Kristumiutut ataasiussuseq Guutimik ataqqinartitsivoq

“Ilungersorlusi aalajangiusimaniarsiuk anersaakkut ataasiussuseq.” — EFESOSIMIUT 4:3.

1. Kristumiut Efesosimiittut qanoq ilillutik Guutimik ataqqinartitseqataappat?

ITSAQ Efesosimi ilagiinni kristumiuni ataasiussuseq Guutimik ilumoortumik, Jehovamik, ataqqinartitsivoq. Niuernermut qitiusumi pigissaarfiusumi tassani qatanngutit kristumiut ilaat inussiaatiliusimagunarput pisuut, allat inussiaataasut piitsupilussuugunartut. (Efesosimiut 6:5, 9) Taakkua ilaat juutiupput qaammatit pingasut apustilip Paulusip synagogiminni oqaluussiffigisaasa ingerlaneranni sallusuissummik paasinnittut. Allat Artemisimik pallorfiginnittuusimallutillu angakkuarniartartuusimapput. (Apustilit Suliaat 19:8, 19, 26) Erseqqippoq kristumiussutsip ilumoortup inunnik assigiinngitsunik tunuliaqutalinnik ataasiussuseqalersitsisimanera. Paulusip paasivaa ilagiit ataasiussuseqarnerat Jehovamik ataqqinartitsisoq, imaluunniit naalannartitsisoq. Apustili ima allappoq: “Taanna naalannartitaali ilagiinni.” — Efesosimiut 3:21.

2. Sooq kristumiut Efesosimiittut ataasiussuseqarunnaaratarsinnaappat?

² Ilagiilli Efesosimiittut ataasiussuseqarunnaaratarsinnaapput. Paulusip ilagiinni utoqqaanertat ima mianersoqquai: “Ilissi akornassinnit saqqummersoqarumaarpoq angutinik ilumoortuunngitsumik oqaluttunik ajoqersukkat imminnut malinnaatikkumallugit.” (Apustilit Suliaat 20:30) Aamma ilagiinni qatannguteqarpoq anersaamik avissaartuunnartumik ‘naalasseriitsut qitornaannut sunniuteqartuartumik’ suli ersersitsisartunik. — Efesosimiut 2:2; 4:22.

Ataasiussuseq — Efesosimiunut allakkani pingaarnersaq

3, 4. Paulusip Efesosimiunut allakkamini ataasiussuseq qanoq erseqqissarpaa?

³ Paulusip paasivaa kristumiut suleqatigiilluartuarsinnaassagunik, ataasiussuseqarnerulersitsiniarlutik tamarmik immikkut ilungersorlutik suliniuteqartariaqartut. Guutip taanna isumassarsisippaa  ataasiussuseq pingaarnersaatillugu Efesosimiunut allagaqarnissaanut. Assersuutigalugu Paulusi allappoq Guutip siunertarigaa ‘tamanik Kristusimi ataatsimut kattussinissani’. (Efesosimiut 1:10) Aamma kristumiut ujaqqanut qarmasissiatut atorneqartunut assigiinngitsunut assersuuppai. “Illuliaq tamarmi katitigaavoq ineriartorlunilu tassaalerluni naalaffik illernartoq [Jehovami].” (Efesosimiut 2:20, 21) Aamma Paulusip kristumiut juutiusut juutiunngitsullu ataasiussuseqarnerat erseqqissarpaa qatanngutillu eqqaasillugit taakkua tamarmik ataatsimik naggueqarnerat pillugu. Jehova ‘Ataatatut qilammi nunamilu ilaqutariit tamarmik aterminnik qutsavigisassaattut’ (NV) eqqaavaa. — Efesosimiut 3:5, 6, 14, 15.

⁴ Efesosimiunut allakkani kapitalit sisamaat sammigutsigu paasissavarput ataasiussuseqarumalluta sooq ilungersorluta iliuuseqartariaqartugut, Jehovap ataasiussuseqarnissatsinnut qanoq ikiortaraatigut ataasiussuseqartuarumallutalu pissuserineqartussanik sunik ineriartortitsisariaqartugut. Soormi Biibilimi kapitali taanna atuarukku allaaserisaq pissarsiffigineruniassagakku?

Sooq ataasiussuseqarumalluni ilungersorluni iliuuseqarnissaq pisariaqartoq

5. Sooq Guutip inngilii ataasiussuseqarlutik kiffartorsinnaappat, aamma sooq tamanna uagutsinnut ajornakusoornerusinnaava?

