‘Inussiarnersumik oqalunneq’ allanut attaveqarluarnerulersitsisarpoq

“Tamatigut oqaluttassaasi inussiarnersumik.” — KOLOSSEMIUT 4:6.

1, 2. Qatanngutip angutip inussiarnersumik periaaserissumillu oqalunnera qanoq kinguneqarpa?

“ULLUT ilaanni illumiit illumut oqaluussitillunga naapitaqarpunga angummik ima kamatsigilersumik siggui sajullutik timaalu tamarmi sajulluni.” Qatanngut angut taama oqaluttuarpoq. Imalu nangippoq: “Mianersorlunga eqqarsalersinniarlugu Biibili tunngavigalugu oqaloqatiginiarsaraara, sulili kamanneruliinnarpoq. Nulia meeraalu ilanngupput uannillu akerartueqataalerlutik, tassanngalu paasivara ingerlasariaqalerlunga. Ilaqutariit taakku paasitippakka akerleriinnissarput siunertarinagu aggerlunga akerleriitsillutalu qimakkusunnagit. Galatiamiut 5:22, 23-mi allassimasut taakkununnga takutippakka, tassani asanninneq, inussiarnisaarneq, imminut naalakkersinnaaneq eqqissinerlu eqqaaneqarmata. Taava ingerlavunga.

² Kingusinnerusukkut aqqusernup illuatungaani illumiit illumut angalaartillunga ilaqutariit taakku illup saavani majuartarfimmi issiasut takuakka. Aggeqquaannga. Eqqarsarpunga ‘sussappammiaasiit’? Angutip kanni imermik immersimavaa imermillu neqeroorfigalunga. Sorraallisaarsimanini pillugu utoqqatserpoq upperluarneralu pillugu nersualaarlunga. Akerleriinnata qimappugut.”

3. Sooq allat kamaatigilernaveersaartariaqarpavut?

³ Ullumikkut silarsuarput ilungersorfiusoq inunnik kamattunik naapitaqanngitsoorfiuneq ajorpoq, aamma oqaluussitilluni. Taamatut pisoqaraangat pingaaruteqarpoq ‘saamallutalu ataqqinnilluinnarnissarput’. (1 Petrusi 3:15, NV) Pulaakkap kamallunilu ataqqinninngitsuliornera qatanngutip angutip qulaani eqqaaneqartup kamaatigilersimasuuppagu, pulaagaq aqilinani immaqa suli kamanneruliinnarsimassagaluarpoq. Qatanngulli angut imminut naalakkersinnaammat ‘inussiarnersumillu oqalummat’, ajunngitsumik kinguneqarpoq.

“Inussiarnersumik” qanoq oqaluttoqartarpa?

4. Sooq ‘inussiarnersumik oqalunnissaq’ pingaaruteqarpa?

⁴ Ilagiit avataanniittunut ilagiinniittunulluunniit ilaquttatsinnulluunniit tunngagaluarpat, pingaaruteqarpoq apustilip Paulusip siunnersuutaanik matuminnga malinninnissaq: “Tamatigut oqaluttassaasi inussiarnersumik tarajulimmillu.” (Kolossemiut 4:6) Attaveqatigiilluassagaanni eqqisseqatigiissagaannilu taamatut inussiarnersumik periaaserillunilu oqalunnissaq pisariaqarpoq.

5. Attaveqatigiilluarneq qanoq paasisariaqanngila? Nassuiaruk.

⁵ Attaveqatigiilluaraanni imaanngilaq eqqarsaatigisat misigissutsillu tamaasa ingerlaannaq oqaatigisariaqartut, ingammik misigissutsikkut aalaterneqarsimagaanni. Biibilimi ersersinneqarpoq kamajaneq sanngiinnermut, nukittunermuunngitsoq, ersiutaasoq. (Atuakkit Ussatit 25:28; 29:11). Israelikkut pikitsitsiumatunerat pissutigalugu ilaanni Mosesi — nunarsuarmi taamani inuusut ‘anneruniajuinnerpaartaat’ — kamalerpoq Guuti naalannarsisinngitsoorlugu. Mosesip qanoq isumaqarnini erseqqissumik oqaatigaa, Jehovalli iluarinngilaa. Israelikkut ukiuni 40-ni siulersoreerlugit nunamut neriorsuutigisamut taakkuninnga siulersuinissaq immikkut pisinnaatitaaffiginngitsoorpaa. — 4 Mosesi 12:3; 20:10, 12; Tussiaat 106:32.

