Eqqunngitsuliorneq uumigaajuk?

‘Eqqunngitsuliorneq uumigaat.’ — HEBRÆERIT 1:9.

1. Jiisusip ajoqersukkani asanninneq pillugu sumik ilinniartippai?

JIISUSI KRISTUSI asanninnerup pingaaruteqassusianik erseqqissaavoq ajoqersukkaminut ima oqarami: “Inassummik nutaamik tunivassi: Asaqatigiissaasi. Soorlu uanga asagissi, taamattaaq ilissi asaqatigiissaasi. Asaqatigiikkussi tamatumuuna tamarmik paasissavaat ajoqersugarigissi.” (Johannesi 13:34, 35) Jiisusip ajoqersukkani peqquai imminut pilliutigeriaannaallutik asannittuliorfigeqatigiittaqqullugit. Taamatut asaqatigiinnertik ilisarnaatigisussaavaat. Jiisusip taakku aamma ima oqarfigai: “Akeqqasi asasigit, ilissinnillu qinuginnittut qinnussigit.” — Matthæusi 5:44.

2. Jiisusip ajoqersugaasa sumik uumiginninneq ineriartortittussaavaat?

² Jiisusilli ajoqersukkami asanninneq pillugu ilinniartinnerisa saniatigut aamma paasitippai suna uumigissaneraat. Jiisusi pillugu ima allassimasoqarpoq: “Eqqortumik iliorneq nuannaraat eqqunngitsuliornerlu uumigalugu.” (Hebræerit 1:9; Tussiaat 45:8) Tamatumannga erserpoq eqqortumik iliornermik nuannarinninnermik ineriartortitsiinnarata aamma ajortimik, imaluunniit eqqunngitsuliornermik, uumiginninnermik ineriartortitsisariaqartugut. Apustili Johannesi ima allappoq: “Kinaluunniit ajortuliortoq aamma inatsisinik unioqqutitsivoq, ajorti tassaammat inatsisinik  unioqqutitsineq [eqqunngitsuliorneq].” — 1 Johannesi 3:4.

3. Eqqunngitsuliornermik uumiginninnermut tunngatillugu sisamat suut sammissavavut?

³ Taamaattumik kristumiuugatta imminut ima aperisariaqarpugut: ‘Eqqunngitsuliorneq uumigaara?’ Sammeriartigu ajortunik qanoq uumiginnissinnaasugut sisamanut ukununnga isiginnittaatsitsinnut tunngatillugu: (1) imigassamik atornerluinermut, (2) anersaarsiornermut, (3) kinguaassiuutitigut inuunerlunnermut, aamma (4) eqqunngitsuliornermik nuannarinnittunut.

Imigassamik pinngitsuuisinnaajunnaaqinak

4. Sooq Jiisusi imigassartorpallaarneq pillugu nakimaalluni mianersoqqusisinnaava?

⁴ Jiisusi ilaannikkut viinnisortarpoq, taanna tunissutitut Guutimeersutut isigalugu. (Tussiaat 104:14, 15) Tunissulli tamanna atornerlunneq ajorpaa, tassa imigassartorpallaarneq ajorpoq. (Ussatit 23:29-33) Taamaattumik Jiisusip ajoqersukkani ileqqupalaamut tamatumunnga tunngatillugu siunnersoramigit nakimaappoq. (Atuaruk Lukasi 21:34). Imigassamik atornerluineq allanittaaq ingasattumik ajortuliornernik kinguneqarsinnaavoq. Apustili Paulusi ima allappoq: “Viinnimik aalakooqinasi, aalakoornerup inuunerlunnerit pilersittarmagit, Anersaamilli peqangaalersinneqaritsi.” (Efesosimiut 5:18) Aamma ilagiinni arnat utoqqaat oqaaqqissaarpai ‘imerajuttooqqunagit’. — Titusi 2:3.

5. Imigassartortartut imminut qanoq aperisariaqarpat?

⁵ Imigassartortaruit imminut ima aperisariaqarputit: ‘Imigassartorpallaarnermut tunngatillugu Jiisusitut isiginnittaaseqarpunga? Tamatumunnga tunngatillugu allanik siunnersuissaguma ilerasuutissaqarnanga taamaaliorsinnaavunga? Isumakuluutikka puiorniarlugit stressennginnerulerniarlungaluunniit imigassartortarpunga? Sapaatip-akunneranut qanoq imigassartortigisarpunga? Allat oqarfigimisaaraangannga immaqa imigassartorpallaartunga qanoq periartarpunga? Imminut illersornialertarpunga, immaqaluunniit allaat ajuallattarpunga?’ Imigassamik pinngitsuuisinnaajunnaarnerput silatusaartumik eqqarsarsinnaanitsinnut isumatusaartumillu aalajangiisinnaanitsinnut sunniuteqarsinnaavoq. Kristusimut ajoqersugaasup eqqarsarsinnaassutsini illersorumassavaa. — Ussatit 3:21, 22.

