Ataasiussuseq — pallorfiginninnermut ilumoortumut ilisarnaat

“Ataatsimut kattutitikkumaarpakka savatut ungalusamut isersimatitatut.” — MIKA 2:12.

1. Pinngortitat Guutip ilisimassusianut qanoq takussutissaappat?

TUSSIAASIORTOQ ima taalliorpoq: “Amerlangaarput pinngortitatit, [Jehova]! Pinngortippatit tamaasa ilisimasuullutit. Nunarsuaq pinngortitannik ulikkaarpoq.” (Tussiaat 104:24) Guutip ilisimassusia naasut, sullerngit, uumasut bakteriallu assigiinngitsorpassuit millionillit pinngortitarsuarmi tupinnarlunilu imaannaanngitsumiittut imminnut ataqatigiinneranni erseqqippoq. Aamma timitsinni timip pisatai angisuut aammattaaq timip sananeqaataasa minnersaat tusindillit timi peqqissuutinniarlugu tamarmik suleqatigiittarput.

2. Sooq kristumiut ataasiussuseqarnerat tupinnarsimassava?

² Jehovap inuit imminnut pinngitsoorsinnaanngitsutut pinngortippai. Inuit isikkumikkut, pissusimikkut piginnaasamikkullu assigiinngitsupilussuupput. Jehovap aamma inuit siulliit nammineq pissuserisaminik pissuseqartippai suleqatigiillutillu tatigeqatigiissinnaaniassammata. (1 Mosesi 1:27; 2:18) Taamaakkaluartorli inuiaat ataatsimut isigalugit Guutimit avissaarsimasuupput, aamma ataasiussuseqarlutik suleqatigiissinnaasimanngisaannarput. (1 Johannesi 5:19) Ukiuni hundredelinni siullerni ilagiit kristumiut inunnik assigiinngitsorpassuarnik, soorlu inussianik Efesosimiunik, arnanik grækerinik nuimasunik, juutinik angutinik ilinniarluarsimasunik guutipilussiortuusimasunillu, ilaasortaqarnerat eqqarsaatigigaanni taakkua ataasiussuseqarnerat tupinnarsimassaaq. — Apustilit Suliaat 13:1; 17:4; 1 Thessalonikamiut 1:9; 1 Timotheusi 6:1.

3. Kristumiut ataasioqatigiinnerat Biibilimi qanoq allaatigineqarpa, allaaserisamilu matumani suut sammineqassappat?

³ Pallorfiginninneq ilumoortoq timip avataasa suleqatigiilluartarnerattut inunnik suleqatigiilluarsinnaanngortitsisarpoq. (Atuakkit 1 Korinthimiut 12:12, 13). Allaaserisami matumani apeqqutit soorlu uku sammineqassapput: Pallorfiginninneq ilumoortoq inunnik qanoq ataasiussuseqalersitsisarpa? Sooq Jehova inunnik inuiannit tamaneersunik millionilinnik ataasiussuseqalersitsisinnaasutuaava? Ataasiussusermut akornutaasartut suut ajugaaffiginissaannut Jehovap ikiortarpaatigut? Aamma ataasiussuseq eqqarsaatigalugu, kristumiut ilumoortut kristumiuunerartunit qanoq allaaneruppat?

Pallorfiginninneq ilumoortoq qanoq ataasiussuseqalersitsisartoq

4. Pallorfiginninneq ilumoortoq inunnik qanoq ataasiussuseqalersitsisarpa?

⁴ Ilumoortumik pallorfiginnittut Jehovap qilammi nunamilu eqqortumik Kisimi Oqartussaanera akueraat, taanna sunik tamanik pinngortitsisuummat. (Saqqummersitat 4:11) Taamaammat kristumiut ilumoortut inuiaqatigiinnit assigiinngitsorpassuarneersuugaluartut pissutsillu atugaat assigiinngikkaluartut, inatsisit Guutimeersut naalataat najoqqutassiallu Biibilimiittut maleruagaat assigiipput. Ilumoortumik pallorfiginnittut tamarmik Jehova ‘Ataatamissut’ eqqortumik taasarpaat. (Esaja 64:7; Matthæusi 6:9) Taamaattumik taakku tamarmik anersaakkut qatanngutigiiupput, ataasiussuserlu nuannersoq tussiaasiortup ima allaatigisaa nuannaarutigisinnaavaat: “Ata! Iluarlunilu nuannillaraasoq qatanngutigiit ataasioqatigiillutik najugaqatigiikkaangata!” — Tussiaat 133:1, NV.

