Silarsuup naggatissaa siooragiunnaarpaat

GARYP Karenillu 1970-ikkut naalerneranni qulariunnaavippaat silarsuup naggatissaa qanillisimasoq. Taamaattumik illoqarfik qimallugu nunaannarmut nuupput aalajangerlutillu tamakkiisumik imminnut pilersorumallutik. Aniguerusupput.

Pisariaqartiligassaminnut piginnaaneqalerumallutik atuagarsipput, pikkorissarput sapinngisamillu inunnik amerlanerpaanik oqaloqatiginnillutik. Naatitanut naatitsiviliorput orpeeqqanillu paarnaqartartunik 50-inik ikkussuillutik. Naatsiiassanik atortussanillu katersipput. Inuussutissanik naatitsineq asiunaveersaartitsinerlu ilinniarpaat. Uumasunik toqutsineq neqaanillu uullineq asiunaveersaartsitsinerlu ikinngutiminnit ilinniarpaat. Karenip ilinniarpaa nerisassaaleqilissagaluarunik orpippassuarni naasut sorlaallu sorliit nerisinnaaneritik. Garyp ilinniarpai majsit ikummatissaliarinissaat, saviminermik kissarsuutiliorneq avataanillu pilersorneqartariaqanngitsumik illuliorneq.

Karen ima oqarpoq: “Taamani silarsuarmi pissutsit amiilaarnangaarmata isumaqarpunga qanittukkut atugartuussuseerutissasoq.” Gary ima nassuiaavoq: “Inuusuttutulli allatut allamik nagguilimmik uumissuineq, Vietnamimi sorsunneq peqquserluttuliornerlu akiorniarlugit iliuuseqarniarsarivunga. Sivisunngitsorli pakatsivunga. Inuiaat imminnut piuneeruteqqajaasoraakka.”

Gary ima nangippoq: “Unnuit ilaanni piffissaqariarama Biibilimi Matthæusimiit Saqqummersitat ilanngullugit  atuarpunga. Unnunni tulliuttuni sisamani taakku atuaqqippakka. Aqaguani ullaakkut Karen ima oqarfigaara: ‘Ullussani kingullerni inuuvugut. Guuti qanittukkut akuliutissaaq nunarsuarlu minguiarlugu. Aniguisussat ujartariaqarpavut.’” Gary Karenilu upperisarsiortuni assigiinngitsuni inunnik naggatissamut piareersarusuttunik ujarlilerput.

Sivitsunngitsoq Jehovap Nalunaajaasuisa ilaat taakkununnga kasuttorpoq, Biibilimillu atuaqqissaaqatigineqartalerput. Karen ima oqaluttuarpoq: “Tuppalleqaanga, Biibilimimi allassimasunik nassuiaanneqarluarpunga. Naggatissap nalaa pillugu ilumoortoq paaserusutara kiisami paasivara. Qularnaatsumik siunissamut neriuutissaqarpoq. Nuannerneruvorli, Ataatannut qilammiusumut, qilammik nunamillu Pinngortitsisumut Guutimullu, ikinngutaaneq ineriartortilerakku.”

Gary ima oqarpoq: “Inuunera siunertaqarlualerpoq. Biibilimik atuaqqissaartalerallartillunga naammatsissinnaajunnaarpunga. Siulittuutit Biibilimiittut atuarakkit taakkualu eqquussornerannut uppernarsaatit misissorakkit qularutigiunnaarpara Guuti qanittukkut akuliukkumaartoq. Ima eqqarsarpunga: ‘Inuit piareersartariaqarput, ajunaarnersuarmuunngitsoq, inuunermulli Guutip uagutsinnut inuuneritererusutaanut.’” Garyp Karenillu siunissaq isumalluarfigilerpaat. Silarsuup naggatissaa isumakuluutigiunnaarlugu qularutigiunnaarpaat Guutip inuiaat naalliuutigisaannut pissutaasut piiarumaarai, nunarsuarlu paratiisinngorteqqikkumaaraa.

Ullumikkut, ukiut 25-t qaangiunneranni, Gary Karenilu sulerippat? Karen ima oqarpoq: “Jehovamut Guutimut asanninnera nakussatsittuarpara, allallu aamma taamaaliornissaannut ikiorniarsaraakka. Garylu tapersersoqatigiilluta ilaqutariinnerput nakussatsittuarparput ataasiussuseqarlutalu Guuti kiffartorfigalutigu. Pilimanianngitsumik inuuniarsarivugut allat taakkualu pisariaqartitaat pingaarnerutissinnaajumallugit.”

Gary ima nangippoq: “Inuit millionillit iluaallatsitsissutigisassaannik Guutip naalagaaffiata tikiunnissaa qinnutigiuarpara. Guutip naalagaaffianik nutaarsiassaq nuannersoq pillugu allanik oqaloqateqaraangama Guutimut qinnutigisarpara inuup ataasiinnaalluunniit Biibilimeersumik neriuuteqalernissaa. Ukiuni 25-nit amerlanerusuni Jehovap qinnutit taakku ajunngisaarluni akisarpai. Karenilu upperaarput qanittukkut Jehova nunarsuarmi allannguerujussuarumaartoq, silarsuulli naggatissaa siooragiunnaarparput.” — Matthæusi 6:9, 10; 2 Petrusi 3:11, 12.

[Qupp. 9-mi assiliartaq]

Maanna Garyp Karenillu nuanaarutigaat tusarliussaq Biibilimiittoq tunngavigalugu allanik neriuuteqalersitsisarnertik