Aappaqanngitsutut periarfissatit atorluakkit

“Taamaaliorsinnaasoq taamaaliorli.” — MATTHÆUSI 19:12, NV.

1, 2. (a) Jiisusip, Paulusip allallu aappaqanngitsuuneq qanoq isigaat? (b) Sooq ilaasa aappaqanngitsuunerup tunissutisiatut isiginissaa ajornakusoortittarpaat?

AAPPARIINNEQ qularnanngitsumik tassaavoq Guutip inuiannut tunissutaasa erlinnarnerpaat ilaat. (Ussatit 19:14) Aammali kisimiittut ilarpassui pilluarlutik nalerisimaarlutillu inuupput. Harold, qatanngut angut 95-inik ukiulik aappanissimanngisaannartoq, ima oqarpoq: “Allanik peqateqartarneq inoroorsaartarnerlu nuannarisarpara, kisimiikkaangamali kiserliunngisaannarpunga. Qularnanga oqarsinnaavunga aappaqanngitsuuneq uannut tunissutaasoq.”

² Jiisusip Kristusip apustilillu Paulusip aappaqanngitsuuneq eqqartorpaat. Paulusip allaat aappaqanngitsuuneq Guutimit tunissutisiatut eqqartorpaa, soorluttaaq aappariinneq taamatut eqqartorneqartoq. (Atuakkit Matthæusi 19:11, 12; 1 Korinthimiut 7:7). Imaanngilarli kisimiittut tamarmik kisimiittoorusukkamik kisimiittuusut. Ilaannikkut pissutsit atukkat pissutaallutik piukkunnartumik aappassarsinissaq ajornakusoortarpoq. Imaluunniit ilaat ukiorpassuarni aappaqareerlutik kisimiileriasaartarput avinneq aappalluunniit toqunera pissutigalugu. Taava sooq oqartoqarsinnaava aappaqanngitsuuneq tunissutaasoq? Kristumiullu kisimiittut aappaqanngitsuunertik qanoq atorluarsinnaavaat?

Tunissutisiaq asseqanngilluinnartoq

3. Aappaqanngitsuuneq sunik iluaqutissartaqartarpa?

³ Kisimiittoq amerlanertigut aappalimminngarnit piffissaqarnerusarlunilu inuttut kiffaanngissuseqarnerusarpoq. (1 Korinthimiut 7:32-35) Aappaqanngitsut taamatut asseqanngitsumik periarfissaqarnerugamik oqaluussinermi iliuuseqarnerusinnaapput, asannittuliornermut tunngatillugu ‘ammarsinnaapput’ Jehovamullu attaveqarluarnerulersinnaallutik. Taamaattumik kristumiut ilaasa aappaqanngitsuunerup iluaqutissartai takusinnaalersimavaat aalajangersimallutillu piffissap ilaannaaniluunniit aappaqanngitsuuniarlutik. Allat aallaqqaammut aappaqanngitsuunissamik siunertaqarsimanngitsut pissutsit atukkatik allanngormata qinunikkut tamanna eqqarsaatigisimavaat. Paasisimavaat Jehovap ikiuineratigut atukkatik akuerisinnaallugit aappaqanngitsuunissartillu aalajangiusimasinnaallugu. — 1 Korinthimiut 7:37, 38.

4. Sooq kristumiut aappaqanngitsut Jehovamit taassumalu peqatigiissortaanit pingaartinneqartutut misiginissamut pissutissaqarluarpat?

⁴ Kristumiut kisimiittut nalunngilaat Jehovamit taassumalu peqatigiissortaanit pingaartinneqarumallutik aappartaartariaqarnatik. Guutip tamatta immikkut asavaatigut. (Matthæusi 10:29-31) Suulluunniit kialuunniillu Guutip asanninneranit avissaartissinnaanngilaatigut. (Romamiut 8:38, 39) Aappaqaraanni aappaqanngikkaluaraanniluunniit Jehovamit taassumalu peqatigiissortaanit pingaartinneqartutut misiginissamut pissutissaqarluarpoq.

