Jehovap ullussaani suut qulaarneqarumaartut

“[Jehovap] ullussaa tillinniatut nalliutissaaq, . . . nunalu suullu inunnit suliarineqarsimasut tassaniittut pissuserisamissut illutik takussaajunnaarput [nunarsuarlu tassanilu suliarineqarsimasut qulaarneqarumaarput, NV].” — 2 PETRUSI 3:10.

1, 2. (a) Pissutsit aaqqissuussaanerat ajortoq maanna atuuttoq qanoq ililluni piuneerutissava? (b) Apeqqutit suut sammissavavut?

PISSUTSIT aaqqissuussaanerat ajortoq maanna atuuttoq inuit Jehovamit siulersorneqaratik nunarsuarmut tamakkiisumik naalakkersuisinnaanerat pillugu salluliuutaalluinnartumik tunngaveqarpoq. (Tussiaat 2:2, 3) Salluliuummik tunngavilik naassaanngitsumik atasinnaava? Naamerluinnaq. Saatanilli silarsuaata imminut aserornissaa utaqqisariaqanngilarput. Taanna Guutimit aserugaajumaarpoq piffissami taassuma aalajangigaani taassumalu periaasia atorlugu. Guutip silarsuarmut ajortumut matumunnga akuliunnera taassuma naapertuilluarneranut asanninneranullu naammalluinnartumik ersiutaassaaq. — Tussiaat 92:8; Ussatit 2:21, 22.

² Apustili Petrusi ima allappoq: “[Jehovap] ullussaa tillinniatut nalliutissaaq, taavalu qilaat perpaluttorsuullutik nungussapput pinngoqqaartullu ikuallakkumaarlutik, nunalu suullu inunnit suliarineqarsimasut tassaniittut pissuserisamissut illutik takussaajunnaarput [nunarsuarlu tassanilu suliarineqarsimasut qulaarneqarumaarput, NV].” (2 Petrusi 3:10) “Qilaat” “nunalu” matumani eqqaaneqartut suugamik? ‘Pinngoqqaartut’ ikuallakkumaartut suugamik? Aamma Petrusip suna pivaa allakkami ‘nunarsuaq tassanilu suliarineqarsimasut qulaarneqarumaartut’? Apeqqutinut taakkununnga akissutinik paasinninneq qanittukkut pisussanut mianernangaartunut piareersimanissatsinnut iluaqutigissavavut.

Qilaat nunalu nunguttussat

3. “Qilaat” 2 Petrusi 3:10-mi eqqaaneqartut suuppat, qanorlu nungussappat?

³ Oqaaseq “qilaat” Biibilimi assersuutitut atorneqaraangat amerlanertigut pineqartarput naalakkersuisut pissaanillit innuttaminnit qutsinnerusumik inissisimaffillit. (Esaja 14:13, 14; Saqqummersitat 21:1, 2) ‘Qilaat nunguttussat’ inuit inuiaqatigiinnut guutiitsunut naalakkersuinerannut assersuutaapput. “Perpaluttorsuullutik” nungunnerannit erserpoq qilaat taakku immaqa qanoq sukkatigisumik suujunnaarsitaassasut.

4. ‘Nuna’ suua, qanorlu suujunnaarsinneqassava?

⁴ ‘Nuna’ inuiannut Guutimit ungasillisimasunut assersuutaavoq. Silarsuaq taama ittoq Noap nalaani atuuppoq, Guutillu peqqusineratigut ulersuarmi suujunnaarsinneqarpoq. “[Qilaat] nunalu maannakkut ittut oqaaseq taannarpiaq tunngavigalugu atatinneqarput utaqqisitaallutillu ullormi eqqartuussivissami iluaatsut nungutitaanissaanni ikuallagaanissaminnut.” (2 Petrusi 3:7) Ulersuarmi silarsuup guutiitsup ataasiaammik suujunnaarsinneqarneranit allaanerusumik, ‘annikilliortitaangaarnerup’ nalaani piuneerussiartuaartoqarumaarpoq. (Saqqummersitat 7:14) Annikilliornartussap tamatuma aallaqqaataani Guutip silarsuarmi politikkikkut naalakkersuisut ‘Babylonersuarmik’ piuneerussitissavai taamaalillunilu upperisarsiornikkut arnamik atortittartumik taassuminnga asissuinini ersersillugu. (Saqqummersitat 17:5, 16; 18:8) Harmagedonimi sorsunnissami, annikilliornartussarsuup naggataatungaani, Jehova Saatanip silarsuaata sinneranik nungutitsissaaq. — Saqqummersitat 16:14, 16; 19:19-21.

