Guutip innuttaani isumannaatsumiigit

“Ilagiinni unnersiutigissavakkit.” — HEBRÆERIT 2:12.

1-3. (a) Kristumiut qanoq ilillutik Jehovamut attaveqarnertik navianartorsiortissinnaavaat? (b) Guutip innuttai sumi isumannaatsumiissinnaappat?

ILAANNI Joe nulianilu kiattuni feeriartillutik imaani koraalit ikkanninnguuttut eqqaanni assigiinngitsorpassuarnik aalisagarpassualimmi sullulimmik anersaartuuserlutik nalorusaarput. Ikkanninnguuttut misissuataarluarumallugit avasinnerulaartumukarput. Tassanngaannaq immap naqqa takusinnaajunnaarpaat, taamaallaalliuna itinersuaq. Joep nulia pilerpoq: “Avasippallaartumiilerunarpugut.” Joelli ajornaviannginnerarpaa. Joep eqqaamavaa tamatuma kinguninngua eqqumiigalugu aalisakkanik ersittoqarunnaarnera. Annilaarluni paasilerpaa sooq taamaannersoq. Eqalussuaq immap itinersuanit tungiminuinnaq ingerlavoq — maannalu eqalussuarmit saassunneqariaannaavoq. Eqalussuaq meterimik ataatsimik qanilligaluarlunilu allamut saappoq qimagullunilu.

² Kristumiup Saatanip silarsuaani ussassaarutigineqartut — aliikkutassat, suliffiit pigisallu — ima tiguartiffigitigisinnaavai nalullugu navianartut tungaannut ingerlalluni. Joe, ilagiinni utoqqaanertaasoq, ima oqarpoq: “Misigisarput kikkunnik ilagisartagaqarnitsinnik eqqumaffiginninnerulissutigaara. Toqqissisimanartumi nuannersumilu — ilagiinni — ‘naluttarit’!” ‘Immap itinersaani’ — anersaakkut avinngarusimasumiilerfigisinnaasanni navianartorsiorfigisinnaasannilu — ‘naluttaqinak’. Taama ittumut pissagaluaruit isumannaatsumut uteqqipallagit, taamaaliunngikkuit Jehovamut attaveqarnerit navianartorsiuleratarsinnaavoq.

³ Ullumikkut silarsuaq kristumiunut navianarpoq. (2 Timotheusi 3:1-5) Saatanip nalunngilaa piffissakilluni, eqqumanngitsullu iiniarsarai. (1 Petrusi 5:8; Saqqummersitat 12:12, 17) Illersorneqarpugulli. Jehovap innuttami isumannaatsumik anersaakkut qimarnguffissaqarnissaat — kristumiunik ilageeqarnissaa — isumagisimavaa.

4, 5. Inuppassuit siunissartik pillugu qanoq eqqarsartarpat, aamma sooq?

⁴ Ullumikkut innuttaaqatigiit timikkut misigissutsikkullu taamaallaat killilimmik toqqissisimalersitsisinnaapput. Inuppassuit misigipput isumannaassusertik pinerluttuliornermit, nakuusernermit, inuuniarnerup akisuneranit avatangiisitigullu ajornartorsiutinit navianartorsiortinneqartoq. Allat utoqqalinermi ajornartorsiutaasartunik peqqiilliornermillu akiugaqarput. Suliffillit, najugallit, naammattunik inuuniutissallit peqqikannersullu immaqa eqqarsaatigaat tamakku tamarmik qanoq sivisutigisumik atassanersut.

⁵ Inuppassuit aamma misigissutsikkut toqqissisimalernissaq angujuminaatsippaat. Aappariinnermi ilaqutariinnilu eqqissisimanissamik naammagisimaarinninnissamillu neriuuteqarsimasut ajoraluartumik neriuutimik eqquutinngitsoornerat misigisimavaat. Anersaakkut toqqissisimanermut tunngatillugu naalagiartartut ilarpassuisa imminnut siunnersuutigineqartut pitsaassusiat apeqqusersimavaat. Tamatumunnga ingammik pissutaavoq taakkua upperisarsiornikkut siuttuisa assuarnartumik pissuseqarnerat taakkualu ajoqersuutaat Biibilimik tunngaveqanngitsut. Taamaattumik inuppassuit isumaqarput ilisimatuussutsimik inoqatimilluunniit ajunngisaarnerannik siuneqassusiannillu tutsuiginninnissartik kisiat periarfissaralugu. Taamaattumik aamma tupinnanngilaq inuppassuit toqqissisimanngitsupilussuummata imaluunniit siunissaminnik eqqarsaatiginninnerorusunngimmata.

