“Anersaarlu nuliartaarlu oqarput: ‘qaagit!’”
“Anersaarlu nuliartaarlu oqarput: ‘qaagit!’”
“Anersaarlu nuliartaarlu oqarput: ‘Qaagit!’ . . . Imerusuttoq aggissaaq, piumasullu imeq inuussutaasoq akeqanngitsumik pissavaa.” — SAQQUMMERSITAT 22:17.
1, 2. Inuunitsinni suna pingaarnerpaasariaqarpa, aamma sooq?
INUUNITSINNI suna pingaarnerpaasariaqarpa? Jiisusip ajoqersukkani kajumissaarpai ‘Guutip naalagaaffia ujaqqaaqqullugu’, aamma neriorsoqqissaarpai taamaaliorunik Guutip pisariaqartitaannik tuniumaarai. (Matthæusi 6:25-33) Guutip naalagaaffia assersuuppaa sapanngamut ima naleqartigisumut niuertup ‘pigisani tamaasa akigiartorlugit taannalu pisiaralugu’. (Matthæusi 13:45, 46) Tassa Guutip naalagaaffianik oqaluussissutiginninneq ajoqersuganngortitsiortornerlu pingaaruteqarluinnartutut isigisariaqarpavut!
2 Soorlu allaaserisap matuma siuliini marlunni paasigipput, Guutip oqaasianik nakimaalluta nalunaajaatiginninnitsinnit oqaluussinermilu Biibilimik atuillaqqinnitsinnit ersertarpoq Guutip anersaavanit siulersortittartugut. Aamma anersaaq illernartoq Guutip naalagaaffianik oqaluussissutiginnittuarsinnaanissamut pingaaruteqangaarpoq. Tamanna misissoriartigu.
Tamanut qaaqqusissut!
3. Inuit imermik qanoq ittumik imernissamut ‘qaaqquneqarpat’?
3 Inuit tamarmik anersaaq illernartoq aqqutigalugu qaaqquneqarput. (Atuaruk Saqqummersitat 22:17). Imermik immikkorluinnaq ittumik imerusuersarnissamut ‘qaaqqusissutaavoq’. Imeq nalinginnaasoq pineqanngilaq. Soorunami imivik nunarsuarmi inuuinnarnissamut pisariaqarpoq, Jiisusilli imeq allaanerulluinnartoq eqqarsaatigaa arnaq Samariamioq imertartoq ima oqarfigigamiuk: “[Imermik] uanga tunniukkumasannik imertoq imerusoqqilinngisaannassaaq. Imeq tunniukkumasara inummi taassumani puilasunngussaaq naassaanngitsumik inuussutaasumik puilajuartoqartoq.” (Johannesi 4:14) Imeq immikkorluinnaq ittoq tamanna inunnut imeqquneqartoq naassaanngitsumik inuussutaavoq.
4. Imeq inuussutaasoq sooq pisariaqartinneqalerpa, imerlu tamanna sumut assersuutaava?
4 Imermik inuunartumik pisariaqartitsisoqalerpoq inuk siulleq, Adami, nuliami Evap iliorneratut iliorluni Pinngortitsisumut, Jehovamut Guutimut, pikitsitsimmat. (1 Mosesi 2:16, 17; 3:1-6) Inuit aappariit siulliit angerlarsimaffimminnit paratiisiusumit peersinneqarput Adami ‘orpimmit inuunartumit tiguseqqunagu nerillunilu toqusussaajunnaaqqunagu’. (1 Mosesi 3:22) Adami inuiannut nagguiugami toqu inuiannut tamanut kingornussassanngortippaa. (Romamiut 5:12) Imeq inuussutaasoq Jehovap inuit naalattut ajortimit toqumillu aniguisinniarlugit nunarsuarmilu paratiisiusumi naassaanngitsumik inuusinnaalersikkumallugit aaqqissuussaanut assersuutaavoq. Jiisusip Kristusip utertitsissutitut pilliutaa aaqqissuussanut taakkununnga tunngaviuvoq. — Matthæusi 20:28; Johannesi 3:16; 1 Johannesi 4:9, 10.
5. ‘Imermik inuussutaasumik akeqanngitsumik pinissamut’ qaaqqusissut suminngaanneerpa? Nassuiaruk.