 ‘Pinngoqqaartut ikuallakkumaartut’

5. ‘Pinngoqqaartunut’ Petrusip eqqaasaanut suut ilaappat?

⁵ ‘Pinngoqqaartut ikuallakkumaartut’ suuppat? Biibilimi oqaatsinik qinerlerfissiami oqaaseq ‘pinngoqqaartut’ “najoqqutassiatut tunngaviusutut” imaluunniit “suup ilaatut tunngaviusutut” nassuiarneqarpoq. Aamma allassimavoq oqaaseq “naqinnernut, oqalunnerup ilaanut pingaarnernut” tunngatillugu atorneqartartoq. ‘Pinngoqqaartunut’ Petrusip eqqaasaanut tunngatillugu pineqarput tunngaviusut silarsuarmut guutiitsumut tamatumanilu isiginnittaaserineqarlutillu ileqqorineqarlutillu anguniagarineqartunut ilisarnaataasut. Taakkununnga ilaavoq “silarsuup anersaava” ‘naalasseriitsut qitornaannut sunniuteqartuartoq’. (1 Korinthimiut 2:12; atuakkit Efesosimiut 2:1-3). Anersaaq, imaluunniit silaannaq, taanna Saatanip silarsuaanut tamarmut sunniuteqarpoq. Tamatuma inuit Saatanip, ‘silaannarsuup naalagaaffiani naalagaasup’ makitallunilu oqaatseriitsuusup, eqqarsartaasianik ersersitsisumik eqqarsartillugillu pilersaarusiortillugillu oqalutsillugillu pissusilersortippai.

6. Silarsuup anersaava qanoq ersertarpa?

⁶ Silarsuup anersaavanik matuminnga tunillanneqarsimasut, nalullugu nalunaguluunniit, isummatik uummatitillu Saatanimit sunnerneqartippaat, taamaattumillu taassuma eqqarsartaasianik isiginnittaasianillu ersersitsipput. Tamatuma kingunerisaanik Guutip piumasaa eqqarsaatiginagu namminneq iluarisamittut iliortarput. Amerlanertigut makitarpaloriartarlutillu namminissarsiorpalaartumik iliuuseqariartarput, oqartussaassusilinnut pikitsitsiumatupput, aamma ‘uinngup pilerigisaanut isillu pilerigisaannut’ nakkaannartarput. — Atuakkit 1 Johannesi 2:15-17. *

7. Sooq ‘uummaterput paarissavarput’?

⁷ Taamaattumik pingaaruteqarpoq ‘uummatitsinnik paaqqinninnissarput’ ilagisartakkanik, atuagassanik, aliikkutassanik nittartakkanilluunniit internettikkut alakkartakkanik toqqaanitsinni Guutip najoqqutassiaanit siulersortinnitsigut. (Ussatit 4:23) Apustili Paulusi ima allappoq: “Mianersoritsi napitinneqaqqunasi ilisimaqqissaarniutinik salloqittaatinillu piunngitsunik, taakku tunngaveqarmata inuit kingornussassiissutaannik silarsuullu pissaanerinik, Kristusimit pisuunngitsunik.” (Kolossemiut 2:8) Mianersoqqussut tamanna Jehovap ullussaa qanilliartortillugu nukinginnarneruleraluttuinnarpoq. Ullussammi tamatuma ‘uunarnersua’ pissutaalluni Saatanip aaqqissuussaani ‘pinngoqqaartut’ ikuallallugit nungunneqassapput taamalu taakkua Guutip kamanneranik akiuisinnaannginnerat qulaarlugu. Tamatumuuna eqqaasinneqarpugut Malaki 3:19-imi allassimasunik ukuninnga: “Maanna nalliutilerpoq ulloq uutsitsivittut ikumasutut ittoq. Soqqusaatsut iluaatsutullu iliortut tamarmik karriiarnikutut ilissapput; ullussallu piumaartussap ikikkassavai.”

