Aappariinnermik Guutimit tunissutisiaasumik ataqqinnigitsi

“Tamanna pillugu angutip ataatani anaananilu qimallugit nuliani attavigissavaa, uiniulissappullu ataaseq.” — 1 MOSESI 2:24.

1. Sooq Jehova ataqqisariaqarparput?

JEHOVA GUUTI, aappariinnermik Pilersitsisoq, ataqqisariaqarparput. Uagutsinnik Pinngortitsisuugami, Kisimi Oqartussaasuugami, Ataataagamilu qilammiusoq eqqortumik allaatigineqarpoq ‘tunissutinik ajunngitsunik naammalluinnartuusunillu tamanik’ Tunisisuusutut. (Jaaku 1:17; Saqqummersitat 4:11) Tunisisuunera asanningaarneranut ersiutaavoq. (1 Johannesi 4:8) Uagutsinnut ilinniartitsissutigisai tamarmik, uagutsinnut peqqussutai tamarmik, uagutsinnullu tunissutai tamarmik iluaqutaalluinnarput. — Esaja 48:17.

2. Jehovap aappariit siulliit sunik ilitsersorpai?

² Biibilimi ersersinneqarpoq Guutimit ‘tunissutit ajunngitsut’ taakkua ilagigaat aappariinneq. (Ussatit 19:14) Jehovap Adami Evalu, aappariit siulliit, katitikkamigit aappariittut qanoq pillualersinnaanerannik ilitsersoqqissaarpai. (Atuakkit Matthæusi 19:4-6). Guutip siulersuinera malissimagaluarunikku ataavartumik pilluarsimassagaluarput. Guutilli peqqussutai sianiilliorlutik sumiginnarpaat, tamannalu alianartorujussuarmik kinguneqarpoq. — 1 Mosesi 3:6-13, 16-19, 23.

3, 4. (a) Ullumikkut inuppassuit qanoq aappariinnermik Jehovamillu Guutimik ataqqinninnginnertik ersersittarpaat? (b) Allaaserisami matumani suut sammissavavut?

³ Aappariit siulliit, Adamip Evallu, pisimanerattut  ullumikkut inuppassuit aappariinnerminni aalajangigassaqaraangamik Jehovap peqqussutai soqutigerpiarneq ajorpaat soqutiginngilluinnartarlugilluunniit. Inuit ilaasa aappariinnermik aaqqissuussineq akuerinngilaat, allat namminneq pilerissusertik maliinnarlugu qanoq aappariittoqartussaaneranik najoqqutassiaq allanngortinniartaraat. (Romamiut 1:24-32; 2 Timotheusi 3:1-5) Aappariinnerup Guutimit tunissutaanera sumiginnarpaat, taamaalillutillu tunissummik tamatuminnga ataqqinninnginnermikkut aamma Tunisisoq, Jehova Guuti, ataqqinngilaat.

⁴ Ilaatigut allaat Jehovamut kiffaasut ilaat Jehovap aappariinnermut isiginnittaasiatut isiginnittaaseqarunnaarsimapput. Aappariit kristumiut ilaat averuserniarlutik aalajangersimapput, imaluunniit Biibilimik tunngavissaqanngikkaluarlutik avissimapput. Tamanna qanoq pinngitsoortinneqarsinnaava? Guutip peqqussutaa Mosesimik allakkani siullerni 2:24-miittoq iluaqutigalugu kristumiut aappariinnertik qanoq nakussatsissinnaavaat? Aamma katinniarlutik eqqarsartut suna eqqaamassavaat? Oqaluttuat Biibilimeersut pingasut aappariittuassagaanni Jehovamik ataqqinninnerup pingaaruteqarluinnassusianik ersersitsisut sammeriartigit.

Ilumoorfigeqatigiittuaritsi

5, 6. Zakariap Elisabethillu suna misilinneqaatigisimasinnaavaat, ilumoorfiginnittuugamillu qanoq pilluaqquneqarpat?

