Anersaaq illernartoq — pinngortitsinermi sulisoq!

“Pinngortitaavoq qilak [Jehovap] oqaasiagut, qilaallu perpassui tamarmik qarnata anersaamineragut.” — TUSSIAAT 33:6.

1, 2. (a) Ukiut ingerlaneranni inuit avataarsua nunarsuarlu pillugit qanoq ilisimasaqarnerulersimappat? (b) Apeqqut suna akineqartariaqarpa?

ALBERT EINSTEINIP 1905-imi relativitetsteoriini saqqummiukkamiuk ilisimatoorpassuillu allat isumaqarsimapput silarsuaq tassaasoq galakse ataasiinnaq — uagut galakserput, Qilaap Sillia. Silarsuup angissusianik minnaarinerujussuuvoq! Maanna isumaqartoqarpoq silarsuarmi 100 milliardinit amerlanerusunik galakseqartoq, taakkualu ilaat milliardilippassuarnik ulloriaqartut. Qinngutit ungasissorsiutit sakkortunerujartuinnartut nunarsuarmi atorneqartarnerat, ilaasalu nunarsuarmik kaaviiaartinneqartarnerat, ilutigalugu galaksit ilisimaneqartut amerlanerujartuinnarput.

² 1905-imi avataarsua pillugu ilisimatuussutsikkut ilisimasat killeqartorujussuupput, nunarsuarmut tunngatillugu aamma taamaappoq. Inuit ukiut hundredet matuma siorna inuusut siuaasaminnit ilisimasaqarnerupput. Taamanikkumulli sanilliullugu ullumikkut inuunerup nunarsuullu inuunermik qanoq ataavartuutitsisinnaanerata alutornassusiannik imaannaanngitsuunerannillu paasisimasaqarnerungaarpugut. Qularnanngitsumillu avataarsua nunarsuarlu pillugit ukiuni tulliuttuni ilisimasaqarnerungaalerumaarpugut. Taamaattumik pissusissamisoorluinnarpoq ima aperissalluni: Tamakku tamarmik qanoq piulerpat? Tamatuma akissutaa ilisimaneqalersinnaavoq Pinngortitsisoq Biibili aqqutigalugu tamatuma akissutaanik saqqummiussisinnaasutuaammat.

Pinngortitsinerup tupinnartua

3, 4. Guutip silarsuaq qanoq pinngortippaa, pinngortitarsuarlu taassumunnga qanoq nersornaataava?

³ Biibilip aallaqqaataani silarsuup qanoq piulersimanera ima nassuiarneqarpoq: “Pileqqaarneranni Guutip qilak nunalu pinngortippai.” (1 Mosesi 1:1) Soqanngikkallarmat Jehovap anersaani illernartoq — nukini sunniineqqortooq sulisoq — atorlugu silarsuarmiittut tamaasa, ilaatigut nunarsuaq, pinngortippai. Inuit arlaannik sanagaangamik assatik atortarpaat sakkoqartarlutillu, Guutilli anersaani illernartoq aallartittarpaa tupinnangaartuliaminik naammassinneqqullugu.

⁴ Biibilimi anersaaq illernartoq assersuutaasumik ‘Guutip assaatut’ eqqaaneqarpoq. (Lukasi 11:20; Matthæusi 12:28) Jehovallu “assaasa piliaat” — anersaani illernartoq atorlugu pinngortitai — taassumunnga nersornaataangaarput. “Qilaap oqaluttuaraa Guutip naalannassusia,” tussiaasiortoq Daavi erinarsorpoq, “qilaanngusaasap nalunaarutigaa assaasa piliaat.” (Tussiaat 19:2) Aap, pinngortitarsuaq Guutip anersaavata illernartup nukinganut tupinnangaartumut uppernarsaataavoq. (Romamiut 1:20) Qanoq?

Guutip nukinga killeqanngitsoq

5. Jehovap anersaavata illernartup pinngortitsisinnaaneranik assersuuteqarit.

⁵ Silarsuarput angingaangaartoq Jehovap pissaaneranut nukinganullu killeqanngitsunut uppernarsaataavoq. (Atuaruk Esaja 40:26). Ullumikkut ilisimatuut nalunngilaat sananeqaatit nukinngortinneqarsinnaasut nukiillu sananeqaatinngortinneqarsinnaasut. Seqinerput, ulloriaasoq, sananeqaatinik nukinngortitsisartut ilagaat. Seqernup sekundit tamaasa sananeqaatit 4 million tonsit missaat qinngorninngortittarpai, kissarninngortittarpai allatullu nukinngortittarlugit. Nukiup tamatuma ilamineeranngua uagutsinnut annguttartoq nunarsuarmi uumassuseqartoqartuarnissaanut naammappoq. Erseqqippoq seqinermik, aammalu ullorissanik milliardilinnik allanik, pinngortitsissagaanni nukerujorujussuaq pisariaqartoq. Jehovap nukik pisariaqartoq — aap, sinningaarlugu — pigaa.

