Siumukarnerit takuneqarsinnaatiguk

“Tamakku tamaasa isumaginiakkit inuuseralugillu ineriartornerit [siumukarnerit, NV] tamanit takuneqarsinnaaqqullugu.” — 1 TIMOTHEUSI 4:15.

1, 2. Timotheusip meeraalluni inuunera 20-llu missaannik ukioqartoq inuunerani allanngortoqarnera pillugu sunik ilisimasaqarpugut?

GALATIA Romamiut pigisaanniittoq, ullumikkut Tyrkiap ilaaniittoq, Timotheusip peroriartorfigaa. Sumiiffimmi tamatumani Jiisusip toqunerata kingorna ukiut qulikkuutaat ingerlaneranni ilagiinnik kristumiunik arlalinnik pilersitsisoqarsimavoq. Ilaanni Timotheusip inuusuttup, aamma anaanaata aanaatalu kristumiussuseq pigiliuppaat ilagiillu ilaanni kiffartulerlutik. (2 Timotheusi 1:5; 3:14, 15) Timotheusip avatangiisini nalunngilluakkamini inuusuttutut kristumiutut tamaani inuunini qularnanngitsumik nuannaarutigalugulu nalerisimaarutigaa. Pissutsilli atugai allanngoriasaarput.

² Apustili Paulusi tamaanga aappassaanik tikeraarpoq. Tamatuma nalaani Timotheusi inuusuttuaraanngikkuni immaqa 20-t sinnerlugit ukioqarpoq. Paulusip Lystramiinnerminiugunartoq maluginiarpaa Timotheusi qatanngutini ilagiinni tassaniittuni ‘tusaamasaalluartoq’. (Apustilit Suliaat 16:2, 1936) Timotheusi inuusuttuugaluarluni inersimalluarsimassaqaaq. Taamaattumik anersaap illernartup siulersuineratigut Paulusip utoqqaanertaqatigiillu tassaniittut Timotheusi assamminnik patillugu ilagiinni immikkut ittumik suliassippaat. — 1 Timotheusi 4:14; 2 Timotheusi 1:6.

3. Timotheusi kiffartornermi immikkut ittumik sumik pisinnaatitaaffeqalerpa?

³ Timotheusi suliassamut immikkut ittumut qaaqquneqarpoq — apustili Paulusi angalaqatigisalissavaa! (Apustilit Suliaat 16:3) Takorlooriaruk Timotheusi qanoq tupaallatsigalunilu pissangatigisimassasoq! Ukiuni tulliuttuni Paulusi ilaannikkullu allat angalaqatigisartussaavai, apustilit utoqqaanertallu sinnerlugit assigiinngitsunik suliaqartarlutik. Paulusi Timotheusilu qatanngutit anersaakkut nakussatsissutigingaagaannik angalallutik kiffartorput. (Atuakkit Apustilit Suliaat 16:4, 5). Taamaattumik kristumiorpassuaqarpoq Timotheusip anersaakkut siumukarneranik maluginiaasunik. Ukiut qulit missaanni Timotheusi suleqatigereerlugu apustilip Paulusip ilagiit Filippimiittut ima allaffigai: “Allamimmi [Timotheusitut] isumalimmik taama ilumoortigisumik ilissinnik isumaginnikkumasumik aallartitassaqanngilanga. . . . [Ilisimavarsi] Timotheusip misiligaanini attassimagaa; qitornatut ataataminik ikiuisutut iivangkiiliumut kiffartoqatigisimavaanga.” — Filippimiut 2:20-22.

4. (a) Timotheusi pingaarutilimmik sumik akisussaaffilerneqarpa? (b) Apeqqutit suut Paulusip 1 Timotheusi 4:15-imi allagaanut tunngatillugu pilerpat?

