Inooriaatsimut pitsaanerpaamut tikilluarit!
Inooriaatsimut pitsaanerpaamut tikilluarit!
“Inuugutta toquguttaluunniit [Jehovap] pigaatigut.” — ROMAMIUT 14:8.
1. Jiisusip ajoqersukkani inooriaaseq pitsaanerpaaq pillugu sumik ilinniartippai?
JEHOVAP kissaatigaa pitsaanerpaamik inooriaaseqassasugut. Inuit assigiinngitsorpassuarnik inooriaaseqarsinnaapput, ataasiinnarli pitsaanerpaavoq. Uagut pitsaanerpaamik inuusinnaavugut Guutip oqaasianik maleruaanitsigut taassumalu erneranik, Jiisusimik Kristusimik, ilinniarfiginninnitsigut. Taassuma ajoqersukkani ilinniartippai anersaakkut ilumoornikkullu Guutimik pallorfiginninnissaannut, aamma peqquai ajoqersuganngortitsiortoqqullugit. (Matthæusi 28:19, 20; Johannesi 4:24) Jiisusip unnersuussutai malillugit inuunitsigut Jehovamut iluarisaassaagut taassumanngalu pilluaqqusaassalluta.
2. Ukiuni hundredelinni siullerni Guutip naalagaaffianik tusarliussamik ilassinnittut suppat, ‘Aqqummillu’ atuaanerat qanoq paasisariaqarpa?
2 “Inuunermik naassaanngitsumik eqqortumik isumaqarfiginnittut” (NV) uppertunngoraangata kuisikkaangatalu taakku ima oqarfiginissaannut pissutissaqarluartarpugut: “Inooriaatsimut pitsaanerpaamut tikilluarit!” (Apustilit Suliaat 13:48) Ukiuni hundredelinni siullerni inuit tusindillit inuiannit assigiinngitsuneersut sallusuissummik ilassinnipput kuisinnermikkullu Guutimut uppernertik tamanut nassuerutigalugu. (Apustilit Suliaat 2:41) Ajoqersukkat siulliit taakku “Aqqummik” atuaapput. (Apustilit Suliaat 9:2; 19:23) Taaguut ‘Aqqut’ tulluarpoq, Jiisusimummi ajoqersuganngortut Jiisusimut Kristusimut uppernermik taassumalu maligassiaanik malinninnermik pingaarnerpaatitsiffiusumik inooriaaseqarput. — 1 Petrusi 2:21.
3. Sooq Jehovap Nalunaajaasui kuisittarpat, ukiullu qulit kingulliit ingerlaneranni qassit kuisissimappat?
3 Ajoqersuganngortitsiortorneq ulluni kingullerni makkunani ingerlalluarpoq maannalu nunani 230-nit amerlanerusuni ingerlanneqarluni. Ukiut qulit kingulliit ingerlaneranni inuit 2.700.000-init amerlanerusut Jehovamut kiffartorniarlutik aalajangersimapput taassumunngalu tunniulluinnarsimanerminnut assersuutaasumik kuisissimallutik. Tassa agguaqatigiissillugu sapaatip-akunneranut inuit 5000-init amerlanerusut taamatut aalajangertarsimapput! Kuisinniarluni aalajangerneq Guutimik asanninnermit aallaaveqarpoq ilisimasaqarnermillu Biibilimeersumik tamatumanilu ajoqersuutigineqartunik upperinninnermik tunngaveqarluni. Kuisinneq tassaavoq inuunermi pisoq pingaarutilik, tassami Jehovamut anngigisaqarnani qanittumik attaveqalernermut ersiutaagami. Aamma Jehovap, itsaq kiffaminik aqqutigeqqusamigut ingerlanissaannut ikiuisimanermisut, uagutsinnik aalajaalluta kiffartornissatsinnut ikiuiumaarneranik qularutiginninnginnermut ersiutaavoq. — Esaja 30:21.
