Ikioqqullutik suaartartut kia annaassinnaavai?
Ikioqqullutik suaartartut kia annaassinnaavai?
“Guuti, eqqartuussisarnitit suliassaatikkit kunngimut . . . [Annaatissavaa] piitsoq ikioqqulluni suaartartoq.” — Tussiaat 72:1, 12.
1. Daavimut pisimasoq Jehovap nallittuinera pillugu sumik ilinniarfigaarput?
OQAATSIT taakku, Israelimi kunngimit Daavimit * allanneqarunartut, qiimmaallannangaarput. Daavip taamatut allannini ukiualunnik sioqqullugu Batsebamik allasioqateqarsimanini ilerasuutigaa. Taamani Daavi Guutimut ilungersorluni ima qinuvoq: “Unioqqutitsinikka piiarigit nallittuingaarninni! . . . [Ajortuliara] sianigiuarpara. . . . Erniuninniilli pisooreerpunga, ajortimiillunga anaanama ilumiugilermangali.” (Tussiaat 51:3-7) Jehovap kingornussatsinnik ajortiliunerput nallittuilluni eqqaamasarpaa.
2. Tussiaat 72 qanoq qiimmassaatigaarput?
2 Jehovap pissutsit atukkavut alianartut paasilluartarpai. Siulittuutigineqartutut taassuma kunnginngortitaata tanitaasup “annaatissavai piitsoq ikioqqulluni suaartartoq annikilliortitarlu ikiortissaaleqisoq. Nallittussavai sanngiitsut piitsullu, piitsullu inuunerat annaatissavaa.” (Tussiaat 72:12, 13) Tamakku qanoq ilillutik pisinnaanngussappat? Tussiaat 72-imi tamanna nassuiarneqarpoq. Erinarsuummi tamatumani, aallaqqaammut Daavip ernerata Salomop naalakkersuineranut tunngatinneqartumi, ersersinneqarpoq Guutip ernerata, Jiisusip Kristusip, naalakkersuineragut inuiaat naalliuutinit qanoq aniguisinneqarumaartut.
Kristusip naalakkersuineranut siumut assersuut
3. Salomop suna qinnutigaa, Guutillu sumik tunivaa?
3 Daavi utoqqalisimasoq Salomop kunnginngortinneqarnissaanik peqqussuteqareerluni kingusinnerusukkut erni sukumiisumik malittarisassiuuppaa, taassumalu taakku aalajaalluni maleruarpai. (1 Kunngit 1:32-35; 2:1-3) Kingusinnerusukkut Jehova Salomomut sinnattukkut saqqummerpoq oqarlunilu: “Oqaannarit sumik tunissanerikkit.” Salomop manna taamaallaat qinnutigaa: “Kiffat uummateqartikkiuk malussarissumik illit innuttannut naalagaasinnaatillunga eqqortut eqqunngitsullu immikkoortissinnaatillugit.” Salomo maniguulluni taama qinummat Guutip taanna qinnutaanik allarpassuarnillu tunivaa. — 1 Kunngit 3:5, 9-13.
4. Salomop nalaani naalakkersuisup allap taassuma naalakkersuinera qanoq oqaatigaa?
4 Jehovap pilluaqqusineratigut Salomop naalakkersuiffia piffissaavoq nunarsuarmi naalakkersuisut allat naalakkersuiffiinit eqqissineqarfiunerungaarlunilu pigissaarfiunerungaartoq. (1 Kunngit 5:5) Salomop naalakkersuinerani pissutsit qanoq innerannik takuniaasut ilagaat Sabap dronningia malitserpassuilu. Taassuma Salomo ima oqarfigaa: “Uanga nunanni . . . tusarsimasara ilumoorsimavoq. . . . Uannut oqaluttuarineqartut maanna takusama affaannilluunniit inornerupput! Ilisimassutsit peqangaarutitillu tusaamanerinit annerungaarput.” (1 Kunngit 10:1, 6, 7) Jiisusili suli ilisimassuseqarneruvoq, imminullu tunngatillugu naleqqulluartumik ima oqarsinnaasimavoq: “[Takuat] maaniippoq Salomomit annerusoq.” — Matthæusi 12:42.