5. Aappaqarnani inuuneq tamakkiisumik pissarsiffigiumallugu sunissaq pisariaqarpa?

⁵ Soorlu tunissutisianut allanut, assersuutigalugu nipilersornikkut timersornikkulluunniit piginnaanernut, tunngatillugu taamaattoq, aappaqarnani inuuneq tamakkiisumik pissarsiffigissagaanni ilungersorluni iliuuseqarnissaq pisariaqarpoq. Ullumikkut kristumiut aappaqanngitsut — angutaagaluarunik arnaagaluarunilluunniit, inuusuttuugaluarunik utoqqaagaluarunilluunniit, namminerluunniit aalajangikkat pissutsilluunniit atukkat pissutigalugit kisimiittuugaluarunik — periarfissatik qanoq ilillutik atorluarsinnaagamikkit? Ilagiinnit kristumiunit siullerneersut  maligassiaat kajumissinartut sammeriartigit paasiniarlugulu sumik ilinniarfigisinnaanerlutigit.

Inuusuttuutilluni aappaqanngitsuuneq

6, 7. (a) Filipip panii Guutimut kiffartornermi sumik immikkut pisinnaatitaaffeqarpat? (b) Timotheusi aappaqanngitsuunerminik qanoq atorluaava, inuusutsillunilu kajumilluni Guutimut kiffartornini pissutigalugu qanoq pilluaqqusaava?

⁶ Iivangkiiliumik oqaluussissutiginnittartoq Filipi sisamanik niviarsiaasunik paneqarpoq, taakkulu ataatamissulli oqaluussinermik aallussilluartigipput. (Apustilit Suliaat 21:8, 9) Arnat inuusuttut taakku tupinnartuliornikkut anersaap illernartup tunissuteqarnerata kinguneranik siulittuisinnaalersimapput, siulittuisarnermikkullu Joeli 3:1, 2-mi allassimasut eqquutitippaat.

⁷ Timotheusi angutaavoq inuusuttoq aappaqanngitsuunerminik atorluaasoq. Naalungiaasorli anaanaata, Eunikep, aanaatalu, Loisip, ‘Allakkanik Illernartunik’ ajoqersortarpaat. (2 Timotheusi 1:5; 3:14, 15) Aatsaalli Paulusi ukiup 47-p missaani illoqarfimminnut, Lystramut, tikeraaqqaarmat kristumiunngorsimagunarput. Ukiut marluk tamatuma kingorna, Paulusi aappassaanik illoqarfimminnut tikeraarmat, Timotheusi inuusuttuaraajunnaalinngikkuni 20-t sinnilaarlugit ukioqarunarpoq. Inuusukkaluarluni sallusuissummiinninilu sivisunngikkaluartoq utoqqaanertanit Lystramiittunit illoqarfimmilu eqqaaniittumi Ikonionimi ‘tusaamasaalluarpoq’. (Apustilit Suliaat 16:1, 2, 1936) Taamaattumik Paulusip Timotheusi angalaqatiseraa. (1 Timotheusi 1:18; 4:14) Qulakkeerlugu ilisimanngilarput Timotheusi aappaqanngittuaannarsimanersoq. Nalunngilarpulli inuusuttuulluni Paulusip angalaqatiserimmani kajumilluni akuersisoq tamatumalu kingorna ukiorpassuarni aappaqarnani ajoqersuiartortitatut nakkutilliisutullu kiffartortoq. — Filippimiut 2:20-22.

8. Johannesip Markusip anersaakkut ittunik anguniagaqarnissaminut suna iluaqutigaa, anersaakkullu ittunik anguniagaqarnini pissutigalugu qanoq pilluaqqusaava?

