Guutip naalagaaffia suua?

‘Naalagaaffimmik iivangkiiliu taanna . . .’ — MATTHÆUSI 24:14.

JIISUSIP qaqqami oqaluutsimini ilisimaneqarluartumi qinnut najoqqutassaasoq oqaatigaa, ilaatigut Guutimut ima qinunertalik: “Naalagaaffiit tikiulli.” Inuit millionillit qinnut taanna alanngaarsinnaavaat arlaleriaqalutillu qinnutigisarsimallugu. Qinerlerfissiami eqqaaneqarpoq qinnut taanna tassaasoq “kristumiut tamarmik guutisiornerminni atornerpaartagaat”. Inuppassuilli qinnummik tamatuminnga atuisartut Naalagaaffiup tamatuma suuneranik tikiukkunilu sunik naammassisaqarumaarneranik ilisimasakitsuararsuupput. — Matthæusi 6:9, 10.

Tamanna tupaallannanngilaq. Kristumiut siuttuisa Naalagaaffiup suuneranik nassuiaataat imminnut akerliullutillu paatsiveqaratillu paasiuminaapput. Angut ataaseq allappoq Guutip naalagaaffia tassaasoq “suna arlaat inunnit piginnaaneqarnerusoq . . . Guutimut uumasumut qamuuna attaveqarneq . . . Guutimik anersaakkut ittumik misigisaqaqatigiinneq angutit arnallu annaanneqarfigisaat”. Allap nassuiarpaa Naalagaaffimmik iivangkiiliu tassaasoq “oqaluffik pillugu ilinniartitsineq”. Aamma Den katolske Kirkes Katekismus-imi ima allassimavoq: “Guutip naalagaaffia tassaavoq iluarneq eqqissinerlu tipaatsunnerlu Anersaami Illernartumi.”

Naalagaaffiup suunera atuagassiami matumani qupperneq 2-mi paasiuminarnerungaartumik nassuiarneqarpoq. Tassani nassuiarneqarpoq Guutip naalagaaffia tassaasoq naalagaaffik piviusoq qilammiittoq qanittukkullu ajussutsimik suujunnaarsitsisussaq nunarsuarmillu paratiisinngortitsisussaq. Paasinnittaaseq tamanna Biibilimi qanoq erseqqissarneqarnersoq misissoriartigu.

Nunarsuarmut tamarmut naalakkersuisussat

Naalagaaffik naalagaaffiuvoq Guutip pilersitaa. Guutip naalagaaffiani Jiisusi Kristusi makititaasimasoq kunngiuvoq. Qilammi kunngitut ivertinneqarnera pruffiitip Danielip imminut takorruuisitami takuaa, taanna ima allappoq: “Kingumut takusaqarpunga unnuami takorluuinikkut: Takuara qilaap nuiaasigut tikiuttoq inuup erneratut isikkoqartoq [Jiisusi]. Taassuma ittuinnartoq [Jehova Guuti] ornippaa taassumunngalu sassartitaalluni. Naalagaassusermik naalannaammillu kunngiussusermillu tunineqarpoq; inuiaqatigiit, naggueqatigiit immikkullu oqaasillit tamarmik kiffartorfigaat. Naalagaassusia naalagaassusiuvoq soraajuitsuusussaq, kunngeqarfialu suujunnaassanngilaq.” — Danieli 7:13, 14.

Aamma Danielimik allakkani erserpoq Naalagaaffik Guutimit tunngavilerneqassasoq, nunarsuarmi naalakkersuisunik tamanik suujunnaarsitsissasoq namminerlu soraajuitsuussasoq. Kapitali 2-mi Babylonip kunngiata sinnattua isumassarsiarititaasoq allaaserineqarpoq, sinnattumini takuaa inuusaliarujussuaq naalagaaffissuarnut kingoraattaattunut assersuutaasoq.  Pruffiitip Danielip sinnattoq taanna nassuiarpaa. “Ullussani kingullissani,” allappoq, “qilaap Guutiata naalagaaffik qaqugumulluunniit atasussaq pilersikkumaarpaa, kingornalu inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq.” — Danieli 2:28, 44.

Guutip naalagaaffiani kunngi allanik naalakkersueqateqassaaq. Jiisusip nunarsuarmi kiffartornermini apustilini aalajaatsut uppernarsaavigai taakku allallu qilammut makititaajumaartut issiavissaarsuarnilu issiajumaartut. (Lukasi 22:28-30) Issiavissaarsuaviit pinngilai, ersersippaami Naalagaaffik qilammiikkumaartoq. Biibilimi allassimavoq naalakkersueqataasussat taakku “naggueqatigiinnit immikkullu oqaasilinnit inuiannillu inuiaqatigiinnillu tamanit” piumaartut. Tassaalersinneqassapput ‘kunngiuffinngortitat palasinngortitallu Guutitsinnut, nunamullu kunngiussapput’ (1936). — Saqqummersitat 5:9, 10.

Sooq Naalagaaffimmik nutaarsiassaq nuannersuusoq

Malugiuk Jiisusi Kristusi “inuiaqatigiit, naggueqatigiit immikkullu oqaasillit” tamaasa naalagaaffigissagai taassumalu naalakkersueqatai ‘nunamut kunngiussasut’. Kikkummi Naalagaaffimmi tamatumani innuttaassappat? Tassaassapput nutaarsiassap nuannersup ullumikkut oqaluussissutigineqarneranut ajunngitsumik periartut. Aammattaaq innuttaasunut ilaassapput nunarsuarmi inuunissamut toqusunit makititaallutik naassaanngitsumik inuunissamut periarfissinneqartut.

Naalagaaffiup aqutsinerani pilluaqqussutit inuit nuannaarutigiumaagaat Biibilimi sukumiisumik allaatigineqarput. Ilamininngui aajuku:

Guutip “nunarsuarmi tamarmi sorsunnerit soraarsikkumaarpai, pisissit nallorumaarpai qalugiusallu aserorterlugit, qamussuit sorsuutit ikikkarumaarpai”. — Tussiaat 46:10.

“Illuliorumaarput namminneq inigisassaminnik viinnequtinillu ikkussuillutik inerititaat nerisassaminnik. Illuliaat allanit inigineqassanngillat ikkussugaalluunniit allanit nerineqassanatik.” — Esaja 65:21, 22.

‘Guutip qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.’ — Saqqummersitat 21:3, 4.

“Taava tappiitsut isaat uisitaassapput, tusilartut siutaat ammarneqassapput. Tusiattoq tuttorsuartut pissigarumaarpoq, oqajuitsuugaluaq qiimmattarluni appikkumaarpoq.” — Esaja 35:5, 6.

‘Piffissaq nalliukkumaarpoq ilivermiittut tamarmik taassuma [Jiisusip] nipaanik tusarumaarfissaat ilivernillu aniumaarfissaat — ajunngitsumik iliorsimasut makillutik inuunissamut.’ — Johannesi 5:28, 29.

“Qanilaartut nuna kingornutissavaat pilluangaarnertillu nuannaarutigissallugu.” — Tussiaat 37:11.

Ilumut nutaarsiassaavoq nuannersoq! Aammattaaq Biibilimi siulittuutit eqquuttut ersersippaat Naalagaaffiup naalakkersuinerata naapertuilluartup nunarsuarmut tamarmut atuutilernissaa qanillisoq.