Kristumiut ataatsimiinnerinik ineriartornartuutitseqataasarpit?
Kristumiut ataatsimiinnerinik ineriartornartuutitseqataasarpit?
“Katisimasaraangassi . . . [suut] tamarmik ineriartuutaalit.” — 1 KORINTHIMIUT 14:26.
1. Korinthimiunut allakkani siullerni kapitali 14 naapertorlugu kristumiut ataatsimiinnerini pingaarnertut anguniarneqartartut ilaat suua?
‘ATAATSIMIINNERPUT nuanningaarami!’ Naalagaaffilersaarfimmi ataatsimeereerlutit taamatupajaaq oqarnikuuit? Tamanna ilimanaannaavoq. Kristumiut ataatsimiinneri qiimmassaataangaartarput, tamannalu tupinnanngilaq. Kristumiummi siulliit nalaannisut ataatsimiinnerni pingaarnertut anguniarneqartartut ilagaat taakkua najuuttunut tamanut anersaakkut nakussatsissutaanissaat. Maluginiaruk apustilip Paulusip Korinthimiunut allakkamini siullerni tamatuminnga erseqqissaanera. Kapitalimi 14-imi eqqaaqattaarpaa ataatsimiinnerni saqqummiunneqartut tamarmik ‘ilagiinnut ineriartuutaassasut’. — Atuakkit 1 Korinthimiut 14:3, 12, 26. *
2. (a) Ataatsimiinnerit suut pissutigalugit ineriartornartuusarpat? (b) Apeqqut suna maanna sammissavarput?
2 Nalunngilarput ataatsimiinnerit pingaarnerpaamik Guutip anersaavata sunniineratigut ineriartornartuusartut. Taamaattuminguna kristumiut ataatsimiinneri tamaasa Ataatatsinnut qilammiusumut, Jehovamut, qamannga pisumik qinnummik aallarnertarivut, taanna qinnuigalugu katerisimaarnitsinnik anersaaminik illernartumik pilluaqquseqqullugu. Ilagiinniittulli tamarmik ataatsimiinnernik ineriartornartuutitseqataasarsinnaapput. Naalagaaffilersaarfimmi sapaatip-akunneranoortumik ataatsimiinnivut tamatigut anersaakkut nukissaqaleqqinnartuutillugillu qiimmaallannartuutinniarlugit tamatta immikkut suut iliuuserisinnaavavut?
3. Kristumiut ataatsimiinneri qanoq pingaaruteqartigippat?
3 Ataatsimiinnitsinnut tunngasut ilaat ataatsimiinnerni siulersuisut eqqarsaatigisariaqagaat sammissavavut. Aamma ilagiinniittut tamarmik immikkut najuuttunut tamanut ataatsimiinnernik qanoq ineriartornartuutitseqataasinnaanerat sammissavarput. Tamanna sammissallugu uagutsinnut soqutiginaateqaqaaq ataatsimiinnivut illernartuummata. Aap, ataatsimiinnerni najuunneq taakkununngalu peqataaneq Jehovamik pallorfiginninnitsinnut ilaapput pingaarutillit. — Tussiaat 26:12; 111:1; Esaja 66:22, 23.
Ataatsimiinneq Biibilimik atuaqqissaarfissatut naatsorsuussaq
4, 5. Napasuliaq Alapernaarsuiffik-mik atuaqqissaaqatigiinnermut suna pingaarnertut siunertarineqarpa?
4 Sapaatip-akunneranoortumik Napasuliaq Alapernaarsuiffik-mik atuaqqissaaqatigiittarnivut tamatta tamakkiisumik iluaqutigerusuppavut. Ataatsimiinnernut taakkununnga suna pingaarnertut siunertarineqarnersoq paasilluarumallugu, Napasuliaq Alapernaarsuiffik-mik atuaqqissaaqatigiittarnitsinnut pissutaasoq allaaserisanullu atuaqqissaaqatigiissutissanut aaqqiissutigineqarsimasut misissoriartigit.
