‘Naapertuilluassuseq taassuma pia’ ujaqqaartuaruk

“Naalagaaffik naapertuilluassuserlu taassuma pia ujaqqaartuarsigik, taava tamakku tamaasa ilanngullugit ilissinnut tunniunneqarumaarput.” — MATTHÆUSI 6:33, NV.

1, 2. Naapertuilluassuseq Guutip pia suua, sunillu tunngaveqarpa?

‘NAALAGAAFFIK ujaqqaartuarsiuk.’ (Matthæusi 6:33, NV) Jiisusip qaqqami oqaluutsimini kajumissaarutaa tamanna Jehovap Nalunaajaasuinit ilisimaneqarluarpoq. Inuunitsinni sutigut tamatigut naalagaaffimmik tamatuminnga nuannarinningaarnerput ilumoorfiginnikkumanerpullu ersersinniarlugu ilungersortarpugut. Aammali Jiisusip nangilluni oqaasii uku eqqumaffigisariaqarpavut: “naapertuilluassuserlu taassuma pia”, imaluunniit Biibili-mi Dronningimit Margrethemit atortussanngortitami nutserneqartutut, “iluarneralu”. Naapertuilluassuseq Guutip pia suua, tamatuminngalu ‘ujaaseqqaarneq’ qanoq paasisariaqarpa?

 ² Biibilip allassimaqqaarfiini oqaatsit “naapertuilluassuseq”-mik isumallit aamma “eqqortoq”-mik “unneqqarissuseq”-millu nutserneqarsinnaapput. Taamaattumik naapertuilluassuseq Guutip pia tassaanerarneqarsinnaavoq taassuma najoqqutassiai pingaartitaalu naapertorlugit eqqortoq. Jehova Pinngortitsisuugami suut ajunngitsuunerat suullu ajortuunerat, suut eqqortuunerat suullu eqqunngitsuunerat pillugit najoqqutassiisinnaatitaavoq. (Saqqummersitat 4:11) Naapertuilluassuserli Guutip pia inatsisit malittarisassiarpassuillu sukannersut aqqutigalugit ersersinneqarneq ajorpoq. Pissutsinik Jehovap kinaassusilittut ilisarnaatigisaanik, pissusiinik pingaarnernik — naapertuilluassusianik, asanninneranik, ilisimassusianik pissaaneranillu — tunngaveqarpoq. Tassa naapertuilluassuseq Guutip pia piumasaanut siunertaanullu tunngassuteqarpoq. Imminut kiffartorumasunut piumasaqaatai naapertuilluassutsimut taassuma pianut ilaapput.

3. (a) Naapertuilluassutsimik Guutip pianik ujaaseqqaarneq qanoq paasisariaqarpa? (b) Sooq Jehovap najoqqutassiaanik naapertuilluartunik malinnippugut?

³ Naapertuilluassutsimik Guutip pianik ‘ujaaseqqaarneq’ qanoq paasisariaqarpa? Naatsumik oqaatigalugu Guutimit iluarisaajumalluni taassuma piumasaatut iliornertut paasisariaqarpoq. Naapertuilluassutsimik taassuma pianik ujaasinermut ilaavoq taassuma pingaartitaanut maleruagassiaanullu naammalluinnartunut, uagut nammineq najoqqutassiatsinnuunngitsoq, naapertuuttumik inuuniarsarineq. (Atuaruk Romamiut 12:2). Taamatut inooriaaseqarneq Jehovamut attaveqarnitsinnut tunngassuteqarpoq. Pillarneqarumanani taassuma inatsisaanut naalannermut tunngassuteqanngilaq. Guutimik asanninnerput taassuma najoqqutassiaanik malinninnikkut, nammineq najoqqutassiornikkuunngitsoq, taassumannga iluarisaaniarnissamut kajumississutigisarparput. Paasilluarparput taamaaliornerpiaq eqqortuliornerusoq, taamaaliornissamorpiaq pinngortitaasugut. Jiisusi Kristusi, Guutip naalagaaffiani kunngiusoq, ilaarlugu naapertuilluarneq nuannarisariaqarparput. — Hebræerit 1:8, 9.

