Ersersiguk Kristusimut ajoqersugaallutit ilumoortoq

“Orpik ajunngitsoq sunaluunniit ajunngitsunik inerititaqartarpoq orpillu ajortoq ajortunik inerititaqartarluni.” — MATTHÆUSI 7:17.

1, 2. Ingammik naggatissap nalaani Kristusimut ajoqersukkat ilumoortut ilumuunngitsunit suna allaassutigaat?

JIISUSI oqarpoq kristumiut ilumuunngitsut ajoqersukkaminit ilumoortunit inerititamikkut — tassa ajoqersuutimikkut ileqqumikkullu — allaassuteqartut. (Matthæusi 7:15-17, 20) Aap, inuit isumaminnut uummatiminnullu immiussaminnit pinngitsooratik sunnertissimapput. (Matthæusi 15:18, 19) Upperisarsiornikkut eqqunngitsunik immersortartut ‘ajortunik inerititaqartarput’, sallusuissutilli anersaakkut ittut pillugit ilinniartut ‘ajunngitsunik inerititaqartarput’.

² Inerititat assigiinngitsut marluk taakku naggatissap nalaani erseqqissumik takuneqarsinnaalersimapput. (Atuakkit Danieli 12:3, 10). Kristumiut ilumuunngitsut Guutimut mumingasumik isiginnittaaseqarput amerlanertigullu ilumoortuusaarlutik Guutimut tunniusimallutik, anersaakkulli paasisimasaqartut “anersaakkut ilumoornikkullu” Guutimik pallorfiginnipput. (Johannesi 4:24; 2 Timotheusi 3:1-5) Anersaakkut paasisimasaqartut kristumiutut pissuserineqartussanik ersersitsiniartarput. Illimmi? Kristumiut ilumoortut ilisarnaataat sammilikkavut eqqarsaatigitillugit imminut ima aperigit: ‘Ileqquma allanullu ilinniartitsissutigisartakkama Guutip oqaasianut naapertuunnerat erseqqippa? Sallusuissut tamatuminnga ujaasisunut nuannerunarsitittarpara?’

Guutip oqaasia malillugu inuugit

3. Jehovap suna iluaraa, tamannalu kristumiunut ilumoortunut qanoq sunniuteqarpa?

³ Jiisusi ima oqarpoq: “Imaanngilaq kinaluunniit uannut oqartoq: Naalagaq, Naalagaq! Qilaap Naalagaaffianut isissasoq, Ataatamali qilanniittup piumasaanik iliortoq kisimi.” (Matthæusi 7:21) Aap, Jehovap iluarisaa tassaanani kristumiut upperisaannik nassuerutiginninneq tassaavoq tamanna malillugu inuuneq. Kristusimut ajoqersukkanut ilumoortunut upperisaq inooriaatsimut tamarmut attuumassuteqarpoq, aamma aningaasanut, suliffimmut aliikkutassanullu, silamiut ileqquinut nalliuttuinullu aamma aappariinnermut inoqatinullu allatigut attaveqarnermut isiginnittaatsimut. Kristumiulli ilumuunngitsut silarsuarmi eqqarsartaaserineqarlutillu ileqqorineqartut ulluni kingullerni makkunani guutiitsuussutsimik ersersitsinerujartuinnartut pigiliuttarpaat. — Tussiaat 92:8.

4, 5. Jehovap Malaki 3:18-imi oqaasiinut naapertuuttumik qanoq ililluta inuusinnaavugut?

