“Maanna nalliuppoq ulloq saammaassivik”

“Tassa maanna nalliuppoq ulloq saammaassivik, maanna nalliuppoq ulloq annaassivik!” — 2 KORINTHIMIUT 6:2.

1. Sooq piffissami aalajangersimasumi suliassat suut pingaarnerpaanerannik naliliisinnaasariaqarpugut?

“SUUT tamarmik aalajangersimasumik piffissaligaapput, qilaammi ataani pisartunut tamanut piffissaq aalajangersimasuusarpoq.” (Oqaluussisartup oqaasii 3:1) Salomop allaatigaa qaqugukkut iliuuseqarnissap — assersuutigalugu naggorissaanissap, niuernissap, angalanissap allanillu oqaloqateqarnissap — piffissaalluarnerpaaneranik naliliisinnaaneq qanoq pingaaruteqartigisoq. Aammali piffissami aalajangersimasumi suliassat suut pingaarnerpaanerannik naliliisinnaasariaqarpugut. Allatut oqaatigalugu, eqqortumik pingaarnersiuisariaqarpugut.

2. Qanoq nalunngilarput Jiisusip nunarsuarmiikkallarami piffissap nukinginnassusia eqqumaffigilluinnaraa?

² Jiisusip nunarsuarmiikkallarami piffissap nukinginnassusia aamma qanoq iliuuseqassanerluni eqqumaffigilluinnarpaa. Nalunngilluinnarpaa inuunermini suna pingaarnerpaanersoq Missiarsilu pillugu siulittuuterpassuit eqquutitinnissaannut kiisami piffissanngortoq. (1 Petrusi 1:11; Saqqummersitat 19:10) Jiisusip nammineq Missiarsiulluni neriorsuutigisaasoq inunnut ilisimalersittussaavaa. Guutip naalagaaffia pillugu sallusuissummik peqqissaartumik nalunaajaasussaavoq Guutillu naalagaaffiani kingornusseqatissani katersortussaallugit.  Aamma ilagiinnik kristumiunik oqaluussinermik ajoqersuganngortitsiortornermillu nunarsuup isua tikillugu allaat suliaqartussanik tunngaviliisussaavoq. — Markusi 1:15.

3. Jiisusip piffissap nukinginnassusianik eqqumaffiginninnini sunissamut kajumississutigaa?

³ Jiisusip piffissap nukinginnassusianik eqqumaffiginninni iluaqutigingaarpaa Ataatami piumasaatut aallussilluarluni iliornissaminut kajumississutigigamiuk. Ajoqersukkani ima oqarfigai: “Katersugassat amerlaqaat sulisussalli ikittuinnaallutik. Taamaattumik katersuinermi naalagaasoq qinnuigisiuk katersuinermi sulisussanik aallartitseqqullugu.” (Lukasi 10:2; Malaki 3:23, 24) Jiisusip aqqaneq-marluk toqqaqqaarpai, kingusinnerukkullu 70-it toqqarpai. Ilitsersoqqissaareerlugit aallartippai tusarliusassaq nuannerluinnartoq una tusarliuteqqullugu: “Qilaap Naalagaaffia qanillivoq!” Jiisusilu pillugu ima allassimavoq: “Ajoqersukkaminut aqqaneq-marlunnut taama peqqusereerami tassannga aallarpoq illoqarfiini ajoqersuiumalluni oqaluussiumallunilu.” — Matthæusi 10:5-7; 11:1; Lukasi 10:1, 1936.

4. Paulusip Jiisusi Kristusi qanoq ilaarpaa?

⁴ Jiisusi aallussilluarnermut tunniusimanermullu tunngatillugu ajoqersukkaminut tamanut maligassaavoq naammalluinnartoq. Tamannaana Apustilip Paulusip pigaa uppeqatini ima kajumissaaramigit: “Uannik ilaarsisunngoritsi, soorluttaaq uanga Kristusi ilaariga.” (1 Korinthimiut 11:1, NV) Paulusip Kristusi qanoq ilaarpaa? Pingaarnerpaamik nutaarsiassamik nuannersumik sapinngisani tamaat oqaluussissutiginninnermigut. Paulusip ilagiinnut allagaani allassimasut soorlu imaattut atuarsinnaavavut: “Ilungersoritsi nangaassuteqarnasi.” “[Jehova] kiffartorfigisiuk.” “Tamaviaarlusi Naalagaq kiffartuussiuk.” Aamma: “Qanorluunniit iliorussi taamaaliortaritsi uummammit pisumik — [Jehovamut].” (Romamiut 12:11; 1 Korinthimiut 15:58; Kolossemiut 3:23) Paulusip puiunngisaannarpai Damaskusiliartilluni pisimasoq Jiisusillu oqaasii ajoqersukkap Ananiap issuagai uku: “[Taannaavoq] qinersimasara sakkugiumallugu aterma saqqummiunneqarnissaanut Guutimik nalusunut, kunnginut Israelillu kinguaavinut.” — Apustilit Suliaat 9:15; Romamiut 1:1, 5; Galatiamiut 1:16.

