Jehova — Naalagarput kisimi oqartussaasoq!
Jehova — Naalagarput kisimi oqartussaasoq!
“[Jehova], Qutsinnerussaartoq, . . . nunarsuarmi tamarmi kunngi pissarsuaq.” — TUSSIAAT 47:3.
1. Paulusip 1 Korinthimiut 7:31mi allakkamini suna pigunarpaa?
“SILARSUARMI matumani pisartut allanngorarput.” Apustili Paulusi taama allappoq. (1 Korinthimiut 7:31, NV) Allassimaqqaarfiit naapertorlugit taassuma silarsuarmi pisartut isiginnaartitsivimmi pisartunut assersuukkunarpai, tassami isiginnaartitsisartut inuttaaffigisatik isiginnaartitsissutigisarpaat isiginnaartitsissummi immikkoortup allap aallartinnissaata tungaanut.
2, 3. (a) Jehovap kisimi oqartussaanerata unammillerneqarnera sumut assersuunneqarsinnaava? (b) Apeqqutit suut sammissavavut?
2 Ullumikkut silarsuaq tamakkerlugu ‘isiginnaartitsivimmi’ pisartut pingaaruteqarluinnarput — ilinnullu attuumassuteqarlutik! Pingaarnerpaamik Jehovap Guutip kisimi oqartussaaneranik qutsissisitsinermut tunngassuteqarput. Isiginnaartitsivimmi pisut nunat arlaanni pisunut assersuunneqarsinnaavoq. Nunami tamatumani inatsisitigut akuerisanik eqqissinermillu atuutsitsisunik naalakkersuisoqarpoq. Aammali pinerlunniaqatigeeqarpoq peqquserlunneq, nakuuserneq toqutsisarnerillu iluaqutigalugit sunniuteqartartunik. Pinerlunniaqatigiit inatsisinut akerliusut taakku nunami tamatumani naalakkersuisunut kisimi oqartussaasunut akornutaapput innuttaasullu tamarmik naalagaaffimmik tamatuminnga ilumoorfiginninnerannut misilinneqaataallutik.
3 Qilammi nunamilu tamatumunnga assingusumik pisoqarpoq. Kisimi oqartussaalluni Naalagaasoq Jehova taakkununnga inatsisitigut akuerisaasumik naalakkersuivoq. (Tussiaat 145:13) Inuilli pinerlunniaqatigiinnit ‘Ajortumit’ siulersorneqartunit navianartorsiortinneqarput. (1 Johannesi 5:19) Pinerlunniaqatigiit taakkua Guutip inatsisitigut akuerisaasumik naalakkersuinera unammillerpaat, aamma inuit tamarmik Guutip kisimi oqartussaalluni naalakkersuineranik ilumoorfiginninnerannut misilinneqaataapput. Pissutsit qanoq ilillutik taamaalisimappat? Sooq pissutsit taamaannissaat Guutip akueraa? Guutip naalakkersuineranik tapersersuiumalluta tamatta immikkut susinnaavugut?
‘Isiginnaartitsissut’ sumut tunngassuteqartoq
4. Imminnut attuumassutillit suut qilammi nunamilu ‘isiginnaartitsissutigineqartumut’ tunngassuteqarpat?
4 Qilammi nunamilu maanna ‘isiginnaartitsissutigineqartoq’ tamanna marlunnut imminnut attuumassutilinnut tunngassuteqarpoq: Jehovap kisimi oqartussaaneranut inuillu assuarnaassusiannut. Biibilimi Jehova “Qutsinnerussaartoq”mik taaneqarpoq. Assersuutigalugu tussiaasiortoq ima erinarsorpoq: “[Jehova] Qutsinnerussaartoq, . . . nunarsuarmi tamarmi kunngi pissarsuaq.” (Tussiaat 47:3) ‘Qutsinnerussaartuuneq’ kisimi oqartussaasuunertut paasisariaqarpoq. Jehovap Qutsinnerussaartutut isiginissaanut pissutissaqarluarpoq. — Danieli 7:22.
5. Sooq Jehovamik tapersersuilluinnarusuttariaqarpugut?
5 Jehova Guuti sunik tamanik pinngortitsisuugami qilammi nunarsuarmilu tamarmi Kisimi Oqartussaasuuvoq. (Atuaruk Saqqummersitat 4:11). Aamma Jehova Eqqartuussisigalugulu Naalakkersortigalugulu Kunngigaarput. (Esaja 33:22) Guuti pisariaqartilluinnaratsigu piunitsinnillu qutsavigisassarigatsigu Naalakkatsitut kisimi oqartussaasutut isigisariaqarparput. ‘Jehovap issiavissaarsuarminik qilammi aalajaatsumik inissiisimanera kunngisullu tamanut naalagaanera’ eqqaamajuarutsigu, tamanna taassuminnga tapersersuilluinnarnissamut kajumississutigissavarput. — Tussiaat 103:19; Apustilit Suliaat 4:24.