5 Napasuliaq Alapernaarsuiffik-mik atuaqqissaaqatigiittarnitsinnut siunertaavoq atuagassiaq taanna iluaqutigalugu Biibilimik misissueqqissaarnissarput. Aap, sapaatip-akunneranoortumik Napasuliaq Alapernaarsuiffik-mik atuaqqissaaqatigiinnermi Nehemiap nalaanisut Guutip oqaasia ‘nassuiarneqartarpoq inunnut paasinartunngorlugu’. — Nehemia 8:8; Esaja 54:13.
6. (a) Napasuliaq Alapernaarsuiffik-mik atuaqqissaaqatigiinnermut suna aaqqiissutigineqarpa? (b) Allassimaffiit innersuussutigineqartut siornatungaanni “atuaruk”-mik allassimasoqaraangat susassaagut?
6 Biibili tassaavoq atuagaq ilinniutigisarput pingaarneq, taamaattumik Napasuliaq Alapernaarsuiffik-mik atuaqqissaaqatigiinnermut aaqqiissuteqartoqarpoq. Allassimaffinnut innersuussutit ilaasa siornatungaanni allassimasoqartarpoq “atuaruk” imaluunniit “atuakkit”. Tamatta kajumissaarneqarpugut nammineq Biibilitsinni malinnaasaqqulluta allassimaffiit taakku ataatsimiinnerni atuarneqaraangata. (Apustilit Suliaat 17:11) Sooq? Guutip siunnersuutai nammineq Biibilitsinni takugaangatsigit killinneqarnerusaratta. (Hebræerit 4:12) Allassimaffiit taakkua atuarneqannginneranni atuaqqissaarnermi aqutsisup najuuttut taakkuninnga quppiinissaannut piffissaqartittariaqarpai, allassimaffiit atuarneqarneranni malinnaasinnaaniassammata.
Uppernitsinnik ersersitsinissamut piffissaqarneruneq
7. Napasuliaq Alapernaarsuiffik-mik atuaqqissaaqatigiinnermi sunissamut periarfissaqarpugut?
7 Allaaserisanut atuaqqissaaqatigiissutissanut aaqqiissutigineqartoq suli alla taakkua takissusiinut tunngassuteqarpoq. Ukiuni kingulliunerusuni naannerupput. Tassa Napasuliaq Alapernaarsuiffik-mik atuaqqissaaqatigiinnermi piffissaq annikinnerusoq immikkoortut atuarnissaannut atorneqartalerpoq, akinissamullu piffissaqarnerulerpugut. Maanna ilagiinniittut amerlanerusut periarfissaqalerput uppernerminnik ersersitsinissaminnut apeqqutit atuagassiami allassimasut akinerisigut, allassimaffiit ilaasa qanoq atorneqarsinnaanerannik nassuiaanermikkut imaluunniit najoqqutassianik Biibilimiittunik maleruaanerup silatusaarneruneranik ersersitsisumik sivikitsunnguamik misigisalikkersaarnermikkut. Assit allaaserisaniittut oqaloqatigiissutiginissaat aamma piffissaqarfigineqartariaqarpoq. — Atuakkit Tussiaat 22:23; 35:18; 40:10.
8, 9. Napasuliaq Alapernaarsuiffik-mik atuaqqissaaqatigiinnermik aqutsisup suna suliassaraa?
8 Amerlanerusulli akinissamut periarfissaqartassapput aatsaat atuaqqissaaqataasut naatsunik akissuteqartarpata ataatsimiinnermillu aqutsisoq oqaaseqakulavallaarnaveersaartarpat. Napasuliaq Alapernaarsuiffik-mik atuaqqissaaqatigiinnermik aqutsisup ataatsimiinneq tamanut ineriartuutaaqqullugu nammineq oqaaseqaatimi ilagiillu akissutaasa oqimaaqatigiissinnissaannut suna iluaqutigisinnaavaa?