‘Nunarsuaq tassanilu suliarineqarsimasut qulaarneqarumaarput’

8. Nuna tassanilu suliarineqarsimasut qanoq ilillutik ‘qulaarneqassappat’?

⁸ Petrusip suna pivaa allakkami ‘nunarsuaq tassanilu suliarineqarsimasut qulaarneqarumaartut’? Petrusip pivaa Jehova annikilliornartussarsuarmi Saatanip silarsuaanik uleersiumaartorlusooq, tamatuma Imminik naalagaaffimminillu akerlilersuinera taamaattumillu suujunnaarsitaasariaqarnera qulaarlugu. Taamanikkussaq pillugu Esaja 26:21-mi ima siulittuuteqarpoq: “[Jehova] ineqarfimminit anissaaq nunarsuarmi najugallit ajortaat pillugit pillariartorlugit. Nunap uleerumaarpaa aammut pisuunini toqutat isertorsinnaajunnaassagamigit.”

9. (a) Suut itigartittariaqarpavut, aamma sooq? (b) Sunik ineriartortitsisariaqarpugut, aamma sooq?

⁹ Jehovap ullussaani silarsuarmit matumannga tamatumalu anersaavanit guutiitsumit ilusilersorneqarsimasut pissusivitik ersersissavaat, aap, allaat imminnut toqoraatissapput. Aamma imaalluarsinnaavoq aliikkusersuuterpassuit nakuusernertallit ullumikkut nuannarineqaqisut inuit isumaannik ilusilersueqataasut taakkua ‘imminnut saassunnerannik imminnullu sorsuunnerannik’ kinguneqartumik. (Zakaria  14:13) Taamaattumik Guutip isaani maajunnartunik uagutsinnik pissuseqalersitsisinnaasunik, soorlu makitasuunngortitsisinnaasunik nakuusernermilluunniit nuannarisaqalersitsisinnaasunik, sunilluunniit itigartitsinissarput pingaaruteqangaarpoq — taakku filmiugaluarpata, atuagaagaluarpata qarasaasiakkulluunniit pinnguaataagaluarpata. (2 Samueli 22:28; Tussiaat 11:5) Guutilli anersaavata illernartup inerititaanik ineriartortitsisa, pissuserineqartussammi inerititami tamatumani ittut Jehovap kamangaarnerata anigornissaanut iluaqutigissavavut. — Galatiamiut 5:22, 23.

“Qilaat nutaat nunalu nutaaq”

10, 11. “Qilaat nutaat nunalu nutaaq” suuppat?

¹⁰ Atuaruk 2 Petrusi 3:13.  “Qilaat nutaat” tassaapput Guutip naalagaaffia qilammiittoq, naalagaaffillu taanna 1914-imi “Guutimik nalusunut piffissarititaasut” naammata pilersinneqarpoq. (Lukasi 21:24) Tassani naalakkersuillutik kunngiusut tassaapput Kristusi Jiisusi taassumalu naalakkersueqatai 144.000-it, taakkualu amerlanersaasa qilammi akissarsiassartik pereerpaat. Qinikkat taakku ‘illoqarfittut illernartutut, Jerusalemitut nutaatut, nuliassatut uissaminut assukkersorsimasutut piareersimalluni qilammit Guutimit aqqartutut’ Saqqummersitani allaatigineqarput. (Saqqummersitat 21:1, 2, 22-24) Soorlu itsaq Israelimi Jerusalemi nunarsuarmiittoq naalakkersuisoqarfiusoq, taamatuttaaq Jerusalemi nutaaq taassumalu uissaa tassaassapput pissutsit aaqqissuussaanissaat nutaaq. Illoqarfik qilammiusoq taanna nunarsuaq pilluaqquniarlugu ‘qilammit aqqassaaq’.

¹¹ ‘Nuna nutaaq’ nunarsuarmi innuttaaqatigiinnut nutaanut Guutip naalagaaffianut kajumillutik naalatsigitinnerminnik uppernarsaasimasunut assersuutaavoq. Anersaakkut paratiisi Guutip innuttaasa maannangaaq nuannaarutigisaat taamanikkussamut paratiisivimmi nunarsuarmi alianaatsumi misigineqarsinnaassaaq. Pissutsinik aaqqissuussinissamut nutaamut tamatumunnga qanoq ililluta ilaalersinnaavugut?

