‘Jehovap aqqa qimarnguffigiuk’

‘Ilinnut pigitiinnassavakka amiakkui inuiaqatigiit ikiortariallit sanngiitsut; amiakkuutitaasut Jehovap aqqa tatigissavaat [qimarnguffigissavaat, NV].’ — SEFANIA 3:12.

1, 2. Qanittukkut suna anorersuartut ittoq inunnik eqquissava?

ANORERSUARTILLUGU sialuttalimmik nataqqornartalimmilluunniit oqquiffissarsiornikuuit, soorlu ikaartarfiup ataanut? Taamatut anorersuartillugu immaqa ikaartarfik oqquiffigissallugu naammappoq, anorersuarujussuartilluguli oqquiffigissallugu naammannaviarunanngilaq.

² Anorersuarli allatut ittoq — inuiannik nungutitseriaannaasoq — pitoraatingajalerpoq. Tassaavoq “ulloq piuneerussaaffissaq” anorersuartut ittoq, tassa “[Jehovap] ullussarsua”, inunnut tamanut sunniuteqartussaq. Pisariaqartumilli oqquiffissarsisinnaavugut, qimarnguffissarsisinnaavugut. (Atuakkit Sefania 1:14-18). “Ullormi [Jehovap] kamaffissaani” nalliutingajalersumi qanoq qimarnguffissarsisinnaavugut?

Biibilip nalaani ullut anorersuarsiorfiusut

3. Naggueqatigiissortat quliusut naalagaaffiat Israeli ‘anorersuarmit aserorterisumit’ sumit eqqorneqarpa?

³ Jehovap ullussaa aallartissaaq nunarsuarmi upperisarsiornerit eqqunngitsut tamaasa piuneerullugit. Qanoq qimarnguffissarsisinnaanerluta paasiumallugu itsaq Israelikkut oqaluttuarisaanerat misissortariaqarparput. Esajap, 700-kkunni Kr.in.si. inuusup, Jehovap naggueqatigiissortat quliusut naalagaaffiannut Israelimut tunussisumut eqqartuussutaa ‘anorersuarmut aserorterisumut’ inunnit pinngitsoortinneqarsinnaanngitsumut assersuuppaa. (Atuakkit Esaja 28:1, 2). Siulittuut taanna 740-mi Kr.in.si. eqquuteqqaarpoq Assyriamiut naggueqatigiissortanit quliusunit, Efraimimit nuimanersaqartunit, najugaqarfigineqartunut isaammata.

4. 607-imi Kr.in.si. Jerusalemi qanoq ‘Jehovap ullussarsuanit’ eqqorneqarpa?

⁴ Israelikkut ilumuunngitsut eqqartuunneqarnerisa kingorna 607-imi Kr.in.si. Jerusalemimut Judamullu “[Jehovap] ullussarsua” nalliuppoq. Tamatumunnga pissutaavoq pallorfiginninnermik ilumoortumik Judakkut aamma tunussinerat. Babylonimiut Nebukadnesarimit siulersorneqartut Judakkunnik tassanilu illoqarfiit pingaarnersaannik Jerusalemimik sioorasaaripput. Judakkut ‘salluneq qimarnguffik’, tassa Egypteni politikkikkut ilertik, ikiortissarsiorfigaat. Taamaattoq Babylonimiut ‘qimarnguffimmik’ tamatuminnga nataqqornat aseruinerattut ilillugu aseruipput. — Esaja 28:14, 17.

5. Upperisarsiorneq eqqunngitsoq tamarmi piuneerunneqarpat Guutip innuttai eqimattatut isigalugit qanoq pissappat?

⁵ “[Jehovap] ullussarsua” Jerusalemimik eqquisoq eqqartuussummut nalitsinni kristumiuunerartunik tunussisunik eqquisumut assersuutaavoq. ‘Babylonersuup’ sinnera, upperisarsiornerup  eqqunngitsup silarsuarmi tamarmi naalagaaffissua, aamma piuneerunneqassaaq. Tamatuma kingorna Saatanip pissutsinik aaqqissuussinerata ajortup sinnera piuneerussaassaaq. Guutilli innuttai eqimattatut isigalugit aniguissapput, taakkuami Jehova qimarnguffigaat. — Saqqummersitat 7:14; 18:2, 8; 19:19-21.

