Ilissi inuusuttuaqqat — Guutip oqaasianit siulersortigitsi

“Ilisimassusermik pissarsiniarit paasisimasaqassusermillu pisillutit.” — USSATIT 4:5.

1, 2. (a) Paulusi eqqortuliorniarluni akiuunnermini qanoq ililluni iluatsippa? (b) Qanoq ilillutit ilisimassuseqalerlutillu paasisimasaqassuseqalersinnaavit?

“EQQORTULIORUSUKKAANGAMA ajortoq uannut qanittarpoq.” Nalunngiliuk kina taama oqarnersoq? Apustili Paulusi taama oqarpoq. Paulusip Jehovamik asannikkaluarluni eqqortuliornissaq ilaannikkut ilungersunartutut isigisarpaa. Eqqortuliorniarluni akiuunnini tamanna pissutigalugu ima oqarpoq: “Inupalaarsuusunga!” (Romamiut 7:21-24, NV) Paulusi qanoq misigisimanersoq takorloorsinnaaviuk? Illit eqqortuliornissaq ilaannikkut ilungersunartutut isigisarpiuk? Paulusip pisimaneratut tamanna nukillalaarutigisarpiuk? Taamaappat nikalloqinak. Paulusip ajornartorsiutini ajugaaffigai, illittaaq ajornartorsiutitit ajugaaffigisinnaavatit.

² Paulusip ajornartorsiutiminik ajugaaffiginninneranut pissutaavoq “oqaatsinit peqqissinartunit” (NV) siulersortinnera. (2 Timotheusi 1:13, 14) Taamaalilluni unamminiarnartut anigornissaannut naammagalugilluunniit atornissaannut silatusaartumillu aalajangiinissamut pisariaqartitaminik ilisimassuseqalerlunilu paasisimasaqassuseqalerpoq. Jehovap Guutip aamma illit ilisimassuseqalernissannut paasisimasaqassuseqalernissannullu ikiorsinnaavaatit. (Ussatit 4:5) Oqaatsimini, Biibilimi, siunnersuutit uagut iluaqutigisinnaanerpaasavut tunniuppai. (Atuakkit 2 Timotheusi 3:16, 17). Misissoriartigu najoqqutassiat Biibilimiittut angajoqqaannut attaveqarnermut tunngatillugu, aningaasanut tunngatillugu aamma kisimiitsillutit qanoq iluaqutigisinnaaneritit.

Ilaqutariinni Guutip oqaasianit siulersortinneq

3, 4. Sooq angajoqqaavit malittarisassiaannik maleruaanissat ajornakusoortissinnaaviuk, aamma sooq angajoqqaat malittarisassiortarpat?

³ Angajoqqaavit malittarisassiaannik maleruaanissaq ajornakusoortippiuk? Ajornakusoortitsininnut sunamita pissutaasinnaava? Pissutaasut immaqa ilagaat kiffaanngissuseqarnerorusunnerit. Taamatut misigineq nalinginnaavoq. Inersimasunngoriartornermut ilaavoq. Angajoqqaannili najugaqartillutit angajoqqaannut naalannissat pisussaaffigaat. — Efesosimiut 6:1-3.

⁴ Angajoqqaavit sooq malittarisassiorlutillu piumasaqaateqartarnerannik paasinnikkuit taakkununnga naalannissat ajornakusoortinnginnerussavat. Imaassinnaavoq ilaannikkut Briellep * 18-inik ukiullip misigisimaneratut misigisartutit, taanna angajoqqaani pillugit ima oqarami: “Uattut ukioqarluni qanoq innersoq puiorluinnarsimavaat. Nammineq isumaqarnissara, nammineq aalajangiisarnissara inersimasunngornissaraluunniit kissaatiginngilaat.” Briellep misigisimaneratut immaqa misigivutit angajoqqaavit kiffaanngissuseqartinnerusariaqaraluaraatsit. Angajoqqaavilli ilinnik isumassuinerat malittarisassiortarnerannut pissutaasut pingaarnerpaartaraat. Aammattaaq angajoqqaat kristumiut nalunngilaat ilinnik isumaginneriaasertik pillugu Jehovamit akisussaatitaasussaallutik. — 1 Timotheusi 5:8.

