Silarsuaq tamakkerlugu ajornartorsiut — Silarsuaq tamakkerlugu aaqqiissutissaq

SUMI tamaani inunnik naalliuttoqarpoq, amerlasuullu misiginneqataangaarnertik ikiuiniarnikkut ersersittarpaat. Assersuutigalugu nakorsat peqqissaasullu napparsimasunik ikilerneqarsimasunillu ikiuiniarlutik nalunaaquttap-akunnerpassuini sulisarput. Qatserisartut, politiit, inatsisartut, annaassiniartartut ikiuiniartartullu inuit allat anniaataannik nipaallisitsiniartarput annialersitsinaveersaartarlutilluunniit. Iliuuseqarnerit taama ittut inunnit ataasiakkaanit iluaqutigineqangaartarput, inuilli ataasiakkaat peqatigiiffiilluunniit silarsuarmi naalliuutinik atuukkunnaarsitsilluinnarsinnaanngillat. Guutili silarsuaq tamakkerlugu aaqqiisinnaallunilu aaqqiiumaarpoq.

Tamatumunnga tunngatillugu Biibilip atuagartaani kingullermi ima neriorsoqqissaarneqarpugut: “[Guutip qulliit] tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.” (Saqqummersitat 21:4) Eqqarsaatigiuk neriorsuut tamanna inunnit qassinit misigineqassanersoq. Guutip siunertaa — naalliuutinik tamanik atuukkunnaarsitsiumaarnera — neriorsuummi tamatumani eqikkarneqarpoq. Nunarsuaq sorsunnernit, kaannernit, nappaatinit, naapertuilluanngitsuliornernit inunnillu ajortunit aniguisissavaa. Inuk kinaluunniit taamaaliorsinnaanngilaq.

 Guutip naalagaaffiata suut naammassissavai

Guutip neriorsuutini eqquutitissavai qilammi nunamilu pissaaneqarnerpaap tullia — Jiisusi Kristusi makititaasimasoq — aqqutigalugu. Qanittukkut Jiisusi akerlilersorneqarani nunarsuarmut tamarmut naalakkersuilissaaq. Taamanikkussamut inuit kunnginit, præsidentinit politikerinilluunniit nunamiusunit naalakkersorneqarunnaarsimassapput. Kunngimit ataasiinnarmit naalagaaffimmillu ataasiinnarmit, Guutip naalagaaffianit, naalakkersorneqassapput.

Naalagaaffiup tamatuma naalagaaffiit nunamiittut tamaasa atorunnaarsissavai. Qangarsuarli Biibilimi ima siulittuuteqarpoq: “Qilaap Guutiata naalagaaffik qaqugumulluunniit atasussaq pilersikkumaarpaa, kingornalu inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq.” (Danieli 2:44) Aqutsineq naapertuilluartoq — Guutip naalagaaffia — atuutilerpat inuit nunarsuarmiittut tamarmik ataasiussuseqalissapput.

Jiisusi inuttut nunarsuarmiikkallarami naalagaaffik taanna eqqartortarpaa. Taanna qinnummi ataatarpuumik ilisimaneqartumi eqqaavaa, tassani ajoqersukkani ima qinusarnissaannik ilinniartippai: “Naalagaaffiit tikiulli, piumasat qilammisut nunamissaaq pili.” (Matthæusi 6:10) Maluginiaruk Jiisusip naalagaaffik taanna Guutip piumasaata nunami pinissaanut atassuseraa, Guutillu piumasaraa nunarsuarmi tamarmi naalliuutit atuukkunnaarnissaat.

Guutip naapertuilluartumik naalakkersuinerata pissutsit nuanningaartut naalakkersuisut nunamiusut atuutilersissinnaanngisaat atuutilersissavai. Allaaserisap matuma siuliani eqqaaneqartutut Jehovap ernini utertitsissutitut tunniuppaa inuit naassaanngitsumik inuusinnaaqqullugit. Guutip naalagaaffiata asannittumik naalakkersuinerani inuit naammalluinnartunngoriartuaassapput. Qanoq kinguneqartumik? Jehovap ‘toqu nungutissavaa piujunnaarsivillugu. Guutillu Jehovap isit tamaasa qullingiarumaarpai’. — Esaja 25:8.

