Ilagiinnut ineriartuutaajuarit

“Tuppallersaqatigiigitsi ineriartorteqatigiigitsilu.” — 1 THESSALONIKAMIUT 5:11.

1. Ilagiinni kristumiuni suut nuannaarutigisinnaavavut, taamaakkaluartorli sunik ajornartorsiuteqarsinnaavugut?

ILAGIINNUT kristumiunut ilaalluni nuanneqaaq! Jehovamut attaveqarluarpugut. Guutip oqaasia tutsuigaarput najoqqutarisarlugulu, tamannalu kristumiorpalunngitsumik inooriaaseqarnerup kingunipiluinut illersuutigaarput. Uagutsinnik ajunnginnerpaamik kissaassisunik ilumoortunik ikinnguteqarpugut. Aap, nuannaarutissarpassuaqarpugut. Amerlanersavulli ajornartorsiutinik assigiinngitsunik akiugaqarput. Ilaat Guutip oqaasianik paasinninnerunissamut ikiorneqarnissamik pisariaqartitsipput. Allat napparsimallutilluunniit nikallungasorujussuupput; sulilu allat sianiilliorlutik aalajangikkamik kinguneri naalliuutigaat. Aamma tamatta silarsuarmi guutiitsumi inuusariaqarpugut.

2. Qatanngutivut artornartorsiuleraangata qanoq periartariaqarpugut, aamma sooq?

² Uppeqaterput naalliukkaangat artornartorsioraangalluunniit, tamanna attorneqaatiginngitsoorneq ajorparput. Apustilip Paulusip ilagiit timimut assersuuppai oqarlunilu “avat ataaseq naalliukkaangat avatit tamarmik [naallioqatigisaraat]”. (1 Korinthimiut 12:12, 26) Pissutsini taama ittuni qatanngutivut tapersersorniarlugit iliuuseqartariaqarpugut. Kristumiut unamminiarnartut nalaatamik naammagalugit atornissaannut ikioqatigiittut pillugit Biibilimi  oqaluttuarpassuaqarpoq. Oqaluttuat taakkua ilaannik misissuinitsinni uagut taakkununnga assingusumik allanik qanoq ikiuisinnaanerluta eqqarsaatigisinnaavarput. Illit qanoq ilillutit qatanngutinnik anersaakkut tapersersuisinnaavit taamaalillutillu Jehovap ilagiissaanut ineriartuutaallutit?

“Ilaliuppaat”

3, 4. Akvilap Priskillallu Apollosi qanoq ikiorpaat?

³ Apollosi Efesosimi suli najugaqalernanili iivangkiiliumik oqaluussissutiginnittartuuvoq aallussilluartoq. Apustilit Suliaanni ima allaatigineqarpoq: “[Anersaakkut] ilungersorluni Jiisusi pillugu sukumiisumik oqaluussivoq ajoqersuillunilu, naak Johannesip kuisissutaa kisiat nalunngikkaluarlugu.” Apollosip Ataatap Ernerullu anersaallu illernartup aqqini kuissut pillugu ilisimasaqannginneranit erserpoq ukiumi 33-mi piinsip ullua sioqqullugu Johannesip Kuisisup ajoqersugaanit Jiisusilluunniit ajoqersugaanit nalunaajaaffigineqarsimasoq. Apollosi aallussilluartuuvoq, pingaarutilinnilli ilisimanngisaqarpoq. Taassuma uppeqatiminik peqateqartarnini qanoq iluaqutigaa? — Apustilit Suliaat 1:4, 5; 18:25; Matthæusi 28:19.

⁴ Aappariit kristumiut Akvilap Priskillallu Apollosi synagogimi nakimaalluni oqaluussisoq tusarnaaramikku ilaliuppaat Allakkanillu paasinninnerunissaanut ikiorlugu. (Atuakkit Apustilit Suliaat 18:24-26). Taamaalioramik asannittuliorput. Akvilap Priskillallu Apollosi periaaserillutik innimittarlutillu saaffigisimassavaat isornartorsiorneqartutut misigeqqunagu. Apollosi ilagiit kristumiut oqaluttuarisaanerata aallaqqaataatungaa pillugu ilisimasaqarpianngiinnarpoq. Qularnanngitsumik qujamasuutigaa ikinngutitaami paasissutissanik pingaarutilinnik taakkuninnga aveqatigerusummanni. Tamakkuninnga ilisimasaqarluni Apollosi qatanngutiminut Akajamiittunut “iluaqutaangaalerpoq” sunniuteqarluartumillu nalunaajaalluni. — Apustilit Suliaat 18:27, 28.