5. Angajoqqaannut naalannerit ilinnut qanoq iluaqutaassava?

⁵ Angajoqqaavit malittarisassiaannik maleruaanivit ilumoortumik assigiinnarpaa bankimut akiitsunik akilersuineq — inuk akilersuinermut tunngatillugu tatiginartoq bankimit akiligassarsisinneqarumanerussaaq. Angerlarsimaffimmi aamma taamatupajaaq ippoq. Angajoqqaatit akiitsugaqarfigaatillusooq, tassami ataqqisariaqarlugillu naalattariaqarpatit. (Atuaruk Ussatit 1:8). Angajoqqaannut naalannerujartuinnartillutit taakkua ilinnik kiffaanngissuseqarnerutitserusunnissaat ilimanaateqarnerujartuinnassaaq.  (Lukasi 16:10) Soorunami malittarisassianik unioqqutitsisaqattaaruit tupigissanngilat angajoqqaavit ‘akiligassarsisinnissannut’ periarfissatit killilerlugilluunniit ‘akiligassarsisikkumajunnaarpatsit’.

6. Angajoqqaat meeqqatik naalannissaannut qanoq ikiorsinnaavaat?

⁶ Angajoqqaat ilaatigut meeqqatik malittarisassiaminnik maleruaanissaannut ikiorsinnaavaat maligassiuinermikkut. Angajoqqaat namminneq kajumillutik Jehovamut naalannerat Taassuma uagutsinnut malittarisassiaasa sukannersuunnginnerannut ersiutaavoq. Maligassiuippata meeqqat inuusuttuaqqallu angajoqqaamik malittarisassiaasa sukannersuunngitsutut isiginissaat ajornannginnerutissavaat. (1 Johannesi 5:3) Aamma pisimasut Biibilimi allaatigineqartut ilaanni Jehovap allaat kiffani aalajangersimasumut tunngatillugu isummaminnik oqaatiginninnissaannut periarfissippai. (1 Mosesi 18:22-32; 1 Kunngit 22:19-22) Qularnanngitsumik pitsaasassaaq angajoqqaat meeqqatik assigiinngitsunut tunngatillugu qanoq isumaqarnerminnik ilaannikkut oqaluttuartittarpatigit.

7, 8. (a) Inuusuttut ilaannut suna ajornartorsiutaasarpa? (b) Ilinnut siunnersuutigineqartut qanoq ilillutit iluaqutiginiarsinnaavigit?

⁷ Meeqqat inuusuttuaqqallu aamma misigisinnaapput angajoqqaaminnit naapertuilluanngitsumik isornartorsiorneqartarlutik. Imaassinnaavoq angutip inuusuttup Craigimik atillip misigisimaneratut ilaannikkut misigisimasartutit, taanna ima oqarami: “Anaanaga soorlu politeeq — kukkunersiortuaannarpaanga.”

⁸ Naqqinneqaraangatta isornartorsiorneqartutut misigigajuttarpugut. Biibilimi miserratigineqanngilaq naqqinneqarneq akueriuminaatsinneqarsinnaasoq, pissutissaqarluinnaraluarpalluunniit. (Hebræerit 12:11) Naqqinneqarnerit qanoq ilillutit iluaqutiginiarsinnaaviuk? Qularnanngitsumik angajoqqaavit asagamitsit siunnersortarpaatsit, tamatumalu eqqaamanissaa pingaaruteqarpoq. (Ussatit 3:12) Ileqqupiloqalernissat kissaatiginngilaat, pitsaasunilli ileqqoqalernissannut ikiorusuppaatsit. Qularnanngitsumik angajoqqaavit nalunngilaat naqqinnaveersaartarunitsit assigiinnassagaa uumigigaatsit! (Atuaruk Ussatit 13:24). * Aamma paasisariaqarpat kukkusarnerit ilinniarninnut ilaaginnartoq. Soormi isornartorsiorneqaraangavit ilisimassuseqarluni oqaaserineqartut atorsinnaasatit maluginiartarukkit? “[Ilisimassutsip] pissarsiarinissaa sølvip pissarsiarinissaanit pingaarneruvoq, iluanaarutissartaalu kuultimit anneruvoq.” — Ussatit 3:13, 14.

