Anersaakkut katersuinersuarmi tamakkiisumik peqataagit

“Tamaviaarlusi Naalagaq kiffartuussiuk.” — 1 KORINTHIMIUT 15:58.

1. Jiisusip ajoqersukkani soqqullugit kajumissaarpai?

UKIUP 30-p naalernerani Jiisusi nunap ilaatigut Samariakkoortilluni puilasuliap eqqaani illoqarfiup Sykarip eqqaaniittumi unippoq qasuerserniarluni. Tassani ajoqersukkani ima oqarfigai: “Isisi uisissigit narsaatillu qimerloorlugit, qaqortissimapput katersuiffigeriaannanngorlutik.” (Johannesi 4:35) Jiisusip ilumoortumik katersuineq pinngilaa, inunnilli eqqortuliorusuttunik ajoqersuganngortussanik anersaakkut katersuineq pivaa. Oqaasii iliuuseqarnissamut kajumissaarutaapput. Suliassarpassuaqarpoq, tamakkualu suliarinissaannut piffissaq killeqarpoq!

2, 3. (a) Sumit erserpa katersuiffissap nalaani inuusugut? (b) Allaaserisami matumani suna sammineqassava?

² Jiisusip katersuinissaq pillugu oqaasii ullutsinni immikkut pingaaruteqarput. Narsaatit, inuiaat silarsuaata, ‘katersuiffigeriaannanngorlutik qaqortissimaffianni’ inuuvugut. Ukiut tamaasa inuit millionillit sallusuissutit inuunartut Guutip oqaasianiittut pillugit ilinniarnissamik neqeroorfigineqartarput, ajoqersuganngorlaallu tusindillit kuisittarput. Aatsaat taama katersugassaqartiginerani, katersuinermi Naalagaasumit Jehovamit Guutimit siulersorneqartumi, peqataanissarput immikkut pisinnaatitaaffigaarput. Illit katersuinermi tamatumani ‘tamaviaarpit’? — 1 Korinthimiut 15:58.

³ Jiisusip ukiuni pingasuni affarmilu kiffartornermini ajoqersukkani katersueqataasussatut ilinniartippai. Allaaserisami matumani Jiisusip ajoqersukkaminut ilinniartitsissutigisarpassuisa pingaaruteqangaartut ilaat pingasut sammineqassapput. Ilinniartitsissutigineqartuni taakkunani ullumikkut sapinngisaq tamaat ajoqersukkanik katersueqataasinnaanissamut pingaarutillit pingasut erseqqissarneqarput. Taakku ataasiakkaarlugit misissoriartigit.

Maniguunnissaq pingaaruteqarpoq

4. Jiisusip maniguunnissap pingaaruteqassusia qanoq erseqqissarpaa?

⁴ Takorlooriaruk: Ajoqersukkat kina arlartik annerpaartarinerlugu assortuussutigeqqammerpaat, immaqalu tatiginninnginnerat akeqqersimaarnerallu kiinaasigut suli takuneqarsinnaavoq. Taava Jiisusip meerannguaq qaaqquaa taakkualu akornannut inissillugu. Meerannguaq malugeqqullugu ima oqarpoq: “Imminut nikanartittoq meeqqatullu uumatut ilisoq taanna Qilaap Naalagaaffiani annerpaavoq.” (Atuakkit Matthæusi 18:1-4). Silarsuarmiittutut, qanoq pissaaneqartigalutillu pisuujutiginerat aamma inissisimaffiat naapertorlugit inunnik eqqartuussisartutut, eqqarsarnani ajoqersugaasup paasisariaqarpaa pingaartorsuannguikkumalluni allanit ‘nikanartutut’ isigineqalerumasariaqarluni. Ajoqersukkat aatsaat ilumoorlutik maniguukkunik Jehovamit pilluaqqusaallutillu atorumaneqassapput.

5, 6. Sooq katersuinermi tamakkiisumik peqataajumallutit maniguuttariaqarpit? Assersuuteqarit.

⁵ Ulloq manna tikillugu silarsuarmi inuppassuit pissaaneqalerumallutik, pisuunngorumallutik inuiaqatigiinnilu malunnarumallutik tamaviaartarput. Tamatuma kinguneranik anersaakkut ittunik sammisaqarnissamut piffissaqalaaginnartarlutilluunniit piffissaqanngilluinnartarput. (Matthæusi 13:22) Jehovamulli kiffaasoq allanit ‘nikanartutut’ isigineqalerumasarpoq katersuinermi Naalagaasumit pilluaqqusaallunilu akuerisaajumalluni. — Matthæusi 6:24; 2 Korinthimiut 11:7; Filippimiut 3:8.