Salomop annerup naalakkersuinerani pilluaqqussutissat
5. Tussiaat 72-imi suna paasinarsisinneqarpa, aamma suna siulittuutigineqarpa?
5 Salomop annerup, Jiisusip Kristusip, naalakkersuinera sunik pilluaqqussutissartaqassanersoq paasiniarlugu Tussiaat 72 sammeriartigu. (Atuakkit Tussiaat 72:1-4). Tussiaammi tamatumani paasinarsisinneqarpoq Jehova ernermi, ‘Eqqissinermut Naalagaanerup’, Jiisusip Kristusip, “naalagaassusia” pillugu qanoq misiginersoq. (Esaja 9:5, 6) Guutimit siulersorneqarluni Salomop annerup ‘ikiortariallit naapertuilluarnermik pineqartissavai piitsullu ikiussallugit’. Naalakkersuinera eqqissinermik naapertuilluarnermillu ilisarnaateqarumaarpoq. Nunamiikkallarami Jiisusi ukiuni tusindini naalakkersuinissamigut naammassiumaakkani pillugit qilanaartuutissiivoq. — Saqqummersitat 20:4.
6. Guutip naalagaaffiata aqutsinerani pilluaqqussutissat suut pillugit Jiisusi qilanaartuutissiiva?
6 Jiisusip Kristusip iliuuserisimasaasa, Tussiaat 72 eqquutitillugu inuiaat iluaqutissaannut sunik naammassisaqarumaarneranik paasisaqarfiusinnaasut, ilaat misissoriartigit. Naalliuttunik isumassuinera pillugu atuaraangatta qularnanngitsumik tamanna qamuuna attorneqaatigingaartarparput. (Matthæusi 9:35, 36; 15:29-31) Angutip pupissup Jiisusi ornippaa imalu qinnuigalugu: “Piumaguit mingukkunnaarsissinnaavarma.” Jiisusilu akivoq: “Piumavunga, mingukkunnaarit!” Taava angut ajorunnaarpoq! (Markusi 1:40-42) Kingusinnerusukkut Jiisusip uillarneq ernituaminik annaasaqartoq naapippaa. Jiisusip taanna “nalligiummerpaa” angullu inuusuttoq ima oqarfigalugu: “Makigit!”, makipporlu. Inuuleqqippoq! — Lukasi 7:11-15.
7, 8. Jiisusip ajorunnaarsitsisinnaanini qanoq ililluni ersersippaa?
7 Jehovap Jiisusi tupinnartuliorsinnaatippaa. “Arnaq ukiuni aqqaneq-marlunni aaqartuarsimasoq” pillugu oqaluttuami tamanna erserpoq. Arnaq taanna ‘amerlasuunit nakorsarneqarluni anniartarsimaqaaq pigisanilu tamaasa atorsimallugit’, ajorneruliinnarsimavorli. Taassuma inuit akornanniilerluni Jiisusi ornippaa attorlugulu — arnat ‘aaqartut’ pillugit Mosesip inatsisaani piumasarineqartumik unioqqutitsilluni. (3 Mosesi 15:19, 25) Jiisusip malugaa nukik imminit anisoq, taamaattumillu aperivoq kia attorneraani. Arnap ‘annilaarnermit sajuttup taanna pallorfigaa qanorlu pisoqarnera tamaat eqqortumik oqaluttuaralugu’. Jiisusip, Jehovap arnamik ajorunnaarsitsisuuneranik paasinnittup, taanna inussiarnisaarfigaa imalu oqarluni: “Panik, uppernerpit annaappaatit. Eqqissillutit qimagunniarit, ajoqutinnillu ajorunnaarsitaagit!” — Markusi 5:25-27, 30, 33, 34.