6, 7. (a) Sooq Guutip kiffai taassumunnga kiffaanngitsut isiginnittaasiannit allaanerusumik isiginnittaaseqarpat? (b) Maanna suut sammissavavut?

 ⁶ Ilagiinnut kristumiunut ilaasut ilaanngitsullu assigiinngissuterujussuaqarput! Jehovamut innuttaasutut inoqatitsitut unamminiagaqartarlutalu ajornartorsiuteqartaraluarluta, taakku uagutsinnut allatorluinnaq sunniuteqartarput. (Atuakkit Esaja 65:13, 14; Malaki 3:18). Sooq? Pissutsit inuiaat atugaat Biibilimi naammaginartumik nassuiarneqarmata, inuunermilu unamminiarnartunik ajornartorsiutinillu iliuuseqarfiginninnissamut piareersimagatta. Taamaattumik siunissarput ingasattumik isumakuluutiginngilarput. Jehovap kiffai tunngavilersuutinut eqqunngitsunut Biibilimillu tunngaveqanngitsunut, kinguaassiuutitigut inuunerlunnermut taamatullu inuunerup kingunerinut illersorneqartarput. Taamaattumik ilagiinnut kristumiunut ilaasut inuit allat misigisimanngisaannik qamuuna eqqissisimapput. — Esaja 48:17, 18; Filippimiut 4:6, 7.

⁷ Oqaluttuat Biibilimeersut Jehovap kiffaasa toqqissisimanerannik, kiffartortuunngitsullu toqqissisimannginnerannik, eqqarsaatiginninnissamut iluaqutigissavavut. Oqaluttuat taakku isiginnittaatsitsinnik iliuutsitsinnillu misissuinissamut Guutillu siunnersuutaanik, uagutsinnut illersuutaasussatut naatsorsuussanik, malinninnerusariaqarnerluta eqqarsaatiginninnissamut kajumississutigissavavut. — Esaja 30:21.

‘Naakkiuteqqajaasimavunga’

8. Jehovamut kiffaasut qanoq iliortariaqartuaannarsimappat?

⁸ Inuiaat oqaluttuarisaaneranni siusissukkulli Jehovamut kiffartorlutillu naalanniarlutik aalajangersimasut taassumunnga kiffartunngitsunut qanittumik attaveqarnaveersaartarput. Aammami Jehova oqarpoq imminik pallorfiginnittut Saatanimillu malinnittut akerariikkumaartut. (1 Mosesi 3:15) Guutip kiffai najoqqutassianik Biibilimiittunik maleruaanissamik aalajangiusimannilluinnaramik inuit pissusilersoriaasiannit allaanerusumik pissusilersortarput. (1 Johannesi 2:15-17) Taamatut aalajangiusimanninneq ajornaatsuujuaannarsimanngilaq. Allaat Jehovap kiffaasa ilaasa imminut pilliutigeriaannaalluni  inuunerup silatusaarnerunera qularilersimavaat.

9. Tussiaat 73-imik allattoq qanoq eqqarsarsimava?

⁹ Jehovap kiffaasa ilaat silatusaartumik aalajangersimanerluni eqqarsalersoq, Asafip kinguaavisa ilagigunagaat, Tussiaammik 73-imik allattuuvoq. Tussiaasiortoq taanna aperaaq sooq guutiitsut ingerlalluarlutillu nuannaarlutillu siumukarajuttartut, Guutimullu kiffartorniarlutik ilungersortut sooq misilinneqarlutillu annikilliortitaasartut. — Atuakkit Tussiaat 73:1-13.