“Ulloq saammaassivik”

5. Paulusip aallussilluarluni oqaluussinerminut suna kajumississutigaa?

⁵ Apustilit Suliaat atuaraanni erseqqippoq Paulusi oqaluussinermini sapiitsuullunilu aallussilluartuusoq. (Apustilit Suliaat 13:9, 10; 17:16, 17; 18:5) Paulusip piffissap inuuffigisami qanoq pingaaruteqartiginera paasilluarsimavaa. Ima allappoq: “Tassa maanna nalliuppoq ulloq saammaassivik, maanna nalliuppoq ulloq annaassivik!” (2 Korinthimiut 6:2) Ukiumi 537-mi Kr.in.si. Babylonimut aallarunneqarsimasut nunaminnut uternerat ‘saammaassiviuvoq’. (Esaja 49:8, 9) Paulusilliuna suna pigaa? Versit ataqatigiinnerinik misissueqqissaarnikkut suna pineraa paasisinnaavarput.

6, 7. Ullumikkut kristumiunut tanitanut ataqqinaataasoq suna suliassiissutigineqarpa, kikkullu kristumiut tanitat suleqatigaat?

⁶ Paulusip siusinnerusukkut allakkamini nammineq uppeqatimilu tanitat ataqqineqangaarsimanertik eqqartorpaa. (Atuakkit 2 Korinthimiut 5:18-20). Nassuiarpaa taakku aalajangersimasoq siunertaralugu Guutimit kiffartortussanngortinneqarsimasut, tassa ‘saammaannartitaanerup piinik kiffartuut’ suliarissallugulu inuit qinnuigissagaat Guutimut saammaannarteqqullugit. ‘Guutimullu saammaannartinneq’ taassuminnga ikinnguteqaqqilernertut eqqisseqateqaqqilernertullu paasisariaqarpoq.

⁷ Naatsiivimmi Edenimi pikitsitsinerup kingorna inuiaat Jehovamit ungasilliartuinnarput  taassumunngalu takornartanngorsimallutik. (Romamiut 3:10, 23) Taamaattumik inuiaat ataatsimut isigalugit anersaakkut taarsiorput, tamannalu naalliuutinik toqumillu kinguneqarpoq. Paulusi ima allappoq: “[Nalunngilarput] pinngortitat tamarmik suli peqatigiillutik anersaarulullutillu nimaartut.” (Romamiut 8:22) Guutilli kiffani nunarsuarmiittut aqqutigalugit inuit qinnuigai imminut uteqqullugit saammaannarteqqullugillu. Paulusimut kristumiunullu tanitanut allanut kiffartuut tamanna suliassiissutigineqarsimavoq. “Saammaassivik” tamanna Jiisusimik upperinnilersunut tassaalersinnaavoq “ulloq annaassivik”. Kristumiut tanitat tamarmik taakkualu suleqataasa, ‘savat allat’, inuit ‘saammaassivimmik’ iluaqutiginninnissaannut kajumissaartuarpaat. — Johannesi 10:16.

8. Sooq Guutimut saammaannartinnissamik kajumissaarut taama maluginiarnartigaa?

⁸ Guutimut saammaannartinnissamik kajumissaarut maluginiarnarpoq Guutip inuit imminit avissaarnerat iluarsiniarlugu iliuuseqaqqaartuunera inuit kisimik, Edenimi pikitsitsinertik pissutigalugu, avissaarneq pisuussutigigaluaraat. (1 Johannesi 4:10, 19) Guuti qanoq iliorpa? Paulusi ima allappoq: “Guuti Kristusimi silarsuarmik [saammannartitsivoq] unioqqutitsinerinillu pisuutinnagit, tatigalutali saammaannartitaanermik oqaaseq uatsinniitilerlugu”. — 2 Korinthimiut 5:19; Esaja 55:6.

