‘Nakimaallutit Guutip oqaasia nalunaajaatigiuk’

“Anersaamik Illernartumik ilumioqangaalerput, Guutillu oqaasia nalunaajaatigaat siooranatik [nakimaallutik, NV].” — APUSTILIT SULIAAT 4:31.

1, 2. Sooq sapinngisamik pitsaanerpaamik oqaluussiniartarpugut?

ULLUT pingasut qaangiuppata toqusussaalluni Jiisusip ajoqersukkani ima oqarfigai: “[Naalagaaffimmik] iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.” Jiisusip makititaasimasup qilaliannginnermini ajoqersukkani peqquai ‘inunnik inuiannit tamaneersunik ajoqersuganngortitsiortoqqullugit, ajoqersorlugillu taakkununnga peqqussutini tamaasa maleruaqqullugit’. (NV) Aamma neriorsorpai najorumaarlugit “ullut tamaasa . . . silarsuup naggatissaanut allaat”. — Matthæusi 24:14; 26:1, 2; 28:19, 20.

² Jehovamut nalunaajaasuugatta oqaluussineq ukiuni hundredelinni siullerni aallartinneqartoq ingerlapparput. Guutip naalagaaffianik oqaluussissutiginnilluni ajoqersuganngortitsiortorlunilu inuunermik annaassiniarnertut pingaaruteqartigisumik allamik suliassaqanngilaq. Taamaattumik pingaaruteqarluinnarpoq sapinngisamik pitsaanerpaamik oqaluussinissarput. Allaaserisami matumani sammissavarput anersaamit illernartumit siulersortinnerput nakimaalluta oqaluussinissamut qanoq iluaqutigisinnaagipput. Allaaserisani tulliuttuni marlunni sammissavarput Jehovap anersaavata ikiuinera qanoq oqaluussillaqqissunnguutigisinnaagipput aamma aalajangersimasumik oqaluussisarnissamut qanoq iluaqutigisinnaagipput.

Nakimaattariaqarpugut

3. Guutip naalagaaffianik oqaluussissutiginnikkumalluni nakimaannissaq sooq pisariaqarpa?

³ Guutip naalagaaffianik oqaluussissutiginninnermut tunngatillugu Guutip uagutsinnut suliassiissutigisaa immikkut pisinnaatitaaffiuvoq angingaartoq. Aammali unamminiagassartaqarpoq. Ilumoorpoq Guutip naalagaaffia pillugu nutaarsiassamik nuannersumik ilassinnittoqartartoq, inuppassuilli Noap nalaani inuusimasut pinerattut pipput. Jiisusi ima oqarpoq: “[Aatsaat] paasisaqalerput ulersuaq nalliummat tamaasalu nungutillugit.” (Matthæusi 24:38, 39) Aamma inoqarpoq uagutsinnik mitaatiginnillutillu akerlilersuisunik. (2 Petrusi 3:3) Assersuutigalugu naalakkersuisut upperisarsiornikkulluunniit oqartussaasut, atuaqatit imaluunniit allaat qanigisat akerlilersuisinnaapput. Akerlilersorneqarnitta saniatigut nammineq sanngiissuteqarpugut; immaqa ittoortuuvugut itigartinneqarnissarpullu annilaangagisarlugu. Aap, assigiinngitsorpassuit pissutigalugit Guutip oqaasianik nakimaalluta oqaluussinissarput ajornakusoortissinnaavarput. (Efesosimiut 6:19, 20) Oqaluussinermili pinertusaassagutta nakimaattariaqarpugut. Taavami nakimaannerunissamut suna iluaqutigissavarput?

4. (a) Nakimaatsuuneq qanoq paasisariaqarpa? (b) Apustili Paulusi qanoq ililluni Thessalonikamiunut oqaluussinissamut sapiissuseqalerpa?

