Kamannerit nunullugu ‘ajortoq ajugaaffigiuk’

“Nammineerlusi akiniaaqinasi, asasakka, . . . ajortorli ajugaaffiginiaruk ajunngitsoq atorlugu.” — ROMAMIUT 12:19, 21.

1, 2. Jehovap Nalunaajaasui angalasut qanoq maligassaalluarpat?

JEHOVAP Nalunaajaasui 34-t immikkoortortaqarfimmik atoqqaarfissiortitseqataajartorlutik aallarput, mikkallarnerminnili timmisartoq ilaaffigisaat teknikkikkut ajutoormat kinguaattoorput. Timmisartoq orsersorniarlugu nalunaaquttap-akunnerani ataasiinnarmi mikkallartussaagaluarlutik nalunaaquttap-akunnerini 44-rsuarni mikkallarfimminniipput, timmisartoqarfimmi avinngarusimasumi naammattunik nerisassaqarnanilu imigassaqanngitsumi iluameersunillu perusuersartarfeqanngitsumi. Ilaasut ilarpassui kamalerput timmisartoqarfimmilu sulisut sioorasaarlugit. Qatanngutilli eqqissisimapput.

² Naggataatigut kiisami apuupput atoqqaarfissiornermi ataatsimiinnerup naggataatungaa angumeralugu. Qasugaluarlutik qatanngutit tassaniittut ataatsimiinnerup kingorna nuannisaaqatigaat. Kingusinnerusukkut paasivaat naammagittarnertik imminullu naalakkersinnaanertik maluginiarneqarsimasoq. Timmisartumi ilaasut ilaat timmisartortitseqatigiinnut ima oqarpoq: “Kristumiut 34-t timmisartumi ilaasut ilaasimanngikkaluarpata timmisartoqarfimmi uivertoqarsimassagaluarpoq.”

Silarsuarmi kamaffioqisumi inuuvugut

3, 4. (a) Kamanneq nakuusernerlu inuianni qanoq atuutsigippat, aamma qanoq sivisutigisumik atuussimappat? (b) Kainip kamannini nunusinnaasimagaluarpaa? Nassuiaruk.

³ Pissutsit aaqqissuussaanerata ajortup matuma tatisinera pissutigalugu inuit kamalersinnaapput. Taamatut kamanneq uumissuinermik nakuusernermillu kinguneqarajuppoq. Nunat iluanni akornannilu sorsuuttoqartarpoq, allaallu ilaqutariit iluanni akerleriittoqartarpoq. Inuiaat oqaluttuarisaaneranni inuiaat kamannerat nakuusernerallu pillugit oqaluttuarpassuaqarpoq. Assersuutigalugu Adamip Evallu angajulliliaata Kainip kamannini sinnganinilu pissutigalugu nukkani Abeli toquppaa. Kaini ajortorujussuarmik iliorpoq Jehovap kajumissaaraluaraani misigissutsiminik aqutseqqulluni aamma neriorsoraluaraani aqukkunigit pilluaqqujumaarluni. — Atuakkit 1 Mosesi 4:6-8.

⁴ Kainip naammalluinnanngissuseq kingornussimagaluarlugu nammineq suniarnerluni aalajangersinnaavaa. Kamannini nunusinnaasimagaluarpaa. Taamaattumik nakuusernini nammineq akisussaaffigaa. Aamma uagut naammalluinnanngitsuugatta kamannaveersaarnissaq kamatsillunilu iliuuseqarnaveersaarnissaq ajornakusoortittarparput. Aammattaaq ilungersunartunik allanik ajornartorsiuteqarpoq ‘ulluni atugarliungaarfiusuni’ makkunani tatineqarnerulissutaasunik. (2 Timotheusi 3:1) Assersuutigalugu aningaasaqarnikkut ajornartorsiutit misigissutsitsigut tatineqaatigisinnaavavut. Politiit ilaqutariinnillu ikiuiniaqatigiit silarsuarmi aningaasaqarnikkut ajornartorsiutit angerlarsimaffinni kammasertarnerit nakuusernerullu annertusiartornerannut attuumassuteqartippaat.

5, 6. Kamannermut isiginnittaatsimit nalinginnaasumit sumit sunnerneqarsinnaavugut?