⁸ Aamma Johannesi Markusi inuusutsilluni aappaqanngitsuunerminik atorluaavoq. Taanna anaananilu, Maria, illortaavalu Barnaba ilagiinnut kristumiunut siullernut Jerusalemimiittunut ilaasortaapput. Aamma Markusip ilaqutai pigissaartuusimasinnaapput, namminnermi illoqarsimapput ‘arnamillu kiffaqarsimallutik’. (Apustilit Suliaat 12:12, 13, 1936) Markusili pigissaartuugaluarluni allaat inuusutsilluni imminuinnaq iluarusutsinniarnanilu eqqarsaatiginngilaq. Aamma ilaqutariittut ilorrisimaarluni inuunissaq naammaginngilaa. Inuunermini taama siusitsigisukkut apustilinik peqateqartarnini ajoqersuiartortitanngorusulissutigisimagunarpaa. Taamaattumik Paulusi Barnabalu ajoqersuiartortitatut angalaqqaarmata kajumilluni angalaqatigilerpai ikiortissatut ilaalluni. (Apustilit Suliaat 13:5) Kingusinnerusukkut Barnaba angalaqatigaa, taavalu kingusinnerusukkut Petrusi Babylonimi kiffartoqatigaa. (Apustilit Suliaat 15:39; 1 Petrusi 5:13) Naluarput Markusi qanoq sivisutigisumik aappaqanngissimanersoq. Tusaamaneqarlualerporli, kajumillunimi  allanik kiffartuussisarpoq Guutimullu kiffartornermi iliuuseqangaatsiarluni.

9, 10. Ullumikkut inuusuttut aappaqanngitsut kiffartornermi iliuuseqarnerunissamut sunik periarfissaqarpat? Assersuuteqarit.

⁹ Ullumikkuttaaq ilagiinni inuusuttorpassuit aappaqanngitsuunertik Guutimut kiffartornermi iliuuseqarnerunissamut kajumillutik atorpaat. Markusip Timotheusillu pisimanerattut paasivaat aappaqanngitsuullutik ‘akornusersorneqaratik Naalagaq attavigiuarsinnaallugu’. (1 Korinthimiut 7:35) Ilumut aappaqanngitsuuneq iluaqutissartaqarpoq. Aappaqanngitsunut periarfissarpassuaqarpoq — assersuutigalugu pioneriusoqarsinnaavoq, oqaluussisartunik pisariaqartitsiffiunerusumi kiffartortoqarsinnaavoq, allamiut oqaasiinik ilinniartoqarsinnaavoq, naalagaaffilersaarfinnik immikkoortortaqarfinnilluunniit sanaartoqataasoqarsinnaavoq, Kiffartortut Toqqakkat Ilinniarfianni ilinniartoqarsinnaavoq Betelimiluunniit kiffartortoqarsinnaalluni. Suli inuusullutillu aappaqalersimanngikkuit, taava periarfissatit atorluarpigit?

¹⁰ Qatanngut angut Markimik atilik suli 20-liinani pionerinngorpoq. Kiffartortut Toqqakkat Ilinniarfianni ilinniarpoq taamanimiillu nunani assigiinngitsuni suliaqartarsimalluni. Ukiuni 25-ni piffissaq tamaat kiffartornini eqqarsaatigalugu ima oqarpoq: “Ilagiinniittunik kikkunnik tamanik qiimmassaaniartarpunga oqaluusseqatigalugit, paarsisutut pulaarlugit, neriartoqqullugit allaallu ineriartornartumik katerisimaartitsisarlunga. Tamakku tamaasa nuannaarutigingaartarpakka.” Soorlu Markip oqaasiinit ersertoq, tunisineq inuunermi nuannaarutaanerpaasarpoq, Guutimullu kiffartorneq inuunermi pingaarnerpaatikkaanni allanut tunniussaqarnissamut periarfissarpassuaqartarpoq. (Apustilit Suliaat 20:35) Soqutigisat piginnaasallu suugaluarpataluunniit aamma qanorluunniit misilittagaqaraluaraanni ullumikkut inuusuttut tamaviaarlutik Naalagaq kiffartuussinnaavaat. — 1 Korinthimiut 15:58.