⁵ Paulusip qatanngutini Efesosimiittut ilungersorluni qinnuigai ‘anersaakkut ataasiussusermik ilungersorlutik aalajangiusimanneqqullugit’. (Efesosimiut 4:3) Ataasiussuseqarumalluni iliuuseqarnissap pisariaqarnera paasiumallugu Guutip inngiliisa maligassiaat eqqarsaatigisinnaavarput. Uumassusilinnik nunarsuarmiittunik assigeeqqissaartoqanngimmat pissusissamisuussaaq isummissalluni Jehovap inngilii millionillit tamarluinnarmik asseqanngitsuullutillu immikkut kinaassusiliusut. (Danieli 7:10) Taamaakkaluartorli Jehovamut ataasiussuseqarlutik kiffartorsinnaapput tamarmik taanna tusarnaartarlugulu piumasaatut iliortaramik. (Atuakkit Tussiaat 103:20, 21). Soorlu inngilit aalajaatsut ajunngitsunik pissuseqartut, uaguttaaq ajunngitsunik pissuseqarpugut. Uagulli kukkussuteqartaratta ataasiussuseqartuarnissarput ajornakusoornerutissinnaavarput.

6. Pissuserineqartussat suut qatanngutinik uagutsinnit allaanerusunik kukkussuteqartartunik suleqateqarnissamut iluaqutigisinnaavavut?

⁶ Inuit naammalluinnanngitsut suleqatigiitsillugit ajornartorsiuteqaleriaannaasinnaasarpoq. Assersuutigeriartigit Jehovamut kiffaasut marluk assigiinngitsupilussuit — aappaa saamavoq inortuikulallunili, aappaa piffissamik eqqorluaasarpoq kamaammiasuullunili. Immaqa tamarmik immikkut qatanngutimik kukkussutigisartagai mamiatsaatigaat, namminerli kukkussutitik puiorlugit. Qatanngutit taakku qanoq ilillutik ataasiussuseqarlutik kiffartoqatigiissinnaappat? Paulusi pissuserineqartussanik taakkua iluaqutigisinnaasaannik eqqaasaqarpoq. Pissuserineqartussat taakkua pigiliunnerisigut uagut qanoq ililluta ataasiussuseqarnerulersitsisinnaanersugut eqqarsaatigeriartigu. Paulusi ima allappoq: “Oqaaqqissaarpassi . . . inooqqullusi, tamatigut  qanilaartuullusi saamasuullusilu naammagittartuullusilu asaqatigiinnikkut immissinnut kamageqatigiillusi. Eqqissineq ataqatigiissutigalugu ilungersorlusi aalajangiusimaniarsiuk anersaakkut ataasiussuseq.” — Efesosimiut 4:1-3.

7. Kristumiunik naammalluinnanngitsunik Guutimut kiffartoqateqarnissamik ilinniarnissarput sooq pingaaruteqartupilussuua?

⁷ Pingaaruteqartupilussuuvoq kristumiunik naammalluinnanngitsunik Guutimut kiffartoqateqarnissamik ilinniarnissarput, ‘timitummi ataatsitut’ ittunik allanik ilumoortumik pallorfiginnittoqanngilaq. “Timi ataaseq Anersaarlu ataaseq — soorlumi aamma neriugisamut ataasiusumut qaaqqusaasimasusi — Naalagaq ataaseq, upperisaq ataaseq, kuissut ataaseq, Guuti ataaseq tamanullu Ataataasoq.” (Efesosimiut 4:4-6) Jehovap kristumiut eqimattat taakku kisiisa pilluaqqusarlugillu anersaaminik najortarpai. Ilagiinniittut arlaata kamatsillutaluunniit aliasutsikkaluarpatigut sumut allamukassagaluaratta? “Oqaatsinik naassaanngitsumik inuussutaasunik” tusarfiusinnaasumik allamik soqanngilaq. — Johannesi 6:68.

