Anersaat silarsuaannik takorruukkat

QILAMMUT aarlorlutit qanorluunniit sivisutigisumik isigigaluaruit anersaanik takusaqarnavianngilatit. Qanorluunniillu tusaasaqarniartigigaluaruit taakku tusaanavianngilatit. Taamaattoq piunerat qularutigisariaqanngilat. Silassorilluinnartut pissaaneqangaartullu taakku tamarmik immikkut ateqarlutillu kinaassuseqarput. Taakkua ilaasa ajunngitsumik kissaakkaatigut allat ajoquserusuppaatigut. Tamarmilli uagutsinnik soqutiginnipput.

Guuti ilumoortoq anersaajuvoq. (Johannesi 4:24) Asseqanngilluinnartumik guutipiluppassuarnit immikkoorutigisaminik ateqarpoq. Aqqa tassaavoq Jehova. * (Tussiaat 83:19) Tussiaasiortoq ima allappoq: “[Jehova] angingaarpoq unnersiutigineqangaartuullunilu, annilaarnangaarpoq guutinut tamanut. Inuiaammi guutii tamarmik suunngitsuupput, [Jehovali] tassaavoq pinngortitsisoq qilammik. Ataqqinangaassuseq alutornassuserlu sioraaniipput, pissaaneq alutornassuserlu illernartuummi pigisaani ipput.” — Tussiaat 96:4-6.

Guutimik ilumoortumik takorruukkat

Biibilimi ima allassimavoq: “Kialluunniit Guuti takusimanngisaannarpaa.” (Johannesi 1:18) Guuti qanoq isikkoqarnersoq qanorlu takorannertiginersoq paasisinnaanngilarput, soorlu inunnguuseralugu tappiitsup qalipaatit takusinnaannginnamigit paasisinnaanngikkai. Ilinniartitsillaqqissup atuartitami oqaatsit paasisinnaasaat atorlugit paasiuminaatsunik nassuiaasinnaaneratulli Guutip oqaatsini, Biibili, aqqutigalugu takusinnaasavut atorlugit takusinnaanngisavut paasisinnaanngortittarpai. Jehovap itsaq kiffaminut aalajaatsunut takorroortitaasa ilaat iluaqutigisinnaavavut qilannik takorluuinissatsinnut uagullu tassaniittunut sanilliulluta qanoq inissisimaffeqarnitta paasinissaanut.

Assersuutigalugu pruffiitip Ezekielip takorruugaani Jehovap naalannassusia innertut, qinngornertut, safiritut neriusaatullu ittutut eqqartorneqarpoq. Takorruukkami allami apustilip Johannesip Jehova issiavissaarsuarmini issiasoq takugamiuk oqarpoq Guuti “takullugu soorlu tassa [ujaqqat] jaspisi sarderilu”, nangillunilu ima oqarpoq: “[Neriusaaq] issiavissaarsuup avataaniittoq soorlu tassa smaragdi.” Taamatut eqqartorneqarneranit erserpoq Jehovap najuunnera immikkut ittumik kusanangaartuullunilu alutornangaartuullunilu eqqissisimanarluinnartuusoq. — Saqqummersitat 4:2, 3; Ezekieli 1:26-28.

Aamma pruffiiti Danieli Jehova pillugu takorruuisinneqarpoq, takuaalu inngilit ‘tituusintit, ilumut tituusintilippassuit [Jehovap] saani qeqartut’. (Danieli 7:10) Ila takullugit tupinnarsimassaqaat! Inngilimik ataatsimik takusaqarneq, takorruuinikkuinnaagaluarpalluunniit, mianernangaarsimassaaq, inngilinilli naammalluinnartunik  10.000-ilippassuarnik takusaqarneq mianernangaarnerusimassaaq, ilaa?