9. Meeqqat inuusuttullu naapertuilluanngitsumik pineqarsorinertik eqqarsaatigiinnarnagu susinnaappat?

⁹ Ilumoorpoq angajoqqaat kukkusartut. (Jaaku 3:2) Angajoqqaavit perorsaraangamitsit eqqarsariaqqaaratik arlaannik immaqa oqartoortarput. (Ussatit 12:18) Tamatumunnga suna pissutaasinnaava? Imaassinnaavoq stressertut, imaluunniit misigisimasut illit kukkunitit namminneq pisuussutigalugit. Naapertuilluanngitsumilli pineqarsorinerit eqqarsaatigiinnarnagu, soormi ilinnik ikiuerusunnerat qujamasuutigigukku? Siunnersorneqarnermik akuerinnissinnaassuseqarnerit inersimasunngoruit iluaqutigissavat.

10. Angajoqqaat malittarisassiaasa siunnersuutaasalu akuerinissaat malinnissaallu qanoq ililluni ajornannginnerutinneqalersinnaava?

¹⁰ Angajoqqaavit malittarisassiaasa siunnersuutaasalu ilinnut akueriuminarnerullutillu malikkuminarnerunissaat kissaatigaajuk? Taamaappat illit taakkununnga attaveqarnerit pitsanngorsartariaqarpat. Qanoq ilillutit? Pingaarnerpaamik tusarnaartariaqarputit. Biibilimi ima allassimavoq: “Kinaluunniit tusarasuartarli, kisianni oqalukkumaataartuulluni kamajaatsuullunilu.” (Jaaku 1:19) Imminut illersorniapallanniarnak misigissutsitit aqunniarsarikkit angajoqqaatillu tusarnaarniarsaralugit. Qanoq oqaatiginninnerat maluginiarnagu suut oqaatigineraat maluginiaruk. Taava angajoqqaavit siunnersuutaat illit nammineq oqaatsitit atorlugit ataqqinnippaluttumik oqaatigeqqikkit. Taamaalioruit oqaasiinik tusarnaarsimaninnik qularunnaarsissavatit. Taavami oqaaserisimasatit iliuuserisimasatilluunniit nassuiarusukkukkit? Amerlanertigut silatusaarnerusassaaq  ‘oqaasissanik killiliigallartarnissaq’, tassa angajoqqaat iliuusereqqusaat aatsaat iliuuserereeraanni nassuiaasarnissaq. (Ussatit 10:19) Angajoqqaavit ilumut tusarnaarsimasutit malugisinnaagunikku aamma illit tusarnaarumanerungaassavaatsit. Pissutsinik taamatut inersimarpaluttumik iliuuseqarfiginninnerit Guutip oqaasianit siulersortinninnut ersiutaassaaq.

Aningaasanut tunngatillugu Guutip oqaasianit siulersortinneq

11, 12. (a) Aningaasanut tunngatillugu Guutip oqaasiani qanoq kajumissaarneqarpugut, aamma sooq? (b) Angajoqqaavit aningaasaqarninnik aqutsinissamut qanoq ikiorsinnaavaatsit?