6. Allanik oqaloqateqaraangatta imminut naalakkersinnaaneq qanoq paasisariaqarpa?

⁶ Biibilimi kajumissaarneqarpugut oqalukkaangatta mianersorlutalu silatusaartaqqulluta, imaluunniit imminut naalakkersinnaasaqqulluta. “Oqaluppallaaraanni unioqqutitsinngitsoorneq ajornartarpoq, silatuujuvoq oqaasissaminik killiliisinnaasartoq.” (Ussatit 10:19) “Oqalunnerminik ingasaassinaveersaartoq ilisimasaqartuuvoq, imminut naalakkersinnaasoq angutaavoq silassorissoq.”  (Ussatit 17:27) Imminulli naalakkersinnaagaanni imaanngilaq nammineq isuma ammasumik oqaatigineqanngisaannassasoq. Imminut naalakkersinnaagaanni “inussiarnersumik” oqaluttoqarsinnaavoq, oqaq katsorsaatitut, ajoqusiiniutissatuunngitsoq, atorlugu. — Atuakkit Ussatit 12:18; 18:21.

“Nipangersimaffissaqarpoq oqaluffissaqarlunilu”

7. Sunik ersersitsissanngilagut, aamma sooq?

⁷ Soorlu suleqativut oqaluussinermilu nalusavut oqaloqatigigaangatsigit periaaserillutalu imminut naalakkersinnaasariaqartugut, taamatuttaaq ilagiinni angerlarsimaffitsinnilu taamatut pissuseqartariaqarpugut. Qanoq kinguneqarsinnaanera eqqarsaatiginagu kamannermik nunusiunnaarneq uagutsinnut, aamma allanut, anersaakkut, misigissutsikkut timikkullu ajoqutaangaarsinnaavoq. (Ussatit 18:6, 7) Misigissutsit nuanniitsut — naammalluinnanngissutsimut kingornussatsinnut takussutissaasut — aqunneqartariaqarput. Allanik mitaatiginninneq, oqaasipilunneq, asissuinermik uumissuinermillu kamannermillu ersersitsinerit eqqunngitsuliornerupput. (Kolossemiut 3:8; Jaaku 1:20) Allanut Jehovamullu attaveqarluarunnaassutaasinnaapput. Jiisusi ima oqarpoq: “Kinaluunniit qatanngumminut kamattoq eqqartuussisunit pisuutinneqassaaq. Qatanngumminullu oqartoq: Raka! Killisiuisoqatigiinnit pisuutinneqassaaq. Oqartorli: Sianiitsoq! Anniarfiup inneranut eqqartuunneqassaaq.” — Matthæusi 5:22. *

8. Qaqugukkut isumarput misigissutsivullu oqaatigisariaqarpavut, aamma qanoq oqaatigissavavut?

⁸ Aalajangersimasunulli tunngatillugu immaqa isummersinnaavugut oqaloqatigiissutiginissaat pitsaanerpaassasoq. Qatanngutip oqaatigisimasai iliuuserisimasaaluunniit ima eqqissiunnaarutigitigigutsigit puiuinnarsinnaanagit, misigissutsit nuanniitsut uummatitsinni isumatsinnilu ineriartortissanngilagut. (Ussatit 19:11) Arlaannik kamaatigisaqaruit, misigissutsitit aqussinnaaleqqaartariaqarpatit. Tamatuma kingorna aaqqiiniarlutit iliuuseqarsinnaavutit. Paulusi ima allappoq: “Seqineq tarrisinaveersiuk narrutsassimanissinni.” Ajornartorsiut suli isumakuluutigigaanni, periaaserilluni piffissaalluartukkut taanna aaqqinniarsarisariaqarpoq.  (Atuakkit Efesosimiut 4:26, 27, 31, 32). Saammaateqatigiinnissarsi siunertaralugu qatanngutit ammasumik, inussiarnersumilli, ajornartorsiut pillugu oqaloqatigiuk. — 3 Mosesi 19:17; Matthæusi 18:15.