4. Sooq naapertuilluassutsimik Guutip pianik ujaasinissaq taama pingaaruteqartigaa?

⁴ Naapertuilluassutsimik Jehovap pianik ujaasinissaq qanoq pingaaruteqartigaa? Manna eqqarsaatigeriaruk: Adami Evalu Naatsiivimmi Edenimi misilinneqarput Jehovap maleruagassaminnik najoqqutassiisinnaatitaaneranik akuerinnissanersut paasiniarlugu. (1 Mosesi 2:17; 3:5) Akuerinninngimmata kinguaavi tamarmik naalliuttussanngorlutillu toqusussanngorput. (Romamiut 5:12) Paarlattuanilli “iluarnermik ilumoorsutsimillu noqqaassutiginnittup inuussut iluarnerlu ataqqisaanerlu pissarsiarissavai”. (Ussatit 21:21) Aap, naapertuilluassutsimik Guutip pianik ujaaseqqaarnerup kingunerissavaa Jehovamut attaveqarluarneq, tamannalu annaanneqaataassaaq. — Romamiut 3:23, 24.

Imminut iluartuutinnerup navianaataa

5. Navianartoq suna eqqumaffigisariaqarparput?

⁵ Apustilip Paulusip kristumiunut Romamiittunut allakkamini navianartoq naapertuilluassutsimik Guutip pianik ujaasinitsinni iluatsissagutta tamatta eqqumaffigisariaqagarput uparuarpaa. Nunaqqatini pillugit ima allappoq: “[Taakku] pillugit nalunaajaasariaqarpunga Guuti ilungersuutigigaat, kisianni silaqassuseqarnatik [eqqorluartumilli ilisimasaqarnatik, NV]. Paasisimanngilaat Guutip iluarnera sunaasoq namminnerli iluarnertik atortinniarlugu [namminnerli naapertuilluartuunertik uppernarsarniarlugu, NV], taamaattumillu Guutip iluarneranut naalatsigitinngillat.” (Romamiut 10:2, 3) Paulusi naapertorlugu, juutit taakku namminneq naapertuilluassutsiminnik ima uppernarsaaniartigipput Guutip naapertuilluassusianut naalatsigitikkumanatik. *

6. Sunaveersaartariaqarpugut, aamma sooq?

⁶ Uagut taamatut kukkusinnaavugut Guutimut kiffartornitsinni imminut allanut naleqqiuttalerutta taakkulu unammisalerutsigit. Tamatuma  kingunerisaanik nammineq piginnaanitsinnut tunngatillugu imminut tatigivallaaleriaannaasinnaavugut. Taamatulli pissusilersoraluarutta ilumoortumik ersersissagaluarparput naapertuilluassuseq Guutip pia soqutiginagu. (Galatiamiut 6:3, 4) Eqqortuliornissamut pissutiginiagaq eqqortoq tassaavoq Jehovamik asanninneq. Nammineq naapertuilluassutsitsinnik uppernarsaaniarnivut tamarmik Guutimik asanninnerarnitsinnik uppernarunnaarsitsissapput. — Atuaruk Lukasi 16:15.