Anersaarsiornermut tunngasut ingalassimakkit

6, 7. (a) Jiisusi nunarsuarmiitilluni Saatanimut anersaapilunnullu qanoq periaaseqarpa, kingusinnerusukkullu sua? (b) Sooq anersaarsiorneq ullumikkut taama soqutigineqartigaa?

⁶ Jiisusi nunarsuarmiikkami Saatanimik anersaapilunnillu aalajangersimalluinnarluni itigartitsisarpoq. Saatanip ilumoorfiginnikkunnaarsinniarluni saassummani nakkaannanngilaq. (Lukasi 4:1-13) Aamma eqqarsartaatsimigut iliuutsimigullu malunnaarsaarnerusumik sunnerniarneqaraangami naluneq ajorpaa, sunnerniarneqarninilu akiortarpai. (Matthæusi 16:21-23) Aammattaaq allat anersaapilunnit naalliutsinneqarunnaarsittarpai. — Markusi 5:2, 8, 12-15; 9:20, 25-27.

⁷ Jiisusip 1914-imi kunnginngortinneqareerluni Saatani anersaapiluillu qilammi ajortumik sunniuteqarsinnaajunnaarsippai. Tamatuma kingunerisaanik Saatani maannakkut aatsaat taama ‘silarsuarmik tamarmik tammartitsiniaatigaaq’. (Saqqummersitat 12:9, 10) Taamaattumik tupigisariaqanngilarput anersaarsiornerup soqutigineqartupilussuullunilu soqutigineqaleraluttuinnarnera. Imminut illersorniarluta suut eqqumaffigissavavut?

8. Aliikkutassanik toqqaasarnitsinnut tunngatillugu imminut qanoq aperisariaqarpugut?

⁸ Anersaarsiornermut tunngasut navianaataat Biibilimi erseqqissumik mianersoqqussutigineqarput.  (Atuakkit 5 Mosesi 18:10-12). Ullumikkut Saatani anersaapiluillu filmit, atuakkat qarasaasiamilu pinnguaatit anersaarsiornermik siuarsaasut atorlugit inuit eqqarsartaasiinik sunniisarput. Taamaattumik aliikkutassanik toqqaagaangatta imminut ima aperisariaqarpugut: ‘Qaammatini kingullerni filminik, tv-kkut aallakaatitassianik, qarasaasiami pinnguaatinik, atuakkanik tegneserianilluunniit anersaarsiornermut tunngasortalerujussuarnik aliikkutaqarnikuuvunga? Tamakkunannga sunnertinnaveersaarnissap pingaaruteqassusia paasivara, imaluunniit navianannginnerartarpakka? Aliikkutassat toqqartakkakka pillugit Jehovap qanoq misigisarnera eqqarsaatigisarpara? Saatani inuuninnut sunniuteqartissimagukku, Jehovamik asanninnera taassumalu najoqqutassiaanik naapertuilluartunik nuannarinninnera aalajangersimalluinnarlunga Saatanip inuuninnut sunniuteqartikkunnaarnissaanut kajumississutigissavakka?’ — Apustilit Suliaat 19:19, 20.

Jiisusip kinguaassiuutitigut inuunerlunneq pillugu mianersoqqussutaa eqqumaffigiuk

9. Eqqunngitsuliornermik nuannarinninneq qanoq ineriartortinneqalersinnaava?

⁹ Jiisusi Jehovap kinguaassiuutitigut ileqqussanut tunngatillugu najoqqutassiaanik aalajangiusimannippoq. Ima oqarpoq: “Atuarsimanngilisiuk pileqqaarneranniit Pinngortitsisup angut arnarlu pinngortikkai oqarlunilu: ‘Tamanna pillugu angutip ataatani anaananilu qimassavai nulianilu attavigalugu, taakkulu marluk uininngussapput ataaseq’? Taamaattumik marluujunnaarlutik uiniulissapput ataaseq. Guutimmi ataqatigiilersitai inuup avissaartissanngilai.” (Matthæusi 19:4-6) Jiisusip nalunngilaa isigisavut uummatitsinnut sunniuteqarsinnaasut. Taamaattumik qaqqami oqaluutsimini ima oqarpoq: “Tusarparsi oqartoqarsimasoq: ‘Allasiussanngilatit’. Uangali oqarfigaassi: Kialuunniit allap nulia pilerigalugu isigiguniuk taanna uummatimigut allasiorfigereerpaa.” (Matthæusi 5:27, 28) Jiisusip mianersoqqussutaanik sumiginnaasut ersersittarpaat eqqunngitsuliornermik nuannarinninnermik ineriartortitsilersimanertik.