9 Tamanna akiumallugu assersuuteqariarta. Napasuliaq Alapernaarsuiffik-mik atuaqqissaaqatigiinneq pitsaasumik ingerlanneqartoq soorlu tassa naasut qilertaliat takujuminartut. Atuaqqissaaqatigiinnermi akissutigineqartut naasunut qilertaliamiittunut assersuunneqarsinnaapput. Soorlu naasut qilertaliamiittut angissusii qalipaataallu assigiinngitsuusartut, taamatuttaaq ataatsimiinnermi assigiinngitsunik akissuteqartoqartarpoq. Aqutsisummi oqaaseqaatai sumut assersuunneqarsinnaappat? Oqaaseqallattaartarnera naasut qilertaliat qorsuttaannut kusassaataasunut assersuunneqarsinnaavoq. Qorsuttai pingaarnerpaajunngillat, qilertalianilli kusanartumik ilusileeqataasarput. Tamatumunnga assingusumik atuaqqissaaqatigiinnermi aqutsisup eqqaamassavaa oqaaseqaatini pingaarnerpaajussanngitsut, ilagiinniittulli unnersiutiginninniarlutik oqaasiinut tapersiissutaassasut. Aap, ilagiinniittut akissutaat assigiinngitsorpassuit aqutsisullu naleqquttunik oqaaseqallattaarnera naasutut qilertaliatullusooq ‘katitigaalluaraangata’ atuaqqissaaqatigiinneq najuuttunit tamanit nuannaarutigineqartassaaq.
‘Guuti pilliivigiuartigu qujaniutinik’
10. Kristumiut siulliit ilagiit ataatsimiinneri qanoq isigaat?
10 Paulusip Korinthimiunut allakkamini siullerni 14:26-33-mi kristumiut ataatsimiinnerinik allaatiginninnera ukiuni hundredelinni siullerni taakkua qanoq aqunneqartarnerat pillugu paasisaqarfigaarput. Biibilimik ilisimatooq versit taakku pillugit ima allappoq: “Itsaq ilagiinni naalagiarnernut tunngatillugu maluginiarnarnerpaaq tassaavoq takkuttut tamarluinnangajammik tapersiinissamik immikkut pisinnaatitaaffeqartutut pisussaaffeqartutullu misiginerat. Inuit tusarnaaginnarniarlutik takkunneq ajorput; takkuttarput tunisiniarlutik, tigusinissartik piinnarnagu.” Aap, kristumiut siulliit ilagiit ataatsimiinneri uppernerminnik ersersitsinissamut periarfissatut isigaat. — Romamiut 10:10.
11. (a) Suut ilagiinnut ineriartuutaasarpat, aamma sooq? (b) Ataatsimiinnerni illit akissutinnik pitsanngorsaaniarlutit illit nammineq suut iliuuserisinnaavigit? (Aamma takuuk quppernerup ataani ilanngussaq).
11 Ataatsimiinnerni uppernitsinnik ersersitsinivut ‘ilagiinnut ineriartuutaangaartarput’. Qatanngutitta akissutaat tusarnaarlugit nuannertuaannarpoq, ilaa? Kristumioqatitta aalajaatsup utoqqaap qamannga pisumik akinera killinneqaatigisarparput; utoqqaanertap akissutaa isumassuerpaluttoq qiimmaallaatigisarparput; aamma qungujunngitsoorsinnaaneq ajorpugut meeraq Jehovamik piviusumik asanninnini ersersillugu nammineq akeriataaraangat. Aap, akisarnitsigut kristumiut ataatsimiinnerinik tamatta ineriartornartuutitseqataasinnaavugut. *
12. (a) Mosesip Jeremiallu maligassiaat sumik ilinniarfigisinnaavavut? (b) Qinuneq akinermut tunngatillugu qanoq pingaaruteqarpa?