⁵ Zakaria Elisabethilu eqqortuliortuaannarput; assersuutigalugu aappassarsioramik anersaakkut ittunik pingaartitsisuunissaq eqqarsaatigisimassavaat. Zakariallu palasitut suliassani aalajaalluni suliarisarpaa, marluullutillu Guutip inatsisai sapinngisartik tamaat maleruarniarpaat. Ilumut qujamasuutissaqaqaat. Judamili angerlarsimaffianni pulaarsimasuugukkit paasilissagaluarpat arlaannik amigaateqartoq. Qitornaqanngillat. Elisabethi ernisuitsuuvoq, marluullutillu utoqqalereersimaqaat. — Lukasi 1:5-7.

⁶ Itsaq Israelimi qitornartaarneq pingaartinneqangaartarpoq, qitornarpassuaqartoqartarporlu. (1 Samueli 1:2, 6, 10; Tussiaat 128:3, 4) Taamanikkut angutip Israelikkuusup ilumuunngitsuliorluni nuliani avissinnaavaa taanna qitornartaanngippat. Zakarialli Elisabethi ilumoorfigiuarpaa. Taakku marluullutik avinnissaminnut utoqqatsissutissarsiunngillat. Qitornaqannginnertik aliasuutigigaluarlugu marluullutik Jehovamut aalajaallutik kiffartortuarput. Utoqqalereeraluartulli Jehovap tupinnartuliornikkut pilluaqqungaarpai ernertaartillugit. — Lukasi 1:8-14.

7. Elisabethip aamma qanoq uini ilumoorfigaa?

⁷ Elisabethip ilumoorfiginninnini aamma allatigut ersersippaa. Ernertik, Johannesi, inunngormat Zakaria oqalussinnaanngilaq. Inngilimmi oqaasii upperinnginnamigit oqajuitsunngorsimavoq. Taamaattorli Zakariap nuliani arlaatigut nalunaarfigisimassavaa inngilip oqarfigisimagaani ernertik Johannesimik atserneqassasoq. Saniliisa qanigisaasalu kissaatigaat ataatamisut ateqassasoq. Elisabethilli uimi siulersuinera ilumoorfiginnilluni aalajangiusimavaa. Ima oqarpoq: “Naagga, Johannesimik ateqassaaq.” — Lukasi 1:59-63.

8, 9. (a) Ilumoorfigeqatigiinneq qanoq aappariinnermut nakussatsissutaasarpa? (b) Uiusoq nuliaasorlu qanoq ilillutik ilumoorfigeqatigiissinnaappat?

⁸ Zakariap Elisabethillu pisimanerattut ullumikkut aappariit pakatsissuteqarlutillu ajornartorsiuteqalersinnaapput. Aappariit ilumoorfigeqatigiinngitsut pilluarsinnaanngillat. Qaninniarujoorneq, pornografii, allasiorneq aappariittullu ingerlalluarnermik navianartorsiortitsisinnaasut allat aappariit tatigeqatigiinnerannik ajoqusiilluinnarsinnaapput. Aappariittullu tatigeqatigiikkunnaartoqarpat asaqatigiikkunnaartoqalissaaq. Ilumoorfigeqatigiinneq ilaqutariit angerlarsimaffianni qarmatut qunusaarisunut illersuutitut toqqissisimatitsisutut ilaatigut ippoq. Aappariit ilumoorfigeqatigiikkaangamik toqqissisimallutik inooqatigiissinnaapput eqqarsaatitillu misigissutsitillu ammasumik eqqartorsinnaallugit, taamaalillutillu asaqatigiinnerulersinnaapput. Aap, ilumoorfigeqatigiinneq pingaaruteqarluinnarpoq.