Sooq kuisinnissaq pingaaruteqarpa?
4, 5. Kuisinnerup iluaqutissartaasa pilluaqqussutissartaasalu ilaannik eqqaasaqarit.
4 Immaqa Guuti pillugu ilisimasaqalersimavutit, inuuninni allannguisimallutit maannalu oqaluussisartuullutit kuisimanngitsoq. Taamatut siuariarnerit pillugu nersualaarneqartariaqarputit. Guutimulli qinunikkut tunniulluinnareerpit, aamma kuisinnissat anguniagaraajuk? Biibilimik atuaqqissaarnikkut qularnanngitsumik paasisimassavat Jehovamik unnersiutiginninneq inuuninni pingaarnerpaajusariaqartoq, imminut iluatatsinnissat pigisanilluunniit katersinissat pingaarnerpaajunani. (Atuakkit Tussiaat 148:11-13; Lukasi 12:15). Taavami kuisinneq sunik iluaqutissartaqarlunilu pilluaqqussutissartaqarpa?
5 Kristumiutut tunniulluinnarsimasutut inuunerit tamanit nersornarnerpaamik anguniagaqarfiussaaq. Maanna Guutip piumasaatut iliorputit, tamannalu nuannaangaassutigalugulu pilluangaassutigissavat. (Romamiut 12:1, 2) Jehovap anersaava illernartoq kristumiunit pissuserineqartussanik, soorlu ‘uppernermik’ (NV) eqqissinermillu, ilinni inerititaqartitsissaaq. (Galatiamiut 5:22, 23) Qinnutitit akisassavai, aamma inuuninnik taassuma oqaasianut naleqqussaaniarlutit ilungersornitit pilluaqqusassavai. Kiffartornerit nuannersuussaaq, naassaanngitsumillu inuunissamik neriuutit Guutip akuerisaanik inooriaaseqarnikkut nakussatsinneqassaaq. Aamma tunniulluinnarnerit kuisinnerillu ilumut Jehovamut nalunaajaasunngorusunninnut ersiutaassapput. — Esaja 43:10-12.
6. Kuisinnitsigut suna nassuerutigisarparput?
6 Tunniulluinnarlutalu kuisinnitsigut Jehovamit pigineqarnerput tamanut nassuerutigisarparput. Apustili Paulusi ima allappoq: “Arlaannarpulluunniimmi imminut pilluni inuunngilaq imminullu pilluni toqunani. Inuugutta [Jehovamut] inuuvugut, toquguttalu [Jehovamut] toquvugut. Tassa inuugutta toquguttaluunniit [Jehovap] pigaatigut.” (Romamiut 14:7, 8) Guutip uagutsinnik tatiginningaarnini ersersippaa nammineq piumasatsitut iliorsinnaatikkamisigut. Guutimik asanninnerput pissutigalugu tamanna inooriaaseriniarlugu aalajangeraangatta taassuma uummataa nuannaartittarparput. (Ussatit 27:11) Kuisinnerput Guutimut tunniulluinnarsimanitsinnut assersuutaavoq, aamma kuisinnitsigut tamanut nassuerutigisarparput Jehova naalagaralutigu. Kuisinnitsinnit ersertarpoq qilammi nunamilu kisimi oqartussaassutsimik akerleriissummi Jehova tapersersoripput. (Apustilit Suliaat 5:29, 32) Jehovap akilluta najorumaarpaatigut. (Atuaruk Tussiaat 118:6). Aamma kuisinneq maanna siunissamilu allarpassuarnik pilluaqqussutisinissamut periarfissaqalersitsisarpoq.
Qatanngutigiissuarnik asannittunik pilluaqqusaasut
7-9. (a) Jiisusip sunik tamanik qimatsillutik imminik malinnittut qanoq neriorsoqqissaarpai? (b) Jiisusip Markusi 10:29, 30-mi neriorsuutaa ullumikkut qanoq eqquuppa?