⁶ Francisco, Amerikami Kujallermi utoqqaanertaasoq, assersuutigeriartigu. Inuusuttuulluni pionerinngorniarluni universitetimi ilinniarnini unitsippaa. Ima oqaluttuarpoq: “Kingusinnerusukkut aappassiartaarama aningaasatigut isumannaannerusumik inissisimalissutigisinnaasatsinnik  suliffittaarsinnaagaluarpunga. Aalajangerpugulli inooriaatsitsinnik pisariillisaaniarluta piffissarlu tamaat kiffartornerput ingerlatiinnarniarlugu. Kingusinnerusukkut meerartaaratta suli unamminiagassaqarnerulerpugut. Jehovalli aalajangiussatsinnik aalajangiusimanninnissamut ikiorpaatigut.” Francisco ima oqarpoq: “Ukiut 30-t sinnerlugit utoqqaanertatut kiffartorneq immikkut pisinnaatitaaffigaara, aamma immikkut ittunik allarpassuarnik suliassaqarnikuuvunga. Pilimanianngitsumik inuunerput peqqissimissutigisimanngisaannarparput.”

7. Romamiut 12:16-imi aamma Sefania 2:3-mi siunnersuutit qanoq ilillutit malissinnaavigit?

⁷ Illittaaq ‘qaffanniarnak’ ‘maniguunneq noqqaassutigigukku’ katersuinermi suli allanik pilluaqqussutisillutillu immikkut pisinnaatitaaffeqalersinnaavutit. — Romamiut 12:16; Sefania 2:3; Matthæusi 4:19, 20; Lukasi 18:28-30.

Eqiasuinneq kinguneqarluartarpoq

8, 9. (a) Jiisusip talentinik paarititanik assersuusiaa oqaluttuariuk. (b) Assersuut taanna pingaartumik kikkunnut qiimmassaataasinnaava?

⁸ Katersuinermi tamakkiisumik peqataasinnaajumalluta aamma eqiasuittariaqarpugut. Jiisusip talentinik paarititanik assersuummi tamanna erseqqissarpaa. * Assersuusiaq angummut nunamut allamut aallannginnermini pisuussutiminik kiffaminut pingasunut tunniussisumut tunngavoq. Kiffaq siulleq talentinik tallimanik tunivaa, kiffallu aappaat marlunnik pingajuallu ataatsimik. Naalagaq aallarmat kiffat siulliit marluk ingerlaannaq eqiasuillutik naalakkamik talentiutaanik amerlanerulersitsinissamut periusissarsiulerput. Kiffalli pingajuat ‘eqiasuppoq’. Itersalioriartorpoq talentilu tassunga toqqorlugu. Naalakkap uterami kiffat siulliit marluk akissarsisippai ‘amerlasuunut pisortanngortillugit’. Kiffalli pingajuat talentimik arsaarneqarpoq naalakkamilu inoqutaanit peersitaalluni. — Matthæusi 25:14-30.

⁹ Qularnanngitsumik kiffat eqiasuitsut Jiisusip assersuusiaaniittut ilaarusuppatit sapinngisallu tamaat ajoqersuganngortitsiortoqataallutit. Taavami pissutsit atukkatit illit suliarisinnaasannik killiliingaatsiarpata? Immaqa aningaasatigut artornartorsiornerit pissutigalugu ilaquttatit pilersorniarlugit nalunaaquttap-akunnerpassuini sulisariaqarputit. Aamma imaassinnaavoq inuusuttuuninnitulli nukittutigiunnaarlutilluunniit peqqitsigiunnaartutit. Taamaappat talentinik paarititanik assersuut ilinnut qiimmassaataangaarsinnaavoq.

10. Naalagaq talentinik paarititanik assersuummi eqqartorneqartoq ingasaassinianngitsuunermik qanoq ersersitsiva, tamannalu ilinnut qanoq qiimmassaataasinnaava?

