Atuartartutta Apeqqutaat . . .

Jehovap Nalunaajaasui uppernikkut ajorunnaarsitsisarpat?

▪ Jehovap Nalunaajaasui uppernikkut ajorunnaarsitsinngisaannarput. Jiisusip pisimaneratut Guutip naalagaaffia pillugu nutaarsiassamik nuannersumik oqaluussissutiginninneq suliassamittut pingaarnertut isigaat. Isumaqarput kristumiut ilumoortut uppernikkut ajorunnaarsitsisarneq ilisarnaatiginagu pingaaruteqarnerungaartumilli ilisarnaateqartut.

Soorunami tamatsinnut assut pingaaruteqarpoq Jiisusip ukiuni hundredelinni siullerni misiginneqataangaarluni nappaatilinnik ajorunnaarsitsisarnera. Taamaalillunimi uppernarsarpaa Guutip naalagaaffiata aqutsinerani innuttaasoq kinaluunniit ima oqassanngitsoq: “Napparsimavunga!” — Esaja 33:24.

Ullumikkummi? Upperisarsioqatigiit kristumiuusut kristumiuunngitsullu ilaat tupinnartuliornikkut ajorunnaarsitsinerartarput. Jiisusilli ‘atermigut amerlaqisunik malunnangaartuliornerartartut’ sakkortuumik mianersoqqussutigai. Taakku ima oqarfigissavai: “Ilisarisimanngisaannarpassi. Nigorsinga, ilissi inatsisinik unioqqutitsisuususi!” (Matthæusi 7:22, 23) Ullumikkut uppernikkut ajorunnaarsitsiniartartut tupinnartuliornerartarnerat Guutimit akuerineqarnermut pilluaqquneqarnermullu ilumut ersiutaappat?

Jiisusip ajorunnaarsitsisarneri Biibilimi oqaluttuarineqartut eqqarsaatigeriakkit. Taakku ullumikkut uppernikkut ajorunnaarsitsiniartartut periaaserisartagaannut sanilliukkutsigit ullumikkut uppernikkut ajorunnaarsitsisarnerit Guutimeersuunersut Guutimeersuunnginnersulluunniit paasinissaa ajornannginnerutissinnaassavarput.

Jiisusi malitserpassuaqarniarlunilu tusarnaartorpassuaqarniarluni ajorunnaarsitsisaqattaanngisaannarpoq. Aap, allaat allanik isigisoqartinnagu ajorunnaarsitsisarpoq. Arlaleriarluni ajorunnaarsitani oqarfigisarpai tupinnartuliorsimanini kimulluunniit oqaatigeqqunagu. — Lukasi 5:13, 14.

Jiisusi tupinnartulioraangami akileqquneq ajorpoq. (Matthæusi 10:8) Ajorunnaarsitsinerilu iluatsittuaannarput. Napparsimasut taassumunnga orniguttut tamarmik peqqissilluinnartarput, ajorunnaarsinneqarnerannullu uppernerat aalajangiisuunngilaq. (Lukasi 6:19; Johannesi 5:5-9, 13) Jiisusi allaat toqusunit makititsisarpoq! — Lukasi 7:11-17; 8:40-56; Johannesi 11:38-44.

Jiisusi taamatut tupinnartuliortaraluartoq ataatsimiititsinerit tupinnartuliorfiusut killitsisimanartut atorlugit ilassarsiorneq kiffartorneranut siunertaanngilaq. Suliassaali pingaarnerpaaq tassaavoq Guutip naalagaaffia pillugu nutaarsiassamik nuannersumik oqaluussissutiginninnissaq. Jiisusip imminik malinnittut katersortikkamigit siunertaraa taakku ajoqersuganngortitsiortorlutik allanut Guutip naalagaaffiata aqutsinerani peqqilluinnalersinnaanerat ilinniartitsissutigissagaat. — Matthæusi 28:19, 20.

Ilumoorpoq Jiisusip ukiuni hundredelinni siullerni ajoqersugaasa ilaat tunissummik immikkut ittumik ajorunnaarsitsisinnaanermik tunineqarsimasut, ajorunnaarsitsisarnerli atorunnaartussaavoq. (1 Korinthimiut 12:29, 30; 13:8, 13) Ullumikkut kristumiut ilumoortut uppernikkut ajorunnaarsitsisarneq ilisarnaatiginngilaat, taakkuali imminut pilliutigeriaannaalluni asanninneq ataqatigissutigisartik ilisarnaatigaat. (Johannesi 13:35) Ullumikkut uppernikkut ajorunnaarsitsiniartarneq kristumiunik ilaqutariissuarnik ilumoortunik, naggueqatigiinnit tamaneersunik kulturikkullu assiginngilluinnartunik tunuliaqutalinnik, taamatut asaqatigiittunik pilersitsisimanngilaq.

Kristumioqarporli asanninnikkut ataasioqatigiittunik ima asaqatigiitsigisunik allaat akerleriissuteqarfiungaartuni imminnut ajoquserumanngitsunik allanilluunniit ajoqusiiumanngitsunik. Taakkumita kikkuuppat? Jehovap Nalunaajaasui. Kristusip asannittuliortarneratut asannittuliortarnertik nunarsuaq tamakkerlugu ilisarnaatigaat. Taamatut inuit naggueqatigiissutsikkut, inuiaassutsikkut kulturikkullu assigiinngitsunik tunuliaqutalinneersut ataasioqatigiinnerat ullumikkut tupinnartuliatut ippoq, tamannalu taamaallaat pisinnaavoq Guutip anersaavata illernartup sunniuteqarneratigut. Soormi tamanna uppernarsiniarlugu illit taakkua ataatsimiinnerisa ilaannut najuukkuit?

[Qupp. 30-mi assiliartaq]

Ullumikkut uppernikkut ajorunnaarsitsiniartartut (uani takusinnaasatit) Guutimit akuerisaappat?