7 Apustilip Petrusip Jiisusi ima oqarfigaa: “Takuat, uagut suut tamaasa qimallugit malippatsigit; sunami taava pisassaraarput?” (Matthæusi 19:27) Petrusip paaserusuppaa nammineq ajoqersukkallu allat siunissami suut ilimagissanerlugit. Taakku annertuumik pilliuteqarput Guutip naalagaaffianik oqaluussissutiginninnermik pingaarnerpaatitsilluinnarnermikkut. (Matthæusi 4:18-22) Jiisusip taakku qanoq neriorsoqqissaarpai?
8 Markusip pisimasoq tamanna pillugu allakkamini allaatigaa Jiisusi oqartoq ajoqersukkani qatanngutigiissuarnut anersaakkut ittunut ilaalerumaartut. Ima oqarpoq: “Inuk kinaluunniit illuminik, qatanngutiminik angutinik arnanillu, anaanaminik ataataminillu, qitornaminik narsaamminilluunniit qimatsisoq uanga pillunga iivangkiiliulu pillugu, maanna silarsuarmi matumani pissarseqqissaaq 100-riaammik illoqalerluni qatannguteqalerlunilu angutinik arnanillu anaanaqalerlunilu qitornaqalerlunilu narsaateqalerlunilu, qinugineqaraluartilluni; naassaanngitsumillu inuuneqalerumaarpoq silarsuartaassami.” (Markusi 10:29, 30) Ukiuni hundredelinni siullerni ilaatigut Lydiap, Akvilap, Priskillap Gajusillu “illutik” uppeqatiminnut atukkiuppaat taakkununngalu ‘qatanngutaalerlutillu anaanaalerlutik’, soorlu Jiisusip tamanna neriorsuutigisimagaa. — Apustilit Suliaat 16:14, 15; 18:2-4; 3 Johannesi 1, 5-8.
9 Jiisusip neriorsuutaa ullumikkut pingaarnerusumik eqquuppoq. ‘Narsaatit’ ajoqersugaasa maanna qimataat tassaapput suliffiit inuppassuit, ilaatigut ajoqersuiartortitat, Betelimi suleqataasut, nunani tamalaani sanaartortut allallu, kajumillutik taamaatitaat Guutip naalagaaffiata soqutigisaanik nunani tamalaani siuarsaasinnaajumallutik. Qatannguterpassuit angutit arnallu inuunerminnik pisariillisaaniarlutik ilorrisimaarnartumik inuunertik taamaatittarpaat, nuannertarporlu paasillugu Jehovap qanoq isumagisimanerai aamma taassumunnga kiffartornerat inuunerannik qanoq pisuunnguallatsitsisimanersoq. (Apustilit Suliaat 20:35) Aap, Jehovamut kiffat kuisimasut tamarmik silarsuaq tamakkerlugu qatanngutigiissuarnut kristumiunut ilaanerup pilluaqqussutissartai misigisarpaat ‘Guutip naalagaaffianik iluarneranillu ujaaseqqaarnermikkut’. — Matthæusi 6:33.
“Qutsinnerussaartup toqqorsimaffiani” toqqissisimaneq
10, 11. ‘Qutsinnerussaartup toqqorsimaffia’ suua, qanorlu ililluta tassunga isersinnaavugut?
10 Tunniulluinnarneq kuisinnerlu allamik angingaartumik pilluaqqussutissartaqarpoq — tassa “Qutsinnerussaartup toqqorsimaffiani” issianermik immikkut pisinnaatitaaffik. (Atuaruk Tussiaat 91:1). Taanna sumiiffiuvoq assersuutaasoq isumannaallunilu toqqissisimaffiusoq, anersaakkut ajoqutaasinnaasunut illersugaaffiusoq. ‘Toqqorsimaffiuvoq’ ima paasillugu anersaakkut paasisimasakitsuararsuarnit Guutimillu tatiginninngitsunit ilisimaneqanngitsoq. Tunniulluinnarsimanitsinnut naapertuuttumik inuunitsigut Jehovamillu tatiginnilluinnarnitsigut taanna pillugu ima oqarpugullusooq: “Qimarnguffiga pallittaalisaralu, Guutiga tatigisara.” (Tussiaat 91:2) Jehova Guuti najugaqarfigilerparput toqqissisimanartoq. (Tussiaat 91:9) Taassumani najugaqarnermit toqqissisimanarnerusoqanngilaq.