¹⁰ Maluginiaruk assersuummi naalakkap eqqumaffigigaa kiffami assigiimmik naammassisaqarsinnaannginnerat. Tamanna erserpoq kiffat talentinik tunimmagit “tamarmik immikkut piginnaanerat naapertorlugu”. (Matthæusi 25:15)  Ilimagineqartutut kiffaq siulleq kiffat aappaannit aningaasarsiornerungaatsiarpoq. Naalakkalli taakkua marluk eqiasuillutik suliniuteqarnerat pillugu nersualaarpai; siulleq aappaallu ‘kiffaasunik pitsaasunik ilumoortunillu’ taavai assigiimmillu akissarsisillugit. (Matthæusi 25:21, 23) Taamatuttaaq katersuinermi Naalagaasup, Jehovap Guutip, nalunngilaa pissutsit illit atukkatit kiffartorninni iliuuserisinnaasannut sunniuteqartartut. Kiffartorniarlutit uummatikkut iluunngarlutit iliuuseqarnerit taassuma maluginiartarpaa, tamannalu naapertorlugu akissarsisikkumaarpaatit. — Markusi 14:3-9; atuakkit Lukasi 21:1-4.

11. Misilinneqartilluni eqiasuinnerup qanoq pilluaqqusaanangaarsinnaaneranik assersuuteqarit.

¹¹ Selmira, qatanngut arnaq kristumiu Brasiliami najugalik, pillugu oqaluttuamit erserpoq imaanngitsoq Guutimut kiffartornermi eqiasuitsuussagaanni ajunngitsunik atugaqarnissaq pisariaqartoq. Taanna ukiut 20-t matuma siorna uini ujajaanianit toqutaammat meeqqaminik pingasunik kisimiilluni isumassuisariaqalerpoq. Illumi kiffaavoq ullormullu nalunaaquttap-akunnerpassuini sulisarluni, suliffimminullu angalagaangami angallatinut ilaasartaatinut ilaasoqarpallaartunut ilaalluni siumut utimullu qasunartumik angalasarluni. Tamakkuninnga unamminiagassaqaraluarluni aaqqissuussivoq pioneriusinnaalerluni. Kingusinnerusukkut meeraasa ilaat marluk pioneritut kiffartoqataalerput. Selmira ima oqaluttuarpoq: “Ukiut ingerlaneranni inuit 20-t sinnerlugit Biibilimik atuaqqissaaqatigisarsimavakka, taakkulu ilaquttattut isigaakka. Ullumikkut taakkua asanninnerat ikinngutiginerallu — pisuussutaasoq pisiarineqarsinnaanngitsoq — suli nuannaarutigisarpara.” Katersuinermi Naalagaasup Selmira eqiasuilluni suliniuteqarnera pillugu ilumut akissarsisippaa!

12. Qanoq ililluta oqaluussinermi eqiasuilluta suliniuteqarsinnaavugut?

¹² Pissutsit illit maanna atukkatit pissutigalugit piffissaq oqaluussinissamut atorsinnaasat killeqarpat katersuinermi peqataanerulerniarsinnaavutit kiffartornermi angusaqarluarneruniarnikkut. Sapaatip-akunneranoortumik oqaluussinermut tunngasumik ataatsimiinnermi siunnersuutit atoriaannaasut ilaannik atuisaruit oqaluussillaqqinnerulissaatit kristumiullu oqaluusseriaasiinut allanut peqataanissannut sapiissuseqarnerulissallutit. (2 Timotheusi 2:15) Immaqa aamma sammisassat pingaanngitsut kinguartissinnaallugilluunniit samminngiinnarsinnaavatit ilagiit katersuunnerinik tapersersuisinnaaneruniassagavit. — Matthæusi 6:33; Efesosimiut 5:15.

13. Oqaluussinermi eqiasuinnissamut suna kajumississutaanerpaasarpa?

¹³ Eqqaamajuk eqiasuinneq Guutimut qujamasunnermit aallaaveqarmat. (Tussiaat 40:9) Kiffat pingajuata Jiisusip assersuusiaani eqqaaneqartup naalakkani qunugaa, piumasaqarpallaartutut ingasattajaartutullu isigalugu. Taamaattuminguna talentiutini nunamut matoorukkaa naalakkami pisuussutaanik amerlisaanissamut atornagu. Taamatut qarsupittumik isiginnittaaseqarnaveersaassagutta katersuinermi Naalagaasumut, Jehovamut, qanittumik attaveqarnermik ineriartortitsisariaqarpugut taassumunngalu qanittumik attaveqartuartariaqarluta. Taassuma pissusiinik nuannersunik — asanninneranik, erinitsajuissusianik nallittuineranillu — misissuillutillu eqqarsaatiginneqqissaarnissamut piffissaqartarit. Taava qamannga pisumik kajumississaatit taassumunnga kiffartornermi sapinngisat tamaat iliuuseqarnissannut. — Lukasi 6:45; Filippimiut 1:9-11.