12 Ittoortuugaannili akisarnissaq unamminiarnangaarsinnaavoq. Illit ittoortuuguit akisarnissallu ajornakusoortittarukku immaqa iluaqutaassaaq eqqaamagukku taamaattarneq qaqutigoortuunngitsoq. Allaat kiffat aalajaatsut Mosesi Jeremialu kikkut tamarmik takkuanni oqalunnermut tunngatillugu imminut tatiginngillat. (2 Mosesi 4:10; Jeremia 1:6) Jehovalli itsaq kiffat taakku kikkut tamarmik takkuanni imminik unnersiutiginninnissaannut ikiorpai, aamma illit qujaniutinik pilliuteqarnissannut ikiorumaarpaatit. (Atuaruk Hebræerit 13:15). Akinissannut ittoornivit ajugaaffiginissaanut tunngatillugu Jehovamit ikiorneqarumallutit susinnaavit? Siullermik, ataatsimiinnermut piareersarluartariaqarputit. Taava naalagaaffilersaarfimmukannginninni Jehova qinunikkut saaffigisinnaavat akinissamullu sapiissuseqarnissat qinnutigalugu. (Filippimiut 4:6) Jehova taassuma ‘piumasaanut naapertuuttumik’ qinnuigigakku qularutiginngilluinnarsinnaavat qinnutivit tusarneqarnissaat. — 1 Johannesi 5:14; Ussatit 15:29.
Ataatsimiinnerit ‘ineriartuutaallutillu kajumissaarutaallutillu tuppallersaataasut’
13. (a) Ataatsimiinnerit najuuttunut qanoq sunniuteqartariaqarpat? (b) Ingammik utoqqaanertat suna eqqumaffigisariaqarpaat?
13 Paulusi allappoq ilagiit ataatsimiinnerini pingaarnertut anguniakkanut ilaasoq taakkua najuuttunut tamanut ‘ineriartuutaallutillu kajumissaarutaallutillu tuppallersaataanissaat’. * (1 Korinthimiut 14:3, 1936) Ullumikkut utoqqaanertat kristumiut qanoq ilillutik qulakkeersinnaavaat ataatsimiinnerni saqqummiussamik qatanngutiminnut qiimmassaataallutillu tuppallersaataanissaat? Tamanna akissutissarsiumallugu Jiisusip makititaanermi kinguninngua katersortitsinera misissoriartigu.
14. (a) Jiisusip katersortitsinera sioqqullugu qanoq pisoqarpa? (b) Sooq apustilit ‘Jiisusip ornimmatik’ oqaluffigimmatillu oqiliallassimassappat?
14 Katersortitsinerup tamatuma siorna pisimasut sammeqqaalaariartigit. Jiisusi toqutaanngitsiartoq apustiliisa taanna “immineerpaat qimaallutillu”, siulittuutigineqartutullu ‘tamarmik immikkut aallakaapput’. (Markusi 14:50; Johannesi 16:32) Jiisusip makititaareerluni apustilini nikallungasut immikkut ittumik katersortippai. * Tamanna Biibilimi ima allaatigineqarpoq: “[Ajoqersukkat] taakku aqqanillit Galilæamukarput qaqqamut Jiisusip orneqqusaanut.” Apuummata ‘Jiisusip ornippai’ oqaluffigalugillu. (Matthæusi 28:10, 16, 18) Takorlooriaruk apustilit qanoq oqiliallatsigisimassasut Jiisusi taamatut siulliulluni iliuuseqarmat! Jiisusip taakku qanoq oqaluffigai?
15. (a) Jiisusip suut eqqartorpai, suullu eqqartunngilai? (b) Katersortitsineq tamanna apustilinut qanoq sunniuteqarpa?
15 Jiisusip manna nalunaarutigaa: “Pissaaneq tamarmi uannut tunniussaavoq.” Taava apustilit matuminnga suliassippai: ‘Aallarlusi ajoqersuganngortitsigitsi.’ Naggataatigullu taakku ima neriorsoqqissaarpai: “Ullut tamaasa najorpassi.” (Matthæusi 28:18-20) Jiisusip suut iliuuserinnginnerai maluginiarpiuk? Apustilit naviinngilai; aamma katersortitsinini taakkua pissutiginiagaannik apeqqusiinissamut uppernikkulluunniit sanngiilliutsiarnerata eqqartorneratigut taakku pisuusutut misiginerulersinnissaannut atunngilaa. Pingaarutilimmik suliassinnerisigut nammineq Ataatamilu asanninnerminnik uppernarsaavigai. Tamanna apustilinut qanoq sunniuteqarpa? Ima ineriartuutigitigalugulu kajumississutigitigalugulu tuppallersarneqaatigitigaat sivitsunngitsoq ajoqersuisaleqqillutik. — Apustilit Suliaat 5:42.
