Siunnersuut 1

Inunnik asannittuugit, aningaasat pigisallu pinnagit

BIIBILIMI QANOQ ALLASSIMAVA? “[Aningaaserituujuneq] ajortunut tamanut sorlaavoq.” — 1 Timotheusi 6:10.

SOOQ AJORNAKUSOORPA? Ussassaarusiortartut sapinngisartik tamaat pigisatsinnik naammaginnikkunnaarsinniartarpaatigut. Kissaatigaat suleruloorluta aningaasarsiussasugut nutaanerusunik, pitsaanerusunik anginerusunillu pisisinnaaniassagatta. Aningaasat pilerinarsinnaapput, aningaaserituujuleriataarsinnaavugullu. Biibilimili mianersoqqussuteqarpoq pisuussutinik nuannarisaqartoq naammaginnilinngisaannassasoq. Kunngi Salomo ima allappoq: “Aningaasanik nuannarisaqartoq naammatsiffeqanngilaq.” — Oqaluussisartup oqaasii 5:10, The New English Bible.

QANOQ ILIORSINNAAVIT? Jiisusi ilaarlugu inuit pigisanit asanerunissaat ilinniaruk. Jiisusip inunnik asanninnini pissutigalugu sunik tamanik — allaat inuunerminik — pilliutiginneriaannaavoq. (Johannesi 15:13) Ima oqarpoq: “Tunisineq pilluarnarneruvoq tigusinermit.” (Apustilit Suliaat 20:35) Piffissatsinnik periarfissatsinnillu pilliutiginnittarneq ileqqorigutsigu, inuit uagutsinnut aamma taamaaliortassapput. Jiisusi ima oqarpoq: “Tunisigitsi, taava ilississaaq tunineqassaasi.” (Lukasi 6:38) ‘Pisuunngorumasoq’ imminut anniaatissittarpoq ajornartorsiulersittarlunilu. (1 Timotheusi 6:9, 10) Nalerisimaarnivilli inunnik allanik asanninnikkut asaneqarnikkullu anguneqartarpoq.

Soormi inuuninnik pisariillisaasinnaanerit eqqarsaatigigukku? Pigisakillinerusinnaavit, pissarsiariniakkavilluunniit arlaat pissarsiarinngiinnarsinnaavigit? Inuunermi pingaarnerusunut — inunnik ikiuinermut Guutimullu, tamanik tunisisinnut, kiffartornermut — piffissaqarnerulersinnaavutit nukissaqarnerulerlutillu. — Matthæusi 6:24; Apustilit Suliaat 17:28.

[Qupp. 4-mi assiliartaq]

“Tunisigitsi, taava ilississaaq tunineqassaasi”