Ussernartunik akiuinissamut nikallungajunnaarnissamullu nakussatsitaaneq

‘Anersaap Illernartup tikippasi pissatsitaajumaarpusi.’ — APUSTILIT SULIAAT 1:8.

1, 2. Jiisusip ajoqersukkani sumik iluaqutissikkumaarlugit neriorsorpai, aamma sooq tamanna pisariaqartippaat?

JIISUSIP nalunngilaa peqqussutigisani tamaasa ajoqersukkami nammineerlutik maleruarsinnaanngikkaat. Qanoq oqaluussisoqartiginissaa, akerlilersuisut kikkuunerat inuillu sanngiissusiat eqqarsaatigalugit erseqqippoq taakku nukimmik nalinginnaanngitsumik pisariaqartitsisut. Taamaattumik Jiisusip qilalianngitsiarluni ajoqersukkani ima neriorsoqqissaarpai: “[Anersaap] Illernartup tikippasi pissatsitaajumaarpusi,  nalunaajaasigissavassilu Jerusalemimi Judæamilu tamarmi Samariamilu nunarsuullu isua tikillugu allaat.” — Apustilit Suliaat 1:8.

² Neriorsuutip tamatuma eqquunnera aallartippoq ukiumi 33-mi piinsip ulluani Jiisusip Kristusip ajoqersugaasa anersaaq illernartoq Jerusalemip ajoqersuutiminnik tamakkernissaanut pissatsissutigimmassuk, imaluunniit nakussatsissutigimmassuk. (Apustilit Suliaat 4:20) ‘Ullut tamaasa pissutsit aaqqissuussaanerata naggataatungaa’ tikillugu Jiisusip ajoqersugaasa aalajaatsut nukik Guutimeersoq taanna pisariaqartilluinnassavaat. — Matthæusi 28:20, NV.

3. Nukik Jehovameersoq qanoq iluaqutigisarparput?

³ Jiisusip ajoqersukkani neriorsorpai ‘Anersaap Illernartup tikippatik pissatsitaajumaartut’. Tamatumani erserpoq anersaaq illernartoq uagutsinnut sunniuteqartartoq. Sunniuteqaraangat nakussatsitaasarpugut. Taamaattumik Guutip anersaava tassaavoq nukik arlaannut sunniuteqartartoq Guutip piumasaa pisinnaaqqullugu. Anersaaq illernartoq kallerup-inneranut batteriimut immiunneqartartumut assersuunneqarsinnaavoq. Batterii taamaalilluni nukimmik immerneqartarpoq. Nukik Jehovap anersaani illernartoq iluaqutigalugu kiffaminut tunniuttagaa tamatta immikkut kristumiutut tunniulluinnarnitsinnik eqqortitsisinnaannguutigisarparput pisariaqaraangallu uagutsinnut ajortumik sunniuteqarsinnaasunik akiuisinnaannguutigisarlutigu. — Atuakkit Mika 3:8; Kolossemiut 1:29.

4. Allaaserisami matumani suut sammissavavut, aamma sooq?

⁴ Nukik anersaaq illernartoq aqqutigalugu pisartagarput qanoq malunniuttarpa? Anersaap illernartup sunissamut kajumissisittarpaatigut? Guutimut aalajaalluta kiffartorniarluta ilungersornitsinni assigiinngitsorpassuarnik ajornartorsiuteqartarpugut — Saatanimit taassumaluunniit pissutsinik aaqqissuussineranit pilersinneqartunik uagulluunniit nammineq naammalluinnanngissutsitsinnik pissuteqartunik. Ajornartorsiutit tamakkua anigorniarnissaat pingaaruteqarpoq kristumiuujuassagutta, oqaluusseqataajuassagutta Jehovamullu attaveqarluartuassagutta. Anersaaq illernartoq ussernartunik akiuinissamut, qasoqqajunnaarnissamut nikallungajunnaarnissamullu qanoq iluaqutigisinnaaneripput misissoriartigu.