10. Sooq illit tussiaasiortup allagaanik eqqarsaatiginninnissat pingaaruteqarpa?

¹⁰ Illit tussiaasiortup eqqarsaataanut assingusunik eqqarsaateqarnikuuit? Taamaappat, pisuusutut ingasattumik misigissanngilatit upperunnaalersorissanalluunniit. Jehovamut kiffaasut arlallit, aamma Biibilimik allannissamut Jehovamit atorneqartut allat ilaat, tussiaasiortup eqqarsaataanut assingusunik eqqarsaateqartarsimapput. (Jobi 21:7-13; Tussiaat 37:1; Jeremia 12:1; Habakkuki 1:1-4, 13) Jehovamut kiffartorusuttut tamarmik apeqqummut matumunnga akissut eqqarsaatigeqqissaartariaqarlugulu upperisariaqarpaat: Guutimut kiffartorlunilu naalanneq iliuuserineqarsinnaasut pitsaanerpaartaraat? Apeqqut tamanna akerleriissummut Saatanip Naatsiivimmi Edenimi pilersitaanut attuumassuteqarpoq. Guutip kisimi oqartussaanera pillugu akerleriissummut qilammi nunamilu atuuttumut tunngatillugu pingaaruteqangaarpoq. (1 Mosesi 3:4, 5) Taamaattumik tamatta tussiaasiortup allagaanik eqqarsaatiginnikkutta silatusaassaagut. Ajortut pingaakujuttut siumukarpasissullu usorissavavut? Jehovamut kiffartornaveersaarnitsigut ‘naakkiutissaagut’ taakkuninngalu ilaarsilluta? Soorunami Saatanip taamatorpiaq iliornissarput kissaatigaa.

11, 12. (a) Tussiaasiortup qularnini qanoq ajugaaffigaa, tamannalu sumik ilinniarfigisinnaavarput? (b) Tussiaasiortutut isummernissamut suna iluaqutigaajuk?

¹¹ Tussiaasiortup qularnerminik ajugaaffiginninnissaminut suna iluaqutigaa? Naakkiuteqqajaasimanini, tassa naapertuilluarnerup aqqutaanit nigungajannini, nassuerutigaa allatullu isiginnittaaseqalerluni “Guutip illernartuutaanut” pigami — tassa imaappoq, inuit anersaakkut ittunik pingaartitsisut Guutip illernartuutaani, imaluunniit naalaffiani, ilagisaleramigit Guutillu siunertaa eqqarsaatigisaleramiuk. Taava tussiaasiortup paasilerpaa ajortut akissarsiassaattut akissarserusunnani. Takusinnaavaa taakku inooriaasertik aalajangikkatillu pissutigalugit ‘aqqutini quasartuniittut’. Tussiaasiortup paasivaa Jehovamik “ilumoorfiginninngitsut” tamarmik piuneerussaalerunik ‘annilaarsuassasut’, Jehovamulli kiffartortut taassumannga annertoqqusersorneqassasut. (Atuakkit Tussiaat 73:16-19, 27, 28). Qularnanngitsumik oqaatsit taakkua ilumoornerat illit takusimavat. Imminuinnaq eqqarsaatigaluni Guutip inatsisaanik sumiginnaalluni inuuneq immaqa inuppassuarnut kajungernarpoq, taamatulli inuuneq ajortorujussuarmik kinguneqanngitsoorsinnaanngilaq. — Galatiamiut 6:7-9.

¹² Tussiaasiortup misigisimasaa sumik allamik ilinniarfigisinnaavarput? Taanna Guutip innuttaaniilluni toqqissisimavoq ilisimassuserlu taakkunaniittoq misigalugu. Jehovamik pallorfiginnittarfimmukarami eqqarsarluarsinnaalerpoq. Ullumikkuttaaq uagut ilagiit ataatsimiinnerinut najuukkaangatta silatuunik siunnersortissarsisinnaavugut anersaakkullu inuussutissat peqqinnartut nuannaarutigisinnaallugit. Taamaattuminguna Jehovap kiffani pissutissaqarluarluni paasitittarai kristumiut ataatsimiinnerinut najuuttassasut. Tassani qiimmassarneqarlutillu silatusaarnissamut kajumissaarneqassapput. — Esaja 32:1, 2; Hebræerit 10:24, 25.

Ikinngutinnik isumatusaarlutit toqqaagit

13-15. (a) Dina qanoq misigisaqarpa, tamannalu sumut erseqqissaataava? (b) Sooq kristumioqatinik ilagisartagaqarneq illersuutaava?

