Jehovap siunertaata naammassineqariartuaarnerani anersaap illernartup sunniuteqarnera

‘Oqaatsima qaninnit anisup naammasseqqusakka naammassissavai.’ — ESAJA 55:11.

1. Pilersaaruteqarnerup siunertaqarnerullu assigiinngissutaat suuppat?

TAKORLOORIAKKIT angutit marluk tamarmik immikkut umiatsiamik angalanissaminnut piareersartut. Aappaa apuuffissaminut anngunniarluni angalanissamut sukumiisumik pilersaarusiorpoq. Aappaata apuuffissani aalajangiusimaqqissaarpaa, tassungali aqqutit arlallit nalunngilai. Pisariaqalissappat aqqutikkut allakkoornissaminut piareersimavoq. Pissutsinik iliuuseqarfiginneriaatsit taakku marluk pilersaaruteqarnerup siunertaqarnerullu assigiinngissutaannut ilaatigut erseqqissaataapput. Pilersaaruteqarneq anguniakkamut anngunniarluni ingerlavissamik sukumiisumik pilersaarusiornermut assersuunneqarsinnaavoq, siunertaqarnermulli ilaavoq anguniagaqarneq, anguniakkalli angunissaanut ataasiinnarmik periaaseqartariaqarani.

2, 3. (a) Jehovap siunertaanut suut ilaappat, aamma Adami Evalu ajortuliormata Jehova sua? (b) Sooq Jehovap siunertaata qanoq naammassineqariartuaarnera soqutigisariaqarparput?

² Jehova piumasaminik naammassinninnissamut tunngatillugu allanngortussaanngitsumik pilersaaruteqanngilaq, siunertaqarporli — imaluunniit ‘aalajangigaqarpoq’ — piffissap ingerlanerani naammassineqarumaartumik. (Efesosimiut 3:11) Siunertaq tamanna taassuma inuiannut nunarsuarmullu aallaqqaammulli siunertaanut tunngassuteqarpoq — tassa nunarsuaq paratiisinngortinneqassasoq  inuit naammalluinnartut eqqissillutik pilluarlutillu naassaanngitsumik inuuffigisinnaasaat. (1 Mosesi 1:28) Adami Evalu ajortulioreermata Jehova siunertami naammassineqarnissaa qulakkeerniarlugu iliuuseqapallappoq. (Atuaruk 1 Mosesi 3:15). * Jehova aalajangerpoq arnaq assersuutaasoq ‘kinguaassaqassasoq’, ernertaassasoq, naggataatigut Saatanimik suujunnaarsitsisussamik taassumalu ajoqusiineranik iluarsiiumaartumik. — Hebræerit 2:14; 1 Johannesi 3:8.

³ Qilammi nunarsuarmiluunniit pissaaneqartoqanngilaq Jehovap siunertaminik naammassinninniarneranik akornusiisinnaasumik. Qanoq ililluta taama oqarsinnaagatta? Jehovap anersaava illernartoq akuummat. Nukik taanna, sunit tamanit sakkortunerpaasoq, taassuma siunertaata naammassineqarnissaanut qulakkeerutaavoq. (Esaja 55:10, 11) Naammassineqarnissaa qanoq pissanersoq soqutigisariaqarparput, Jehovammi siunertaata piviusunngortinneqarnera siunissatsinnut aalajangiisuuvoq. Aammattaaq uppernikkut nakussatsinnarpoq takullugu Jehovap anersaani illernartoq qanoq atortaraa. Taamaattumik Jehovap siunertaata naammassineqariartuaarnerani anersaap illernartup itsaq ullumikkullu sunniutai siunissamilu sunniutigiumaagai misissoriartigit.

