Misilinneqarnerit suulluunniit naammagalugit atornissaannut nakussatsitaaneq

“Tamaasa pissatsitsisikkut atussallugit sapinngilakka.” — FILIPPIMIUT 4:13.

1. Sooq Jehovap kiffai assigiinngitsorpassuartigut misilinneqartarpat?

JEHOVAP innuttai arlaatigut misilinneqarajupput. Misilinneqarnerit ilaat uagut nammineq naammalluinnanngissutitsinnik silarsuarmiluunniit inuuffigisatsinni pissutsinik atuuttunik pissuteqartarput. Allat Guutimut kiffartortuusut kiffartortuunngitsullu ‘akerariinnerannik’ pissuteqartarput. (1 Mosesi 3:15) Inuiaat oqaluttuarisaanerata aallartinneraniilli Guutip kiffani aalajaatsut upperisaq pissutigalugu malersugaanermik allallu ajortumik sunniiniarnerannik akiuinissaannut allatullu misilinneqarnerminni pinertusaarnissaannut ikiortarsimavai. Taassuma anersaava illernartoq uaguttaaq taamatut nakussatsissutigisinnaavarput.

Upperisaq pissutigalugu malersugaanermik akiuinissamut nakussatsitaaneq

2. Upperisaq pissutigalugu malersuinermut suna siunertaasarpa, qanorlu malersuisoqarsinnaava?

² Upperisaq pissutigalugu malersuinermut siunertaasarpoq upperisap pineqartup nungutinniarnissaa, allanut anngutinnginnissaa tamatuminngaluunniit upperinnittut upperisaminnik taamaatitsisinnissaat. Assigiinngitsorpassuartigut malersuisoqarsinnaavoq — malunnartorsuarmik malunnarpianngitsumilluunniit. Biibilimi Saatanip saassussineri løvip pulateriaarsuullu saassussinerannut assersuunneqarput. — Atuaruk Tussiaat 91:13.

3. Løvitut pulateriaarsuttullu saassussinerit ilisarnaataat suuppat?

³ Saatani løvitut qaasuttutut malunnartorsuarmik saassussisarsimavoq nakuuserneq, parnaarussineq inerteqquteqarnerlu iluaqutigalugit. (Tussiaat 94:20) Jehovas Vidners Årbog-imi periaaseq tamannarpiaq pillugu nalitsinneersunik allaaserisarpassuaqarpoq. Guutip innuttai sumiiffinni assigiinngitsorpassuarniittut inuppassuarnit inatsisaatsunit, palasinit politikerinilluunniit ingasaassiniartunit siulersorneqarajuttunit, saassunneqartarsimapput. Taamatut løvisut saassussinerit nalunaajaasut ikittunnguit uppernerminnik taamaatitsissutigisimavaat. Aamma Diaavulu pulateriaarsuttut terlinganeerisutut Guutip kiffaanik malunnaarsaarluni saassussisarpoq taakkua isumaannik aserorsaaniarluni taakkuluunniit nammineq piumasamisut iliortinniarlugit. Taamatut saassussinermut siunertaavoq uagutsinnik anersaakkut sanngiillisitsiniaanissaq. Guutilli anersaava illernartoq iluaqutigalugu malersueriaatsinik marlunnik taakkuninnga akiuisinnaavugut.

4, 5. Malersugaanissamut qanoq pitsaanerpaamik piareersartoqarsinnaava, aamma sooq? Assersuuteqarit.

⁴ Siunissami qanoq malersugaariataarsinnaanermik takorluuiniarneq malersugaanissamut piareersarniarluni iliuuserineqarsinnaasut pitsaanerpaartarinngilaat. Tamatta naluarput qanoq malersugaajumaarnerluta, taamaattumik iluaqutiginavianngilarput immaqa pinngisaannartussamik isumakuluutiginnikkutta. Iluaqutigisinnaasatsinnilli allamik iliuuseqarsinnaavugut. Malersugaanerminni pinertusaarsimasut pinertusaarsimapput Guutimut kiffaasut aalajaatsut qanoq ilillutik assuarnaattuarsimanerat pillugu oqaluttuat Biibilimiittut eqqarsaatigeqqissaartarnerisigut,  aamma Jiisusip ajoqersuutaasa maligassiaatalu eqqarsaatigeqqissaartarnerisigut. Taamaaliortarnertik Jehovamik asanninnerulissutigisinnaasimavaat. Asanninnertillu tamanna misilinneqarnermik naammagalugit atornissaannut iluaqutigisimavaat.

