Anersaamut naapertuuttumik saqisariaqarpugut tunniulluinnarnerpullu eqqortillugu

“Anersaamut naapertuuttumik saqiuaritsi, taava uinngup kajungerisai suulluunniit naammassinavianngilasi.” — GALATIAMIUT 5:16, NV.

1. Piinsip ulluani kuissutit suut kuissutigineqarpat?

JIISUSIP ajoqersugai ukiumi 33-mi piinsip ulluani oqqanik oqalukkamik, anersaamik illernartumik kuisinnermik kingorna taamaaliorput. Anersaap tunissutaasa tupinnartuliorsinnaatitsisut ilaat atorpaat. (1 Korinthimiut 12:4-10) Taamaaliorsinnaalersinneqarnerat apustilillu Petrusip oqalugiaataa qanoq sunniuteqarpat? Inuit ilarpassuisa “uummatimikkut anniutigaat”. Petrusip kajumissaarineratigut allamik isumataarlutillu kuisipput. Oqaluttuarisaanermi pisimasuik tamanna ima allaatigineqarpoq: “Oqaasiinik ilassinnittut kuisipput, ullorlu taanna inuit 3.000-ingajaat ilagiinnut ilanngutitaapput.” (Apustilit Suliaat 2:22, 36-41) Jiisusip peqqusisimaneratut “Ataatap Ernerullu Anersaallu Illernartup aqqini” (NV) imermi kuisissimassapput. — Matthæusi 28:19.

2, 3. (a) Anersaamik illernartumik kuisinnerup anersaallu illernartup aqqani kuisinnerup assigiinngissutaat nassuiaruk. (b) Sooq imermi kuisinneq ullumikkut kristumiunut ilumoortunut tamanut piumasaqaataava?

² Anersaamik illernartumik kuisinneq anersaallu  illernartup aqqani kuisinneq assigiinngissuteqaramik? Aap. Anersaamik illernartumik kuisittut Guutimit anersaakkut kinguaassiarititaasutut ‘ernioqqittarput’. (Johannesi 3:3) Guutip naalagaaffiani qilammiittumi kunngiusussatut palasiusussatullu taninneqarput, aamma Kristusip timaanut anersaakkut ittumut ilaapput. (1 Korinthimiut 12:13; Galatiamiut 3:27; Saqqummersitat 20:6) Tassa kuissut tamanna — anersaamik illernartumik kuissut — kuissutigineqarpoq Jehova piinsip ulluani tamatumalu kingorna Kristusip kingornussisussaaqataanik toqqaammat. (Romamiut 8:15-17) ‘Anersaammi illernartup aqqani’ imermi kuineqarnermut, iliuutsimut Jehovap Nalunaajaasuisa ataatsimeersuarneranni pisartumut, tunngatillugu qanoq ippa?

³ Imermi kuisinneq iliuusiuvoq kristumiut ilumoortut iliuuserisartagaat nangaanngivillutik Jehovamut Guutimut tunniulluinnarnertik ersersinniarlugu. Qilammut qaaqquneqartut taamaaliorsimasarput, aammali ullumikkut angutit arnallu millionillit nunarsuarmi naassaanngitsumik inuunissamik neriugisallit tamanna iliuuserisariaqarpaat. Qanorluunniit neriuuteqaraluaraanni Guutip isaani akuerineqarsinnaajumalluni Ataatap Ernerullu anersaallu illernartup aqqini imermi kuisinnissaq pisariaqarpoq. Kristumiut taamaaliortut tamarmik piumaffigineqarput ‘anersaamut naapertuuttumik saqiuarnissamik’. (Galatiamiut 5:16, NV). Illit anersaamut naapertuuttumik saqivit taamaalillutillu tunniulluinnarnerit eqqortillugu?

‘Anersaamut naapertuuttumik saqineq’ qanoq paasisariaqartoq

4. ‘Anersaamut naapertuuttumik saqineq’ qanoq paasisariaqarpa?

⁴ ‘Anersaamut naapertuuttumik saqineq’ anersaamit illernartumit sunnertinnertut, ulluinnarni inuunermi tamatumannga siulersortinnertut, paasisariaqarpoq. Galatiamiunut allakkani kapitali 5-imi anersaamit illernartumit siulersorneqarnerup uinimmillu naalakkersorneqarnerup assigiinngissutaat eqqaaneqarput. — Atuakkit Galatiamiut 5:17, 18.