8 Jiisusip Ataataminit ajorunnaarsitsisinnaanngortinneqarsimanera napparsimasut iluaqutigingaarpaat, aammali inuit taakkua ajorunnaarsinneqarnerannik takunnittut qamuuna attorneqaatigingaarsimassavaat. Assersuutigalugu inuppassuit Jiisusip qaqqami tusaamasaasumik oqalugiannginnermini inunnik ajorunnaarsitsineranik takunnittut qularnanngitsumik killinneqarsimassapput. (Lukasi 6:17-19) Johannesip Kuisisup ajoqersukkami ilaat marluk Jiisusimut aallartippai taassuma Missiarsiunera qulakkeerniarlugu. Taakkua tikimmanni Jiisusip “inuit amerlasuut nappaataannit, naalliuutaannit anersaapiloqarnerannillu ajorunnaarseqqammerpai tappiitsullu amerlasuut tappissisillugit”. Jiisusip ajoqersukkat marluk taakku ima oqarfigai: “Johannesi oqaluttuukkiartorsiuk takusassinnik tusakkassinnillu: Tappiitsut tappissipput, nukillaarsimasut pisupput, pupissut pupeerupput tusilartullu tusaapput; toqusut makipput iivangkiiliulu piitsunut tusarliunneqarpoq.” (Lukasi 7:19-22) Tamanna Johannesimut qanormita qiimmassaataatigisimassava!
9. Jiisusip tupinnartuliai sumut qilanaartuutaappat?
9 Ilumoorpoq Jiisusip nunarsuarmi kiffartornermini ajorunnaarsitsineri ataavartuunngitsut. Inuit ajorunnaarsitai makititaalu kingusinnerusukkut toqupput. Jiisusip nunarsuarmiitilluni tupinnartuliai ataavartumik aniguinissamut inuiaat taassuma Missiarsitut naalakkersuinerani nuannaarutigisinnaasaannut qilanaartuutaapput.
Paratiisissaq
10, 11. (a) Guutip naalagaaffiata pilluaqqussutissartai qanoq sivisutigisumik atuutissappat, Jiisusillu naalakkersuinerani pissutsit qanoq issappat? (b) Kia Kristusi paratiisimeeqatigiumaarpaa, naassaanngitsumillu inuussaguni susariaqarpa?
10 Takorlooriaruk nunarsuarmi paratiisissami inuuneq qanoq issanersoq. (Atuakkit Tussiaat 72:5-9, 1900). * Guutimik ilumoortutuamik pallorfiginnittut Paratiisimi inuuneq nuannaarutigisinnaassavaat seqineqartuartillugu qaammateqartuartillugulu — aap, naassaanngitsumik! Kunngi Jiisusi Kristusi nakussatsitsillunilu inuummarissaassaaq ‘soorlu sialuit pisartut ivinnik killuiffigineqartumut, soorlu sialuit kusernerisa nuna masatsertaraat’.
11 Illit tussiaatip tamatuma eqquunnissaa eqqarsaatigigaangakku nunarsuarmi paratiisimi naassaanngitsumik inuunissamik neriuut qamannga pisumik nuannaarutigilertarpat, ilaa? Pinerluttoq nappakkamut kikiattugaasoq qularnanngivissumik qamuuna killinneqarpoq Jiisusip ima oqarfigimmani: “Paratiisimeeqatigiumaarparma.” (Lukasi 23:43) Angut taanna Jiisusip ukiuni tusindini naalakkersuinissaani inuuleqqikkumaarpoq. Kristusip naalakkersuineranut naalatsigitikkuni peqqilluinnarluni pilluarlunilu naassaanngitsumik inuusinnaassaaq.