Anersaap illernartup itsaq sunniutai

4. Jehovap qanoq ililluni siunertani paasinarsisikkiartuaarpaa?

⁴ Biibilip nalaani Jehovap siunertani paasinarsisikkiartuaarpaa. Kina kinguaassaanersoq neriorsuutigisaq aallaqqaammut ‘anngigisaavoq’. (1 Korinthimiut 2:7) Aatsaat ukiut 2000-it missiliorlugit qaangiummata Jehovap kinguaassaq eqqartoqqippaa. (Atuakkit 1 Mosesi 12:7; 22:15-18). Taamanikkut Jehovap Aaperaat neriorsuuteqarfigaa annertunerusumik eqquuttussamik. Oqaatsini ‘illit kinguaassakkut’-ni erseqqippoq kinguaassaq inuttut, Aaperaap kinguaavatut, saqqummerumaartoq. Qularutiginngilluinnarsinnaavarput tamanna paasinarsisinneqarmat Saatani soqutiginningaarluni tusarnaarsimassasoq. Akerlilersuisup taassuma iliuusererusunnerpaasaa tassaavoq Aaperaap kinguaavinik aseruinissani minguttuunngortitsinissaniluunniit taamaalillunilu Guutip siunertaanik maangaannartitsinissani. Tamannali iluatsissinnaanngilaa, Guutimmi anersaani takussaanngitsoq iluaqutigalugu tamanna pitsaalivaa. Qanoq ililluni?

5, 6. Jehovap inuit kinguaassamut siuaasaasussat ataasiakkaat sernissorniarlugit anersaani qanoq atorpaa?

⁵ Jehova anersaani atorlugu inunnik kinguaassamut siuaasaasussanik ataasiakkaanik sernissuivoq. Abramimut (Aaperaamut) ima oqarpoq: “Uanga tassaavunga eqqortinnaveeqqutit.” (1 Mosesi 15:1) Asuliinnaq taama oqanngilaq. Assersuutigalugu eqqarsaatigeriaruk ukiup 1919-ip Kr.in.si. missaani qanoq pisoqartoq Aaperaat Saralu Gerarimut nunassikkallarmata. Abimelekip, Gerarimi kunngiusup, Sara Aaperaap nuliarigaa nalullugu nuliartaariniarlugu illuminukaappaa. Saataniuna taakkua nalusaannik pisunik aqutsisoq Sara Aaperaap kinguaassaanik ernertaannginniassammat? Biibilimi tamanna eqqartorneqanngilaq. Nalunngilarpulli Jehova akuliuttoq, Abimelekimi sinnattortillugu mianersoqquaa Sara attoqqunagu. — 1 Mosesi 20:1-18.

⁶ Jehova ataasiaannarluni taamatut illersuinngilaq. Pisimasuni assigiinngitsuni Jehova Aaperaamik eqqarliinillu aniguisitsisarsimavoq. (1 Mosesi 12:14-20; 14:13-20; 26:26-29) Taamaattumik Aaperaat taassumalu kinguaavi pillugit tussiaasiortoq ima allassinnaasimavoq: “[Jehovap taakku] kimit qunutinneqaqqunngilai, taakkulu pillugit kunngit pillartarpai: ‘Tanitakka attunngisaannarsigit! Pruffiitikka ajortumik peqinasigit.’” — Tussiaat 105:14, 15.

7. Jehovap Israelikkut qanoq sernissorpai?

⁷ Jehovap anersaani atorlugu Israelikkut — kinguaariit kinguaassap neriorsuutigisap saqqummerfigisassai — sernissorpai. Anersaani illernartoq atorlugu Jehovap inatsisini, pallorfiginninnermik ilumoortumik illersuisut juutinullu anersaakkut, ileqqussatigut timikkullu illersuutaasussat, Israelikkunnut tunniuppai. (2 Mosesi 31:18; 2 Korinthimiut 3:3) Eqqartuussisut nalaanni angutit ilaasa Israelikkut taakkununnga akeraasunit aniguisinnissaannut Jehovap anersaava nukissaqalissutigaat. (Eqqartuussisut 3:9, 10) Ukiut hundredellit ingerlaneranni Aaperaap kinguaassaata pingaarnerusortaata, Jiisusip, inunngornissaa nalliutserlugu anersaaq illernartoq Jerusalemimik, Betlehemimik  naalaffimmillu — tamarmik Jiisusi pillugu siulittuutit eqquussinnaanissaannut pingaarutillit — illersueqataasimassaaq.