16. Ullumikkut utoqqaanertat kristumiut Jiisusip ataatsimiinnernik nakussatsissutaasunik aqutsinermut tunngatillugu maligassiaa qanoq ilaartarpaat?
16 Ullumikkut utoqqaanertat, Jiisusip pisimaneratut, ataatsimiinnerit uppeqatimik Jehovap innuttaminik soraanngisaannartumik asanninneranik upperinninnerannik nakussatsitsinissamut periarfissatut isigaat. (Romamiut 8:38, 39) Taamaattumik utoqqaanertat ataatsimiinnerni saqqummiussaqaraangamik qatanngutit nukittuffigisaat, sanngiiffigisaajunngitsoq, samminerusarpaat. Qatanngutimik pissutiginiagaat apeqquserneq ajorpaat. Oqaasiinit paasinarsisarpoq uppeqatitik Jehovamik asannittutut eqqortuliorusuttutullu isigisaraat. (1 Thessalonikamiut 4:1, 9-12) Ilaannikkulli utoqqaanertat ilagiinnik pisariaqartumik naqqiisariaqartarput, ataasiakkaaginnaalli naqqinneqartariaqartillugit taamaallaat naqqinneqartariaqartunik oqaloqatiginninnissaq amerlanertigut pitsaanerusarpoq. (Galatiamiut 6:1; 2 Timotheusi 2:24-26) Utoqqaanertat ilagiinniittunik tamanik saaffiginnillutik oqalugiaraangamik nersualaarinissamut periarfissat eqqumaffigisarpaat. (Esaja 32:2) Oqaatsimik ataatsimiinnernut najuuttunut tamanut nakussatsissutaallutillu ‘kajumissaarutaanissaat’ anguniagarisarpaat. — Matthæusi 11:28; Apustilit Suliaat 15:32, 1936.
Ataatsimiinnerit toqqissisimaffiupput
17. (a) Ataatsimiinnitta toqqissisimaffiunissaat sooq aatsaat taama pingaaruteqartigaa? (b) Illit qanoq ilillutit ataatsimiinnernik ineriartornartuutitseqataasinnaavit? (Takuuk ungalusaq “Illit ataatsimiinnernik qanoq ineriartornartuutitseqataasinnaanerit pillugu siunnersuutit qulit”).
17 Saatanip silarsuaa naqisimanninnerujartuinnartillugu kristumiutut ataatsimiinnivut toqqissisimaffiutittariaqarlugillu kikkunnut tamanut tuppallersaataatittariaqarpavut. (1 Thessalonikamiut 5:11) Qatanngut arnaq ukiualuit matuma siorna uinilu sualuttumik misilinneqartoq ima oqaluttuarpoq: “Naalagaaffilersaarfimmut ataatsimiigiaraangatta Jehovamit asannittumik pakkusimaneqartutut misigisarpugut. Qatanngutit akornanni naalagaaffilersaarfimmiitilluta nanertuutigisatsinnik Jehovamut tunniussisinnaasutut misigisarpugut, aamma ilaatigut qamuuna eqqissisimasarpugut.” (Tussiaat 55:23) Qanortoq ataatsimiinnitsinnut najuuttut tamarmik qiimmaallassimasutut tuppallersarneqarsimasutullu misigisarilik. Taamaattumik kristumiutut ataatsimiinnitsinnik ineriartornartuutitseqataajuarta. (w10 10/15-E)
[Quppernerup ataani ilanngussat]
^ imm. 1 Siulittuutigineqarsimavoq ukiuni hundredelinni siullerni kristumiut ataatsimiinnerinut tunngasut ilaasa atuukkunnaarnissaat. Assersuutigalugu “oqqanik oqaluttarnerit” ‘pruffiititullu oqaluttarnerit’ atuukkunnaarsimapput. (1 Korinthimiut 13:8; 14:5) Taamaakkaluartorli Paulusip siunnersuutai kristumiut ataatsimiinnerisa ullumikkut qanoq ingerlanneqartassanerannik paasinninnissamut iluaqutigaavut.