⁹ Jehovap Adami ima oqarfigaa: “Angutip ataatani anaananilu qimallugit nuliani attavigissavaa.” (1 Mosesi 2:24) Tamanna qanoq paasisariaqarpa? Ikinngutinut ilaquttanullu  attaveqarneq qangatut ikkunnaartariaqassaaq. Aappariit pingaarnerpaamik imminnut soqutigalutillu piffissaqarfigissapput. Aappartaarsimagamik ikinngutitik ilaquttatillu salliussinnaanngilaat. Aappariittut aalajangigassaqaraangamik isumaqatigiinngissuteqaraangamilluunniit angajoqqaatik akuliutsitassanngilaat. Aappariit maanna imminnut attavigiissapput. Guutip tamanna peqqussutigaa.

10. Aappariit ilumoorfigeqatigiittuarnissaminnut suna iluaqutigisinnaavaat?

¹⁰ Allaat ilaqutariinni assigiinngitsumik upperisaqarfiusuni ilumoorfigeqatigiinneq iluaqutaavoq. Qatanngut arnaq Jehovamut nalunaajaasunngitsumik ueqartoq ima oqarpoq: “Jehovamut qujamasoqaanga uinnut qanoq naalatsigitissanersunga uinnillu qanoq qamannga pisumik ataqqinnissanersunga ilinniartissimammanga. Ilumoorfiginnittuarama ukiuni 47-ni asaqatigiittuarlutalu ataqqeqatigiittuarpugut.” (1 Korinthimiut 7:10, 11; 1 Petrusi 3:1, 2) Tatiginartuuniarlutit iliuuseqartuarit. Aappat paasitinniarlugu ilinnut nunarsuarmi tamarmi pingaarnerpaajusoq oqaatsikkut iliuutsikkullu periarfissarsiortarit. Sapinngisat tamaat illit aappavillu akornassinni kimilluunniit sumilluunniillu akornutaasoqalernissaa akuereqinagu. (Atuakkit Ussatit 5:15-20). Ron Jeannettelu ukiut 35-t sinnerlugit aappariittut pilluarlutik inuusut ima oqarput: “Guutimik ilumoorfiginnilluta uagutsinnut piumasaqaatai naapertorlugit iliuuseqartaratta aappariittut pilluarluta inuuvugut.”

Aappariinneq suleqatigiinnikkut nakussatsinneqartarpoq

11, 12. Akvila Priskillalu qanoq suleqatigiittarpat (a) angerlarsimaffimminni, (b) tupiliornerminni, aamma (c) kristumiutut kiffartornerminni?

¹¹ Apustilip Paulusip qanimut ikinngutini Akvila Priskillalu eqqaagaangamigit taakku marluutillugit eqqaajuaannarpai. Aappariit imminnut ataqatigiilluartut taakku maligassiuilluarput Guuti oqarmat uiusoq nuliaasorlu ‘uiniulissasut ataaseq’. (1 Mosesi 2:24) Angerlarsimaffimminni suleqatigiittuartarput, tupilioqatigiittarput kristumiutullu kiffartoqatigiittarlutik. Paulusi Korinthimeeqqaarmat Akvilap Priskillallu angerlarsimaffimminneeqquaat, taakkualu angerlarsimaffiat piffissap ilaani Paulusip sulinermini aallaavittut atorunarpaa. Kingusinnerusukkut Efesosimi angerlarsimaffitsik ilagiit ataatsimiiffissaattut atukkiuppaat, ajoqersuganngorlaallu, assersuutigalugu Apollosi, sallusuissummik paasinninnerulernissaannut ikiorniarlugit suleqatigiittarput. (Apustilit Suliaat 18:2, 18-26) Taava aappariit aallussilluartut taakku Romamut nuupput, tassanilu angerlarsimaffitsik ilagiit ataatsimiiffissaattut aamma atukkiuttalerpaat. Kingusinnerusukkut Efesosimut uterput qatanngutillu nakussatsittarlugit. — Romamiut 16:3-5.