⁴ Grækerit oqaasiat ‘nakimaanneq’-mik nutserneqartoq “isertuanngissusermik, ilumoornermik ilakkuminartuunermillu” isumaqarpoq.  Aamma sapiinnermik, isumalluarnermik sioorannginnermillu isumaqarsinnaavoq. Nakimaatsuuneq sorraannertut kannguttaannertulluunniit paasisariaqanngilaq. (Kolossemiut 4:6) Soorunami nakimaatsoorusuppugut, aammali kikkut tamaasa eqqisseqatigerusuppavut. (Romamiut 12:18) Aammattaaq Guutip naalagaaffia pillugu nutaarsiassamik nuannersumik oqaluussissutiginnikkaangatta nakimaannermut periaaserinnermullu tunngatillugu oqimaaqatigiissaariuartariaqarpugut, piaarinata ajuallatsitsisuunnginniassagatta. Tassa nakimaassinnaajumalluta pissuserineqartussanik aalajangersimasunik ineriartortitsisariaqarpugut. Taamatulli nakimaatsuuneq imminut tatiginermik namminerluunniit qamuuna nukittunermik pissuteqanngilaq. Apustilip Paulusip angalaqataasalu ‘Filippimi naalliutsitaaqqammeraluarlutik’ Thessalonikamiittut oqaluussiffigaat. Qanoq ilillutik oqaluussinissaminnut nakimaassuseqalerpat? Paulusi ima allappoq: “Guutitsinni”, tassa Guutip ikiuineratigut. (Atuaruk 1 Thessalonikamiut 2:2). Jehovap Guutip aamma sioorajunnaarsissinnaavaatigut tamatumunngalu assingusumik nakimaassuseqalersilluta.

5. Petrusi, Johannesi ajoqersukkallu allat qanoq ilillutik nakimaassuseqalerpat?

⁵ Apustilit Petrusi Johannesilu ‘siulersortinit, utoqqaanertanit allakkanillu ilisimasunit’ sioorasaarneqaramik ima oqarput: “Nammineq aalajangersiuk Guutimut eqqortuliornerunersoq ilissi taassumannga annerusumik naalanneqassagussi; uagulli eqqartunngitsoorsinnaanngilavut takusimasavut tusarsimasavullu.” Taakkua uppeqataasalu Guuti qinnuiginngilaat malersuineq unitseqqullugu, imali oqarput: “[Jehova], sioorasaarutaat arajutsinaveersaakkit, kiffatillu pisinnaatikkit oqaatsit siooranngivillutik [nakimanngivillutik, NV] oqaatigeqqullugu.” (Apustilit Suliaat 4:5, 19, 20, 29) Jehovap taakkua qinnutaat qanoq akivaa? (Atuaruk Apustilit Suliaat 4:31). Jehovap taakku nakimaallutik oqalunnissaannut anersaaminik illernartumik ikiorpai. Uagut Guutip anersaavanit aamma taamatut ikiorneqarsinnaavugut. Qanorli ililluta Guutip anersaavanik pisinnaavugut, aamma oqaluussinermi taassuma anersaavanit qanoq ililluta siulersortissinnaavugut?

Qanoq ililluni nakimaassuseqalertoqartartoq

6, 7. Guutip anersaavanik qanoq ililluta toqqaannarnerpaamik pisinnaavugut? Assersuuteqarit.

⁶ Guutip anersaavanik toqqaannarnerpaamik pisinnaavugut qinnutigigutsigu. Jiisusip tusarnaartuni ima oqarfigai: “Ilissimi ajortuususi qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.” (Lukasi 11:13) Aap, anersaaq illernartoq qinnutigiuartariaqarparput. Oqaluusseriaatsit aalajangersimasut — immaqa aqqusinermi, torrutiinnarlugu niuertarfinniluunniit oqaluussineq — annilaanganarigutsigit Jehova qinnuigisinnaavarput anersaaminik tuneqqulluta pisariaqartumillu nakimaassuseqarnissatsinnut ikioqqulluta. — 1 Thessalonikamiut 5:17.

⁷ Oqaluussisartoq Rosamik atilik taamaaliorpoq. * Ullut ilaanni atuarfimmi Rosap suliffiani ilinniartitsisup meeqqat qanoq ajortigisumik pineqartarnerat pillugu nalunaarusiaq atuarpaa. Ilinniartitsisup atuakkani isumatsassutigingaaramigit ima oqarpoq: “Silarsuaq-una qanoq ittoq inuuffigigipput?” Rosap oqaluussinissamut periarfissaq tamanna maangaannartikkumanngilaa. Oqaloqatiginissaanut qanoq ililluni sapiissuseqalerpa? Rosa ima oqarpoq: “Jehova qinnuigaara anersaaminik ikioqqullunga.” Nalunaajaalluarpoq, isumaqatigiippullu kingusinnerusukkut oqaloqatigeeqqinniarlutik. Aamma eqqarsaatigeriaruk Milane, tallimanik ukiulik New Yorkimi najugaqartoq. Ima oqarpoq: “Atuariartunnginninni anaanagalu Jehovamut qinoqqaartuaannarpugut.” Suna qinnutigisarpaat? Milanep upperisaminik illersuinissamut Guutilu pillugu oqaluttuarnissamut sapiissuseqarnissaa qinnutigisarpaat. Anaanaa ima oqarpoq: “Tamanna Milanep inuuissiornerit nalliuttullu allat  qanoq isumaqarfiginerlugit oqaluttuarnissaminut taakkualu peqataaffiginnginnissaannut iluaqutigisimavaa.” Misigisanit taakkunannga erserpoq qinuneq nakimaatsuunissamut iluaqutigisinnaagipput, ilaa?