6, 7. (a) Sooq oqarsinnaavugut Guutip anersaani illernartoq atorlugu pinngortitai torersuusut? (b) Sumit erserpa silarsuaq nalaatsornerinnakkut piulersimanngitsoq?

 ⁶ Avatangiisitsinni uppernarsaatissarpassuaqarpoq Guutip anersaaminik illernartumik aaqqissuussaalluartumik atuisimaneranut. Assersuuteqariarta: Takorlooruk karsiuteqartutit arsaaqqanik assigiinngitsunik qalipaatilinnik imalimmik. Karsi aalaterluarpat, nunamullu imaarlugu. Ilimagissaviuk arsaaqqat qalipaateqatigiikkuutaarlutik nunamut tunnissaat — tungujortut ataatsimut immikkoorlutik, sungaartut ataatsimut immikkoorlutik ilaalu ilanngullugit? Soorunami naamik! Iliuutsit aqunneqanngitsut kingunerat torinngitsuusarpoq torersuunani. Ilumoortoq tamanna pinngortitap inatsisaatut tunngaviusutut akuerisaavoq. *

⁷ Suummiuku isiinnatsinnik qinngutilluunniit ungasissorsiutit atorlugit qilak isiginnaaraangatsigu takusarivut? Takusarpavut aaqqissuussat torerluinnartut angingaartullu tassaasut galaksit, ullorissat planetillu, tamarmik angalaarfitik eqqoqqissaarlugit angalasartut. Tassaasinnaanngillat avataarsuani pisut aqunneqanngitsut nalaatsornerinnakkulluunniit pisut kinguneri. Taamaattumik ima aperisariaqarpugut: Silarsuaq aaqqissuulluagaasoq pinngortinniarlugu nukik suna atorneqarsimava? Uagut inuusugut piginnaanivut killeqarput ilisimatuussutsikkut misissuinerit misilittaanerillu kisiisa atorlugit nukiup tamatuma suuneranik paasinninnissatsinnut. Biibilimili oqaluttuarineqarpoq nukik taanna tassaasoq Guutip anersaava illernartoq, silarsuarmi nukik sakkortunerpaaq. Tussiaasiortoq ima erinarsorpoq: “Pinngortitaavoq qilak [Jehovap] oqaasiagut, qilaallu perpassui tamarmik qarnata anersaamineragut.” (Tussiaat 33:6) Taartumilu qilak qimerlooraangatsigu isitsinnik takusinnaasavut tassaapput ‘perpassuit’ ilaminiinnanngui!

Anersaaq illernartoq nunarsuarlu

8. Jehovap pinngortitai pillugit qanoq ilisimasaqartigaagut?

⁸ Pinngortitarsuaq pillugu ilinniarsinnaasat eqqarsaatigigaanni ullumikkut ilisimasakitsuararsuuvugut. Guutip pinngortitaanik qanoq ilisimasaqartiginerput pillugu angut aalajaatsoq Jobi ima isummerpoq: “Takuat, tamakku tassa suliaasa ilaminiinnaat, isussunnertut nipeqarlutik tusarsaasut.” (Jobi 26:14) Ukiut hundredelikkuutaat tamatuma kingorna kunngip Salomop Jehovap pinngortitarsuanik qimerluuisoq silassorissoq ima nalunaarpoq: “[Guutip] suut tamaasa aalajangersumik piffissalerpai. Aammattaaq inuk pereersunik pisussanillu siuneqartunngortippaa, kisianni Guutip piffissami sivisoqisumi suliai inuit ilaannaasumik paasisinnaavaat.” — Oqaluussisartup oqaasii 3:11, 1990; 8:17.

9, 10. Guutip nunarsuaq pinngortikkamiuk nukik sulisoq suna atorpaa, ullunilu pinngortitsiffiusuni pingasuni siullerni pinngortitsineq qanoq ingerlava?

⁹ Jehovalli pinngortitani pillugu pingaaruteqartunik paasissutissiivoq. Assersuutigalugu Biibilimi paasitinneqarpugut qangarsuarujussuaq nunarsuarmi Guutip anersaava sulissutiginnittuusoq. (Atuaruk 1 Mosesi 1:2). Taamanikkut nunaqanngilaq panertumik, qaamaneqanngilaq nunarsuullu qaavani iltilimmik silaannaqarunarnani.