7. Jiisusip imminut iluartuutinneq pillugu ajornartorsiut qanoq saqqummiuppaa?

⁷ Jiisusip ‘iluartuutillutik imminnut tatigisut allanillu asissuisut’ isumakuluutigai. Imminut iluartuutinneq pillugu ajornartorsiut assersuusiaq iluaqutigalugu ima saqqummiuppaa: “Angutit marluk naalaffimmukarput qinujartorlutik. Aappaa farisiiariuvoq aappaalu ilanngaaserisuulluni. Farisiiari immikkoorluni qeqarpoq imalu qinulluni: Guuti, qutsavigaakkit inuttut allatut innginnama — ujajaasutut, iluaatsutut, allasiortutut uumatulluunniit ilanngaaserisutut. Sabbatip-akunneranut marloriarlunga iisinnginniartarpunga pissarsiamalu tamarmik qulingi tunniuttarpakka. Ilanngaaserisorli alisimalluni qeqarpoq isiniluunniit qilammut aarlortikkumanagit, sakissamigulli imminut tilluppoq oqarlunilu: Guuti, saammaannga ajortiliusunga!” Jiisusi ima naggasiivoq: “Oqarfigaassi: Taannaavoq iluartuulluni angerlartoq, aappaa naami. Kinaluunniimmi imminut akitsisittoq nikanarsisitaassaaq imminullu nikanartittoq akitsisitaassalluni.” — Lukasi 18:9-14.

Navianartoq alla — ‘iluarniarpallaarneq’

8, 9. ‘Iluarniarpallaarneq’ qanoq paasisariaqarpa, qanorlu kinguneqarsinnaava?

⁸ Navianartoq mianersorfigisariaqagarput alla Oqaluussisartup oqaasii 7:16-imi ima allaatigineqarpoq: “Iluarniarpallaarniaqinak ingasattumillu ilisimaniarnak. Soormi imminut aserorniinnassavit?” Taava isumassarsisitaalluni Biibilimik allaqataasup sooq taamatut pissuseqarnaveersaartariaqartugut nassuiarpaa versi 20-mi ima nangilluni: “Nunami ima iluassuseqartigisumik inoqanngilaq ajunngitsuliuinnavilluni ajortuliunngisaannarlunilu inuusumik.” ‘Iluarniarpallaartoq’ naapertuilluarnermut tunngatillugu nammineq najoqqutassiortarpoq allallu taanna tunngavigalugu eqqartuuttarlugit. Eqqumaffiginngilaali taamaaliornermigut Guutip najoqqutassiaaninngarnit nammineq najoqqutassiaminik pingaarnerutitsisarluni taamaalillunilu ersersittarlugu Guutip isaani naapertuilluanngitsuulluni.

⁹ ‘Iluarniarpallaarutta’ allaat Jehovap pissutsinik iliuuseqarfiginneriaasianik apeqqusiisalersinnaavugut. Eqqaamasariaqarparput Jehova ingasaassinianngitsumik naapertuilluartumillu aalajangiisimanersoq apeqquserutsigu, naapertuilluarnermut tunngatillugu nammineq najoqqutassiavut Jehovap najoqqutassiaanit pingaarnerutilersimassagivut. Jehova eqqartuussassanngortissavarpullusooq, suut eqqortuunerannik suullu eqqunngitsuunerannik uagut nammineq najoqqutassiavut naapertorlugit eqqartuullugu. Jehovaliuna, uaguunngitsoq, suut naapertuilluartuunerat pillugu najoqqutassiorsinnaatitaasoq. — Romamiut 14:10.

10. Suna pissutigalugu Jobip pisimaneratut Guutimik eqqartuussisoorsinnaavugut?

¹⁰ Arlaannarpulluunniit piaaraluni Guutimik eqqartuussiumanavianngikkaluartoq, naammalluinnanngitsuunerput pissutigalugu eqqartuuttoorsinnaavarput. Naapertuilluanngitsuliornerusorisatsinnik takunnikkutta namminerluunniit  atugarliorutta Guuti eqqartuuttooriaannaavarput. Allaat Jobip aalajaatsup tamanna kukkussutigaa. Taanna aallaqqaammut angutitut ‘assuarnaatsutut peqqusersuitsutullu Guutimik mianerinnittuusutut ajortumillu iliuuseqarnaveersaartuusutut’ allaatigineqarpoq. (Jobi 1:1) Taavali ajunaarnernit, naapertuilluanngitsutut isigisaminit, eqqugaavoq. Tamanna pissutigalugu ‘Guutiminngarnit iluartuunerutinnialerpoq’. (Jobi 32:1, 2) Jobip isiginnittaasia naqqinneqartariaqarpoq. Taamaattumik tupigissanngilarput tamatumunnga assingusumik ilaannikkut misigisaqartarutta. Tamatumunnga assingusumik misigisaqassagutta, taava eqqarsartaatsitsinnik aaqqiinissamut suna iluaqutigisinnaavarput?