Jehovap ullussarsuanut piareersarit

12. Sooq Jehovap ullussaa silarsuarmut annilaarutaassava?

¹² Paulusip Petrusillu siulittuutigaat Jehovap ullussaa “tillinniatut” — arajutsisitsilluni ilimagineqaranilu — nalliukkumaartoq. (Atuakkit 1 Thessalonikamiut 5:1, 2). Allaat kristumiut ilumoortut ullussamik tamatuminnga ilimaginnittuartut qanoq nalliuteriataartiginera tupaallaatigissavaat. (Matthæusi 24:44) Silarsuarli tupaallaannarnavianngilaq. Paulusi ima allappoq: “Inuit [Jehovamut takornartaasut] oqarpata: ‘Sumilluunniit aarlerinartoqanngilaq!’ taava perlussap tassanngaannaq tikikkumaarpai ernilersup nallisitsisarneratut, aniguissanngillallu.” — 1 Thessalonikamiut 5:3.

13. Qanoq ililluta ‘sumilluunniit aarlerinartoqannginneraanermit’ nakutitaanaveersaarsinnaavugut?

¹³ ‘Sumilluunniit aarlerinartoqannginneraaneq’ salluliuutaassaaq anersaapilunnit isumassarsiarititaasoq suli alla; Jehovalli kiffaasa nakutitaassutiginavianngilaat. Paulusi ima allappoq: “Taarmiuunnginnassi ullussap taassuma tillittutut qaninngassanngilaasi. Ilissimi tamassi qaamanerup ullullu qitornaraasi.” (1 Thessalonikamiut 5:4, 5) Taamaattumik qaamasumiiginnarta, taarsuarmit Saatanip silarsuaaniittumit ungasissumiilluta. Petrusi ima allappoq: “Asasakka, tamakku ilisimareerassigit mianersoritsi soqqusaatsut [ilagiinni kristumiuni eqqunngitsumik  ilinniartitsisut] tammartarnerini peqataaqqunasi tunngavissinnillu kataqqunasi.” — 2 Petrusi 3:17.

14, 15. (a) Jehovap sumik immikkut pisinnaatitaaffilerpaatigut? (b) Oqaatsit isumassarsiarititaasut suut uummammiuliuttariaqarpavut?

¹⁴ Maluginiaruk Jehovap ‘mianersoqqusinissani’ naammagiinnanngikkaa. Aamma asannilluni immikkut pisinnaatitaaffilerpaatigut siunissami pisussanik pingaarnernik ‘ilisimannereernissamik’.

¹⁵ Ajoraluartumilli kristumiut ilaat eqqumasariaqarneq pillugu eqqaasitsissutinik sumiginnaasalersimapput imaluunniit allaat isornartorsiuisalersimallutik. Immaqa ima oqarput: ‘Oqaaqqissaarut taanna ukiorpassuarni tusaqattaartuartarparput.’ Eqqaamasariaqarpaalli oqaaseqaatinik tamakkuninnga upperinninnginnermikkut ilumoortumik inussiaqatigiit aalajaatsuinnaanngitsoq, aammali Jehova taassumalu ernera, tatigineq ajorlugit. Jehova ima oqarpoq: “Nalliutiaanngikkaluarpat utaqqiinnarina [ilimagiuaruk, NV].” (Habakkuki 2:3) Jiisusi tamatumunnga assingusumik ima oqarpoq: “Eqqumagitsi, naluarsimi ulloq Naalakkassi tikiuffissaa.” (Matthæusi 24:42) Aamma Petrusi ima allappoq: “Tamatigut illernartuullusilu Guutimillu mianerinnillusi inuusariaqarpusi, Guutip ullussaata nalliunnissaa utaqqillugu.” (2 Petrusi 3:11, 12) Inussiaqatigiit aalajaatsut taakkualu Siulersuisoqatigiivisa oqaatsit pimoorussassat taakku sumiginnarnavianngilaat.