Qimarnguffik — anersaakkut timikkullu

6. Jehovap innuttai qanoq qimarnguffissarsisinnaappat?

⁶ Guutip innuttai allaat maannakkut naggatissap nalaani matumani qanoq qimarnguffissarsisinnaappat? Anersaakkut ittumik qimarnguffissarsisinnaavugut Guutimik mianerinnilluta ‘Jehovap aqqanik ataqqinninnikkut’ aallussilluarlutalu taassuminnga kiffartorfiginninnikkut. (Atuakkit Malaki 3:16-18). Aammattaaq Biibilimi ima allassimavoq: ‘Kinaluunniit Jehovap aqqanik torlorfiginnittoq annaanneqassaaq.’ (Romamiut 10:13) Jehovap aqqanik torlorfiginninneq aamma tamatuma annaanneqarnermik kinguneqarnera imminnut atassuteqarput. Inuillu eqqortuliorusuttorpassuit takusinnaavaat kristumiut ilumoortut ‘Jehovap aqqanik ataqqinnillutillu’ taassuminnga nalunaajaasutut kiffartorfiginnittut aamma taassuminnga kiffartorfiginninngitsut assigiinngissutaat.

7, 8. Ukiuni hundredelinni siullerni kristumiut timikkut qanoq annaanneqarpat, tamannalu nalitsinnut qanoq assingussuteqarpa?

⁷ Annaanneqarnissatsinnulli apeqqutaaginnanngilaq anersaakkut ittumik qimarnguffipput. Timikkut annaanneqarnissaq Guutip innuttaanut neriorsuutigineqarpoq. Ukiumi 66-imi Romamiut sakkutuuisa Cestius Gallusimit siulersorneqartut Jerusalemimik saassussinerisa kingorna pisumit tamanna erserpoq. Jiisusip siulittuutigaa naalliunnartoqangaarfiup ullui taakku ‘ikilisinneqassasut’. (Matthæusi 24:15, 16, 21, 22) Tamanna pivoq Romamiut sakkutuuisa illoqarfik ilimagineqanngitsumik ungusareqqajunnaarmassuk, taamaattumik ‘annattoqarsinnaalerpoq’, tassa kristumiut ilumoortut annaanneqarsinnaalerput. Illoqarfimmit tamatumalu eqqaanit qimaasinnaalerput. Ilaasa kuussuaq Jordani ikaarlugu qaqqanut kuussuup kangiata tungaaniittunut qimarngupput.

⁸ Taamanikkut kristumiut ullumikkullu Guutip innuttai assigiissuteqarput. Ukiuni hundredelinni siullerni kristumiut qimarnguffissarsiorput, aamma Guutip innuttai ullumikkut taamaaliussapput. Taamanikkussamulli sumiiffimmut aalajangersimasumut qimarnguffissarsiussanngillat, kristumiummi ilumoortut nunarsuarmi sumi tamaniipput. ‘Qinikkat’ taakkualu suleqataat ilumoorfiginnittut inuiattut isigalugit kristumiuunerartut tunussisut piuneerussaanerat anigussavaat, Jehova taassumalu peqatigiiffia qaqqarsuartut ittoq qimarnguffigigamikku.

9. Kikkut Jehovap aqqanik puiuisitsiniaasimappat? Assersuuteqarit.

⁹ Kristumiuunerartut piuneerunneqartariaqarput, naalagiartartummi amerlanerit anersaakkut ilisimasaqannginnerannut Guutillu aqqata uumigineqarnerujussuanut pisooqataapput. Ukiuni akullerni Europami Guutip aqqa ilisimaneqarluarpoq. Ateq taanna, naqinnernik hebræerisuunik sisamanik tetragrammimik taaneqartartumik JHVH-mik nutserneqarajuttumik issuagaasoq, aningaasani, illut saqqaanni, atuagarpassuarni Biibilerpassuarnilu allaallu katuullit naaggaartullu oqaluffiini allassimavoq. Ukiunili kingullerni Guutip aqqa Biibilimik nutsikkani allanilu siornatigut atorneqarfigisimasaraluini atorneqarunnaariartorpoq. Tamanna ilaatigut erserpoq katuullit biskoppii ataatsimeersuartut Naalagiarnernut Sakramentinullu katuullini suleqatigiinnit immikkoortunit ‘Guutip aqqa’ pillugu 29. juuni 2008-mik ullulerneqarsimasunik allaffigineqarnerannit. Tamanna tassaavoq katuullit Romalerisut oqaluffiata tetragrammip assigiinngitsunik taaneqartartup “Naalagaq”-mik taarserneqarnissaa pillugu malittarisassaliaat. Vatikani peqqusivoq katuullit naalagiarneranni Guutip aqqa tussiutini qinnutinilu atorneqartarnanilu oqaatigineqartassanngitsoq. Upperisarsiortuni allani kristumiuunerartuni kristumiuuneranngitsunilu siuttuusut inunnut millionilinnut Guutip ilumoortup kinaanera aamma isertorsimavaat.