¹¹ Biibilimi allassimavoq ‘aningaasat alanngortaliisartut’, imaluunniit illersuutaasartut. Versimilli tassanngarpiaq erserpoq ilisimassuseq aningaasanit naleqarnerungaartoq. (Oqaluussisartup oqaasii 7:12) Guutip oqaasiani kajumissaarneqarpugut aningaasanut eqqortumik isiginnittaaseqaqqulluta aningaaserituujoqqunatalu. Sooq aningaaserituujunaveersaartariaqarpugut? Assersuut una eqqarsaatigeriaruk: Igasup pikkorissup savik ipittoq atortorilluartarpaa. Misilittagakitsulli mianersunngitsulluunniit savik taanna atoruniuk ajoquserujussuarsinnaavoq. Aningaasat savittut ipittutut ipput — silatusaartumik atoraanni iluaqutaalluarsinnaapput. “Inuilli pisuunngorumasut” ikinngutiminnik, ilaquttaminnut attaveqarnerminnik allaallu Guutimut attaveqarnerminnik tunulliussilertarput. Tamatuma kingunerisaanik ‘imminnut amerlasuunik erloqissutissiortarput’. — Atuakkit 1 Timotheusi 6:9, 10.

¹² Aningaasanik silatusaartumik atuineq qanoq ilillutit ilinniarsinnaaviuk? Soormi missingersuusiornissamut angajoqqaannut ikioqquguit? Salomo ima allappoq: “Ilisimasoq tamakkuninnga naalaassaaq suli annerusumik ilisimasaqalissalluni; inuk silassorissoq pissarsissaaq inuunermi ilisimasassanik [inuk ilisimasalinnut ilitsersuutsittoq sianisuujuvoq, NV].” (Ussatit 1:5) Arnaq inuusuttoq Annamik atilik angajoqqaaminut siunnersoqquvoq. Ima oqarpoq: “Ataatama missingersuusiornermik ilinniartippaanga, aamma paasitippaanga aningaasaatinnik atuinermut naatsorsuinermullu tunngatillugu torersumik aaqqissuussisarnissara qanoq pingaaruteqartigisoq.” Anna atorluarsinnaasaminik anaanaminittaaq ilikkagaqarpoq. Anna ima oqaluttuarpoq: “Pisinnginnermi akinik naleqqiussisarnissap silatusaarneruneranik paasitippaanga.” Annap tamakku tamaasa qanoq iluaqutigai? Ima oqarpoq: “Maanna nammineq aningaasaqarnera aqussinnaavara. Aningaasanik atuivallaarnaveersaaqqissaarpunga pisariaqanngitsumik akiitsugaqarnaveersaarneq pissutigalugu kiffaanngissuseqarlungalu qamuuna eqqissisimaniassagama.”

13. Aningaasanik atuinermut tunngatillugu imminut naalakkersinnaaneq qanoq ilikkarsinnaaviuk?

¹³ Akiitsugaqaleriaannaavutit pileritsaateriataakkannik pisisaruit ikinngutinnulluunniit malugeqqusaarlutit aningaasanik atuisaruit. Tamakku napitiffigiumanagit qanoq iliorsinnaavit? Aningaasanik atuinermut tunngatillugu imminut naalakkersinnaaneq ilinniartariaqarpat. Ellenap, 20-t sinnilaarlugit ukiullip, tamanna ilikkarpaa. Ima oqarpoq: “Ikinngutikkalu aninnginninni annerpaamik qanoq atuitigerusunnerlunga aalajangertarpunga. . . . Aamma ikinngutit aningaasaatiminnik silatusaartumik atuisartut, akinik naleqqiussinissamik — takuinnarlugit pisiinnarnissamiunngitsoq — kajumissaarisartut, kisiisa pisiniarfilereqatigisarpakka.”

