Uppeqatinnik ataqqinninniarlutit siulliullutit iliuuseqartarpit?

“Qatanngutigiittut asaqatigiillusi ungageqatigiigitsi, ataqqeqatigiigitsilu immissinnut akimorniullusi.” — ROMAMIUT 12:10.

1, 2. (a) Paulusi Romamiunut allakkamini qanoq oqaaqqissaariva? (b) Apeqqutit suut sammissavavut?

APUSTILI Paulusi Romamiunut allakkamini uagut kristumiutut ilagiinni asannittuliorfigeqatigiinnissatta pingaaruteqassusianik erseqqissaavoq. Eqqaasippaatigut asanninnerput ‘pisuusaarnerussanngitsoq’. Aamma ‘qatanngutigiittut asaqatigiinneq’ eqqaavaa allallunilu taamatut asaqatigiittoqassasoq ‘ungageqatigiilluni’, imaluunniit ‘qamannga pisumik tunniusimaffigeqatigiilluni’ (NV). — Romamiut 12:9, 10a.

² Soorunami qatanngutigiittut asaqatigiinneq nuannareqatigiinnerinnaanngilaq. Nuannarinninneq iliuutsitigut ersersinneqartariaqarpoq. Allammi asagitsinni paasinavianngilaat arlaatigut asanninnitsinnik ersersitsiviginngikkutsigit. Taamaattumik Paulusi ima oqaaqqissaarivoq: ‘Ataqqeqatigiigitsi immissinnut akimorniullusi.’ (Romamiut 12:10b) Allanik ataqqinninneq qanoq paasisariaqarpa? Uppeqatinik ataqqinninnermut tunngatillugu immitsinnut akimorniunnissarput, imaluunniit siulliulluta iliuuseqartarnissarput, sooq pingaaruteqarpa? Qanoq ililluta ataqqeqatigiissinnaavugut?

 Ataqqinninneq qanoq paasisariaqarpa?

3. Oqaaseq ‘ataqqinninneq’ hebræerisut grækerisullu qanoq isumaqarsinnaava?

³ Oqaaseq hebræerisooq ‘ataqqinninneq’-mik nutserneqarnerusartoq nutsiinnavillugu isumaqarpoq “oqimaatsuuneq”-mik. Inuk ataqqineqartoq pingaarutilittut, nuimasutut, sunniuteqarluartutut isigineqartarpoq. Oqaaseq grækerisooq Biibilimi ‘ataqqinninneq’-mut tunngatillugu atorneqartoq isumaqarsinnaavoq ‘ataqqisaavoq’, ‘pingaaruteqarpoq’ imaluunniit ‘erlinnarpoq’. (1 Petrusi 3:7) Aap, ataqqisavut erligalugillu pingaartittarpavut.

4, 5. Ataqqinninneq qanoq paasisariaqarpa? Assersuuteqarit.

⁴ Allanik ataqqinninneq qanoq paasisariaqarpa? Qatanngutinik ataqqinninneq tassaaginnanngilaq qallikkuinnaq ataqqinnittumik pinninneq. Ataqqinninneq iliuutsitigut ersersinneqartaraluartoq qatanngutitsinnik ataqqinninneq taakkununnga isiginnittaatsimik, taakkununnga misigissutsinik, tunngaveqarpoq.

⁵ Kristumiu qanoq ililluni uppeqatiminik ilumoorluni ataqqinnissinnaava, taakku qamannga pisumik ataqqinngikkunigit? (3 Johannesi 9, 10) Soorlu naasoq aatsaat issorissumiikkuni naajartorlunilu sivisuumik atasinnaasoq, taamatuttaaq ilumoorluni ataqqinnittuartoqarsinnaavoq aatsaat qamannga pisumik ataqqinnikkaanni. (Apustilit Suliaat 5:1-5) Taamaattumik Paulusip ataqqeqatigiinnissaq pillugu oqaaqqissaarinnginnermini toqqaannartumik ima oqarnera tupinnanngilaq: “Asanninneq pisuusaarnerunngikkili.” — Romamiut 12:9; atuaruk 1 Petrusi 1:22.