8. Sumit erserpa anersaaq illernartoq Guutip ernerata inuunerani kiffartorneranilu toqqaannartumik akuusoq?

⁸ Anersaaq illernartoq Jiisusip inuunerani kiffartorneranilu toqqaannartumik akuuvoq. Anersaaq illernartoq Mariamut niviarsiaasumut pivoq siornatigut kingornatigullu pisimanngitsumik sunniuteqarluni: arnaq naammalluinnanngitsoq naartulerpoq ernertaarlunilu naammalluinnartumik, toqumik kingornussisussaanngitsumik. (Lukasi 1:26-31, 34, 35) Kingusinnerusukkut anersaaq Jiisusimik illersuivoq taanna meeraalluni toqoqqunagu. (Matthæusi 2:7, 8, 12, 13) Jiisusi 30-t missiliorlugit ukioqarmat Guutip anersaamik illernartumik tanippaa, Daavip issiavissaarsuanik kingornussisussatut toqqarlugu oqaluussinissamullu piginnaatillugu. (Lukasi 1:32, 33; 4:16-21) Anersaaq illernartoq iluaqutigalugu Jiisusi tupinnartuliorsinnaanngorpoq, soorlu napparsimasunik ajorunnaarsitsisinnaanngorluni, inuppassuarnik nerisitsisinnaanngorluni toqusimasunillu makititsisinnaanngorluni. Suliat nuanningaartut tamakku pilluaqqussutinut Jiisusip kunngitut naalakkersuinissaata nalaani qilanaarisinnaasatsinnut siumut assersuutaapput.

9, 10. (a) Anersaaq illernartoq kristumiunut siullernut qanoq sunniuteqarpa? (b) Ukiuni hundredelinni siullerni Jehovap siunertaata naammassineqariartuaarnerani suna paasinarsisinneqarpa?

⁹ Ukiumi 33-mi piinsip ullua aallarnerfigalugu Jehovap anersaani Aaperaap kinguaassaata pingaannginnerusortaanik tanitanngortitsinissamut atortalerpaa, taakkualu ilarpassui Aaperaamut uinikkut kinguaajunngillat. (Romamiut 8:15-17; Galatiamiut 3:29) Erseqqippoq anersaaq illernartoq ukiuni hundredelinni siullerni Jiisusip ajoqersugaanut sunniuteqartoq, nakimaallutik oqaluussisinnaanngortillugit sunniuteqangaartunillu suliaqarsinnaanngortillugit. (Apustilit Suliaat 1:8; 2:1-4; 1 Korinthimiut 12:7-11) Anersaap tunissutaanik tupinnartuliortitsisinnaasumik tunineqarsimanerat Jehovap siunertaminik naammassinninniariaasianik nutaamik paasinarsisitsivoq. Jehovap pallorfiginninnermik aaqqissuussineq ukiuni hundredelinni naalaffimmik Jerusalemimiittumik pingaarnerpaatitsiffiusoq atorunnaarniarpaa. Maanna ilagiit kristumiut pilersinneqarlaat iluarilerpai. Taamanimiilli Jehovap ilagiit tanitat taakku siunertaminik naammassinninniarnermini atortalerpai.

¹⁰ Tassa itsaq Jehovap anersaani illernartoq kiffaminik sernissuillunilu tanitanngortitsillunilu nakussatsitsinermut atortarpaa. Tamakkulu tassaapput Jehovap siunertaminik naammassinninniarluni anersaaminik atuisimaneranut assersuutit ilaannaat. Ullumikkummi? Jehovap siunertani naammassiniarlugu anersaani ullumikkut qanoq atortarpaa? Tamatuma paasinissaa pisariaqartipparput, inuunitsinnimi anersaamit siulersorneqarusuppugut. Taamaattumik Jehovap anersaaminik ullumikkut atueriaasii sisamat misissoriartigit.