Immaqa ima aperiumasoqassaaq: ‘Sooq Guuti suli iliuuseqarsimanngila? Sunaana utaqqigaa?’ Jehova naalliuutinik tamanik atuukkunnaarsitsilluni allaalluunniit naalliuutinik pinaveersaartitsilluni qangarsuarli iliuuseqarsimasinnaagaluarpoq. Taamaaliornanili naalliuutit atuutiinnarnissaat akueraa, namminissarsiortumik pissuteqarani, qitornamili nunamiut naassaanngitsumik iluaqutissaannik. Angajoqqaat asannittut qitornamik atugarliornissaat akuerissavaat nalunngikkunikku ungasinnerusoq eqqarsaatigalugu tamanna meeqqamut iluaqutaassasoq. Taamatulli Jehovap pissutissaqarluarluni inuit naalliuuteqarallarnissaat akueraa, pissutigisaalu Biibilimi nassuiarneqarput. Ilaatigut tassaapput inuit piumasamik iliorsinnaatitaanerat, ajorti aamma Jehovap naalakkersuisinnaatitaanera pillugu akerleriissut. Aammattaaq Biibilimi allassimavoq pinngortitaq anersaajusoq piffissami killilimmi silarsuarmik naalakkersuisinnaatitaasoq. *

Inissaq killeqarmat pissutigisai taakku samminerusinnaanngilavut, kisianni tuppallersaatigalugillu qiimmassaatigisinnaasavut marluupput. Siullermik: Jehovap pilluaqqussutigiumaagai naalliuutigisimasinnaasatsinnik soqutaajunnaarsitsilluinnassapput. Guutillu ima neriorsoqqissaarpaatigut: “Pereersut eqqaamaneerutissapput eqqaaqqinneqarnatillu.” (Esaja 65:17) Guutip ajortut atuukkallarsinnaatitaanerisa kingunerisaanik aliasuutaasut naalliuutaasullu ataavartussamik atuukkunnaarsissavai.

Aappassaanik: Jehova naalliuutinik atuukkunnaarsitsinissaminut piffissamik aalajangiisimavoq. Eqqarsaatigeqqilaariaruk pruffiiti Habakkuki aperisoq nakuusernernik saqitsaannernillu Jehova qanoq sivisutigisumik akuerinnissanersoq. Jehova ima akivoq: ‘Takorluugaq piffissarititami aatsaat eqquutissaaq. Eqquutinngitsoorani piviusunngorumaarpoq.’ (Habakkuki 2:3) ‘Piffissarititap’, imaluunniit piffissap aalajangersakkap, tamatuma qanillinera allaaserisami tulliuttumi sammissavarput.

[Quppernerup ataani ilanngussaq]

 [Qupp. 7-mi ungalusaq]

Siunissaq nuannersoq pillugu allassimaffiit

SORSUTTOQARUNNAASSAAQ:

“Qaallusi takuniarsigit [Jehovap] suliai, aseruinersuit nunami pilersitai. Nunarsuarmi tamarmi sorsunnerit soraarsikkumaarpai.” — Tussiaat 46:9, 10.

TOQUSUT MAKITITAASSAPPUT:

‘Toqusut makikkumaarput — iluartut iluaatsullu.’ — Apustilit Suliaat 24:15.

TAMANUT NERISASSAQASSAAQ:

“Karrit naammangaartut nunami naasimassapput, qaqqat qaanni aalataarumaarput.” — Tussiaat 72:16, 1990.

NAPPAATAARUTISSAAQ:

“Innuttaasoq kinaluunniit oqassanngilaq: ‘Napparsimavunga!’” — Esaja 33:24.

INUIT AJORTUT PEERUTISSAPPUT:

“Iluanngitsut nunamit piiagaassapput tunussisullu tassannga aallarunneqarlutik.” — Ussatit 2:22.

NAAPERTUILLUASSUSEQASSAAQ:

“Kunngiusoq [Jiisusi Kristusi] naalagaajumaarpoq iluartuulluni, naalagartallu naalakkersuiumaarput innarluitsumik.” — Esaja 32:1.

[Qupp. 7-mi assiliartat]

Guutip naalagaaffiata naalliuutigisimasavut tamaasa atuukkunnaarsissavai