Qinuneq – Kimut?
QINNUTIT tamarmik, kimut qinnutaanersut apeqqutaatinnagu, tusarneqartarpat? Taamatut isumaqarneq ullumikkut nalinginnaavoq. Isuma tamanna inuppassuarnit nuannarineqarpoq, ilaatigut upperisarsioqatigiit assigiinngitsut kattunnissaannik tapersersuisunit, isumaqartunillu upperisarsioqatigiit assigiingikkaluarlutik tamarmik ajunngitsuusut. Imaassinnaava isuma tamanna eqqunngitsuusoq?
Biibili naapertorlugu inuppassuit kukkusumut qinusarput. Biibilip allanneqarnerata nalaani qiperukkanut qinuneq nalinginnaavoq. Guutilli taamaaliorneq mianersoqqussutigiuarpaa. Assersuutigalugu Tussiaat 115:4-6-imi guutiliat pillugit ima allassimavoq: “Siuteqaraluarput tusaasinnaanatilli.” Suna pineqartoq erseqqippoq. Sooq Guutimut tusaasinnaanngitsumut qinussaagut?
Tamanna oqaluttuami pissanganartumi Biibilimeersumi erseqqissarneqarpoq. Pruffiiti ilumoortoq Elia peqqusivoq Ba’alip pruffiitii guutiminnut qinussasut, qinoreerpatalu nammineq Guutiminut qinuniarpoq. Elia oqarpoq Guuti ilumoortoq kisimi akissasoq. Ba’alip pruffiitiisa tamanna akuersaarpaat sivisuumillu ilungersorlutik, allaat nipitoorsuarmik, qinupput — iluaqutaanngitsumilli! Oqaluttuami ima allassimavoq: “Nipimik tutsiuttoqanngilaq akisoqarnanilu.” (1 Kunngit 18:29) Eliali qinummat qanoq pisoqarpa?
Eliap Guutia ingerlaannaq akivoq Eliap pilliutaa innermit qilammeersumit ikuallallugu. Sunaana allaassutaasoq? Eliap qinnutaanit Kunnginik allakkat siulliit 18:36, 37-mi allassimasumit tamatuma nassuiaataa erserpoq. Qinnut taanna naatsunnguuvoq — oqaatsini Eliap nalaani atorneqartuni hebræerisuuni 30-t missaannaannik oqaasertaqarluni. Taamaattoq Eliap qinunermini Guutip aqqa, Jehova, pingasoriarluni atorpaa. *
Ba’ali, isumaqartoq “piginnittoq” imaluunniit “naalagaq”, Kana’anikkut guutigaat, taannalu assigiinngitsunik saqqummiunneqartarpoq sumiinneq apeqqutaalluni. Jehovali atiuvoq asseqanngilluinnartoq, ateq silarsuarmi tamarmi ataasiinnarmik aterineqartoq. Guuti taanna innuttaminut ima oqarpoq: “Uanga tassa Jahve, tassa atera! Ataqqinassusera tunniutissanngilara kimulluunniit.” — Esaja 42:8.
Eliap Ba’alillu pruffiitiisa qinnutaat guutimut ataatsimut annguppat? Ba’alisiorneq naalaffimmi atortittartoqartitsinermigut allaallu inunnik pilliuteqartitsisarnermigut inunnik ajortunngortitsisarpoq. Tamatumunnga akerliusumik Jehovap innuttai, Israelikkut, ileqqunit taamaattunit nikanarsarneqanngillat, Jehovap imminik ataqqinnittumik pallorfiginninnissaannik ilinniartimmatik. Una eqqarsaatigiuk: Ikinngutinnut ataqqingaakkannut allakkatit erseqqilluartumik qaatiguuliorukkit, ilimagissaviuk tunniunneqassasut inummut allarluinnarmut, ikinngutippit
ilisimaneqarneranit allaanerulluinnartumik tusaamanerlugaasumut? Soorunami naamik!Eliap Ba’alip pruffiitii unammillermagit uppernarsarneqarpoq kimut qinuneq pingaaruteqartoq
Jehovamut qinuguit Pinngortitsisumut, inuiaat Ataataannut, qinussaatit. * Pruffiiti Esaja qinnummini ima oqarpoq: “Illit ataatagaatsigit, [Jehova].” (Esaja 63:16) Taannaavorlu Jiisusip Kristusip eqqartugaa ajoqersukkaminut ima oqarami: “[Pavunnalerpunga] uanga Ataatannut ilissilu Ataatassinnut, uanga Guutinnut ilissilu Guutissinnut.” (Johannesi 20:17) Jehova Jiisusip Ataatagaa. Taanna Guutiuvoq Jiisusip qinnuigisaa, ajoqersukkanilu ilinniartippai taassumunnga qinusassasut. — Matthæusi 6:9.
Biibilimi ajoqersorneqarpugut Jiisusimut, Mariamut, iluartuutitanut inngilinulluunniit qinusassasugut? Naagga — Jehovamuinnaq. Pissutaasut marluupput. Siullermik, qinuneq pallorfiginneriaasiuvoq, Biibililu naapertorlugu Jehova kisimi pallorfigineqassaaq. (2 Mosesi 20:5) Aappassaanik, Biibilimi oqaluttuarineqarpoq taannaasoq ‘qinnutinik tusartartoq’. (Tussiaat 65:3) Naak Guuti suliassanik allanut isumagititsisarnissani tunuarsimaarfiginngikkaluarlugu, qinnutinut tusarnaarnissap akisussaaffittaa allanut isumagitinngisaannarsimavaa. Neriorsuivoq qinnutsitsinnut nammineq tusarnaartassalluni.
Tassa kissaatigigutsigu Guutip qinnutivut tusartassagai Biibilimi allassimasoq una eqqaamasariaqarparput: ‘Kinaluunniit Jehovap aqqanik torlorfiginnittoq annaanneqarumaarpoq.’ (Apustilit Suliaat 2:21) Jehovalli qinnutit tamaasa tusartarpai piumasaqaateqarani? Ilisimasaqarnerusariaqarpugulluunniit Jehovap qinnutivut tusartassappagit?
^ imm. 6 Hebræerisut ateq Jehova imaluunniit Jahve Biibilimi kalaallisuumi ‘Naalagaq’-mik taarserneqarajuppoq.
^ imm. 9 Upperisarsiornikkut ileqqutoqqat ilaat naapertorlugit Guutip aqqa, qinunermiluunniit, taaneqaqqusaanngilaq. Biibililli allassimaqqaarfiini ateq taanna 7000-it missaannik atorneqarpoq, taakkua ilarpassuini Jehovamut kiffaasut aalajaatsut qinnutaanni tussiaasiaannilu.