11. Katipallanniannginnissaq sunik iluaqutissartaqarpa?

¹¹ Inuusuttut amerlanersaasa arlaanni aappaninnissartik kissaatigisarpaat, katipallanniannginnissamulli pissutissaqarluarpoq. Paulusip inuusuttut kajumissaarpai ‘inuusuttuunerup aallaqqaataata’, kinguaassiuutimikkut pilerissutsimik sakkortunerpaaffiata, qaangiunnissaanut utaqqeqqullugit. (1 Korinthimiut 7:36, NV) Aapparisinnaasamimmi tulluartumik toqqaasinnaajumalluni imminut ilisarisimallualersimasariaqarlunilu inuunermi misilittagaqalersimasariaqarpoq, tamakkualu piffissap sivikitsuinnaap ingerlanerani anguneqarsinnaanngillat. Katinnermi neriorsoqatigiinneq pimoorussassaavoq inuuneq tamaat atortussaq. — Oqaluussisartup oqaasii 5:1-4.

Inuunermi kingusinnerusukkut kisimiittuuneq

12. (a) Uillarnerup Annap pissutsit atukkami allanngornerat qanoq naammagalugu atorpaa? (b) Suna immikkut pisinnaatitaaffigilerpaa?

¹² Anna, iivangkiiliumi Lukasip allagaani eqqaaneqartoq, qularnanngitsumik assut aliasussimassaaq uini ukiut arfineq-marluinnaat aapparereerlugu uillarami. Naluarput meeraqarnersut imaluunniit Annap aappaneqqinnissani eqqarsaatigisarsimaneraa. Biibilili naapertorlugu 84-inik ukioqarluni suli uillarneruvoq. Allassimasut naapertorlugit isummersinnaavugut Annap pissutsit atukkami allanngornerat atorluarlugu Jehovamut attaveqarluarnerulerniarsimasoq. “Naalaffik qimanngisaannarpaa, Guutilu kiffartuuttarlugu unnuaq ullorlu iisinnginniartarluni qinusarlunilu.” (Lukasi 2:36, 37) Tassa Guutimik pallorfiginninneq inuunerani pingaarnerpaavoq. Ilungersortariaqarlunilu aalajangersimalluinnartariaqarsimassaaq, pilluaqqusaangaarporli. Jiisusi naalungiaatillugu takugamiuk immikkut pisinnaatitaaffigaa, Missiarsillu qanittukkut annaassinissaa allanut nalunaajaatigaa. — Lukasi 2:38.

13. (a) Sumit erserpa Tabitha ilagiinniittunik ikiuisartoq? (b) Tabitha ikiuiumatunini inussiarnersuuninilu pillugit qanoq akissarsisinneqarpa?

¹³ Arnaq Tabithamik atilik Joppimi, itsaq illoqarfimmi Jerusalemip avannamut kitaatungaaniittumi, najugaqarpoq. Taassuma ueqarnera Biibilimi eqqaaneqanngimmat tamatuma nalaani ueqarsimannginnguatsiarpoq. Tabithap ajunngitsuliungaartarnini piitsunullu tunissutinik amerlasuunik tunisisarnini ilisimaneqaatigaa.  Uillarnernut piitsunullu allanut atisaliuussisarsimagunarpoq, taamaattumillu nuannarineqangaarpoq. Taamaattumik taanna tassanngaannaq napparsimalerluni toqummat ilagiinniittut tamarmik Petrusi aasippaat ilungersorlutik qinnuigalugu qatanngutertik asasartik makiteqqullugu. Taassuma makititaasimanera Joppimi tamarmi ilisimaneqaleriartortillugu amerlasuut uppertunngorput. (Apustilit Suliaat 9:36-42) Tabithap inussiarnerluinnartuunini pissutigalugu uppertunngortut ilarpassui nammineq ikiorsimasinnaavai.