^ imm. 11 Ataatsimiinnerni akissutitsinnik qanoq pitsanngorsaasinnaanerput pillugu siunnersuutit uaniipput: Vagttårnet 1. septembari 2003-moortoq, qupp. 19-22.
^ imm. 13 Grækerit oqaasiisa ‘kajumissaarneqaatissaq’-p aamma ‘tuppallersarneqaatissaq’-p assigiinngissutaat pillugit Vine’s Expository Dictionary of Old and New Testament Words-imi allassimavoq oqaaseq ‘tuppallersarneqaatissaq’-mik nutserneqarsimasoq ‘oqaatsimit kajumissaarneqaatissaq-minngarnit naakkittartuunermut tunngassuteqarnerusoq’. — Naleqqiuguk Johannesi 11:19.
^ imm. 14 Pisimasoq tamanna Paulusip eqqartugarisimasinnaavaa Jiisusip ‘500-t qaangerlugit amerlassuseqartunit takuneqarnera’ pillugu allakkami. — 1 Korinthimiut 15:6.
Qanoq akissavit?
• Kristumiut ataatsimiinneri qanoq pingaaruteqartigippat?
• Ataatsimiinnerni akissutigineqartut ‘ilagiinnut qanoq ineriartuutaasarpat’?
• Jiisusip ajoqersukkaminik katersortitsinera sumik ilinniarfigisinnaavarput?
[Atuaqqissaarnermi apeqqutit]
[Qupp. 28, 29-mi ungalusaq/assiliartat]
ILLIT ATAATSIMIINNERNIK QANOQ INERIARTORNARTUUTITSEQATAASINNAANERIT PILLUGU SIUNNERSUUTIT QULIT
Piareersartarit. Naalagaaffilersaarfimmi sammineqartussat siumut misissoreertarukkit ataatsimiinnerit soqutiginartinnerullugillu killinneqaatiginerussavatit.
Ataatsimiigiartuarit. Ataatsimiigiat amerlanerat qiimmassaataasarmat, illit najuunnerit najuutinnginnerilluunniit sunniuteqassaaq.
Sioqqutsillutit takkuttarit. Ataatsimiinnerup aallartinnginnerani ingereersimasaruit erinarsuummut qinnummullu aallarniutaasunut, Jehovamik pallorfiginninnitsinnut ilaasunut, peqataasarsinnaavutit.
Atorneqartussat nassartakkit. Ataatsimiinneq pissarsiffiginerusassavat Biibili atuagassallu atorneqartussat malinnaavigiumallugit nassartarukkit.
Allamut saasaateqarnaveersaartarit. Assersuutigalugu sms-it aatsaat ataatsimiinnerup kingorna atuartakkit. Taamaalillutit namminermut tunngasut naleqquttumik inissisimatissavatit.
Peqataasarit. Akinermikkut uppernerminnik ersersitsisut amerlanerugaangata, amerlanerit nakussatsitaallutillu qiimmaallattassapput.
Naatsumik akisarit. Taamaalillutik amerlanerit peqataanissaminnut periarfissaqartassapput.
Suliassatit peqqissaaruttakkit. Teokratiimik Ilinniarfimmi saqqummiussassaqaraangavit oqaluussinermulluunniit tunngasumik ataatsimiinnermi saqqummiusseqataasussaagaangavit piareersarluartariaqarputit, sungiusartariaqarlutit suliassallu sapinngisat tamaat taamaatinnaveersaartariaqarlugu.
Nersualaarisarit. Ataatsimiinnermi saqqummiussaqarsimasut akisimasulluunniit oqarfigisakkit tapersiissutaat qanoq pingaartitsigalugit.
Akuugit. Ataatsimiinnerup siorna kingornalu ilasseraartarutta ineriartornartunillu oqaloqatigiissuteqartarutta najuunnerput nuannaarutiginerullugulu iluaqutiginerusassavarput.