6. Assuarnaassuseq qanoq paasisariaqarpa?
6 Jehovap kisimi oqartussaaneranik tapersersuisinnaajumalluta taassumunnga assuarnaattuartariaqarpugut. “Assuarnaassuseq” tassaavoq ileqqussatigut peqqissuuneq, ileqqorissuuneq. Assuarnaatsoq peqqusersuitsuuvoq. Ataataanerpaaq Jobi taamaattuuvoq. — Jobi 1:1.
‘Isiginnaartitsissut’ qanoq aallartittoq
7, 8. Saatanip qanoq ililluni apeqquserpaa Jehovap kisimi oqartussaanera naapertuilluartuunersoq?
7 Ukiut 6000-it missiliorlugit matuma siorna pinngortitap anersaajusup apeqquserpaa Jehovap kisimi oqartussaanera naapertuilluartuunersoq. Pikitsitsisup taassuma oqaasiinut iliuusiinullu pissutaavoq pallorfigineqarnissaminik namminissarsiorluni kissaataa. Taassuma inuit aappariit siulliit, Adami Evalu, salloqittarpai Guutip kisimi oqartussaaneranik ilumoorfiginnikkunnaarsillugit, aamma Jehova sallunerarlugu taassuma aqqa tusaamanerlugaalersinniarsaraa. (Atuakkit 1 Mosesi 3:1-5). Pikitsitsisoq taanna akerlilersuisorsuanngorpoq, Saataninngorluni (akerlilersuisoq) Diaavulunngorlunilu (mamarliisoq), pulateriaarsunngorluni (uukapaatitsisoq) uumasorujussuanngorlunilu (iioraasoq). — Saqqummersitat 12:9.
8 Saatani unammillerluni imminut naalakkersuisunngortippoq. Kisimi oqartussaalluni Naalagaasoq Jehova taamatut unammillerneqarami qanoq iliussava? Pikitsitsisut pingasut — Saatani, Adami Evalu — ingerlaannaq suujunnaarsissavai? Suujunnaarsitsinissaminut pissaaneqarpoq, suujunnaarsitsineralu kia nukittunerpaaneranut erseqqissaataasimassagaluarpoq. Aamma inatsisiminik unioqqutitsinermut pillaammut tunngatillugu ilumoortumik oqalussimanini uppernarsarsimassagaluarpaa. Sooq Jehova suujunnaarsitsinngila?
9. Saatanip suut apeqquserpai?
9 Saatanip salloqittaagami aamma Adami Evalu Guutimik tunussitikkamigit Jehovap inunnit naalanneqarnissaminik piumasaqarsinnaatitaanera apeqquserpaa. Aamma Saatanip inuit aappariit siulliit Guutimut naalanngitsinnerisigut pinngortitat sianissusillit tamarmik ilumoorfiginninnerat apeqquserpaa. Soorlu Jobimut, Jehovap kisimi oqartussaaneranik ilumoorfiginnittumut, tunngatillugu ersertoq, Saatanip inuit tamaasa Guutimik tunussitissinnaanerarpai. — Jobi 2:1-5.
10. Guutip kisimi oqartussaanerminik qutsissisitsinngikkallarnermigut suut anguai?
10 Jehovap kisimi oqartussaanerminik qutsissisitsinngikkallarnermigut Saatani oqaatsiminik uppernarsaanissaanut piffissaqartippaa. Aamma Guutip inuit kisimi oqartussaanerminik ilumoorfiginninnerminnik uppernarsaanissaannut periarfissippai. Ukiuni hundredelinni qaangiuttuni qanoq pisoqarpa? Saatani pinerlunniaqatigiissuarnik ineriartortitsisimavoq, naggataatigulli Jehovap taakku Diaavululu nungutissavai taamalu kisimi oqartussaanini erseqqissumik qutsissisillugu. Jehovap Guutip tamatuma kinguneqarluarnissaa ima qularutiginngitsigaa Naatsiivimmi Edenimi pikitsitsinerup kingunitsianngua qanoq pisoqarumaarnera pillugu siulittuilluni. — 1 Mosesi 3:15.