14. Kristumiut kisimiittut Jehovamut attaveqarluarnerulernissaminnut suna kajumississutigisarpaat?

¹⁴ Annatut Tabithatullu ullumikkut ilagiinniittut ilarpassui kisimiittuullutilluunniit inuunermi kingusinnerusukkut kisimiittunngortarput. Ilaat immaqa tulluartumik aappassarsisinnaasimanngillat. Allat avissimallutilluunniit aappartik toqukkut annaasimavaat. Kisimiittut kristumiut taakku oqaloqatissaminnik aappaqannginnamik Jehovamik tatiginninnerunissartik ilikkartarpaat. (Ussatit 16:3) Silviap, qatanngutip arnap kisimiittup ukiut 38-t sinnerlugit Betelimi kiffartorsimasup, tamanna pilluaqqussutitut isigaa. Ima oqarpoq: “Ilaannikkut qiimmassaasuukatattarpunga, taava eqqarsartarpunga: ‘Kia uanga qiimmassassavaanga?’” Imali nangippoq: “Jehovap sunik pisariaqartitsininnik uannit ilisimanninneruneranik qularutiginninnginnera taassumunnga attaveqarluarnerulernissannut iluaqutigisarpara. Qiimmassarneqartuaannarpungalu, ilaannikkut ilimaginngilluinnakkannit.” Jehovamut attaveqarluarnerulerniarluta iliuuseqaraangatta taassuma asanningaarluni tuppallersartarlutalu nakussatsittarpaatigut.

15. Kristumiut aappaqanngitsut asannittuliornermut tunngatillugu qanoq ‘ammarsinnaappat’?

¹⁵ Aappaqanngitsut asannittuliornermut tunngatillugu ‘ammarnissamut’ immikkut periarfissaqarput. (Atuakkit 2 Korinthimiut 6:11-13). Jolene, qatanngut arnaq kisimiittoq ukiuni 34-ni kingullerni piffissaq tamaat kiffartortuusimasoq, ima oqarpoq: “Qanimut ikinngutitaarniarlunga assut iliuuseqarnikuuvunga, peqatinniinnaanngitsoq, inunnilli assigiinngitsorpassuarnik. Aappaqanngitsuulluni Jehovamut, ilaquttanut, qatanngutinut allanullu tunniussaqarnissamut periarfissarpassuaqarnarpoq. Utoqqaliartortillunga kisimiittuunera nuannarinerujartuinnarpara.” Kisimiittut namminissarsioratik ikiuisarnerat utoqqaat, napparsimasut, angajoqqaat kisimiittut, inuusuttut ilagiinniittullu allat assorujussuaq pingaartippaat. Aap, asannittulioraangatta iluarusunnerusarpugut. Aamma illit asannittuliornermut tunngatillugu ‘ammarsinnaavit’?

Inuuneq tamaat aappaqanngitsuuneq

16. (a) Sooq Jiisusi aappaninngila? (b) Paulusip aappaqannginnini silatusaartumik qanoq atorpaa?

¹⁶ Jiisusi aappaninngilaq; imminut suliassiissutigineqartoq piareersartussaallugulu naammassisussaavaa. Angalasupilussuuvoq, ullaaralaamiit unnussuarmut sulisarpoq, naggataatigullu inuunini pilliutigaa. Taassuma aappaqannginnini suliaminik naammassinninnissaminut iluaqutigaa. Apustili Paulusi kilometerit tusindillit angalavoq kiffartornermilu annikilliornangaartut naammagalugit atorlugit. (2 Korinthimiut 11:23-27) Paulusi siusinnerusukkut aappaqarnikuusimagunaraluarpoq, apustilitulli toqqarneqarami aappaqanngiinnarniarluni aalajangerpoq. (1 Korinthimiut 7:7; 9:5) Jiisusip Paulusillu kiffartornermi iliuuseqarnerusoqarnissaa siunertaralugu allat kajumissaarpaat sapinngikkunik maligassiaminnik malinneqqullugit. Taakkuali tamarmik aappaqarnissaq Guutimut kiffaasunut inerteqqutiginngilaat. — 1 Timotheusi 4:1-3.

17. Ullumikkut inuit ilaat Jiisusip Paulusillu tumaannik qanoq atuaasimappat, aamma sooq qularutiginngilluinnarsinnaavarput Jehovap taamatut pilliuteqartut pingaartikkai?

