Imigassaq Guutip qanoq isigaa?

PINNGORTITSISUP, uagutsinnik ajunnginnerpaamik kissaassisup, ingasaassinani imigassartornissaq inerteqqutiginngilaa. * Inerteqqutiginagu inunnut tunniuppaa ‘viinni inunnik nuannaalersitsisartoq, inuit kiinaat qillertisillugit uuliamik, inullu nutaamik nukeqalersillugu timiusamik’. (Tussiaat 104:15) Ilaanni Jiisusi Kristusi katittorsiornermik nuannernerulersitseqqataavoq imermik ‘viinninngortitsigami’. — Johannesi 2:3-10.

Soorunami Pinngortitsisup nalunngilaa imigassap qaratsamut timimullu qanorpiaq sunniuttarnera. Ataatatta qilammiusup Biibili aqqutigalugu ‘iluaqutaasunik ajoqersorpaatigut’, imigassamillu kimittuumik atornerluinissamut sakkortuumik mianersoqquaatigut. (Esaja 48:17) Toqqaannartumik mianersoqqussutit uku maluginiariakkit:

“Viinnimik aalakooqinasi, aalakoornerup inuunerlunnerit pilersittarmagit.” (Efesosimiut 5:18) “Imerajuttut . . . Guutip naalagaaffia kingornussarsiarissanngilaat.” (1 Korinthimiut 6:9-11) “Imerajunneq, inuulluarumatuallaarnerit tamakkualu taamaaqataat” Guutip oqaasiani assuarineqarput. — Galatiamiut 5:19-21.

Imigassamik atuivallaarnerup navianaataasa ilaat misissoriartigik.

Imigassartorpallaarnerup navianaatai

Imigassaq ajunngitsortaqaraluarluni aamma isumamut timimullu sunniuteqarsinnaasunik ulorianartortaqarpoq. Imigassamik atuipilunneq ajornartorsiutinik imaattunik kinguneqarsinnaavoq:

Imigassamik atuipilunneq naliliilluarsinnaajunnaarsitsisarpoq ‘eqqarsarluarsinnaajunnaarsitsilluni’. (Ussatit 23:33, Today’s English Version) Allen imerajuttoq allaaserisap matuma siuliani eqqaaneqartoq ima nassuiaavoq: “Imerajuttuuneq timikkut nappaataaginnanngilaq; nappaataavoq eqqarsartaatsimut isiginnittaatsimullu sunniuteqartoq. Imerajuttup atornerluinermi inunnut allanut ajoqutaanera eqqarsaatigineq ajorpaa.”

 Imigassartorpallaarneq imminut nangarsinnaajunnaarnermik kinguneqarsinnaavoq. Biibilimi ima mianersoqqussuteqarpoq: “Viinni viinnilu nutaaq ajunngitsumik siunertaqarunnaarsitsisarput.” (Hosea 4:11, NV) Qanoq ililluni? Eqqarsaatit kissaatillu naqisimaneqartartut aalakoortilluni akuerineqarsinnaasutut — allaat kajungernartutut — ilersinnaapput. Eqqortumik iliornissaq aalajangiusimajunnaarneqarsinnaavoq. Imigassap ileqqussatigut illersuutit qajannarsisissinnaavai, tamannalu Guutimut attaveqarnermut ajoqutaangaarsinnaavoq.

Assersuutigalugu John nulianilu oqqatereerlutik kamalluni anivoq imerniartarfiliarlunilu. Eqqissisaatiginiarlugu arlalinnik najorsereersoq arnaq eqqaanut pivoq. Najorseqqilaareerlutik Johnip arnaq aneqatigaa allasiorlunilu. Tamatuma kingorna Johnip peqqissimissutigingaarpaa imigassaq pissutigalugu imminut nangarsinnaajunnaarsimanngitsuuguni eqqarsaatigisimanavianngisaannakkaminik iliuuseqarami.

Imigassartorpallaarneq eqqarsaqqaarani oqaaseqarnermik iliuuseqarnermillu kinguneqarsinnaavoq. Biibilimi ima allassimasoqarpoq: “Kikkut suaartartarpat ‘alianaq’, kikkullu suaartartarpat ‘eqqanaq’? Kikkut saqitsaattarpat kikkullu nimaartarpat? . . . Taamaattarput unnuarsuarmut ernguttut, aggertartut viinnimik akuukkamik najorsiartorlutik.” (Ussatit 23:29, 30) Imerpallaaraanni ima misigisoqarsinnaavoq ‘soorlu imaannarsuarmiilluni, soorluluunniit najummatserfigalugu napparutip nuua’. (Ussatit 23:34) Imerpallaarsimasoq itersinnaavoq ‘unatarneqarsimagaluarluni malugisaqarsimanani’. — Ussatit 23:35.