Ussernartunik akiuinissamut nakussatsitaaneq

5. Qinuneq qanoq nakussatsissutigisinnaavarput?

⁵ Jiisusip ajoqersukkani ima qinusaqqullugit ilinniartippai: ‘Ussernartumut pisinnata, ajortumilli annaatsigut.’ (Matthæusi 6:13) Jehovap kiffami aalajaatsut tamatuminnga qinnuigippanni taakku imminiiginnarnavianngilai. Pisimasumi allami Jiisusi oqarpoq “Ataatap qilammiittup imminut qinusut Anersaamik Illernartumik tuniumaarai”. (Lukasi 11:13) Jehovap eqqortuliorsinnaaniassagatta anersaaminik nakussatsinniarluta neriorsuisimanera nalunagu eqqissiallannangaarami! Soorunami imaanngilaq Jehovap usserneqarnissarput pinaveersaartissagaa. (1 Korinthimiut 10:13) Ussernartorsioraangattali ilungersorluta qinusariaqartassaagut. — Matthæusi 26:42.

6. Jiisusip Saatanip ussiiniutai akioramigit suut atorpai?

⁶ Diaavulu ussiiniaqattaarmat Jiisusi Allakkanit Illernartunit issuaasaqattaarpoq. Erseqqippoq Jiisusip Guutip oqaasia eqqarsaatigigaa ima akigami: “Allassimavoq: . . . Allassimavortaaq: . . . Nigorit, Saatani! Allassimavormi: ‘[Jehova] Guutit pallorfigissavat taannalu kisiat kiffartuullugu.’” Jiisusi Jehovamik asannikkami taassumalu Oqaasianik nuannarinnikkami Diaavulup ussiiniutaanik itigartitsisinnaavoq. (Matthæusi 4:1-10) Jiisusi ussernartunik akiuisaqattaareermat, Saatanip taanna qimappaa.

7. Biibili ussernartunik akiuinissamut qanoq iluaqutigisarparput?

⁷ Jiisusip Diaavulup ussiiniutai Guutip oqaasia iluaqutigalugu akiormagit uagut taamaaliortariaqarnerungaarpugut. Aap, Diaavulu taassumalu ussiiniutai akiorniarlugit iliuuserisinnaasarput siulleq tassaavoq Guutip najoqqutassiai pillugit ilinniarniarluta taakkuninngalu maleruaaqqissaarniarluta aalajangerneq. Inuppassuit Biibili pillugu paasisaqarnerulernertik Guutillu ilisimassusianik naapertuilluarneranillu paasinninnerulerlutillu pingaartitsinerulernertik kajumississutigalugit Guutip najoqqutassiai malillugit inuulersimapput. Aap, “Guutip oqaasia” ‘uummatip eqqarsaataanik isumaanillu’ naliliisinnaassuseqarpoq.  (Hebræerit 4:12) Inuup Biibilimi allassimasunik atuarlunilu eqqarsaatiginninnerujartortilluni ‘sallusuissut Jehovamit pisoq paasisaqarfiginerujartuinnartarpaa’. (Danieli 9:13) Taamaattumik silatusaassaagut allassimaffiit uagut nammineq sanngiissutitsinnut tunngasut eqqarsaatigeqqissaartarutsigit.

8. Qanoq ililluta Guutip anersaavanik illernartumik pisinnaavugut?

⁸ Jiisusi ussernartunik akiuisinnaavoq Allakkat pillugit ilisimasaqarnini pissutigiinnarnagu aammali ‘Anersaamik Illernartumik ilumioqangaarnini’ pissutigalugu. (Lukasi 4:1) Uagut taassumatut nakussatsitaajumalluta Jehovap anersaaminik illernartumik tunisinnaajumalluta aaqqissuussaasa tamarmik tamakkiisumik iluaqutiginiarnerisigut taassumunnga attaveqarluarnerulertariaqarpugut. (Jaaku 4:7, 8) Iluaqutigisinnaasatta ilagaat Biibilimik atuaqqissaartarneq, qinusarneq uppeqatinillu peqateqartarneq. Ilarpassuatta aamma paasisimavaat kristumiutut sammisassanik ulapputeqartarnissaq pingaaruteqartoq, isumatta eqqarsaatinik anersaakkut ittunik ineriartornartunik immersornissaanut tamanna iluaqutigisaratsigu.

9, 10. (a) Kristumiut qanoq usserneqarajuppat? (b) Eqqarsaatiginneqqissaartarneq qinusarnerlu qasoqqagaluarlutilluunniit ussernartunik akiuinissamut qanoq nakussatsissutigisarsinnaavigit?