“Illernartuussaasi”

14. Katersueqataajumasut piumasaqaat pingaarutilik suna eqqortittariaqarpaat?

¹⁴ Apustili Petrusi Allakkanit Hebræerisuunit issuaalluni Guutip kiffaminut nunamiusunut tunngatillugu piumasaa erseqqissoq pillugu ima oqaaseqarpoq: “Soorlu qaaqqusisersi illernartuusoq ilississaaq inuunissigut tamatigut illernartuussaasi, allassimavormi: ‘Illernartuussaasi uanga illernartuugama.’” (1 Petrusi 1:15, 16; 3 Mosesi 19:2; 5 Mosesi 18:13) Oqaatsini taakkunani erseqqissarneqarpoq katersueqataasut ileqqussatigut anersaakkullu minguitsuussasut. Piumasaqaammik pingaarutilimmik tamatuminnga eqqortitsisinnaavugut assersuutaasumik uffarneqarluta minguiarneqarniarluta iliuuseqarnitsigut. Taamaaliorsinnaavugut Guutip oqaasia sallusuissutaasoq iluaqutigalugu.

15. Guutip oqaasia sallusuissutaasoq uagut iluaqutissatsinnut susinnaassuseqarpa?

¹⁵ Guutip oqaasia sallusuissutaasoq imermut  minguiaataasumut assersuunneqarpoq. Assersuutigalugu apustili Paulusi allappoq ilagiit kristumiut tanitat Kristusimut nuliassatut assuarnaatsutut, ‘illernartuullutillu sumilluunniit ippinnaateqaqqunatik’ Kristusimit ‘imermik oqaatsikkut eqqiarneqartutut’, Guutip isaani minguitsuusut. (Efesosimiut 5:25-27) Jiisusittaaq siusinnerusukkut eqqartorpaa Guutip oqaasiata, oqaluussissutigisami, minguiaasinnaassuseqarnera. Ajoqersukkani ima oqarfigai: “Ilissi minguitsooreerpusi oqaaseq ilissinnut oqaatigisara pissutaalluni.” (Johannesi 15:3) Tassa sallusuissut Guutip oqaasianeersoq ileqqussatigut anersaakkullu minguiaasinnaassuseqarpoq. Aatsaat Guutip oqaasianut sallusuissutaasumut minguiartikkutta Guutip pallorfiginninnerput akuerisinnaavaa.

16. Qanoq ililluta anersaakkut ileqqussatigullu minguittuarsinnaavugut?

¹⁶ Taamaammat anersaakkut katersuinersuarmi peqataasinnaajumalluta siullermik ileqqussatigut anersaakkullu minguttuujusut iliuuserisarunnaartariaqarpavut. Katersueqataanerlu immikkut pisinnaatitaaffigiuarumallugu Jehovap ileqqussatigut anersaakkullu ittunut tunngatillugu najoqqutassiai qutsissut maleruarniarlugit sapinngisarput tamaat iliuuseqartuartariaqarpugut. (Atuakkit 1 Petrusi 1:14-16). Soorlu timikkut minguinnerput eqqumaffigiuartaripput, taamatuttaaq Guutip oqaasia sallusuissutaasoq minguernartoq uagutsinnik minguiaatittariaqarparput. Minguiaatissinnaassagutsigu Biibilimik atuartariaqarpugut kristumiullu ataatsimiinnerinut najuuttarluta. Aamma Guutip eqqaasitsissutaanik maleruaanissarput ilumoorluta ilungersuutigisariaqarparput. Tamanna ajortulioqqajaasarnitsinnik silarsuullu matuma sunniutaanik ajortunik akiuinissamut iluaqutigissavarput. (Tussiaat 119:9; Jaaku 1:21-25) Aap, tuppallernangaarami nalunagu Guutip oqaasia sallusuissutaasoq iluaqutigalugu allaat ajortulianit ingasattunit ‘uffarneqarluta minguiarneqarsinnaasugut’! — 1 Korinthimiut 6:9-11.

