‘Kiap Jehovap eqqarsaatai ilisimavai?’

‘“Kiap Jehovap eqqarsaatai ilisimavai ilitsersorsinnaallugulu?” Uagulli Kristusip eqqarsaatai pigaavut.’ — 1 KORINTHIMIUT 2:16.

1, 2. (a) Inuppassuit suna ajornakusoortikkajuppaat? (b) Uagut eqqarsartaatsitsinnut Jehovallu eqqarsartaasianut tunngatillugu suna eqqaamasariaqarparput?

ILLIT inuup allap eqqarsartaasianik paasiuminaatsitsinikuuit? Immaqa kateqqammerputit misigalutillu aappavit eqqarsartaasia paasilluarsinnaanagu. Ilumoorpoq angutit arnallu eqqarsartaasii allaallu eqqarsaatiminnik oqaatiginneriaasii assigiinngitsuusut. Allaat kulturit ilaanni angutit arnallu assigiinnik oqaaseqaraluarlutik assigiinngitsunik oqaluttaaseqarput. Aamma assigiinngitsunik oqaaseqarlunilu kultureqaraanni assigiinngitsunik eqqarsartaaseqarlunilu pissuseqartoqarsinnaavoq. Allalli ilisarisimalluarnerujartortillugit taakkua eqqarsartaasiinik paasinnikkiartulernissamut periarfissaqarnerujartuinnarnartarpoq.

² Taamaattumik uagut eqqarsartaatsitta Jehovap eqqarsartaasianit allaanerujussuunera tupigissanngilarput. Pruffiitini Esaja aqqutigalugu Jehovap Israelikkut ima oqarfigai: ‘Eqqarsaatikka ilissi eqqarsaatiginngilasi, aqqutisilu uanga aqqutiginngilakka.’ Taava Jehovap ilumoortoq tamanna erseqqissarpaa ima assersuusiorluni: ‘Soorlu qilak nunamit qutsissoq, taamattaaq aqqutikka qutsipput aqqutissinnit, eqqarsaatikkalu eqqarsaatissinnit.’ — Esaja 55:8, 9, 1900.

3. Sutigut marlutsigut Jehovamut qaninnerusumik attaveqalersinnaavugut?

³ Imaappa Jehovap eqqarsartaasianik paasinninniarsarissanngitsugut? Naamik. Jehovap eqqarsaataanik qaqugumulluunniit paasinnilluinnarsinnaalernavianngikkaluartugut Biibilimi kajumissaarneqarpugut taassumunnga qanittumik attaveqarniaqqulluta. (Atuakkit Tussiaat 25:14; Ussatit 3:32). * Jehovamut qanittumik attaveqalersinnaavugut ilaatigut taassuma suliai, oqaasiani Biibilimi allaatigineqarnerattut, maluginiarlugillu soqutigalugit. (Tussiaat 28:5) Aamma taassumunnga qanittumik attaveqalersinnaavugut “Kristusip eqqarsaatai” pillugit ilisimasaqarnerulernitsigut, Kristusi tassaammat “Guutip takussaanngitsup assinga”. (1 Korinthimiut 2:16; Kolossemiut 1:15) Oqaluttuat Biibilimiittut atuarnissaannut eqqarsaatiginissaannullu piffissaqartarnitsigut Jehovap qanoq ittuuneranik qanorlu eqqarsartaaseqarneranik paasinninnerujartuinnarsinnaavugut.

Iliuusereqqajaasagarput iliuuserinaveersaartariaqagarpulli

4, 5. (a) Soqqajaasarneq mianersorfigisariaqarparput? Nassuiaruk. (b) Israelikkut kukkusumik qanoq eqqarsartaaseqalerpat?

⁴ Jehovap suliai eqqarsaatigeqqissaaraangatsigit inuit najoqqutassiaat tunngavigalugit Guutimik eqqartuusseqqajaasarneq mianersorfigisariaqarparput. Jehovap taamatut eqqartuusseqqajaasarneq eqqarsaatigaa Tussiaat 50:21-mi allassimasutut ima oqarami: “Isumaliorpit ilittut ittunga?” Biibilimik ilisimatooq ukiut 175-it sinnerlugit matuma siorna ima allappoq: “Inuit namminneq najoqqutassiatik tunngavigalugit Guuti eqqartuuteqqajaasarpaat, inatsisinit namminneq malittariaqarsorisaminnit killilersorneqarsorisarlugu.”