⁵ Aammattaaq inuit attaveqarfigisatta ilarpassui ‘namminissarsiortuullutillu’ ‘anneruniartuupput’ allaallu ‘qiningasuullutik’. Inuit pissusiinit ajortunit tamakkunannga sunnertiasuararsuuvugut taamaattumillu kamaqqajaanerulersinnaalluta. (2 Timotheusi 3:2-5) Filmini fjernsynikkullu aallakaatitani akiniaaneq ajunngivissutut nakuusernerlu ajornartorsiutinut aaqqiissutissatut pissusissamisoortutut naapertuilluartutullu takutinniarneqartarpoq. Isiginnaagassiat ilarpassui ima sananeqartarput isiginnaartut inupiluup   “pisassaminik pineqarnissaanik” — amerlanertigut inuttaasumit pingaarnermit ajunngitsumit peqqarniitsumik toqutaanissaanik — qilanaarinnittussanngortillugit.

⁶ Sunniiniutit tamakku Guutip anersaavanik ersersitsinatik ‘silarsuup anersaavanik’ anersaamillu silarsuarmut naalagaasumut, Saatanimut, ilisarnaataasumik ersersitsipput. (1 Korinthimiut 2:12; Efesosimiut 2:2; Saqqummersitat 12:12) Anersaaq taanna uinimmut naammalluinnanngitsumut kajungernartuuvoq Guutillu anersaavanut illernartumut tamatumalu inerititaanut akerliulluinnarluni. Kamassaarneqartilluni akiniaannginnissaq kristumiut ajoqersuutigaat tunngaviusoq. (Atuakkit Matthæusi 5:39, 44, 45). Taavami qanoq ililluta Jiisusip ajoqersuutai maleruarnerusinnaavavut?

Maligassiuilluartut maligassiuinerluttullu

7. Simmiuup Levillu kamannertik nununngimmassuk qanoq pisoqarpa?

⁷ Kamannermik nunusinissamik Biibilimi kajumissaaruterpassuaqarpoq, aamma ersersinneqarpoq kamanneq nunugutsigu nununngikkutsigulu qanoq kinguneqarsinnaasoq. Eqqarsaatigeriaruk qanoq pisoqartoq Jaakup ernerisa Simmiuup Levillu Sikemi akiniarmassuk najartik, Dina, pinngitsaalillugu arneriffigisimammagu. Taakku “ajuallapput kamangaarlutillu”. (1 Mosesi 34:7) Taava Sikemip illoqarfia saassuppaat, Jaakullu ernerisa allat ujajaaffigaat arnanillu meeqqanillu aallarussillutik. Simmiuut Levilu Dina pissutigiinnarnagu taamaaliorput, aammali makitassuseq pissutigalugu, inunnit ataqqisaajunnaarumanatik. Misigipput namminneq kanngunarsagaasimallutik aamma ataatartik, Jaaku, kanngunarsagaasimasoq. Iliuuserisimasaalli Jaakup qanoq isumaqarfigaa?

8. Simmiuumik Levimillu oqaluttuamit akiniaaneq pillugu suna erserpa?

⁸ Dinap nalaatai Jaakup aliasuutigingaarsimassavai. Taamaakkaluartoq ernimi akiniaajumatunerat assuaraa. Simmiuulli Levillu iliuuserisimasatik eqqortutut isigineqalersinniarsaraat ima oqarlutik: “Qatannguterput arnatut atortittartutut iliorfigimmagu ilaginnaannassanerparput?”  (1 Mosesi 34:31) Pisut aamma allanik malitseqarput, Jehovammi taamaaliornerat iluarinngilaa. Ukiorpassuit qaangiummata Jaakup siulittuutigaa Simmiuup Levillu kamallutik naakkittaatsuliorsimanerat pissutigalugu taakkua kinguaavi Israelimi avissaartiterumaartut. (Atuakkit 1 Mosesi 49:5-7). Aap, kamannertik nununngimmassuk Guutimit ataataminnillu iluarineerupput.