“Guuti assilillugu” pinngortinneqartut ataqqikkit

6, 7. Sooq allanik ataqqinnittariaqarpugut?

⁶ Allat ataqqinnittumik pissagutsigit qamannga pisumik ataqqinnittariaqaratta, qatanngutitsinnik tamanik ataqqinninnissamut pissutissat Biibilimeersut puiunngisaannartariaqarpavut. Pissutissat taakkua ilaat marluk sammeriartigit.

⁷ Pinngortitanit nunarsuarmiittunit tamanit inuit kisimik “Guuti assilillugu” pinngortitaapput. (Jaaku 3:9) Taamaattumik uagut asannittuullutalu ilisimassuseqarlutalu naapertuilluassuseqarpugut Guuti taamaattuummat. Maluginiariaruk aamma sumut tunngatillugu Pinngortitsisoq assigigipput. Tussiaasiortoq ima allappoq: “[Jehova] . . . illit alutornassutsinnik [ataqqinangaassutsinnik, NV] qilammut ivertitsisutit! . . . [Inuk] naalannaammik ataqqinaammillu niaqoruserpat.” (Tussiaat 8:2, 5, 6; 104:1) * Guutip inuit tamaasa naalannaammik ataqqinaammillu niaqoruserpai, imaluunniit naalannassusilerlugillu ataqqinassusilerpai. Taamaattumik allat ataqqinnittumik pigaangatsigit Jehovap inunnik ataqqinassusiliisuunera akuerisarparput. Inunnik tamanik ataqqinninnissamut pissutissaqarluaratta, uppeqatitsinnik ataqqinninnerungaartariaqarpugut! — Johannesi 3:16; Galatiamiut 6:10.

Ilaqutariissuuvugut

8, 9. Paulusip oqaasii naapertorlugit sooq ataqqeqatigiissaagut?

⁸ Ataqqeqatigiinnissamut pissutissaq suli alla Paulusip eqqaavaa. Ataqqeqatigiinnissaq pillugu oqaaqqissaarinngitsiarluni ima allappoq: “Qatanngutigiittut asaqatigiillusi ungageqatigiigitsi.” Oqaaseq grækerisooq matumani “ungageqatigiigitsi”-mik nutserneqarsimasoq aamma “qamannga pisumik tunniusimaffigeqatigiigitsi”-mik nutserneqarsinnaavoq. Oqaaseq grækerisooq taanna ilaqutariit asaqatigiillutillu tapersersoqatigiilluartut ataqatigiilluarnerat pillugu atorneqarnerusarpoq. Oqaatsip tamatuma atorneratigut Paulusip ersersippaa ilagiinnut ilaasortaasut ilaqutariit ataqatigiilluarnerattulli imminnut attaveqatigiilluartariaqartut. (Romamiut 12:5) Aamma eqqaamasariaqarparput Paulusip oqaatsit taakku kristumiunut  tanitanut, tamarmik Ataatamit Jehovamit qitornatut akuerineqarsimasunut, allagarigai. Taamaattumik oqartoqarsinnaavoq taakku ilaqutariiusut. Tassa kristumiut tanitat Paulusip nalaani aamma ullumikkut inuusut ataqqeqatigiinnissaminnut pissutissaqarluarput.

⁹ ‘Savanummi allanut’ ilaasut? (Johannesi 10:16) Taakku Guutimit qitornatut suli akuerisaanngikkaluarlutik imminnut qatanngutinik taasarnissaat naleqquppoq, silarsuaq tamakkerlugu ilaqutariissuarnut kristumiunut ataasiussusilinnut ilaagamik. (1 Petrusi 2:17; 5:9) Savanut allanut ilaasut sooq imminnut ‘qatanngutinik’ taagortarnerminnik paasinnilluinnarsimagunik, taakkuttaaq uppeqatiminnik qamannga pisumik ataqqinninnissamut pissutissaqarluassapput. — Atuaruk 1 Petrusi 3:8.

Sooq taama pingaaruteqartigaa?

10, 11. Uppeqatitsinnik qamannga pisumik ataqqinninnissaq sooq taama pingaaruteqartigaa?