 ⁵ Uagut nammineq najoqqutassiavut kissaatigisavullu Jehovamut isiginnittaatsitsinnut aalajangiisuutinnaveersaartariaqarpavut. Sooq tamanna pingaaruteqarpa? Biibilimik atuaraangatta, naammalluinnanngissuserput pisinnaasattalu killeqarnerat pissutigalugit, Jehova uagut isiginnittaaserput naapertorlugu eqqortulioqqissaarsimanngissorisinnaagatsigu. Itsaq Israelikkut tamanna kukkussutigaat Jehovallu iliuuseqarfiginneriaasianut tunngatillugu kukkusumik isummerlutik. Maluginiaruk Jehovap taakku qanoq oqarfigigai: “Ilissi oqarpusi: ‘[Jehovap] periaasia iluanngilaq.’ Taava tusaagitsi Israelikkuususi: Uanga periaasera tassaanerpa iluanngitsoq? Imaannginnerpa ilissi periaasersi iluanngitsuusoq?” — Ezekieli 18:25.

6. Jobip suna paasivaa, taassumalu misigisai qanoq iluaqutigisinnaavavut?

⁶ Kukkulluta Jehovamik uagut nammineq najoqqutassiavut tunngavigalugit eqqartuussinaveersaarnissamut iluaqutigisinnaasarput tassaavoq uagut paasinnittaatsitta killeqarneranik ilaannikkullu kukkulluinnartarneranik nassuerutiginninneq. Jobip tamanna ilinniartariaqarsimavaa. Taanna misilinneqarnermini isumatsassimavoq ilaatigullu imminuinnaq eqqarsaatigilersimalluni. Uungaannaq isigilersimavoq. Jehovalli taanna isiginnittaatsiminik allanngortitsinissaanut asannilluni ikiorpaa. Jobip 70-init amerlanerusunik akisinnaanngisaanik apeqquteqarfigineratigut Jehovap erseqqissarpaa Jobip pissutsinik paasinnittaasia killeqartoq. Jobip pissutsinik isiginnittaatsini maniguulluni aaqqippaa. — Atuakkit Jobi 42:1-6.

“Kristusip eqqarsaatai” qanoq pigilersinnaagivut

7. Sooq Jiisusip iliuusiinik misissuinikkut Jehovap eqqarsartaasianik paasinnilluarnerusinnaavugut?

⁷ Jiisusip oqaatsimigut iliuutsimigullu tamatigut Ataatani naammalluinnartumik ilaarpaa. (Johannesi 14:9) Taamaattumik Jiisusip iliuusiinik misissuineq Jehovap eqqarsartaasianik paasinninnissamut iluaqutigissavarput. (Filippimiut 2:5, 1936) Iivangkiiliuni oqaluttuarineqartut marluk misissoriartigit.

8, 9. Johannesi 6:1-5-imi oqaluttuaq naapertorlugu pisimasoq suna pissutigalugu Jiisusip Filipi aperaa, aamma sooq aperaa?

⁸ Takorlooriaruk. Ukiumi 32-mi poorskingajalerpoq. Jiisusip apustilii Galilæamut tamarmut oqaluussiartorlutik angalareerlutik uteqqammerput. Misigisarpassuaqarsimallutik qasummata Jiisusip taakku Galilæap Tasersuata sineriaata avannamut kangiatungaaniittumut inoqanngitsumukaappai. Inuilli tusindillit malinnaapput. Jiisusip taakkua ilarpassui ajorunnaarsereermagit tamaasalu amerlasuunik ilinniartereermagit iliuusissanut tunngatillugu aalajangigassaqalerpoq. Inuppassuit taakku tamaani avinngarusimasumiittut qanoq nerisassaqartinneqassappat? Jiisusip, nerisoqartariaqarneranik paasinnittup, Filipi tamaanimiuusoq ima aperaa: “Sumi timiusarsissaagut inuit ukua nerisassaannik?” — Johannesi 6:1-5.