9. Sooq ajornartorsiutip oqaloqatigiissutiginnginnerani misigissutsit aqussinnaalersimasariaqarpat?

⁹ Soorunami piffissaalluartukkut oqaloqatiginiartariaqarpat. “Nipangersimaffissaqarpoq oqaluffissaqarlunilu.” (Oqaluussisartup oqaasii 3:1, 7) Aamma allassimavoq ‘iluartoq oqalulersinnani qamuuna eqqarsaqqaartartoq’. (Ussatit 15:28) Ajornartorsiutip oqaloqatigiissutiginissaa utaqqisittariaqarsinnaavoq. Suli kamassimaartilluni oqaloqatigiissutiginiaraanni, tamanna ajornartorsiummik suli ajornerulersitsiinnarsinnaavoq. Aappaatigut aamma silatusaarnerussanngilaq sivisuallaamik utaqqisikkaanni.

Periaaserinneq allanut attaveqarluarnerulersitsisarpoq

10. Inussiarnisaarneq qanoq ililluni allanut attaveqarluarnerulersitsisarpa?

¹⁰ ‘Inussiarnersumik oqalunneq’ oqaloqatigiilluarnerlu allat eqqisseqatigilernissaannut eqqisseqatigiuarnissaannullu iluaqutigisarpavut. Allanut attaveqarluarnerulerumalluta sapinngisatsinnik iliuuseqarutta taakku oqaloqatigilluarnerusalersinnaavavut. llassiortarutta, inussiarnisaartarutta ikiuinissamullu periarfissat eqqumaffigigutsigit aamma tukkortuullutalu inoroorsaartuugutta, taamatut pisavut ammasumik oqaloqatigisinnaanerussavavut. Tamanna allaat ‘aamarsuarnik aamaartunik allap niaquanut katersuinitsinnik’ kinguneqarsinnaavoq, ajornartorsiummik oqaloqatigiissutiginnilluarsinnaanerulerluta. — Romamiut 12:20, 21.

11. Jaaku Esauimut attaveqarluaqqilerumalluni siulliulluni suut iliuuserai, qanorlu kinguneqarpa?

¹¹ Ataataanerpaaq Jaaku allanut attaveqarluarnerulerumalluni inussiarnisaarnissap pingaaruteqassusianik paasinnippoq. Taassuma nalunngilaa marluliaqatini Esaui ima kamatsigisoq imminik toqutserusulluni, taamaammallu Esaui qunugalugu qimaavoq. Ukiorpassuit tamatuma kingorna Jaaku nunagisaminut uterpoq. Esauip angutinik 400-nik ingerlaqateqarluni naapigiarmani Jaaku Jehovamut ikioqqulluni qinuvoq. Taava Esaui amerlaqisunik tunissuteqarfigaa nersutaatimi ilaat siuartillugit aallartillugit. Tunissuteqarnera siunertarisaq naapertorlugu sunniuteqarpoq. Naapikkamik Esaui saammarsimavoq, arpallunilu Jaaku ornippaa eqitaarlugulu. — 1 Mosesi 27:41-44; 32:7, 12, 14-16; 33:4, 10.

“Inussiarnersumik” oqaluttarnikkut allanik qiimmassaagit

12. Sooq qatanngutivut inussiarnersumik qiimmassaataasumillu oqaluuttassavavut?

¹² Kristumiut inunnut kiffartornatik Guutimut kiffartorput. Soorunami kissaatigaarput allanit akuerineqarnissarput. Inussiarnersumik oqalunnerput qatanngutitta nanertuutaannik oqilisaataasinnaavoq. Oqaatsit sakkortuut nanertuutinik taakkuninnga oqimaannerulersitsisinnaapput, allaallu qatanngutitta ilaat oqaatsit taakku pissutigalugit nalornilersinnaapput Jehovamit suli akuerisaanerlutik. Taamaattumik oqaatsitsigut allanik qiimmassaasarta, tassa ‘oqaatsinik ajunngitsuinnarnik aniatitaqarluta ineriartornissamut pisariaqartunik, tamakku tusartunut pilluaatissaaqqullugit’. — Efesosimiut 4:29.