11 Jehovap ‘toqqorsimaffianut’ isernermut aamma ilaavoq taassumunnga nammineq qanittumik attaveqalersimanerput. Tunniulluinnarneq kuisinnerlu taamatut attaveqarnermut aallarniutaapput. Tunniulluinnarlutalu kuisereeraangatta Jehovamut attaveqarnerput ineriartortittarparput, Biibilimik atuaqqissaarnitsigut, qamannga pisumik qinunitsigut naalalluinnarnitsigullu taassumunnga qanillisarluta. (Jaaku 4:8) Jehovamut Guutimut Jiisusimit qaninnerusoqarsimanngilaq, taannalu Guutimik tatiginnikkunnaarsimanngisaannarpoq. (Johannesi 8:29) Taamaattumik Jehova taassumalu tunniulluinnarnitsinni neriorsuutitsinnik eqqortitsinissatsinnut ikiuerusunnera ikiuisinnaaneralu qularinngisaannartigit. (Oqaluussisartup oqaasii 5:3) Jehovap innuttaminut aaqqissuussai anersaakkut ittut tamarmik taassuma uagutsinnik asanninneranut taassumunngalu kiffartornitsinni iluatsinnissatsinnik kissaateqarneranut uppernarsaataapput assortorneqarsinnaanngitsut.
Anersaakkut paratiisi qujamasuutigiuk
12, 13. (a) Anersaakkut paratiisi suua? (b) Ilagiinniittut nutaat qanoq ikiorsinnaavavut?
12 Aamma tunniulluinnarnerput kuisinnerpullu anersaakkut paratiisimut isernissamut periarfissaqalissutigaarput. Anersaakkut paratiisi tassaavoq sumiiffik anersaakkut ittoq asseqanngilluinnartoq, tassaneeqatigaavullu uppeqativut, aamma tassani Jehova Guuti uppeqativullu eqqisseqatigisarpavut. (Tussiaat 29:11; Esaja 54:13) Silarsuarmiittoqanngilaq anersaakkut paratiisitsinnut eqqortumik assersuunneqarsinnaasumik. Tamanna ingammik malugisarparput ataatsimeersuarnerni nunanit tamalaanit peqataaffigineqartuni, qatanngutit angutit arnallu nunanit naggueqatigiinnillu assigiinngitsorpassuarneersut assigiinngitsorpassuarnillu oqaasillit eqqissisimallutik, ataasiussuseqarlutik qatanngutigiittullu asaqatigiillutik naapeqatigiittarfianni.
13 Anersaakkut paratiisi misigisarput ullumikkut silarsuarmi pissutsinit allaanerulluinnarpoq. (Atuakkit Esaja 65:13, 14). Guutip naalagaaffia oqaluussissutigigaangatsigu allat anersaakkut paratiisimut isernissaannut ilumoortumik qaaqqusarpavut. Aammattaaq ilagiinnut ilannguteqqammersunik oqaluussinermilu ilinniartinneqarumasunik ikiuineq nuannaarutaangaartarpoq. Utoqqaanertat unnersuussineratigut nutaat ilaannik ikiuineq immikkut pisinnaatitaaffigisinnaavarput, soorluttaaq Akvilap Priskillallu Apollosi ‘Guutip aqqutigeqqusaanik sukumiinerusumik nassuiaakkamikku’ taamaaliorsimasut. — Apustilit Suliaat 18:24-26.
Jiisusi ilinniarfigiuaruk
14, 15. Jiisusip ilinniarfigiuarnissaanut sunik pissutissaqarluarpugut?