¹² Piffissap ilaani Akvilap Priskillallu Paulusi tupiliortutut suleqatigaat. Aap, aappariittut suleqatigiilluarput imminnut unammillernatillu saqitsaannatik. (Apustilit Suliaat 18:3) Qularnanngitsumilli kristumiutut sammisaqaqatigiittaramik aappariittut ingerlalluarput pilluarlutillu. Paulusip oqaatigaa aappariit aalajaatsut taakku ‘Kristusi-Jiisusimi suleqatigalugit’. (Romamiut 16:3) Sumiluunniit kiffartoraluarunik Korinthimiluunniit, Efesosimiluunniit, Romamiluunniit aappariittut Guutip naalagaaffianik oqaluussissutiginninneq siuarsarniarlugu suleqatigiilluartutut tusaamaneqarlualerput.

13, 14. (a) Suut aappariittut ataasiussuseqarunnaarsitsisinnaappat? (b) Aappariit qanoq iliorsinnaappat aappariinnertik ‘uinittut ataatsitut’ nakussatsinniarlugu?

¹³ Aap, aappariinneq anguniagaqaqatigiinnikkut sammisaqaqatigiinnikkullu nakussatsinneqartarpoq. (Oqaluussisartup oqaasii 4:9, 10) Ajoraluartumik ullumikkut aappariippassuit imminnut piffissaqarfigerpianngillat. Namminneq immikkut suliffimminni suligaatsiartarput. Inuit allat suliniarlutik angalangaatsiartarput, ilaquttaminnulluunniit aningaasarsiorniarlutik kisimiillutik nunanut allanut nuuttarput. Aappariit tamarmik immikkut fjernsynernermut, sukisaarsarnermut, timersornermut, qarasaasiami pinnguarnermut internettimilluunniit atuinermut piffissaq atortarunikku angerlarsimagaluarlutik kiserliorsinnaapput. Ilissimi ilaquttassinni? Ilagiippallaartanngikkussi immissinnut  piffissaqarfiginerulersinnaavisi? Ulluinnarni suleqatigiissinnaavisi, soorlu igaqatigiillusi, errueqatigiillusi illulereqatigiillusiluunniit? Meeqqasi imaluunniit angajoqqaasi utoqqalisimasut marluullusi isumagisarsinnaavisigit?

¹⁴ Pingaanerpaavoq aappariittut Jehovamik pallorfiginninnermut tunngassuteqartut piffissaqarfigisarnissaat. Ilaqutariit ullormut allassimaffimmik oqaloqatigiissutiginnittarnerat Biibilimillu atuaqqissaaqatigiittarnerat isiginnittaaseqarnerannik anguniagassaqarnerannillu ataasiussuseqarnerulersitseqataasinnaavoq. Oqaluusseqatigiittarneq aamma pingaaruteqarpoq. Ajornanngippat misilillugu marluullusi ikiorti-pioneriugitsi pioneriugitsiluunniit, aamma pissutsit atukkasi pissutigalugit qaammat ataasiinnaq imaluunniit ukioq ataasiinnaq taamatut kiffartorsinnaagaluarlusi. (Atuaruk 1 Korinthimiut 15:58). Qatanngut arnaq uiminik pionerioqateqarsimasoq ima oqarpoq: “Ilaatigut oqaluussinermi ilagiinnissamut oqaloqatigiilluarnissamullu periarfissaqarsinnaasarpugut. Allat anersaakkut ikiornissaat anguniagarigatsigu misigivunga suleqatigiilluarluta. Aamma misigivunga uinnut qaninnerulerlunga, aap, uiga ikinngutigillualerpara.” Ineriartornartunik suleqatigiissuteqaraanni soqutigisat, ileqqut pingaartitallu aappap soqutigisaatut, ileqquisut pingaartitaatullu ileriartuaassapput. Taava aappariit piffissap ingerlanerani, Akvilap Priskillallu pisimaneratut, ‘uinittut ataatsitut’ eqqarsartaaseqarnerujartorsinnaallutillu misiginerujartorsinnaallutillu iliuuseqarnerujartorsinnaapput.