⁹ Sooq Jiisusi taama aperiva? Qanoq iliornissani nalornissutigigamiuk? Naamik. Sunamiuna eqqarsaatigigaa? Apustili Johannesi, matumani najuuttoq, ima nassuiaavoq: “[Jiisusi] taama oqarpoq [Filipi] misilikkumallugu, namminermi qanoq iliornissani nalunnginnamiuk.” (Johannesi 6:6) Jiisusip ajoqersukkat anersaakkut qanoq siumukarsimatiginersut paasiniarpaa. Taamatut aperinerisigut eqqarsalersippai tupinnartuliorsinnaanerminillu upperinninnerminnik ersersitsinissaannut periarfissillugit. Periarfissarli tamanna atorluanngilaat taamaalillutillu paasinnittaatsimik qanoq killeqartiginerat paasinarsisillugu. (Atuakkit Johannesi 6:7-9). Taava Jiisusip takutippaa takorloorsinnaasimanngisaannik iliuuseqarsinnaalluni. Inuit kaattut tusindillit tupinnartuliornikkut nerisassippai. — Johannesi 6:10-13.

10-12. (a) Jiisusip arnamit Guutimik nalusumit qinnuigineqarnermisut ingerlaannaq iliunnginneranut suna pissutaagunarpa? Nassuiaruk. (b) Maanna suna sammissavarput?

¹⁰ Oqaluttuaq taanna pisimasumi allami Jiisusip eqqarsartaasianik paasinninnissamut iluaqutigisinnaavarput. Jiisusip inuppassuarnik taakkuninnga nerisitsinermi kinguninngua apustilini ilagalugit avannamut aallarpoq Israelip killeqarfia qaangerlugu Tyrusip Sidonillu eqqaanniittumukarluni.  Tassaniitillutik arnaq Guutimik nalusoq panimminik ajorunnaarsitseqqullugu Jiisusimik qinnuiginnittoq naapippaat. Aallaqqaammut Jiisusip arnaq soqutiginngitsuusaarpaa. Kimigiiserfigiuarmanili Jiisusip taanna ima oqarfigaa: “Meeqqat qaarsillaqqaarallarlit. Iluanngilarmi meeqqat nerisassaannik arsaaraanni qimminnguanullu tunniullugit.” — Markusi 7:24-27; Matthæusi 15:21-26.

¹¹ Sooq Jiisusip arnaq aallaqqaammut ikiorumanngilaa? Jiisusip Filipimik misiliisimanermisut taanna qanoq periassanersoq paasiniarpaa, uppernerminik ersersitsinissaanut periarfissillugu? Biibilimi ersersinneqanngilaq Jiisusip oqaatsit taakku qanorpiaq oqaatigisimanerai, arnarli itigartinneqartutut misigisimannginnguatsiarpoq. Jiisusip oqaatsimik ‘qimminnguanik’ taassuma inuiaqatai pillugit atuinera assersuussineranik qajassuusserpalunnerulersitsivoq. Taamaammat Jiisusi immaqa angajoqqaatut meeqqami kissaataanik tunniusserusuttutut, meeqqamili kissaatigisaminik qanoq kissaatiginnitsiginera paasiniarlugu tunniusserusunnerminik ersersitsinaveersaartutut, iliorpoq. Sunaluunniit pissutaasimagaluarpat, arnaq uppernerminik ersersitsiniariartoq Jiisusi taassuma kissaatigisaatut iliorpoq. — Atuakkit Markusi 7:28-30.

¹² Oqaluttuat marluk taakku “Kristusip eqqarsaatai” pillugit paasisaqarfigilluarpavut. Maanna misissoriartigu taakku Jehovap eqqarsaataanik paasinnilluarnerunissamut qanoq iluaqutigisinnaagivut.

Jehovap Mosesimut iliorfiginneriaasia

13. Jiisusip eqqarsartaasia pillugu paasisaqarneruneq qanoq iluaqutigisinnaavarput?

¹³ Jiisusip eqqarsartaasia pillugu paasisaqarneruneq Biibilimi immikkoortunik paasiuminaatsunik paasinninnissamut iluaqutaasarpoq. Assersuutigalugu eqqarsaatigeriakkit Israelikkut kuultimik nersuteeraasaliornerata kingorna Jehovap Mosesimut oqaasii uku: “Inuit uku sissuigaraakka, malugaakkalu inuiaasut naalasseriitsut. Kamanninni nungutiinnarlakka! Illilli inuiassuanngortikkumaarpakkit.” — 2 Mosesi 32:9, 10.