5. Oqaluussisartut tusindillit asannittumik qanoq ikiuippat, qanorlu kinguneqarpa?

⁵ Ullumikkut ilagiinni kristumiuniittut ilarpassuisa Biibilimik paasinninnissaminnut imminnik ikiuisimasut qujamasuffigingaarpaat. Ilinniartorpassuit taakkualu ilinniartitsisui ataavartumik ikinngutigiilersimapput. Amerlanertigut oqaluussisartut inuit sallusuissummik paasinninnissaannut ikiorumallugit qaammatit arlallit ingerlaneranni aalajangersimasumik Biibilimik atuaqatigisariaqartarpaat. Oqaluussisartulli taamaaliornissamut kajumissuseqarput, nalunngilaammi tamanna inuuinnarnissamut pingaaruteqarluinnartoq. (Johannesi 17:3) Aamma nuannertaqaaq allat sallusuissummik paasinnikkaangata, tamatumunnga naapertuuttumik inuuniarlutik aalajangeraangata inuunertillu Jehovap piumasaatut iliornissamut atuleraangassuk!

‘Tusaamasaalluarpoq’

6, 7. (a) Sooq Paulusip Timotheusi angalaqatissamisut toqqarpaa? (b) Timotheusi sutigut siumukarnissaminut ikiorneqarpa?

⁶ Apustilip Paulusip ajoqersuiartortitatut aappassaanik angalanermini angalaqatinilu Silasi Lystramut tikeraaramik angut inuusuttoq Timotheusimik atilik, inuusuttuaraajunnaalinngikkuni 20-t sinnilaarlugit ukioqartoq, naapippaat. Taanna “Lystrami Ikonionimilu  qatanngutinit ataqqisaavoq [tusaamasaalluarpoq, 1936].” Timotheusip anaanaa, Eunike, aanaavalu, Loisi, kristumiuupput tunniulluinnarsimasut, ataataali taakkunatut upperisaqanngilaq. (2 Timotheusi 1:5) Imaassinnaavoq Paulusip ukiualuit tamatuma siorna tamaanga tikeraaqqaarami ilaqutariit taakku naapissimagai. Maannali apustilip taassuma Timotheusi immikkut maluginiarpaa imaannaanngippasimmat. Utoqqaanertaqatigiit tassaniittut akuerinninneratigut Timotheusi Paulusip ajoqersuiartortitatut kiffartornerani angalaqataasinnaanngorpoq. — Atuakkit Apustilit Suliaat 16:1-3.

⁷ Timotheusi uppeqatiminit imminit utoqqaanerusumit ilinniagassarpassuaqarpoq. Piffissalli ingerlanerani ima ilikkagaqarsimatigaaq Paulusip isumalluarluni taanna ilagiit ilaannut sinniisumisut aallartissinnaallugu. Timotheusi misilittagakitsuusimagaluarluni immaqalu ittoortuusimagaluarluni ukiut 15-it missiliorlugit ingerlaneranni Paulusimik suleqateqarnermini assut siumukarpoq nakkutilliisutsialanngorlunilu. — Filippimiut 2:19-22; 1 Timotheusi 1:3.

8, 9. Qatanngutit inuusuttunik ilagiinniittunik kajumissaariniarlutik qanoq iliorsinnaappat? Assersuuteqarit.

⁸ Ullumikkut anguterpassuit arnarpassuillu inuusuttut ilagiinni kristumiuniittut periarfissarpassuaqarput. Inuusuttut taakku uppeqatinit anersaakkut ittunik pingaartitsisunit kajumissaarneqarlutillu isumassorneqarunik imaassinnaavoq Jehovap innuttaasa akornanni akisussaaffeqarnerulernissamik sulissutiginnikkusulissasut. Ilagiit najukkatit qimerlooriakkit! Inuusuttoqarpa Timotheusip pisimaneratut ikiuunnissamut piareersimarusussinnaasunik? Illit ikiuillutillu kajumissaarinikkut immaqa pionerinngorsinnaapput Betelimiluunniit sulisunngorsinnaallutik, ajoqersuiartortitanngorsinnaapput nakkutilliisunngorsinnaallutilluunniit angalasartut. Illit taakku anguniagassanik tamakkuninnga anguniagaqarnissaannut ikiorniarlugit susinnaavit?