14 Jiisusip ilinniarfigiuarnissaanut pissutissaqarluarpugut. Taassuma inuttut inunngunngikkallarami Ataatani ukiuni tusindilinni qilammeeqatigaa. (Ussatit 8:22, 30) Nalunngilaa inooriaaseq pitsaanerpaaq tassaasoq Guutimut kiffartornermik sallusuissummillu nalunaajaatiginninnermik pingaarnerpaatitsiffik. (Johannesi 18:37) Jiisusip paasilluarpaa inooriaaseq alla sunaluunniit namminissarsiortuullunilu uungaannaq isigisuussasoq. Nalunngilaa tamakkiisumik misilinneqarumaarluni naggataatigullu toqutaajumaarluni. (Matthæusi 20:18, 19; Hebræerit 4:15) Uagutsinnut maligassaagami paasitippaatigut qanoq ililluta assuarnaattuassasugut.
15 Jiisusi kuisinnermi kingunitsianngua Saatanimit pitsaanerpaamik inooriaaseqarunnaarnissamut usserneqarpoq, ussiinerali iluatsinngilaq. (Matthæusi 4:1-11) Tamatumannga paasivarput Saatani qanorluunniit ilioraluarpat assuarnaattuarsinnaasugut. Ilimanarpoq kuisingajalersut kuiseqqammersulluunniit taassumannga maluginiarneqassasut. (1 Petrusi 5:8) Ilaquttanit ajunngitsumik isumaqartunit eqqunngitsumilli paasitinneqarsimasunit akerlilersorneqartoqarsinnaavoq. Misilinneqarnerilli tamakku kristumiutut pissuserissaarnissamut, apeqqutinik akisigaangatta nalunaajaagaangattalu periaaserillutalu ataqqinnittuunissamut, periarfissatut isigisinnaavavut. (1 Petrusi 3:15) Taamaattumik akissutivut tusarnaartutsinnut sunniuteqarluarsinnaapput. — 1 Timotheusi 4:16.
Inooriaaseq pitsaanerpaaq aalajangiusimajuk!
16, 17. (a) Inuunerup 5 Mosesi 30:19, 20-mi eqqaaneqartup angunissaanut piumasaqaatit pingasut suuppat? (b) Jiisusip, Johannesip Paulusillu Mosesip allagai qanoq uteqqippaat?
16 Jiisusip nunarsuarmi inuunera ukiut 1500-t missiliorlugit sioqqullugu Mosesip Israelikkut kajumissaarpai taamanikkut inooriaaserineqarsinnaasoq pitsaanerpaaq qineqqullugu. Ima oqarpoq: “Ullumi qilak nunalu ilisimannittoralugit ilissinnut saqqummiuppakka inuuneq toqulu, pilluaqqussut perloqqussullu. Inuuneq qinerniaruk illit kinguaassatillu inuuginnaqqullusi! [Jehova] Guutit asassavat naalassallugulu attavigittuinnarlugulu.” (5 Mosesi 30:19, 20) Israelikkut Guutimut ilumoortuaratillu Mosesip kajumissaarutaa malillugu iliunngillat, inuunerulli Mosesip eqqaasaata angunissaanut piumasaqaatit tunngaviusut pingasut allanngorsimanngillat. Jiisusimit allanillu eqqaaqqinneqarput.
17 Siullermik, ‘Jehova Guuterput asasariaqarparput’. Jehovamik asanninnerput ersersittarparput taassuma aqqutigeqqusai naapertuilluartut naapertorlugit iliuuseqartarnitsigut. (Matthæusi 22:37) Aappassaanik, ‘naalattariaqarparput’ oqaasia atuaqqissaartarlugu inassutaalu maleruartarlugit. (1 Johannesi 5:3) Taakkununnga ilaavoq kristumiut ataatsimiinnerinut najuuttuartarneq, tassanimi Biibilimit atuartoqartarpoq allassimasullu nassuiarneqartarlutik. (Hebræerit 10:23-25) Pingajussaanik, ‘Jehova attavigittuinnartariaqarparput’. Uagut sunilluunniit nalaataqaraluarutta Guutimut uppertuarta taassumalu ernerata maligassiaa malillugu. — 2 Korinthimiut 4:16-18.