⁵ Assersuutigeriartigit qatanngutivut arnat marluk Malawimiittut. Taakku partiimut ilaasortaanermut uppernarsaatinik pisitinniarneqarlutik inuppassuarnit tigusaapput, unatagaallutik, atisaajarneqarlutik pinngitsaalisaallutillu arneriffigineqarnissamik sioorasaarneqarlutik. Inupalaanit taakkunannga salluliorfigineqarlutik oqarfigineqarput allaat Betelimi suleqataasut partiimut ilaasortaanermut uppernarsaatinik pisisimasut. Qatanngutit arnat taakku qanoq akippat? “Uagut Jehova Guuti kisiat kiffartorfigaarput. Taamaattumik qatanngutit immikkoortortaqarfimmiittut uppernarsaatinik pisisimanersut apeqqutaatinngilarput. Toqussagaluarutsigulluunniit akuersiinnarnavianngilagut!” Qatanngutit arnat taamatut sapiillutik akereersullu iperagaapput.

6, 7. Jehovap kiffani malersugaanerminni pinertusaarnissaannut qanoq nakussatsittarpai?

⁶ Apustilip Paulusip eqqaavaa kristumiut Thessalonikamiittut ‘annikilliungaaraluarlutik’ ‘Anersaami Illernartumi nuannaarlutik’ sallusuissummik ilassinnittut. (1 Thessalonikamiut 1:6) Aap, kristumiorpassuit — itsaq ullumikkullu — misilinneqarsimasut misilinneqarnerminnilu pinertusaarsimasut oqaluttuartarput misilinneqarnerpaaffimminni qamuuna eqqissisimasarlutik. Taamatut eqqissisimanertik, Guutip anersaavata illernartup inerititaanut ilaasoq, uummatiminnut isumaminnullu illersuutigaat. (Galatiamiut 5:22) Aap, Jehovap anersaani illernartoq kiffami misilinneqarnerminni pinertusaarnissaannut silatusaarnissaannullu ikiornissaannut atortarpaa. *

⁷ Inuit Jehovap Nalunaajaasuinik maluginiaasartut taakkua peqqarniitsumik malersugaagaluarlutik assuarnaattuarnissaminnik aalajangiusimannilluinnartarnerat tupigisimavaat. Nalunaajaasut nalinginnaanngitsumik nukissaqarpasittarnerarpaat, aammami nalinginnaanngitsumik nukissaqartinneqartarmata. Apustilip Petrusip ima uppernarsaavigaatigut: “Pilluarpusi Kristusip aqqa pissutigalugu mitaatigineqarussi naalannassutsip anersaavata, tassa Guutip Anersaavata, najormasi.” (1 Petrusi 4:14) Guutip najoqqutassiaanik naapertuilluartunik maleruaanerput pillugu malersorneqaraangatta, tamanna taassumannga akuerineqarnitsinnut ersiutaasarpoq. (Matthæusi 5:10-12; Johannesi 15:20) Nuanningaarami nalunagu Jehovamit pilluaqqusaalluni!

Allat sunniiniarnerannik akiuinissamut nakussatsitaaneq

8. (a) Josvap Kalebillu allanit sunnerniarneqarnerminnik suna akiuisinnaanngussutigaat? (b) Josvap Kalebillu maligassiaat sumik ilinniarfigisinnaavarput?

⁸ Kristumiut aamma malunnaarsaarnerusumik akerlilersorneqartarput ajortumik sunnerniarneqarlutik. Jehovalli anersaava silarsuup anersaavanit pissaaneqarnerungaarmat mitaatigineqaraluarluta, salluliuutigineqaraluarluta allallu najoqqutassiaannik maleruaatinniarneqaraluarluta aalajaassinnaavugut. Assersuutigalugu Josvap Kalebillu Kana’animut alapernaarsuiartortitanik qulinik allanik sunaana akerliliisinnaanngussutigigaat? Tassa anersaaq illernartoq ‘allaasumik anersaaqalissutigisaat’, imaluunniit allatut isiginnittaaseqalissutigisaat. — Atuakkit 4 Mosesi 13:30; 14:6-10, 24.

9. Sooq kristumiut amerlanerussuteqartunit allaanerujumasariaqarpat?

⁹ Aamma Jiisusip apustiliisa anersaaq illernartoq Guutip inunnit, inuit amerlanersaannit upperisaq ilumoortoq pillugu ajoqersuisutut isigineqartunit, naalannerunissaanut nakussatsissutigaat. (Apustilit Suliaat 4:21, 31; 5:29, 32) Inuit amerlanersaat akerleriittoqaleqqunagu amerlanerussuteqartut iliortarnerattut iliorumanerusarput. Kristumiulli ilumoortut eqqortuliornerusutut qularutigiunnaarsimasaminnik aalajangiusimannittariaqartarput.  Guutilli nukinganit sulisumit nakussatsinneqartarnertik iluaqutigalugu allaanerunissaminnut sapiissuseqartarput. (2 Timotheusi 1:7) Ilaatigut qanoq allanit sunnerniarneqarsinnaanersugut sunnerniarneqarnivullu qanoq nakkaannarfiginaveersaarsinnaanerivut sammeriartigu.