16. Qanoq isiginnittaaseqarnaveersaassaagut, aamma sooq?

¹⁶ ‘Kiffaruna ajortoq’ Naalakkamik muluneraasoq. (Matthæusi 24:48) Kiffaq ajortoq eqimattanut 2 Petrusi 3:3, 4-mi allaatigineqartunut ilaavoq. Petrusi allappoq “ullussani kingullerni [tikiukkumaartut] mitallersut” ‘pilerissusertillu maliinnarlugu’ inunnik naalallutik Jehovap ullussaanik eqqarsaatiginnittuartunik mitaatiginnittut. Aap, mitalliisut taakku Guutip naalagaaffiata soqutigisaanik pingaarnerutitsinatik imminut pingaarnerutillutillu namminissarsiorlutik kissaatigisatik pingaarnerutippaat. Uagut taamatut naalanngilinngisaannarlutalu navianartumik taama ittumik isiginnittaaseqalinngisaannarisa! Qanortoq ‘Naalakkatta erinitsajuissusia uagut annassutissatsitut paasitigu’ Guutip naalagaaffianik oqaluussissutiginninnermik ajoqersuganngortitsiortornermillu ulapputiginninnitsigut pisussallu Jehovap Guutip isumagiumaagaasa qaqugu nalliunnissaannik ingasattumik isumakuluutiginninnginnitsigut. — 2 Petrusi 3:15; atuakkit Apustilit Suliaat 1:6, 7.

Guuti annatsitsisoq tatigiuk

17. Kristumiut aalajaatsut Jiisusip Jerusalemimit qimaaqqusissutaanut qanoq periarpat, aamma sooq?

¹⁷ Romamiut sakkutuuisa Judæa ukiumi 66-imi Kr.in.king. tiguareermassuk kristumiut aalajaatsut Jiisusip Jerusalemimit qimaaqqusissutaa periarfissaq siulleq atorlugu naalappaat. (Lukasi 21:20-23) Sooq taama iliuuseqapallatsigalutillu aalajangersimalluinnartigippat? Qularnanngitsumik Jiisusip mianersoqqussutaa eqqarsaatiminniitittuarsimagamikku. Nalunngilluinnarpaat aalajangiussartik Kristusip mianersoqqussutigisimasaatut  annikilliuutigiumaarlugu. Aammali nalunngilaat Jehovap kiffani ilumoorfiginnittut imminiiginnanngisaannassagai. — Tussiaat 55:23.

18. Jiisusip oqaasii Lukasi 21:25-28-mi allassimasut annikilliornartussarsuarmut illit isiginnittaatsinnut qanoq sunniuteqarpat?

¹⁸ Aamma Jehova tatigilluinnartariaqarparput, taannami uagutsinnik aniguisitsisinnaasutuaavoq pissutsit aaqqissuussaanerat maanna atuuttoq annikilliornartumit inuiaat oqaluttuarisaaneranni tamarmi annerpaamit nalaanneqarpat. Annikilliornartussarsuaq aallartereerpat, Jehovalli silarsuup sinneranut eqqartuussutiminik naammassinninnginnerani, “inuit sapingajalivissapput annilaanganermit silarsuarmilu qanoq pisoqarumaarneranut ersinermit”. Guutimulli akeraasut annilaanganermit uulittut, taassuma kiffai ilumoorfiginnittut ersiornavianngillat. Nuannaassapput nalunnginnamikku aniguisitaanissartik qanillisoq. — Atuakkit Lukasi 21:25-28.

19. Allaaserisami tulliuttumi suna sammineqassava?

¹⁹ Aap, silarsuarmit tamatumanilu ‘pinngoqqaartunit’ avissaaqqajuarniartut nuanningaartumik siunissaqarput. Soorluli allaaserisami tulliuttumi sammissagipput, naassaanngitsumik inuulerusukkutta ajortunik ingalassimanninnerinnaq naammanngilaq. Pissuserineqartussanik Jehovap nuannaarutigisartagaanik ineriartortitsisariaqarlutalu taassuma akuerisaanik suliaqartariaqarpugut. — 2 Petrusi 3:11.

[Quppernerup ataani ilanngussaq]

Uku nassuiarsinnaavigit?

• Uku sumut assersuutaappat?

“Qilaat” “nunalu” maanna atuuttut

‘Pinngoqqaartut’

“Qilaat nutaat nunalu nutaaq”

• Sooq illit Guuti tatigilluinnarpiuk?

[Atuaqqissaarnermi apeqqutit]

[Qupp. 13-mi assiliartaq]

Qanoq ilillutit ‘uummatit paarisinnaaviuk’ silarsuarmillu avissaaqqajuarlutit?

[Qupp. 14-mi assiliartaq]

Qanoq ililluta ersersissinnaavarput ‘Naalakkatta erinitsajuissusia uagut annassutissatsitut paasillutigu’?