10. Misigisaq pornografiimik isiginnaartarunnaartoqarsinnaaneranik ersersitsisoq oqaluttuariuk.

¹⁰ Saatani pornografii atorlugu kinguaassiuutitigut inuunerlunnermik siuarsaasarpoq. Pissutsit aaqqissuussaanerat maanna atuuttoq pornografiimik ulikkaarpoq. Tamakkuninnga isiginnaartartut assit kinguaassiuutitigut inuunerlunnermut tunngasut isumaminnit peeruminaatsittarpaat. Allaat pornografiimut tunngasunik isiginnaanngitsoorsinnaajunnaartarput. Qatanngutip angutip inuusuttup oqaluttuaa maluginiariaruk. Ima oqaluttuarpoq: “Isertorlunga pornografiimut tunngasunik isiginnaartarpunga. Uanga nammineq silarsuaaraqarpunga silarsuarmit Jehovamut kiffartorfigisannit avissaaqqatissinnaasorisannik. Nalunngilara eqqunngitsuliornerusoq, imminulli oqarfigaanga Guutimut kiffartornera suli akuerineqarsinnaasoq.” Qatanngut angut qanoq ililluni taamatut eqqarsarunnaarpa? Ima oqaluttuarpoq: “Utoqqaanertat ajornartorsiutiga pillugu oqaluttuunniarlugit aalajangerpunga, naak tamanna inuuninni sapernarnerpaatikkaluarlugu.” Qatanngutip angutip ileqqoq nikanarsaataasoq tamanna naggataatigut ileqqoriunnaarpaa. Ima oqarpoq: “Taamatut ajortuliortarunnaareerlunga naggataatigut misigivunga ilerasuutissaarutivillunga.” Eqqunngitsuliornermik uumiginnittut pornografiimik uumiginninneq ilinniartariaqarpaat.

11, 12. Eqqunngitsuliornermik uumiginninnerput erinarsukkanik nipilersukkanillu toqqaasarnitsigut qanoq ersersissinnaavarput?

¹¹ Erinarsuutit taallaat nipilersuutitaallu misigissutsitsinnut taamalu uummatitsinnut assersuutaasumut sunniuteqangaarsinnaapput. Nipilersorneq erinarsornerlu Guutimit tunissutaapput pallorfiginninnermilu ilumoortumi itsarsuarli atorneqartarsimallutik. (2 Mosesi 15:20, 21; Efesosimiut 5:19) Saatanilli silarsuaani guutiitsumi nipilersukkat kinguaassiuutitigut inuunerlunnermik  nuannaartorinnilersitsisartut siuarsarneqarput. (1 Johannesi 5:19) Qanoq ililluni nalunnginneqarsinnaagami nipilersukkat tusarnaartakkat ajortumik sunniuteqartarnersut?

¹² Siullermik imminut ima aperisoqarsinnaavoq: ‘Erinarsukkat tusarnaartakkakka toqutsinermik, allasiornermik, kinguaassiuutitigut inuunerlunnermik Guutimillu mitaatiginninnermik nuannaartorinnilersitsisarpat? Taakkua taallaat allanut atuffassissutigigukkit, atuffassama eqqunngitsuliornermik uumiginnittutut isigissavaannga, imaluunniit taallat uummatima mingutsissimaneranut ersiutaassappat?’ Erinarsukkanik nipilersukkanillu eqqunngitsuliornermik nuannaartorinnilersitsisartunik tusarnaartaatigaluni eqqunngitsuliornermik uumiginninnerartoqarsinnaanngilaq. Jiisusi ima oqarpoq: “[Qanikkut] anisut uummammit pisarput, tamakkulu inummik mingutsitsisarput. Uummammimmi pisarput eqqarsaatipiluit, toqutsinerit, allasiornerit, kinguaassiuutitigut inuunerlunnerit, tillinnerit, sallulluni nalunaajaanerit mitallernerillu.” — Matthæusi 15:18, 19; naleqqiutikkit Jaaku 3:10, 11.