5 ‘Imermik inuussutaasumik akeqanngitsumik pinissamut’ qaaqqusissut suminngaanneerpa? Aaqqissuussat inuunartut tamarmik Jiisusi aqqutigalugu taassuma ukiuni tusindini naalakkersuinerani tamakkiisumik atorneqarsinnaalerpata ‘kuussuartut imermik inuussutaasumik aligortut qaammaritsigisumik imilittut’ issapput. Kuussuaq taanna ‘Guutip Savaaqqallu issiavissaarsuannit puilavoq’. (Saqqummersitat 22:1) Taamaattumik erngup tamatuma pilerfia tassaasimassaaq Inuunermik Tunisisoq, Jehova. (Tussiaat 36:10) Taassuma imeq tamanna ‘Savaaraq’, Jiisusi Kristusi, aqqutigalugu pineqarsinnaanngortittarpaa. (Johannesi 1:29) Kuussuaq assersuutaasoq tamanna iluaqutigalugu Jehova Adamip naalannginnermigut inuiannik ajoqusiineranik aaqqiiumaarpoq. Aap, ‘qaaqqusissut’ Jehovamit Guutimeersuuvoq.
6. ‘Kuussuaq imermik inuussutaasumik imilik’ qanga kuulerpa?
6 ‘Kuussuaq imermik inuussutaasumik imilik’ aatsaat Kristusip ukiuni tusindini naalakkersuinerani tamakkiisumik kuulertussaavoq, ‘Naalakkalli ulluanili’, tassa Savaaraq 1914-imi qilammi kunnginngortinneqarmalli, kuulereerpoq. (Saqqummersitat 1:10) Tassa taamanimiilli aaqqissuussat inuunartut ilaat atorneqarsinnaalerput. Taakkununnga ilaapput tusarliussaq Guutip oqaasiani Biibilimiittoq, taannami ‘imermut’ assersuunneqarpoq. (Efesosimiut 5:26) Guutip naalagaaffia pillugu tusarliussamik tusarnaarnikkut eqqumaffiginninnikkullu ‘imermik inuussutaasumik pinissamut’ qaaqqusissut kikkunnut tamanut qaaqqusissutaavoq. Naalakkalli ulluani imermik inuussutaasumik pinissamut kinarpiaq qaaqqusisuua?
‘Nuliartaaq’ oqarpoq “qaagit”
7. Kikkut “Naalakkap ulluani” ‘qaaqquseqqaartuuppat’, kikkullu qaaqquaat?
7 Nuliassaqatigiit, kristumiut tanitat, ‘qaaqquseqqaartuupput’. Kikkut qaaqquaat? Nuliartaaq soorunami imminut qaaqqunngilaq. ‘Guutilli Ajugaqanngitsup ullussarsuani sorsunnerup’ kingorna nunarsuarmi naassaanngitsumik inuunissamik neriugisallit qaaqquneqarput. — Atuakkit Saqqummersitat 16:14, 16.
8. Sumit erserpa kristumiut tanitat 1918-imiilli Jehovameersumik qaaqqusisartut?
8 1918-imiilli kristumiut tanitat taamatut qaaqqusilerput. Ukioq taanna inuppassuit oqalugiaat “Millioner af nulevende Mennesker vil måske aldrig dø” (Inuit millionillit maanna inuusut immaqa toqunngisaannassapput) Harmagedonimi sorsunnerup kingorna nunarsuarmi naassaanngitsumik inuunissamik neriuuteqalissutigaat. 1922-mi Biibilimik Atuaqqissaartartut Cedar Pointimi Ohiomiittumi ataatsimeersuarneranni oqalugiaammi tusarnaartut kajumissaarneqarput ‘Kunngimik taassumalu naalagaaffianik oqaluussissutiginneqqullugit’. Kajumissaarut tamanna nuliassaqatigiit kinguleruttut amerlanerusunik qaaqqusinissaminnut kaammattuutigaat. 1929-mi Vagttaarnet-imi 1. maajimoortumi allaaserisaqarpoq “En naadig Indbydelse”-mik ( “Saammaassilluni qaaqqusissut”-mik) qulequtalimmik, tassanilu Saqqummersitat 22:17 najoqqutarineqarpoq. Allaaserisami ima allassimasoqarpoq: “Kinguleruttut aalajaatsut saammaassilluni qaaqqusissummut [Guutimit qutsinnerpaameersumut] ilaliupput oqarlutillu ‘qaagit’. Tusarliussaq tamanna naapertuilluassusermik sallusuissummillu kipitsaviginnittunut oqaluussissutigineqassaaq. Massakkut oqaluussissutigineqartariaqarpoq.” Ullumikkut nuliassaqatigiit taamatut suli qaaqqusipput.