 Guutip aqqanik illernarsisitsisut sernigineqassapput

10. Ullumikkut Guutip aqqa qanoq ataqqinnittuliorfigineqarpa?

¹⁰ Upperisarsioqatigiinnit allanit allaanerulluinnarlutik Jehovap Nalunaajaasui Guutip aqqanik ataqqinnillutillu qutsissisitsipput. Illernarsisippaat ataqqinnittumik atorneratigut. Jehovap tatiginnitsini nuannaarutigai, innuttanilu pilluaqqujumallugit sernissorumallugillu pisariaqartitsinerat naapertorlugu sunngorsinnaavorluunniit, taamaaliortarporlu. “Imminut qimarnguffissarsiortut isumassortarpai.” — Nahumi 1:7; Apustilit Suliaat 15:14.

11, 12. Itsaq Judami kikkut Jehovap aqqanik illersuippat, ullumikkullu kikkut taamaaliorpat?

¹¹ Itsaq Judakkut amerlanersaat tunussisunngorsimapput, inoqarporli ‘Jehovap aqqanik tatiginnittunik’, imaluunniit ‘Jehovap aqqanik qimarnguffiginnittunik’ (NV). (Atuakkit Sefania 3:12, 13). Aap, Guutip Judakkut ilumuunngitsut pillarmagit taakku taakkualu nunaat Babylonimiunit tigusarinnitsillugit inuit ataasiakkaat, assersuutigalugu Jeremia, Baruki Ebed-Melekilu, asattuunneqarput. Inuiaat tunussisut akornanni inuupput. Allat aallarussaaqqatillutik aalajaattuarput. 539-mi Kr.in.si. Babyloni Kyrosi kunngiutillugu Mediamiunit Persiamiunillu ajugaaffigineqarpoq. Tamatuma kingunitsianngua juutit kinguleruttut nunaminnut utersinnaalersillugit Kyrosi peqqussuteqarpoq.

¹² Pallorfiginninnerup ilumoortup pilerseqqinneqarneranik tamatumannga misiginnittut pillugit Sefania siulittuivoq Jehovap taakku annaatissagai nuannaarutigissagaalu. (Atuakkit Sefania 3:14-17). Nalitsinni aamma taamaappoq. Guutip naalagaaffiata qilammi pilersinneqarnerata kingorna Jehovap tanitat aalajaatsut kinguleruttut Babylonersuarmit anersaakkut aniguisippai. Jehovalu suli taakkuninnga nuannaarutiginnippoq.

13. Inuiannit tamaneersut aniguisitaaneq suna misigaat?

¹³ Nunarsuarmi naassaanngitsumik inuunissamik neriugisallit aamma Babylonersuarmit anipput upperisarsiornikkullu ajoqersuutinit eqqunngitsunit aniguinertik nuannaarutigisinnaallugu. (Saqqummersitat 18:4) Taamaalilluni Sefania 2:3 ullumikkut pingaarnerusumik eqquuppoq: “[Jehova] ujarsiuk nunami maniguuttusi tamassi.” Maniguuttut inuiannit tamaneersut, nunarsuarmi inuunissamik qilaliarnissamilluunniit neriugisaqaraluarunik, maanna Jehovap aqqa qimarnguffigaat.

Guutip aqqa angakkuarniutaanngilaq

14, 15. (a) Inuit ilaasa suut angakkuarniutitut atortarsimavaat? (b) Suna aarnuatut atussanngilarput?