9. Qanga Daavi kamarujussuangajappa?

⁹ Kunngi Daavi allatorluinnaq ippoq. Akiniaanissaminut periarfissaqaqattaaraluarluni akiniaanngilaq. (1 Samueli 24:4-8) Ilaannili kamarujussuangajavippoq. Daavip kiffai Nabalip pisoorsuup nersutaataanik taakkuninngalu paarsisunik sernissuisimagaluartut Nabalip soqqusaalliorfigai. Daavi, immaqa ingammik kiffani sinnerlugit eqqunngitsuliorfigineqarsimasutut misigisoq, ingerlaannaq akiniaarusuppoq. Daavi sakkutuuilu Nabalimut inoqutaanullu saassussiartortillugit angutip inuusuttup Nabalip nulia silatooq, Abigajili, qanoq pisoqarsimaneranik oqaluttuuppaa taannalu kajumissaarlugu iliuuseqaqqullugu. Taassuma ingerlaannaq tunissutissanik katersueriarluni Daavi naapigiarpaa. Maniguullunilu Nabalip soqqusaatsuliorsimanera pillugu utoqqatserpoq Daavilu pisumi matumanissaaq Guutimik mianerinninnermik ersersitseqqullugu kajumissaarlugu. Daavi silattuaqigami ima oqarpoq: “[Illit] qujanarsigit ullumi aammik kuisinissaraluara imminullu akiniunnissaraluara pinngitsoortikkakkit.” — 1 Samueli 25:2-35.

Kristumiut isiginnittaasiat

10. Kristumiut akiniaaneq qanoq isigissavaat?

¹⁰ Simmiuumut Levimullu pisuni aamma Daavip Abigajilillu akornanni pisuni erseqqilluinnarpoq Jehovap nununani kamanneq nakuusernerlu akuerinngikkaa eqqisseqatigiissitsiniartartorlu pilluaqqusaraa. Apustili Paulusi ima allappoq: “Ajornanngippat — ilissi aalajangiisuusinnaagussi — inuit tamaasa eqqisseqatiginiarsigit. Nammineerlusi akiniaaqinasi, asasakka, Guutilli kamaassinera periarfississiuk — allassimasoqarmat: ‘Akiniut pigaara, uanga akiliiumaarpunga,’ oqarpoq [Jehova]. Kisianni ‘akeqqat kaappat nerleruk, imerusuppallu immiguk; taamaalioruit aamarsuit aamaartut niaquanut katersorumaarpatit.’ Ajortumut ajugaaffigitinnaveerit, ajortorli ajugaaffiginiaruk ajunngitsoq atorlugu.” — Romamiut 12:18-21. *

11. Qatanngutip arnap kamannermi nununissaa qanoq ilinniarpaa?

¹¹ Siunnersuut tamanna malissinnaavarput. Assersuutigalugu qatanngutip arnap suliffimmini aqutsisortaani utoqqaanertamut naammagittaalliutigaa. Naapertuilluanngitsuunerarlugulu inussiarniitsuunerarpaa. Kamaappaa suliffiminillu soraarusulluni. Utoqqaanertap taanna kajumissaarpaa eqqarsaqqaarani iliuuseqaqqunagu. Utoqqaanertap paasivaa qatanngutip arnap suliffimmi aqutsisuminik kamaassinera pissutsinik ajornerulersitsiinnarsimasoq. (Titusi 3:1-3) Uparuarpaa suliffittaaraluaruniluunniit inussiarniitsumik pineqaraangami qisuariartaatsini sulissutigisariaqaraa. Siunnersorpaalu suliffimmini aqutsisoq nammineq pineqarusunnermisut pisassagaa — Jiisusip oqaasii naapertorlugit. (Atuaruk Lukasi 6:31). Qatanngutip arnap tamanna akueraa. Qanoq kinguneqarpa? Kingusinnerusukkut suliffimmi aqutsisuata isiginnittaasia pitsaanerulerpoq allaallu qatanngut arnaq sulilluarnera pillugu qutsavigalugu.

12. Sooq pingaartumik kristumiut akornanni isumaqatigiinngissutit annernarsinnaasarpat?

¹² Ilagiit kristumiut avataanniittunut tunngatillugu taama ittunik ajornartorsiuteqaleraangat immaqa tupigineq ajorparput. Nalunngilarput Saatanip silarsuaa naapertuilluanngitsuusoq inuillu ajortut iliuusii kamaatigissanngikkivut. (Tussiaat 37:1-11; Oqaluussisartup oqaasii 8:12, 13; 12:13, 14) Anersaakkulli qatanngutinut tunngatillugu ajornartorsiuteqaleraangat annernarnerungaarsinnaasarpoq. Qatanngut arnaq alla oqaluttuarpoq: “Sallusuissummiileqqaarama Jehovap Nalunaajaasuisa naammalluinnanngitsuunerat akueriuminaatsinnerpaasimavara.” Silarsuaq asannissuseqanngitsoq nillertorlu qimapparput,  neriulluta ilagiinniittut tamarmik kristumiuugamik imminnut inussiarnersumik pisassasut. Uppeqat, ingammik ilagiinni immikkut pisinnaatitaaffilik, eqqarsaqqaarnani kristumiorpalunngitsumik iliuuseqarpat, tamanna ajuallaatigisinnaalluguluunniit kamaatigisinnaavarput. Immaqa ima aperivugut: ‘Jehovap innuttaasa akornanni qanoq taama pisoqarsinnaava?’ Allaat apustilit nalaanni kristumiut tanitaasut akornanni taama pisoqartarsimavoq. (Galatiamiut 2:11-14; 5:15; Jaaku 3:14, 15) Uagut nammineq tamakkuninnga nalaataqarutta qanoq qisuariassaagut?