14. Sooq ‘pisuussutit nakutitsisinnaanerat’ mianersorfigisariaqarpiuk?

¹⁴ Aningaasarsiorneq aningaasaqarnermillu aqutsineq inuunermut ilaapput pingaarutillit. Jiisusilli “anersaakkut pisariaqartitaqarnerminnik miserratiginninngitsut” piviusumik pilluartuunerarpai. (Matthæusi 5:3, NV) Mianersoqqussutigaa ilaatigut ‘pisuussutit nakutitsineri’ inuup anersaakkut  ittunik soqutiginnikkunnaassutigisinnaagai. (Markusi 4:19) Taamaattumik Guutip oqaasianit siulersortinnissat aningaasanullu oqimaaqatigiissumik isiginnittaaseqarnissat pingaaruteqangaarpoq!

Kisimiitsilluni Guutip oqaasianit siulersortinneq

15. Qularnanngitsumik qaqugukkut Guutimik ilumoorfiginninneq misilinneqarnerpaasarpa?

¹⁵ Guutimik ilumoorfiginninnerit qaqugukkut misilinneqarnerpaasorisarpiuk — allanik peqateqaraangavit kisimiikkaangavilluunniit? Atuarfimmiitillutit sulitillutilluunniit Guutimut attaveqarninnut ajoqutaasinnaasut qularnanngitsumik eqqumaffiginiarnerusarpatit. Navianarsinnaasunut sillimanerusarputit. Qasukkarsimaaraangavilli sillimannginnerugaangavillu ileqqussatigut najoqqutarisannut akerliusumik iliuuseqarnissamut sunnerteqqajaanerusarputit.

16. Sooq kisimiikkaluaruttaluunniit Jehovamut naalakkumasariaqarpugut?

¹⁶ Sooq kisimiikkaluaruttaluunniit Jehovamut naalakkumasariaqarpugut? Manna eqqaamajuk: Jehova aliasutsissinnaavat, imaluunniit taassuma uummataa nuannaartissinnaavat. (1 Mosesi 6:5, 6; Ussatit 27:11) Iliuuserisatit Jehovamut sunniuteqartarput, taassumami ‘isumassorpaatit’. (1 Petrusi 5:7) Jehovap kissaatigaa oqaatsiminik tusarnaartarnissat, illit nammineq iluaqutigisinnaaniassagakku. (Esaja 48:17, 18) Itsaq Israelimi kiffami ilaasa siunnersuutini sumiginnarmatigit Jehova ‘aliasuppoq’. (Tussiaat 78:40, 1990) Pruffiitimilli Danielimik asanningaarpoq, inngilimmi taanna ‘Guutimit nuannarineqangaarnerarpaa’. (Danieli 10:11) Sooq? Danieli allanik peqateqartilluniinnaanngitsoq aammali kisimiitsilluni Guutimik ilumoorfiginnittuarmat. — Atuaruk Danieli 6:11.

17. Aliikkutassanik toqqaassagaangavit imminut qanoq aperisarsinnaavit?

¹⁷ Kisimiitsilluni Guutimik ilumoorfiginnittuarumalluni ‘paasinnissinnaassuseq eqqortumik eqqunngitsumillu immikkoortitsisinnaanissamut’ ineriartortittariaqarpoq taavalu piginnaaneq taanna eqqortuliortarnikkut sungiusarlugu. (Hebræerit 5:14, NV) Nipilersukkanik tusarnaagassannik, filminik isiginnaagassannik nittartakkanilluunniit alakkartigassannik toqqaassagaangavit eqqortumik aalajangertarnissat ajornannginnerutissavat imminut ima aperisaruit: Toqqagara misiginneqatiginninnerulissutigissavara, imaluunniit allat ‘ajunaarnerannik nuannaapiluuteqalissutigissavara’? (Ussatit 17:5) ‘Ajunngitsumik nuannarinninnissannut’ iluaqutigissavara, imaluunniit ‘ajortumik uumiginninniarninnut’ akornutaassava? (Amosi 5:15) Kisimiitsillutit sammisakkannit ersertarpoq suut illit pingaarnerpaatikkitit. — Lukasi 6:45.