⁹ Martinip, ukiuni 20-ni Betelimi najugaqarsimasup, ukiut 30-t matuma siorna nakkutilliisup angalasartup angalaaqatiginerani taassuma imminik soqutiginninnermik ersersitsinera qujamasulluni eqqaamavaa. Nakkutilliisup angalasartup inuusuttuugallarami Betelimiinnini angorniorluni eqqartorpaa. Martin kajumissaarpaa Jehovap peqatigiissortaani ikiuunnissamut piareersimasinnaanerluni eqqarsaatigeqqullugu. Martin oqaluttuarpoq puiunaatsumik oqaloqatigiinnertik tamanna inuunermini kingusinnerusukkut aalajangikkaminut sunniuteqangaartoq. Illit inuusuttunut ilagiinniittunut teokratiimi anguniagassanik eqqartuinikkut qanoq sunniuteqarsinnaasutit kia ilisimavaa!

‘Tuppallersarsigit nikallortut’

10. Sooq Epafroditusi nikallungalerpa?

¹⁰ Epafroditusi Filippimiit Romamut sivisuumik qasunartumillu angalavoq apustili Paulusi,  uppernini pissutigalugu parnaarussaaqqasoq, tikeraarniarlugu. Qatanngut angut taanna Filippimiunit aallartitaavoq. Filippimiunit Paulusimut tunissummik nassarnermi saniatigut aamma pilersaarpoq apustili taanna najorniarlugu, ajornartorsiornerani ikiorniarlugu. Epafroditusili Romamiitilluni napparsimalerpoq, “toqungajalluni”. Suliassaminik naammassinnissinnaannginnini aliasuutigaa taamaattumillu nikallungalerluni. — Filippimiut 2:25-27.

11. (a) Sooq tupigissanngilarput ilagiinniittut ilaannik nikallungalertoqarluniluunniit isumatsassimangaalertoqarpat? (b) Paulusi Epafroditusi eqqarsaatigalugu qanoq ilioqqusiva?

¹¹ Ullumikkut inuppassuit isumatsassimangaarput assigiinngitsutigut tatineqarnertik pissutigalugu. Silarsuarmi Peqqissaanikkut Suliniaqatigiiffiup, WHO-p, naatsorsuineri naapertorlugit nunarsuup inuisa 20 procentiisut amerlatigisut inuunerminni isumatsassimangaalerumaarput. Jehovap innuttaasa ilaat aamma isumatsassimangaartarput. Peqqiilliorneq, ilaquttanik pilersuinermut tunngatillugu ajornartorsiutit, nammineq kukkusarnerit sanngiissutillu nikallungalissutaasartut ilagaat. Filippimiut Epafroditusi ikiorniarlugu susinnaappat? Paulusi ima allappoq: “Ilassilluarniarsiuk tipaatsungaarlusi, inuillu taama ittut ataqqisarisigit! Kristusimi kiffartuutsillugu inuunini navianartorsiortippaa toqungajavillunilu ilissi uannut kiffartuussinissinni suli amigaataasut naammassiniartillugit.” — Filippimiut 2:29, 30.

12. Nikallungasut isumatsassimangaartulluunniit qanoq tuppallersarneqarsinnaappat?

¹² Uaguttaaq uppeqatitsinnik nikallungasunik isumatsassimangaartunilluunniit qiimmassaasariaqarpugut. Qularnanngitsumik taakkua Jehovamut kiffartorneranni arlaannik nuannersumik eqqaasaqarsinnaavugut. Immaqa kristumiunngorniarlutik piffissarluunniit tamaat kiffartorumallutik inuunerminni allannguerujussuarsimapput. Iliuuserisimasaat pingaartippavut, qulanngilluinnarlutalu oqaluttuussinnaavavut Jehovap aamma pingaartikkai. Ilagiinnili aalajaatsortatta ilaat utoqqalineq peqqiilliornerluunniit pissutigalugu siornatigutut iliuuseqarsinnaanngikkaluartut, ukiorpassuarni kiffartornerat pillugu uagut ataqqingaartariaqarpavut. Uppeqativut nikallunganerminnut isumatsassimangaarnerminnulluunniit sumilluunniit pissuteqaraluarpata, Jehovap kiffani aalajaatsut tamaasa ima siunnersorpai: “Tuppallersarsigit ernumasut [nikallortut, 1936], isumaginiarsigit sanngiitsut, tamaasa nikallujuisaarfigisigit.” — 1 Thessalonikamiut 5:14.