10. Qanoq nalaataqartoqarsinnaava?

¹⁰ Inuusuttut ilaat immaqa nalornisoortarput ikinngutimik ilaat Biibilimut naapertuutinngitsumik iliuuseqarsimanera paasigaangamikku. Immaqa misigisarput ikinngutertik utoqqaanertanut ikioqqugunikku ikinngutiminnit tatigineqarunnaassallutik; taamaattumillu kukkusumik ilumoorfiginninnertik pissutigalugu oqarumaneq ajorput. Immaqa allaat unioqqutitsisimasup ikinngutini iliuuserisimasaminik isertueqqullugit kimigiiserfigai. Soorunami taamatut nalornisoortartut inuusuttuinnaanngillat. Aamma inersimasut ikinngutimik ilaquttamilluunniit eqqunngitsuliornera pillugu ilagiinni utoqqaanertanut saaffiginninnissartik sapernartissinnaavaat. Kristumiulli ilumoortut taamatut pisoqartillugu susariaqarpat?

11, 12. Ilagiinniittut ilaata eqqunngitsuliorsimanerminik isertueqquppatit suguit pitsaanerpaassava, aamma sooq?

¹¹ Ima pisoqartoq takorlooriaruk: Qatanngutip angutip Aleximik atillip paasilerpaa ilagiinni ikinngutimi ilaat Steve pornografiimik isiginnaarnermik ileqquliussisimasoq. Alexip Steve oqarfigaa tamatuminnga ileqquliussisimammat isumaalugalugu. Stevelli tuini kiviimiinnarpai. Alexip utoqqaanertanik oqaloqateqaqqulluni kajumissaarmani Stevep akivaa ilumut ikinngutigiikkunik allanut oqarnavianngitsoq. Alexip ikinngutini annaajumanagu oqarnaveersaaginnassava? Immaqa eqqarsarpoq Steve misiarpat utoqqaanertat kina arlartik upperissaneraat. Aappaatigulli oqarnaveersaaruni pissutsit pitsaanerulernavianngillat. Ilami Steve naggataatigut Jehovamut attaveqarunnaarsinnaavoq. Alexi silatusaassaaq ussat una eqqarsaatigiguniuk: “Inunnik qunugisaqarneq napiaaniutinngortarpoq, [Jehovamilli] tatiginnittoq aarlerissutissaqanngilaq.” (Ussatit 29:25) Alexi qanoq iliussava? Steve saaffigeqqissinnaavaa ajornartorsiutaalu pillugu ammasumik, inussiarnersumilli, oqaloqatigalugu. Taamaaliussaguni sapiissuseqartariaqarpoq. Aammali imaassinnaavoq Stevep ajornartorsiutini massakkut oqaloqatigiissutigerusukkaa. Alexip Steve utoqqaanertanik oqaloqateqaqqullugu kajumissaaqqittariaqarpaa, aamma oqarfigisariaqarpaa sivitsorpallaartinnagu oqaloqateqarnianngippat nammineq taakku ajornartorsiut pillugu paasitikkumaarlugit. — 3 Mosesi 5:1.

¹² Illit tamatumunnga assingusumik nalaataqassagaluaruit imaassinnaavoq ikinngutit illit ikiuiniarnerit pillugu aallaqqaammut qujamasunnavianngitsoq. Immaqali piffissap ingerlanerani paasilissavaa imminut iluaqutaasussamik iliuuseqarsimasutit. Unioqqutitsisoq ikiorneqarnissaminik akuerinnikkuni imaassinnaavoq illit sapiinnerit ilumoorfiginninnerillu pillugu qujamasungaalersoq. Unioqqutitsisulli manngertilluni illit utoqqaanertanut saaffiginninnerit pillugu kamaakkunnaarumanngippatit, taava immaqa taanna ikinngutissaqqissuusimassanngilaq. Ikinngutiginerpaasatsinnik, Jehovamik, nuannaartitsinissaq  eqqortuliornerujuaannassaaq. Taanna pingaarnerpaatittarutsigu taassuminnga asannittut allat ilumoorfiginninnerput pillugu uagutsinnik ataqqinnilissapput, uagullu taakku ikinngutigilersinnaavavut ilumoortut. Diaavulu ilagiinni kristumiuni inissaqartinngisaannartariaqarparput. Inissaqartikkaluarutsigu Jehovap anersaava illernartoq aliasutsingaassagaluarparput. Ilagiilli minguitsuutittuarnerisigut anersaaq suleqatigaarput. — Efesosimiut 4:27, 30.