5. Pissuseq Guutimik pallorfiginnittunik ilumoortunik ataasiussuseqarnerulersitsisartoq sunaava?

⁵ Kristumiut ilumoortut naammalluinnanngitsuugaluarlutik ataasiussuseqarlutik pallorfiginneqatigiipput, asaqatigiinneq ilinniarnikuugamikku. Jehova taannatuaavoq taakkuninnga asaqatigiinnermik  ilinniartitsisinnaasoq. (Atuakkit 1 Johannesi 4:7, 8). Taassuma oqaasiani ima allassimasoqarpoq: “Atiniarsigit nallittuingaarneq, ajunngissuseq, nikanartinneq, qanilaarneq naammagittassuserlu. Kamageqatigiigitsi isumakkeerfigeqatigiittarlusilu arlassinnut assuarliutissaqaraangassi. Soorlu [Jehovap] isumakkeerfigigaasi taamatuttaaq ilissi iliussaasi. Tamakkuali tamarmik qaavatigut atiniarsiuk asanninneq, tassaammat naammalluinnassutsip qilerutaa [ataasiussutsip qilerutaa naammalluinnartoq, NV].” (Kolossemiut 3:12-14) Ataasiussutsip qilerutaa naammalluinnartoq tamanna, asanninneq, kristumiut ilumoortut ilisarnaataasa pingaarnersaraat. Ataasiussuseq pallorfiginninnermut ilumoortumut ilisarnaataasoq tamanna illit nammineq misiginikuuat, ilaa? — Johannesi 13:35.

6. Guutip naalagaaffia pillugu neriuut ataasiussuseqarnissamut qanoq iluaqutigaarput?

⁶ Aamma ilumoortumik pallorfiginnittut ataasiussuseqarput Guutip naalagaaffia inuiaat neriuutissatuaattut tutsuigigamikku. Nalunngilaat Guutip naalagaaffiata naalagaaffiit nunamiittut atuukkunnaarsingajalerai Guutimullu naalattut tamaasa eqqissinermik piviusumik ataavartumillu pilluaqqungajalerai. (Esaja 11:4-9; Danieli 2:44) Taamaattumik Jiisusip ajoqersukkani pillugit oqaasii uku maleruarpaat: “Silarsuarmut ilaanngillat, soorlu uanga silarsuarmut ilaanngitsunga.” (Johannesi 17:16, NV) Kristumiut ilumoortut silarsuarmi akerleriissutinut kalluunnaveersaartuupput, tamannalu pissutigalugu inunnit imminnut sorsuuttunit avatangerneqaraluarlutik ataasiussuseqarsinnaapput.

Uagutsinnik ilinniartitsinissamut aaqqissuussatuaq

7, 8. Biibili tunngavigalugu ilinniartitsineq qanoq ililluni ataasiussuseqarnerulersitseqataava?

⁷ Ukiuni hundredelinni siullerni kristumiut ataasiussuseqarput aaqqissuussamit ataatsimit tamarmik ilinniartinneqaramik. Taakkua Jiisusip siulersuisoqatigiit, tassa apustilit utoqqaanertallu Jerusalemimiittut, aqqutigalugit ilagiinnik ilinniartitsillunilu siulersuinera akueraat. Angutit imminut pilliutigeriaannaat taakkua aalajangikkatik Guutip oqaasianik tunngaveqartittarpaat nakkutilliisullu angalasartut ilitsersuussutiminnik ilagiinnut nunani assigiinngitsuniittunut ingerlatitseqqiinissamik suliassittarlugit. Nakkutilliisut taakku pillugit Biibilimi ima allassimavoq: “Illoqarfinni aqqusaakkaminni ilagiit ilisimatittarpaat ileqqoreqqusanik apustilit utoqqaanertallu Jerusalemimiittut atortussanngortissimasaannik taakkulu maleruaqqusarlugit.” — Apustilit Suliaat 15:6, 19-22; 16:4.

⁸ Ullumikkuttaaq Siulersuisoqatigiit kristumiunik tanitanik ilaasortallit silarsuaq tamakkerlugu ilagiinni ataasiussuseqarnerulersitseqataapput. Siulersuisoqatigiit Biibililersaarutinik anersaakkut ineriartornartunik oqaatsinut assigiinngitsorpassuarnut nutserneqartartunik saqqummersitsisarput. Anersaakkut inuussutissat taakku Biibilimik tunngaveqarmata ilinniartitsissutigineqartut inunneersuunatik Jehovameersuupput. — Esaja 54:13.