⁴ Tamatumunnga naapertuuttumik pruffiiti Malaki ima allappoq: “Kingumut immikkoortissinnaanngussavarsi iluartoq iluanngitsumit, tassa Guutimik kiffartuussisoq kiffartuussisuunngitsumit.” (Malaki 3:18) Oqaatsit taakku eqqarsaatigitillugit imminut ima aperigit: ‘Inuit silarsuarmiittut assigaakka, imaluunniit taakkunannga allaassuteqarpunga? Atuarfimmi suliffinniluunniit ulluinnarni ilagisartakkannut silamiunut akuereqqusaarniarsariuaannarpunga, imaluunniit najoqqutassianut Biibilimeersunut tunngatillugu aalajaappunga piffissaalluaraangallu taakku illersortarlugit?’ (Atuakkit 1 Petrusi 3:15, 16). Soorunami imminut iluartuutikkusunngilagut, Jehovamilli asanninnatillu taassumunnga kiffartunngitsunit allaanerusariaqarpugut.

⁵ Tamatumunnga tunngatillugu pitsanngorsaasariaqarsoriguit, taava tamanna pillugu Jehovamut qinugit anersaakkullu nakussatsinneqarnissat noqqaassutigalugu qinunikkut, ataatsimiinnerni peqataasarnikkut aalajangersimasumillu Biibilimik atuaqqissaartarnikkut. Guutip oqaasianut naapertuuttumik inuunerujartortillutit ‘ajunngitsunik inerititaqarnerujartussaatit’, ilaatigut “qarlut [Guutip] aqqanik nassuerutiginnittut inerititaannik”. — Hebræerit 13:15.

 Guutip naalagaaffia oqaluussissutigiuk

6, 7. Guutip naalagaaffianik tusarliussaq eqqarsaatigalugu kristumiut ilumoortut ilumuunngitsullu suna assigiinngissutigaat?

⁶ Jiisusi ima oqarpoq: “Guutip naalagaaffianik iivangkiiliu illoqarfinni allanissaaq tusarliussassaraara; tamanna pillugu aallartitaavunga.” (Lukasi 4:43) Sooq Jiisusip oqaluussinermini Guutip naalagaaffia pingaarnersaatippaa? Nalunnginnamiuk naalagaaffimmi tamatumani kunngisut, qatanngutini makititaasimasut anersaakkut kinguaassiarititaasut peqatigalugit, inuit ajornartorsiutaannut aliasuutaannullu pissutaasorpiaat — ajorti Diaavululu — peerumaarlugit. (Romamiut 5:12; Saqqummersitat 20:10) Taamaattumik ajoqersukkani peqquai naalagaaffimmik tamatuminnga oqaluussissutiginneqqullugit silarsuup matuma aaqqissuussaanerata naggatissaa tikillugu. (Matthæusi 24:14) Inuit oqaannartartut Kristusimut ajoqersugaanerarlutik suliaq tamanna suliarinngilaat — suliarisinnaanngilaat. Sooq? Tamanna minnerpaamik pingasunik pissuteqarpoq: Siullermik, paasinngisaminnik oqaluussissutiginnissinnaanngillat. Aappassaanik, taakkua amerlanersaat Guutip naalagaaffia pillugu tusarliussamik allanut oqaluussissutiginninnerup kingunerisartagaanik mitaatigineqarnissamut akerlilersorneqarnissamullu pisariaqartumik maniguussuseqarnatillu sapiissuseqanngillat. (Matthæusi 24:9; 1 Petrusi 2:23) Pingajussaanillu, kristumiut ilumuunngitsut Guutip anersaavanit najorneqanngillat. — Johannesi 14:16, 17.

⁷ Kristusimulli ajoqersukkat ilumoortut Guutip naalagaaffia suunersoq tamannalu sunik naammassisaqarumaarnersoq paasivaat. Aamma Guutip naalagaaffiata soqutigisai inuunerminni pingaarnerpaatippaat Jehovallu anersaavata ikiuineratigut silarsuarmi tamarmi oqaluussissutigisarlugit. (Zakaria 4:6) Illit oqaluusseqataajuarpit? Guutip naalagaaffianik oqaluussissutiginnittartutut pikkorinnerulerniarsarivit, immaqa oqaluussinermut piffissaqarneruniarnikkut sunniuteqarluarnerusumilluunniit oqaluussiniarnikkut? Ilaasa oqaluussinertik pitsaanerulersinniarsimavaat Biibilimik atuillaqqinnerulerniarnermikkut. Apustili Paulusi Allakkat atorlugit eqqarsalersitsiniarluni oqaloqateqartartoq ima allappoq: “Guutip oqaasia uumavoq sunniisinnaassuseqarlunilu.” — Hebræerit 4:12; Apustilit Suliaat 17:2, 3.