⁴ Paulusip Filippimiunut allannermi nalaani aamma Timotheusi allaffigaa pingaarutilimmik akisussaaffilerlugu — tassa utoqqaanertanik ilagiinnilu kiffartortunik toqqaasussanngortippaa. (1 Timotheusi 3:1; 5:22) Erseqqippoq Timotheusip maanna nakkutilliisutut kristumiutut tatiginartuulersimallunilu akisussaassutsiminik ilisimannilersimanera. Allakkaminili tamatumani Paulusip kajumissaarpaa  ‘ineriartornerminik [siumukarnerminik, NV] tamanit takuneqarsinnaatitseqqullugu’. (1 Timotheusi 4:15) Kisianni Timotheusip siumukarnini takuneqarsinnaatilluariinnginnamiuk? Paulusi taamatut allakkami sunaana pigaa, siunnersuutaalu uagut qanoq iluaqutigisinnaavarput?

Anersaakkut pissuserineqartut qanoq takuneqarsinnaalertartut

5, 6. Suna ilagiit Efesosimiittut anersaakkut minguissusiannik navianartorsiortitsiva, Timotheusillu navianartoq tamanna qanoq akiorsinnaavaa?

⁵ Versit Timotheusimut allakkani siullerni kapitali 4-miittut ataqatigiinneri misissoriartigit. (Atuakkit 1 Timotheusi 4:11-16). Allakkami taakkua allannginneranni Paulusi Makedonialiarsimavoq, Timotheusili qinnuigisimavaa Efesosimiiginnaqqullugu. Sooq? Illoqarfimmi tamatumaniittut ilaat eqqunngitsunik ajoqersuuteqarnermikkut ilagiinnik avissaartuutsitsimmata, Timotheusillu ilagiit anersaakkut minguissusiat illersortussaavaa. Qanoq ililluni taamaaliussagami? Ilaatigut allanut maligassaalluarnermigut.

⁶ Paulusip Timotheusi ima allaffigaa: ‘Uppertunut maligassanngorniarit oqaatsikkut ileqqukkullu asannissutsikkullu uppernikkullu minguissutsikkullu.’ (1936) Imalu nangippoq: “Tamakku tamaasa isumaginiakkit inuuseralugillu ineriartornerit [siumukarnerit, NV] tamanit takuneqarsinnaaqqullugu.” (1 Timotheusi 4:12, 15) Taamatut siumukarneq ilagiinni akisussaaffinninngarnit Timotheusip anersaakkut pissuserisaanut tunngassuteqarneruvoq. Kristumiullu tamarmik anersaakkut pissuserisatigut siumukarnissaq anguniagarisariaqarpaat.

7. Ilagiinniittut tamarmik sumik piumaffigineqarpat?

⁷ Ullumikkut Timotheusip nalaanisut ilagiinni assigiinngitsunik akisussaaffeqartussanngortitaasoqartarpoq. Ilaat utoqqaanertatut ilagiinniluunniit kiffartortutut kiffartorput. Allat pioneriupput. Sulilu allat angalalluni kiffartornermi, Betelini ajoqersuiartortitatulluunniit suliassaqarput. Utoqqaanertat ilinniartitseqataasarput, soorlu ataatsimeersuaararnerni ataatsimeersuarnernilu. Kristumiulli tamarmik — angutit, arnat inuusuttullu — anersaakkut siumukarnermik takuneqarsinnaatinnissaanut periarfissaqarput. (Matthæusi 5:16) Aap, soorlu Timotheusimut tunngatillugu taamaattoq kristumiut immikkut ittunik akisussaaffilerneqarsimagaluartulluunniit piumaffigineqarput anersaakkut pissuserisaminnik tamanit takuneqarsinnaatitsinissamik.

Oqaatsikkut maligassanngorit

8. Oqaloriaaserput Guutimik pallorfiginninnitsinnut qanoq sunniuttarpa?

⁸ Timotheusi ilaatigut oqaloriaatsimigut maligassaalluartussaavoq. Tamatumunnga tunngatillugu siumukarnerput qanoq ililluta takuneqarsinnaatissinnaavarput? Oqaloriaaserput inuttut qanoq ittuunitsinnik ersersitsisarpoq. Jiisusi eqqorluartumik ima oqarpoq: “[Uummatip] ulikkaarutaanik qaneq utsersortarpoq.” (Matthæusi 12:34) Aamma Jiisusip affarmik qatanngutaata Jaakup oqaloriaatsitta Guutimik pallorfiginninnitsinnut sunniuteqangaartarnera miserratiginngilaa. Ima allappoq: “Guutisiortuusorisoq oqqaminilli naalatsitsinani imminik salloqittarpoq; taassuma guutisiornera sussaanngilaq.” — Jaaku 1:26.