Anersaap illernartup ullumikkut sunniutai

11. Sumit erserpa anersaaq illernartoq Guutip innuttaasa minguitsumik inuunissaminnut iluaqutigisaraat, aamma qanoq ililluta ersersissinnaavarput anersaamut naapertuuttumik inuulluta?

¹¹ Siullermik, anersaaq illernartoq Guutip innuttaasa minguitsumik inuunissaminnut iluaqutigisarpaat. Guutip piumasaanut naapertuuttumik kiffartortut ileqqussatigut minguitsuusariaqarput. (Atuakkit 1 Korinthimiut 6:9-11). Kristumiunngortut ilumoortut ilaat siornatigut kinguaassiuutitigut inuunerluttuusimallutilluunniit allasiortuusimallutilluunniit suiaassuseqatiminnik atoqateqartartuusimapput. Kissaatigisapiluit ajortuliornermik kinguneqartartut sorlanissimasupilussuusinnaapput. (Jaaku 1:14, 15) Kristumiulli taakku maanna ‘uffarneqarlutik minguiarneqarsimapput’, ima paasillugu, Guutimit iluarisaanissaminnut pisariaqartunik allannguisimasut. Guutimik asannittup kissaatigisapilunnik akiuinissaminut sunaana nakussatsissutigisaraa? 1 Korinthimiut 6:11-mi ima allassimavoq: ‘Guutitta Anersaava.’ Ileqqussatigut minguitsuujuarnitsigut ersersittarparput Guutip anersaava inuunitsinnut assut sunniuteqartillugu.

12. (a) Ezekielip takorruugaa naapertorlugu Jehovap peqatigiissortani qanoq siulersortarpai? (b) Anersaamik tamatuminnga suleqatiginninnerput qanoq ililluta ersersissinnaavarput?

¹² Aappassaanik, Jehovap peqatigiissortani anersaani atorlugu kissaatigisamisut siulersortarpai. Ezekielip takorruugaani qamutit qilammiittut Jehovap siunertaa naammassiniarlugu  akornuserneqarsinnaanatik ingerlasut Jehovap peqatigiissortaanut qilammiittunut assersuutaapput. Qamutit sunaana ingerlassutigigaat? Anersaaq illernartoq. (Ezekieli 1:20, 21) Eqqaamasariaqarparpulli Jehovap peqatigiissortai marlunnik immikkoortoqartut, tassa qilammiittut nunarsuarmiittullu. Qilammiittut anersaamit illernartumit siulersorneqarmata nunarsuarmiittunut tunngatillugu aamma taamaassimassaaq. Jehovap peqatigiissortaanit nunarsuarmiittunit siulersorneqarnermut naalattuullutalu ilumoorfiginninnitsigut ersersittarparput qamutit qilammiittut ingerlaqatigalugit anersaarlu illernartoq suleqatigalugu. — Hebræerit 13:17.

13, 14. (a) “Kinguaariissoqatigiit” Jiisusip eqqartugai kikkuuppat? (b) Anersaap illernartup sallusuissutinik Biibilimiittunik paasinarsisitseqataaneranik ersersitsisumik assersuuteqarit. (Takuuk ungalusaq “Paasinnikkiartuinnarnermi malinnaavit?”).

¹³ Pingajussaanik, anersaaq illernartoq sallusuissutinik Biibilimiittunik paasinarsisitseqataavoq. (Ussatit 4:18) Atuagassiami matumani “inussiaq aalajaallunilu silatooq” (NV) paasinarsisikkiartuaarneqartunik ingerlatitseqqiisutut pingaarnertut qangalili atorneqartarsimavoq. (Matthæusi 24:45) Assersuutigeriartigu ‘kinguaariissoqatigiinnik’ Jiisusip eqqartugaanik paasinnittaaserput. (Atuaruk Matthæusi 24:34). * Kinguaariissoqatigiit kikkut Jiisusip eqqarsaatigai? Allaaserisami “Kristusip najuunnera illit qanoq paasiviuk?”-mi nassuiarneqarpoq Jiisusip inuit ajortut pinagit, ajoqersukkanili qanittukkut anersaamik illernartumik taninneqartussat pigai. * Jiisusip ajoqersugaasa tanitat, ukiuni hundredelinni siullerni ullumikkullu inuusut, nalunaaqutit takusinnaaginnarnagit aammali nalunavianngilaat qanoq paasisariaqarnersut — tassa Jiisusip ‘tikiutilivinneratut’ paasisariaqartut.

