Jiisusip sumik ilinniartikkaatigut

“Naggatissaq” pillugu

Suup naggatissaa?

Ajoqersugaasa Jiisusi ima aperaat: “[Suna nalunaaqutaassava] illit tikiunnissannut silarsuullu naggatissaanut?” (Matthæusi 24:3) Jiisusip apeqqut taanna akigamiuk oqanngilaq tamanna nunarsuup naggatissarigaa. ‘Silarsuup naggatissaa’ eqqaareersimavaa oqariartaaserlu politikkikkut, aningaasarsiornikkut upperisarsiornikkullu aaqqissuussaaneq tamaat Saatanimit aqunneqartoq pillugu atorpaa. (Matthæusi 13:22, 40, 49) Jiisusimuna taanna eqqarsaatigigaa ima oqarami: “Naggatissaq nalliutissaaq.” — Matthæusi 24:14.

Naggatissaq nalliuttussaq Jiisusip qanoq eqqaavaa?

Silarsuup naapertuilluanngitsup naggatissaata nalliunnissaa ‘nutaarsiassaavoq nuannersoq’. Jiisusi ima oqarpoq: “[Naalagaaffimmik] nutaarsiassaq nuannersoq tamanna nunarsuarmi inuit najugarisaanni tamarsuarmi oqaluussissutigineqassaaq inuiannut tamanut nalunaajaatitut; taavalu naggatissaq nalliutissaaq.” (NV) Silarsuullu maanna atuuttup naggatissaa ima eqqaavaa: “Taamaanneranimi naalliunnartoqangaassaaq silarsuup pileqqaarneraniit maannamut asseqanngitsumik nalliuteqqinngisaannassasumillu. Ullullu taakku ikilisarneqanngippata ataatsimilluunniit annattoqassanngikkaluarpoq.” — Matthæusi 24:14, 21, 22.

Kikkut suujunnaarsinneqassappat?

Inuit Jehovamik Jiisusimillu asanninnatillu kiffartuussinngitsut kisimik suujunnaarsinneqassapput. Taakku Guuti naalanngilaat. Jiisusi ima oqarpoq: “[Soorlu] Noap ulluini ittoq, taamatuttaaq Inuup Ernerata tikiuffissaa ikkumaarpoq.” Jiisusip eqqartorpaa inuit ulersuup tikiunnissaanik eqqumaffiginninnginnerat. “Aatsaallu paasisaqalerput ulersuaq nalliummat tamaasalu nungutillugit.” (Matthæusi 24:36-39) Jiisusip oqaasii malillugit inuppassuit  aqqummiipput piuneerunneqarfissaminnukartumi. Aammali uppernarsaavigaatigut ‘nerukitsumik inuunermut sammisumik’ aqquteqarneranik. — Matthæusi 7:13, 14.

Silarsuup naggatissaa qaqugu nalliutissava?

Jiisusi aperineqarami tikiunnissaminut “silarsuullu naggatissaanut” nalunaaqutaasussaq pillugu ima akivoq: “[Inuiaat] pikitsitsiumaarput inuiannut, naalagaaffillu naalagaaffimmut, sumilu tamani kaannersuaqartarumaarpoq nunalu sajuttarluni . . . Inatsisaatsuliornerlu ingasatsikkiartussammat asanninneq amerlanerni nillertunngorumaarpoq.” (Matthæusi 24:3-12) Nutaarsiassarpassuit ajortut ullumikkut tusartakkavut tassa qanittukkut ajunngitsunik pisoqarnissaanut takussutissanut ilaapput — Guutip naalagaaffiata eqqissineq inuiannut naalattunut iluaqutaasumik atuutilersitseqqinnissaanut. Jiisusi ima oqarpoq: “Tamakku tamaasa takulerussigit ilisimassavarsi Guutip naalagaaffia qanillisoq.” — Lukasi 21:31.

Qanoq iliortariaqarpit?

Jiisusi oqarpoq Guutip “ernituani [tunniukkaa] taassumunnga uppertoq kinaluunniit tammaqqunagu naassaanngitsumilli inooqqullugu”. (Johannesi 3:16) Guuti erneralu upperfigilerumallugit ilisarisimallualertariaqarpavut. Taamaattumik Jiisusi ima oqarpoq: “[Inuuneq] naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.” — Johannesi 17:3.

Guutimut asanninnerpit ersersinnissaanut ajornartorsiutit isumakuluutillu akornutaateqinagit. Jiisusi ima oqarpoq: “Mianersoritsi uummatisi malussarlersitaaqqunagit . . . [inuunerup] matuma piinik isumakuluutinit, pakasarteqqunasi ullup taassuma tassanngaannaq tikiunneranit nigartuutitut illuni, inuiaammi nunarsuarmi tamarmi najugaqartut tamaasa tikissammagit.” Jiisusip mianersoqqussutaa eqqumaffigigukku ‘pisussat suut tamaasa qimarratigisinnaassavatit’. — Lukasi 21:34-36. (wp09 05/01-E)

Paasissutissat amerlanerusut atuarneqarsinnaapput atuakkami Biibilimi sorpiaat ajoqersuutigineqarpat?-mi kapitalimi 9-mi: “‘Ullussani kingullerni’ inuuvugut” *

[Quppernerup ataani ilanngussaq]