8, 9. (a) Pisimasuni suni oqaluussinermi Biibilimik atuinerup pingaaruteqassusia erseqqissarneqarpa? (b) Guutip oqaasianik atuinermut qanoq pikkorinnerulersinnaavugut?

⁸ Qatanngutip angutip illumiit illumut angalaartup Danieli 2:44-mi allassimasut angummut katuuliusumut takutippai nassuiaallugulu Guutip naalagaaffia piviusumik eqqissineqalersitsiumaarlunilu toqqissisimalersitsiumaartoq. Angut taanna ima oqarpoq: “Qujanaq tamanna pillugu oqaluttuutiinnarnanga Biibilimi allassimasut uannut takutikkakkit.” Qatanngutip angutip arnaq ilagiinnut grækerinut upperluarniartunut ilaasoq allassimaffimmik atuffammagu, taanna apersoqattaarpoq. Aamma pisimasumi tamatumani qatanngutip angutip nuliani ilagalugu arnap apeqqutaasa akiniarneranni Biibili atorpaa. Kingusinnerusukkut arnaq taanna ima oqarpoq: “Nalunngilisiuk sooq oqaloqatigerusukkissi? Biibili nassarlugu aggerassi tassanngalu atuarlusi.”

⁹ Soorunami atuagaativut atuagassiaativullu pingaaruteqangaarput neqeroorutigineqartariaqarlutillu. Biibilili atortutta pingaarnersaraat. Taamaammat oqaluussinermi Biibilimik atuineq sungiusimanngikkukku tamatuma atortarnissaa anguniagarisinnaavat. Immaqa allassimaffinnik pingaarnernik Guutip naalagaaffiata suuneranut  naalagaaffiullu tamatuma ajornartorsiutinik inuit angalaarfigisartakkatsinniittut isumakuluutigisaannik qanoq aaqqiiumaarneranut nassuiaataasunik toqqaasinnaavutit. Tamatuma kingorna matumiit matumut oqaluussigaangavit taakkua atuartarnissaannut piareersimagit.

Guutip aqqanik taaguuteqarneq tulluusimaarutigiuk

10, 11. Guutip aqqanik atuineq eqqarsaatigalugu Jiisusip taassuminngalu malinninneraasorpassuit suna assigiinngissutigaat?

¹⁰ “Ilissi ilisimannitsigaassi [nalunaajaasuuvusi uannut, NV], oqarpoq [Jehova], uanga tassa Guuti.” (Esaja 43:12) Jehovap nalunaajaasuisa nuimanersaata, Jiisusip Kristusip, Guutip aqqanik taaguuteqarneq tamatuminngalu oqaluussissutiginninneq ataqqinaatitut isigai. (Atuakkit 2 Mosesi 3:15; Johannesi 17:6; Hebræerit 2:12). Aap, Jiisusi ‘nalunaajaasumik tatiginartumik’ taaneqarpoq Ataatami aqqa oqaluussissutigigamiuk. — Saqqummersitat 1:5; Matthæusi 6:9.

¹¹ Inuppassuilli Guutimut erneranullu sinniisuunerartut Guutip aqqanut ataqqinninngitsuliortarsimapput allaallu Biibilimik nutsikkaminni aqqa peersimallugu. Isiginnittaatsimut tamatumunnga assingusumik, biskoppinut katuuliusunut qanittukkut malittarisassiami allassimavoq naalagiartitsinerup nalaani “Guutip aqqa tetragrammimik JHWH-mik allanneqarsimasoq atorneqassananilu oqaatigineqassanngitsoq”. * Eqqarsartaatsip tamatuma assuarnassusia!