¹⁴ Tamanna uagutsinnut qanoq sunniuteqarpa? Piffissaq “kinguaariissoqatigiit taakku” inuuffigisaat qanorpiaq sivisutiginersoq naatsorsorsinnaanngikkaluarlugu oqaaseq “kinguaariissoqatigiit” eqqarsaatigalugu matuma eqqaamanissaa pitsaassaaq: Oqaaseq taanna Biibilimi inuit assigiinngitsunik ukiulinnut piffissami killilimmi aalajangersimasumi ataatsikkut inuusunut atorneqartarpoq; piffissaq taanna sivisuallaanngilaq, aamma qaangiuttussaavoq. (2 Mosesi 1:6) Jiisusimmi “kinguaariissoqatigiit taakku” pillugit oqaasii qanoq paasissagatsigit? Ima paasivarput tanitat nalunaaqut 1914-imi erseqqissiartormat nalunaaqummik tamatuminnga takunnittut, piffissap ilaani tanitat allat annikilliornartussarsuup aallartinneranik misigisaqarumaartut inuunerata nalaani inuussasut. Kinguaariissoqatigiit taakku aallartiffeqarput, qularnanngivissumillu aamma nungukkumaarput.  Nalunaaqutip immikkoortuisa assigiinngitsut eqquunnerannit erseqqippoq annikilliornartussarsuaq qanillisoq. Piffissap nukinginnassusianik sianiginnittuarnitsigut eqqumajuarnitsigullu ersersissavarput sallusuissutinik Biibilimiittunik paasinnikkiartuinnarnermut malinnaaniartuarluta anersaallu illernartup siulersuinera malillugu inuulluta. — Markusi 13:37.

15. Sumit erserpa anersaaq illernartoq nutaarsiassamik nuannersumik oqaluussissutiginninnissamut nakussatsissutigisaripput?

¹⁵ Sisamassaanik, anersaaq illernartoq nutaarsiassamik nuannersumik oqaluussissutiginninnissamut nakussatsissutigisarparput. (Apustilit Suliaat 1:8) Sunami alla nutaarsiassap nuannersup nunarsuaq tamakkerlugu oqaluussissutigineqarsimaneranut nassuiaataassagami? Manna eqqarsaatigeriaruk. Imaassinnaavoq inuttut ittuutuupilussuullutaluunniit qunutusugut taamaattumillu ilaanni ima eqqarsarsimalluta: ‘Illumiit illumut angalaarsinnaanngisaannassaanga!’ Maannali aallussilluaqaluta oqaluussisarpugut. * Aammattaaq Jehovamut nalunaajaasorpassuaqarpoq akerlilersorneqaraluarlutik malersugaagaluarlutilluunniit aalajaallutik oqaluussiuartunik. Guutip anersaava illernartoq kisiat anigoruminaappasissunik aniguinissamut nakussatsissutigisinnaavarput nammineerlutalu naammassisinnaanngisatsinnik naammassinnissinnaannguutigalugu. (Mika 3:8; Matthæusi 17:20) Tamakkiisumik oqaluusseqataanitsigut ersersittarparput anersaaq suleqatigalutigu.