12. Kristusip ukiuni tusindini naalakkersuinerani ‘iluaatsut’ makititaasut sunissamut periarfissinneqassappat?
12 Salomop annerup, Jiisusip Kristusip, naalakkersuinerani ‘iluartut naasutut sikkerumaarput’, tassa ingerlalluassapput. (Tussiaat 72:7, 1900) Jiisusi taamanikkussamut nunarsuarmiitilluni pisarnermisut asanningaarumaarlunilu isumassuingaarumaarpoq. Silarsuassami nutaami Guutip neriorsuutigisaani ‘iluaatsut’ makititaasut allaat Jehovap najoqqutassiaanik maleruaanissamut naassaanngitsumillu inuunissamut periarfissinneqassapput. (Apustilit Suliaat 24:15) Soorunami Guutip piumasaqaataanik maleruaajumanngitsut inuuinnarsinnaatitaassanngillat silarsuassamilu nutaami eqqissineerutitsisinnaatitaassanatik.
13. Guutip naalagaaffia qanoq angitigissava, aamma sooq eqqissineerutitsisoqanngisaannassava?
13 Salomop annerup naalagaaffia qanoq angitigissanersoq ima allaatigineqarpoq: ‘Naalagaassaaq immamit immap aappaanut kuussuarmillu [Eufratimit] nunap isuinut. Kiinaata saanut seeqqumiassapput inuisattormiut, qinngarsortaasalu qasernerit aluttussavaat.’ (Tussiaat 72:8, 9, 1900) Aap, Jiisusi Kristusi nunarsuarmut tamarmut naalakkersuiumaarpoq. (Zakaria 9:9, 10) Taamanikkussamut taassuma naalakkersuineranik tamatumalu pilluaqqussutissartaanik akuerinnillutillu pingaartitsisut kajumillutik naalatsigitillutik ‘seeqqumiassapput’. Ajortuliortulli peqqissiminngitsut peerneqassapput ‘100-innarnik ukioqaraluarunilluunniit’. (Esaja 65:20) ‘Qasernernik’, tassa pujoralammik, ‘aluttuissapput.’
Jiisusip asannittumik isumassorlutalu misiginneqatigaatigut
14, 15. Qanoq ililluta nalunngilarput Jiisusi inuit misigissusiinik paasinnilluartoq ‘annaatissagaalu piitsoq ikioqqulluni suaartartoq’?
14 Inuiaat ajortillit alianartunik atugaqarput, ikiorneqarnissartillu pisariaqartilluinnarpaat. Neriuutissaqarporli. (Atuakkit Tussiaat 72:12-14). Jiisusip, Salomop annerup, misigeqatigaatigut nalunnginnamiuk naammalluinnanngitsuusugut. Aamma Jiisusi naapertuilluarneq pissutigalugu naalliuppoq, Guutillu akueraa taassuma nammineerluni anigortariaqakkaminik misilinneqarnissaa. Aap, Jiisusi misigissutsikkut ima sakkortutigisumik tatineqarpoq ‘kiagunneri aap kusernerisut nunamut nakkaallutik’. (Lukasi 22:44) Kingusinnerusukkut nappakkami anniartitaaffimmiitilluni ima nillerpoq: “Guutiga, Guutiga! Sooq qimappinga?” (Matthæusi 27:45, 46) Jiisusi naalliungaaraluarluni aamma Saatanip tamaviaarluni Jehovamit qimagutitinniaraluaraani Ataataminut aalajaattuarpoq.
15 Qularutiginngilluinnarsinnaavarput Jiisusip misigeqatigigaatigut ‘annaatissagaalu piitsoq ikioqqulluni suaartartoq annikilliortitarlu ikiortissaaleqisoq’. Ataatamisut asannilluni isumassuilluni Jiisusip ‘piitsut tusaajumasarumaarpai’, aamma ‘katsorsarumaarpai sequmissimasumik uummatillit, ikiilu mattuserlugit’. (Tussiaat 69:34; 147:3) Jiisusi ‘qajannassutsitsinni naakkiginnissinnaavoq tamatigut uagutsitut usserneqarsimagami’. (Hebræerit 4:15) Nuanneqaaq nalunagu kunngi Jiisusi Kristusi maanna qilammi naalakkersuillunilu inunnik naalliuutinit aniguisitsinissaminut pilerisoq!