9. Suna eqqarsaatigalugu oqaloriaatsitsigut maligassaasariaqarpugut?

⁹ Oqaloriaatsitsigut ilagiinniittut allat paasisinnaavaat anersaakkut qanoq siumukartigisimanersugut. Taamaattumik kristumiut inersimalluartut taqassinartumik, nikallornartumik, isornartorsiuerpaluttumik annernartumilluunniit oqaloriaaseqarnatik allanut ineriartornartuunissartik, allanik tuppallersaasarnissartik, nakussatsitsisarnissartik qiimmassaasarnissartillu sulissutigisinnaavaat. (Ussatit 12:18; Efesosimiut 4:29; 1 Timotheusi 6:3-5, 20) Ileqqussatigut isummatsinnik Guutillu najoqqutassiaanik qutsissunik illersuiumassuserput Guutimut tunniusimanitsinnik ersersitsisinnaavoq. (Romamiut 1:15, 16) Inuit eqqortuliorusuttut qularnanngitsumik oqaloriaatsitsinnik maluginiaassapput immaqalu maligassiatsinnik malinnillutik. — Filippimiut 4:8, 9.

Ileqqukkut minguissutsikkullu maligassaq

10. Sooq piviusumik uppernissaq anersaakkut siumukarnissatsinnut pingaaruteqarpa?

¹⁰ Kristumiu oqaloriaatsimigut ineriartornartuunermigut maligassaaginnassanngilaq. Inuk  eqqortut iliuuserinagit eqqortumik oqalukkuni ilumoortuusaassaaq. Paulusip farisiiarit ilumoortuusaarnerat ilumoortuusaarneratalu qanoq ajoqusiitiginera nalunngilluarpaa. Ataasiarnani Timotheusi taamatut pisuusaarnermut ilumoortuusaarnermullu mianersoqquaa. (1 Timotheusi 1:5; 4:1, 2) Timotheusili ilumoortuusaanngilaq. Paulusi taassumunnga allakkami aappaanni ima allappoq: “[Puiorsimanngilara] piviusumik uppernerit.” (2 Timotheusi 1:5) Taamaakkaluartorli Timotheusip kristumiutut ilumoornerminik allanit takuneqarsinnaatitsinissaa pingaaruteqarpoq. Ileqqumigut maligassiuisariaqarpoq.

11. Paulusip Timotheusi pisuussutit pillugit qanoq allaffigaa?

¹¹ Paulusi Timotheusimut allakkamini marlunni kajumissaaruterpassuaqarpoq. Assersuutigalugu Timotheusi pisuussutinik noqqaassuteqarnaveersaartariaqarpoq. Paulusi ima allappoq: “[Aningaaserituujuneq] ajortunut tamanut sorlaavoq; tamatumannga pileritsatsitaallutik inuit ilaat uppernerminnit tunussisitaasarput taamalu imminnut amerlasuunik erloqissutissiorlutik.” (1 Timotheusi 6:10) Aningaaserituujuneq anersaakkut ajoquteqarnermut ersiutaavoq. Kristumiulli pilimanianngitsumik inuunerminnik naammaginnittut, ‘nerisassaqarlutillu atisassaqartut’, anersaakkut siumukarnertik erseqqissumik takuneqarsinnaatittarpaat. — 1 Timotheusi 6:6-8; Filippimiut 4:11-13.