9. Paulusip qanoq ersersippaa Guutip nallittuinera pingaartillugu?

⁹ Jehovap utertitsissutitut pilliummik pilersitsinermigut uppertut unioqqutitsinerannit isumakkeerfigineqarsinnaanngortillugillu imminik ikinnguteqarsinnaanngortippai. Aammattaaq aallartitani ‘inunnik tamalaanik’ (versi 4, NV) kajumissaarisippai periarfissaqarallartillugit imminik eqqisseqateqalernissaannut. (Atuakkit 1 Timotheusi 2:3-6). Paulusip Guutip piumasaa ilisimallugulu piffissap pingaaruteqassusia eqqumaffigigamiuk ‘saammaannartitaanerup piinik kiffaartuummi’ qasusuilluni tamaviaarpoq. Jehovap piumasaa allanngorsimanngilaq. Aamma ullumikkut Guutimik eqqisseqateqalernissamut periarfissaqarpoq. Paulusip oqaasii uku suli atuupput: “Maanna nalliuppoq ulloq saammaassivik,” aamma “maanna nalliuppoq ulloq annaassivik”. Jehova ilumut Guutiuvoq nallittuillunilu misiginneqataasoq! — 2 Mosesi 34:6, 7.

Illit ‘Guutip saammaanneranik pissarsiannik maangaannartitseqinak’

10. Itsaq ullumikkullu tanitat “ulloq annaassivik” qanoq atorluarsimavaat?

¹⁰ ‘Kristusimiittut’, imaluunniit Kristumiut tanitat, Guutip ajunngisaarneranut pisassarinngisaraluamut ersiutaasoq tamanna siulliullutik iluaqutigaat. (2 Korinthimiut 5:17, 18) Taakkununnga “ulloq annaassivik” ukiumi 33-mi piinsip ulluani aallartippoq. Taamanimiilli ‘saammaannartitaanermik oqaatsip’ oqaluussissutiginera taakkununnga suliassiissutigineqarsimavoq. Ullumikkut Kristumiut tanitat kinguleruttut ‘saammaannartitaanerup piinik kiffartuut’ suli suliaraat. Paasivaat inngilit sisamat apustilip Johannesip takorruukkami siulittuutaasumi takusaata ‘nunarsuup anorai sisamat noqikkaat nuna anorlerfigineqaqqunagu’. Tassa suli ‘ulluuvoq annaassivik’ ‘saammaassivillu’. (Saqqummersitat 7:1-3) Taamaattumik tanitat kinguleruttut 1900-kkut aallartinneranniilli ‘saammaannartitaanerup piinik kiffartuut’ aallussilluarlutik ulapputigaat nunarsuup isua tikillugu.

11, 12. 1900-kkut aallartinneranni tanitat qanoq ersersippaat piffissap nukinginnassusianik eqqumaffiginnillutik? (Asseq qupp. 21-miittoq takuuk).

¹¹ Assersuutigalugu atuakkami Jehovas Vidner — forkyndere af Guds rige *-mi ima allassimavoq: “C.T. Russellip suleqataasalu [1800-kkut naalerneranni] qularutiginngilluinnarpaat katersuiffiup nalaani inuullutik inuillu sallusuissut inussiaajunnaarsitsisussaq tusartariaqaraat.” Qanoq iliorpat? Qatanngutit taakkua paasigamikku katersuiffiup, imaluunniit ‘saammaassiviup’, nalaani inuullutik inunnik naalagiartitsinermut qaaqqussinissartik naammagiinnanngilaat. Kristumiuunerartut palasiisa tamanna qangalili ileqqorisimavaat. Kristumiulli tanitat taakku nutaarsiassaq nuannersoq siaruarterniarlugu atorluarsinnaasunik periarfissarsiulerput. Oqaluussineq siuarsarniarlugu taamanikkut teknologii nutaanerpaaq atorluarpaat.

