Siunnersuut 4

Silatusaarlutit ikinngutissarsiorit

BIIBILIMI QANOQ ALLASSIMAVA? “Ilisimasunik peqateqartoq ilisimassuseqalersarpoq.” — Ussatit 13:20.

SOOQ AJORNAKUSOORPA? Ikinngutitta nalerisimaarnerulersissavaatigut imaluunniit nalerisimaannginnerulersilluta. Taakkua isiginnittaasiat oqaloqatigiissutigisartagaallu inuunermut isiginnittaatsitsinnut qularnanngivissumik sunniuteqassaaq. — 1 Korinthimiut 15:33.

Assersuutigalugu angutit aqqaneq-marluk Kana’animut misissuiartoreerlutik utertut pillugit oqaluttuaq Biibilimeersoq eqqarsaatigiuk. Taakkua amerlanersaat “Israelikkunnut tusagassanik imaattunik siammarteripput: ‘Nuna angallavigalugu misissuiffigisarput inumminik nungusaasuuvoq.’” Angutilli taakkua ilaat marluk Kana’ani isumalluarfigalugu ‘ajunngitsorujussuunerarpaat’. Misissuiartortulli qulit isumalluannginnerat Israelikkunnut sunniuppoq. Ima allassimavoq: ‘Israelikkut tamarmik oqalorujupput suaartarlutik.’ — 4 Mosesi 13:30–14:9.

Aammattaaq ullumikkut inuppassuit ‘naammagittaalliorlutik atugarisaminnik ajorneraasarput’. (Judasi 16) Nalerisimaarnissaq ajornartarpoq ikinngutit naammagittaalliortuaannartut ilagisaraanni.

QANOQ ILIORSINNAAVIT? Ikinngutitillu oqaloqatigiittarnisi eqqarsaatigikkit. Pigisatik pingaakujuutigisarpaat? Imaluunniit pilerigisarpassuatik piginnginnamikkit naammagittaalliortuarpat? Illit ikinngutitut qanoq ittuuit? Ikinngutitit sinngatinniarsarivigit, pigisaminnilluunniit naammaginninnissaannut kajumissaartarpigit?

Daavi, kunngiusussaq, Jonatanilu, kunngi Saulip ernera, eqqarsaatigikkit. Daavi qimaasutut inoqajuitsumi inuuvoq. Kunngi Sauli Daavimit ulorianartorsiortinneqartutut misigigami taanna toqukkusuppaa. Naak Jonatani tulliulluni kunnginngortussaagaluarluni Daavip qanimut ikinngutaasa ilagaat. Jonatanip akueraa Guutip Daavi tulliulluni kunnginngortussatut toqqarsimagaa, ikinngummilu tapersersornissaa naammagalugu. — 1 Samueli 19:1, 2; 20:30-33; 23:14-18.

Ikinngutinuku taamaattut pisariaqartikkitit — nalerisimaarnissamik noqqaassutiginnittut, ilinnillu pitsaanerpaamik kissaassisut. (Ussatit 17:17) Taamaattunilli ikinngutitaassaguit soorunami illit aamma taamaattuusariaqarputit. — Filippimiut 2:3, 4.

[Qupp. 7-mi assiliartaq]

Illit ikinngutivit nalerisimaarnerulersippaatsit imaluunniit nalerisimaannginnerulersippaatsit?