12. Siumukarnerput inuunitsinni qanoq takuneqarsinnaatissinnaavarput?

¹² Paulusip Timotheusimut eqqaavaa arnat kristumiut ‘isornaatsunik perroorniutaanngitsunillu atisaqartarnissaata’ qanoq pingaaruteqartiginera. (1 Timotheusi 2:9) Arnat atisalersoriaatsimikkut nujaleriteriaatsimikkullu, inuunerminnilu allatigut, anneruniajuillutillu isumakkut peqqissuusut maligassaalluarput. (1 Timotheusi 3:11) Angutinut kristumiunut tunngatillugu aamma taamaappoq. Paulusip nakkutilliisut eqqaasippai ‘ingasaassinaveersaartooqqullugit, silatusaartooqqullugit, pissuserissooqqullugit’. (1 Timotheusi 3:2) Ulluinnarni pissuserineqartussat tamakku ersersittarutsigit siumukarnerput tamanit takuneqarsinnaassaaq.

13. Uagut Timotheusip pisimaneratut minguissutsikkut qanoq ililluta maligassaasinnaavugut?

 ¹³ Timotheusi aamma minguissutsikkut maligassaasussaavoq. Oqaatsip tamatuma atorneratigut Paulusip immikkut ittoq erseqqissarpaa, tassa kinguaassiuutitigut ileqqussaq. Ingammik Timotheusip arnanik peqateqartarnermini ileqqui isornaatsuusariaqarput. “Arnat utoqqaat anaanagisutut arnallu inuusuttut qatanngutigisutut” pisussaavai, ‘tamatigut minguitsuulluni’. (1 Timotheusi 4:12; 5:2) Allaat inuunerluttuliornerit isertugaasorisaagaluit Guutip ilisimavai, naggataatigullu aamma inunnit paasineqarumaarput. Aammali kristumiup ajunngitsuliai isertorneqarsinnaanngillat. (1 Timotheusi 5:24, 25) Ilagiinniittut tamarmik ileqqumikkut minguissutsimikkullu siumukarnertik allanit takuneqarsinnaatissinnaavaat.

Asanninnerup uppernerullu pingaaruteqassusiat

14. Biibilimi qanoq erseqqissarneqarpa asannittuliorfigeqatigiittariaqartugut?

¹⁴ Asanninneq kristumiussutsimi ilumoortumi pingaaruteqarpoq. Jiisusip ajoqersukkani ima oqarfigai: “Asaqatigiikkussi tamatumuuna tamarmik paasissavaat ajoqersugarigissi.” (Johannesi 13:35) Asanninneq tamanna qanoq ililluta ersersissinnaavarput? Guutip oqaasiani ilungersortumik kajumissaarneqarpugut ‘asaqatigiinnikkut immitsinnut kamageqatigeeqqulluta, immitsinnut ajunngitsuliorfigeqqulluta nallittueqqullutalu, isumakkeerfigeqatigiittaqqullutalu’. (Efesosimiut 4:2, 32; Hebræerit 13:1, 2) Apustili Paulusi ima allappoq: “Qatanngutigiittut asaqatigiillusi ungageqatigiigitsi.” — Romamiut 12:10.

15. Sooq kikkut tamarmik, ingammillu nakkutilliisut kristumiut, asanninnermik ersersitsinissaat pingaaruteqarpa?

¹⁵ Timotheusi uppeqatiminut kristumiunut sakkortullunilu inussiarniissimasuuppat, tamanna ilinniartitsisutut nakkutilliisutullu suliaanut ajunngitsunut akornutaasimassagaluarpoq. (Atuakkit 1 Korinthimiut 13:1, 2). Timotheusilli qatanngutiminik ilumoortumik asanninnera, ilassiortuunera ajunngitsuliaalu anersaakkut ineriartorneranik tamanit takuneqarsinnaatitsipput. Taamaattumik naleqquppoq apustilip Paulusip Timotheusimut allakkamini asanninneq pissuserineqartussat ilaattut Timotheusip maligassiuiffigisariaqagaatut immikkut eqqaammagu.