5. Anersaamit illernartumit siulersortittut suliat suut ingalassimasarpaat?

⁵ Anersaamit illernartumit siulersortittut uinngup suliai ingalassimaniartarpaat. Taakku ilaatigut tassaapput “kinguaassiuutitigut inuunerlunneq, mingunnartuliorneq, ileqqorlunneq, guutipilussiorneq, ilisiinneq, akerariinnerit, saqitsaanneq, sinnganeq, kamajassuseq, namminissarsiorneq, assuariinnerit, immikkoorniarneq, qinngarsuinerit, imerajunneq, inuulluarumatuallaarnerit”. (Galatiamiut 5:19-21) ‘Anersaap ikiuineragut timip suliai toqunneqartarpullusooq.’ (Romamiut 8:5, 13) Taamaaliortarneq isumap anersaamut atasunut sammitinnissaanut uinngullu kajungerisaanit naalakkersortinnani anersaap siulersuineranik malinninnissamut iluaqutaassaaq.

6. Anersaap inerititaanik ersersitsiumalluni suut pisariaqarpat? Assersuuteqarit.

⁶ Anersaaq illernartoq ilinnut sunniuteqartikkukku, tamanna pissuserineqartussanik Guutip iluarisaanik, ‘anersaap inerititaanik’, ersersitsinissamut iluaqutigissavat. (Galatiamiut 5:22, 23) Illilli nammineq iliuuseqartariaqarputit. Assersuuteqariarta. Naasorissaasup nunaatini naggorissarpaa. Seqinnernanilu imeqanngitsuuppat katersugassaqarnissani soorunami ilimagisinnaanngilaa. Anersaaq illernartoq seqinnersumut assersuunneqarsinnaavoq. Anersaap inerititaanik ersersitsisinnaajumalluta pisariaqartipparput. Aammali naasorissaasoq katersuisinnaajumalluni nammineq iliuuseqartariaqarpoq. (Ussatit 10:4) Aap, uummativit “naajartorfianik” qanoq naggorissaalluartiginerit inerititap anersaap illernartup ilinni  naajartortitaata pitsaassusianut annertussusianullu aalajangiisooqataasarpoq. Imminut ima aperigit: ‘Anersaap illernartup suleqatigineratigut taanna inerititaminik naajartortitsisippara?’

7. Sooq anersaap illernartup inerititaanik ineriartortitsisinnaajumalluni atuaqqissaarnissaq eqqarsaatiginneqqissaarnissarlu pisariaqarpat?

⁷ Aammattaaq naasorissaasup katersugassaqarluarumalluni naatitani imertertariaqarpai. Anersaap inerititaanik ineriartortitsiumallutit sallusuissutip ernga Biibilimiittoq ilagiillu kristumiut aqqutigalugit pineqartartoq pisariaqartippat. (Esaja 55:1) Qularnanngitsumik inuppassuarnut ilisimatitsissutigisimavat Biibili anersaaq illernartoq aqqutigalugu pilersinneqartoq. (2 Timotheusi 3:16) Aamma inussiaqatigiit aalajaallutillu silatuut sallusuissutip ernganik minguitsumik paasinninnerunissatsinnut ikiorpaatigut. (Matthæusi 24:45-47) Tassa anersaamit illernartumit siulersorneqarumalluta Guutip oqaasia atuarlugulu eqqarsaatigeqqissaartariaqarparput. Taamaaliortareeruit pruffiitit paasissutissanik taamanikkut pigisaminnik ‘paasiniaaqqissaarlutillu eqqarsaatiginneqqissaartartut’ ilaarsimassavatit. Maluginiarnarpoq allaat inngilit kinguaassaq neriorsuutigisaq pillugu ilagiillu kristumiut tanitat pillugit sallusuissutinik anersaakkut ittunik soqutiginningaarnerat. — 1 Petrusi 1:10-12.

Anersaamit sunnerneqarneq — qanoq ililluni?