14. Mosesi Jehovap oqaasiinut qanoq periarpa?

¹⁴ Oqaluttuaq ima nangippoq: “Taava Mosesip [Jehova] Guutini saammarsarniarlugu oqarfigaa: ‘[Jehova], sooq kamaatingaalerpigit illit nammineq innuttatit nakuussusersuakkut assannik pissarsuarmik Egyptenimit anisitatit? Egyptenimiut oqarumallissapput: “Guutip pilersaarutipiloqarluni anisissimavai qaqqat akornanni toqorarumallugit nunallu qaavanit piiarumallugit”. Kamangaarnerit taamaatinniaruk innuttavillu perlutsitaanissaannik pilersaarutigigaluit naammassinagu. Eqqaagigit kiffatit Aaperaat, Iisaaq Israelilu, eqqaamajullu imminut naqqissigalutit taakku uppernarsaaffigigakkit: Kinguaassasi qilaap ulloriaasut amerlatigilersissavakka, nunalu manna neriorsuutigisara tamaat kinguaassassinnut tunniukkumaarpara soraajuitsumik taakkununnga pigisassanngortillugu.’ Taava [Jehovap] perluk  innuttaminut nalliutitikkumasaraluani peqqissimissutigilerpaa.” — 2 Mosesi 32:11-14. *

15, 16. (a) Jehovap oqaasii pissutigalugit Mosesi sunissamut periarfissaqalerpa? (b) Jehovap ‘peqqissimilernera’ qanoq paasisariaqarpa?

¹⁵ Mosesi Jehovap eqqarsartaasianik ilumut naqqiisariaqarami? Naamerluinnaq! Jehovap iliuusererusussinnaasani oqaatigaa, inaarutaasumilli eqqartuussutiginngilaa. Jehovap ilumoortumik Mosesi misilippaa, soorluttaaq kingusinnerusukkut Jiisusip Filipi arnarlu Guutimik nalusoq misilikkai. Taamaalilluni Mosesi isummaminik oqaatiginninnissamut periarfissaqalerpoq. * Jehovap Mosesi Israelikkunnut imminullu akunnermiliuttussatut toqqarsimavaa, aaqqissuussamullu tamatumunnga naapertuuttumik iliuuseqarusuppoq. Aamma Jehovap makku paaserusuppai: Mosesip isumatsannini iliuutsiminut sunniuteqartissavaa? Periarfissaq tamanna Jehovamik Israelikkunnik puiueqqusinissamut imminillu inuiassuanngortitseqqusinissamut atussavaa?

¹⁶ Mosesip akissutimigut ersersippaa Jehovap naapertuilluartuunera upperalugulu qularutiginagu. Paasitippaa imminut eqqarsaatiginani Jehovalli aqqanik isumakuluutiginnilluni. Jehovap aqqata nikanarsarneqarnissaa kissaatiginngilaa. Taamaalilluni Mosesip ersersippaa tamatumunnga tunngatillugu ‘Jehovap eqqarsaataanik’ paasinnilluni. (1 Korinthimiut 2:16) Tamanna qanoq kinguneqarpa? Jehovap aalajangersimasumik iliuuseqarnissani pisussaaffiginngilaa. Taamaattumik Biibilimi allassimavoq ‘peqqissimilersoq’. Hebræerisut oqaaseq taanna isumaqaannarsinnaavoq Jehova inuiaqatigiinnik taakkuninnga perlutsitserusussinnaagaluarluni taamaaliunngitsoq.

Jehovap Aaperaamut iliorfiginneriaasia

17. Jehova Aaperaap isumakuluutaanut tunngatillugu qanoq naammagittangaarpa?

¹⁷ Jehovap kiffaminik uppernermik tatiginninnermillu ersersitsinissamut periarfissiisarneranut assersuutissaq alla Aaperaap Sodomamut tunngatillugu saaffiginninneranut tunngavoq. Oqaluttuami tamatumani Jehova naammagittangaarpoq. Aaperaap arlalinnik apeqquteqarnissaa akueraa. Oqaloqatigiinnerminni Aaperaat misigissutsikkut aalassassimaarluni ima aperaaq: “Qanoq ilillutit iluartut iluaatsunut ilanngullugit toqorarsinnaavigit iluartut iluaatsullu atugarisaat assigiissillugit? Taamaaliorneq ajornaqaaq! Nunarsuarmik tamarmik eqqartuussisuusoq eqqortuliussannginnerpa?” — 1 Mosesi 18:22-33.

