“Qanoq sivisutigisumik kappialassanerpunga?”

“Anniarunnaarusuinnarpunga!” Jayne qialluni oqarpoq. Kræftimik nappaateqarpoq, nappaallu timaanut tamarmut siaruaakkiartorpoq. Ilaqutaasa ikinngutaasalu kissaatigigaluarpaat nappaataarullunilu naalliuutaarunnissaa! Guutimut qinupput ikioqqullugu. Taanna tusarnaarusuppa? Jayne soqutigaa?

GUUTIP inuit qanoq atugaqarnersut nalunngilaa. Oqaasiani, Biibilimi, ima allassimavoq: “Pinngortitat tamarmik suli peqatigiillutik anersaarulullutillu [nimaarput].” (Romamiut 8:22) Guutip nalunngilaa inuit hundrede millionillit Jaynetut ullut tamarluinnaasa timikkut, misigissutsikkut isummakkulluunniit naalliuuteqartartut. Inuit 800 millionit unnuit tamaasa kaallutik innartartut, millionillillu allat angerlarsimaffimminni nakuuserfigineqartartut angajoqqaarpassuillu qitornamik siunissaannik atugarissaarnissaannillu isumakuluuteqartut takusarpai. Eqqarsaatiginikuuiuk Guuti ajornartorsiutinik tamakkuninnga aaqqiiniarluni iliuuseqarumaarnersoq? Asasatsinnik ikiuerusussuseqaratta, qularnanngilluinnarpoq Guuti inunnik, pinngortitaminik, ikiuerusussuseqassasoq, ilaa?

Tamakkununnga assingusunik eqqarsaateqartarsimaguit, kisimiinngilatit. Ukiut 2600-nit amerlanerusut matuma siorna angut uppertoq Habakkukimik atilik ullumikkut inuppassuit misiginerattut misigivoq, taassumalu Guuti ima aperaa: “[Jehova], qanoq sivisutigisumik kappialassanerpunga ilinnit tusarneqarnanga? Qanoq sivisutigisumik nilliassutigissanerpakka nakuusernerit ilinnit annaanneqarnanga? Sooq iluaatsuliorfigineqarnermik misigisaqartippinga perlutsitaaneralu isiginnaaginnarlugu?” (Habakkuki 1:2, 3) Pruffiiti hebræeriusoq Habakkuki nalimini peqqarniitsumik nakuusernernut saassussinernullu tupannartunut takunnittuuvoq. Iliuutsit taama ittut ullumikkut nalinginnaapput inuit misigittartuusut amiilaarutigisaat.

Jehovap Habakkukip isumakuluutai soqutaanngitsutut isigai? Naagga. Habakkukip ilumoorluni apeqqutaa tusarnaariarlugu tuppallersarpaa qiimmassarlugulu. Jehovap naalliuutit tamaasa atuukkunnaarsikkumallugit neriorsuilluni taassuma uppernera nakussatsippaa. Neriuut Guutimeersoq Jaynemut ilaqutaanullu tuppallersaataallunilu nakussatsissutaavoq, aamma ilinnut tuppallersaataallunilu nakussatsissutaasinnaavoq. Allaaserisami tulliuttumi apeqqutit uku akineqassapput: Qanoq ililluta qularinngissinnaavarput Guutip ilumut isumassoraatigut? Guuti naalliuutit atuukkunnaarsinniarlugit qanoq iliussava, aamma qaqugu?