17. Minguittuarumalluta siunnersuutit Biibilimik tunngavillit suut malittariaqarpavut?

¹⁷ Guutip oqaasianit sallusuissutaasumit kajumillutit minguiarneqartittarpit? Assersuutigalugu silarsuarmi matumani aliikkusersuutit aserorsaataasut navianaataat pillugit mianersoqquneqaraangavit qanoq periartarpit? (Tussiaat 101:3) Atuaqatit suleqatillu illit upperisannit allaanerusumik upperisallit taamaallaat pisariaqaraangat ilagisarpigit? (1 Korinthimiut 15:33) Sanngiissutit Jehovap isaani ilinnik minguttuunngortitsisinnaasut ajugaaffiginissaat ilumoorlutit ilungersuutigaajuk? (Kolossemiut 3:5) Silarsuarmi matumani politikkikkut akerleriinnernit timersorlunilu unamminerni inuiaassutsimik pingaartitsivallaarnermit avissaaqqajuarpit? — Jaaku 4:4.

18. Ileqqussatigut anersaakkullu minguittuarnerput katersueqataasutut inerititaqarluartuunissamut qanoq iluaqutigisinnaavarput?

¹⁸ Tamakkununnga tunngatillugu aalajaallutillu naalannerit kinguneqarluassaaq. Jiisusip ajoqersukkani tanitat viinnequtip avalequtaanut assersuuppai imalu oqarluni: “Avalequtit uanniittut inerititaqanngitsut tamaasa [Ataatama] peertarpai, inerititaqartullu salittarpai suli inerititaqarneruleqqullugit.” (Johannesi 15:2) Illit Biibilip ernganik minguernartumik inuuninni sunniuteqartitsinerujartortillutit, inerititaqarnerujartuinnassaatit.

Pilluaqqussutit maanna siunissamilu

19. Jiisusip ajoqersugai katersueqataasutut ilungersornerminni sunik pilluaqqussutisippat?

¹⁹ Ajoqersukkat aalajaatsut Jiisusimit ilinniartinneqartut kingusinnerusukkut, ukiumi 33-mi piinsip ulluani, anersaaq illernartoq aqqutigalugu ‘nunarsuup isua tikillugu allaat’ taassuminnga nalunaajaatiginninnissamut nakussatsinneqarput. (Apustilit Suliaat 1:8) Siulersuisoqatigiinnut ilaasortatut, ajoqersuiartortitatut utoqqaanertatullu angalasartutut kiffartulerput, nutaarsiassamillu  nuannersumik “qilaap ataani pinngortitanut tamanut” oqaluussissutiginninnermi siuttuupput. (Kolossemiut 1:23) Pilluaqqussuterpassuarnik katersuipput allanullu nuannaarutaangaarlutik.

20. (a) Illit anersaakkut katersuinermi tamakkiisumik peqataanerit pillugu sunik pilluaqqussutisereerpit? (b) Sunissat aalajangiusimaviuk?

²⁰ Aap, maniguullutalu eqiasuillutalu najoqqutassianik qutsissunik Guutip oqaasianiittunik maleruaaniarluta ilungersorutta anersaakkut katersuinersuarmi maannakkut pisumi tamakkiisumik peqataanerput nuannaarutigiuarsinnaassavarput. Allat silarsuarmi pigisalerituffiullunilu nuannaarniutilerituffiusumi ajornartorsiutigineqartartunik pakatsissutigineqartartunillu akiugaqartut, uagut piviusumik nuannaarlutalu nalerisimaarpugut. (Tussiaat 126:6) Pingaarnerpaamillu, ‘suliniarnerput Naalakkami asuliinnaanavianngilaq’. (1 Korinthimiut 15:58) Katersuinermi Naalagaasup, Jehovap Guutip, ‘suliavut asanninnerpullu aqqanut takutissimasarput’ pillugit naassaanngitsumik akissarsisikkumaarpaatigut. — Hebræerit 6:10-12.

[Quppernerup ataani ilanngussaq]

Eqqaamavigit?

Sooq katersuinermi tamakkiisumik peqataanissamut tunngatillugu . . .

• maniguuttariaqarpugut?

• eqiasuittariaqarpugut?

• ileqqussatigut anersaakkullu minguitsuujuartariaqarpugut?

[Atuaqqissaarnermi apeqqutit]

[Qupp. 21-mi assiliartaq]

Maniguunneq Guutip naalagaaffiata soqutigisaanik pingaarnerpaatitsiffiusumik pilimanianngitsumillu inuunissamut iluaqutigisinnaavarput