8. Pruffiiti Jeremia nakimaannermut tunngatillugu sumik ilinniarfigisinnaavarput?

⁸ Eqqarsaatigiuttaaq pruffiitip Jeremiap nakimaatsuunissamut suna iluaqutigineraa. Jehovap inuiannut pruffiitinngortimmani Jeremia ima oqarpoq: “Inuusuttuuvunga; oqalunneq naluvunga!” (Jeremia 1:4-6) Jeremiali oqaluussiuarmat oqaluussineralu pikkunangaarmat naggataatigut inuppassuarnit ajunaarnissamik siulittuisartutut isigineqalerpoq. (Jeremia 38:4) Taassuma Jehovap eqqartuussissutai ukiut 65-it sinnerlugit sapiilluni oqaluussissutigai. Sapiilluni qunusuillunilu oqaluussinera Israelimi ilisimaneqarluangaarmat Jiisusi ukiut 600-t missiliorlugit tamatuma kingorna nakimaalluni oqaluussimmat ilaat isumaqarput Jiisusi Jeremiaasoq toqusunit makissimasoq. (Matthæusi 16:13, 14) Pruffiitip siornatigut taama pinaatsigigaluartup ittoornini qanoq ajugaaffigaa? Ima oqarpoq: “Misigilersarpara [Guutip oqaasia] soorlu ilunni [inneq ikumasoq], soorlu saanikka ikuallanneqartut.” (Jeremia 20:9) Aap, Jeremiap Jehovap oqaasia nakussatsissutigalugulu oqaluussinissamut kajumississutigaa.

9. Sooq Guutip oqaasia Jeremiamut sunniuteqarsimanermisut uagutsinnut sunniuteqarsinnaava?

⁹ Paulusip hebræerit ima allaffigai: “Guutip oqaasia uumavoq sunniisinnaassuseqarlunilu panamillu illuttut kiinalimmit ipinnerulluni. Magguttarpoq avissaartillugu tarneq anersaamit taamatullu aamma pateq saanermit, uummatip eqqarsaatai isumaalu eqqartuuttarlugit.” (Hebræerit 4:12) Guutip oqaasia Jeremiamut sunniuteqarsimanermisut uagutsinnut sunniuteqarsinnaavoq. Eqqaamasariaqarparput inuit Biibilip allanneqarneranut atorneqaraluartut, Biibili imaqaannanngitsoq allakkanik katersukkanik inuit ilisimassusiannik imalinnik. Biibili Guutimit isumassarsiarititaavoq. 2 Petrusi 1:21-mi ima allassimavoq: “[Pruffiitip] siulittuutaa inuup piumasaagut tutsiutinngisaannarpoq, Anersaamilli Illernartumit sunnertillutik inuit Guutimit pisumik oqaaseqartarput.” Siunertaqarluartumik nammineq Biibilimik atuaqqissaartarnissaq piffissaqarfigisarutsigu isumarput tusarliussamik anersaamit illernartumit isumassarsiarititaasumik immersortassavarput. (Atuaruk 1 Korinthimiut 2:10). Tusarliussaq tamanna ilutsinni ‘innertut ikumasutut’ ilersinnaavoq, nammineq pigiinnarsinnaajunnaarlutigu.

10, 11. (a) Nakimaallisinnaajumalluta qanoq atuaqqissaartariaqarpugut? (b) Nammineq atuaqqissaartarnerit pitsanngorsarniarlugu iliuuseriniakkannik minnerpaamik ataatsimik eqqaasaqarit.