¹⁷ Ullumikkuttaaq ilaat aalajangersimapput aappaqarniarnatik kiffartornertik aallulluarnerusinnaaniassagamikku. Harold, siusinnerusukkut eqqaaneqartoq, ukiut 56-it sinnerlugit Betelimiissimavoq. Ima oqarpoq: “Betelimiinninni ukiut qulit siulliit aappariippassuit napparsimaneq angajoqqaalluunniit utoqqalisut isumagineqarnissaminnik pisariaqartitsinerat pissutigalugit Betelimiikkunnaartut takusarpakka. Angajoqqaakka tamarmik toqoreerput. Betelimiinnerali nuannareqigakku aappartaaruma Betelimiikkunnaartariaqaleqinagama aappartaarusunngilanga.” Ukiualuit matuma siorna qatanngut arnaq Margaretimik atilik ukiorpassuarni pioneriusimasoq tamatumunnga assingusumik ima  oqarpoq: “Aappaninnissannut arlaleriarlunga periarfissaqarnikuuvunga, allarpassuarnilli soqutiginartunik ulapputissaqartuaannarnikuuvunga. Kisimiittutut kiffaanngissuseqarnerunera pissutigalugu oqaluussinermik ulapputeqarsinnaasimavunga, tamannalu nuannaarutigingaartarpara.” Jehovap pallorfiginninneq ilumoortoq pillugu taamatut namminissarsioratik pilliuteqartut puiunngisaannassavai. — Atuakkit Esaja 56:4, 5.

Periarfissatit tamaasa atorluakkit

18. Allat kristumiunik aappaqanngitsunik qanoq qiimmassaallutillu tapersersuisinnaappat?

¹⁸ Kristumiut aappaqanngitsut Jehovamut kiffartorniarlutik sapinngisartik tamaat iliuuseqartut tamaasa nersortariaqarlutigillu qiimmassartariaqarpavut. Asavavut pissusii nuannersut pillugit ilagiinnilu iliuuseqangaarnerat pillugu. Kiserliortariaqanngisaannassapput taakkununnga anersaakkut ‘qatanngutaalerlutalu anaanaalerlutalu qitornaalerutta’ ilumoortut. — Atuakkit Markusi 10:28-30.

19. Aappaqanngitsuuneq qanoq pitsaanerpaamik atorneqarsinnaava?

¹⁹ Illit nammineq aalajangikkatit pissutsilluunniit atukkatit pissutigalugit kisimiittuuguit, qanortoq misilittakkat Biibilip nalaaneersut ullumikkumeersullu pissutigalugit qularutigiunnaariuk pilluarlutit imaqarluartumillu inuusinnaallutit. Tunissutisiassat ilaasa tigunissaat qilanaarineqartarpoq, tunissutisiat allat naatsorsuutiginngilluinnakkamik tunissutisiarineqartartut. Ilaat ingerlaannaq nuannarineqalertarput, allat aatsaat kingusinnerusukkut qujamasuutigineqalertartut. Tassa nammineq isiginnittaaseq apeqqutaasupilussuusarpoq. Aappaqanngitsuuneq pitsaanerpaamik atorneqarsinnaavoq Jehovamut attaveqarluarnerulernikkut, Guutimut kiffartornermi tamaviaarnikkut allanullu asannittuliornermut tunngatillugu ‘ammarnikkut’. Aappaqanngitsuuneq aappaqarnertut nalerisimaarnarsinnaavoq tunissutisiaq tamanna Guutip isiginnittaasiatut isigigaanni silatusaartumillu atoraanni.

Eqqaamavigit?

• Aappaqanngitsuuneq suut eqqarsaatigalugit tunissutisiaava?

• Sooq inuusuttuulluni aappaqanngitsuuneq iluaqutaasinnaava?

• Kristumiut kisimiittut Jehovamut attaveqarluarnerulernissaminnut asannittuliornermullu tunngatillugu ‘ammarnissaminnut’ suut periarfissaraat?

[Atuaqqissaarnermi apeqqutit]

[Qupp. 20-mi assiliartaq]

Guutimut kiffartornissamut periarfissatit tamaasa atorluartarpigit?