“Isumakkeerfigalugulu tuppallersarniarsiuk”

13, 14. (a) Ilagiit Korinthimiittut pimoorussassamik sumik iliuuseqarpat, aamma sooq? (b) Angutip ilagiinnit ilaajunnaarsitaanera qanoq sunniuteqarpa?

¹³ Ukiuni hundredelinni siullerni ilagiinni Korinthimiittumi anguteqarpoq allamik isumataarnani kinguaassiuutitigut inuunerluttumik. Taassuma pissusilersornera ilagiit minguissusiannik navianartorsiortitsivoq allaallu inunnit ilagiit kristumiut avataanniittunit mamiasuutigineqarluni. Taamaattumik Paulusip pissutissaqarluarluni qatanngutit peqquai taanna ilagiinnit peerseqqullugu. — 1 Korinthimiut 5:1, 7, 11-13.

¹⁴ Taamatut perorsaatissiineq sunniuteqarluarpoq. Ilagiit ajortumik sunnerneqarnissamut illersorneqarput, unioqqutitsisullu ajortuliornini nassuerutigaa ilumoorlunilu peqqissimilluni. Angutip taassuma iliuusiisigut ersermat allamik isumataarsimasoq Paulusip ilagiinnut taakkununnga allakkami aappaanni angutip taassuma ilanngutiteqqinneqarnissaa unnersuussutigaa. Ilanngutiteqquinnarnaguli Paulusip aamma ilagiit oqaaqqissaarpai ajortuliortumik peqqissimisumik ‘isumakkeerfiginneqqullugillu tuppallersaaqqullugit, aliasunnermit suli annerusumit sapilersinneqaqqunagu’. — Atuakkit 2 Korinthimiut 2:5-8.

15. Unioqqutitsisunut peqqissimisunut ilagiinnut ilanngutiteqqinneqartunut qanoq isiginnittaaseqartariaqarpugut?

¹⁵ Oqaluttuaq tamanna sumik ilinniarfigisinnaavarput? Ilagiinnit kristumiunit ilaajunnaarsitaasoqartariaqaraangat tamanna aliasuutigisarparput. Ilaajunnaarsitaasut immaqa Guutip aqqanik ilagiinnillu nikarnarsaasimapput. Immaqa uatsinnorpiaq ajortuliorsimapput. Utoqqaanertalli pineqartumik suliarinnittut Jehovap  siunnersuutaanut naapertuuttumik aalajangerpata ajortuliortoq peqqissimisoq ilagiinnut ilanngutiteqqinneqartariaqartoq, taava taanna Jehovamit isumakkeerfigineqarsimassaaq. (Matthæusi 18:17-20) Uagut Jehova ilaarniartariaqarparput, ilaa? Misigittaatsuugutta isumakkeerfiginnikkumanngikkuttalu, ilumoortumik Jehovamik akerlilersuissaagut. Ilagiinni eqqissinermik ataasiussusermillu siuarsaaqataajumalluta Jehovamillu akuerisaajuarumalluta, ajortuliortunut ilumoorlutik allamik isumataartunut ilanngutiteqqinneqartunullu ‘pissutsitsinni asanninneq aalajangiisuutittariaqarparput’. — Matthæusi 6:14, 15; Lukasi 15:7.