¹⁰ Nammineq Biibilimik atuaqqissaartarnerput uagutsinnut sunniuteqarluassappat, ima atuaqqissaartariaqarpugut Biibilimi tusarliussaq ilorlikkut pissusitsinnut sunniuteqartillugu. Assersuutigalugu pruffiiti Ezekieli takorruuisinneqarmat takorruugaani  peqquneqarpoq mappersakkamik inuiannut oqaatseriitsunut sakkortuumik tusarliussassartalimmik nereqqullugu. Ezekielip tusarliussaq pigiliulluinnartussaavaa, misigissutsiminut sunniuteqartillugu. Taamaaliorneq tusarliussamik ingerlatitseqqiinermik nuannersisitsissaaq — tungusunnitsuummik mamarsarnertut ilersitsilluni. — Atuakkit Ezekieli 2:8–3:4, 7-9.

¹¹ Pissutsit uagut atukkavut Ezekielip atugaanut assingupput. Ullumikkut inuppassuaqarpoq Biibilimi qanoq allassimasoqarneranik tusarusunngitsunik. Pinertusaarluta Guutip oqaasia oqaluussissutigisinnaajumallugu pingaaruteqarpoq ima atuaqqissaarnissarput, Biibilimi tusarliussaq pigiliulluinnarlugu. Aalajangersimalluinnartumik, ilaannikkuinnaanngitsoq, Biibilimik atuaqqissaartariaqarpugut. Tussiaasiortutut ima erinarsortutut isiginnittaaseqartariaqarpugut: “Qanerma oqaasii uummatimalu eqqarsaatai ilinni iluarinarilit, [Jehova], qaarsora aniguisitsisigalu!” (Tussiaat 19:15) Pingaaruteqarpoq atuakkatta eqqarsaatigeqqissaarnissaannut piffissaqartarnissarput, sallusuissut Biibilimiittoq uummammiuliulluinnarniassagatsigu. Aap, nammineq atuaqqissaartarnerput pitsanngorsarniarlugu ilumut ilungersortariaqarpugut! *

12. Sooq ataatsimiinnerit Guutip anersaavanik iluaqutiginninnissamut iluaqutigisarpavut?

¹² Jehovap anersaava illernartoq aamma iluaqutigisinnaavarput “[isumageqatigiittarluta] asaqatigiinnermut ajunngitsuliornermullu kajumissaaqatigiittarluta, ilagiittut katisimasarnivut tamatigut peqataanngitsoorfigisarnatigit”. (Hebræerit 10:24, 25) Ataatsimiigiartuarnissarput, tusarnaaqqissaartarnissarput ilikkakkatsinnillu atuisarnissarput ilungersuutigigaangatsigu anersaamit illernartumit siulersortittarpugut. Tassami, Jehovap ilagiit aqqutigalugit anersaaminik siulersortarpaatigut. — Atuaruk Saqqummersitat 3:6.

Nakimaannerup iluaqutissartai

13. Kristumiut siulliit oqaluussinermi naammassisaat sumik ilinniarfigisinnaavavut?

¹³ Anersaaq illernartoq nukiuvoq qilammi nunamilu sakkortunerpaaq, aamma inunnik Jehovap piumasaatut iliorsinnaanngortitsisinnaavoq. Tamatuma sunniineratigut ukiuni hundredelinni siullerni kristumiut oqaluussersuataarput. Nutaarsiassaq nuannersoq “qilaap ataani pinngortitanut tamanut” oqaluussissutigaat. (Kolossemiut 1:23) Taakkua amerlanersaat ‘inuinnaallutillu immikkut ilinniagaqarsimanngitsuunerat’ eqqarsaatigalugu erseqqippoq nukimmik imminnit nukittunerusumik kajumississuteqarnerat. — Apustilit Suliaat 4:13.

14. ‘Anersaakkut tamaviaarnissamut’ suna iluaqutigisinnaavarput?

¹⁴ Anersaamit illernartumit siulersortittarutta,  tamanna oqaluussinermi sapiinnissamut iluaqutigissavarput. Anersaamik qinnutiginnittuarnerput, isumaqarluartumik nammineq atuaqqissaartarnerput, qinunikkut atuakkatsinnik eqqarsaatiginnittarnerput kristumiullu ataatsimiinnerinut najuuttuarnerput ‘anersaakkut tamaviaalissutigissavavut’. (Romamiut 12:11) ‘Juuteq Apollosimik atilik Alexandriamioq oqallorissorsuaq’ pillugu Biibilimi ima allassimasoqarpoq: “[Anersaakkut] ilungersorluni Jiisusi pillugu sukumiisumik oqaluussivoq ajoqersuillunilu.” (Apustilit Suliaat 18:24, 25) ‘Anersaakkut tamaviaarnitsigut’ illumiit illumut aamma torrutiinnarlugu oqaluussinermi nakimaannerusinnaavugut.