12. Jehovap kiffaasa Jehovamut atassuteqarnerat 1931-mi qanoq ililluni erseqqinnerulerpa?

¹² Kristumiut ilumoortut Kristusimik ‘nalunaajaasunillu amerlasuunik’ taanna sioqqullugu inuusunik ilaarsipput Guutip aqqanik taaguuteqarnerminnik tulluusimaarutiginninnermikkut. (Hebræerit 12:1) 1931-mi Guutip kiffaasa Jehovamut atassuteqarnerat suli erseqqinnerulerpoq taakku Jehovap Nalunaajaasuinik taaguuteqalermata. (Atuakkit Esaja 43:10-12). Taamaalillutik Kristusimut ajoqersukkat ilumoortut inuianngorput ‘Guutip aqqanik taagorneqartut’ (NV). — Apustilit Suliaat 15:14, 17.

13. Guutip aqqanik taaguuteqartunut piumasaqaataasut qanoq ililluta eqqortissinnaavavut?

¹³ Guutip aqqanik taaguutilinnut piumasaqaataasut tamatta immikkut qanoq ililluta eqqortissinnaavavut? Aalajaalluta Jehova pillugu nalunaajaasariaqarpugut. Paulusi allappoq ‘kinaluunniit Jehovap aqqanik torlorfiginnittoq annaanneqassasoq’. “Qanorli ilillutik upperfigilersimanngisartik torlorfigissavaat? Qanoq ilillutik tusarsimanngisartik upperfigissavaat? Qanoq ilillutik tusassappat oqaluussisoqanngippat? Qanoq ililluni oqaluussisoqarsinnaava aallartitaanngitsumik?” (Romamiut 10:13-15) Aamma periaaserilluta qulaartariaqarpavut upperisarsiornikkut salluliuutit Pinngortitsisumik isiginerluititsisut, soorlu anniarfimmik ikualasumik ajoqersuut, ajoqersuut Guutimik asannittumik naakkittaatsuuneraasoq, uffa naakkittaatsuuneq Diaavulup ilisarnaatigigaa. — Jeremia 7:31; 1 Johannesi 4:8; naleqqiutikkit Markusi 9:17-27.

14. Inuit ilaat Guutip nammineq atia paasigamikku qanoq qisuariarsimappat?

¹⁴ Illit Ataatavit qilammiusup aqqanik taaguuteqarnerit tulluusimaarutigaajuk? Allat atermik illernartumik tamatuminnga ilisimannilernissaannut ikiortarpigit? Arnap Parisimiittup tusarsimavaa Guutip aqqa Jehovap Nalunaajaasuisa nalunngikkaat, Jehovamullu nalunaajaasoq naapitani tulliuttoq qinnuigaa ateq nammineq Biibiliutimini takuteqqullugu. Tussiaat 83:19 atuaramiuk tamanna qamuuna attorneqaatigingaarpaa. Biibilimik atuaqqissaartalerpoq maannalu qatanngutaalluni aalajaatsoq nunami allami kiffartortoq. Katuullip Australiamiup Guutip aqqa Biibilimi takoqqaaramiuk nuannaarnermit qiavoq. Taanna maanna ukiorpassuarni pioneriusimavoq. Aamma Jehovamut nalunaajaasut Jamaicamiittut qanittukkut Guutip aqqa arnamut taassuma nammineq Biibiliani takutikkamikku, aamma taanna nuannaarnermit qiavoq. Tassa Guutip aqqanik taaguuteqarnerit Jiisusillu pisimaneratut atermik erlinnartumik tamatuminnga nalunaajaatiginninnerit tulluusimaarutigisinnaavat.

‘Silarsuaq asaniaqinasiuk’

15, 16. Kristumiut ilumoortut silarsuaq qanoq isigaat, imminullu qanoq aperisariaqarpugut?