13. Sooq qanorlu ililluta isumaqatigiinngissutit aaqqinniartariaqarpavut?

¹³ Qatanngut arnaq ima nangippoq: “Uannik annersitsisut qinnuttarnissaat ilikkarpara. Iluaqutaajuaannarpoq.” Soorlu atuareeripput, Jiisusip ilinniartippaatigut uagutsinnik malersuisut qinnuttassagivut. (Matthæusi 5:44) Taava anersaakkut qatanngutivut qinnuttariaqarnerungaarpavut, ilaa? Soorlu ataataasup kissaatigigaa meeqqani asaqatigiissasut, taamatuttaaq Jehovap kissaatigaa kiffani nunamiittut asaqatigiissasut. Qilanaaraarput eqqissilluta pilluarlutalu naassaanngitsumik inooqatigiinnissarput, maannangaarlu Jehovap taamatut inooqatigiinnissatsinnik ilinniartippaatigut. Kissaatigaa suliareqqusani pingaarutillit ataasiussuseqarluta suliarissagivut. Taamaattumik ajornartorsiutit aaqqitsigik, ‘unioqqutitsisimasut asattuullugit’ ataasiussuseqarlutalu suleqatigiittuarluta. (Atuaruk Ussatit 19:11). Ajornartorsiuteqaleraangat qatanngutitsinnit ungasillinata ikioqatigiittariaqarpugut Guutip innuttaaniittuaqqulluta, Jehovap ‘taliini ittuinnartuni’ toqqissisimajuaqqulluta. — 5 Mosesi 33:27.

Kikkunnut tamanut inussiarnersuuneq kinguneqarluartarpoq

14. Qanoq ililluta Saatanip akunnitsinni avissaartuutsitsiniaanera akiorsinnaavarput?

¹⁴ Saatani anersaapiluilu nutaarsiassamik nuannersumik oqaluussissutiginninnitsinnik akornusersuillutik ilaqutariinnik ilagiinnillu ilungersorlutik avissaartuutsitsiniarsaripput. Isumaqatigiinngisitsiniarsaripput nalunnginnamikku isumaqatigiinnginneq aserorsaataasartoq. (Matthæusi 12:25) Sunniiniarnerannut ajortumut  akiuunniarnitsinni silatusaassaagut Paulusip siunnersuutaa una malikkutsigu: “[Naalakkamut] kiffaasoq saqitsaassisussaanngilaq. Taanna tamanut inussiarnersuussaaq.” (2 Timotheusi 2:24) Eqqaamasariaqarparput ‘sorsunnerput uinimmut aammullu sorsunnerunani ajussutsip anersaavinut pissaasunut sorsunnerummat’. Sorsunnermi, imaluunniit akiuunnermi, tamatumani ajugaassagutta anersaakkut sakkutuussutit atisariaqarpavut, ilaatigut ‘eqqissinerup iivangkiiliuanik ingerlassinitsigut’. — Efesosimiut 6:12-18.

15. Saassunneqaraangatta qanoq periartassaagut?

¹⁵ Jehovap innuttai eqqissisimasut taakkununnga akeraasunit sakkortuumik saassunneqartarput. Akeraasut taakkua ilaasa Jehovap Nalunaajaasui nakuuserfigisarpaat. Allat tusagassiuutitigut eqqartuussivitsigullu uagutsinnik mamarliisarput. Jiisusi oqarpoq ajoqersukkami taamatut pineqartarnissartik naatsorsuutigisinnaagaat. (Matthæusi 5:11, 12) Qanoq periartassaagut? ‘Ajortoq akilinngisaannassavarput ajortoqataanik’, oqaatsitsigut iliuutsitsigulluunniit. — Romamiut 12:17; atuaruk 1 Petrusi 3:16.