¹⁴ Israelikkut ilaasa naalaffik angakkuarniutitut akeqqamminnut illersuutigisinnaasamissut isigaat. (Jeremia 7:1-4) Siusinnerusukkut Israelikkut isumaqarsimapput taamatut angerutsip illerfia sorsunnermi illersuutigisinnaallugu. (1 Samueli 4:3, 10, 11) Konstantinersuup naqinnerit grækerisuut chi aamma rho, grækerisut taaguutip Kristusip naqinneri siulliit marluk, sakkutuumi eqqornaveeqqutaannut allatsippai neriulluni sakkutuumi sorsunnermi illersorneqaatigissagaat. Aamma saattuaasaq Europami ukiuni 30-ni sorsunnermeersoq takulertornartumi atermik Jehovamik allannertalik suli pigineqarpoq; isumaqartoqarpoq Sverigep kunngiata Gustav Adolf II-ta taanna atorsimagaa.

¹⁵ Guutip innuttaasa ilaasa anersaapilunnit saassunneqartut Jehova qimarnguffigisimavaat taassuma aqqanik nipituumik oqaatiginninnikkut. Sunaluunniilli Guutip aqqanik allassimasoqartoq atorneqassanngilaq angakkuarniutitut imaluunniit aarnuatut, tupinnartuliornikkut illersuutaasinnaasoralugu. Jehovap aqqani qimarnguneq pineqaraangat tamanna pineqarneq ajorpoq.

Ullumikkut qanoq qimarngusinnaasugut

16. Ullumikkut qanoq anersaakkut qimarnguffissarsiorsinnaavugut?

¹⁶ Ullumikkut Guutip innuttaasa ataatsimut isigalugit anersaakkut isumannaatsumiiffigisaat qimarnguffigaarput. (Tussiaat 91:1) “Inussiaq aalajaallunilu silatooq” (NV) ilagiinnilu utoqqaanertat aqqutigalugit isumannaassusermik tamatuminnga navianartorsiortitsisinnaasunut silarsuarmi nalinginnaaleraluttuinnartunut mianersoqquneqartarpugut.  (Matthæusi 24:45-47; Esaja 32:1, 2) Eqqarsaatigeriaruk pigisaleritunermut qanoq mianersoqquneqakulatigisugut, mianersoqqussutillu taamaattut anersaakkut ajoqusinnginnissatsinnut qanoq illersuutigisarsimagivut. Ilorrisimaartutummi eqqasuuteqanngitsutullu pissuseqaleriartuaarsinnaaneq Jehovamut kiffartornitsinni unittoortitsisinnaasoq? Guutip oqaasiani ima allassimavoq: “Sianiitsut nungutitaassutigissavaat eqqasuuteqannginnertik. Uannulli naalattoq aarlerinaatsumik najugaqassaaq eqqissillunilu inuussalluni perlussanik aarlerigisaqarnani.” (Ussatit 1:32, 33) Ileqqussatigut minguitsuuniarsarigutta anersaakkut isumannaatsumiittuarnissatsinnut aamma iluaqutigissavarput.

17, 18. Ullumikkut inuit millionillit Jehovap aqqani qimarngunissaminnut suna iluaqutigaat?

¹⁷ Aamma eqqarsaatigiuk inussiap aalajaatsup Guutip naalagaaffia pillugu nutaarsiassamik nuannersumik nunarsuarmi tamarmi oqaluussissutiginninnissamik Jiisusip peqqussutaanik malinninnissamut tunngatillugu kajumissaarinera. (Matthæusi 24:14; 28:19, 20) Sefaniap eqqaavaa inuit Guutip aqqani qimarnguffissarsiornerminni iluaqutigisinnaasaat. Ima allappoq: “[Taamanikkussamut] inuiaat nutaanik oqaaseqalersissavakka, oqaatsinik minguitsunik, tamarmik Jehovap aqqanik torlorfiginnissinnaaqqullugit suleqatigiilluarlutillu taassuminnga kiffartorfiginnissinnaaqqullugit.” — Sefania 3:9, NV.