13. Utoqqaanertat suut eqqarsaatigisariaqarpaat (a) siunnersuigaangamik? (b) allagaqaraangamik?

¹³ Ingammik utoqqaanertat ‘saamasuusariaqarput’ ‘savaatinillu’ qajassuartumik pinnittariaqarlutik. Utoqqaanertat siunnersuisariaqaraangamik, allaat ‘oqaatseriitsunik’ (1936) oqaloqateqaraangamik, ‘saamasumik periaaseqarlutik’ taamaaliornissartik anguniagarisariaqarpaat. (1 Thessalonikamiut 2:7, 8; 2 Timotheusi 2:24, 25) Utoqqaanertat aamma utoqqaanertaqatigiinnut allanut immikkoortortaqarfimmulluunniit allagaqaraangamik inussiarnerpaluttariaqarput. Periaaserittariaqarput Matthæusi 7:12-imi allassimasunut naapertuuttumik.

Ilaqutariinni iluamik inussiarnersumillu oqaluuttaritsi

14. Paulusip uiusut qanoq siunnersorpai, aamma sooq?

¹⁴ Oqaatsitta, kiinnatta isikkua pissusilersornittalu allanut sunniuteqarsinnaanerat suusupagissanngilarput. Angutit ilaasa immaqa nalusarpaat oqaatsitik arnamut qanoq sunniuteqartigisinnaasut. Qatanngut arnaq ima oqarpoq: “Qunuummertarpunga uima sukanngaallaffigigaanganga.” Oqaatsit sakkortuut arnanut angutinuninngarnit sakkortorpalunnerusinnaapput, arnap immaqa aamma oqaatsit tamakku sivisuumik eqqaamasarpai. (Lukasi 2:19) Ingammik asasaminit ataqqerusutaminillu sakkortuumik oqaluunneqaraangami taamaattarpoq. Paulusip uiusut ima siunnersorpai: “Nuliasi asassavasi, peqqarniisaarfigeqinasigillu.” — Kolossemiut 3:19.

15. Sooq uiusoq nuliaminik qajassuartumik pinnittassasoq assersuummik nassuiaruk.

 ¹⁵ Tamatumunnga tunngatillugu qatanngut angut nulialik nassuiaavoq sooq angutip nuliani, “qajannarnerusoq”, qajassuartumik pisassagaa. Ima oqarpoq: “Arlaannik akisuumik aserujasumillu tigumiaqaraanni qajassuunneqartarpoq, qajassuutinngikkaanni aserorsinnaammat. Aserornera iluarsaakkaluaraanniluunniit iluarsaannertaa immaqa suli takuneqarsinnaassaaq. Uiusup oqaatsit sakkortuut nuliaminut atortarpagit, nuliaasup tamanna qamuuna anniaatigisinnaavaa, aamma aappariinnerannut ataavartumik ajoqutaalersinnaavoq.” — Atuaruk 1 Petrusi 3:7.

16. Nuliaasoq ilaquttaminut qanoq ineriartuutaasinnaava?

¹⁶ Angutit tamatumunnga assingusumik allat, aamma nuliamik, oqaatigisaat qiimmassaatigisinnaallugillu nikalluutigisinnaavaat. ‘Nuliap silassorissup’, nuliaasup uiminit tatigineqarluartup, taassuma misigissusii eqqarsaatigalugit iliuuseqartarpoq, soorlumi nammineq aamma kissaatigigaa uimi aamma taamatut pisassagaani. (Ussatit 19:14; 31:11) Aap, nuliaasoq ilaqutariinnut, ajunngitsumik ajortumillu, sunniuteqangaarsinnaavoq. ‘Arnat ilisimatuut illu ineriartortittaraat, arnalli sianiitsup assamminik uukkartittaraa.’ — Ussatit 14:1, 1900.