8. Sooq Jehovap anersaaminik tuneqqullutit qinnuiginissaa pingaaruteqarpa?

⁸ Biibilimilli atuaqqissaarnerinnaq eqqarsaatiginneqqissaarnerinnarlu naammanngillat. Aamma Jehova qinnuigiuartariaqarpat ikioqqullutit siulersoqqullutillu. Taanna “qinnutigisavut paasisinnaasavullu akimungaarlugit [iliorsinnaavoq]”. (Efesosimiut 3:20; Lukasi 11:13) Illilli qanoq akissagaluarpit ima aperineqaruit: “Sooq Guutimut ikioqqullunga qinujuassaanga ‘suliluunniit qinnuiginngikkinni pisariaqakkakka ilisimareerpagit’?” (Matthæusi 6:8) Tamatumunnga pissutaasut ilaat tassaavoq anersaap illernartup qinnutigineratigut ersersittarakku Jehovamik tatiginnillutit. Ilinnut ikioqqusoqarpat qularnanngitsumik taanna ikiorniarlugu sapinngisat tamaat iliuuseqassagaluarputit, immaqa ikioqqunera taamaalillunilu ilinnik tatiginninnerminik ersersitsinera pissutigiinnavillugu. (Naleqqiuguk Ussatit 3:27). Taamatuttaaq Jehovap nuannaarutigisarpaa qinnuigigaangakku anersaaminik tuneqqullutit, tuniumaarpaatillu. — Ussatit 15:8.

9. Kristumiut ataatsimiinnerinut najuuttarneq Guutip anersaavanit sunnerneqarnissamut qanoq iluaqutigisinnaaviuk?

⁹ Aamma Guutip anersaavanit sunnerneqarsinnaavutit kristumiut ataatsimiinnerinut ataatsimeersuarnerinullu najuuttarnikkut. Pingaaruteqartupilussuuvoq ilungersorlutit najuunniarnissat saqqummiunneqartunullu tusarnaaqqissaarniarnissat. Tamanna ‘Guutip itissusiinik’ paasinninnissamut iluaqutigissavat. (1 Korinthimiut 2:10) Aamma ataatsimiinnerni akisarnerit iluaqutigisinnaavat. Ataatsimiinnerit sapaatit-akunnerini sisamani kingullerni najuuffigisimasatit eqqarsaatigeriakkit. Akiniarlutit uppernerillu ersersinniarlugu qanoq nappaakulatigivit? Tamatumunnga tunngatillugu pitsanngorsaasariaqarpit? Taamaappat, aalajangerit sapaatit-akunnerini tulliuttuni tamanna iliuuseqarfiginiarlugu. Jehovap peqataarusunnerit maluginiarumaarpaa, anersaaminillu illernartumik tuniumaarpaatit ataatsimiinnerit pissarsiffiginerusinnaaniassagakkit.

10. Anersaamut naapertuuttumik saqisup qaaqqusissut suna allanut ingerlateqqittariaqarpaa?

¹⁰ Anersaamut naapertuuttumik saqinermut ilaavoq qaaqqusissummik Saqqummersitat 22:17-imi eqqartorneqartumik matuminnga ilassinninneq: “Anersaarlu nuliartaarlu oqarput: ‘Qaagit!’  Tusartorlu oqassaaq: ‘Qaagit!’ Imerusuttoq aggissaaq, piumasullu imeq inuussutaasoq akeqanngitsumik pissavaa.” Imermut inuussutaasumut tunngatillugu qaaqqusissut tamanna anersaamit illernartumeersuuvoq, nuliassaqatigiit tanitat aqqutigalugit sulisartumeersuulluni. Qaaqqusissut tamanna ilassisimagukku, taava allanik ‘qaaqqusinissat’ aalajangiusimaviuk? Taamatut inuunermik annaassiniaqataaneq immikkut pisinnaatitaaffiuvoq angingaartoq.

11, 12. Anersaaq illernartoq oqaluussinermut tunngatillugu qanoq pingaaruteqarpa?

¹¹ Suliaq inuunermut pingaarutilik tamanna anersaap illernartup siulersuineratigut suliarineqarpoq. Anersaap illernartup ukiuni hundredelinni siullerni ajoqersuiartortitat angalaarfissanut aallarnerannut pissutaaqataanera pillugu Biibilimi atuarsinnaavugut. Assersuutigalugu oqaluttuarineqarpoq anersaap illernartup apustili Paulusi suleqataalu ‘akornutissaqartilerai Asiami oqaatsip oqaluussissutiginissaanut’; aamma Bityniamukarnissamut akuerisaanngillat. Anersaap taakkua sumiiffinnut taakkununnga angalanissaannut qanorpiaq akornutissaqartilersimanerai naluarput, erseqqipporli anersaap Paulusi Europami oqaluussiffissarujussuarmut siulersoraa. Taanna angut Makedoniamiu ilungersorluni ikioqqusoq pillugu takorruugaqarpoq. — Apustilit Suliaat 16:6-10.