‘Inuit tunissutaasut’ ataasiussuseqarnerulersitsipput

8. Jiisusip avissaartuutaasinnaasunut sunulluunniit akiuisinnaanngortinniarluta suut atortarpai?

⁸ Paulusip itsaq sakkutuut nalinginnaasumik iliuuserisartagaat atorlugu nassuiarpaa Jiisusi ilagiinnik ataasiussuseqalersitsiniarluni qanoq ‘inunnik tunissutaasunik tigusisoq’ (NV). Sakkutuut ajugaasimasut ilaannikkut tigusatik allamiut angerlaattarpaat inussiatullu nuliaminnik ikiuisussatut atortarlugit. (Tussiaat 68:2, 13, 19) Tamatumunnga assingusumik Jiisusi silarsuarmut ajugaagami kajumittunik inussiaaterpassuaqalerpoq. “Tamatta immikkut saammaannermik tunineqarpugut Kristusip angissusiliinera naapertorlugu. Taamaattumik allassimavoq: Qutsissumut qullarpoq, tiguakkat aallaruppai, inuit tunissuteqarfigai [tunisivorlu inunnik tunissutaasunik, NV].” (Efesosimiut 4:7, 8) “Tiguakkat” taakku qanoq atorpai? “[Taassuma taakkua] ilaat apustilinngortippai, allat pruffiitinngortillugit, allat iivangkiiliulersaartunngortillugit allallu paarsisunngortillugit ajoqersuisunngortillugillu, illernartut piukkunnarsarumallugit kiffartortuunissamut Kristusip timaa ineriartortinneqassammat, tamatta anngutserluta uppernermi ataasiunissamut.” — Efesosimiut 4:11-13.

9. (a) ‘Inuit tunissutaasut’ ataasiussuseqartuarnissatsinnut qanoq ikiortarpaatigut? (b) Sooq tamatta immikkut ilagiinnik ataasiussuseqarnerulersitseqataasariaqarpugut?

⁹ Paarsisuugamik asannittut ‘inuit tunissutaasut’ taakkua ataasiussuseqartuarnissatsinnut ikiortarpaatigut. Assersuutigalugu ilagiinni utoqqaanertap maluginiaruniuk qatanngutit marluk imminnut ‘kamassaartut’, imaluunniit unammillertut, ilagiinnik sunniuteqarluartumik ataasiussuseqarnerulersitseqataasinnaavoq qatanngutit taakkua immikkut siunnersornerisigut, ‘qanilaarluni iluarsinissaannut ikiorlugit’. (Galatiamiut 5:26–6:1) ‘Inuit tunissutaasut’ taakkua ilinniartitsisuugamik Biibilimi ajoqersuutigineqartunik tunngavilimmik upperluartuunissatsinnut ikiortarpaatigut. Taamaalillutik ataasiussuseqarnerulersitsisarput kristumiutullu inersimalluartunngornissatsinnut ikiortarluta. Paulusi allappoq taakku taamaaliortartut ‘meeraajunnaaqqulluta, tamanut tamaanga nassataritittarunnaaqqulluta malinnit ajoqersuutit suulluunniit anoraannit, taakkua peqqusersusaarlutik aqqutissaanngitsunut tammarnartunut ingerlakkaangatigut.’ (Efesosimiut 4:13, 14) Kristumiut tamarmik immikkut qatanngutigiissuarnik ataasiussuseqarnerulersitseqataasariaqarput, soorluttaaq avatitta tamarmik timi tamaat ineriartortittaraat tamatuma pisariaqartitaanik pilersorneratigut. — Atuakkit Efesosimiut 4:15, 16.

Isiginnittaatsimik pitsaasumik ineriartortitsigit

10. Inuunerlunneq qanoq ililluni uagutsinnik ataasiussuseqarunnaarsitseratarsinnaava?

¹⁰ Maluginiarpiuk Paulusip Efesosimiunut allagaani kapitalit sisamaanni ersersinneqartoq asanninneq kristumiutut inersimalluartutut ataasiussuseqalernissamut aqqutissaasoq? Kapitalimi aamma erserpoq asanninneq qanoq paasisariaqartoq. Inuk asannittuuguni kinguaassiuutitigut inuunerlunnanilu kannguttaatsuliornavianngilaq. Paulusip qatanngutini kajumissaarpai ‘Guutimik nalusutut inuujunnaaqqullugit’. Guutimik nalusut ‘misigittaassutsiminni inuunerlunnermut tunniussimapput’. (Efesosimiut 4:17-19) Silarsuaq kinguaassiuutitigut inuunerluffiusoq  inuuffigisarput pissutigalugu ataasiussuseqarunnaara-tarsinnaavugut. Inuit kinguaassiuutitigut inuunerlunneq quiasaarutigisarpaat, erinarsuutigisarlugu, aliikkutarisarlugu isertorlutillu isertuarnatilluunniit namminneq kinguaassiuutitigut inuunerluttarlutik. Allaat aappariilernissaq siunertarinngikkaluarlugu qaninniarujoorneq Jehovamit ilagiinnillu qimagussutaasinnaapput. Sooq? Kinguaassiuutitigut inuunerlunnermik kinguneqariaannaammat. Aamma aappalik qaninniarujooruni naggataatigut allasiorsinnaavoq, tamatumalu kingunerisaanik meeqqat ataataminnit anaanaminnilluunniit avissaartinneqarsinnaapput aappaasorlu pisuussuteqanngitsoq qimagaasinnaalluni. Aap, qaninniarujoorneq avissaartuutaalluinnartarpoq! Paulusi pissutissaqarluarluni ima allappoq: “Ilissi Kristusi pillugu taamaattunik ilinniartinneqarsimanngilasi.” — Efesosimiut 4:20, 21.