18. Jehovap Aaperaamut iliorfiginneriaasia sumik ilinniarfigisinnaavarput?

¹⁸ Oqaluttuaq taanna Jehovap eqqarsartaasianut tunngatillugu sumik ilinniarfigaarput? Jehova eqqortumik aalajangiisinnaajumalluni Aaperaamit oqaloqatigineqartariaqarpa? Naamik. Soorunami Jehovap aallaqqaammulli aalajangikkaminut pissutigisani Aaperaamut oqaatigiinnarsimasinnaagaluarpaa. Jehovalli Aaperaap taamatut apersornissaanik akuerinninnermigut taanna eqqarsartaatsiminik paasinninnissaanut aalajangikkaminillu akuerinninnissaanut piffissaqartippaa. Aamma taamaalilluni Aaperaat Jehovap qanoq nallittuitigalunilu naapertuilluartigineranik  paasinninnerunissamut periarfissaqalerpoq. Aap, Jehovap Aaperaat ikinngutimisut pivaa. — Esaja 41:8; Jaaku 2:23.

Ilinniarfigisinnaasavut

19. Jobi qanoq ililluta ilaarsinnaavarput?

¹⁹ ‘Jehovap eqqarsaatai’ pillugit sunik paasisaqarpugut? Guutip oqaasia Jehovap eqqarsaataanik paasinnittaatsitsinnik ilusilersuitittariaqarparput. Jehova eqqartuutissanngilarput uagut paasinnittaaserput killilik, najoqqutassiavut eqqarsartaaserpullu tunngavigalugit. Jobi ima oqarpoq: “[Guuti] uattut inuinnaagaluarpat akisinnaassagaluarpara eqqartuussivimmullu sassaqatigisinnaallugu.” (Jobi 9:32) Jehovap eqqarsaataanik paasinnikkiartuleraangatta Jobitut ima oqarusulertarpugut: “Takuat, tamakku tassa suliaasa ilaminiinnaat, isussunnertut nipeqarlutik tusarsaasut. Kiami taava paasisinnaavaa kallersitsinermigut pissaanerminik takutitsinera?” — Jobi 26:14.

20. Qanoq iliortassaagut Biibilimik atuartilluta immikkoortumik paasiuminaatsitaqaraangatta?

²⁰ Qanoq iliortassaagut Biibilimik atuartilluta immikkoortumik paasiuminaatsitaqaraangatta, ingammik Jehovap eqqarsartaasianut tunngasumik paasiuminaatsoqartillugu? Misissuereeraluarluta suli paasilluarsimanngikkutsigu, tamanna Jehovamik tatiginninnitsinnut misilinneqaatitut isigisinnaavarput. Eqqaamasariaqarparput Biibilimi allassimasut ilaat Jehovap nuanningaartunik pissuseqarneranik qularutiginninnginnitsinnik ersersitsinissamut periarfissaqalissutigisarlutigit. Maniguulluta nassuerutigisigu taassuma iliuusii tamaasaanngitsoq paasisinnaagivut. (Oqaluussisartup oqaasii 11:5) Apustilip Paulusip oqaasii uku isumaqatigisariaqarpavut: “Ilami Guutip pisuussusiata ilisimassusiatalu siuneqassusiatalu itissusiat! Ilami eqqartuussinerisa paasiniarneq ajornassusii aqqutaasalu siunersissaanngissusii! ‘Kiammi [Jehovap] eqqarsaatai ilisimavai, kinalu siunnersortigisinnaavaa? Kia tuneqqaarsimanerpaa akilerneqarumalluni?’ Taassumanngami taassumuunalu taassumunngalu suut tamarmik ipput. Taanna naalannartitaali naassaanngitsumik! Amen.” — Romamiut 11:33-36.

[Quppernerup ataani ilanngussat]

Eqqaamavigit?

• Uagut nammineq najoqqutassiavut tunngavigalugit Jehovamik eqqartuussinaveersaarnissamut suna iluaqutigisinnaavarput?

• Jiisusip iliuusiinik paasinninnitsigut qanoq ililluta Jehovamut qaninnerusumik attaveqalersinnaavugut?

• Jehovap Mosesimik Aaperaamillu oqaloqatiginninneri sumik ilinniarfigaavut?

[Atuaqqissaarnermi apeqqutit]

[Qupp. 11-mi assiliartat]

Jehovap Mosesimut Aaperaamullu iliorfiginneriaasiinik eqqarsaatiginninnitsigut taassuma eqqarsartaasia sumik paasisaqarfigisinnaavarput?