Siulersuisutta ullumikkut suliai

‘Aallarpoq ajugaalluni ajugaalluinnassallunilu.’ — SAQQUMMERSITAT 6:2, NV.

1, 2. (a) Kristusi 1914-imi kunnginngoqqammerluni susimanersoq Biibilimi qanoq allaatigineqarpa? (b) Kristusi kunnginngoramili sunik naammassisaqarsimava?

JIISUSI KRISTUSI 1914-imi Jehovap naalagaaffiani Missiarsikkoortumi kunnginngortinneqarpoq. Massakkut taanna qanoq takorloorparput? Kunngisut issiavissaarsuarmini eqqarsarusaartutut, ilagiissinilu qanoq innersut takuniarlugu ilaannikkut nunarsuup tungaanut saattartutut? Taamatut takorloortarutsigu isumarput allanngortittariaqarparput. Tussiaatini Saqqummersitanilu kunngisut sulisinnaassuseqarluartutut, “ajugaalluni ajugaalluinnassallunilu” hestersutut, allaatigineqarpoq. Tassa inaarutaasumik ajugaatinnani uninnavianngilaq. — Saqqummersitat 6:2, NV; Tussiaat 2:6-9; 45:2-5.

² Kristusip kunnginngortinneqareerami siullermik ‘uumasorujuk inngiliilu’ sorsuffigai. Inngiliunerup Mikaelip inngiliminut siuttuulluni Saatani anersaapiluilu qilannit illernartunit igippai taamaallaallu nunarsuup eqqaani sunniuteqarsinnaanngortillugit. (Saqqummersitat 12:7-9) Tamatuma kingorna Jiisusi ‘angeruseq pillugu aallartitatut’ Ataatani peqatigalugu naalaffik anersaakkut ittoq misissorniarlugu tikiuppoq. (Malaki 3:1, NV) Kristumiuunerartut, ‘Babylonersuarmiittut’ assuarnarnerpaartaat, eqqartuuppai aammillu kuisisimasutut silarsuarmilu matumani politikkikkut aaqqissuussinernik anersaakkut allasioqateqarsimasutut pisuutillugit. — Saqqummersitat 18:2, 3, 24.

Inussiaq nunarsuarmiittoq minguiarneqarpoq

3, 4. (a) Jiisusi Kristusi Jehovap ‘aallartitaatut’ sua? (b) Naalaffimmik misissuinermi suna paasineqarpa, ilagiinnillu siulersuisutut Jiisusi susussanngortitsiva?

³ Jehovap aallartitaatalu naalaffik anersaakkut ittoq misissoramikku paasivaat naalaffiup matuma silarliani nunarsuarmiittumi ilumoortunik kristumioqartoq kristumiuunerartut ilagiivinut ilaanngitsunik. Kristumiulli tanitat taakku, “Levikkut”, minguiarneqartariaqarput. Pruffiitip Malakip tamanna ima siulittuutigaa: “[Jehova] ingikkumaarpoq aatsitsissalluni sølvimillu akuiaassalluni. Levikkut eqqiarumaarpai kuultitut sølvitullu akuiarlugit eqqortumik [Jehovamut] pilliutinik aatsisinnaaqqullugit.” (Malaki 3:3) Jehovap ‘angeruseq pillugu aallartitaq’, Kristusi Jiisusi, anersaakkut Israelikkunnik taakkuninnga minguiaanermut atorpaa.

⁴ Taamaakkaluartorli Jiisusip Kristusip paasivaa kristumiut tanitat aalajaatsut taakku inoqutigiinnut uppertunut piffissaq eqqorlugu anersaakkut inuussutissaqartitsiniarlutik sapinngisartik tamaat iliortut. Taakku 1879-imiilli, pissutsini qanorluunniit ikkaluartuni, Guutip naalagaaffia pillugu sallusuissutinik Biibilimeersunik atuagassiami matumani paasissutissiisarput. Jiisusi siulittuivoq ‘pissutsit aaqqissuussaanerata naggataatungaani’ (NV) kiffani misissuiffiginiarlugit ‘tikikkuni’ paasissallugu inussiaqartoq “piffissaq eqqorlugu” taakkununnga “nerisassanik” tunniussisartumik. Inussiaq taanna ‘pilluarnerassavaa’ ‘pigisaminullu’ nunarsuarmiittunut ‘tamanut paarsisunngortissallugu’. (Matthæusi 24:3, 45-47) Ilagiinnik kristumiunik siulersuisuugami Kristusip “inussiaq aalajaallunilu silatooq” (NV) taanna naalagaaffimminut attuumassuteqartunik nunarsuarmiittunik paarsisussatut atorpaa. ‘Inoqutimi’, imaluunniit kiffami, tanitat taakkualu suleqataasa, ‘savat allat’, siulersuisoqatigiinnit siulersorneqarnissaat isumagaa. — Johannesi 10:16.