9. Suliassarput Guutimeersoq qanoq ililluni uagutsinnik ataasiussuseqarnerulersitseqataava?

⁹ Nakkutilliisuttaaq kristumiut oqaluussinermi siuttuunermikkut ataasiussuseqarnerulersitseqataapput. Qanimut ikinngutigiit Guutimut kiffartornermi suleqatigiittut ikinngutigiinnit silamiunit, amerlanertigut sukisaarsaqatigiinnerinnaq tunngavigalugu ikinngutigiittartunit, ikinngutigiilluarnerungaartarput. Ilagiit kristumiut sukisaarsaarfissatut pilersinneqanngillat, pilersinneqarpulli Jehova ataqqinartinniarlugu suliassanillu suliarinninnissaq siunertaralugu — tassa nutaarsiassamik nuannersumik oqaluussissutiginninniarluni, ajoqersuganngortitsiortorniarluni ilagiinnillu ineriartortitsiniarluni. (Romamiut 1:11, 12; 1 Thessalonikamiut 5:11; Hebræerit 10:24, 25) Taamaattumik apustili Paulusi kristumiut pillugit ima oqarsinnaasimavoq: “Anersaaq ataaseq [aalajangiussimavarsi] tarnimilu ataatsimi [assorooqatigiillusi] iivangkiiliumut upperneq pillugu.” — Filippimiut 1:27.

10. Sooq Guutip innuttai ataasiussuseqarpat?

¹⁰ Tassa Jehovamut innuttaasutut ataasiussuseqarpugut Jehovap kisimi oqartussaanera akuerigatsigu, qatanngutivut asagatsigit, Guutip naalagaaffia tutsuigigatsigu Guutillu uagutsinnut siuttuutitai ataqqigatsigit. Jehovap pissutsinik ajortunik, naammalluinnanngissuserput pissutigalugu ataasiussuseqarunnaarsitsisinnaasunik, ajugaaffiginninnissamut ikiortarpaatigut. — Romamiut 12:2.

 Makitaneq sinnganerlu qanoq ajugaaffigineqarsinnaasut

11. Sooq makitassuseq avissaartuutaasarpa, pissutsillu ajortup tamatuma ajugaaffiginissaanut Jehovap qanoq ikiortarpaatigut?

¹¹ Makitassuseq avissaartuutaasarpoq. Makitasooq allanit pingaaruteqarnerusutut imminut isigisarpoq usorsitsaarnissarlu nuannarisarlugu. Tamannali ataasiussusermut akornutaasarpoq usorsitsaartumik tusaasut sinngalersinnaasarmata. Ajoqersugaq Jaaku toqqaannartumik ima allappoq: “Usorsitsaarneq taamaattoq ajortuuvoq.” (Jaaku 4:16) Allanik pingaaruteqannginnerusutut pinninneq asannittuliornerunngilaq. Maluginiarnarporli Jehovap maniguunnikkut maligassaanera, taassumami uagut inuttut naammalluinnanngitsuusugut soqutigaatigut. Daavi ima allappoq: “Ikiuinerpillu [maniguunnerpillu, NV] nakussassarpaanga.” (2 Samueli 22:36) Guutip oqaasia iluaqutigalugu makitaneq ajugaaffigisarparput, tamatumani silatusaarnissaq ilinniartaratsigu. Paulusi isumassarsisitaalluni ima allappoq: “Kiammi allanit pingaarnerutippaatit? Sunalu pigaajuk tunissutisiarinngisat? Tunissutisigavillu sooq ajugaasimaarpit tunissutisisimanngitsutut?” — 1 Korinthimiut 4:7.

12, 13. (a) Sooq sinngaliavugut? (b) Jehovap allanut isiginnittaasiatut isiginnittaaseqarneq qanoq kinguneqartarpa?

¹² Ataasiussusermut akornutaasinnaasoq suli alla tassaavoq sinnganeq. Naammalluinnanngissuserput kingornussarput pissutigalugu tamatta sinngaqqajaasarpugut, aamma ukiorpassuarni sallusuissummiissimagaluartulluunniit pissutsinik allat atugaannik, allat pigisaannik, immikkut pisinnaatitaaffiinik piginnaasaannilluunniit ilaannikkut sinngaginnissinnaasarput. (Oqaluussisartup oqaasii 4:4) Assersuutigalugu qatanngutip angutip aappallip meerallillu piffissaq tamaat kiffartortoq aappaqanngitsoq usorisinnaavaa taassuma immikkut pisinnaatitaaffii pillugit. Paarlattuanik piffissaq tamaat kiffartortup qatanngut angut aappalik usorilaarsinnaavaa aappaqarnera meeraqarneralu pissutigalugit. Ataasiussuserput akornuserneqaqqunagu qanoq ililluta usorunnaveersaarsinnaavugut, imaluunniit sinnganaveersaarsinnaavugut?

