Inuk silarsuarmik allannguisoq

Inuit milliardillit nunarsuarmi inuusimapput. Amerlanersaat puiorneqareerput. Ilaalli ikittunnguit inuiaat oqaluttuarisaanerannut — qularnanngitsumik aamma illit ulluinnarni inuuninnut — sunniuteqarsimapput.

TAKORLOORIARUK suliartorniarlutit ullaakkut makillutit. Atisalersuleravit qulleq ikippat. Anileravit atuakkamik atuagassiamilluunniit bussertillutit atuarsinnaasannik tigusivutit. Aamma penicillinit tunillatsissimaninnut akiuussutissaqartikkumallutit ilinnut nakorsaatissiissutigineqarsimasut iinissaat eqqaamavat. Ulloq aallartilaaginnarpoq, angutilli tusaamasat ikittunnguit suliarisimasaat iluaqutigereerpatit.

Michael Faraday Fysikerip tuluup taassuma 1791-imi inunngortup elektromotoori dynamolu nassaarai. Taassuma ilisimatuussutsikkut nassaavi kallerup-inneranik atuilluarsinnaanerulissutigineqarput.

Ts’ai Lun Kinami kaasarip illussaarsuani qaffasissumik atorfilik ukiup 105-ip missaani pappiaralioriaatsimik nassaarpoq, pappiaralioriaaserlu taanna pissutigalugu pappiararpassualiortoqarsinnaalerpoq.

Johann Gutenberg Ukiup 1450-ip missaani nassaarsiortartup tyskip taassuma naqinnernik ilioqqaalluni naqiterut siulleq pilersippaa. Naqiterut iluaqutigalugu akikitsumik atuakkanik naqiterisoqarsinnaalerpoq, taamaalillunilu assigiinngitsorpassuit pillugit ajornannginnerusumik paasititsiniaasoqarsinnaalerpoq.

Alexander Fleming 1928-mi ilisimatuup skottep taassuma antibiotikummi penicillinimik taasani nassaaraa. Antibiotikummit nappaatinut tunillaassuuttunut akiuussutissatut maanna atorneqartupilussuusarput.

Qularutissaanngilaq inuit ikittunnguit nassaavisa isumassarsiaasalu inunnut milliardilinnut iluaqutaasimanerat peqqinnerulersitsisimanerallu.

Inulli ataaseq inunnit allanit tamanit immikkooruteqarpoq. Ilisimatuussutsikkut nakorsaatitigulluunniit nassaaq tusaamasaassutiginngilaa. Angulli taanna nuimananilu pisuujunngitsoq ukiut 2000-ingajaat matuma siorna toqusoq tusarliussaqarpoq — tusarliussamik sunniuteqarluartumik neriuutissiillunilu tuppallersaataasumik. Tusarliussaa silarsuaq tamakkerlugu inunnut qanoq sunniuteqartigisimanersoq eqqarsaatigalugu, ilimanarpoq inuppassuit taanna silarsuarmik ilumut allannguisuunerassagaat.

Angut taanna tassaavoq Jiisusi Kristusi. Taassuma suna tusarliuppaa? Tusarliussaalu illit inuuninnut qanoq sunniuteqarsinnaava?