15. Oqaluussinermi nakimaannerulernerput qanoq iluaqutigisarparput?

¹⁵ Nakimaannerunerput oqaluussinermi iluaqutigissavarput. Oqaluussinermut isiginnittaaserput pitsaanerulissaaq suliatta tamatuma qanoq pingaaruteqartigalunilu iluaqutaatigineranik paasinninnerulertaratta. Oqaluussinermi sapinngisarput tamaat iliuuseqartarnerput pissutigalugu angorniornerullutalu nuannaarnerusarpugut. Aamma oqaluussinerup qanoq nukinginnartigineranik eqqumaffiginninnerulernerput pissutigalugu aallussilluarnerulertarpugut.

16. Oqaluussinermi aallussilluarpiarunnaarsimagutta susariaqarpugut?

¹⁶ Taavami siornatigutut aallussilluartigiunnaarsimagutta? Unneqqarilluni imminut misissorneq pissusissamisuussaaq. Paulusi ima allappoq: “Immissinnik paasiniaaffiginiaritsi uppernermiinnersusi! Immissinnik misiligitsi!” (2 Korinthimiut 13:5) Imminut ima aperisinnaavugut: ‘Suli anersaakkut tamaviaarpunga? Jehova qinnuigisarpara anersaaminik tuneqqullunga? Qinnutinnit ersertarpa taassuma piumasaatut iliorsinnaajumallunga taassumannga nakussatsinneqarnissara qularutiginngikkiga? Qinnutinnit ersertarpa uagutsinnut suliassiissutigineqartoq pingaartikkiga? Atuaqqissaartarnera qanoq ingerlava? Atuakkama tusarnaakkamalu eqqarsaatigeqqissaarnissaat qanoq piffissaqarfigitigisarpara? Ilagiit ataatsimiinnerini qanoq peqataatigisarpunga?’ Apeqqutit tamakkua eqqarsaatigeqqissaarnerisigut sutigut pitsanngorsaasinnaanersugut paasisinnaavarput.

Guutip anersaava ilinnik nakimaallisitsisiguk

17, 18. (a) Ullumikkut qanoq oqaluussisoqartigaa? (b) Guutip naalagaaffia pillugu nutaarsiassaq nuannersoq ‘nakimmateqarata’ qanoq oqaluussissutigisinnaavarput?

¹⁷ Jiisusip makititaasimasup ajoqersukkani ima oqarfigai: “[Anersaap] Illernartup tikippasi pissatsitaajumaarpusi, nalunaajaasigissavassilu Jerusalemimi Judæamilu tamarmi Samariamilu nunarsuullu isua tikillugu allaat.” (Apustilit Suliaat 1:8) Suliaq taamani aallartinneqartoq maanna aatsaat taama aallunneqartigaaq. Jehovap Nalunaajaasui 7 millioninit amerlanerusut Guutip naalagaaffianik tusarliussaq nunani 230-nit amerlanerusuni oqaluussissutigaat, ukiumullu akunnerit 1,5 milliardingajaat oqaluussinermut atortarpaat. Aallussilluarluta suliamut suliareqqinneqanngisaannartussamut tamatumunnga peqataanerput pissanganangaarami!

¹⁸ Ukiuni hundredelinni siullernisut Guutip anersaavata siulersuineratigut ullumikkut silarsuaq tamakkerlugu oqaluussisoqarpoq. Anersaamit siulersortikkutta ‘nakimmateqarata’ oqaluussissaagut. (Apustilit Suliaat 28:31) Taamaattumik anersaamit siulersortittuarta Guutip naalagaaffia pillugu nutaarsiassaq nuannersoq oqaluussissutigalugu!

[Quppernerup ataani ilanngussat]

Suna ilikkarpiuk?

• Sooq Guutip oqaasia oqaluussissutigigaangatsigu nakimaatsuusariaqarpugut?

• Kristumiut siulliit nakimaallutik oqaluussinissaminnut suna iluaqutigaat?

• Qanoq ililluta nakimaallisinnaavugut?

• Nakimaannerput qanoq iluaqutigisarparput?

[Atuaqqissaarnermi apeqqutit]

[Qupp. 13-mi assiliartaq]

Angajoqqaat meeqqatik nakimaallinissaannut qanoq ikiorsinnaavaat?

[Qupp. 14-mi assiliartat]

Naatsumik qinuneq oqaluussinermi nakimaannissannut iluaqutigisinnaavat