‘Tusartoq oqassaaq: Qaagit!’
9, 10. Qaaqqusissumik tusartut namminneq ‘qaaqqusinissamut’ qanoq kajumissaarneqarpat?
9 ‘Qaaqqusissummimmi’ tusartut? Taakku aamma nammineq ‘qaaqqusinissaminnut’ kajumissaarneqarput. Assersuutigalugu Vagttaarnet-imi 1. oktobari 1932-moortumi qupp. 297-imi ima allassimavoq: “Tanitat piumasut tamaasa kajumissaartariaqarpaat Guutip naalagaaffia pillugu tusarliussamik oqaluussissutiginneqataaqqullugit. Naalakkap tusarliussaanik oqaluussissutiginneqataajumalluni Naalakkamit taninneqarsimanissaq pisariaqanngilaq. Jehovap Nalunaajaasui ilorraallapput maanna nalunnginnamikku imermik inuussutaasumik inunnut eqimattanut, Harmagedonimi aniguisitaanissamut nunarsuarmilu naassaanngitsumik inuunissamut periarfissaqartunut, tunioraanissaminnut akuerisaallutik.”
10 ‘Qaaqqusissummik’ tusartut akisussaaffiat pillugu Vagttaarnet-imi 15. oktobari 1934-moortumi qupp. 314-imi ima allassimasoqarpoq: “Katersat Jonadabitut ittunut ilaasut katersanik Jehutut ittunik assersuutaasunik, tassa tanitanik, ingerlaqateqartariaqarput Guutillu naalagaaffianik tusarliussaq oqaluussissutigalugu, naak tassaanngikkaluarlutik Jehovap Nalunaajaasui tanitaasut.” 1935-mi ‘amerlangaartut’ Saqqummersitat 7:9-17-imi eqqartorneqartut kikkuunerat paasinarsisinneqarpoq. Tamanna ‘qaaqqusiniarluni’ iliuuseqarsuataartoqarneranik kinguneqarpoq. Taamanimiilli ilumoortumik pallorfiginnittut amerligaluttuinnartut — maanna 7 millioninit amerlanerusut — tamatuminnga suliaqaqataanissamut kajumissaarummik eqqumaffiginnissimapput. Taakku tusarliussamik kajumillutik ilassinnipput, Guutimut tunniulluinnarlutik, kuisillutik nuliassaqatigiinnillu tapersersuillutik ‘imermik inuussutaasumik akeqanngitsumik pinissamut’ amerlanerusunik qaaqqusiniarnermi.
‘Anersaaq’ oqarpoq “qaagit”
11. Anersaaq illernartoq ukiuni hundredelinni siullerni oqaluussinermut qanoq pingaaruteqartigaa?
11 Jiisusip synagogimi Nazaretimiittumi oqaluussigami oqaatsit Esajap siulittuutaaneersut uku atuarpai: “[Jehovap] anersaavata tikippaanga [Jehovap] tanitarimmanga. Aallartippaanga nalunaarut nuannersoq piitsunut tusarliuteqqullugu, torlulaatigeqqullugu parnaarussat iperagaanissaat tappiitsullu tappissinissaat, nanertugaasullu aniguiseqqullugit torlulaatigeqqullugulu [Jehovap] ukiua saammaassivik.” Atuareeramigit Jiisusip oqaatsit taakku imminut tunnganerarpai, ima oqarami: “Oqaatsit allakkaniittut tusakkasi ullumikkut eqquupput.” (Lukasi 4:17-21) Jiisusip qilaliannginnermini ajoqersukkani ima oqarfigai: “[Anersaap] Illernartup tikippasi pissatsitaajumaarpusi, nalunaajaasigissavassilu . . . [nunarsuup] isua tikillugu allaat.” (Apustilit Suliaat 1:8) Tassa ukiuni hundredelinni siullerni anersaaq illernartoq oqaluussinermut pingaaruteqangaarpoq.