¹³ Jaakup pania Dina Jehovamut kiffartortuunngitsunik ilagisartagaqarnini pissutigalugu sualuttunik ajornartorsiuteqalersut ilagaat. Mosesimik allakkani siullerni oqaluttuarineqarpoq Dinap arnat Kana’animiut inuusuttut ilaquttami najugaqarfiata eqqaaniittut pulaartarai. Kana’animiut Jehovap kiffaatulli ileqqussatigut qutsissunik najoqqutaqanngillat. Itsarnisarsiuulli nassaavi naapertorlugit Kana’animiut  inooriaaseqarsimapput nunap tamatuma guutipilussiornermik, kinguaassiuutitigut inuunerlunnermik nakuusernermillu ulikkaalerneranik kinguneqartumik. (2 Mosesi 23:23; 3 Mosesi 18:2-25; 5 Mosesi 18:9-12) Dina inunnik taakkuninnga peqateqartarmat taassumunnga tunngatillugu qanoq pisoqarsimanersoq takoriartigu.

¹⁴ Angutit tamaani najugallit ilaata, Sikemip, ‘ataatami inoqutaanit tamanit ataqqisaanerpaasutut’ eqqartorneqartup, Dina takuaa ‘tigullugulu pinngitsaalillugulu arneriffigalugu’. (1 Mosesi 34:1, 2, 19) Ila alianassusia! Isumaqarpit Dinap imminut taamatut pisoqarnissaa takorloorsinnaasimassagaa? Immaqa inuusuttunik, ajunngivissutut isigisaminik, tamaani najugalinnik ikinngutitaartorniarsariinnarpoq. Dina uukapaatitaavoq.

¹⁵ Oqaluttuaq tamanna sumik ilinniarfigisinnaavarput? Allanik upperisalinnik ilagisartagaqarneq ajortorujussuarmik kinguneqartartoq. Biibilimi allassimavoq ‘ikinngutipalaaqarneq ileqqorikkaluartunut aseruutissiisartoq’. (1 Korinthimiut 15:33) Inunnilli uatsitut upperisalinnik, uatsitut ileqqussatigut qutsissunik najoqqutalinnik aamma Jehovamik asannittunik peqateqartarnerput uagutsinnut illersuutaavoq. Pitsaasunik taakkuninnga ilagisartagaqarnerput isumatusaarnissamut iluaqutigisinnaavarput. — Ussatit 13:20.

‘Uffarneqarlusi minguiarneqarpusi’

16. Paulusi Korinthimi ilagiinniittut ilaat pillugit qanoq allappa?

¹⁶ Ilagiit kristumiut minguttuunik ileqqoqarunnaarlunilu iliuuseqartarunnaarnissamut inuppassuarnit iluaqutigineqarsimapput. Apustilip Paulusip ilagiinnut Korinthimiittunut allakkani siulleq allakkamiuk kristumiut tamaaniittut ilaasa inuunertik Guutip najoqqutassiaanut naapertuutitilerniarlugu allannguisimanerat eqqartorpaa. Ilaat kinguaassiuutitigut inuunerluttuusimapput, guutipilussiortuusimapput, allasiortuusimapput, suiaassuseqatiminnik atoqateqartartuusimapput, tillittuusimapput, imerajuttuusimapput ilaallu ilanngullugit. Paulusilli taakku ima allaffigai: “Uffarneqarlusili minguiarneqarpusi.” — Atuakkit 1 Korinthimiut 6:9-11.

17. Inuppassuit najoqqutassianik Biibilimiittunik maleruaanertik qanoq inuunerminnik allannguissutigisimavaat?

¹⁷ Inuit Jehovamik ilisarisimanninngitsut iluameersunik najoqqutassaaleqipput. Toraagassaminnik namminneq aalajangiussisarput, imaluunniit ileqqussat tungaatigut allanik ilaarsiinnartarlutik, soorlu itsaq Korinthimiut ilaat uppertunngunnginnerminni taamaassimasut. (Efesosimiut 4:14) Guutilli oqaasia siunertaalu pillugit eqqorluartumik ilisimasaqarneq inuit inuunerminnik allannguissutigisinnaavaat inuunertik pitsaanerulersillugu, siunnersuutinik Biibilimiittunik malinnikkunik. (Kolossemiut 3:5-10; Hebræerit 4:12) Ullumikkut ilagiinnut kristumiunut ilaasut ilarpassuisa oqaluttuarisinnaavaat Jehovap najoqqutassiai naapertuilluartut pillugit ilisimasaqanngikkallaramik taakkuninngalu maleruaalinngikkallaramik ileqqussatigut killeqarnatik. Taamaakkaluartoq nalerisimaarnatillu pilluaapput. Aatsaat Guutip innuttaanik peqateqartaleramik najoqqutassianillu Biibilimeersunik maleruaaleramik qamuuna eqqissipput.