Nunarsuaq katersuiffigineqarpoq

5. Apustilip Johannesip takorruukkami kunngi susoq takuaa?

⁵ Apustili Johannesi takorruugaqarpoq kunngip Missiarsiusup “Naalakkap ulluani”, tassa 1914-imi kunnginngortinneqareeruni, iliuuserisassaa alla pillugu. Johannesi ima allappoq: “Takusaqalerpungalu: Takuat, nuiaq qaqortoq, nuiamilu issiavoq inuup erneratut isikkoqartoq kuultiusumik niaqoruteqarluni killuullu ipittoq  tigumiarlugu.” (Saqqummersitat 1:10; 14:14) Johannesip tusarpaa inngili Jehovameersoq nuiami issiasumut suaartartoq killuutiminik killueqqullugu “nunarsuarmi katersugassat katersoriaannanngormata”. — Saqqummersitat 14:15, 16.

6. Piffissap ingerlanerani susoqarnissaa Jiisusip siulittuutigaa?

⁶ Oqaatsit “nunarsuarmi katersugassat” tusarlugit immaqa Jiisusip qajuusiassat naasupiluillu pillugit assersuusiaa eqqarsaatigilerparput. Jiisusi angummut qajuusiassanik pitsaasunik katersuilluarumalluni narsaatimini qajuusiassanik siaruarterisumut imminut assersuuppoq. Qajuusiassat pitsaasut ‘Naalagaaffiup qitornaanut’, kristumiunut ilumoortunut Jiisusip naalagaaffiani naalakkersueqataasussatut tanitaasunut, assersuutaapput. Unnuakkulli qinngarsuisoq, “Diaavulu”, takkuppoq naasupilussanillu, ‘Ajortup qitornaanik’, narsaammut siaruarterilluni. Siaruarterisup kiffani peqquai qajuusiassanik naasupilussanillu naajartoqatigiiginnartitseqqullugit katersuiffissaq, “pissutsit aaqqissuussaanerata naggataatungaa” (NV), nalliutserlugu. Taamanikkussamut taassuma inngilini qajuusiassanik naasupilunnit immikkoortiteriartortissavai. — Matthæusi 13:24-30, 36-41.

7. Kristusi qanoq ‘nunarsuarmi katersuiva’?

⁷ Johannesip takorruugaani siulittuutigineqartutut Jiisusip silarsuaq tamakkerlugu katersuinersuaq siuttuuffigaa. ‘Nunarsuarmi katersuineq’ aallartippoq ‘Naalagaaffiup qitornaasa’, Jiisusip assersuusiaani “qajuusiassat”, 144.000-it ilaat kinguleruttut katersorneqalermata. Kristumiut ilumoortut ilumuunngitsullu assigiinngissutaat sorsunnersuup siulliup kingorna erseqqinnerulerpoq, ima erseqqitsigilerluni ‘nunarsuarmi katersuinerup’ immikkoortuata aappaata — savanik allanik katersuinerup — aallartinneranik kinguneqarluni. Savat allat ‘Naalagaaffiup qitornaanut’ ilaanngillat, tassaappulli Guutip naalagaaffiani innuttaasut kajumittut ‘amerlangaartut’. ‘Inuiaqatigiinnit, naggueqatigiinnit immikkullu oqaasilinnit tamanit’ katersorneqartarput. Naalatsigitipput naalagaaffimmut Missiarsikkoortumut, naalagaaffimmut qilammiittumut Kristusip Jiisusip ‘illernartortallu’ 144.000-it naalakkersueqatigiiffissaannut. — Saqqummersitat 7:9, 10; Danieli 7:13, 14, 18.

Ilagiit qanoq siulersorneqartut

8, 9. (a) Sumit erserpa Jiisusip ilagiit ataatsimut isigalugit qanoq pissusilersornersut maluginiaannarnagu aammali ilagiinniittut tamarmik immikkut inooriaasiat maluginiartaraa? (b) Assilissami qupp. 31-miittumi ersersinneqartutut, ullumikkut ‘Saatanip itissusiinut’ tunngassuteqartut suut samminaveersaartariaqarpavut?