17. (a) Meeqqat inuusuttullu angajoqqaaminnut qanoq oqaluttariaqarpat? (b) Angajoqqaat utoqqaanertallu meeqqanut inuusuttunullu qanoq oqaluttariaqarpat, aamma sooq?

¹⁷ Angajoqqaat meeqqallu taamatuttaaq imminnut inussiarnersumik oqaluuttariaqarput. (Matthæusi 15:4) Meeqqat inuusuttullu oqaloqatigigaangatsigit taakkununnga innimittarneq taakkua ‘narrassaarnaveersaarnissaannut’ ‘kamatsinnaveersaarnissaannulluunniit’ iluaqutigissavarput. (Kolossemiut 3:21; Efesosimiut 6:4) Meeqqanik naqqiinissaq pisariaqartarsinnaagaluartoq angajoqqaajusut utoqqaanertallu taakku inussiarnersumik oqaluutissavaat. Taamaalillutik angajoqqaat utoqqaanertallu meeqqat inuusuttullu eqqortuliornissaannut Guutimullu attaveqarluartuarnissaannut ikiussavaat. Tamanna meeqqat immineerpasinnissaaninngarnit pitsaanerungaarpoq, taamaalioraannimi taakkua tamanna namminneq uniinnassutigisinnaavaat. Imaassinnaavoq inuusuttut qanorpiaq siunnersorneqarsimanertik eqqaamanngikkaat, qanorli oqaluunneqarnertik eqqaamassavaat.

Iluunngarlutit inussiarnersumik oqaluttarit

18. Qanoq ililluta ajortunik eqqarsaateqarunnaarlutalu misigissuseqarunnaarsinnaavugut?

¹⁸ Kamassamik nunusisinnaaneq eqqissisimarpasinnermuinnaq  tunnganngilaq. Anguniagassarput tassaaginnassanngilaq misigissutsinik sakkortuunik naqisimanninnissaq. Kamassaqaatigaluta eqqissisimarpasinniarsarigutta imminut eqqarsartaatsikkut timikkullu artorsaatississaagut. Tamatuma assigiinnarpaa biilimi unittaat speederilu ataatsikkut tutigaanni. Taamaaliorneq biilimik tamaviaartitsillunilu ajoqusiissaaq. Taamaattumik kingusinnerusukkut anitassannik ilumikkiussannik kamassaqaqinak. Jehova qinnuigiuk ikioqqullutit misigissutsit ajoqutaasut uummatinnit peernissaannut. Jehovap anersaava isumannik uummatinnillu allannguisiguk, taassuma piumasaanut naleqqussarlutit. — Atuakkit Romamiut 12:2; Efesosimiut 4:23, 24.

19. Najoqqutassat suut kamalluni oqalliseqateqarnaveersaarnissamut iluaqutigisinnaavavut?

¹⁹ Atoriaannaasunik imminut najoqqutassigit. Najummassimanartoqalerpat malugigaannilu kamaqqajaalluni, qimagutiinnarnissaq iluaqutaasinnaavoq eqqissiiminissaq utaqqillugu. (Ussatit 17:14, NV) Oqaloqatigisat kamaqqajaalerpat, taava saamasumik inussiarnersumillu oqalunnissat ilungersuutigiuk. Siunnersuut una eqqaamajuk: “Akissut sallaatsoq kamannaveersaartitsisarpoq, oqaatsilli ajuallannartut uumitsatsitsisarput.” (Ussatit 15:1) Annernartumik sakkortuumillu oqaaseqarneq pissutsinik suli sukanganarnerulersitsisinnaavoq, aamma saamarpaluttumik oqalukkaluaraanniluunniit. (Ussatit 26:21) Taamaammat pissutsit imminut naalakkersinnaaninnut misilinneqaataappata, ‘oqalukkumaataartuullutillu kamajaatsuugit’. Jehova qinnuigiuk anersaaminik ikioqqullutit nuannersunik, nuanniitsuniunngitsoq, oqalunnissannut. — Jaaku 1:19.