12. Anersaaq illernartoq ullumikkut oqaluussinermi qanoq akuua?
12 Anersaaq illernartoq ullumikkut qaaqqusinermut qanoq akuua? Anersaaq illernartoq Jehovameersuuvoq, taassumalu anersaaq taanna atortarpaa nuliassaqatigiit uummataata isumaatalu ammarnissaannut, oqaatsiminik Biibilimik paasinnissinnaaqqullugit. Nuliassaqatigiit anersaaq qaaqqusinissamut sallusuissutillu Biibilimeersup paratiisimi nunarsuarmiittumi naassaanngitsumik inuunissamik neriugisalinnut nassuiarnissaanut kajumississutigisarpaat. Qaaqqusissummimmi ilassinnillutik Jiisusimullu Kristusimut ajoqersuganngorlutik qaaqqusissummik allanut ingerlatitseqqiisut? Taakkuattaaq anersaap ikiuinera malugisarpaat. Taakku ‘Anersaap Illernartup aqqani’ kuisipput, aamma tatiginnillutik anersaap siulersuineranut naapertuuttumik iliuuseqartarput. (Matthæusi 28:19) Aamma eqqarsaatigiuk tusarliussaq tanitat amerlangaartullu amerliartuinnartut oqaluussissutigisaat. Tusarliussaq Biibilimeersuummat — Guutip anersaavata toqqaannartumik sunniineratigut allanneqarsimasuneersuummat — ilumoortumik anersaaq illernartoq aqqutigalugu qaaqqusisoqartarpoq. Aap, anersaamit tamatumannga siulersorneqartarpugut. Tamanna qaaqqusinermut peqataanitsinnut qanoq sunniuteqartariaqarpa?
“Oqarput: ‘Qaagit!’”
13. ‘Anersaallu nuliartaallu qaaqqusinerat’ qanoq paasisariaqarpa?
13 “Anersaarlu nuliartaarlu” oqarmata “qaagit”, imaanngilaq ataasiaannarlutik qaaqqusisut. Oqaluummi grækerisuumi pineqarpoq iliuuseqartuarneq. Tamatumannga erserpoq ataavartumik akuttoqatigiimmillu qaaqqusisoqartartoq. Qaaqqusissummimmi tusartut tamatuminngalu ilassinnittut? Taakkuattaaq ‘qaaqqusisarput’. Ilumoortumik pallorfiginnittut amerlangaartut pillugit allassimasoqarpoq Jehovap ‘naalaffiani kiffartortut ullukkut unnuakkullu’. (Saqqummersitat 7:9, 15) ‘Ullukkut unnuakkullu kiffartorneq’ qanoq paasisariaqarami? (Atuakkit Lukasi 2:36, 37; Apustilit Suliaat 20:31; 2 Thessalonikamiut 3:8). Arnap pruffiitiusup Annap apustilillu Paulusip maligassiaasigut erserpoq ‘ullukkut unnuakkullu kiffartornermut’ ilaasoq oqaluussinermi eqiasuilluni suliniuteqartuarneq.
14, 15. Guutimik pallorfiginninnermut tunngasunik aalajangersimasumik sammisaqartarnissap pingaaruteqassusia Danielip maligassiaatigut qanoq erserpa?
14 Aamma pruffiitip Danielip maligassiaanit erserpoq aalajangersimasumik Guutimik pallorfiginnittarnissaq qanoq pingaaruteqartigisoq. (Atuakkit Danieli 6:5-11, 17). Guutimut qinujuarpoq “[ullormut] pingasoriarluni . . . , siornatigut ileqqoriuakkamisut”. Aap, Danielip aalajangersimasumik anersaakkut ittunik sammisaqartarnini qaammammi ataasiinnarmiluunniit allanngortikkumanngilaa, naak tamanna pillugu løvit inaannut igitaasussaagaluarluni. Danielimik maluginiaasut taassuma iliuusiinit paasivaat Jehovamik pallorfiginninnermut tunngasunik aalajangersimasumik sammisaqartarnissaq pingaaruteqarluinnartoq. — Matthæusi 5:16.
15 Danieli unnuaq naallugu løvit inaanneereersoq kunngip ornippaa imalu suaarluni: “Danieli, Guutip uumasup kiffaa! Guutivit guutisiorfigiuakkavit løvinit annaassinnaasimanerpaatit?” Danieli ingerlaannaq ima akivoq: “Kunngi inuugili naassaanngitsumik! Guutima inngilini aallartillugu løvit qarni matuai. Ajoqusinngilaannga pinngitsuutitaagama Guutima saani, ilinnuttaarlumi peqquserluuteqanngilanga, kunngi!” Jehovap Danieli pilluaqquaa ‘guutisiorfigiuarmani’. — Danieli 6:20-23.