16. Sooq Timotheusi upperluartariaqarpa?

¹⁶ Timotheusip uppernera Efesosimiinnerani misilinneqarpoq. Ilagiinniittut ilaat kristumiussusermi sallusuissummut naapertuutinngitsunik ajoqersuuteqarput. Allat “oqaluttuatoqqanik”, imaluunniit salluliuutinik, siaruarteripput ilagiilluunniit anersaakkut peqqissusiannut iluaqutaanngilluinnartunik misissuillutik. (Atuakkit 1 Timotheusi 1:3, 4). Paulusip inuit taamaattut ‘anneruniartutut sumilluunniillu paasinninngitsutut oqallinnernilu assortuunnernilu peqataajumasartutut’ allaatigai. (1 Timotheusi 6:3, 4) Timotheusip eqqarsaatit isummallu ajoqutaasut ilagiinnut eqqunneqalersut imminut navianartorsiortilluni eqqarsaatigerusaassavai? Naamik, Paulusimmi kajumissaarpaa ‘uppernerup sorsunnera ajunngitsoq sorsuutigeqqullugu’ (NV) tunoqqullugillu “oqalunneq iluaatsoq piunngitsorlu akerliliissutillu ilisimasaqarnermit eqqunngitsumik taama taaneqartartumit pisut”. (1 Timotheusi 6:12, 20, 21) Qularnanngitsumik Paulusip siunnersuutai pitsaasut Timotheusip malippai. — 1 Korinthimiut 10:12.

17. Ullumikkut uppernerput qanoq misilinneqarsinnaava?

¹⁷ Soqutiginarpoq Timotheusi paasitinneqarmat “ullussani kingullerni inuit ilaat uppernermik tunussiumaartut, tassa naalakkamikkit anersaat tammartitsisut anersaapiluillu ajoqersuutaat”. (1 Timotheusi 4:1) Ilagiinniittut tamarmik, aamma akisussaaffillit, Timotheusip pisimaneratut aalajaatsumik upperluarnertik ersersittariaqarpaat. Aalajangiusimanninnikkut iliuuseqarlutalu  tunussisut eqqarsaataannik ingalassimanninnikkut siumukarnerput allanit takuneqarsinnaatissinnaavarput uppernikkullu maligassiuilluta.

Siumukarnerpit takuneqarsinnaanissaa sulissutigiuk

18, 19. (a) Siumukarnerit qanoq ilillutit tamanit takuneqarsinnaatissinnaaviuk? (b) Allaaserisami tulliuttumi suna sammineqassava?

¹⁸ Kristumiup anersaakkut siumukarnera isikkuanut, inunnguuserisamik piginnaasaanut imaluunniit qanoq nuimatigineranut attuumassuteqanngilaq. Aamma ukiuni qanoq amerlatigisuni ilagiinni kiffartorsimanera anersaakkut siumukarneranut aalajangiisuunngilaq. Anersaakkut ilumoortumik siumukarnerput eqqarsaatikkut, oqaloriaatsikkut ileqqutsigullu Jehovamut naalattuunitsigut ersertarpoq. (Romamiut 16:19) Asaqatigiinnissamik upperlualernissamillu sulissutiginninnissamik peqqussut malillugu iliortariaqarpugut. Aap, Paulusip Timotheusimut allagai eqqarsaatigeqqissaartigit siumukarnerput tamanit takuneqarsinnaaqqullugu.

¹⁹ Pissuserineqartussaq alla anersaakkut ineriartornermut kristumiutullu inersimassusermut ilaasoq tassaavoq nuannaarneq, Guutip anersaavata illernartup inerititaata ilaa. (Galatiamiut 5:22, 23) Allaaserisami tulliuttumi ajornartorsiungaarfinni nuannaarneq qanoq ililluta ineriartortillugulu attassinnaaneripput sammineqassaaq.

Qanoq akissavit?

• Allat oqaloriaatsitsigut uagut pilluta suna paasisinnaavaat?

• Ileqqukkut minguissutsikkullu siumukarnerput qanoq ililluta takuneqarsinnaatissinnaavarput?

• Sooq kristumiut asanninnikkut uppernikkullu maligassaasariaqarpat?

[Atuaqqissaarnermi apeqqutit]

[Qupp. 11-mi assiliartaq]

Timotheusi inuusukkaluaqaluni inersimalluarpoq

[Qupp. 13-mi assiliartat]

Siumukarnerit allanit takuneqarsinnaava?