“Ikiortigilluartarpara”

16. Sooq Paulusip Markusi pakatsissutigaa?

¹⁶ Biibilimi allamik oqaluttuaqarpoq uagutsinnik pakatsisitsisunut ajortunik misigissuseqartuannginnissatsinnik ersersitsisumik. Oqaluttuami tamatumani Johannesi Markusi apustilimik Paulusimik pakatsisitserujussuarpoq. Qanoq? Paulusi Barnabalu ajoqersuiartortitatut siullerpaamik aallarmata Markusi ikiuunniarluni aallaqataavoq. Angalanerminnili Markusi sumik pissuteqaraluarnerluni angalaqatini qimappai angerlarlunilu. Paulusip tamanna ima pakatsissutigitigaa ajoqersuiartortitatut aappassaanik aallarnissaminut piareersarnermini Markusip ilaanissaanut ilaannginnissaanulluunniit tunngatillugu Barnabalu isumaqatigiinngillutik. Angalanermi siullermi pisoq pissutigalugu Paulusip Markusi ilaatikkumanngilaa. — Atuakkit Apustilit Suliaat 13:1-5, 13; 15:37, 38.

17, 18. Qanoq ililluta nalunngilarput Paulusip Markusillu akornanni ajornartorsiut aaqqinneqartoq?

¹⁷ Markusi nalunanngitsumik nikalluissimanngilaq Paulusip itigartitsinera pissutigalugu, ajoqersuiartortitatummi angalanini Barnaba peqatigalugu sumiiffimmi allami nangippaa. (Apustilit Suliaat 15:39) Markusip aalajaallunilu tatiginartuunera Paulusip ukiualuit tamatuma kingorna taanna pillugu allagaanit erserpoq. Paulusip, maanna Romami tigusaaqqasup, Timotheusi allakkatigut qaaqquaa. Allakkami tamatumanissaaq Paulusi ima allappoq: “Markusi maannaqatiginiaruk, uanga kiffartortuuninni taanna ikiortigilluartarpara.” (2 Timotheusi 4:11) Aap, Markusi Paulusimit ataqqineqarnerulersimavoq.

¹⁸ Tamanna ilinniarfigilluarsinnaavarput. Markusi ajoqersuiartortitap pikkorissup pissuserisassaanik ineriartortitsivoq. Paulusip itigartitsinera imminut naakkiussutaatinngilaa. Nammineq Paulusilu anersaakkut ittunik pingaartitsisuupput, aamma imminnut puttarsiuanngillat. Paulusip taanna kingusinnerusukkut ikiortitut naleqangaartutut akueraa. Taava qatanngutit ajornartorsiutit ajugaaffigalugillu qaangeraangamikkit ingerlaqqittariaqarput allanillu anersaakkut siumukarnissaannut ikiuinertik ingerlatiinnarlugu. Isumalluartuuneq allallu pissusiinik ajunngitsunik maluginiaaneruneq ilagiinnut ineriartuutaavoq.

Ilagiit illillu

19. Ilagiinni kristumiuniittut tamarmik immikkut qanoq ikioqatigiissinnaappat?

¹⁹ ‘Ulluni atugarliungaarfiusuni’ makkunani illit qatanngutinnit ilagiinniittunit ikiorneqarnissat pisariaqartippat, aamma taakkua ilinnit ikiorneqarnissartik pisariaqartippaat. (2 Timotheusi 3:1) Kristumiut ilaasa ajornartorsiutitik qanoq pitsaanerpaamik anigorsinnaanerlugit namminneq ilisimajuaannanngilaat, Jehovalli ilisimajuaannarpaa. Taassumalu qatanngutit ilagiinniittut assigiinngitsut — aamma illit — allat aqqutikkut eqqortukkoornissaannut ikiuinermut atorsinnaavai. (Esaja 30:20, 21; 32:1, 2) Taamaattumik apustilip Paulusip kajumissaarutaa maliguk! ‘Tuppallersaqatigiittuarlusilu ineriartorteqatigiittuaritsi — soorluttaaq taamaaliortartusi’. — 1 Thessalonikamiut 5:11.

Qanoq akissavit?

• Sooq ilagiinni kristumiuni ineriartorteqatigiittariaqarpugut?

• Allat ajornartorsiutit suut ajugaaffiginissaannut ikiorsinnaavigit?

• Sooq ilagiinniittunit allanit ikiorneqarnissarput pisariaqartipparput?

[Atuaqqissaarnermi apeqqutit]

[Qupp. 14-mi assiliartaq]

Uppeqat ajornartorsiorpat tapersersorlugulu ikiorsinnaavarput

[Qupp. 15-mi assiliartaq]

Ullumikkut anguterpassuit arnarpassuillu inuusuttut ilagiinni kristumiuniittut periarfissarpassuaqarput