Ilissi angutit, Kristusip siulersuineranut naalatsigitippisi?

‘Angutip kialuunniit Kristusi niaqoraa.’ — 1 KORINTHIMIUT 11:3.

1. Sumit erserpa Jehova ularussinermut Guutiunngitsoq?

“ILLIT, Naalagarput Guuterpullu [Jehova Guuterput, NV], qinngaqqunnanngillat pigissallugit naalannaat ataqqinaallu pissaanerlu; illimmi suut tamaasa pinngortippatit, illit piumasakkut piulerput pinngortitaallutillu.” Saqqummersitat 4:11-mi taama allassimasoqarpoq. Jehova Guuti tamanik pinngortitsisuugami qilammi nunamilu Kisimi Oqartussaanerpaavoq pinngortitaminullu tamanut oqartussaassuseqarluni. Jehovap ‘ularussinermut Guutiunani eqqisseqatigiinnermulli’ Guutiunera ilaqutariissuisa qilammiusut qanoq aaqqissuunneqarsimanerannit erserpoq. — 1 Korinthimiut 14:33; Esaja 6:1-3; Hebræerit 12:22, 23.

2, 3. (a) Jehovap pinngortitaasa siullersaat suua? (b) Angajulliliaq Ataatamut naleqqiullugu qanoq inissisimaffeqarpa?

² Guuti pinngortitsilluni aallartinnginnermini ukiuni kisissaanngitsuni kisimiippoq. Pinngortitaa siullerpaaq tassaavoq anersaaq ‘Oqaatsimik’ taaneqartoq, tassa Jehovap oqaaseqartartua. Suut allat tamarmik Oqaaseq ikiortigalugu pinngortinneqarput. Kingusinnerusukkut taanna inuttut naammalluinnartutut nunarsuarmut pivoq Jiisusitullu Kristusitut ilisimaneqalerluni. — Atuakkit Johannesi 1:1-3, 14. *

³ Guutip angajulliliaatalu imminnut naleqqiullutik qanoq inissisimaffeqarnerat pillugu Biibilimi qanoq allassimasoqarpa? Apustili Paulusi isumassarsisitaalluni ima allappoq: “[Ilisimaqquara] angutip kialuunniit Kristusi niaqorimmagu, arnap angut niaqorimmagu, Kristusillu niaqua Guutiummat.” (1 Korinthimiut 11:3) Kristusi Ataataminut naalatsigitippoq. Siulersuineq naalatsigitinnerlu pissutsit pinngortitat sianissusillit akornanni eqqissinarlutillu torersuunissaannut aalajangiisuupput pingaarutillit. Allaat Erneq Guutip siulersuineranut naalatsigitittussaavoq, naak ‘suut tamarmik taassumuuna pinngortitaagaluartut’. — Kolossemiut 1:16.

4, 5. Jiisusip Jehovap siulersuineranut naalatsigitinnissani qanoq isumaqarfigaa?

⁴ Jiisusip Jehovap siulersuineranut naalatsigitinneq nunarsuarmullu pineq qanoq isigai? Biibilimi ima allassimavoq: “Taassuma Guutisut isikkoqaraluarluni arsaarinissaq, tassa Guutip naliginissaa, eqqarsaatiginngilluinnarpaa. Aap, imminut imaarpoq inussiatullu isikkoqalerluni inuillu assigilerlugit.” (NV) Imalu nangippoq: “Saqqummerami inuttut nikanartippoq naalalluni toqumut, sanningasulimmi [nappakkami anniartitaaffimmi, NV] toqumut allaat.” — Filippimiut 2:6-8.