⁸ Allaaserisap matuma siuliani paasivarput Kristusip ukiuni hundredelinni siullerni ilagiit tamarmik immikkut anersaakkut qanoq innerat nakkutigeqqissaartaraa. Kunngisut naalakkersuisutut ‘qilammilu nunamilu pissaanermik tamarmik’ tunineqarsimalluni siulersuisutta, Kristusip, silarsuarmi tamarmi ilagiit taakkuninngalu nakkutilliisut siulersorpai. (Matthæusi 28:18; Kolossemiut 1:18) Jehovap “sunut tamanut niaquusoq” taanna “ilagiinnuttaaq” tanitanut “niaquulersippaa”. (Efesosimiut 1:22) Taamaattumik ilagiinni Jehovamut nalunaajaasuusuni 100.000-init amerlanerusuni pisunik arajutsisaqarneq ajorpoq.

⁹ Itsaq Thyatirami ilagiinnut Jiisusi ima tusarliussaqarpoq: “Ima oqarpoq Guutip ernera innertut ikualasutut ittumik iseqartoq . . .: Ilisimavakka suliatit.” (Saqqummersitat 2:18, 19) Ilagiinni taakkunaniittut kinguaassiuutitigut inuunerlunnerat imminuinnarlu iluarusutsikkusunnerat pillugu naqqippai ima oqarluni: ‘Uanga tassaavunga tartunik uummatinillu misissuisoq, tamassilu immikkut tuniumaarpassi suliasi naapertorlugit.’ (Saqqummersitat 2:23) Oqaatsini taakkunani erserpoq Jiisusip ilagiit ataatsimut isigalugit qanoq pissusilersornersut maluginiaannarnagu aammali ilagiinniittut tamarmik immikkut inooriaasiat maluginiartarpaa. Jiisusip kristumiut Thyatiramiittut ilaat nersualaarpai ‘Saatanip itissusii’ pillugit ilisimasaqanngimmata. (Saqqummersitat 2:24) Ullumikkuttaaq internettikkut qarasaasiamilu pinnguaatit nakuusernertallit aqqutigalugit inuilluunniit akaarinnikkumatuut isumaliutersuutaannik soqutigisaqarnikkut ‘Saatanip itissusiinik’ misissuinaveersaartut tamaasa, inuusuttuugaluarpata utoqqaagaluarpataluunniit, iluarai. Jiisusi kristumiorpassuit inuunertik tamaat siulersuinerminik malinninniarlutik ilungersorlutik iliuuseqartarnerat pilliuteqartarnerallu takullugu nuannaartarpoq.

10. Kristusip ilagiinni utoqqaanertanik siulersuinera qanoq allaatigineqarpa, taakkuali aaqqissuussaq suna akuerisariaqarpaat?

¹⁰ Kristusip utoqqaanertat toqqakkat aqqutigalugit ilagiissimi nunarsuarmiittut asannittumik  nakkutigineqartarnissaat isumagisarpaa. (Efesosimiut 4:8, 11, 12) Ukiuni hundredelinni siullerni nakkutilliisut tamarmik anersaakkut kinguaassiarititaapput. Taakku Saqqummersitani ullorissatut Kristusip talerpimminik tigumiagaasut allaatigineqarput. (Saqqummersitat 1:16, 20) Ullumikkut ilagiinni utoqqaanertat amerlanersaat savanut allanut ilaapput. Qinunikkut anersaallu illernartup siulersuineratigut toqqagaasarput taamaalillutillu taakkuttaaq Kristusimit, imaluunniit taassuma talerpianit, siulersorneqartutut isigineqarsinnaallutik. (Apustilit Suliaat 20:28) Taakkuali Kristusip ajoqersukkaminik nunarsuarmiittunik siulersuinissamut angutinik kristumiunik tanitanik ikittunnguanik siulersuisoqatigiittut atuinera akueraat. — Atuakkit Apustilit Suliaat 15:6, 28-30.

“Aggerniarit Naalagaq Jiisusi!”