Sunik tamanik ilisimannittuaannanngilagut

11, 12. (a) Naapertuilluanngitsuliornerusorisatsinnik siumugaqarutta suna eqqaamasariaqarparput? (b) Sooq isumaqartoqarsinnaava Jiisusip viinnequteqarfimmi sulisunik assersuusiaani naapertuilluanngitsumik pisoqartoq?

¹¹ Siullerpaamik eqqaamasariaqarparput sunik tamanik ilisimannittuaannarnata. Jobimut tunngatillugu aamma taamaappoq. Taassuma qilammi ataatsimiinnerit, Saatanip imminik Guutimut inngilinullu sallulluni unnerluutiginniffii, ilisimasaqarfiginngilai. (Jobi 1:7-12; 2:1-6) Jobip naluaa misilinneqarnini ilumoortumik Saatanip pisuussutigigai. Jobi Saatanip kinaaneranik ilumut ilisimanninnersoq qulakkeersinnaanngilarpulluunniit. Taamaattumik taassuma Guuti misilinneqarnerminut kukkulluni pisuusoraa. Aap, sunik tamanik ilisimanninngikkaanni kukkusumik isummertoqariaannaavoq.

¹² Assersuutigalugu eqqarsaatigeriaruk Jiisusip viinnequteqarfimmi sulisunik assersuusiaa. (Atuakkit Matthæusi 20:8-16). Tamatumani Jiisusip oqaluttuaraa viinnequteqarfiutilik sulisuminik tamanik assigiimmik akissarsisitsisoq, taakku ulloq tamaat akunnermiluunniit ataasiinnarmi sulisimanersut apeqqutaatinnagu. Illit tamanna qanoq igaajuk? Naapertuilluartuliornerorpasippa? Immaqa seqernup uunaannaasup ataani ulloq tamaat sulisimasut ingerlaannaq misigeqatigilerpatit. Akissarsinerusariaqaraluarput! Taamatut isummeraanni viinnequteqarfiutilik asanninngitsutut naapertuilluanngitsutullu isigineqarsinnaavoq. Akissarsiaminnik naammagittaalliutiginnittunut akissutaa allaat tusarlugu isumaqarnarsinnaavoq taanna iluarisarsorluni oqartussaassutsiminik atornerluisoq. Tamatumunngali tunngasut tamaasa ilisimasaqarfigaavut?

13. Jiisusip viinnequteqarfimmi sulisunik assersuusiaa qanoq allatut eqqarsaatigisinnaavarput?

¹³ Assersuusiaq taanna allatut eqqarsaatigeriartigu. Viinnequteqarfiutillip qularnanngitsumik nalunngilaa angutit taakku tamarmik ilaquttaminnik pilersuisussaasut. Jiisusip nalaani narsaatini sulisut ullormusiaqartarput. Ullormusiat taakku taakkua ilaqutaasa inuussutigisarpaat. Tamanna eqqarsaatigalugu paasiniariartigu sulisut viinnequteqarfiutillip ualilluinnarnerani sulisussarsiarisai, taamaammallu akunnermi ataasiinnarmi sulisimasut, qanoq atugaqarsimanersut. Immaqa taakkua akunnermut ataatsimut akissarsiaat ilaquttaminnik  nerisassarsiniussinissamut naammanngillat. Sulinissamulli piareersimasimapput sulisussarsiarineqarnissartillu ulloq naallugu utaqqisimallugu. (Matthæusi 20:1-7) Ulloq tamaat sulisimannginnertik namminneq pisuussutiginngilaat. Piaaralutik sulinngitsoorniarsimanerannut takussutissaqanngilaq. Takorlooriaruk illit ulloq naallugu utaqqisariaqarsimallutit, nalunagu ullormi tamatumani akissarsiassatit allanit pisariaqartinneqartut. Suliffissarsinerit qujamasuutigissagaluarpat, ilaa? Aamma ilaquttannik pilersuinissamut naammattumik akissarsisimanerit nuannaajallaatigalugulu tupaallaatigissagaluarpat, ilaa?