⁵ Jiisusi maniguulluni Ataatami piumasaanut tamatigut naalatsigitittarpoq. Ima oqarpoq: “Immineerlunga iliuuseqarsinnaanngilanga; . . . [eqqartuussutiga] naapertuilluartuuvoq uanga piumasara pinnagu uannilli aallartitsisup piumasaa piniarakku.” (Johannesi 5:30) Aamma ima oqarpoq: ‘Tamatigut [Ataatama] iluarisaanik iliortarpunga.’ (Johannesi 8:29) Nunami inuunermi naalernerani Jiisusi Ataataminut qinunermini ima oqarpoq: “Nunarsuarmi naalannarsisippagit suliassaq uannut suliareqqusat naammassigakku.” (Johannesi 17:4) Erseqqippoq Jiisusip Ataatami imminut  oqartussaaneranik akuerinnillunilu tamatumunnga naalatsigitinnissani sapernartinngikkaa.

Ernerup Ataatamut naalatsigitinnini iluaqutigaa

6. Jiisusi pissuserineqartussanik sunik ersersitsiva?

⁶ Jiisusi nunarsuarmiikkallarami pissuserineqartussanik nuannersunik ersersitsivoq. Taakkua ilagaat Ataataminik asanningaarnera. Ima oqarpoq: ‘Ataataq asavara.’ (Johannesi 14:31) Aamma inunnik asanningaarnini ersersippaa. (Atuakkit Matthæusi 22:35-40). Jiisusi sukannersuunanilu makitanngilaq, inussiarnersuullunili soqutigittartuuvoq. Ima oqarpoq: “Ornissinga tamassi suleruluttusi nanertugaasusilu, qasuertissavassi. Nammaatara ilissinnut pisissiuk, ilinniarfigisingalu qanilaarama uummatikkullu makitajuikkama; taava qasuerfissarsiumaarpusi tarnissinnut. Nammaatarami iluaqaaq, nammakkiussaralu oqeqaluni.” (Matthæusi 11:28-30) Inuit eqqortuliorusuttut qanorluunniit utoqqaatigisut, ingammik qunutinneqarlutillu naqisimaneqartut, Jiisusip ilakkuminartuunera tusarliussaalu qiimmaallannartoq tuppallersaatigingaarpaat.

7, 8. Mosesip inatsisai naapertorlugit arnap aaqartuartup pisinnaasai qanoq killeqarpat, Jiisusilli taanna qanoq pivaa?

⁷ Eqqarsaatigiuk Jiisusi arnanik qanoq pinnittarnersoq. Oqaluttuarisaanerup ingerlanerani anguterpassuit arnanik ajortorujussuarmik pinnittarsimapput. Assersuutigalugu itsaq Israelimi upperisarsiornikkut siuttut taamaassimapput. Jiisusilli arnat ataqqinnittumik pisarpai. Tamanna erserpoq arnamut ukiuni aqqaneq-marlunni aaqartuartumut iliorfiginninneranit. Taanna nakorsanit ‘nakorsarneqarluni  anniartarsimaqaaq’ peqqissiniarsaralunilu pigisani tamaasa atorsimallugit. Taamaakkaluartorli ‘ajorneruliinnarsimavoq’. Mosesip inatsisai naapertorlugit minguttuutut isigineqarpoq, taassuminngalu attuisut tamarmik aamma minguttuunngussapput. — 3 Mosesi 15:19, 25.

⁸ Arnap tusaramiuk Jiisusi napparsimasunik ajorunnaarsitsisartoq inuppassuit Jiisusimik avatangiisut akornannut pivoq imalu oqarluni: “Atisaaluunniit attuinnarukkit annaanneqassaanga [ajorunnaassaanga, 1936].” Jiisusi attorpaa, ingerlaannarlu ajorunnaarpoq. Jiisusip nalunngilaa atisamigut attorsimasariaqanngikkaluaraani. Naveernaguli inussiarnersumik pivaa. Nalunngilaa ukiuni taama amerlatigisuni napparsimasimalluni qanoq misigisimassanersoq, aamma paasilluarpaa ikiortariaqavissoq. Misiginneqatigingaarlugu ima oqarfigaa: “Panik, . . . Eqqissillutit qimagunniarit, ajoqutinnillu ajorunnaarsitaagit.” — Markusi 5:25-34.