Imigassamik atuipilunneq peqqissutsimut ajoqutaasinnaavoq. “Naggataatigummi [imigassaq] pulateriaarsuttut kiisisinnaavoq toqunartumik tissalutsitsilluni pulateriaarsuttut toqunartulittut.” (Ussatit 23:32) Nakorsaatitigut ilisimatusarnikkut ussatitoqqap tamatuma ilumoornera uppernarsineqarsimavoq. Imigassartorujussuaraanni imigassaq toqunartutut toqussutaaratarsinnaasutut issinnaavoq assigiinngitsunik kræfteqalersitsisinnaalluni, imigassamik pissuteqartumik tingukkut aseruuttoortitsisinnaalluni, tingukkut eqittoortitsisinnaalluni, aqajaqqup sanilequtaani qinersikkut aseruuttoortitsisinnaalluni, sukkornermik nappaatilik aamigut sukkukippallaalersissinnaallugu, naartumik ajoqusiisinnaalluni, aanaartoortitsisinnaalluni uummammillu unittoortitsisinnaalluni — kingunerluutaasinnaasut ilaannaat eqqaassagaanni. Allaallu ataasiaannarluni imerpallaarsimagaanni ilisimajunnaavittoqarsinnaavoq allaalluunniit toqusoqarsinnaalluni. Atuipilunnerulli kingunipilua ilungersunarnerpaaq nakorsaatitigut ilinniutini allaatigineqanngilaq.

 Navianaataasa navianarnerpaartaat. Naak immaqa aalakuulertanngikkaluarluni, imigassamik atuipilunneq Guutimut attaveqarnermut ajoqutaasinnaavoq. Biibilimi toqqaannartumik ima allassimasoqarpoq: “Eqqanaq taakku ullaarnganit immiamik imigassarsiortartut, unnuarsuarmullu viinnisornermit sinngorullersartut.” Sooq tamanna navianarpa? Esajap imigassartorpallaartarnerup Guutimut attaveqarnermut qanoq sunniuteqartarnera ima nassuiarpaa: “[Jehovap] suliai takunngilaat, assaasa piliaat isiginngilaat.” — Esaja 5:11, 12.

Guutip oqaasiani siunnersorneqarpugut ‘ilaginiassanngikkivut viinnisorpallaartut’. (Ussatit 23:20) Arnat utoqqaat mianersoqquneqarput ‘imerajuttooqqunagit’. (Titusi 2:3) Sooq? Imigassartornerusalertoqarsinnaallunilu imigassartukulanerulertoqarsinnaammat — amerlanertigut malunnanngitsumik. Immaqa naggataatigut imigassartortartoq innangassaaq imalu aperaluni: “Qaquguuna itissaanga, viinnisoqqinniarumaarama!” (Ussatit 23:35) Inuit imigassamik ajornartorsiutillit navianartorsiulersimassapput ullaakkut itiinnarlutik aqagutaarunnaarniarlutik najorserusussuataartarunik.

Biibilimi mianersoqqussutigineqarpoq ‘imerujuupiluttartut, nuannaapiluttartut, ernguttartut inuusunik toqusimasunillu eqqartuussissalluni piareersimasumut tamakku pillugit akisussaajumaartut’. (1 Petrusi 4:3, 5) Aamma Jiisusi ullut ernumanartorsiorfiusut inuuffigisavut pillugit ima mianersoqqusivoq: “Mianersoritsi uummatisi malussarlersitaaqqunagit aalakoornermit imerajunnermillu inuunerullu matuma piinik isumakuluutinit, pakasarteqqunasi [Jehovap ulluata] tassanngaannaq tikiunneranit nigartuutitut illuni.” — Lukasi 21:34, 35.

Imigassartorpallaartartut qanoq iliorsinnaappat ‘imerajunnermit malussarlersitaaqqunatik’?

[Quppernerup ataani ilanngussaq]

[Qupp. 4, 5-mi assiliartat]

Imigassamik atuipilunneq ajornartorsiuterpassuaqalersitsisinnaavoq