11. Inuppassuit qanoq ilillutik Jehovap kisimi oqartussaaneranik qutsissisitseqataasimappat?
11 Inuppassuit uppernerminnik ersersitsillutillu assuarnaattuarsimapput, taamaalillutillu Jehovap kisimi oqartussaaneranik qutsissisitseqataasimapput aqqanillu illernarsisitseqataasimallutik. Taakkununnga ilaapput Abeli, Enoki, Noa, Aaperaat, Sara, Mosesi, Ruthi, Daavi, Jiisusi, kristumiut siulliit ullumikkullu inuit millionillit assuarnaattuartut. Taakku tamarmik Saatanip sallutuneranik uppernarsaaqataasimapput Diaavulullu pingaakujulluni inuit tamaasa Guutimik tunussisissinnaanerarneratigut taassuma aqqanik kanngunarsaaneranik piiaaqataasimallutik. — Ussatit 27:11.
Qanoq naassanersoq nalunanngilaq
12. Sooq qularutiginngilluinnarsinnaavarput Guutip ajussuseq naassaanngitsumik akueriinnarnavianngikkaa?
12 Jehovap kisimi oqartussaanerminik qanittukkut qutsissisitsiumaarnera qularutiginngilluinnarsinnaavarput. Ajussuseq naassaanngitsumik akueriinnarnavianngilaa, aamma nalunngilarput ulluni kingullerni inuulluta. Jehova Noap nalaani nunarsuarmut ulersuartitsigami ajortunut akuliuppoq. Sodomamik Gomorramillu aamma Faraomik taassumalu sakkutuuinik suujunnaarsitsivoq. Siserap taassumalu sakkutuuisa Sankeribilluunniit taassumalu sakkutuuisa Assyriamiut Qutsinnerussaartoq ajugaaffigisinnaanngilaat. (1 Mosesi 7:1, 23; 19:24, 25; 2 Mosesi 14:30, 31; Eqqartuussisut 4:15, 16; 2 Kunngit 19:35, 36) Taamaattumik qularutiginngilluinnarsinnaavarput Jehovap Guutip atermi nikanarsarneqarnissaa nalunaajaasumilu malersorneqarnissaat akueriinnartuarnavianngikkaa. Aamma Jiisusip najuunneranut pissutsillu aaqqissuussaanerata ajortup maanna atuuttup naggataatungaanut nalunaaqut maanna takusinnaavarput. — Matthæusi 24:3.
13. Qanoq ililluta Jehovamut akeraasunut ilanngulluta piuneerussaanaveersaarsinnaavugut?
13 Guutimut akeraasunut ilanngulluta piuneerussaajumanata Guutip kisimi oqartussaaneranik ilumoorfiginnittariaqarpugut. Qanoq ililluta? Saatanip peqquserlulluni naalakkersuineranik akuerinninnginnitsigut taassuminngalu illersuisut qunuginnginnerisigut. (Esaja 52:11; Johannesi 17:16; Apustilit Suliaat 5:29) Aatsaat Saatanip naalakkersuineranit avissaaqqajuarutta Jehovamik tapersersuisinnaavugut taassumanngalu asattuunneqarnissarput neriuutigisinnaallugu taassuma aqqi mitaatigineqarsimanermit minguiarluinnarpagu qilammilu nunamilu kisimi oqartussaanini qutsissisippagu.
14. Biibilip immikkoortuini assigiinngitsuni suut paasinarsisinneqarpat?
14 Biibilimi allaatigineqarajuppoq inuit Jehovap kisimi oqartussaaneranik qanoq isiginninnerat. Biibilimi kapitalini siullerni pingasuni pinngortitsineq ajortilinngornerlu allaatigineqarput, kapitalini kingullerni pingasuni inuiaat pilerseqqinneqarnerat allaatigineqartoq. Quppernerni taakkua akornanniittuni kisimi oqartussaalluni Naalagaasup Jehovap inunnut, nunarsuarmut qilammullu siunertani naammassiniarlugu iliuuserisimasai sukumiisumik allaatigineqarput. Mosesimik allakkani siullerni ersersinneqarpoq Saatani ajussuserlu suminngaanneersuunersut, Saqqummersitallu naggataatungaanni ersersinneqarpoq ajortut qanoq peerneqassasut, Diaavulu qanoq suujunnaarsinneqassasoq Guutillu piumasaa nunarsuarmi qilammisut qanoq pissasoq. Aap, Biibilimi paasinarsisinneqarpoq ajortimut toqumullu suna pissutaanersoq taakkulu ‘isiginnaartitsivimmit’ nunarsuarmiittumit qanoq peerneqarumaarnersut. Allaatigineqarpoq taakku nunguppata assuarnaattuartut nuannaartualersinnaallutillu naassaanngitsumik inuusinnaalerumaartut!