Jiisusip eqqunngitsuliornermik nuannarinnittunut isiginnittaaseqarneratut isiginnittaaseqalerit

13. Jiisusip allamik isumataarnatik ajortuliortuartut qanoq isigai?

¹³ Jiisusi oqarpoq tikiulluni ajortuliortut, imaluunniit eqqunngitsuliortut, allamik isumataaqqullugit. (Lukasi 5:30-32) Allamimmi isumataarnatik ajortuliortuartut qanoq isigai? Jiisusip inunnit taama ittunit sunnertissinnaanerput sakkortuumik mianersoqqussutigaa. (Matthæusi 23:23-26) Paatsuugassaanngitsumik ima oqarpoq: “Imaanngilaq kinaluunniit uannut oqartoq: Naalagaq, Naalagaq! Qilaap Naalagaaffianut isissasoq, Ataatamali qilanniittup piumasaanik iliortoq kisimi. Ullussami tassani amerlasuut uannut oqarumaarput: Naalagaq, Naalagaq! Illit atikkut siulittuisarsimannginnerpugut, atikkullu anersaapilunnik anisitsisarsimannginnerpugut, atikkullu amerlaqisunik malunnangaartuliortarsimannginnerpugut?” Eqqunngitsuliorniartuartulli ajattorumaarpai ima oqarluni: “Nigorsinga!” (Matthæusi 7:21-23) Sooq taamatut eqqartuunneqarpat? Guutimik narrunarsaammata eqqunngitsuliortarnermikkullu allanik ajoqusiisarmata.

14. Sooq ajortuliortut allamik isumataanngitsut ilagiinnit peersinneqartarpat?

¹⁴ Guutip oqaasiani peqqussutigineqarpoq ajortuliortut allamik isumataanngitsut ilagiinnit peersinneqartarnissaat. (Atuakkit 1 Korinthimiut 5:9-13). Tamanna pisariaqarpoq minnerpaamik uku pingasut pissutigalugit: (1) Jehovap aqqa kanngunarsarneqaqqunagu, (2) ilagiit minguitsuutittuarumallugit, aamma (3) ajornanngippat ajortuliortoq allamik isumataarnissaanut ikiorniarlugu.

15. Jehovamik ilumoorfiginnikkumagutta imminut qanoq aperisariaqarpugut?

¹⁵ Jiisusip eqqunngitsuliortuartunut isiginnittaasiatut isiginnittaaseqarpugut? Imminut ima aperisinnaavugut: ‘Ilaajunnaarsitaasimasoq imminulluunniit ilagiinnut kristumiunut ilaasortaajunnaarsissimasoq pisariaqanngikkaluartumik attaveqarfigisarpara? Ilaajunnaarsitaasimasormi ilaqutaralugulu najugaqatigiunnaarsimagutsigu?’ Taamatut pisoqarnera eqqortumik iliornermik nuannarinninnitsinnut Guutimillu ilumoorfiginninnitsinnut misilinneqaataavissorsinnaavoq. *

16, 17. Anaanaasoq kristumiu artornartumik sumik misigisaqarpa, ajortuliortunillu allamik isumataanngitsunik ilaajunnaarsitsisarnermut tunngatillugu aaqqissuussamik ataqqinninnissamut suna iluaqutigaa?

¹⁶ Qatanngutip arnap Jehovamik asannittuusimagaluartumik inersimasumik ernillip misigisimasaa  eqqarsaatigeriaruk. Ernera peqqissiminani eqqunngitsuliortalersimavoq. Taamaattumik ilagiinnut ilaajunnaarsitaavoq. Qatanngutitta arnap Jehova asavaa, aammali ernini asavaa taassuminngalu peqateqartannginnissamik peqqussutip Biibilimeersup maleruarnissaa assut sapernartillugu.

¹⁷ Qatanngut arnaq taanna illit qanoq siunnersussagaluarpiuk? Utoqqaanertap taanna ikiorpaa Jehovap paasinnittuuneranik paasinninnissaanut. Qatanngutip angutip taanna kajumissaarpaa Jehova ernimi qilammiusut ilaat pikitsitsimmata qanoq misigisimasimassanersoq eqqarsaatigeqqullugu. Utoqqaanertap eqqarsalersinniarlugu oqaloqatigaa paasitillugulu Jehovap taamatut pisoqarnerata qanoq naalliunnarsinnaatiginera nalunngikkaluarlugu ajortuliortut allamik isumataanngitsut ilagiinnut ilaajunnaarsitaanissaat piumasarigaa. Arnap utoqqaanertap siunnersuutaa akuersaarpaa ilaajunnaarsitsisarnermullu tunngatillugu aaqqissuussaq Biibilimik tunngavilik ilumoorfiginnilluni tapersersorlugu. * Taamatut ilumoorfiginnittoqartillugu Jehovap uummataa nuannaartinneqartarpoq. — Ussatit 27:11.