¹⁰ Biibilimi nangillugu allaaserineqarpoq Guuti ulluni pinngortitsiffiusuni tulleriiaartuni sunik naammassisaqartoq. Ullut taakku tassaanngillat nalunaaquttap-akunnerinik 24-nik sivisussusillit, tassaappulli piffissat sivisuut pisoqarfiusut. Ullut pinngortitsiffiusut siullianni Jehovap qaamaneq nunarsuup qaavani takuneqarsinnaanngortikkiartuaarpaa, taamaaliornerlu aatsaat naammassivoq  seqineq qaammallu kingusinnerusukkut nunarsuarmiit takuneqarluarsinnaanngormata. (1 Mosesi 1:3, 14) Ullut pinngortitsiffiusut aappaanni atmosfære pinngortinneqalerpoq. (1 Mosesi 1:6) Nunarsuaq imermit, qaamanermit silaannarmillu avatangerneqarpoq, sulili nunaqanngilaq panertumik. Ullut pinngortitsiffiusut pingajussaanni siusissukkut Jehovap anersaani illernartoq atorlugu nunaqalersippaa panertumik, immaqa nukiit geologiskiusut sakkortuut atorlugit nunarsuarmit imaannaasumit nunavissuit nuisillugit. (1 Mosesi 1:9) Ullut pingajuata tamatuma ingerlanerani kingusinnerusukkullu piffissani pinngortitsiffiusuni allanik tupinnartunik pisoqaqattaassaaq.

Anersaaq illernartoq pinngortitallu uumassusillit

11. Imaannaanngilluinnassuseq, iluseqaqatigiilluassuseq alutornassuserlu uumassusillit tamarmik ilisarnaatigisaat sumut ersiutaappat?

¹¹ Aamma Guutip anersaava uumassusilinnik imaannaanngilluinnartunik pinngortitsivoq. Ullut pinngortitsiffiusut pingajuanniit arfernat ilanngullugu Guutip anersaani illernartoq atorlugu nunami naasartunik uumasunillu assigiinngitsorpassuarnik pinngortitsivoq. (1 Mosesi 1:11, 20-25) Taamaattumik uumassusilinni imaannaanngilluinnartoqarneranut, iluseqaqatigiittoqarneranut alutornartoqarneranullu kisissaanngitsunik takussutissaqarpoq ilusilersuillaqqinnerpaamit ilusilersuisoqarsimaneranut uppernarsaataasunik.

12. (a) DNA sumut atortarpa? (b) DNA-p siunertaasoq naapertorlugu ingerlatitseqqiisarnerata allanngujaatsuunera pillugu qanoq isummersinnaavugut?

¹² Assersuutigeriartigu DNA (deoxyribonukleinsyre) uumassusillit ilisarnaataannik kinguaariinnit kinguaariinnut ingerlatitseqqiisarnermut ilaasoq. Nunarsuarmi uumassusillit tamarmik — soorlu tappiorannartut, ivikkat, nagguaatsut, tunnulissuit inuillu — DNA-p ingerlatitseqqiineratigut kinguaassiortarput. Pinngortitat nunarsuarmiittut assigiinngitsorujussuupput. DNA ilisarnaatit kingornuttagaasut amerlanersaannik aalajangiisartoq assut allanngujuillunilu ukiut ingerlaneranni pinngortitat assigiinngitsukkuutaat assigiinngissutaannik  ataavartitsisuujuartuuvoq. Taamaattumik Jehovap Guutip siunertaa naapertorlugu nunarsuarmi uumassuseqarnerup imaannaanngilluinnartumik sunniuteqaqatigiittarnerat ingerlajuarpoq. (Tussiaat 139:16) Aaqqissuussilluarneq kinguneqarluartoq tamanna tassaavoq Guutip ‘assaata’ — anersaavata illernartup — pinngortitsisuusimaneranut uppernarsaat suli alla.

Pinngortitat nunarsuarmiittut pingaarnersaat

13. Guutip inuk qanoq pinngortippaa?

¹³ Ukiorparujorujussuit qaangiunneranni Guutillu uumassuseqanngitsunik uumassusilinnillu assigiinngitsorpassuarnik pinngortitsinerata kingorna nunarsuaq tassaajunnaarpoq ‘soqanngitsoq ilisarsaanngitsorlu’. Jehovalli pinngortitsinerminut tunngatillugu anersaani suli atortussaavaa. Nunarsuarmi pinngortitaq pingaarnerpaaq suli pinngortinngilaa. Ullut pinngortitsiffiusut arfernata naalernerani Guutip inuk pinngortippaa. Qanoq? Anersaani illernartoq nunarsuullu pinngoqqaatai atorlugit. — 1 Mosesi 2:7.