¹⁰ Uppeqatitsinnik qamannga pisumik ataqqinninnissaq sooq taama pingaaruteqartigaa? Taamaalilluta ilagiinnik ingerlalluarnerulersitseqataallutalu ataasiussuseqarnerulersitseqataasaratta.

¹¹ Soorunami nalunngilarput Jehovamut qanittumik attaveqarneq taassumalu anersaavanit ikiorneqarneq kristumiutut ilumoortutut nakussatsissutiginerpaasarivut. (Tussiaat 36:7; Johannesi 14:26) Aammali uppeqatitta uagutsinnik pingaartitsinerminnik ersersitsinerat nakussatsissutigisarlugulu qiimmassaatigisarparput. (Ussatit 25:11) Oqaatsikkut iliuutsikkulluunniit uagutsinnik ataqqinninnermik ersersitsisoqaraangat nuannaartarpugut. Nuannaarluta aalajangiusimannillutalu inuunermut aqqutikkut ingerlajuarnissamut nakussatsissutigisarparput. Qularnanngitsumik illit nammineq tamanna misigereerpat.

12. Tamatta immikkut qanoq ililluta ilagiinnik asaqatigiinnerulersitseqataasinnaavugut?

¹² Jehovap nalunnginnamiuk ataqqineqarnissarput inunnguutsitsinnit pisariaqartikkipput oqaatsini aqqutigalugu kajumissaarpaatigut ‘ataqqeqatigeeqqulluta immitsinnut akimorniulluta’. (Romamiut 12:10; atuaruk Matthæusi 7:12). Kristumiut siunnersuummik atuuttuartussamik tamatuminnga malinnittut tamarmik qatanngutigiissuarnik kristumiunik asaqatigiinnerulersitseqataasarput. Taamaattumik unikaallalluta imminut ima aperisarnissarput pitsaassaaq: ‘Qanga kingullermik qatanngutit ilagiinniittut arlaat oqaatsikkut iliuutsikkulluunniit paasitippara qamannga pisumik ataqqinninninnik?’ — Romamiut 13:8.

 Tamatsinnut kajumissaarut

13. (a) Kikkut allanik ataqqinninniarlutik siulliullutik iliuuseqartassappat? (b) Paulusip Romamiut 1:7-imi oqaasiinut tunngatillugu qanoq isummersinnaavugut?

¹³ Kikkut allanik ataqqinninniarlutik siulliullutik iliuuseqartassappat? Paulusip hebræerinut allakkamini utoqqaanertat kristumiut ‘siulersortitsitut’ allaatigai. (Hebræerit 13:17) Aap, utoqqaanertat assigiinngitsorpassuarnut tunngatillugu siulliullutik iliuuseqartarput. Aammali savaatinik paarsisuugamik uppeqatiminnik, aammattaaq utoqqaanertaqatiminnik, ataqqinninniarlutik siulliullutik iliuuseqartarnissaat pingaaruteqarpoq. Assersuutigalugu utoqqaanertat ilagiit pisariaqartitaannik oqaloqatigiissutiginninniarlutik ataatsimiikkaangamik ataqqeqatigiittarput oqaaseqaatigineqartunik tusarnaaqqissaartarnermikkut. Aamma ataqqeqatigiittarput utoqqaanertaqatigiinniittut tamarmik immikkut isumaat eqqarsaatigalugit aalajangiisarnermikkut. (Apustilit Suliaat 15:6-15) Eqqaamasariaqarparpulli Paulusip Romamiunut allagai utoqqaanertanuinnaanngitsoq, ilagiinniittunulli tamanut allagaammata. (Romamiut 1:7) Taamaattumik Paulusip ‘akimorniulluni ataqqeqatigiinnissaq’ kajumissaarutigigamiuk tamatta allanik ataqqinninniarluta siulliulluta iliuuseqartarnissarput eqqarsaatigaa.

14. (a) Sooq Paulusip ataqqeqatigiinnermut tunngatillugu siulliulluta iliuuseqartaqquaatigut? Assersuuteqarit. (b) Imminut qanoq aperisinnaavugut?