 ¹² Guutip naalagaaffia pillugu nutaarsiassaq nuannersoq tusarliukkumallugu eqimattat ikittunnguit aallussilluarlutik oqaluussisartut taakkua naqitaaqqat, atuagassiaaqqat, atuagassiat aamma atuakkat atortarpaat. Aamma oqaluutsit allaaserisallu suliarisarpaat aviisini tusindilinni saqqummiunneqartussat. Nuna tamakkerlugu nunanilu assigiinngitsuni radiukkut Biibilimut tunngasunik aallakaatitsisarput. Tulluarsakkanik nipitalersukkamik filmiliorput taannalu takutittarlugu, taamanikkut filmiliortartut filminik taama ittunik kikkunnut tamanut suli takutitsisalinngitsulluunniit. Qasusuilluni aallussilluarneq tamanna qanoq kinguneqarpa? Ullumikkut inuit 7 millionit missaanniittut ‘Guutimut saammaannartinnissamik’ tusarliussaq ajunngitsumik periarfigaat, tusarliussamillu tamatuminnga oqaluussissutiginnillutik. Aap, Jehovamut kiffaasut eqqaariikkavut misilittagakikkaluarlutik ikikkaluarlutillu aallussilluarnermut tunngatillugu maligassaalluarput.

13. Guutip siunertaa suna pimooruttariaqarparput?

¹³ Paulusip oqaasii uku suli atuupput: “Maanna nalliuppoq ulloq saammaassivik.” Jehovap ajunngisaarneranik pisassarinngisaraluamik misigisaqarsimagatta Guutimut saammaannartinnissamik tusarsimallutalu ajunngitsumik periarnerput nuannaarutigaarput. Saammaanneqarnissarput naammagiinnarnagu Paulusip oqaasii uku pimooruppavut: “Oqaaqqissaarpassi Guutip saammaannera pissarsiarsi maangaannarteqqunagu.” (2 Korinthimiut 6:1) Guutip ajunngisaarnerata pisassarinngisaraluap siunertaa tassaavoq Kristusi aqqutigalugu Guuti ‘silarsuarmik saammaannartitsissasoq’. — 2 Korinthimiut 5:19.

14. Nunani amerlasuuni qanoq pisoqartarpa?

¹⁴ Inuiaat amerlanersaat Saatanimit tappiillisinneqarsimapput, taamaattumillu Guutimut takornatanngorsimallutik aamma taassuma ajunngisaarnerata pisassarinngisaraluap siunertaa naluaat. (2 Korinthimiut 4:3, 4; 1 Johannesi 5:19) Silarsuarmi pissutsit ajorseriarsimanerat pissutigalugu inuppassuit Guutimit ungasillisimaneq ajussuseqarneranut naalliunnartoqarneranullu pissutaasoq nassuiaanneqaraangamik ajunngitsumik periartarput. Allaat nunani tusarliussatsinnik soqutigisaqanngiffiusimasuni inuppassuit nutaarsiassamik nuannersumik tusarumanerulertarput Guutimullu saammaannartinnissartik iliuuseqarfigilerlugu. Uagummi ‘Guutimut saammaannartinnissamut’ kajumissaarummik kimittuumik aallussilluarnerulluta oqaluussissutiginninnissamut maanna piffissanngortoq paasivarput?

15. Inuit tusarusutaannaannik oqaluussinata taakkua tamarmik suna paasissagaat kissaatigaarput?

 ¹⁵ Inuit Guutimut saakkunik ajornartorsiutiminnik ikiorneqarsinnaanerannik iluaallakkumaarnerannillu oqaluttuutiinnartussaanngilavut. Upperisarsioqatigiippassuilli inuit tusarusutaat tusarliukkusuttarpaat, tamannaannarli pissutigalugu naalagiartartoqartarpoq. (2 Timotheusi 4:3, 4) Kiffartornerput pingaaruteqarnerusumik siunertaqarpoq. Nutaarsiassaq nuannersoq oqaluussissutigisarput tassaavoq Jehova asanninnini pissutigalugu unioqqutitsinernik isumakkeerfiginnikkumasoq Kristusi aqqutigalugu. Tassa inuit Guutimut takornataajunnaarsinnaapput taassumanngalu saammaannartitaallutik. (Romamiut 5:10; 8:32) ‘Ullorli saammaassivik’ naangajalerpoq.