18. Isertorluni eqqunngitsuliorsimagaanni susariaqarpa, aamma sooq?

¹⁸ Taavami isertorluni eqqunngitsuliorsimagaanni? Eqqaamajuk ‘unioqqutitsinerminik isertuisoq pilluaatissaqanngitsoq, ajortuliaminilli anngiiaatiginnittoq soraarussisorlu nallittorneqartussaasoq’. (Ussatit 28:13) Eqqunngitsuliortuarneq ‘Guutillu anersaavanik illernartumik aliasutsitsineq’ sianiitsuliornerungaassaaq. (Efesosimiut 4:30) Illit pisussaaffigaat eqqunngitsuliorsimaninnik Guutimut angajoqqaannullu nassuerutiginninnissat. Nassueruit aamma imminut iluaqutississaatit. Tamatumunnga tunngatillugu ‘ilagiit utoqqaanertaasa’ ikiungaatsiarsinnaavaatsit. Ajoqersugaq Jaaku ima allappoq: ‘Taakkua [unioqqutitsisoq] Jehovap aqqani uuliamik  tanissavaat qinnullugulu. Uppernikkut qinnutaasup napparsimasoq annaatissavaa, Jehovallu ajorunnaarsissavaa; ajortulisimagunilu isumakkeerfigineqassaaq.’ (Jaaku 5:14, 15) Ilumoorpoq nassuerneq kanngusunnarsinnaasoq immaqalu nuanniitsumik kinguneqarsinnaasoq. Ikioqqunissannulli sapiissuseqaruit suli annikilliornerunissat pinngitsoortissinnaavat ilerasuutaarunnerillu oqiliallaatigalugu. — Tussiaat 32:1-5.

Jehovap uummataa nuannaartiguk

19, 20. Jehovap sumik kissaappaatit, illilli nammineq suut iliuuserisariaqarpigit?

¹⁹ Jehova ‘Guutiuvoq pilluartoq’, illillu pilluarnissat kissaatigaa. (1 Timotheusi 1:11) Ilumoorluni soqutigaatit. Eqqortuliorniarlutit ilungersornerit allanit malugineqanngikkaluaraangalluunniit Guutip maluginiartarpaa. Jehova arajutsisaqarneq ajorpoq. Qimerloortarpaatit, kukkunersiorniarnatit, ajunngitsumilli iliorniarlutit ilungersorninni tapersersorniarlutit. “[Jehovap] nunarsuarmiittut tamaasa takusinnaavai uummatimikkut iluunngarlutik imminik tunaarinnittut pissaanermigut ikiorsinnaallugit.” — 2 Nalunaarsuutit 16:9.

²⁰ Taamaattumik Guutip oqaasianit siulersortigit tassanilu siunnersuutigineqartut malillugit. Taava ajornartorsiutivit ajugaaffiginissaannut inuunermilu silatusaartumik aalajangiinissamut pisariaqartitannik ilisimassuseqalerlutillu paasisimasaqassuseqalissaatit. Angajoqqaannut Jehovamullu nuannaarutaaginnarnak illit nammineq pilluarlutit inuulissaatit.

[Quppernerup ataani ilanngussat]

Qanoq akissavit?

• Meeqqat inuusuttullu angajoqqaamik malittarisassiaannik siunnersuutaannillu akuerinnikkumallutik iluaqutiginnikkumallutillu susinnaappat?

• Sooq aningaasanut oqimaaqatigiissumik isiginnittaaseqarnissaq pingaaruteqarpa?

• Qanoq ilillutit kisimiikkaluaraangavilluunniit Jehovamik ilumoorfiginnittuarsinnaavit?

[Atuaqqissaarnermi apeqqutit]

[Qupp. 13-mi assiliartaq]

Kisimiitsillutit Guutimik ilumoorfiginnittuassavit?