¹³ Sinnganaveersaarnissamut iluaqutaassaaq tanitat ilagiinni kristumiuniittut timimi avatinut Biibilimi assersuunneqarnerannik eqqarsaatiginninneq. (Atuakkit 1 Korinthimiut 12:14-18). Assersuutigalugu isit takussaavoq, uummatilli takussaanani. Uummatilli takussaanngikkaluartoq timivit pisatai taakku tamarmik ilinnut pingaaruteqangaarput, ilaa? Tamatumunnga assingusumik ilagiinniittut ilaat immaqa piffissap ilaani allanit malunnarnerupput, Jehovalli kiffani tamaasa pingaaruteqangaartutut isigai. Taamaattumik Jehovap qatanngutitsinnut isiginnittaasiatut isiginnittaaseqalerniarta. Allat sinngaginagit isumassortariaqarpavut inuttullu soqutigisariaqarlutigit. Taamaaliornitsigut kristumiut ilumoortut kristumiuunerartullu ilagiivinut ilaasortaasut assigiinngissutaat erseqqinnerulersissavarput.

Kristumiuunerartut — avissaartuunnermik ilisarnaatillit

14, 15. Kristumiuunerartut qanoq ilillutik avissaartuutilerpat?

¹⁴ Kristumiuunerartut ilagiivi kristumiut ilumoortut ataasiussuseqarnerattut ataasiussuseqanngilluinnarput. 300-kkunni kristumiut tunussinerat ima nalinginnaatigilersimavoq allaat Romamiut  kaasariat Guutimik nalusoq taakkunatut upperisaqalerluni taakkununngalu siuttuulerluni, suli tunussisoqarnerulerneranik kinguneqartumik. Piffissap ingerlanerani isumaqatigiinngissuteqaqattaartoqarnerata kinguneranik naalagaaffippassuit Romamut atajunnaarput namminnerlu ilagiinnik naalagaaffimmut atassuteqartunik pilersitsillutik.

¹⁵ Naalagaaffiit taakkua ilarpassui ukiuni hundredelinni imminnut sorsuupput. 1600-kkunni 1700-kkunnilu Tuluit Nunaanni, Frankrigimi USA-milu naalagaaffimmik ilumoorfiginninneq pingaartinneqalerpoq, tamannalu inuiaassutsimik pingaartitsinerup upperisatut ilerneranik kinguneqarpoq. 1800-kkunni 1900-kkunnilu inuiaassutsimik pingaartitsineq inuiaat amerlanersaasa eqqarsartaasiannut sunniuteqartorujussuanngorpoq. Piffissap ingerlanerani kristumiuunerartut ilagiivi ilagiinnut immikkoorniartunut arlalissuarnut immikkoortiterput, taakkualu amerlanersaat inuiaassutsimik pingaartitsinermik akuersaarlutik. Allaat naalagiartartut uppeqatiminnut inuiannit allaneersunut sorsugiartarsimapput. Ullumikkut kristumiuunerartut immikkoorniartut ajoqersuutaannik inuiaassutsimillu pingaartitsinermik avissaartuussuteqarput.

16. Suut kristumiuunerartut ilagiivini avissaartuussutaasarpat?

¹⁶ 1900-kkunni immikkoorniat kristumiuunerartut hundredellit upperisarsioqatigiinnik kristumiuunerartunik assigiinngitsunik ataasiussuseqalersitsiniarlutik suliniuteqalerput. Ukiulli qulikkuutaat tamatuma kingorna upperisarsioqatigiit ikittuinnaat kattupput, aamma apeqqutit pinngoriartuaarsimaneraanermut, naartuersittarnermut, anguteqatinoortarnermut arnaqatinoortarnermullu, arnanillu palasinngortitsisarnermut tunngasut naalagiartartunit suli isumaqatigiinngissutaaqaat. Kristumiuunerartut ilagiivisa ilaanni siuttuusut inunnik upperisarsioqatigiinnit assigiinngitsuneersunik ataasiussuseqalersitsiniarsarisarput ajoqersuutinik siornatigut avissaartuussutaasartunik pingaaruteqannginnerulersitsinermikkut. Tamannali inuit uppernikillissutigisarpaat, aamma kristumiuunerartut upperisarsioqatigiivinik avissaartuussimasunik ataasiussuseqalersitseqataanngilluinnarpoq.