“Anersaakkut tamaviaaritsi”

16. Paulusip sapiissuseqarnissaminut aallussilluarnissaminullu suna iluaqutigaa?

¹⁶ Qanormi ililluta pallorfiginninnermik ilumoortumik aallussilluarnerput ineriartortissinnaallugulu aallussilluartuarsinnaavugut? Imaassinnaavoq ilaat ittoortuullutillu tunuarsimaartuusut misigissutsiminnillu ersersitsinissamik allanillu oqaloqateqarnissamik sapernartitsisut. Pitsaassaarli eqqaamassallugu aallussilluarneq taamaallaat misigissutsikkut angorniornikkullu ersersinneqarneq ajortoq aamma inuttut pissutsimut aalajangersimasumut aalajangiisuunngitsoq. Paulusip oqaasiinit erserpoq suna aallussillualissutaasartoq uppeqatini ima kajumissaarmagit: “Anersaakkut tamaviaaritsi.” (Romamiut 12:11) Paulusip Jehovap anersaava oqaluussinermini sapiissuseqarnerminut pinertusaarnerminullu iluaqutigingaarpaa. Ukiuni 30-nit amerlanerusuni — Jiisusimit qaaqquneqarnerminit naggammik parnaarunneqarnini Romamilu toqutaanini tikillugu — Paulusi aallussilluartuaannarpoq. Paulusip Guuti tatigiuarpaa, taassumami anersaani aqqutigalugu pisariaqartitaanik nakussatsittarpaa. Paulusi ima allappoq: “Tamaasa pissatsitsisikkut atussallugit sapinngilakka.” (Filippimiut 4:13) Maligassiuinera ilinniarfigalugu iluaqutigingaarsinnaavarput!

17. Qanoq ililluta ‘anersaakkut tamaviaarsinnaavugut’?

¹⁷ Apustilip Paulusip Romamiunut allakkamini 12:11-mi oqaaseq grækerisooq toqqaannartumik nutserlugu “qalaartoq”-mik isumaqartoq atorpaa. (Kingdom Interlinear) Imeq uunnaavimmi qalaartittuassagaanni kissarsuut ikumajuartariaqarpoq. Taamatuttaaq ‘anersaakkut tamaviaarniarluta’ Guutip anersaava pisariaqartittuarparput. Anersaaq tamanna piumallugu Jehovap pilersitaanik tamanik anersaakkut nakussatsissutaasunik atorluaasariaqarpugut. Allatut oqaatigalugu ilaqutariinni ilagiinnilu pallorfiginninnerput pimooruttariaqarparput aalajangiusimannilluta nammineq ilaqutariittullu atuaqqissaaqatigiittarnitsigut, qinujuartarnitsigut kristumioqatitsinnillu peqateqartuartarnitsigut. Jehovap pilersitai taakku iluaqutigigutsigit ‘anersaakkut tamaviaarsinnaavugut’, soorlu kissarsuut ikumasoq iluaqutigalugu imeq uunnaavimmi qalaarsinnaasoq. — Atuakkit Apustilit Suliaat 4:20; 18:25.

18. Kristumiuugatta Guutimut tunniulluinnarsimasut suna anguniagariuartariaqarparput?

¹⁸ Inuk anguniagassamik aalajangersimasumik angusinissamut tunniulluinnarsimasoq allamut saasarneqariaannaananilu taamaatitseriaannaanngilaq. Kristumiuugatta Guutimut tunniulluinnarsimasut Jehova qanorluunniit uagutsinnut piumasaqaraluartoq taassuma piumasaa malillugu iliortuaannarnissaq — Jiisusip iliorsimaneratut — anguniagaraarput. (Hebræerit 10:7) Ullumikkut Jehovap piumasaa tassaavoq inuit sapinngisamik amerlanerpaartaasa imminut saammaannartinneqarnissaat. Taamaattumik Jiisusi Paulusilu ilaarlugit ullumikkut suliassamut tamatumunnga pingaanerpaamut nukinginnarnerpaamullu aallussilluarluta peqataasa.

[Quppernerup ataani ilanngussaq]

Eqqaamavigit?

• ‘Saammaannartitaanerup piinik kiffartuut’ Paulusimut kristumiunullu tanitanut allanut suliassiissutigineqartoq suua?

• Tanitat kinguleruttut qanoq “ulloq saammaassivik” atorluarsimavaat?

• Oqaluussisartut kristumiut qanoq ilillutik ‘anersaakkut tamaviaarsinnaappat’?

[Atuaqqissaarnermi apeqqutit]

[Qupp. 19-mi assiliartaq]

Paulusip puiunngisaannarpaa Damaskusiliartilluni pisimasoq