¹⁵ “Silarsuaq taassumaluunniit pii asaniaqinasigit. Silarsuarmik asannittup Ataatap asanninnera immini piginngilaa.” (1 Johannesi 2:15) Silarsuaq  tamatumanilu eqqarsartaaseq isiginnittaaserlu uinimmut atasut Jehovamut anersaavanullu illernartumut akerliupput. Tamanna pissutigalugu Kristusimut ajoqersukkat ilumoortut silarsuarmut ilaanaveersaaginnaratik taanna asajumanngilaat, nalunngilaammi ‘silarsuarmut ikinngutaajumasoq Guutimut akeranngortartoq’, soorlu ajoqersugaq Jaaku taama allassimasoq. — Jaaku 4:4.

¹⁶ Silarsuarmi kisissaanngitsunik ussernartulimmi Jaakup oqaasiinik maleruaanissaq unamminiarnarsinnaavoq. (2 Timotheusi 4:10) Taamaattumik Jiisusip ajoqersukkani qinnuppai imalu oqarluni: “Qinnutinngilakka silarsuarmit peerseqqullugit, ajortorli pissutigalugu paareqqullugit. Silarsuarmut ilaanngillat, soorlu uanga silarsuarmut ilaanngitsunga.” (Johannesi 17:15, 16, NV) Imminut ima aperigit: ‘Silarsuarmut matumunnga ilaannginnissara ilungersuutigaara? Nalliuttut ileqqullu Biibilimut naapertuutinngitsut, imaluunniit Guutimik nalusunit immaqa aallaaveqanngikkaluarlutik erseqqissumik silarsuup anersaavanik ersersitsisut qanoq isumaqarfiginerikka allat nalunngilaat?’ — 2 Korinthimiut 6:17; 1 Petrusi 4:3, 4.

17. Eqqortuliorusuttut suna pissutigalugu Jehovamik aalajangiussisinnaappat?

¹⁷ Aalajangiussavut Biibilimik tunngaveqartut silarsuarmi nuannarineqaatiginngilluinnarpavut, immaqali inuit eqqortuliorusuttut alapernaalissutigissavaat. Taakkua upperisarput Biibilimik tunngaveqarluartoq inooriaatsitsinnullu tamarmut sunniuteqartoq maluginiarunikku imaassinnaavoq tamanna periarfigigaat tanitanut ima oqarlutik: “Ingerlaqatigissavassi tusaratsigu Guutip najoraasi.” — Zakaria 8:23.

Kristumiutut ilumoortumik asannittuliorit

18. Jehovamut tullermullu asannittuliornermut suut ilaappat?

¹⁸ Jiisusi ima oqarpoq: “[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit”, aamma “tullit ilittut asassavat”. (Matthæusi 22:37, 39) Asanninneq tamanna (grækerisut agaʹpē) tassaavoq asanninneq ileqqussatigut eqqortunik tunngavilik akisussaassuseqarnermut, najoqqutassianut ileqqussaasunullu attuumassuteqartoq. Misigissutsinulli sakkortuunut atassuteqarajuppoq, aamma misigissusiusinnaavoq qamannga pisoq. (1 Petrusi 1:22) Asanninnerup tamatuma namminissarsiorneq akerlerluinnaraa, oqaatsitigummi iliuutsitigullu namminissarsiunngitsutigut ersersinneqartarpoq. — Atuakkit 1 Korinthimiut 13:4-7.

19, 20. Pisimasut kristumiutut asanninnerup qanoq sunniuteqartigisinnaaneranik ersersitsisut oqaluttuarikkit.