Guuti aappariinnissinni salliutissiuk

15. Aappariit pillualissagunik susariaqarpat? Nassuiaruk.

¹⁵ Jiisusip nalunngilaa aappariinnermi Guutimik salliutitsinissap pingaaruteqassusia. Jiisusip Jehova aappariinnik siullernik katititsisoq takuaa. Adami Evalu Guutimit siulersorneqartillutik qanoq pilluartiginerat maluginiarpaa, aamma Guutip siulersuineranik sumiginnaammata qanoq kingunipiloqartiginera nammineq takuaa. Taamaattumik Jiisusip allanik ilinniartitsigami Ataatami peqqussutaa Mosesimik allakkani siullerni 2:24-miittoq uteqqippaa. Taavalu ima nangippoq: “[Guutip] ataqatigiilersitai inuup avissaartissanngilai.” (Matthæusi 19:6) Aamma ullumikkut aappariit aappariittut iluatsissagunik pillualissagunillu Jehovamik ataqqinningaartariaqarput. Tamatumunnga tunngatillugu Jiisusip angajoqqaavi nunamiusut, Josefi Marialu, maligassaalluartuupput.

16. Josefip Mariallu ilaqutariittut Guutimik salliutitsinertik qanoq ersersippaat?

¹⁶ Josefip Maria asannittuliorfigalugulu ataqqivaa. Naartusoq paasigamiuk nallittorusuppaa suliluunniit Guutip inngiliata nassuiaatinngikkaani Mariamut tunngatillugu qanoq pisoqarsimaneranik. (Matthæusi 1:18-20) Aappariittut kaasarip peqqussutaa malippaat Mosesillu inatsisai maleruaqqissaarlugit. (Lukasi 2:1-5, 21, 22) Jerusalemimilu upperisarsiornikkut nalliuttorsiornerit angutaannarnit najuuffigineqartussaagaluartut Josefi Marialu ukiut tamaasa ilaquttatik ilagalugit Jerusalemiliartarput. (5 Mosesi 16:16; Lukasi 2:41) Taamaaliornermikkut allatigullu aappariit Guutimik mianerinnittut taakku Jehova nuannaartinniartarpaat taassuminngalu pallorfiginninnermut  tunngatillugu ataqqinningaarnertik ersersittarlugu. Paasinarpoq Jehovap ernermi meeraanerani taassuminnga isumassuisussatut taakkua toqqarsimammagit.

17, 18. (a) Aappariit qanoq ilaqutariittut Guutimik salliutitsisinnaappat? (b) Tamannalu taakkununnga qanoq iluaqutaassava?

¹⁷ Aamma ilissi ilaqutariittut Guuti salliutippisiuk? Assersuutigalugu pingaarutilinnik aalajangigassaqaraangassi aalajangigassassinnut tunngatillugu najoqqutassiat Biibilimeersut misissoqqissaaqqaartarpisigit? Tamanna qinunikkut Guutimut saqqummiuttarpisiuk, kristumiumullu inersimalluartumut siunnersortissarsiortarpisi? Imaluunniit ilissi nammineq, ilaquttassi ikinngutissiluunniit misigissusii naapertorlugit ajornartorsiutit aaqqinniaqajaasarpisigit? Aappariinneq ilaqutariinnerlu pillugit siunnersuuterpassuit atoriaannaasut inussiaq aalajaatsoq aqqutigalugu pisartakkavut maleruarniartarpisigit? Imaluunniit najukkassinni ileqqorineqartut silamiunilluunniit siunnersuutigineqartut maliinnartarpisigit? Qinoqatigiittuartarpisi atuaqqissaaqatigiittuartarlusilu, anersaakkut anguniagaqarpisi, aamma ilaqutariittut suut pingaartinnerussanerlugit oqaloqatigiissutigisarpisigit?