18, 19. (a) Eqqunngitsuliortartumut attaveqartarunnaarnerput sumik uumiginninnitsinnut ersiutaava? (b) Guutimik taassumalu aaqqissuussaanik ilumoorfiginninnerput qanoq kinguneqarsinnaava?

¹⁸ Illit tamatumunnga assingusumik atugaqaruit eqqaamajuk Jehovap misigeqatigigaatit. Ilaajunnaarsitaasimasup imminulluunniit ilagiinnut ilaasortaajunnaarsissimasup attaveqarfigisarunnaarneratigut ersersippat taassuma isiginnittaasia iliuusiilu ilagiinnut ilaajunnaarsitaaneranik kingunillit uumigalugit. Aammali ersersippat unioqqutitsisoq ima asatigigit taassumunnga iluaqutaanerpaasumik iliorusullutit. Jehovamik ilumoorfiginnikkuit perorsaatissinneqartup peqqissimilluni Jehovamut saannissaa ilimanarnerulersinnaavoq.

¹⁹ Qatanngut arnaq ilaajunnaarsitaasimasoq kingusinnerusukkullu ilagiinnut ilanngutiteqqinneqartoq ima allappoq: “Nuannaarutigeqaara Jehovap innuttani ima asatigimmagit peqatigiissortaminik minguitsuujuartitsilluni. Ilagiit avataanniittunut sakkortorpasikkaluartoq asannittumik aaqqissuussaavoq pisariaqartoq.” Qatanngut arnaq taanna taama isummersimassagaluarpa ilagiinniittut, aamma ilaquttami, ilaajunnaarsitaaqqanermini pisariaqanngikkaluartumik attaveqarfigisarsimasuuppanni? Ilaajunnaarsitsisarnermut tunngatillugu aaqqissuussamik Biibilimik tunngavilimmik ataqqinninnerput eqqortumik iliornermik nuannarinninnitsinnut Jehovallu ileqqussatigut najoqqutassiisinnaatitaaneranik akuerinninnitsinnut ersiutaavoq.

“Ajortoq uumigissavarsi”

20, 21. Eqqunngitsuliornermik uumiginninnissap ilikkarnissaa sooq pingaaruteqarpa?

²⁰ Apustili Petrusi ima mianersoqqusivoq: “Eqiingagitsi silatusaarlusilu!” Sooq taama mianersoqqusiva? “Akerartortersi Diaavulu løvitut uiannisaartutut [angalasarmat] iisassarsiorluni.” (1 Petrusi 5:8) Illit iineqassavit? Apeqqutaavoq illit eqqunngitsuliornermik qanoq uumiginnitsigilersimanersutit.

²¹ Ajortumik uumiginninnissap ilikkarnissaa imaannaanngilaq. Ajortiliulluta inunngorpugut silarsuarmilu uinngup pilerigisaanik naammassinninnissamik kajumissaariffiusumi inuulluta. (1 Johannesi 2:15-17) Jiisusimilli Kristusimik ilaarsinitsigut Jehovamillu asanningaarnermik ineriartortitsinitsigut eqqunngitsuliornermik uumiginninneq ilikkarsinnaavarput. ‘Ajortumik uumiginninnissarput’ aalajangiusimatigu, qularutiginngilluinnarlugu Jehovap ilumoorfigisimi ‘inuunerat paarigaa taakkulu aniguisikkumaarai iluaatsunit.’ — Tussiaat 97:10.  (w11 02/15-E)

[Quppernerup ataani ilanngussat]

Qanoq akissavit?

• Imigassamut qanoq isiginnittaaseqarnerluta qanoq ililluta paasisinnaavarput?

• Anersaarsiornermut tunngatillugu imminut illersorniarluta suut eqqumaffigissavavut?

• Sooq pornografiimik isiginnaartarneq navianarpa?

• Asasarput ilagiinnut ilaajunnaarsitaappat eqqunngitsuliornermik uumiginninnerput qanoq ersersissinnaavarput?

[Atuaqqissaarnermi apeqqutit]

[Qupp. 28-mi assiliartaq]

Imigassartortaruit imminut qanoq aperisariaqarpit?

[Qupp. 29-mi assiliartaq]

Aliikkutassat aqqutigalugit Saatani inuuninnut sunniuteqarsinnaammat mianersorit

[Qupp. 30-mi assiliartaq]

Pornografiimik isiginnaartartup suna nuannaraa?