⁹ Eqqunngitsuliornissamut ussernartut suut illit akiortariaqarpigit? Aappaqaruit, illit aapparinngisavit qaninniarujoornissaanut ussernartorsiornikuuit? Aappaqanngikkuit, allamik upperisalimmik aappartaarusunnikuuit? Fjernsyneraanni interneteraanniluunniit minguttuumik isiginnaarnissamut ussernartorsiuleriataartoqarsinnaavoq. Illit tamanna misiginikuugukku, taamatut pisoqarmat qanoq periarpit? Silatusaarnerussaaq eqqarsaatigeqqissaassallugu ataasiaannarluni eqqunngitsulioraanni eqqunngitsuliortoqaqqissinnaasoq, tamannalu ingasattumik ajortuliornermik kinguneqarsinnaasoq. (Jaaku 1:14, 15) Eqqarsaatigiuk taamatut ilumuunngitsulioraluaruit Jehovap, ilagiit ilaquttavillu tamanna qanoq anniaatigitigissagaat. Najoqqutassianilli Guutimeersunik ilumoorfiginnittuarnikkut ilerasuuteqanngittuartoqarsinnaavoq. (Atuakkit Tussiaat 119:37; Ussatit 22:3). Taamatut ussernartorsioraangavit, usserneqarninnik akiuinissannut nakussatsinneqarnissavit qinnutigisarnissaa aalajangiusimajuk.

¹⁰ Diaavulup ussiiniutaanut tunngatillugu allamik eqqaamasassaqarpugut. Saatanip Jiisusi inoqajuitsumi ulluni 40-ni iisinnginniartillugu usserpaa. Qularnanngitsumik Saatani Diaavulu eqqarsarsimassaaq maanna piffissaalluartoq Jiisusip assuarnaassusianik misiliinissamut. (Lukasi 4:13, NV) Saatanip uaguttaaq assuarnaassutsitsinnik misiliinissamut qaqugukkut imminut piffissaalluarnersoq eqqumaffigisarpaa. Taamaattumik pingaaruteqarluinnarpoq anersaakkut nukittujuarnissarput. Saatani usserniakkami sanngiinnerpaaffiani saassussigajuppoq. Taamaammat qaqugukkulluunniit qasoqqallutaluunniit nikallungagaangatta Jehovap illersuutaasumik ikiuinissaata anersaavatalu illernartup qinnutigisarnissaat aalajangiusimalluinnartariaqarparput. — 2 Korinthimiut 12:8-10.

Qasoqqajunnaarnissamut nikallungajunnaarnissamullu nakussatsitaaneq

11, 12. (a) Sooq ullumikkut inuppassuit nikallungalertarpat? (b) Nikallungajunnaarnissamut suna nakussatsissutigisinnaavarput?

¹¹ Naammalluinnanngitsuugatta ilaannikkut nikallungalertarpugut. Ingammik ullumikkut, piffissarmi inuuffigisarput immikkut sukanganarami. Piffissaq inuiannut immaqa aatsaat taama ajornartorsiorfiutigisoq inuuffigaarput. (2 Timotheusi 3:1-5) Harmagedoni qanilliartortillugu aningaasatigut, misigissutsikkut allatigullu ajornartorsiutit amerligaluttuinnarput. Taamaattumik tupigissanngilarput kristumiut ilaasa ilaquttaminnik isumaginnillutillu pilersuinissamut pisussaaffimminnik naammassinninnissartik ajornakusoortinnerujartuinnarmassuk. Qasulluinnarput nanertugaasutullu, immaqalu allaat nukissaarutivissutut, misigalutik. Illit taamatut tatineqaruit, tamanna qanoq ilillutit naammagalugu atorsinnaaviuk?

¹² Eqqaamajuk Jiisusip ajoqersukkani neriorsorai “ikiuisussamik” (NV) — Guutip anersaavanik illernartumik — aallartitsivigiumaarlugit. (Atuakkit Johannesi 14:16, 17). Anersaaq taanna  nukiuvoq qilammi nunamilu sakkortunerpaaq. Taanna iluaqutigalugu Jehovap misilinneqarnerit suulluunniit naammagalugit atornissaannut pisariaqartitavut “akimungaarlugit” nakussatsissinnaavaatigut. (Efesosimiut 3:20) Apustili Paulusi naapertorlugu ‘tamatigut annikilliortitaagaluarluta’ taanna tutsuigisarutsigu “pissaaneq asseqanngitsoq” pisassavarput. (2 Korinthimiut 4:7, 8) Jehovap neriorsunngilaatigut tatineqarunnaassasugut, neriorsoqqissaarpaatigulli anersaani iluaqutigalugu tamatuma naammagalugu atornissaanut nakussatsikkumaarluta. — Filippimiut 4:13.