11. Sooq siulersuisutta qanittukkut tikiunnissaa qilanaaraarput?

¹¹ Apustilimut Johannesimut saqqummersitani Jiisusip qanittukkut tikiukkumaarnini arlaleriarluni ilisimatitsissutigaa. (Saqqummersitat 2:16; 3:11; 22:7, 20) Babylonersuarmut Saatanillu pissutsinik aaqqissuussinerata ajortup sinneranut eqqartuussummik naammassinninniarluni tikiunnissani qularnanngitsumik eqqarsaatigaa. (2 Thessalonikamiut 1:7, 8) Apustili Johannesi utoqqalisimasoq pisussat nuanningaartut siulittuutigineqartut tamarmik eqquunnerat takorusungaarlugu ima oqarpoq: “Amen, aggerniarit Naalagaq Jiisusi!” Uaguttaaq pissutsit aaqqissuussaanerata ajortup naggatissaata nalaani inuusugut siulersuisutta kunngittalu Ataatami aqqanik illernarsisitsiniarluni kisimilu oqartussaaneranik qutsissisitsiniarluni Guutip naalagaaffiani kunngitut pissaaneqarluni tikiunnissaa qilanaaraarput.

12. Aseruinerup anorai iperarneqartinnagit Kristusip suna naammassiumaarpaa?

¹² Jiisusip Saatanip peqatigiissortaanik takussaasunik suujunnaarsitsiniarluni tikiutinnginnerani anersaakkut Israelikkunnut ilaasut 144.000-it ilaat kingulliit inaarutaasumik naqissuserneqassapput. Biibilimi erseqqissumik allassimavoq aatsaat 144.000-inik naqissusiineq tamanna naammassereerpat aseruinerup anorai Saatanip pissutsinik aaqqissuussineranut ajortumut iperarneqarumaartut. — Saqqummersitat 7:1-4.

13. Kristusip najuunnera ‘naalliunnartoqangaarnissap’ immikkoortuani siullermi qanoq erseqqississava?

¹³ Inuit amerlanersaasa Kristusip 1914-imiilli ‘najuunnera’ (NV) arajutsisimavaat. (2 Petrusi 3:3, 4) Taassumali najuunnini qanittukkut erseqqissisissavaa Jehovap Saatanip pissutsinik aaqqissuussinerata immikkoortuinut assigiinngitsunut eqqartuussutaanik naammassinninnermigut. ‘Inatsisaatsuunerup inuttaanik’, tassa kristumiuunerartut palasiinik, piuneerussineq taassuma ‘najuunnerata erseqqissisinneqarneranut’ (NV) takussutissaassaaq assortugassaanngitsoq. (Atuakkit 2 Thessalonikamiut 2:3, 8). Tamanna Kristusip eqqartuussisutut Jehovap toqqagaatut sulilersimaneranut uppernarsaataassaaq akerlilerneqarsinnaanngitsoq. (Atuaruk 2 Timotheusi 4:1). * Babylonersuup assuarnarnerpaartaanik suujunnaarsitsineq upperisarsiornerup eqqunngitsup silarsuarmi tamarmi naalagaaffissuata suujunnaarsinneqarluinnarneranut aallarniutaassaaq. Jehovap politikkikkut siuttut arnamik atortittartumik anersaakkut  ittumik aseruerusulersissavai. (Saqqummersitat 17:15-18) Taamaalilluni ‘naalliunnartoqangaarnissap’ immikkoortua siulleq aallartissaaq. — Matthæusi 24:21.

14. (a) Annikilliornartussarsuup immikkoortuani siullermi ullut annikilliorfissat sooq ikilisinneqassappat? (b)  “Inuup Ernerata nalunaaqutaa” Jehovap innuttaanut qanoq sunniuteqassava?

¹⁴ Jiisusi oqarpoq ullut annikilliorfissat taakku ‘qinikkat’, kristumiut tanitat kinguleruttut suli nunarsuarmiittut, “pillugit” ikilisinneqassasut. (Matthæusi 24:22) Jehovap kristumiut tanitat taakkualu suleqataat, savat allat, upperisarsiornermik eqqunngitsumik saassussinerup aseruutaasup tamatuma kingunerisaanik nungutinneqartinnavianngilai. Jiisusi nangilluni oqarpoq “[ullut] taakkua annikilliornartut kinguninnguatigut” seqinermi, qaammammi ullorissanilu nalunaaquteqarumaartoq ‘taavalu Inuup Ernerata nalunaaqutaa qilammi erserumaartoq’. Tamanna pillugu nunarsuarmi inuiaat “nimaarumaarput”. Tanitalli, qilaliarnissamik neriugisallit, taakkualu suleqataat, nunarsuarmi inuunissamik neriugisallit, nimaarnavianngillat. ‘Nikuikkumaarput niaqqutillu massitsillugit aniguisitaanissartimmi qanillimmat.’ — Matthæusi 24:29, 30; Lukasi 21:25-28.