¹⁸ Oqaatsit minguitsut taakku suuppat? Oqaatsit minguitsut tassaapput Jehova Guuti taassumalu siunertaa, taassuma oqaasiani isumassarsiarititaasumiittut, pillugit sallusuissutit. Oqartoqarsinnaavoq oqaatsit taakku atortarivut allat ikioraangatsigik Guutip naalagaaffiata suuneranik eqqortumik paasinninnissaannut, tamatumalu Guutip aqqa qanoq illernarsisissagaa, Guutillu kisimi oqartussaanerata qutsissisinneqarnissaata qanoq pingaaruteqartiginera allanut erseqqissaraangatsigu, inuillu aalajaatsut naassaanngitsumik pilluaqqussutisiassaat nuannaarluta eqqartoraangatsigik. Oqaatsit assersuutaasut taakku inunnik taama amerlatigisunik atorneqarnerisa kingunerisaanik ‘Jehovap aqqanik torlorfiginnittut suleqatigiilluarlutillu taassuminnga kiffartorfiginnittut’ amerliartuinnarput. Aap, inuit millionillit nunarsuarmi sumi tamaniittut Jehova qimarnguffigaat. — Tussiaat 1:1, 3.

19, 20. Biibilip nalaani ‘sallunermik qimarnguffimmik’ tatiginninneq qanoq pakatsissutaava?

¹⁹ Silarsuarmi inuit ajornartorsiutinik anigorneqarsinnaarpasinngitsunik akiuisariaqarput. Inuppassuit ajornartorsiutiminnik aaqqinnikkusungaaraluarnerminni inuit naammalluinnanngitsut isumalluutigaat. Politikkikkulluunniit aaqqinneqarnissaat neriuutigisarpaat, soorlu itsaq Israelikkut ilaannikkut inuiaat eqqaamiutik ikiortissarsiarisaraat ilissarsiarisarlugillu. Nalunngilarpulli tamanna Israelikkunnut iluaqutaanngitsoq. Ullumikkullu politikkikkut naalagaaffiit, aamma Naalagaaffiit Peqatigiit, inuit ajornartorsiutaannik tamakkiisumik aaqqiisinnaanngillat. Taava politikkikkut kattuffiit peqatigiillu qimarnguffittut isigissavavut? Taakku Biibilimi siulittuutaasumik ima taaneqarput: ‘Salluneq qimarnguffik’. Pissutissaqarluarluta taamatut taasinnaavavut, taakkuninngami tatiginnittut tamarmik pakatsingaassapput. — Atuakkit Esaja 28:15, 17.

 ²⁰ Qanittukkut Jehovap ulluata nunarsuaq anorersuartut illuni eqqussavaa. Inuit pilersaarutaat aaqqissuussaallu illersuutaassanngillat, soorlu pisuussutit atomimilluunniit sakkussianik eqqorneqatsaaliorluni qimarnguffissiat illersuutaanngitsut. Esaja 28:17-imi ima allassimavoq: “Salluneq qimarnguffigisarsi nataqqornat saggarumaarpaat, isertorfigisarsilu kuuit supputissavaat.”

21. Ukiumut 2011-mut allassimaffimmik maleruaaneq qanoq iluaqutigisinnaavarput?

²¹ Maannakkut siunissamilu pisussat nalaanni Guutip innuttai Guutiminni, Jehovami, isumannaatsumiivissapput. Sefaniap aqqa, isumaqartoq “Jehova isertuisimavoq”, isertorfimmut piviusumut tamatumunnga tunngavoq. Taamaattumik naleqquppoq ukiumut 2011-mut allassimaffimmi ima pitsaasumik siunnersuuteqarmat: ‘Jehovap aqqa qimarnguffigiuk.’ (Sefania 3:12, NV) Maannangaaq Jehovamik tatiginnilluinnarnikkut Jehovap aqqa qimarnguffigisinnaavarput qimarnguffigisariaqarlugulu. (Tussiaat 9:11) Oqaatsit isumassarsiarititaasut uku ullut tamaasa eqqarsaatigisartigik: “[Jehovap] aqqa pallittaalisap napasuliaatut ippoq, iluartoq tassunga qimaanasuartarpoq isumannaatsumilu inissittarluni.” — Ussatit 18:10.

Eqqaamavigit?

• Ullumikkut Jehovap aqqa qanoq qimarnguffigisinnaavarput?

• Sooq ‘salluneq qimarnguffik’ tatigissanngilarput?

• Siunissami qimarnguffik sorleq qularnaappa?

[Atuaqqissaarnermi apeqqutit]

[Qupp. 13-mi issuagaq]

Ukiumut 2011-mut una allassimaffiuvoq: ‘Jehovap aqqa qimarnguffigiuk.’ — Sefania 3:12, NV.