Inngilit Biibilimi 400-t inulaarlugit eqqaaneqarput, ilaatigut serafit kerubillu. Grækerit oqaasiat hebræerillu oqaasiat Biibilimi “inngili”mik nutserneqartartut isumaqarput “aallartitaq”. Taamaattumik inngilit attaveqatigiissinnaapput, aamma itsaq inunnut attaveqartarput. Inngilit tassaanngillat siornatigut nunarsuarmi inuttut inuusimasut. Jehovap anersaat taakku inunnik pinngortitsinini sioqquterujussuarlugu pinngortippai. — Jobi 38:4-7.

Danielip takorruugaani inngilerpassuit katersuupput pisimasoq pingaarutilik najuuffigiartorlugu. Taava Danielip takuaa “inuup erneratut isikkoqartoq” Jehovap issiavissaarsuanut sassartoq, taannalu “naalagaassusermik naalannaammillu kunngiussusermillu tunineqarpoq; inuiaqatigiit, naggueqatigiit immikkullu oqaasillit tamarmik kiffartorfigaat”. (Danieli 7:13, 14) Inuup Ernera, anersaat silarsuaanni pingaaruteqartuusoq, tassaavoq Jiisusi Kristusi makititaasimasoq nunarsuarmut tamarmut naalagaassusermik tunineqarsimasoq. Qanittukkut taassuma naalakkersuineranit naalakkersuisut inuit pilersitaat tamarmik taarserneqassapput nappaatillu, aliasunnerit, naqisimaneqarnerit, piitsuuneq allaallu toqu peerneqassallutik. — Danieli 2:44.

Jiisusip kunnginngortitaanera qularnanngitsumik inngilerpassuarnit aalajaatsunit, inunnut pitsaanerpaamik kissaassisunit, nuannaarutigineqarpoq. Ajoraluartumilli pisimasoq tamanna pinngortitat anersaajusut ilaannaasa nuannaarutigaat.

Guutimut inunnullu akeqqat

Inuit oqaluttuarisaanerata aallaqqaataani inngilit ilaat pallorfigineqarusungaarneq pissutigalugu Jehovamik tunussivoq imminullu Saataninngortilluni. Taaguut Saatani isumaqarpoq  ‘akerlilersuisoq’. Saatani kinaassusiliuvoq ajornerpaaq Jehovamit kinaassusilimmit asanninnerpaamit allaanerulluinnartoq. Inngilit allat Saatanimik pikitsitseqatiginnilerput. Taakku Biibilimi anersaapilunnik taaneqarput. Anersaapiluit Saatanitulli inunnut akeraalerput naakkittaatsut. Nunarsuarmi naalliuutit, ilaatigut naapertuilluanngitsuliornerit, nappaatit, piitsuuneq sorsunnerillu, taakkua sunniinerannit pissuteqarput.

Kristumiuunerartut ilagiivini amerlasuuni Saatani eqqartorneqarpiarunnaarsimavoq, Biibilimili Jobimik allakkani inngilip pikitsitsiumatuup taassuma kinaassusilittut qanoq ittuunera taassumalu pissutiginiagai pillugit paasisaqarpugut. Ima oqaluttuarineqarpoq: “Ullut ilaanni Guutip erneri takkupput [Jehovamullu] sassarlutik; Saatani aamma taakkununnga ilaavoq.” Tamatuma kingorna oqaloqatigiinnermi Saatani nikassaalluni oqarpoq Jobi Guutimut kiffartortoq taassumannga akilerneqartarnini piinnarlugu. Saatanip unnerluutiginnissutini uppernarsarniaraluarlugu Jobi naalliunnangaartunik atugaqartippaa, uumasuutai qitornaalu qulit toqullugit. Taava Jobip timaa tamakkerlugu ajuartilerpaa. Saatanilli saassussisarluni unnerluutiginninniarnerigalua uppernarsarneqanngilaq. — Jobi 1:6-19; 2:7.