14. Viinnequteqarfimmi sulisunik assersuusiaq pingaarutilimmik sumik ilinniarfigisinnaavarput?

¹⁴ Maanna viinnequteqarfiutillip akissarsianut tunngatillugu aalajangigaa sammeqqeriartigu. Taanna akilernerlugaqanngilaq. Sulisut tamaasa inuussutissarsiorsinnaatitaasutut isigai. Sulisussaaleqisoqanngimmat viinnequteqarfiutillip tamanna iluanaarniutiginiarsimasinnaagaluarpaa sulisut annikinnerusumik akissarsisinnerisigut. Taamaaliunngilarli. Sulisui tamarmik ilaquttaminnik pilersuinissamut naammattunik aningaasarsisimallutik angerlarput. Paasissutissat taakku eqqarsaatigigutsigit viinnequteqarfiutillip aalajangigaa allatut isigilissavarput. Aalajangigaa asanninneranut ersiutaavoq, iluarisarsorluni oqartussaassutsimik atornerluinerunani. Tamanna sumik ilinniarfigisinnaavarput? Arlaannut tunngasut ilaannaat eqqarsaatigigaanni kukkusumik isummertoqarsinnaavoq. Jiisusip assersuusiaani erseqqissarneqarpoq naapertuilluassutsip Guutip piata inuit naapertuilluarnerannik akimuinera, tamatumunnga tunngaviusut tassaaginnanngimmata inatsisit inuillu iliuutsitik pissutigalugit pisassarisaat pisassarinngisaallu.

Pissutsinik paasinnittaaserput kukkusinnaalluniluunniit killeqarsinnaavoq

15. Sooq naapertuilluassuseq pillugu paasinnittaaserput kukkusinnaalluniluunniit killeqarsinnaava?

¹⁵ Naapertuilluanngippasissoqaraangat eqqumaffigisariaqakkatta aappaat tassaavoq pissutsinik paasinnittaatsitta kukkusinnaalluniluunniit killeqarsinnaanera. Naammalluinnanngissuseq, isummat pigiliutiinnakkat kulturikkulluunniit tunuliaqutaq pissutigalugit kukkusumik paasinnittaaseqarsinnaavugut. Aamma paasinnittaaserput killeqarpoq inuk sunik pissutiginiagaqarnersoq sunillu uummammioqarnersoq nalugatsigu. Tamatumunngali tunngatillugu Jehovap Jiisusillu pisinnaasaat killeqanngillat. — Ussatit 24:12; Matthæusi 9:4; Lukasi 5:22.

16, 17. Jehovap allasiorneq pillugu inatsisiliaminik Daavimut Batsebamullu tunngatillugu maleruaannginneranut suna pissutaasimasinnaava?

¹⁶ Daavimik Batsebamillu oqaluttuaq misissoriartigu. (2 Samueli 11:2-5) Mosesip inatsisai naapertorlugit toqutaasussaagaluarput. (3 Mosesi 20:10; 5 Mosesi 22:22) Jehovap taakkuninnga pillaagaluarluni nammineq inatsisiliani maleruanngilaa. Jehova taamaalilluni naapertuilluanngitsuliorpa? Daavi qujaginiarlugu nammineq najoqqutassiaminik naapertuilluartunik sumiginnaava? Biibilimik atuartartut ilaat taama isumaqarput.