Ilumoorlutit isumakkeerfiginnigit

20, 21. Suna allanik isumakkeerfiginninnissamut iluaqutigisinnaavarput, aamma sooq isumakkeerfiginnittassaagut?

²⁰ Ajoraluartumik inoqanngilaq oqqaminik aqutsilluinnarsinnaasumik. (Jaaku 3:2) Ilaqutariinniittut anersaakkulluunniit qatanngutivut asannittut ajunnginnerpaamik siunertaqaraluarlutik qamuuna anniutigisatsinnik ilaannikkut oqartoortarsinnaapput. Ingerlaannaq mamiatsannata naammagittarluta paasiniarsarisariaqarparput sooq oqarnermissut oqarnersut. (Atuakkit Oqaluussisartup oqaasii 7:8, 9). Taamatut oqarpat annilaangagamik, tatineqaramik, iluarusunnginnamik uagulluunniit ilisimasaqarfiginngisatsinnik akiugaqaramik?

²¹ Qulaani eqqaaneqartut kammasernissamut utoqqatsissutaasinnaanngillat. Taakkuninngali eqqumaffiginninneq inuit ilaasa sooq ilaannikkut eqqarsaqqaaratik oqaaseqarlutillu iliuuseqartarnerannik paasinninnissamut taakkuninngalu isumakkeerfiginninnissamut iluaqutigisinnaavarput. Tamatta allat aliasuutigisaannik oqarnikuullutalu iliuuseqarnikuuvugut, neriuppugullu taakkua ilumoorlutik isumakkeerfigiumaaraatigut. (Oqaluussisartup oqaasii 7:21, 22) Jiisusi oqarpoq Guutimit isumakkeerfigineqassagutta allanik isumakkeerfiginnittariaqartugut. (Matthæusi 6:14, 15; 18:21, 22, 35) Tamanna pissutigalugu utoqqatsipallattarlutalu allanillu isumakkeerfiginnipallattassaagut. Taamaalilluta ilaqutariit ilagiillu iluanni asaqatigiittuassaagut —  “ataasiussutsip qilerutaa naammalluinnartoq” (NV) atajuartissavarput. — Kolossemiut 3:14.

22. Sooq ‘inussiarnersumik oqalunniarluni’ ilungersornerit tamarmik asuliinnarnavianngillat?

²² Pissutsit aaqqissuussaanerata ajortup — kamannerup malunnangaarfiata — matuma naggatissaa qanilliartortillutigu, ilimanarpoq unamminiagassat nalaatassavut ingasatsikkaluttuinnassasut, tamannalu nuannaarnitsinnut ataasiussutsitsinnullu ajoqutaasinnaavoq. Najoqqutassat atoriaannaasut Guutip oqaasianiittut atortarutsigit, tamanna oqqatsinnik eqqortumik atuinissamut iluaqutigisinnaavarput. Qatanngutinut ilagiinniittunut ilaquttatsinnullu eqqissisimanerusumik attaveqalissaagut, maligassiuinerpullu ‘Guuterput pilluartoq’, Jehova, pillugu allanut nalunaajaataalluassaaq. — 1 Timotheusi 1:11.

[Quppernerup ataani ilanngussaq]

Uku nassuiarsinnaavigit?

• Sooq ajornartorsiut oqaloqatigiissutigiumagaanni piffissaalluartukkut oqaloqatigiissutiginissaa pingaaruteqarpa?

• Sooq ilaqutariinni oqaloqatigiikkaanni ‘inussiarnersumik oqaluttuaannartariaqarpa’?

• Qanoq ililluta allat oqaatsitsinnik annersinnaveersaarsinnaavavut?

• Suut isumakkeerfiginninnissamut iluaqutigisinnaavavut?

[Atuaqqissaarnermi apeqqutit]

[Qupp. 24-mi assiliartat]

Misigissutsitit aqussinnaalikkit — aatsaallu tamatuma kingorna oqalunnissamut naleqquttumik periarfissarsiorit

[Qupp. 26-mi assiliartaq]

Uiusup nuliani iluamik inussiarnersumillu oqaluuttuaannartariaqarpaa