Misilinneqarnerit suulluunniit naammagalugit atornissaannut nakussatsitaaneq

13. Jehovap innuttai qanoq misilinneqartarpat, aamma sooq taama misilinneqarajutsigaat?

¹³ Assigiinngitsorpassuit misilinneqaataasinnaapput — soorlu aningaasatigut annaasaqarneq, suliffeerunneq, ajunaarnersuarmit nalaanneqarneq, perululluni napparsimalerneq asasamilluunniit annaasaqarneq. ‘Ulluni atugarliungaarfiusuni’ inuugatta tamatta siusinnerusukkut kingusinnerusukkulluunniit arlaatigut misilinneqarnissarput naatsorsuutigisariaqarparput. (2 Timotheusi 3:1) Misilinneqarnitsinni paatsiveerutinnginnissarput pingaaruteqarpoq. Anersaaq illernartoq misilinneqarnerit suulluunniit naammagalugit atornissaannut nakussatsissutigisinnaavarput.

14. Jobip misilinneqarnermi naammagalugit atornissaannut suna nakussatsissutigaa?

¹⁴ Jobi alianartunik nalaataqaqattaarpoq. Inuussutissarsiutini, qitornani ikinngutinilu annaavai, perululluni napparsimalerpoq, aamma nulia Jehovamik tatiginnikkunnaarpoq. (Jobi 1:13-19; 2:7-9) Jobili Elihumit tuppallersarneqarpoq. Elihup tusarliussaa aamma Jehovap nammineq Jobimut tusarliussaa ima eqikkarneqarsinnaapput: “Unillutit Guutip tupinnartuliai maluginiakkit!” (Jobi 37:14) Jobip misilinneqarnermi naammagalugit atornissaannut suna iluaqutigaa? Uagullu misilinneqarnitta naammagalugit atornissaannut suna iluaqutigisinnaavarput? Jehovap anersaavata illernartup nukingatalu qanoq malunniuttarnerannik eqqaamannillunilu eqqarsaatiginneqqissaartarneq. (Jobi 38:1-41; 42:1, 2) Immaqa inuuninni pisimasunik erseqqilluinnartumik Guutip ilinnik soqutiginninneranut ersiutaasunik eqqaamasaqarputit. Taassuma ullumikkut suli soqutigaatit.

15. Paulusip misilinneqarnermi naammagalugit atornissaannut suna nakussatsissutigaa?

¹⁵ Apustili Paulusi uppernini pillugu inuunerminik navianartorsiortitsisunik assigiinngitsorpassuarnik misilinneqarnermini pinertusaarpoq. (2 Korinthimiut 11:23-28) Artornartunik tamakkuninnga atugaqartilluni eqqarsartaatsikkut misigissutsikkullu qanoq ililluni oqimaaqatigiissaarisinnaajuarsimava? Jehovamut qinusarnermigut taassuminngalu tatiginnilluinnarnermigut. Paulusi uppernini pillugu toqutaanerminik kinguneqarunartumik misilinneqartilluni ima allappoq: “[Naalakkap] ikiorpaanga pissatsillungalu nalunaarummik nalunaajaanera naammassisinnaatillugu, tamanna inuianni tamani tusarneqarsinnaaqqullugu; løvillu qarnanit annaanneqarpunga.” (2 Timotheusi 4:17) Taamaattumik Paulusip nammineq misigisimasani naapertorlugit uppeqatini neriorsoqqissaarsinnaavai ‘sumilluunniit isumakuluuteqartariaqanngitsut’. — Atuakkit Filippimiut 4:6, 7, 13.

16, 17. Jehovap ullumikkut kiffani misilinneqarnerminnik naammagittarlutik atuinissaanut ilaatigut qanoq nakussatsittarpai?