Jehovap Saatanimik taama sivisutigisumik ilaginnaanera pissutissaqarluarpoq. Ilaginnaannartuaannassanngilaali. Qanittukkut Saatani susinnaajunnaarsinneqassaaq. Taamatut pisoqarnissaanut iliuuseqartoqalereerpoq, tamannalu Saqqummersitani allaatigineqarpoq, tassanimi qulaarneqarpoq anersaat silarsuaanni pisimasoq pingaarutilik alla paasinngisassaraluarput. Ima allassimavoq: “Qilammi sorsunneqalerpoq. Mikaelip [Jiisusip Kristusip makititaasimasup] inngiliisalu uumasorujuk [Saatani] saassuppaat, uumasorujullu inngiliilu akiuupput kisianni artorsartitaallutik, qilammilu najugassaarutitaapput. Igitaavoq uumasorujussuaq taanna, pulateriaarsutoqaq Diaavulumik Saatanimillu taaneqartoq silarsuarmik tamarmik tammartitsiniartoq nunamut igitaavoq, inngiliilu taassumunnga ilanngullugit igitaapput.” — Saqqummersitat 12:7-9.

Malugiuk allassimammat Saatani “silarsuarmik tamarmik tammartitsiniartoq”. Inuit Jehovamit taassumalu oqaasianit qimagutitinniarlugit upperisarsiornermut tunngasunik sallulioqattaarnermigut tammartinniartarpai. Salluliuutit ilagaat toqusut tamarmik anersaat silarsuaanni inuuginnartarnerat. Tamatuminngali upperinneriaatsit assigiinngeqaat. Assersuutigalugu Afrikami Asiamilu inuppassuit upperaat toqusut siuaasamik najugaannut anersaat silarsuaannukartartut. Aamma uneriffimmik anniarfimmillu ajoqersuut toqup kingorna inuuginnartoqartarneranik upperinninnermik tunngaveqarpoq.

Toqusut qilaliartarpat?

Taavami silarsuarmi sumi tamani inuit millionilikkuutaat inuit ajunngitsut tamarmik qilaliartarnerannik upperinninnerat? Ilumoorpoq inuit ajunngitsut ilaasa qilaliartarnerat, taakkuali toqungasunut milliardilinnut sanilliullugit ikittuinnaapput. Biibilimi ersersinneqarpoq inuit 144.000-it ‘akiliunneqarlutik nunamiikkunnaarsitaassasut’ taakkulu ‘palasiussasut kunngiullutillu’. (Saqqummersitat 14:1, 3; 20:6) Taakku Inuup Ernera, Jiisusi Kristusi, peqatigalugu tassaassapput qilammi naalakkersuisut, tassa Guutip naalagaaffia. Naalakkersuisut taakkua Saatani taassumalu anersaapilui piuneerutitissavaat nunarsuarlu paratiisinngortillugu. Toqusut amerlanerpaartaat uummaqqissapput nunarsuarmilu paratiisiusumi naassaanngitsumik inuunissamut periarfissaqassallutik. — Tussiaat 37:10, 11; Johannesi 5:28, 29.

Sammeriikkavut eqikkariartigik. Anersaat silarsuaanni amerlangaartunik silassorissusileqarpoq. Taakkua qutsinnerpaartaraat Jehova Guuti, uumassusilinnik tamanik Pinngortitsisoq. Inngilerpassuarnit aalajaatsunit kiffartorfigineqarpoq. Inngilit allat, Saatanimit siulersorneqarlutik, Jehovamik tunussipput inunnillu tammartitsiniarsaralutik. Aammattaaq inuit killilimmik amerlassusillit ‘akiliunneqarlutik nunamiikkunnaarsitaapput’, imaluunniit toqqarneqarput, qilammi immikkut ittumik akisussaaffeqartussatut. Tamanna eqqaamallugu maanna misissoriartigu anersaat silarsuaanniittut kikkut attaveqarfigisinnaanerivut taakkununngalu attaveqarsinnaanerput qanoq isiginnittaaseqarfigissaneripput.

[Quppernerup ataani ilanngussaq]