 ¹⁹ Asanninneq Guutip anersaavata inerititaraa, taamaattumillu kristumiut ilumoortut allat iliuuserisinnaanngisaannik iliuuseqarsinnaanngortittarpai, assersuutigalugu ammip qalipaataatigut, kulturikkut politikkikkullu assigiinngissutinik ajugaaffiginnissinnaanngortittarlugit. (Atuakkit Johannesi 13:34, 35; Galatiamiut 5:22). Sallusuissummik ujartuisut taamatut asaqatigiittoqarnera takugaangamikku killinneqangaartarput. Juuteq inuusuttoq Israelimi kristumiut ataatsimiinnerannut najuuteqqaarami uppeqatigiit juutiusut Arabiamiullu Jehovamik pallorfiginneqatigiinnerat tupigusuutigaa. Tamanna ataatsimiinnernut najuuttuaannalerneranik Biibilimillu atuaqqissaaqatigineqarumanerminut akuersineranik kinguneqarpoq. Illit qatanngutit taamatut qamannga pisumik asannittuliorfigisarpigit, aamma nutaat inuiaassusiat, amiisa qalipaataat innuttaaqatigiinniluunniit inissisimaffiat apeqqutaatinnagit naalagaaffilersaarfissinni tikilluaqquniarlugit iliuuseqartarpit?

²⁰ Kristumiuugatta ilumoortut kikkut tamaasa asannittuliorfiginiartarpavut. El Salvadorimi oqaluussisartup inuusuttup arnaq katuuleq 87-inik ukiulik ilagiinnut katuullinut atassuteqartupilussuaq Biibilimik atuaqqissaaqatigisarpaa. Ilaanni arnaq taanna perululerpoq napparsimmavimmullu unitsitaalluni. Angerlartinneqarmat oqaluussisartut pulaartarpaat nerisassaanillu pajuttarlugu. Qaammatip ataatsip ingerlanerani taamaaliortuarput. Arnaq taanna ilagiinnit atassuteqarfigisamineersunit pulaarneqanngilaq. Tamanna qanoq kinguneqarpa? Taassuma assiliaatini inuusaliaatinilu upperisarsiornermut tunngassuteqartut eqqarpai, oqaluffimmit ilaasortaajunnaarluni Biibilimillu atuaqqissaartaleqqilluni. Aap, kristumiutut asannittuliorneq sunniuteqangaartarpoq! Tassami oqaluussinerinnarminngarnit inunnik iliuuseqarusulersitsinerusarpoq.

21. Siunissarput qanoq ililluta isumannaarsinnaavarput?

²¹ Qanittukkut Jiisusip kristumiut ilumuunngitsut tamaasa ima oqarfigissavai: “Ilisarisimanngisaannarpassi. Nigorsinga, ilissi inatsisinik unioqqutitsisuususi!” (Matthæusi 7:23) Taamaattumik Ataatamut Ernermullu ataqqinaataasunik inerititaqarta. Jiisusi ima oqarpoq: “Kialuunniit oqaaserisannik tamakkuninnga tusartup maleruaasullu assigissavaa angut silatooq qaarsumi illuliortoq.” (Matthæusi 7:24) Aap, ersersikkutsigu Kristusimut ajoqersugaalluta ilumoortut Guutimit iluarisaalersinnaavugut, siunissarpullu qaarsumut tunngavilerneqarsimasutut isumannaatsigissaaq!

[Quppernerup ataani ilanngussaq]

Eqqaamavigit?

• Kristusimut ajoqersukkat ilumoortut ilumuunngitsunit suna allaassutigaat?

• ‘Inerititanik’ kristumiut ilumoortut ilisarnaatigisaannik eqqaasaqarit.

• Kristumiutut inerititaqarnermut tunngatillugu sunik imminut anguniagassissinnaavit?

[Atuaqqissaarnermi apeqqutit]

[Qupp. 19-mi assiliartaq]

Oqaluussinermi Biibilimik atuisarneq sungiusimaviuk?

[Qupp. 21-mi assiliartaq]

Allat nalunngilaat nalliuttut Biibilimik tunngaveqanngitsut qanoq isumaqarfigineritit?