16. Sooq Salomop innuttani misigeqatigisinnaavai?
16 Salomop ilisimassuseqarlunilu paasisimasaqassuseqarami qularnanngilluinnartumik ‘sanngiitsut nallittortarpai’. Aamma nammineq inuunermini alianartunik sakkortuunillu nalaatarpassuaqarpoq. Salomop qatanngutaata Amnonip najartik Tamari pinngitsaalillugu arneriffigaa, qatanngutaatalu Absalomip pinerluttuliaq tamanna pillugu Amnoni toqutaatippaa. (2 Samueli 13:1, 14, 28, 29) Absalomi Daavip kunngiussusianik arsaarinneriaraluarpoq, pikitsitsinerali iluatsinngilaq, Joabimillu toqutaavoq. (2 Samueli 15:10, 14; 18:9, 14) Kingusinnerusukkut Salomop qatanngutaa Adonija imminut kunnginngorteriaraluarpoq. Iluatsissimagaluarpat qularnanngitsumik Salomop toqutaaneranik kinguneqarsimassagaluarpoq. (1 Kunngit 1:5) Salomop inuit naalliuutaannik ilisimasaqarluarnera erseqqippoq Jehovap naalaffiata atoqqaartinneqarnerani qinnutaani. Innuttani pillugit ima oqarpoq: ‘[Illit, Jehova,] kinaluunniit qamuuna eqqorneqartutut misigisartoq [perluutiminik erloqissutiminillu nalujunnaarsoq, 1900] tusartaruk, isumakkeerfigiuk, kinaluunniillu qanoq inuuseqarnera naapertorlugu pineqartittaruk akillugulu iliuuseqarfigalugu.’ — 2 Nalunaarsuutit 6:29, 30.
17, 18. ‘Erloqissutit’ suut Jehovap kiffaasa ilaasa naammagalugit atortariaqarsimavaat, taamaaliornissaminnullu suna iluaqutigaat?
17 ‘Erloqissutivut’ tassaasinnaapput inuunitsinni siusinnerusukkut pisimasut kingunerisaat. Mary, * Jehovamut nalunaajaasoq 30-t sinnerlugit ukiulik, ima allappoq: “Nuannaarnissannut pissutissaqarluarpunga, kisianni inooriaaserisimasara eqqarsaatigigaangakku amerlanertigut kanngusuummertarlungalu avaanngusuummertarpunga. Taava aliasulertarpunga qiariaannaasutullu misigilertarlunga; soorlulusooq suut tamarmik ippassaq pisimasut. Eqqaamasat nuanniitsut qaffakaakulasut pissutigalugit pisuusutut naleqarpianngitsutullu misiginermit sapilertarpunga.”
18 Guutip kiffaasa ilarpassui taamatupajaaq misigisarput, pinertusaarnissaminnulli pisariaqartumik nukissaqarnissamut suna iluaqutigisinnaavaat? Mary ima oqarpoq: “Ikinngutit ilumoortut anersaakkullu ilaquttakka nuannaarutigingaartarpakka. Aamma Jehovap siunissaq pillugu neriorsuutai eqqarsaatigineruniarsarisarpakka, qularutiginngilaralu ikioqqullunga suaartarnera qiimmattarninngortinneqassasoq.” (Tussiaat 126:5) Guutip ernini naalakkersuisussanngortitani aqqutigalugu aaqqissuussaa neriuffigisariaqarparput. Naalakkersuisussaq taanna pillugu ima siulittuuteqarpoq: “Nallittussavai sanngiitsut piitsullu, piitsullu inuunerat annaatissavaa. Aniguisissavai qunutitaanermit nakuuserfigisaanermillu, aavat erlinnangaartuuvoq taassuma isaani.” (Tussiaat 72:13, 14) Tamanna nalunagu tuppallernangaarami!
Silarsuassaq nutaaq peqangaarfiusussaq
19, 20. (a) Tussiaat 72 naapertorlugu ajornartorsiut suna Guutip naalagaaffiata aqutsinerani aaqqinneqarumaarpa? (b) Pingaarnerpaamik kia Kristusip naalakkersuinerata pilluaqqussutissartai ataqqinaatigissavai, Guutillu naalagaaffiata naammassiumaagai eqqarsaatigigaangakkit qanoq misigisarpit?