15. Kristusi tikiukkuni sussava?

¹⁵ Inuup Ernera ajugaalluinnartinnani suli allamik siunertaqarluni tikiutissaaq. Nammineq ima oqarpoq: “Inuup Ernera naalannassutsimini tikiukkuni inngilit tamaasa ilagalugit, taava naalannassutsimi issiavissaarsuanut ingissaaq. Inuiaqatigiillu tamarmik saavanut katersuutissapput, avissaartissavaalu, soorlu savanik paarsisup savat savaasanit avissaartittarai, savat talerpimmi tungaanut pisissavai, savaasallu saamimmi tungaanut.” (Matthæusi 25:31-33) Siulittuut tamanna Kristusip eqqartuussisutut tikiunnissaanut tikkuussivoq. Taamanikkussamut taassuma ‘inuiaqatigiit tamaasa’ immikkoortunut marlunnut ukununnga immikkoortitissavai: ‘savanut’, anersaakkut qatanngutiminik (kristumiunik tanitanik nunarsuarmiittunik) tapersersuisimasunut, ‘savaasanullu’, ‘Naalakkamik Jiisusimik iivangkiiliumut naalakkumanngitsunut’. (2 Thessalonikamiut 1:7, 8) Savat, ‘iluartutut’ allaatigineqartut nunarsuarmi ‘naassaanngitsumik inuulerumaarput’, savaasalli “aallarumaarput naassaanngitsumik pillarneqassallutik”, tassa suujunnaarsitaassallutik. — Matthæusi 25:34, 40, 41, 45, 46.

Jiisusi ajugaalluinnassaaq

16. Siulersuisorput Kristusi qanoq ililluni ajugaalluinnassava?

¹⁶ Jiisusi kunngioqatigalugillu palasioqatissani tamaviisa naqissusereerunigit savallu immikkoortereerunigit annaanneqarnerannullu nalunaaqutitut talerpimmi tungaanut inissereerunigit ingerlaqqissinnaavoq ‘ajugaalluinnarlunilu’. (Saqqummersitat 5:9, 10, aamma takuuk 1936; 6:2, NV) Inngilerpassuarnut pissaaneqangaartunut qularnanngitsumillu qatanngutiminut makititaasimasunut siuttuulluni Saatanip politikkikkut, sakkutooqarnikkut niuernikkullu aaqqissuussinera nunarsuarmiittoq tamaat suujunnaarsissavaa. (Saqqummersitat 2:26, 27; 19:11-21) Kristusi Saatanip pissutsinik aaqqissuussineranik ajortumik suujunnaarsitsiguni ajugaalluinnassaaq. Taava Saatani anersaapiluillu itinersuarmut nakkartissavai, taakkulu tassaniissapput ukiuni tusindini. — Saqqummersitat 20:1-3.

17. Kristusip savaatini allat ukiuni tusindini naalakkersuinermini sumut siulersussavai, sunalu aalajangiusimasariaqarparput?

¹⁷ Savat allat ‘amerlangaartut’, annikilliornartussarsuarmit aniguisussat, pillugit apustili Johannesi siulittuivoq ‘Savaaqqap issiavissaarsuup qeqqaniittup paarissagai puilasunullu inuussutaasunut ingerlatissagai’. (Saqqummersitat 7:9, 17) Aap, Kristusip ukiuni tusindini naalakkersuinini tamaat savat allat, nipiminik tusartartut, siulersortuassavai, inuunermullu naassaanngitsumut ingerlatissavai. (Atuakkit Johannesi 10:16, 26-28). Kunngerput siulersuisorpullu aalajaalluta malitsigu — maanna silarsuassamilu nutaami Jehovap neriorsuutigisaani! (w10 09/15-E)

[Quppernerup ataani ilanngussaq]

Uteqqiineq

• Kristusi kunnginngortinneqareerami siullermik sua?

• Kristusip nunarsuarmiittut kikkut ilagiinnik siulersuinermut atorpai?

• Siulersuisorput Kristusi suli allat suut siunertaralugit tikiutissava?

• Kristusip silarsuassami nutaami qanoq siulersortuassavaatigut?

[Atuaqqissaarnermi apeqqutit]