16. Danielip maligassiaa kiffartornitsinnut tunngatillugu imminut qanoq apererusulissutigisariaqarparput?
16 Danieli anersaakkut ittunik aalajangersimasumik sammisaqartarunnaarnissaminngarnit toqorusunneruvoq. Uagummi? Guutip naalagaaffia pillugu nutaarsiassamik nuannersumik oqaluussissutiginnittuarsinnaajumalluta sunik pilliuteqartarpugut, imaluunniit sunik pilliuteqarumavugut? Qaammatit tamaasa Jehova pillugu allanik oqaloqateqarniartariaqarpugut! Ajornanngippat sapaatit-akunneri tamarluinnaasa oqaluusseqataaniartariaqarpugut. Timikkut sapinngisavut killeqaraluarpataluunniit qaammatillu ataatsip ingerlanerani minutsini 15-iinnarni oqaluussisinnaalluta, tamanna nalunaarusiatsinnut allassavarput. Sooq? Anersaaq nuliartaarlu peqatigalugit ‘qaaqqusiuarusukkatta’. Aap, oqaluusseqataajuarumalluta sapinngisarput tamaat iliuuseqassaagut.
17. Qaaqqusissumik ingerlatitseqqinnissamut periarfissat suut maangaannartikkumanngilavut?
17 Qaaqqusissut Jehovameersoq periarfissat tamaasa, oqaluussinissamut piffissalerfigisimasatsinniinnaanngitsoq, ingerlateqqinniartariaqarparput. Immikkut pisinnaatitaaffigaarput imerusuttunik tamanik ‘imermik inuussutaasumik akeqanngitsumik pinissaannut qaaqqusineq’, aamma pisiniartilluta, angalatilluta, sulinngiffeqartilluta, sulitilluta atuarfimmiitillutaluunniit. Oqartussaasut killilersoraluaraangatigulluunniit malunnaarsaarluta oqaluussiuartarpugut — immaqa angalaarfigisartakkami ataatsimi ikittunnguanut kasuttortarnikkut tamatumalu kingorna allamut ingerlaqqittarnikkut imaluunniit torrutiinnarlugu oqaluussiniarluta iliuuseqarniarnerunikkut.
‘Qaaqqusiuarit’
18, 19. Qanoq ilillutit ersersissinnaaviuk Guutimut suleqataanermik immikkut pisinnaatitaaffimmik pingaartitsillutit?
18 Ukiuni 90-init amerlanerusuni anersaaq nuliartaarlu imermik inuussutaasumik imerusuttunik tamanik ‘qaaqqusisarsimapput’. Illit qaaqqusissut nuanningaartoq tamanna ilassiviuk? Ilassisimagukku kajumissaarusuppatsigit qaaqqusissummik allanut ingerlatitseqqiinissannut.
19 Naluarput suli qanoq sivisutigisumik Jehova taamatut qaaqqusisitsissanersoq, ilassigutsiguli namminerlu ‘qaaqqusilluta’ Guutimut suleqataalissaagut. (1 Korinthimiut 3:6, 9) Immikkut pisinnaatitaaffiup angingaassusia! Ersersitsigu immikkut pisinnaatitaaffik tamanna pingaartillugu, oqaluussiuartarnitsigullu ‘Guuti qujaniutinik pilliivigiuartigu’. (Hebræerit 13:15) Nunarsuarmi inuunissamik neriugisallit nuliassaqatigiit peqatigalugit ‘qaaqqusiuarumaarput’. Aap, qanortoq suli amerlanerungaartut ‘imermik inuussutaasumik akeqanngitsumik pigilit’!
Suna ilikkarpiuk?
• Kikkut ‘qaaqquneqarpat’?
• Sooq oqartoqarsinnaava ‘qaaqqusissut’ Jehovameersuusoq?
• Anersaaq illernartoq ullumikkut oqaluussinermi qanoq akuua?
• Sooq oqaluusseqataajuarniartariaqarpugut?
[Atuaqqissaarnermi apeqqutit]
[Qupp. 22-mi ungalusaq/assiliartat]
(Allassimasut qanoq inissisimanersut naqitami takuneqarsinnaavoq)
‘Qaaqqusiuarit’!
1914
Oqaluussisartut 5100-t
1918
Inuppassuit paratiisimi nunarsuarmiittumi inuulerumaarput
1922
“Kunngi taassumalu naalagaaffia oqaluussissutigisigik, oqaluussissutigisigik, oqaluussissutigisigik”
1929
Kinguleruttut aalajaatsut ‘qaaqqusipput’
1932
Tanitaannaanngitsoq ‘qaaqqusinissamut’ kajumissaarneqarput
1934
Katersat Jonadabitut ittut oqaluussinissamut kajumissaarneqarput
1935
‘Amerlangaartut’ kikkuunerat paasineqarpoq
2009
Oqaluussisartut 7.313.173-it