9. Inuit meeqqaminnik Jiisusimukaassisut taassuma ajoqersugaanit unitsinniarsarineqarmata Jiisusi qanoq periarpa?

⁹ Allaat meeqqat Jiisusi ilagalugu nuannarisarpaat. Ilaanni inuit meeqqatik Jiisusimukaammatigit taassuma ajoqersugaasa inuit avoqqaaraat, qularnanngitsumik isumaqaramik Jiisusi meeqqanit akornusersorneqarusunngitsoq. Jiisusili taamatut misiginngilaq. Biibilimi ima oqaluttuarineqarpoq: “[Jiisusip] tamanna takugamiuk kamalerpoq [ajoqersukkallu oqarfigalugit]: ‘Meerannguit uannut qaaginnarlit, akornuseqinasigillu; taakkuami Guutip naalagaaffia pigaat.’” Aamma meeqqat ‘pakkuppai assamminillu patillugit pilluaqqullugillu’. Jiisusip meeqqat akueriinnarnagit aammali asannittumik pisarpai. — Markusi 10:13-16.

10. Jiisusip pissuserineqartussat ersersitani qanoq ililluni pissuserilersimavai?

¹⁰ Jiisusip nunarsuarmiitilluni pissuserisani qanoq ililluni pissuserilersimavai? Inuttut inunngunngikkallarami Ataatani qilammiusoq ukiuni kisissaanngitsuni qimerloortarsimavaa Taassumalu pissutsinik iliuuseqarfiginneriaasia pigiliussimallugu. (Atuakkit Ussatit 8:22, 23). Jiisusip qilammi takusimavaa Jehovap pinngortitaminut oqartussaassutsini qanoq asannitsigaluni atoraa, Jiisusillu taanna ilaarusussimavaa. Jiisusi naalatsigitissimanngitsuuguni taanna ilaarsinnaasimassagaluarpaa? Ataataminut naalatsigitinneq nuannaraa, Jehovallu taassuminnga erneqarnini nuannaarutigaa. Jiisusip nunarsuarmiikkami Ataatami qilammiusup pissusii nuanningaartut naammalluinnartumik ersersippai. Kristusimut, Guutip naalagaaffimmi qilammiittumi naalakkersuisunngortitaanut, naalatsigitinnerput immikkut pisinnaatitaaffigaarput!

Kristusip pissusiinik ilaarsigit

11. (a) Kimik ilaarsinissarput ilungersuutigisariaqarparput? (b) Sooq ingammik angutit ilagiinniittut Jiisusimik ilaarsiniartariaqarpat?

¹¹ Ilagiinni kristumiuniittut tamarmik, ingammik angutit, Kristusip pissusiinik ilaarsinissartik ilungersuutigiuartariaqarpaat. Eqqaaneqareersutut Biibilimi ima allassimasoqarpoq: ‘Angutip kialuunniit Kristusi niaqoraa.’ Soorlu Kristusi ‘niaqquminik’, Guutimik ilumoortumik, ilaarsisoq, taamattuttaaq angutit kristumiut ‘niaqortik’, Kristusi, ilaarniarlugu sapinngisaminnik iliuuseqartariaqarput. Paulusi kristumiunngoreerluni taamaaliorpoq. Taassuma uppeqatini ima kajumissaarpai: “Uannik ilaarsisunngoritsi, soorluttaaq uanga Kristusi ilaariga.” (1 Korinthimiut 11:1, NV) Apustili Petrusi ima allappoq: “[Tamatumunnga] qaaqqusaavusi Kristusi aamma anniartitaammat ilissi pillusi maligassamillu qimatsivigalusi, tumini atuarlugit malinnaaqqullusi.” (1 Petrusi 2:21) Kristusimik ilaarsinissaq pillugu oqaaqqissaarutip angutinut immikkut soqutiginaateqarneranut suli allamik pissuteqarpoq. Taakku utoqqaanertanngorsinnaallutillu ilagiinni kiffartortunngorsinnaapput. Soorlu Jiisusip Jehovamik ilaarsinini nuannaarutigigaa, taamatuttaaq angutit kristumiut Kristusimik taassumalu pissusiinik ilaarsinertik nuannaarutigisariaqarpaat.