¹² Ullumikkuttaaq silarsuaq tamakkerlugu oqaluussineq Jehovap anersaavanit siulersorneqarpoq. Jehova tupinnartuliornikkut takorruuisitsisarunnaarpoq, tanitalli anersaaq illernartoq atorlugu siulersortarpai. Aamma anersaap qatanngutit kajumissaarpai oqaluussinermi ilinniartitsinermilu sapinngisartik tamaat iliuuseqaqqullugit. Qularnanngitsumik suliamik inuunermut pingaarutilimmik tamatuminnga suliaqaqataavutit. Pissanganartumik tamatuminnga suliaqarnerit nuannaarutiginerulersinnaaviuk?

13. Qanoq ilillutit anersaamut illernartumut siulersortissinnaavit? Assersuuteqarit.

¹³ Anersaamut illernartumut siulersortissinnaavutit ullumikkut Guutip innuttaanut unnersuussutigineqartunik malinninnikkut. Qatanngut arnaq inuusuttoq Japanimiittoq Mihokomik atilik taamaaliorpoq. Pionerinngorlaajulluni misigaaq pulaaqqiineq pikkoriffiginagu; nammineq isumaqarpoq pulaakkaminut soqutiginartumik saqqummiillaqqinnani. Tamatuma nalaani Tjenesten for Riget-imi sivikitsunnguamik qanoq pulaaqqiisoqarsinnaanera pillugu atoriaannaasunik siunnersuuteqarpoq. Taava atuagassiaaraq Nalerisimaarluni qanoq inuusoqalersinnaasoq saqqummerpoq. Paasinarsivorlu taanna Japanimi oqaluussiffissamut naleqqulluartoq. Mihokop atuagassiaaqqap qanoq atorneqarsinnaanera pillugu siunnersuutit, ingammik qanoq ililluni sivikitsunnguamik pulaaqqiisoqarsinnaanera pillugu siunnersuutit, malippai. Sivitsunngitsoq arlalinnik immaqa siornatigut itigartitsisimasunik Biibilimik atuaqqissaaqatitaartalerpoq. Ima oqaluttuarpoq: “Atuaqqissaaqatigisartakkakka ima amerlitigipput utaqqisunut allattorsimaffiliortariaqarlunga — taamaallutimmi aqqaneq-marlunngoraluaramik!” Aap, Jehovap kiffaminut unnersuussutai malillugit anersaamut naapertuuttumik saqiguit naammangaartunik katersuiumaarputit.

Guutip anersaava tutsuigiuk

14, 15. (a) Inuit naammalluinnanngitsut qanoq ilillutik tunniulluinnarnertik eqqortissinnaavaat? (b) Qanoq ilillutit pitsaanerpaanik ikinngutitaarsinnaavit?

¹⁴ Kiffanngortitaagavit suliassaqarputit. (Romamiut 10:14) Immaqa tamatuminnga suliaqarnissamut piukkunnarluinnartutut misiginngilatit. Soorluli tanitanut tunngatillugu taamaattoq, Guuti taannaavoq ilinnik pisinnaanngortitsisoq.  (Atuaruk 2 Korinthimiut 3:5). Tunniulluinnarnerit eqqortissinnaavat sapinngisat tamaat iliuuseqarnikkut Guutillu anersaavanik tutsuiginninnikkut.

¹⁵ Nassuerutigisariaqarpoq Guutimut naammalluinnartumut, Jehovamut, tunniulluinnarnermik eqqortitsinissaq inunnut naammalluinnanngitsunut imaannaanngitsuusoq. Immaqa unamminiakkavit ilagaat siornatigut ilagisarsimasavit illit inooriaaserilersimasannik eqqumiiginninnerat immaqalu ilinnik mitaatiginninnerat. (1 Petrusi 4:4) Puiussanngilalli maanna ikinngutitaarsimagavit, ikinngutitaavillu pingaarnersaat tassaapput Jehova Jiisusilu Kristusi. (Atuakkit Jaaku 2:21-23). Aamma pingaaruteqarpoq qatanngutinik ilagiinniittunik ilisarisimannilernissat; taakkumi silarsuaq tamakkerlugu qatanngutigiissuarnut ilaapput. (1 Petrusi 2:17; Ussatit 17:17) Jehovap anersaani aqqutigalugu ilinnut sunniuteqarluartuarumaartunik ikinngutitaarnissannut ikiorumaarpaatit.