Inuiaassutsimik pingaartitsinermik akimuisoq

17. Pallorfiginninnerup ilumoortup “ullussani kingullerni” inunnik ataasiussuseqalersitsinissaa qanoq siulittuutigineqarpa?

¹⁷ Inuiaat maanna aatsaat taama avissaartuutsigigaluartut ilumoortumik pallorfiginnittut ataasiussusertik immikkoorutigiuarpaat. Guutip pruffiitia Mika ima siulittuivoq: “Ataatsimut kattutitikkumaarpakka savatut ungalusamut isersimatitatut.” (Mika 2:12) Mikap siulittuutigaa pallorfiginninnerup ilumoortup pallorfiginneriaatsinik allanik tamanik akimuiumaarnera, taakku guutipilunnik naalagaaffimmilluunniit guutitut pallorfiginninnerugaluarpata. Ima allappoq: “Ullussani kingullerni qaqqaq [Jehovap] naalaffiata inaa aalajaalluni qaqqanit allanit portunerulerumaarpoq qattorngit tamaasa portussutsimigut akimussallugit. Tassunga inuiaat ornigutissapput. Inuiaat allat tamarmik inuupput namminneq guutimik aqqanni; uagulli inuujumavugut [Jehovami] Guutitta aqqani.” — Mika 4:1, 5.

18. Pallorfiginninneq ilumoortoq sunik allannguinissamut iluaqutigisimavarput?

¹⁸ Aamma Mikap allaatigaa pallorfiginninnerup ilumoortup inunnik akerariissimagaluartunik ataasiussuseqalersitsiumaarnera. “[Inuit inuiappassuarneersut] tassunga ingerlaassapput oqassallutillu: ‘Qaa, majuarta [Jehovap] qaqqaanut, Jaakup Guutiata illuanut; aqqutigeqqusaminik ajoqersussavaatigut ingerlavigeqqusamigut ingerlasinnaaleqqulluta.’ . . . Panatik saffiussavaat assallatserummut savissaliaralugit, qalugiusatillu saviliaralugit viinnequtilerissutit. Inuiaat panamik  imminnut silugutissaassapput sorsunnissamullu sungiusarunnaassallutik.” (Mika 4:2, 3) Jehovamik pallorfiginninniarlutik naalagaaffimmik guutinilluunniit inuit piliaannik pallorfiginnikkunnaartut silarsuaq tamakkerlugu ataasiussuseqarneq nuannaarutigisinnaavaat. Guutip taakku asaqatigiinnissaannik ilinniartittarpai.

19. Ilumoortumik pallorfiginnittut millionillit ataasiussuseqarnerat sumut uppernarsaataava?

¹⁹ Kristumiut ilumoortut ullumikkut silarsuaq tamakkerlugu ataasiussuseqarnerat asseqanngilluinnarpoq Jehovallu anersaani iluaqutigalugu innuttaminik siulersuiuarneranut uppernarsaataalluarluni. Inuit inuiannit tamaneersut maanna aatsaat taama ataasiussuseqartigipput. Tamanna Saqqummersitat 7:9, 14-imi allassimasut maluginiarnartumik eqquunneraat, aamma Guutip inngiliisa ‘anorinik’ silarsuarmik ajortumik maanna atuuttumik suujunnaarsitsisussanik iperaangajalernerannut ersiutaavoq. (Atuakkit Saqqummersitat 7:1-4, 9, 10, 14). Silarsuaq tamakkerlugu qatanngutigiissuarni ataasiussuseqarneq immikkut pisinnaatitaaffiuvoq angingaartoq, ilaa? Qanoq ililluta tamatta immikkut ataasiussuseqarnerulersitseqataasinnaavugut? Tamanna allaaserisami tulliuttumi sammineqassaaq.

Qanoq akissavit?

• Pallorfiginninneq ilumoortoq inunnik qanoq ataasiussuseqalersitsisarpa?

• Ataasiussuserput akornuserneqaqqunagu qanoq ililluta sinnganaveersaarsinnaavugut?

• Sooq ilumoortumik pallorfiginnittut inuiaassutsimik pingaartitsineq avissaartuutiginngilaat?

[Atuaqqissaarnermi apeqqutit]

[Qupp. 18-mi assiliartat]

Suliassanut naalagaaffilersaarfimmut tunngasunut peqataasarnerit qanoq ataasiussuseqarnerulersitseqataava?