 ¹⁶ Qatanngutip arnap pioneriusup Roxanamik atillip Jehovap isumassuinera nammineq misigisimavaa. Taanna ataatsimeersuariarsinnaajumalluni ullualunni sulinngiffeqarsinnaanerluni sulisitsisuminut aperimmat, sulisitsisuata kamalluni akivaa ataatsimeersuariarpat soraarsikkumallugu. Taamaakkaluartoq Roxana ataatsimeersuariarpoq, soraarsitaannginnissanilu Jehovamut qamannga pisumik qinnutigereeramiuk qamuuna eqqissiallappoq. Sulisitsisuatali taanna ataasinngornermi suliartoqqimmat oqarnermisut soraarsippaa. Roxana isumakululerpoq. Ilaquttani pilersorsinnaajumallugit aningaasarsiakikkaluarluni tassani suliinnarnissani pisariaqartippaa. Jehovamut qinoqqippoq, eqqarsarporlu taanna anersaakkut pisariaqartitaminik ataatsimeersuarnermi matussuseereermat aamma timikkut pisariaqartitaminik isumaginnissinnaassasoq. Angerlamut aqqutaani fabrikkini mersorfissornermik misilittagalinnik sulisussarsiortunik allagartaliisoqarsimasoq takuaa, tassanilu sulilernissaminut qinnuteqarpoq. Direktørip paasereeraluarlugu Roxanap tamakku misilittagaqarfiginngikkai taanna atorfinitsikkumavaa akissarsiarisarsimasaasa marloriaatingajaannik akissarsiaqartartussanngortillugu. Roxana misigivoq qinnutini akineqartut. Pilluaqquneqaatigisaasali nuannernersaat tassaavoq suleqatitaami ilarpassuisa nutaarsiassaq nuannersoq pillugu oqaluussiffiginissaannut periarfissaqalernera. Oqaluussiffigisami ilaat tallimat, aamma direktøri, sallusuissummik ilassinnipput kuisillutillu.

¹⁷ Ilaannikkut immaqa qinnutivut ingerlaannaq ilimagisatsittulluunniit akineqarpasinneq ajorput. Ingerlaannaq ilimagisatsittulluunniit akineqarpasinngippata qularnanngitsumik tamatumunnga pissutissaqarluarsimassaaq. Jehovap tamatumunnga pissutaasoq naluneq ajorpaa, uagulli tamatumunnga pissutaasoq immaqa aatsaat kingusinnerusukkut paasisarparput. Mannali qularnanngilaq: Guutip kiffani aalajaatsut imminiiginnarneq ajorpai. — Hebræerit 6:10.

Misilinneqarnerit usserneqarnerillu naammagalugit atornissaannut nakussatsitaaneq

18, 19. (a) Sooq misilinneqartarlutalu usserneqartarnissarput naatsorsuutigisinnaavarput? (b) Misilinneqarnerit naammagalugit qanoq atorsinnaavigit?

¹⁸ Jehovap kiffaasa usserneqartarnertik, nikallungasarnertik, malersugaasarnertik allanillu sunnerniarneqartarnertik tupigineq ajorpaat. Silarsuaq ataatsimut isigalugu uagutsinnut akeqqersimaarpoq. (Johannesi 15:17-19) Anersaarli illernartoq Guutimut kiffartornitsinni unamminiarnartut suulluunniit naammagalugit atornissaannut nakussatsissutigisinnaavarput. Jehovap artukkatsinnik usserneqartinnavianngilaatigut. (1 Korinthimiut 10:13) Iperarnavianngilluinnarlutalu imminiiginnarnavianngilluinnarpaatigut. (Hebræerit 13:5) Oqaasianut isumassarsiarititaasumut naalanneq illersuutigalugulu nakussatsissutigisarparput. Aamma taassuma anersaavata uppeqativut sunnersinnaavai pisariaqartitsinerpaaffitsinni uagutsinnik ikiuisillugit.

¹⁹ Qanortoq tamatta qinusarnikkut Biibilimillu atuaqqissaartarnikkut anersaaq illernartoq nakussatsissutiginiartarisigu. Qanortoq ‘tamatigut sakkortuumik nakussatsinneqartuarisa Guutip pissaaneratigut naalannartukkut tamatigut nikallujuitsooqqulluta kamagittartooqqullutalu’ nuannaarluta. — Kolossemiut 1:11.

[Quppernerup ataani ilanngussaq]

Qanoq akissavit?

• Malersugaanerup naammagalugu atornissaanut qanoq piareersarsinnaavit?

• Allap eqqunngitsuliaminik isertueqquppatit qanoq iliussavit?

• Misilinneqaraangavit suna qularutiginngilluinnartarsinnaaviuk?

[Atuaqqissaarnermi apeqqutit]

[Qupp. 30-mi assiliartaq]

Josva Kalebilu sumik ilinniarfigisinnaavavut?

[Qupp. 31-mi assiliartaq]

Ikinngut eqqunngitsuliortoq qanoq ikiorsinnaaviuk?