Najorseqqilaa

ALLEN aqqanilinnik ukioqarluni imigassamik atornerluisalerpoq. * Ikinngutinilu orpippassuarni pinnguarlutik filmini isiginnaarsimasaminni inuttaasut ilaartarpaat. Inuit ilaagaat piviusuunngillat, imigassarli imigaat piviusuuvoq.

Tony 40-nik ukioqarluni unnuit tamaasa imigassartornerugaluttuinnarpoq. Naggataatigut nalulerpaa ullormut qanoq imigassartortigisarnerluni.

Allen imigassamik ajornartorsiutiminut tunngatillugu ikiortissarsiorpoq. Tonyp ilaquttami ikinngutimilu isumassuillutik ikiuiniarnerat itigartippaa. Allen ullumikkut inuuvoq inuuninilu oqaluttuarisinnaallugu; Tony ukiualuit matuma siorna imerpallaarsimanermi kingorna angallannikkut ajutoornermi toquvoq.

Inuk aatsaat kisimiitsilluni imerpallaartaraluarpalluunniit, taassuma atuivallaarnera allanut sunniuteqanngitsoorsinnaanngilaq, kingunerisaalu amerlanertigut alianartuusarput. Imigassamik atornerluineq oqaatsikkut timikkullu nakuusernermik, saassussinermik toqutsinermillu, angallannermi sulinermilu ajutoornermik, aamma peqqiilliuuterpassuarnik kinguneqarajuppoq. Imigassamik atornerluineq ukiut tamaasa innuttaaqatigiinnut kroninik milliardilinnik akeqartarpoq, minnerunngitsumillu inunnut ataasiakkaanut, ilaqutariinnut meeqqanullu inuttut misigissutsikkullu ajoqutaasarpoq.

U.S. National Institutes of Health-imit oqaaseqaatigineqarpoq ‘akuttunngitsumik imigassartortartut tamarmiunngitsoq imigassamik ajornartorsiuteqartut, imigassamillu ajornartorsiuteqartut tamarmiunngitsoq ullut tamaasa imigassartortartut’. Imerajuttuunngitsut ilarpassuisa misigiitsoorlutik imigassartorpallaartarneq ileqquliussimavaat. Allat ilaannikkuinnaq imigassartortarput, imigassartutuaraangamilli imigassartungaatsiartarlutik.

Imigassartorniarlutit aalajangeruit, taava qanoq atsigisoq ingasappallaarpa? Qanoq ilillutit nalussanngiliuk qaqugukkut najorseqqilaassanak? (Ussatit 23:29, 30) Allaaserisani tulliuttuni tamatumunnga tunngasunik atorluarsinnaasunik paasissutissaqarpoq.

[Quppernerup ataani ilanngussaq]