Siunnersuut 3

Qujamasuttuujuarit

BIIBILIMI QANOQ ALLASSIMAVA? “Qanorluunniit atugaqaraluarussi qujasaritsi.” — 1 Thessalonikamiut 5:18.

SOOQ AJORNAKUSOORPA? Ullumikkut inuppassuit anneruniartuupput qujasuitsuullutillu, aamma uagut taakkunatut pissuseqalersinnaavugut. (2 Timotheusi 3:1, 2) Aammattaaq immaqa misigivugut sammisassat amerlanerujartuinnartut inuunitsinnut ulapinnareeqisumut ilannguttariaqarlutigik. Ima ajornartorsiulersinnaatigaagut imaluunniit nammineq soqutigisatsinnik ulapputeqalersinnaatigaagut allaat pigeriikkatsinnik pingaartitsinissamut, allalluunniit uagut pilluta iliuuserisaannut qujanissamut, piffissaqarata.

QANOQ ILIORSINNAAVIT? Misigisavit nuannersut eqqarsaatigeqqissaarnissaannut piffissaqarit. Immaqa ilaannikkut ajornartorsiutinit sapilersinneqartutut misigisarputit. Kunngi Daavi eqqarsaatigiuk. Ilaannikkut aliasunnermit nanertisimangaartarpoq, misilinneqarnini pissutigalugit ‘uummataa aalariassaartutut’ ittarpoq. Taamaattoq Guutimut ima qinuvoq: “Naammassisatit tamaasa eqqarsaatigaakka isumaliutigeqqissaarlugillu assappit suliaat.” (Tussiaat 143:3-5) Daavi misilinneqartaraluarluni qujamasuttuujuarpoq nalerisimaartuarlunilu.

Allat illit pillutit iliuuseqartarnerat eqqarsaatigiuk, ikiuinerannullu qujamasunnerit ersersittarlugu. Tamatumunnga tunngatillugu Jiisusi maligassaalluarpoq. Mariap, Jiisusip ikinngutaasa ilaata, uulia akisooq Jiisusip niaquanut isigaanullu kuimmagu, ima aperisoqarpoq: “Sooq uulia kuilussinnarneqarpa?” * Isornartorsiuisut taakku isumaqarput uulia tunineqartariaqaraluartoq, aningaasallu piitsunut tunniunneqartariaqaraluartut. Jiisusi ima akivoq: “Ilaginnarsiuk! Sooq erloqisippisiuk?” Imalu nangippoq: “Pisinnaanini naapertorlugu iliorpoq.” (Markusi 14:3-8; Johannesi 12:3) Mariap qanoq iliunnginnera isiginiarnerunagu, Jiisusip taassuma iliuuserisaanut qujamasunnini ersersippaa.

Ilaasa ilaquttaminnik, ikinngutiminnik, immikkut piginnaatitaaffimminnik allanilluunniit annaasaqarnermik kingorna aatsaat pingaartitsilertarput. Taamaalinaveersaarsinnaavutit maannakkorpiaq misigisannik nuannersunik eqqarsaatiginninnikkut! Soormi qujamasuutigisinnaasatit eqqarsaatigigukkit imaluunniit allattorukkit?

‘Tunissutit ajunngitsut tamarmik’ Guutiminngaaneersuummata taassumunnga qinunikkut qujamasunnerput ersersittariaqarparput. (Jaaku 1:17) Taamaaliortuartarutta qujamasuttuujuarnissamut nalerisimaartuarnissamullu iluaqutigissavarput. — Filippimiut 4:6, 7.

[Quppernerup ataani ilanngussaq]

[Qupp. 6-mi assiliartaq]

Allat illit pillutit iliuuseqaraangata qujasarpit?