16. Sooq illit Paulusip pisimaneratut ‘sanngiittaraangavit tulluusimaarsinnaavit’?

¹⁶ Ilagiinniittunilli ikiuiumatuunik ikinnguteqaraluarlutit immaqa ulluinnarni unamminiagassat anigornissaat suli sapernartippat. Ilaannikkut immaqa ajornartorsiutitit nikalluutigisarpatit, ajornartorsiutitit imaaginnavissutut ilinnut misinnalerlutik. Taamatut misigigaangavit immikkut pingaaruteqarpoq Jehovamut saaffiginninnissat, qinnuigalugu anersaaminik illernartumik tuneqqullutit. Apustili Paulusi ima allappoq: ‘Sanngiittaraangama pissatsittarpunga.’ (Atuakkit 2 Korinthimiut 4:7-10; 12:10). Paulusip nalunngilaa Guutip anersaava sanngiiffimmigut nakussatsissutigisinnaallugu. Guutip nukinga sulisoq qaqugukkulluunniit sanngiikkaangavit ikiortariaqaraangavillu nakussatsissutigisinnaavat. Paulusi ima allappoq: “Tulluusimaartaqaanga sanngiittaraangama.” Tassa sanngiikkaangami misigisarpoq anersaaq illernartoq imminut sunniuteqartoq. Aamma illit tamatuma misiginissaanut periarfissaqarputit! — Romamiut 15:13.

17. Anersaaq illernartoq anguniakkavit angunissaanut qanoq iluaqutigisinnaaviuk?

¹⁷ Guutip anersaava pisariaqartipparput tunniulluinnarnitsinnut naapertuuttumik inuusinnaaniassagatta. Jehovamut naassaanngitsumik kiffartornissat anguniagaraat. Angallammi tissiartaammi naalakkatut imminut isigigit. Anersaaq illernartoq soorlu tassa anori apuulluarumallutit tissiarnissannut iluaqutigisat. Anersaamit Saatanip silarsuaaniittumit tamanut tamaanga nassataritinnissat kissaatiginngilat. (1 Korinthimiut 2:12) Taamaattumik anori iluaqutigisinnaasarpiat, tassa anersaaq illernartoq, toraarluartariaqarpallusooq. Guutip oqaasia peqatigiissortaalu aqqutigalugit anersaap illernartup apuuffissavit tungaanut siulersorumaarpaatit.

18. Maanna sunissat aalajangiusimaviuk, aamma sooq?

¹⁸ Sivisujaamik Jehovap Nalunaajaasuinit Biibilimik atuaqqissaaqatigineqartarsimaguit taakkualu anersaakkut sammisaqaqatigisarnerat nuannaarutigisimagukku, iliuuserisariaqakkalli pingaarutillit suli iliuuserisimanngikkukkit, tassa suli tunniulluinnarnallu kuisissimanngikkuit, imminut ima aperisinnaavutit: ‘Sooq nangaavunga?’ Ullumikkut Jehovap piumasaata naammassineqariartuaarnerani anersaap illernartup pingaaruteqassusia akuerigukku sunniuteqarneralu qujamasuutigalugu, taava eqqortunik iliuuseqarit. Jehovap pilluaqqungaarumaarpaatit. Anersaaminik illernartumik tukkorluni tuniumaarpaatit. Ukiorpassuarni kuisimasimaguit, qularnanngitsumik anersaap illernartup inuuninni sunniuteqarnera malugisimassavat. Guutip anersaaminik ilinnik qanoq nakussatsitsisinnaanera takusimallugulu misigisimavat. Takusinnaallugulu misigiuarsinnaavat — naassaanngitsumut. Taamaattumik anersaamut illernartumut naapertuuttumik saqiuarnissat aalajangiusimajuk.

Eqqaamavigit?

• ‘Anersaamut naapertuuttumik saqineq’ qanoq paasisariaqarpa?

• ‘Anersaamut naapertuuttumik saqiuarnissannut’ suna iluaqutigisinnaaviuk?

• Tunniulluinnarnerit qanoq ilillutit eqqortissinnaaviuk?

[Atuaqqissaarnermi apeqqutit]

[Qupp. 19-mi assiliartaq]

Uummatip “naajartorfianik” naggorissaaniarluni iliuuseqarnissaq pisariaqarpoq

[Qupp. 21-mi assiliartaq]

Guutip anersaavanit siulersortippit?