¹⁸ Ray nulianilu ukiuni 50-ini pilluarlutik aappariinnertik pillugu ima oqarpoq: “Ajornartorsiuteqarsimanngisaannarpugut aaqqissinnaanngisatsinnik, Jehovami ‘allunaasamut pingasulimmut’ ilaatittuarparput.” (Atuaruk Oqaluussisartup oqaasii 4:12). Dannyp Trinallu taakku isumaqatigaat. Ima oqarput: “Guutimut kiffartoqatigiinnitsinni aappariinnerput ingerlalluarnerulerpoq.” Taakku ukiut 34-t sinnerlugit pilluarlutik aappariipput. Jehovap aappariit imminik salliutitsiuaannartut aappariittut pillualernissaannut ikiussavai, aamma pilluaqqungaassavai. — Tussiaat 127:1.

Guutimit tunissutisiassinnik ataqqinnittuaritsi

19. Sooq Guutip aappariinneq tunissutigaa?

¹⁹ Ullumikkut inuppassuarnut pingaaruteqartutuaq tassaavoq nammineq pilluarnissaq. Jehovamulli kiffaasut nalunngilaat Guutip aappariinneq tunissutigigaa siunertaminik siuarsaanissaq siunertaralugu. (1 Mosesi 1:26-28) Adami Evalu tunissutisiaminnik tamatuminnga ataqqinnissimasuuppata nunarsuaq tamarmi paratiisinngortinneqarsimassagaluarpoq inunnik Guutimut kiffartortunik naapertuilluartunik pilluartunillu ulikkaartoq.

20, 21. (a) Sooq aappariinneq illernartutut isigisariaqarparput? (b) Sapaatiuppat tunissutisiaq alla suna sammissavarput?

²⁰ Pingaarnerpaamik Guutimut kiffaasut aappariinneq Jehovamik ataqqinninnissamut periarfissatut isigaat. (Atuaruk 1 Korinthimiut 10:31). Soorlu sammereeripput, ilumoorfiginninneq, suleqatigiinneq Guutimillu salliutitsineq aappariinnermut nakussatsissutaasarput. Katinniarlutaluunniit eqqarsaraluarutta, aappariittulluunniit ingerlalluarnissarput kissaatigigaluarutsigu, aappariiginnarnissarpulluunniit ilungersuutigigaluarutsigu pingaarnerpaamik aappariinneq aaqqissuussinertut Guutimeersutut illernartutullu isigisariaqarparput. Tamanna eqqaamajuarutsigu aappariinnitsinni sapinngisarput tamaat Guutip oqaasia tunngavigalugu aalajangiisassaagut. Taamaalilluta aappariinneq tunissutisiaasoq kisiat ataqqinagu aammattaarli aappariinnermik Tunisisoq, Jehova Guuti, ataqqivarput.

²¹ Jehovalli aappariinneq kisiat uagutsinnut tunissutiginngilaa. Aamma katinneq inuunermi pillualissutaasinnaasutuaanngilaq. Allaaserisami tulliuttumi Guutimit tunissutisiaq naleqangaartoq alla sammissavarput, tassa aappaqanngitsuuneq.

Qanoq akissavit?

• Aappariit kristumiut ilumoorfigeqatigiissagunik qanoq iliortariaqarpat?

• Sooq aappariittut suleqatigiinneq aappariinnermut nakussatsissutaava?

• Qanoq aappariit inuunerminni Guutimik salliutitsisinnaappat?

• Qanoq Jehovamik, aappariinnermik pilersitsisumik, ataqqinninnerput ersersissinnaavarput?

[Atuaqqissaarnermi apeqqutit]

[Qupp. 17-mi assiliartaq]

Aappariit suleqatigiittarpata aappariittuarnissaannut tamanna iluaqutaassaaq