14. Inuit uumasullu pingaaruteqartukkut sukkut assigiinngissuteqarpat?

¹⁴ Mosesimik allakkani siullerni 1:27-mi ima allassimavoq: “Guutip inuk pinngortippaa imminik assililluni; Guuti assilillugu pinngortippaa. Pinngortippai tassaatillugit angut arnarlu.” Guutip imminik assililluni pinngortikkamisigut imaappoq Jehovap asannittuliorsinnaatilluta, piumasatsitut iliorsinnaatilluta allaallu imminut qanittumik attaveqarsinnaatilluta pinngortikkaatigut. Taamaattuminguna qarasarput uumasullu qarasaat assigiinngitsorujussuusut. Immikkut maluginiarnarpoq Jehovap inuup qarasaa pinngortikkaa imminik suliaminillu naassaanngitsumut ilinniartuarsinnaaqqulluta tamatuminngalu nuannaarutiginnissinnaaqqulluta.

15. Adami Evalu sunik periarfissinneqarpat?

¹⁵ Guutip nunarsuaq inunnut siullernut, Adamimut Evamullu, isumagisassanngortippaa nunarsuarmik tupinnartulianillu tassaniittunik misissuinerminnik nuannaarutiginnissinnaatillugit. (1 Mosesi 1:28) Jehovap naammangaartunik nerisassaqartippai Paratiisimilu najugassillugit. Naassaanngitsumik inuunissamut milliardilinnillu naammalluinnartunik imminnik asannittunik kinguaassiornissaminnut periarfissaqarput. Ajoraluartumilli taamatut pisoqanngilaq.

Anersaap illernartup pingaaruteqarneranik akuerinninneq

16. Inuit siulliit pikitsitsigaluartut sumik neriuutissaqarpugut?

¹⁶ Adami Evalu Pinngortitsisuminnut naalannermikkut qujamasunnermik ersersitsinatik namminissarsiorlutik pikitsitsipput. Inuit naammalluinnanngitsut tamarmik taakkuninnga naggueqarput taamaattumillu naalliuttariaqarlutik. Biibilimili nassuiarneqarpoq siuaasavut siulliit ajortuliornerisa kingunerisaanik ajoqusiineq Guutip qanoq aaqqikkumaaraa. Aamma Biibilimi erserpoq Jehovap aallaqqaammut siunertani naammassiumaaraa. Nunarsuaq paratiisinngussaaq inunnik pilluarlutillu peqqittunik inuunermik naassaanngitsumik pilluaqqussutisisimasunik ulikkaartoq. (1 Mosesi 3:15) Neriuutit nuanningaartut tamakku upperiuassagutsigit Guutip anersaavata illernartup ikiuinera pisariaqartipparput.

17. Isummat suut ingalassimasariaqarpavut?

¹⁷ Jehovamut anersaaq illernartoq qinnutigisariaqarparput. (Lukasi 11:13) Taamaaliorutta Guutip “assaasa” pinngortitanik tamanik ‘piliarinnittuunerannik’ upperinninnitsinnut nakussatsissutaassaaq. Ullumikkut guuteqannginneraanermik pinngoriartuaarsimaneraanermillu siammarteriniarneq isummiussanik eqqunngitsunik tunngaveqanngitsunillu tunngavilik ingasatsikkiartuinnarpoq. Isummat eqqunngitsorpassuit taakku paatsiveerussutigissanngilavut annilaarutiginagilluunniit. Kristumiut tamarmik taamatut saassunneqarnerujussuup tamatumalu kingunerisaanik tatineqarnerup akiornissaanut piareersartariaqarput. — Atuaruk Kolossemiut 2:8.

18. Silarsuup inuullu pileqqaarnerannik eqqarsaatiginninnermi sooq silassorissumik Pinngortitsisoqarneranik akuerinnikkumannginneq uungaannaq isiginerua?