¹⁴ Paulusip siunnersuutaani aamma manna maluginiariaruk: Paulusip uppeqatini Romamiittut ataqqeqatigeeqqullugit kajumissaaginnanngilai, aammali taamaaliornissamut tunngatillugu imminnut akimorniuteqquai, imaluunniit siulliullutik iliuuseqaqquai. Sooq? Assersuuteqariarta. Ilinniartitsisup ilinniartut atuarlutillu allassinnaasut atuarnermik ilinniaqqullugit kajumissaassavai? Naagga, atuarsinnaareerput. Ilinniartitsisulli ilinniartut taakku atuffarissarnissaannut ikiussagaluarpai. Tamatumunnga assingusumik kristumiut ilumoortut asaqatigiinnertik, ataqqinninnissamut kajumississutigisartagartik, ilisarnaatigereerpaat. (Johannesi 13:35) Soorluli ilinniartut atuarlutillu allassinnaareersut atuffarissarnermikkut siumukarsinnaasut, taamatuttaaq uagut ataqqeqatigiinnermut tunngatillugu siulliulluta iliuuseqartarnitsigut siumukarnerusinnaavugut. (1 Thessalonikamiut 4:9, 10) Paulusip kajumissaarutaa tamannarpiaq tamatsinnut atuuppoq. Imminut ima aperisinnaavugut: ‘Ilagiinniittut allat ataqqinninnermik ersersitsiviginiarlugit siulliullunga iliuuseqartarpunga?’

“Nikanartut” ataqqikkit

15, 16. (a) Kikkut ataqqinninnermik ersersitsiviginngitsuussanngilavut, aamma sooq? (b) Qanoq ililluta paasisinnaavarput qatanngutitsinnik tamanik ilumoorluta ataqqinninnerluta?

¹⁵ Ataqqinninnissaq eqqarsaatigalugu, ilagiinniittut kikkut puiussanngilavut? Guutip oqaasiani ima allassimavoq: “Pilluarpoq sanngiitsumik isumassuisoq; taanna [Jehovap] annaakkumaarpaa ullormi perlulimmi.” (Tussiaat 41:2) Allassimaffimmi tamatumani najoqqutassiaq ataqqeqatigiinnissamut tunngatillugu siulliulluta iliuuseqartarnissamut iluaqutigisinnaavarput?

¹⁶ Qularnanngitsumik isumaqataassaatit oqarutta inuit amerlanerpaartaat inunnik imminnit qaffasinnerusumik inissisimaffilinnik ataqqinnikkumasartut. Amerlanertigulli inuit taakkorpiaat inunnik pingaaruteqannginnerusutut isigisaminnik immannguaannaq ataqqinnittarput ataqqinninngilluinnartarlutilluunniit. Jehovali taamaattuunngilaq. Taanna ima oqarpoq: “Ataqqinnitsikka . . . ataqqissavakka.” (1 Samueli 2:30; Tussiaat 113:5-7) Jehovap kiffartortini ataqqinnitsinilu tamaasa ataqqivai. “Nikanartut” sumiginnarneq ajorpai. (Atuaruk 1 Samueli 2:8; 2 Nalunaarsuutit 16:9). Soorunami uagut Jehova ilaarusupparput. Qamannga pisumik allanik ataqqinninnermik qanoq ersersitsillaqqitsiginerluta paaserusukkutsigu imminut ima aperisinnaavugut: ‘Ilagiinni malunnannginnerusut, imaluunniit immikkut  suliakkerneqarsimanngitsut, qanoq pisarpakka?’ (Johannesi 13:14, 15) Apeqqummut tamatumunnga akissuterput allanik qanoq ataqqinnitsiginitsinnik paasisaqarfigingaatsiassavarput. — Atuakkit Filippimiut 2:3, 4.

Allat piffissaqarfiginerisigut ataqqinnittuliorfigikkit

17. Allanik ataqqinninniarluta siulliulluta iliuuseqassagutta suna pingaaruteqarluinnarpa, aamma sooq?

¹⁷ Ilagiinniittut tamaasa ataqqinninnermik ersersitsiviginiarlugit siulliulluta iliuuseqassagutta taakkua piffissaqarfiginissaat pingaaruteqarluinnarpoq. Sooq? Kristumiutut ulapaartuuvugut, teokratiimullu tunngatillugu sammisartagarpassuavut pingaarutillit piffissartornartupilussuusarput. Taamaattumik tupinnanngilaq piffissaq asuli atorusunnginnatsigu. Aamma uppeqativut piumaffigerusunngilavut piffissarujussuaq uagutsinnut atussagaat. Taamatuttaaq ilagiinniittut arlaannut piffissartornartumut tunngatillugu ikioqqugaangamik piumasaqarpallaarnaveersaaraangata iluarisarparput.