¹⁷ Jehovalli allasiorneq pillugu inatsit taanna eqqartuussisunut naammalluinnanngitsunut, inuit uummammiuinik takunnissinnaanngitsunut, atortussanngortitaraa. Pisinnaasatik killeqaraluartut, eqqartuussigaangamik inatsit taanna iluaqutigalugu aalajangersimalluinnarlutik iliuuseqarsinnaapput. Jehovalli inuit uummammiui takusinnaavai. (1 Mosesi 18:25; 1 Nalunaarsuutit 29:17) Taamaattumik naatsorsuutigissanngilarput Jehovap inatsimmit eqqartuussisunut naammalluinnanngitsunut tunniussaminit killilersorneqartariaqarnissaa. Taamaattariaqarsimasuuppat assigiinnassagaluarpaa inuk isimigut ajoquteqanngitsoq isigiarsuttunut atugassianik  isaruaqaqqullugu pinngitsaaligaanni. Jehovap nalunngilaa Daavi Batsebalu ilumoorlutik peqqissimisut, taakkua uummammiui takusinnaagamigit. Taamaattumik nallittuilluni asannittumik eqqartuussivoq.

Naapertuilluassuseq Jehovap pia ujartuaruk

18, 19. Uagut nammineq naapertuilluarnermut najoqqutassiarput naapertorlugu Jehovap eqqartuutinngisaannarnissaanut suna iluaqutigisinnaavarput?

¹⁸ Jehovap naapertuilluanngitsuliorneranut ersiutaasorisatsinnik arlaannik ilaannikkut siumugaqartarutta — atuarnitsinniugaluarpat namminerluunniit inuunitsinniugaluarpat — Guuti uagut nammineq naapertuilluarnermut najoqqutassiarput naapertorlugu eqqartuutinngisaannartariaqarparput. Eqqaamasariaqarparput sunik tamanik ilisimannittuaannanngitsugut, aamma pissutsinik paasinnittaaserput kukkusinnaalluniluunniit killeqarsinnaasoq. Eqqaamasariaqarparput ‘inuup kamannera Guutip iluarisaanik sumilluunniit kinguneqarneq ajortoq’. (Jaaku 1:19, 20) Taamaalilluni ‘uummaterput Jehovamut kamalinngisaannassaaq’. — Ussatit 19:3.

¹⁹ Jiisusip pisarneratut Jehovap kisimi naapertuilluartut eqqortullu pillugit najoqqutassiorsinnaatitaanera akueriuaannartigu. (Markusi 10:17, 18) Taassuma najoqqutassiai pillugit ‘eqqorluartumik ilisimasaqalernissarput’ ilungersuutigisariaqarparput. (Romamiut 10:2, NV) Najoqqutassiat taakkua akuerinerisigut Jehovallu piumasaanut naapertuuttumik inuunitsigut ersersittarparput ‘naapertuilluassuseq taassuma pia’ ujaqqaarlutigu. — Matthæusi 6:33, NV.

[Quppernerup ataani ilanngussaq]

Eqqaamavigit?

• Sooq naapertuilluassutsimik Jehovap pianik ujaasinissaq pingaaruteqarpa?

• Navianartut marluk suut eqqumaffigisariaqarpavut?

• Naapertuilluassuseq Guutip pia qanoq ililluta ujaqqaarsinnaavarput?

[Atuaqqissaarnermi apeqqutit]

[Qupp. 15-mi assiliartaq]

Jiisusip angutit marluk naalaffimmi qinusut pillugit assersuusiaa sumik ilinniutigaarput?

[Qupp. 16-mi assiliartaq]

Sulisut nalunaaquttap-akunnerisa aqqarnanni sulisussarsiarineqartut ulloq tamaat sulisimasutut akissarsisinneqarnerat naapertuilluanngitsuliornerua?