¹⁸ Pinngortitsinermik oqaluttuap ilumoorsinnaaneranut uppernarsaatinik unneqqarilluni misissuineq Biibilimik Guutimillu upperinninnermut nakussatsissutaalluinnassaaq. Inuppassuit silarsuup inuullu pileqqaarnerat eqqarsaatigigaangamikku nukik ilisimatuussutsikkut uppernarsarneqarsinnaanngitsoq akueriumaneq ajorpaat. Isummiussarli tamanna aalajangiusimagaluarutsigu  uppernarsaatit tamaasa illuinnaasiornata eqqarsaatigisimassanngikkaluarpavut. Aammattaaq aaqqissugaaneq siunertaqarnerlu erseqqilluinnartut uumassusillit ‘kisissaanngitsut’ nunarsuarmiittut ilisarnaatigisaat sianiginngitsuusaarneqassagaluarpoq. (Jobi 9:10; Tussiaat 104:25) Kristumiutut upperilluinnarparput nukik sulisoq pinngortitsinermi atorneqartoq tassaasoq anersaaq illernartoq Jehovap silassorilluni siulersugaa.

Anersaaq illernartoq Guutimillu upperinninnerput

19. Guutip piuneranut anersaavatalu sulineranut inunnut ataasiakkaanut suut uppernarsaataappat?

¹⁹ Guutimut uppertuussagutta taassuminngalu asannittuussagutta ataqqinningaartuussaguttalu pinngortitsinermut tunngatillugu suut tamaasa ilisimasariaqanngilavut. Inuit ikinngutigiittarnerattut Guutimik upperinninneq paasissutissaannarnik tunngaveqanngilaq. Ikinngutigiilluartoqalissappalli ilisarisimaqatigiilluartoqartariaqarpoq, taamatuttaaq Guuti ilisarisimallualerutsigu taassumunnga uppernitsinnut nakussatsissutaassaaq. Aap, qinnutitsinnik akisigaangat najoqqutassiaanillu maleruaanitta sunniuteqarluarnera malugigaangatsigu piunera ilisimaarinerulertarparput. Jehovamut attaveqarluarnerulertarpugut alloriarnitsinnik siulersuineranut, uagutsinnik sernissuineranut, imminullu kiffartorniarluta ilungersornitsinnik pilluaqqusineranut pisariaqartitatsinnillu tunisisarneranut uppernarsaatit amerliartuinnartut takugaangatsigik. Tamakku tamarmik Guutip piuneranut anersaavatalu illernartup sulineranut uppernarsaataapput kimittuut.

20. (a) Sooq Guutip silarsuaq inuillu pinngortippai? (b) Guutip anersaavanit illernartumit siulersortittuarutta qanoq kinguneqassava?

²⁰ Jehovap nukimminik sulisumik atuineranut Biibili assersuutaavoq asseqanngilluinnartoq. Biibilimimmi allattut ‘Anersaamit Illernartumit sunnertillutik Guutimit pisumik oqaaseqartarput’. (2 Petrusi 1:21) Peqqissaartumik Biibilimik atuaqqissaarneq Guutimik, sunik tamanik pinngortitsisuusumik, upperinninnitsinnik nakussatsissutaasinnaavoq. (Saqqummersitat 4:11) Pinngortitsineq Jehovap asanninneranut ersiutaavoq. (1 Johannesi 4:8) Taamaattumik inuit allat sapinngisatsinnik ikiortigit Ataatarput Ikinnguterpullu asannittoq qilammiusoq ilisarisimalerniassammassuk. Uagutsinnut tunngatillugu, Guutip anersaavanit siulersortittuarutta, naassaanngitsumut ilisarisimanissaa immikkut pisinnaatitaaffigissavarput. (Galatiamiut 5:16, 25) Qanortoq tamatta immikkut Jehova taassumalu tupinnartuliai pillugit ilinniartuarta, ilaartuartigulu qilaat, nunarsuaq inuillu pinngortinniarlugit anersaani illernartoq atorlugu asanninnerminik killeqanngitsumik ersersitsinera.

[Quppernerup ataani ilanngussaq]

Uku nassuiarsinnaavigit?

• Anersaaq illernartoq pillugu qilaat nunarsuullu piunerat sumik ilinniarfigaarput?

• Guuti assilillugu pinngortitaagatta susinnaavugut?

• Sooq pinngortitsisoqarsimaneranut uppernarsaatit misissortariaqarpavut?

• Jehovamut attaveqarnerput qanoq nakussatsissinnaavarput?

[Atuaqqissaarnermi apeqqutit]

[Qupp. 11-mi assiliartaq]

Pinngortitarsuaq aaqqissuussaalluagaasoq sumik ilinniarfigaarput?

[Suminngaanneernera]

Ullorissat: Anglo-Australian Observatory/David Malin Images

[Qupp. 12-mi assiliartat]

Uumassusillit uku suna assigiissutigaat?

[Qupp. 14-mi assiliartaq]

Upperisappit illersornissaanut piareersimavit?