16, 17. Jehovap Nalunaajaasuisa ilaat nalorninartumik sumik nalaataqarpat?

¹⁶ Diaavulup qanorluunniit pigaluarpatigut nalunaajaalluarsinnaavugut ‘ajunngitsoq atorlugu ajortumik ajugaaffiginninnikkut’. Assersuutigalugu Manerassuarmi qeqertat ilaanni Jehovap Nalunaajaasui eqqaaniaanissamut atugassaminnik inimik attartorput. Upperisarsioqatigiit tamaaniittut allat sinniisaasa tamanna paasigamikku ilaasortatik eqqaaniaaffissap nalerpiaani inimut tassunga naalagiaqquaat. Ilagiit sinniisaat taakku politiit naalagaannit ilisimatinneqarput ini taanna piffissaq isumaqatigiissutigineqartoq eqqorlugu Jehovap Nalunaajaasuisa atussagaat. Eqqaaniaanerli aallartittussanngormat ini naalagianik ulikkaarpoq, naalagiarnerallu aallartippoq.

¹⁷ Politiit inimi isersimasunik pinngitsaaliillutik anisitsinissaminnut piareersaleruttortut ilagiit sinniisaasa siuttuata utoqqaanertat ilaat ornippaa aperalugulu: “Unnugu arlaannik immikkut pisassaqarassi?” Utoqqaanertap eqqaaniaanissaq pillugu taanna oqaluttuuppaa, taannalu akivoq: “Aah, sunaaffa!” Politeerlu akuliuppoq oqarlunilu: “Ullaap tungaanili tamanna pillugu oqaluttuuppatsigit!” Ilagiit sinniisaasa siuttuata utoqqaanertaq qiviarpaa qungujulapalaarlunilu oqarluni: “Qanoq iliussavisi? Ini inunnik ulikkaarpoq. Politiinit anisitaasinniarpisigut?” Peqqusersusaarluni Jehovap Nalunaajaasui kukkorpasitsilerpai! Qatanngutit qanoq pissappat?

18. Qatanngutitta nalorninartoq qanoq anigorpaat, qanorlu kinguneqarpa?

¹⁸ Qatanngutivut siunnersuipput inimi tassani nalunaaquttap-akunnerata affaani taakku naalagiarsinnaasut naalagiareerpatalu namminneq eqqaaniaallutik aallartissinnaallutik. Naalagiarneq sivitsortoorpoq, naalagialli aniareermata eqqaaniaalluni nalliuttorsiorneq aallartippoq. Aqaguani oqartussaasut misissuisussanik ataatsimiititalialiorput. Ataatsimiititaliamiittut misissuereerlutik peqqusipput ilagiit taakku nalunaarutigissagaat Jehovap Nalunaajaasui ajornartorsiortitsinatik ajornartorsiortitsisoq tassaasoq ilagiinni sinniisut siuttuat. Aamma ataatsimiititaliamiittut Jehovap Nalunaajaasui qutsavigaat pissutsini ajornakusoortuni naammagittarnerat pillugu. Qatanngutit ‘inunnik tamanik eqqisseqatiginninniarlutik’ ilungersornerat kinguneqarluarpoq.

19. Suna alla allanut attaveqarluarnerulissutigisinnaavarput?

¹⁹ Inunnut allanut attaveqarluartuarnissamut iluaqutaasoq alla tassaavoq ‘inussiarnersumik oqalunneq’. ‘Inussiarnersumik oqalunneq’ qanoq paasisariaqarnersoq, qanoq ililluta ‘inussiarnersumik oqalussinnaasugut’ tamannalu qanoq pikkoriffiginerulersinnaagipput allaaserisami tulliuttumi sammineqassaaq.

[Quppernerup ataani ilanngussaq]

Uku nassuiarsinnaavigit?

• Sooq ullumikkut inuit taama kamatsigippat?

• Biibilimi oqaluttuanit sorlernit erserpa kamannermik nununeq nununnginnerlu qanoq kinguneqartartut?

• Uppeqatitta qamuuna annersippatigut qanoq periassaagut?

• Jehovamut akeraasunit saassunneqarutta qanoq periassaagut?

[Atuaqqissaarnermi apeqqutit]

[Qupp. 19-mi assiliartaq]

Simmiuut Levilu angerlamut apuupput — kamarujussuarnermik kingorna

[Qupp. 21-mi assiliartat]

Inussiarnisaartarutta allat saamanerulersinnaapput