12, 13. Utoqqaanertat savaatit paarisatik qanoq isumassortariaqarpaat?

¹² Utoqqaanertat ilagiinni kristumiuniittut Kristusimik ilaarsinissamik ilinniarnissaq pisussaaffigaat. Petrusip utoqqaanertat  ima kajumissaarpai: “Guutip savaataanik ilissinniittunik paarsisuuniaritsi, paarisigit tamatumunnga pinngitsaalisaasutut pinnasi namminerli kajumissutsissinnit, soorlu Guuti taama piumasaqartoq, iluanaarniapilunneq siunertarinagu nuannaarlusili kajumillusilu; akisussaaffigisassinnut naalagaaniassanngilasi, savaatinulli maligassaagitsi.” (1 Petrusi 5:1-3) Utoqqaanertat kristumiut naalagaaniartuusussaanatillu namminiinnaq isumaminnik atuiumasuusussaanatillu sukannersuusussaanngillat. Kristusimik ilaarsiniartariaqarput paarisaminnut asannittuullutillu innimittartuullutillu maniguuttuullutillu inussiarnersuunermikkut.

¹³ Angutit ilagiinni siuttuusut naammalluinnanngitsuupput, pisinnaasamillu killeqarnerat ilisimaariuartariaqarpaat. (Romamiut 3:23) Taamaattumik Jiisusi pillugu ilinniarnerunissartik taassumalu asanninneranik ilaarsinissartik ilungersuutigisariaqarpaat. Guuti Kristusilu inunnik qanoq isumassuinersut eqqarsaatigeqqissaartariaqarpaat, taavalu ilaarniarsaralugit. Petrusip ima kajumissaarpaatigut: “[Tamassi] immissinnut qanilaarfigeqatigiinneq [maniguuffigeqatigiinneq, NV] atiniarsiuk, Guutip makitasuut akerartorpai, qanilaartulli saammaattarpai.” — 1 Petrusi 5:5.

14. Utoqqaanertat allanik qanoq ataqqinnitsigissappat?

¹⁴ Utoqqaanertat toqqakkat ilagiinniittut Guutip savaataanik isumassuinerminni pissuserineqartussat pissuseriniartariaqarpaat. Romamiut 12:10-mi ima allassimavoq: “Qatanngutigiittut asaqatigiillusi ungageqatigiigitsi, ataqqeqatigiigitsilu immissinnut akimorniullusi.” Utoqqaanertat ilagiinnilu kiffartortut allanik ataqqinnittuusarput. Uppeqatimik kristumiut pisarnerattut angutit taakku ‘namminissarsiorneq imminulluunniit angisuutinneq tunngavigalugit iliuuseqartanngillat, makitajuitsuunermikkulli allat imminnit annerutippaat’. (Filippimiut 2:3) Pingaaruteqarpoq siuttuusut allanik imminnit annerutitsisarnissaat. Taamaaliornermikkut angutit toqqakkat taakkua Paulusip siunnersuutaa una malippaat: “Uagut sanngisuujusugut pisussaavugut sanngiitsut sanngiissutaat ersussallugit imminuinnaq eqqarsaatiginata. Tamatta immikkut eqqarsaatigissavavut tullitta iluaqutissaat ineriartornissaallu. Kristusiluunniimmi imminut eqqarsaatiginngilaq.” — Romamiut 15:1-3.

Nuliaasut ataqqineqassapput

15. Uiusup nuliani qanoq pisassavaa?

¹⁵ Apustilip Petrusip uiusunut siunnersuutaa maluginiariaruk. Ima allappoq: “Taamatuttaaq ilissi angutit, arnaq ilissinnit qajannarnerusoq qajassuullugu inooqatigissavarsi; ataqqissavasilu.” (1 Petrusi 3:7) Inummik ataqqinninneq tassaavoq taassuminnga pingaartitsingaarneq. Inuup taassuma isumaanik, pisariaqartitaanik soqutigisaanillu innimiginninneruvoq, aamma taassuma kissaatai nammineq kissaatigisanit salliutinneqartarput taamaaliunnginnissamut pissutissaqarluanngikkaangat. Uiusup nuliani taamatut pisartussaavaa.