11. Kristumiut sumik allannguinissaat Biibilimi kajumissaarutigineqarpa?

¹¹ Paulusip erseqqissarpaa ineriartornanngitsumik isiginnittaaseqarnaveersaarluta isiginnittaatsimik allanut attaveqarluarnissamut iluaqutigisinnaasatsinnik ineriartortitsisariaqartugut. Ima allappoq: “Inutoqaq manna tikillugu inuuserisassinniittoq pileritsannernillu nakutitsissutaasunit aserorneqartoq [iperassavarsi], isumassigullu anersaassigullu [nutaanngortissaasi] atillugulu inuk nutaaq [inuttut pissuseq nutaaq, NV] Guuti assilillugu pinngortitaq iluarsuseqarlusi upperluarlusilu sallusuissutip piinik.” (Efesosimiut 4:22-24) Qanoq ililluta ‘isumatsigut anersaatsigullu nutaanngortissinnaavugut’? Guutip oqaasia kristumiullu inersimalluartut maligassiaannit ilikkakkavut qujamasulluta eqqarsaatigeqqissaartarutsigit ilungersorluta iliuuseqarnitsigut ‘Guuti assilillugu pinngortitamik’ inuttut pissuseqalersinnaavugut.

Oqaloriaatsimik ataasiussuseqalersitsisartumik ineriartortitsigit

12. Sallunani oqalunneq qanoq ataasiussuseqalissutaasarpa, aamma sooq ilumoortumik oqalunnissaq inuit ilaasa ajornakusoortissinnaavaat?

¹² Sallunani oqalunneq ilaqutariinni ilagiinnilu ataasiussuseqarnissamut pingaaruteqarpoq. Unneqqarilluni, isertuarnani inussiarnersumillu oqalunneq ataasiussuseqalissutaasarpoq. (Johannesi 15:15) Ilaqutariinnimi ilagiinniluunniit sallusoqarpat? Tamanna paasineqarpat salloqittarneqartoq tatiginnippiarunnaassaaq. Paasinarpoq Paulusi ima allammat: ‘Ilumoortumik immissinnut oqaluffigisaritsi. Immitsinnummi avatioqatigiippugut!’ (Efesosimiut 4:25) Sallunermik ileqquliussisimasup, immaqa meeraanerminiilli sallusartup, ilumoortumik oqaluttalernissani ajornakusoortittupilussuusinnaavaa. Jehovalli taassuma allanngorniarluni ilungersornera iluarissavaa ikiorumaarlugulu.

13. Nikassaarpaluttumik annernartunillu oqaluttarunnaarnissamut suna iluaqutaasinnaava?

¹³ Jehovap allanut oqaloriaatsitsinnut tunngatillugu erseqqissunik killiliinermigut ilinniartippaatigut ilagiinni ilaqutariinnilu ataqqeqatigiinnermik  ataasiussusermillu siuarsaanissamik. “Oqaatsinik mikiarsimasunik qanissinnit aniatitaqarniaqinasi. . . . Narrutsatsitsinerit, puffajanerit, kamannerit, nipiliornerit mitalliinerillu, tassami ajorsutsit suulluunniit, eqqaasassanngilasiluunniit.” (Efesosimiut 4:29, 31) Allanut nikassaarpaluttumik annernartunillu oqalunnginnissamut iluaqutaasinnaasoq tassaavoq allanik ataqqinninnerulerniarneq. Assersuutigalugu angutip nuliaminut kusanaatsumik oqaluttartup taassumunnga isiginnittaatsini allanngortinniarlugu ilungersortariaqarpoq, ingammik Jehovap arnanik qanoq ataqqinninnera paasiartortillugu. Maluginiarnarpoq Guutip arnanik anersaamik illernartumik tanitsisarnera Kristusimillu kunngisut naalakkersueqateqarnissamik neriuuteqalersitsisarnera. (Galatiamiut 3:28; 1 Petrusi 3:7) Taamatuttaaq arnap uiminik suanngassisartup isiginnittaatsini allanngortittariaqarpaa Jiisusip kamassaarniarneqaraangami imminut qanoq noqittarnera paasiartortillugu. — 1 Petrusi 2:21-23.