13. (a) Arnaq inuusuttoq atukkami imaannaanngitsut naammagalugit atornissaannut qanoq nakussatsinneqartarpa? (b) Allat tamatumunnga assingusumik nakussatsinneqartartut pillugit atuarlutilluunniit tusagaqarnikuuit?

¹³ Assersuutigisinnaavarput qatanngut arnaq 19-inik ukiulik pioneriusoq Stephaniemik atilik. Taanna aqqaneq-marlunnik ukioqarluni qaratsamigut aanaartoorpoq, nakorsallu paasivaat qaratsamigut tinuneqartoq. Taamanerniilli marloriarluni suliaritissimavoq qinnguartartittarlunilu katsorsartissimalluni. Aamma marloriarluni aanaartooqqippoq, tamatumalu kingunerisaanik timimi saamiatungaata ilaatigut nukillaarpoq isigiarsuttunngorlunilu. Nukissaqarpallaannginnami nukini pingaartinnerpaasaminut, assersuutigalugu kristumiut ataatsimiinnerinut oqaluussinermullu, atortarpai. Misigisarpoq Jehovap anersaava nakussatsitsisartoq assigiinngitsorpassuartigut pinertusaarnissaminut iluaqutigisarlugu. Nikallungagaangami uppeqatimi misigisalikkersaarutaat Biibililersaarutaatitsinniittut qiimmassaatigisarpai. Qatanngutit taanna tapersersortarsimavaat allaffigalugu ataatsimiinnerillu siorna kingornalu qiimmassarlugu. Aamma soqutiginnittut Stephaniep imminnut ilinniartitsissutigisimasaanik qujamasuutiginninnertik ersersissimavaat Biibili pillugu ilinniartinneqarumallutik taassumunnga pulaartarnermikkut. Tamakku tamaasa pillugit Stephanie Jehovamut qujamasungaarpoq. Misigivoq allassimaffik nuannarinerpaasani, Tussiaat 41:4, imminut ilumut eqquussimasoq.

14. Qasoqqallutalu nikallungagaangatta sunaveersaartariaqarpugut, aamma sooq?

¹⁴ Qasugaangatta stresseraangattaluunniit isumaqalinngisaannartariaqarpugut anersaakkut sammisassatsinnik annikillisaaneq iluaqutaassasoq. Taamatut isumaqalerutta ajorluinnassaaq. Sooq? Pissutigalugu nammineq atuaqqissaartarnikkut, ilaqutariittut atuaqqissaaqatigiittarnikkut, oqaluussisarnikkut ataatsimiigiartarnikkullu Guutip anersaavanik illernartumik nakussatsissutigisinnaasatsinnik pisaratta. Kristumiutut sammisassat nukissaqalernartuaannarput. (Atuakkit Matthæusi 11:28, 29). Ilami, arlaleriaqaluta misiginikuuarput qasulluta ataatsimiigiaratta nukissaqaleqqissimalluta angerlarluta, batteriivut anersaakkut ittut immersimallutillusooq!

15. (a) Jehova neriorsuinikuua kristumiuuneq ilungersornanngitsuussasoq? Biibili atorlugu nassuiaagit. (b) Guutip qanoq neriorsorpaatigut, tamannalu pissutigalugu qanoq aperisariaqarpugut?

 ¹⁵ Soorunami imaanngilaq Kristusimut ajoqersugaaneq ilungersornanngitsuusoq. Kristumiutut aalajaassagaanni ilungersorluni iliuuseqarnissaq pisariaqarpoq. (Matthæusi 16:24-26; Lukasi 13:24) Jehovalli anersaani illernartoq iluaqutigalugu qasusoq nakussatsissinnaavaa. Pruffiiti Esaja ima allappoq: “[Jehovamik] neriuffiginnittut nutaanik nukinissapput, sulunissapput nattoralittut. Arpassapput qasunatik, ingerlassapput nukillaarnatik.” (Esaja 40:29-31) Anersaakkut ittunik sammisaqartarneq nakussatsissutaasarmat ima aperisariaqarpugut: ‘Anersaakkut sammisassanik nanertuutitut isiginninnitsinnut sunarpiaq pissutaava?’