18. Arnaq inuusuttoq qanoq misigisaqarsimava, tamatumanngalu suna paasivarput?

¹⁸ Tamatuma akerlianik inuppassuaqarpoq ilagiinni kristumiuni isumannaassuseq qimanniarlugu ilaanni aalajangersimasunik, maannali aalajangikkaminnik peqqissimissutiginningaartunik. Qatanngut arnaq Tanyamik taasinnaasarput oqaluttuarpoq peroriartornermini sallusuissut ilaatiguinnaq aalluttarlugu, 16-inilli ukioqarluni ilagiit qimappai ‘silarsuarmi misigisaqarniarluni’. Tamanna ilaatigut kinguneqarpoq taassuma kissaatiginngisaminik naartulerneranik naartuersinneranillu. Tanya maanna ima  oqarpoq: “Ukiut pingasut taakkua ilagiinnit qimagussimaffigisama kingorna misigissutsikkut ikersuaqalerpunga peertussaanngitsunik. Naalliuutigiuarpara qitornannik suli erniusimanngitsumik toqutsinera. . . . Inuusuttut silarsuarmik ‘misiliigallaannarusukkaluartulluunniit’ oqarfigerusuppakka: ‘Taamaalioqinasi!’ Imaassinnaavoq aallaqqaammut nuannersoq, kingunerluttarporli. Silarsuaq naalliuutaannarnik neqeroorutissaqarpoq. Uanga nalunngilara. Misigereerpara. Jehovap peqatigiissortaaniiginnarit! Pilluarnartutuaavoq.”

19, 20. Ilagiit kristumiut sumut illersuutaappat, aamma qanoq illersuutaappat?

¹⁹ Eqqarsaatigiuk ilinnut qanoq pisoqarsinnaanera ilagiit kristumiut toqqissisimanartut qimakkaluarukkit. Inuppassuit sallusuissut malillugu inuulinngikkallaramik inuunerminnik isumaqanngitsumik eqqarsaatiginnittut eqqarsaatigiinnarlugu uulikullattarput. (Johannesi 6:68, 69) Illit toqqissisimasinnaavutit aliasuutinullu ajornartorsiutinullu Saatanip silarsuaani nalinginnaaqisunut illersorneqarlutit qatanngutinnut kristumiunut qanittumik attaveqartuarnikkut. Taakku ilagisarukkit ilagiillu ataatsimiinnerinut najuuttuaruit, Jehovap najoqqutassiaasa naapertuilluartut ilisimassusermik ulikkaarnerat pillugu eqqaasinneqartarumaarputit taakkulu malillugit inuunissamut kajumissisinneqartarumaarlutit. Jehovamik ‘ilagiinni unnersiutiginninnissamut’ pissutissaqarluarputit. — Hebræerit 2:12.

²⁰ Soorunami kristumiut tamarmik assigiinngitsunik pissuteqarlutik piffissap ilaani aalajaattuarnissartik artornartittarpaat. Immaqa eqqortup tungaanut siulersorneqarnissartik pisariaqartiinnarpaat. Illit — ilagiinniittullu sinneri — uppeqatisi artornartorsiorneranni ikiorniarlugit sunik iliuuseqarsinnaavisi? Allaaserisami tulliuttumi sammineqassaaq illit qatanngutitit qanoq ilillutit ‘tuppallersartuarlugillu taakkununnga ineriartuutaajuarsinnaasutit’. — 1 Thessalonikamiut 5:11.

Qanoq akissavit?

• Tussiaat 73-imik allattup misigisai sumik ilinniarfigisinnaavavut?

• Dinap nalaatai sumik ilinniarfigisinnaavavut?

• Sooq ilagiinni kristumiuni toqqissisimasinnaallutalu illersorneqarsinnaavugut?

[Atuaqqissaarnermi apeqqutit]

[Qupp. 10-mi assiliartat]

Isumannaatsumi ‘nalugit’; ilagiinniiginnarit!