16. Uiusup nuliaminik ataqqinninnissaanut tunngatillugu Guutip oqaasiani sumik mianersoqqussuteqarpa?

¹⁶ Qulaani allassimasutut oqaaqqissaarereerluni Petrusi ima nangippoq: “Qinusarnisi akornuserneqaqqunagit.” (1 Petrusi 3:7) Matumani erseqqippoq angutip nuliaminik iliorfiginneriaasia taassuma Jehovamut attaveqarneranut sunniuteqangaartartoq. Angutip qinnutai akornuserneqarsinnaapput taanna nuliaminik ataqqinninngippat. Aamma nuliaasoq uiminit ataqqineqaruni naammagisimaarinninnerullunilu suleqatiginnikkumanerussaaq, ilaa?

17. Uiusoq nuliaminik qanoq asannitsigissava?

¹⁷ Nuliamik asanninneq pillugu Biibilimi matuminnga siunnersuuteqarpoq: “Uiusut nuliatik asassavaat namminneq timimittut. . . . Inuummi timini uumissunngisaannarpaa, kisianni inuussutissittarpaa paaqqisarlugulu soorlu  Kristusip ilagiit taama pisarai. [Ilississaaq] tamassi immikkut nuliasi immissisut asasussaavasi.” (Efesosimiut 5:28, 29, 33) Uiusoq nuliaminik qanoq asannitsigissava? Paulusi ima allappoq: “Angutit, nuliasi asassavasi soorlu Kristusip ilagiit asagai imminullu tunniulluni taakku pillugit.” (Efesosimiut 5:25) Aap, uiusoq allaat nuliani pillugu inuunerminik akiginnikkumassuseqartariaqarpoq, soorluttaaq Kristusi allat pillugit taamaaliorsimasoq. Uiusup kristumiup namminissarsiorani nuliani innimigalugulu soqutigalugulu isumassoruniuk, nuliata uimi siulersuineranut naalatsigitinnissani ajornannginnerutissavaa.

18. Uiusut nuliaminnik ataqqinnittumik pinninnissamut suna iluaqutigisinnaavaat?

¹⁸ Uiusut nuliaminnik taamatut ataqqinninnissaannik piumaffigineqarnerat ingasappallaarpa? Naamik, Jehovap taakku piumaffiginavianngilai piginnaasaannik akimuisunik ilioqqullugit. Aammattaaq nukik qilammi nunamilu sakkortunerpaaq — Guutip anersaava illernartoq — Jehovap kiffaasa atorluarsinnaavaat. Jiisusi ima oqarpoq: “Ilissimi ajortuususi qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.” (Lukasi 11:13) Uiusut Jehova qinnuigisinnaavaat anersaaminik illernartumik ikioqqullutik allanik, aamma nuliaminnik, ataqqinnittumik pinnissinnaaniassagamik. — Atuaruk Apustilit Suliaat 5:32.

19. Allaaserisami atuaqqissaaqatigiissutissami tulliuttumi suna sammineqassava?

¹⁹ Uiusut Kristusimut naalatsigitinnermik ilinniarnissamut taassumalu oqartussaassutsimik atueriaasianik ilaarsinissamut tunngatillugu akisussaafferujussuaqarput. Arnammi, ingammik aappallit? Allaaserisami tulliuttumi taakku Jehovap aaqqissuussinerani inissisimaffimminnik qanoq isiginnittariaqarnersut sammineqassaaq.

[Quppernerup ataani ilanngussaq]

Eqqaamavigit?

• Jiisusip pissusii suut ilaartariaqarpavut?

• Utoqqaanertat savanik qanoq pinnittussaappat?

• Uiusup nuliani qanoq pisassavaa?

[Atuaqqissaarnermi apeqqutit]

[Qupp. 14-mi assiliartaq]

Allanik ataqqinninnikkut Jiisusi ilaaruk