18. (a) Sallusuissut 1914-imi The Watch Tower-imi qanoq allaatigineqarpa? (b) Ullumikkut sallusuissutip qaamarna pillugu qanoq misigisariaqarpugut?
18 Sallusuissummut Biibilimeersumut naapertuuttumik inuuneq pilluaqqussutaangaarpoq. 1914-imi oqaaseqaat pingaarutilik una The Watch Tower-imi atuarneqarsinnaavoq: ‘Inuiaannginnerpugut pilluaqqusaallutillu pilluartut? Guuterput aalajaatsuunnginnerpa? Pitsaanerusumik ilisimasaqartoqaruni taassuma tamanna ilannguffigiliuk. Arlarsi pitsaanerusumik nassaaruni neriuppugut oqaluttuutissagitsigut. Uagut Guutip oqaasiani nanisimasatsinnit pitsaanerusumik, allaat nanisimasatsitulli pitsaatigisumik, ilisimasaqanngilagut. Guuti ilumoortoq pillugu eqqorluartumik ilisimasaqarnerup uummatitsinnik eqqissisitsillunilu nuannaartitsinera inuunitsinnullu pilluaqqussutaanera allaaseriuminaappoq. Guutip ilisimassusianik, naapertuilluarneranik, pissaaneranik asanninneranillu oqaluttuat isumatsinnik uummatitsinnillu nalerisimaartitsilluinnarput. Ujaasisariaaruppugut. Guuti pillugu ilisimasaqarnerulernissarput kissaatiginerpaavarput.’ (The Watch Tower, 15. decembari 1914, qupp. 377, 378) Anersaakkut qaamanermik sallusuissummillu qujamasuutiginninnerput allanngorsimanngilaq. Aap, ‘Jehovap qaamasuani inuunitsinnik’ nuannaarutiginninnissamut maanna pissutissaqarneruvugut. — Esaja 2:5; Tussiaat 43:3; Ussatit 4:18.
19. Sooq kuisinnissamut piukkunnarsisimasut nangaanatik kuisittariaqarpat?
19 ‘Jehovap qaamasuani inuujumaguit’ sulili kristumiutut tunniulluinnarsimanallu kuisissimanngikkuit, nangaaqinak. Kuisinnissamut piumasaqaatit Biibilimiittut eqqortinniarlugit iliuuserisariaqakkatit iliuuserikkit. Kuisinnitsigut immikkut ittumik ersersissavarput Guutip Kristusillu iliuuserisimasaat qujamasuutigalutigit. Pigisat naleqarnerpaaq — inuunerit — Jehovamut tunniuguk. Ersersiguk Guutip piumasaatut iliorusullutit erneranik malinninnikkut. (2 Korinthimiut 5:14, 15) Qularutissaanngilluinnarpoq tamanna inooriaasiusoq pitsaanerpaaq! (w10 02/15-E)
Qanoq akissavit?
• Kuisinneq sumut assersuutaava?
• Tunniulluinnarneq kuisinnerlu sunik pilluaqqussutissartaqarpat?
• Jiisusip ilinniarfiginissaa sooq pingaaruteqarpa?
• Inooriaatsimik pitsaanerpaamik aalajangiusimanninnissamut suna iluaqutigissavarput?
[Atuaqqissaarnermi apeqqutit]
[Qupp. 26-mi assiliartaq]
Kuisinnikkut ersersissavat inooriaaseq pitsaanerpaaq qinersimallugu
[Qupp. 27-mi assiliartat]
‘Qutsinnerussaartup toqqorsimaffianiippit’?