18. Qupperneq 20-mi assilissami ersersinneqartutut, qanoq ililluta ersersissinnaavarput uppeqatitta piffissaqarfiginissaannut piumassuseqarluta?

¹⁸ Aammali paasivarput (ingammik ilagiinni paarsisutut kiffartortuusugut) uppeqaterput piffissaqarfigiumallugu suliatta unitsikkallarnissaanut piumassuseqartarnerput taassuminnga ataqqinninnitsinnut ersiutaasartoq. Qanoq? Qatanngut piffissaqarfigiumallugu suliavut qimaannaraangatsigit, taanna ima oqarfigisarparpullusooq: ‘Illit ima pingaartitsigaakkit suliama suliariinnarnissaaninngarnit illit ilagerusunnerullutit.’ (Markusi 6:30-34) Qatannguterpulli piffissaqarfigiumallugu suliatta unitsikkallarnissaanut piumassuseqanngikkutta, qatanngut uagutsinnit pingaartinneqarpianngitsutut misigilersinnaavoq. Soorunami imaassinnaavoq pingaarutilimmik unitsikkallarneqarsinnaanngitsumik ulapputeqartugut. Qatanngutitsinnulli piffissaqarumanerput — piffissaqarumannginnerpulluunniit — allanik qanoq ataqqinnitsiginitsinnut ersiutaassaaq. — 1 Korinthimiut 10:24.

Siulliullutit iliuuseqartarnissat aalajangiusimajuk

19. Qanoq allatut uppeqativut ataqqinninnermik ersersitsivigisinnaavavut?

¹⁹ Allatiguttaaq uppeqativut ataqqinninnermik ersersitsivigisinnaavavut. Assersuutigalugu piffissarput taakkununnga atoraangatsigu aamma soqutigilluinnartariaqarpavut. Tamatumunngattaaq tunngatillugu Jehova maligassaalluarnerpaavoq. Tussiaasiortoq Daavi ima allappoq: “[Jehovap] isaasa sammivigaat iluartut, ikioqqullutik nillianerat siutaasa tusartarpaat.” (Tussiaat 34:16) Jehova ilaarniartariaqarparput qatanngutitta, ingammik uatsinnut ikioqqusut, sammillugillu tusarnaartarnerisigut — soqutigilluinnarnerisigut. Taamaalilluta ataqqinninnermik ersersitsivigissavavut.

20. Allanik ataqqinninnermut tunngatillugu suut eqqaamasariaqarpavut?

²⁰ Soorlu sammereeripput, uppeqatitsinnik qamannga pisumik sooq ataqqinnittariaqartugut eqqaamajuartariaqarparput. Aamma kikkut tamaasa, aamma “nikanartut”, ataqqinninnermik ersersitsiviginissaannut periarfissarsiortarpugut. Taamaaliornitsigut ilagiinni qatanngutigiittut asaqatigiinnerulersitseqataallutalu ataasiussuseqarnerulersitseqataasarpugut. Taamaattumik ataqqeqatigiiginnarata ataqqinninniarluta siulliulluta iliuuseqarta. Illit taamaaliornissat aalajangiusimaviuk?

[Quppernerup ataani ilanngussaq]

Eqqaamavigit?

• Ataqqinninneq qanoq paasisariaqarpa?

• Uppeqatitta ataqqinninnermik ersersitsiviginissaannut sunik pissutissaqarpugut?

• Sooq ataqqeqatigiinnissaq pingaaruteqarpa?

• Uppeqativut qanoq ataqqinninnermik ersersitsivigisinnaavavut?

[Atuaqqissaarnermi apeqqutit]

[Qupp. 20-mi assiliartaq]

Uppeqativut qanoq ililluta ataqqinninnermik ersersitsivigisinnaavavut?