16. Qasoqqasarnitsinnut nikallunganitsinnullu pissutaasinnaasut peerniarlugit susinnaavugut?

¹⁶ Jehovap oqaasiani kajumissaarneqarpugut ‘suut pingaartittariaqarnerannik’ qulakkeerisaqqulluta. (Filippimiut 1:10) Apustilip Paulusip isumassarsisitaalluni kristumiutut inuuneq sivisuumik arpannermut assersuuppaa tamatumunngalu tunngatillugu ima siunnersuilluni: “Uaguttaarmi . . . nanertuisitsinnit tamanit . . . peerniarta, angusassamullu siunitsinniittumut arpannitsinni tamatumani nikallujuilluta.” (Hebræerit 12:1) Matumani erseqqissarpaa pisariaqanngitsunik, nanertuisinnaasunillusooq tamanik, qasussutigisinnaasatsinnik sammisaqarnaveersaartariaqartugut. Imaassinnaavoq ulapputigisartakkatta saniatigut allarpassuarnik angumerisaqarniarpallaartartugut. Taamaammat stresserajullutillu qasoqqagajukkuit piffissaq nukitillu suliffinnut, feeriarlutit angalanernut, timersornermut sunngiffimmilu sammisassanut allanut qanoq atortiginerlugit eqqarsaatigigukku iluaqutigissavat. Oqimaaqatigiissaarisinnaaneq maniguunnerlu pisinnaasatta killeqarnerannik paasinninnissamut pisariaqanngitsunillu sammisaqartannginnissatsinnut tamatta kajumississutigissavavut.

17. Kristumiut ilaat suna pissutigalugu nikallungasinnaappat, Jehovalli qanoq neriorsoqqissaarpaatigut?

¹⁷ Aamma imaassinnaavoq ilavut nikallungaqqajaasut pissutsit aaqqissuussaanerata matuma naggatissaa naatsorsuutigisamittut nalliutiaartiginngimmat. (Ussatit 13:12) Tamatuminnga nikallungassuteqartut tamarmik Habakkuki 2:3-mi allassimasut uku qiimmassaatigisinnaavaat: “Takorluugaq piffissarititami aatsaat eqquutissaaq, naggatissamik nalunaajaavoq eqquutinngitsuussananilu. Nalliutiaanngikkaluarpat utaqqiinnarina, eqquutinngitsoorani piviusunngorumaarmat [Kingusinaarnavianngilaq, NV].” Jehovap neriorsoqqissaarpaatigut pissutsit aaqqissuussaanerata naggatissaa piffissaq eqqorlugu nalliukkumaartoq!

18. (a) Neriorsuutit suut nakussatsissutigaavut? (b) Allaaserisaq tulliuttoq qanoq iluaqutigisinnaavarput?

¹⁸ Qularnanngivippoq Jehovap kiffaasa tamarmik ulloq qasoqqajunnaarlunilu nikallungajunnaarfissaq inuusullu tamarmik inuusukkallarnermissut nukittornerminnik nuannaarutiginniffissaat qilanaarigaat. (Jobi 33:25) Anersaakkut ittunik nukissaqaleqqinnartunik sammisaqaraangatta maannangaaq ‘inuutsitsigut ilorlikkut [Jehovap] Anersaamigut nakussatsittarsinnaavaatigut’. (2 Korinthimiut 4:16; Efesosimiut 3:16) Qasoqqanerit naassaanngitsumik pilluaqqussutisinissannut akornutaateqinagu! Misilinneqarnerit tamarmik — ussernartunik, qasoqqanermik nikallunganermilluunniit pissuteqaraluarpata — ingerlaannaq qaangiutinngikkunik Guutip silarsuassaani nutaami qaangiukkumaarput. Allaaserisami tulliuttumi sammissavarput Guutip kiffaasa anersaaq illernartoq malersugaanerminni pinertusaarnissamut, allat ajortumik sunniiniarnerannik akiuinissamut allatigulluunniit artornartorsiornerit naammagalugit atornissaannut qanoq nakussatsissutigisinnaagaat.

Qanoq akissavit?

• Biibilimik atuartarneq qanoq nakussatsissutigisarsinnaavarput?

• Qinusarneq eqqarsaatiginneqqissaartarnerlu qanoq nakussatsissutigisarsinnaavavut?

• Nikallunganermut pissutaasinnaasut qanoq peersinnaavigit?

[Atuaqqissaarnermi apeqqutit]

[Qupp. 26-mi assiliartaq]

Kristumiut ataatsimiinneri anersaakkut nakussatsissutigisinnaavavut