15. Kisimi oqartussaassuseq pillugu isiginnaartitsissutip naannginnerani nammineq susariaqarpugut?
15 Silarsuarmi matumani pisartunut tunngatillugu qanittukkut allanngorluinnartoqassaaq. Qilammi nunamilu kisimi oqartussaassuseq pillugu ‘isiginnaartitsissut’ ukiut tusindillit matuma siorna aallartittoq naassaaq. Saatani ‘isiginnaartitsivimmit’ peerneqassaaq naggataatigut suujunnaarsilluinnarneqartussaalluni, Guutillu piumasaa pinngitsoorani pissaaq. Pilluaqqussuterpassuilli Guutip oqaasiani siulittuutigineqartut nuannaarutigisinnaajumallugit Jehova maannakkut nangaassuteqarata tapersersortariaqarparput. ‘Jehovamit najorneqarnerarsinnaajumalluta’ taanna tapersersortuartariaqarparput. — Tussiaat 118:6, 7.
Assuarnaattuarsinnaavugut
16. Sooq qularutiginngilluinnarsinnaavarput inuit Guutimut assuarnaattuarsinnaasut?
16 Assuarnaattuarsinnaallutalu Jehovap kisimi oqartussaaneranik qutsissisitseqataasinnaavugut, apustilimi Paulusi ima allappoq: “Usserneqaatigisimasasi inuit atortagaattut iinnarput, Guutilu unneqqarippoq; akuersaarumanngilaa artukkassinnik usserneqarnissarsi, kisianni usserneqarnermut ilagitillugu aniguiffissaq pilersissavaa artorsartitaaqqunasi.” (1 Korinthimiut 10:13) Sumit-una usserneqarneq Paulusip pigaa, aamma Guuti qanoq ililluni aniguiffissatsinnik pilersitsissava?
17-19. (a) Israelikkut ussernartut suut inoqajuitsumi nakkaannarfigaat? (b) Sooq uagut Jehovamut assuarnaattuarsinnaavugut?
17 Soorlu Israelikkut inoqajuitsumi misigisaannit ersertoq, ulluinnarni inuunermi ussernartoqalertarpoq. (Atuakkit 1 Korinthimiut 10:6-8, 10). Israelikkut ussernartoq akiorsimasinnaagaluarpaat, taakkuli ‘pilerissusipiloqarmata’ Jehovap tupinnartuliornikkut aqissiusarsuarnik qaammammut ataatsimut naammattunik pilersorpai. Piffissami sivisujaami neqitorsimanngillat, Guutilli mannanik naammattunik nerisassaqartippai. Piumatullutilli imminullu naalakkersinnaanatik aqissiusarsuarnik katersuersuaarnissamut ussernartumut nakkaannarput. — 4 Mosesi 11:19, 20, 31-35.
18 Mosesi siusinnerusukkut Inatsisit piniarlugit qaqqami Sinajimiimmat Israelikkut guutipilussiortunngorput nersuteeraasaliorlutik uinngullu pilerigisaanik malinniinnarlutik. Siulersuisortik takussaasoq najuutinngeriarmat imminut nangartaratik ussernartumut nakkaannarput. (2 Mosesi 32:1, 6) Israelikkut nunamut neriorsuutigisamut isinngitsiartut taakkua ilaat tusindillit Moabikkut arnartaannit tammartitaapput taakkuninngalu kinguaassiuutitigut inuunerloqateqarlutik. Israelikkut tusindillit taamatut ajortuliornertik pissutigalugu toqupput. (4 Mosesi 25:1, 9) Israelikkut naammagittaalliornissamut pikitsitsinissamullu ussernartumut ilaannikkut nakkaannartarput. Ilaanni Mosesiinnaanngitsoq aammali Guuti oqalorujuffigaat! (4 Mosesi 21:5) Allaat Israelikkut Korap, Datanip, Abiramip taakkununngalu ilaliuttut suujunnaarsitaanerata kingorna naammagittaalliorput, pikitsitsisut pillarneqarnerat naapertuilluanngitsuunerarlugu, uffa taamaanngitsoq. Tamatuma kingunerisaanik 14.700-t Guuti perlutsitsimmat toqupput. — 4 Mosesi 17:6, 14.