Anersaap illernartup siunissami sunniuteqarfigisassai

16. Sooq qularutiginngilluinnarsinnaavarput Jehovap innuttani annikilliornartussarsuarmi sernissorumaarai?

¹⁶ Siunissami Jehovap siunertani naammassiniarlugu anersaani maluginiarnartumik atortarumaarpaa. Sernissuinermut tunngasut eqqarsaatigeriartigit. Soorlu paasereeripput, Jehovap itsaq anersaani atorlugu inuit ataasiakkaat aammalu Israelikkut tamaasa sernissortarpai. Taamaattumik taassuma anersaani sunniinertooq taanna atorlugu annikilliornartussarsuarmi innuttaminik sernissuiumaarnerata upperinissaanut pissutissaqarluarpugut. Taamanikkussamut Jehovap qanorpiaq isumagiumaarneraatigut isumakuluutigisariaqanngilarput. Siunissamulli isumalluarsinnaavugut, nalunnginnatsigu Jehovamik asannittut taassumannga takuneqarsinnaajuarumaartut anersaallu illernartup inugaaniinngisaannassasut. — 2 Nalunaarsuutit 16:9; Tussiaat 139:7-12.

17. Jehovap anersaani illernartoq silarsuassami nutaami qanoq atussavaa?

¹⁷ Jehovap anersaani illernartoq silarsuassami nutaami qanoq atorumaarpaa? Anersaaq taanna iluaqutigalugu mappersakkat nutaat taamanikkussamut mapperneqartussat allanneqarumaarput. (Saqqummersitat 20:12) Mappersakkani taakkunani suut allassimassappat? Jehovap ukiuni tusindini taakkunani piumasaqaatai sukumiisut allassimassagunarput. Mappersakkanik taakkuninnga misissuinissat qilanaaraajuk? Aap, silarsuassaq nutaaq qilanaaraarput. Jehovap anersaani illernartoq atorlugu nunarsuarmut inunnullu siunertaminik naammassinniffissaata nalaani inuulluni qanoq nuannertigissava!

18. Illit suna aalajangiusimaviuk?

¹⁸ Eqqaamajuartariaqarparput Jehovap pinngitsoorani siunertani naammassiumaaraa, anersaanimi illernartoq — qilammi nunamilu nukik sakkortunerpaaq — atorumaarpaa. Siunertaq taanna ilinnuttaaq tunngassuteqarpoq. Taamaattumik Jehova qinnuigiuk anersaaminik tuneqqullutit anersaallu siulersuineranut naapertuuttumik inuullutit. (Lukasi 11:13) Taava qilanaarisinnaassavat Jehovap inunnut siunertarisimasaatut inuunissat — nunarsuarmi paratiisiusumi naassaanngitsumik.

[Quppernerup ataani ilanngussat]

Eqqaamavigit?

• Jehovap siunertani Biibilip nalaani naammassiartuaarniarlugu anersaani illernartoq qanoq atorpaa?

• Ullumikkut Jehovap anersaani qanoq atortarpaa?

• Jehovap siunertani naammassiniarlugu anersaani siunissami qanoq atorumaarpaa?

[Atuaqqissaarnermi apeqqutit]

[Qupp. 18-mi ungalusaq]

Paasinnikkiartuinnarnermut malinnaavit?

Jehovap innuttani sallusuissutinik Biibilimiittunik paasinninnerujartuinnartippai. Allaaserisat Napasuliaq Alapernaarsuiffik-miittut Vagttårnet-imiittullu paasinnikkiartuinnarnermut takussutissaasut ukunaniipput:

▪ Jiisusip seernarsaammik assersuusiaa anersaakkut ineriartorneq pillugu sumik paasisaqarfigaarput? (Matthæusi 13:33) — Napasuliaq Alapernaarsuiffik, 1. aggusti 2008, qupp. 29-30.

▪ Qaqugu kristumiunik qilammut qaaqqusisoqartarunnaassava? — Vagttårnet, 1. maaji 2007, qupp. 30-31.

▪ Jehovamik “anersaakkut” pallorfiginninneq qanoq paasisariaqarpa? (Johannesi 4:24) — Napasuliaq Alapernaarsuiffik, 1. aggusti 2002, qupp. 19.

▪ Silarlermi sorlermi amerlangaartut kiffartorpat? (Saqqummersitat 7:15) — Vagttårnet, 1. maaji 2002, qupp. 30-31.

▪ Jiisusip savat savaasanit qaqugu avissaartissavai? (Matthæusi 25:31-33) — Napasuliaq Alapernaarsuiffik, 1. novembari 1995, qupp. 10-21.