14. Kamannermik ersersitsineq sooq navianarpa?

¹⁴ Annernartumik oqalunneq kamannermik nunusisinnaannginnermik aallaaveqarajuppoq. Aamma ‘avatioqatigiittunut’ avissaartuussutaasinnaavoq. Kamanneq innermut assersuunneqarsinnaavoq. Aqussinnaajunnaarneqariaannaavoq aseruerujussuarsinnaallunilu. (Ussatit 29:22) Pissutissaqarluarluni naammagittaalliortup allanut attaveqarnini ajoquserumanagu kamannini nununiartariaqarpaa. Kristumiut isumakkeerfiginnittuunissartik sulissutigisariaqarpaat; puttarsisaqassanngillat pisimasunillu eqqartueqqissanatik. (Tussiaat 37:8; 103:8, 9; Ussatit 17:9) Paulusip Efesosimiut ima siunnersorpai: “Kamassimariannguaritsi, kisiannili ajortuliornasi. Seqineq tarrisinaveersiuk narrutsassimanissinni. Diaavululu inissaqarteqinasiuk.” (Efesosimiut 4:26, 27) Kamanneq nununngikkaanni Diaavulu ilagiinni avissaartuutsitsinissamut akerleriissitsilernissamullu periarfissinneqassaaq.

15. Piginngisamik tigusineq qanoq kinguneqarsinnaava?

¹⁵ Ilagiinni ataasiussuseqarnissamut pingaarutilik alla tassaavoq allat pigisaannik eriaginninneq. Ima allassimasoqarpoq: “Tillittartoq tillissaarli.” (Efesosimiut 4:28) Jehovamut kiffaasut tatigeqatigiipput, kristumiullu piginngisaminik tigusinermigut tatigeqatigiinneq tamanna atornerluppagu ataasiussuseqarunnaarsitsissaaq.

Guutimik asanninneq ataasiussuseqalissutigaarput

16. Oqaloriaatsitsigut qanoq ililluta ataasiussuseqarnerulersitseqataasinnaavugut?

¹⁶ Ilagiit kristumiut ataasiussuseqarput ilagiinniittut tamarmik Guutimik asanninnertik kajumississutigalugu allanik asannittumik pinnittarmata. Jehovap ajunngisaarneranik qujamasuutiginninnerput siunnersuummik matuminnga malinninniarluta ilungersornissamut kajumississutigaarput: “[Oqaatsinik] ajunngitsuinnarnik aniatitaqaritsi ineriartornissamut pisariaqartunik, tamakku tusartunut pilluaatissaaqqullugit. [Immissinnut] ajunngitsuliorfigigitsi nallittuillusilu, isumakkeerfigeqatigiittaritsilu soorlu Guutip Kristusimi isumakkeerfigigaasi.” (Efesosimiut 4:29, 32) Jehovap uagut inuttut naammalluinnanngitsuusugut asannilluni isumakkeerfigisarpaatigut. Allat naammalluinnanngissutaat malugigaangatsigit, taava uaguttaaq taakku isumakkeerfigisassavavut, ilaa?

17. Sooq ataasiussuseqarnerulersitseqataaniarluta ilungersorluta suliniuteqartariaqarpugut?

¹⁷ Guutip innuttaasa ataasiussuseqarnerat Guutimik ataqqinartitsivoq. Taassuma anersaavata ataasiussusermik tamatuminnga assigiinngitsutigut siuarsaanissamut kajumissisittarpaatigut. Anersaap siulersuineranut akerliusumik iliorusunngilluinnarpugut. Paulusi ima allappoq: “Guutip Anersaava illernartoq aliasutseqinasiuk.” (Efesosimiut 4:30) Ataasiussuseq erlinnartuutitut paarilluartariaqarpoq. Tamatuminnga siuarsaasunut tamanut nuannaarutaangaartarpoq, aamma Jehovamik ataqqinartitsisarpoq. “Guuti maligassarisiuk taassumunnga qitornaasutut asasaasutut, inuugitsilu asaqatigiillusi.” — Efesosimiut 5:1, 2.

Qanoq akissavit?

• Pissuserineqartussat suut kristumiut ataasiussuseqarnerulissutigisarpaat?

• Pissusilersornerput qanoq ililluni ilagiinni ataasiussuseqarnerulissutaasinnaava?

• Oqaloriaaserput allanik suleqateqarnitsinni qanoq iluaqutaasinnaava?

[Atuaqqissaarnermi apeqqutit]

[Qupp. 21-mi assiliartaq]

Inuit assigiinngitsorpassuarnik tunuliaqutallit ataasiussuseqarput

[Qupp. 23-mi assiliartaq]

Qaninniarujoornerup navianaatai nalunngiligit?