19 Ussernartut eqqaaneqartut tamaasa Israelikkut akiorsinnaasimagaluarpaat. Israelikkut ussernartunut nakkaannarput upperunnaaramik aamma Jehova, taassuma asannittumik isumassuinera taassumalu aqqutaasa eqqortuaannarnerat puioramikku. Uagut usserneqaatigisartakkavut inuit tamarmik usserneqaatigisinnaavaat, soorlu Israelikkunnut tunngatillugu aamma taamaattoq. Taakku akiorniarlugit iliuuserisariaqakkavut iliuuserigutsigit Guutillu uagutsinnik annertoqqusersuinissaa upperigutsigu assuarnaattuarsinnaavugut. Tamanna qularinngilluinnarsinnaavarput, ‘Guutimi unneqqarippoq, akuersaarnavianngilaalu artukkatsinnik usserneqarnissarput’. Jehovap imminiiginnanngisaannassavaatigut, aamma pissutsit atukkavut pissutigalugit piumasamisut iliornissatsinnik ajornartitsilernissarput akuerinavianngilaa. — Tussiaat 94:14.
20, 21. Ussernartorsioraangatta Jehova qanoq ‘aniguiffissatsinnik’ pilersitsisarpa?
20 Jehova ‘aniguiffissatsinnik pilersitsissaaq’ ussernartunik akiuinissamut nakussatsilluta. Assersuutigalugu uagutsinnik malersuisut timikkut naalliutsissinnaavaatigut upperisatsinnik tunussitikkumalluta. Taamatut naalliutsinneqarnerput immaqa aalajangiusimasatsinnik qasukkartitsinissamut ussernartorsiulissutigisinnaavarput, unatarneqarumanata, anniartinneqarumanata immaqaluunniit toqutaajumanata. Paulusilli Korinthimiunut allakkat siulliit 10:13-imi neriorsuutaa isumassarsiarititaasoq tunngavigalugu nalunngilarput ussernartoq atuukkallaannartartoq. Jehovap imminut aalajaattuarunnaassutigisinnaasatsinnik atugaqalernissarput akuerinavianngilaa. Guutip assuarnaattuarsinnaaniassagatta uppernikkut anersaakkullu pisariaqartitatsinnik nakussatsissinnaavaatigut.
21 Jehovap anersaani illernartoq iluaqutigalugu annertoqqusersortarpaatigut. Aamma anersaaq taanna aqqutigalugu Biibilimut tunngasunik, ussernartunik akiuissagaangatta pisariaqartitatsinnik, eqqaasinneqartarpugut. (Johannesi 14:26) Tamatuma kingunerisaanik eqqunngitsuliornissamut tammartitaaneq ajorpugut. Assersuutigalugu Jehovap kisimi oqartussaaneranut tunngasunik assuarnaattuarnissattalu pingaaruteqassusianik paasinnilluarpugut. Inuppassuit tamakkuninnga ilisimasaqaramik Guutimit annertoqqusersorneqarsimapput taamaalillutillu toqumut allaat aalajaattuarsimallutik. Imaanngilarli toqu aniguiffissarisimagaat; Jehovamuna ikiuineratigut ussernartumut nakkaannarnatik toqumut allaat aalajaassinnaanngortut. Aamma uagut taamatut ikiorsinnaavaatigut. Aamma inngilini uagut iluaqutissatsinnut atortarpai, “inngilimmi tamarmik tassaaginnarput anersaat kiffartortut, aallartitaasartut annassummik kingornussisussat ikioqqullugit”. (Hebræerit 1:14) Soorlu allaaserisami tulliuttumi ersersinneqarumaartoq, assuarnaattuartut kisimik Guutip kisimi oqartussaaneranik naassaanngitsumik qutsissisitseqataaneq nuannaarutigalugulu immikkut pisinnaatitaaffigissavaat. Uagut taakkununnga ilaasinnaavugut Jehova Naalakkatsitut kisimi oqartussaasutut tapersersortuarutsigu.
Qanoq akissavit?
• Sooq Jehova Naalakkatsitut kisimi oqartussaasutut akuerisariaqarparput?
• Guutimut assuarnaattuarneq qanoq paasisariaqarpa?
• Qanoq ililluta nalunngilarput Jehova kisimi oqartussaanerminik qanittukkut qutsissisitsiumaartoq?
• 1 Korinthimiut 10:13 naapertorlugu sooq assuarnaattuartoqarsinnaava?
[Atuaqqissaarnermi apeqqutit]
[Qupp. 24-mi assiliartaq]
Saatanip Adami Evalu Jehovamik ilumoorfiginnikkunnaarsippai
[Qupp. 26-mi assiliartaq]
Jehovamik tapersersuinissat aalajangiusimajuk