Jehovap uagutsinnit suna piumasaraa?
Guutimut palligunniarit
Jehovap uagutsinnit suna piumasaraa?
Mosesimik allakkat tallimaat 10:12, 13
NAALANNISSAQ imaluunniit naalannginnissaq — sorleq aalajangiutissanerlugu ajornaatsuujuaannanngilaq. Qullersaasup sukannersup piumasaqarpallaartulluunniit qullersaaffigisaasa piumarpiaratik naalassavaat. Jehovamulli Guutimut pallorfiginnittut kajumillutik taanna naalattarpaat. Sooq? Tamanna akissutissarsiumallugu Mosesimik allakkat tallimaat 10:12, 13-imi allassimasut misissussavavut. *
Mosesip Guutip piumasaqaatai eqikkaramigit soqutiginartumik ima aperivoq: “[Jehovap] Guutivit ilinnit suna piumasaraa?” (Versi 12) Guuti uagutsinnit sumilluunniit piumasaqarsinnaatitaavoq. Taannami tassaavoq Naalagaq kisimi oqartussaasoq, aamma inuunermut puilaffiullunilu inuuginnartitsisuuvoq. (Tussiaat 36:10; Esaja 33:22) Tassa Jehovap piumasarisinnaavaa imminut naalannissarput. Kissaatiginngilaali pinngitsaalineqarluta naalassagitsinni. Sunaliuna uagutsinnit piumasarigaa? ‘Uummatitsigut naalassasugut’. — Romamiut 6:17.
Kajumilluta Guutimut naalannissamut suna kajumississutigisinnaavarput? Mosesip pingaarutilik eqqaavaa ima oqarami: ‘Jehova Guutit mianerissavat.’ * (Versi 12) Pillarneqarnissamik qunulluni mianerinninnerunani iluaqutaasumik ataqqinnittumillu Guutimik taassumalu aqqutigeqqusaanik mianerinninneruvoq. Guutimik ataqqinningaartuugutta sapinngisarput tamaat taassuma iluarinngisaanik iliornaveersaassaagut.
Guutimulli naalannissamut pingaarnertut suna pissutiginiagarisussaavarput? Mosesi ima oqarpoq: ‘[Jehova] Guutit asassavat kiffartuutissavallu uummatikkut iluunngarlutit tarnikkullu iluunngarlutit.’ (Versi 12) Guutimik asanninneq misigissutsinuinnaq tunnganngilaq. Qinerlerfissiami ima nassuiarneqarpoq: “Misigissutsit pillugit hebræerit oqaluutaanni ilaannikkut misigissutsit kingunerisaannik iliuuserineqartut pineqartarput.” Qinerlerfissiami tamatumani allassimavoq Guutimik asanninneq tassaasoq taassumunnga “asannittumik iliorneq”. Allatut oqaatigalugu Guutimik ilumoorluta asannikkutta taassuma iluarisaatut iliuuseqassaagut. — Ussatit 27:11.
Guutimut qanoq naalatsigissaagut? Mosesi oqarpoq ‘aqqutigeqqusai tamaasa ingerlavigissagivut’. (Versi 12) Jehovap kissaatigaa uagutsinnit piumasarisani tamaasa iliuuserissagivut. Taamatut naalalluinnarnissaq uagutsinnut ajoqutaassava? Naamerluinnaq.
Kajumilluta naalannerput uagutsinnut pilluaqqussutaassaaq. Mosesi ima allappoq: ‘Jehovap peqqussutai ullumi ilinnut tunniussakka maleruassavatit ajunngitsunik atugaqarsinnaaqqullutit.’ (Versi 13) Aap, Jehovap peqqussutai — uagutsinnut piumasaqaatai — tamarmik uagutsinnut iluaqutaapput. Tamanna pissusissamisuuginnarpoq! Biibilimimi allassimavoq ‘Guuti tassaasoq asanninneq’. (1 Johannesi 4:8) Taamaattumik peqqussutigisimasai tamarmik uagutsinnut iluaqutaapput. (Esaja 48:17) Jehovap uagutsinnit piumasarisaanik tamanik iliuuseqarneq, pakatsissutaasinnaasorpassuarnut maannakkut illersuutigissavarput, aamma naggataatigut Guutip naalagaaffiata aqutsinerani pilluaqqussuterpassuarnik kinguneqarumaarpoq. *
Naalanneq imaluunniit naalannginneq? Jehovap uagutsinnit piumasarisaanut tunngatillugu silatusaartumik aalajangiineq ataasiinnaavoq — kajumilluni naalalluinnarneq. Taamatut aalajaatsuuneq Jehovamut, Guutimut asannittumut uagutsinnut pitsaanerpaamik kissaasiuaannartumut, qaninnerulissutigissavarput. (wp09 10/01-E)
[Quppernerup ataani ilanngussat]
^ imm. 1 Oqaatsit taakku Mosesip itsaq Israelikkunnut oqaaserigaluarai ullumikkut Guutimit iluarisaarusuttunit tamanit atorneqarsinnaapput. — Romamiut 15:4.
^ imm. 3 Mosesimik allakkat tallimaanni Mosesip erseqqissaqattaarpaa Guutip kiffaanut Guutimik mianerinninneq tunngaviulluinnartariaqartoq. — 5 Mosesi 4:10; 6:13, 24; 8:6; 13:5; 31:12, 13.
^ imm. 6 Atuakkami Biibilimi sorpiaat ajoqersuutigineqarpat?-mi kapitali 3-mi “Guutip nunarsuaq sumik siunertaqarfigaa?”-mi amerlanerusunik paasissutissaqarpoq. Jehovap Nalunaajaasuinit saqqummersinneqartoq.