19 Takorlooqqilaariaruk eqqortuliorusuttut Salomop annerup naalakkersuinerani Guutip silarsuassaani nutaami siunissaat qanoq issanersoq. Ima neriorsorneqarpugut: “Karrit naammangaartut nunami naasimassapput, qaqqat qaanni aalataarumaarput.” (Tussiaat 72:16, 1990) Karrit qaqqat qaanni naatinneqartanngimmata oqaatsit taakku nunarsuup qanoq naggoritsiginissaanut erseqqissaataapput. Libanoni Salomop naalakkersuinerata nalaani naggorissuusimavoq, nangillunilu allassimavoq inerittut naalluassasut “Libanonimisut”. Eqqarsaatigeriaruk! Nerisassaaleqisoqassananilu nerisassakilliortoqassananilu kaattoqassanngilaq! Inuit tamarmik “nerisassat pikkunartut” nerisinnaassavaat. — Esaja 25:6-8; 35:1, 2.
20 Pilluaqqussutit tamakku tamaasa kia ataqqinaatigissavai? Pingaarnerpaamik Kunngiusup Ittuinnartup nunarsuarmut qilammullu Naalakkersuisup, Jehovap Guutip. Aap, taamanikkussamut Tussiaat 72-ip nuanneqisup qamuunalu attortinnartup naggataatungaa imaattoq tamatta nuannaarluta erinarsoqataaffigisinnaassavarput: “Aqqa [tassa kunngip Jiisusip Kristusip aqqa] naassaanngitsumik atagili, seqineqartuartillugu aqqa alliartussaaq. Aqqanik imminnut pilluaqqussapput, inuiaat tamarmik pilluarnerassavaat. Unnersiutigineqarli Guuti [Jehova], Israelip Guutia, kisimi tupinnartuliortartoq. Unnersiutigineqarli aqqa naalannartoq naassaanngitsumik! Naalannassusiata nunarsuaq tamakkissavaa. Amen. Amen.” — Tussiaat 72:17-19. (w10 08/15-E)
[Quppernerup ataani ilanngussat]
^ imm. 1 Naak Biibilimi kalaallisuumi Tussiaat 72 imatut qulequtaqaraluartoq: “Salomomit”, Daavip taanna tussiaasiarigunarpaa soorlu versimi kingullermi tamanna ersertoq.
^ imm. 10 Tussiaat 72:5-9, 1900: ‘Mianerineqassaatit seqineq ingerlatillugu qaammallu takussaatillugu, kinguaariissoqartillugu. Aqqarli soorlu sialuit pisartut ivinnik killuiffigineqartumut, soorlu sialuit kusernerisa nuna masatsertaraat. Taassuma ulluini iluartut naasutut sikkerumaarput, eqqissinerlu angissaqaaq, qaammat peqarunnaarserlugu. Naalagaassaaq immamit immap aappaanut kuussuarmillu nunap isuinut. Kiinaata saanut seeqqumiassapput inuisattormiut, qinngarsortaasalu qasernerit aluttussavaat.’
^ imm. 17 Ateq allanngortitaavoq.
Qanoq akissavit?
• Tussiaat 72-imi suna siulittuutigineqarpa?
• Salomo anneq kinaava, naalagaaffialu qanoq angitigissava?
• Pilluaqqussutit Tussiaat 72-imi siulittuutigineqartut ilaat sorliit nuannerunartinnerpaavigit?
[Atuaqqissaarnermi apeqqutit]
[Qupp. 28-mi assiliartaq]
Salomop naalakkersuinerata nalaani pigissaarneq sumut assersuutaava?
[Qupp. 31-mi assiliartaq]
Salomop annerup naalakkersuinerani paratiisissami inuuneq anguniarlugu sapinngisatsinnik ilungersornivut asuliinnaanavianngillat