Pimoorussilluni Jehovamut kiffartorneq

“Eqqarsaatigiuarniarsigit . . . pimoorussassaasut tamaasa.” — FILIPPIMIUT 4:8, NV.

1, 2. Sooq inuppassuit aliikkutassanik pingaartitsilersimappat, suullu apeqqutaalerpat?

INUIAAT oqaluttuarisaaneranni silarsuarmi artornartorsiorfiunerpaasumi inuuvugut. Jehovamik tatiginninngitsut “ullut atugarliungaarfissat” tamakku anigoruminaatsinnerusinnaavaat. (2 Timotheusi 3:1-5) Namminneerlutik ajornartorsiutitik aaqqinniartarpaat, aaqqissinnaanngilluinnartarpaalli. Inuppassuit ilumoorsaarpallaalinnginniassagamik aliikkutassarsiortuartarput.

² Inuppassuit ulluinnarni ulapinnertik anigorsinnaajumallugu aliikkutassat pingaartinnerusarpaat. Aamma kristumiut mianersunngikkunik tamakkuninnga salliutitsileriaannaasinnaapput. Qanoq tamanna pinngitsoorneqarsinnaava? Pimoorussiinnavittariaqaratta? Qanoq aliikkutassanik pingaaruteqarnerusunillu oqimaaqatigiissaarisinnaagatta? Najoqqutassiat Biibilimiittut suut inuunermi pingaaruteqarnerusut salliutinnissaannut imminullu pingaartippallaannginnissamut iluaqutigisinnaavavut?

Silarsuarmi aliikkutassanik pingaartitsiffiusumi pimoorussineq

3, 4. Biibilimi pimoorussisuunerup pingaaruteqassusia qanoq erseqqissarneqarpa?

³ Tamanit naluneqanngilaq silarsuup matuma inui ‘inuulluarniutinik’ pingaartitsivallaartut. (2 Timotheusi 3:4) Nuannaarniutinik pingaartitsivallaarneq Jehovamut attaveqarnitsinnik navianartorsiortitsisinnaavoq. (Ussatit 21:17) Taamaattumik pissutissaqarluarpoq apustilip Paulusip Timotheusimut Titusimullu allakkamini pimoorussisuunissap pingaaruteqarnera uparuaramiuk. Siunnersuutai malillugit inuugutta silarsuup inuunermut qarsupittumik isiginnittaasiatut isiginnittaaseqarnaveersaarsinnaavugut. — Atuakkit 1 Timotheusi 2:1, 2; Titusi 2:2-8. *

⁴ Ukiut hundredelillit matuma siorna inuunerup pimoorussassaaneranik ilaannikkut eqqarsaatiginnittarnissap nuannaarniutaannavinnik eqqarsaatiginninnermit pitsaanerungaarnera Salomop allaatigaa. (Oqaluussisartup oqaasii 3:4; 7:2-4) Inuunerup sivikissusia eqqarsaatigalugu pingaaruteqarluinnarpoq annaanneqarumalluta ‘ilungersornissarput’. (Lukasi 13:24) Annaanneqarumalluta ‘pimoorussassaasut tamaasa eqqarsaatigiuartariaqarpavut’. (Filippimiut 4:8, NV) Tamanna ima paasisariaqarpoq Kristumiutut inuunitsinnut tunngasut tamaasa soqutigingaartariaqarivut.

5. Kristumiup pimoorussisariaqarneranik assersuuteqarit.

⁵ Assersuutigalugu Kristumiut Jehova Jiisusilu ilaarlugit suliaminnik ilungersuutiginninnissartik pimooruppaat. (Johannesi 5:17) Taamaattumik sulinerminni ileqqorissaarlutillu unneqqarikkamik nersualaarneqartarput. Ingammik ilaqutariinni ittuusup ilaquttaminut pilersuinissamik ilungersuutiginninnissani pingaartippaa. Ilaquttanimmi pilersuinnginnerup assigiinnarpaa Jehovamik tunussineq! — 1 Timotheusi 5:8.

Pimoorussilluni nuannaarlunilu Jehovamik pallorfiginninneq

6. Qanoq nalunngilarput Jehovamik pallorfiginninnitsinnik pimoorussisariaqarluta?

⁶ Jehovap eqqortumik pallorfigineqarnissani pingaaruteqartutut isigiuaannarsimavaa. Assersuutigalugu Mosesip inatsisaasa atuunneranni Israelikkut Jehovamik pallorfiginnikkunnaaraangata tamanna taakkununnga ajortorujussuarmik  kinguneqartarpoq. (Josva 23:12, 13) Ukiuni hundredelinni siullerni Kristusip ajoqersugai pallorfiginninneq ilumoortoq ajoqersuutinit eqqunngitsunit isummanillu ajortunit sunnerneqaqqunagu ilungersortariaqarsimapput. (2 Johannesi 7-11; Saqqummersitat 2:14-16) Ullumikkuttaaq Kristumiut ilumoortut pallorfiginninnerminnik pimoorussipput. — 1 Timotheusi 6:20.

7. Paulusi oqaluussinissaminut qanoq piareersartarpa?

⁷ Oqaluussinerput nuannaarutigingaartarparput. Oqaluussinerpulli nuannaarutigiuarumallugu pimoorussisariaqarlutalu piareersarluartariaqarpugut. Paulusip kikkut ilinniartinnerlugit eqqarsaatigisarnerarpaa. Ima allappoq: “Kikkut tamaasa peqatiginiartarsimavakka ilaannaannilluunniit annaassaqarumagaluarlunga. Tamakkuninngali tamanik iliuuseqarpunga iivangkiiliu pillugu taassuminnga pissarseqataajumallunga.” (1 Korinthimiut 9:22, 23) Paulusip inunnik anersaakkut ikiuisarnini nuannaarutigisarpaa, eqqarsaatigeqqissaartarpaalu tusarnaartumi pisariaqartitarpiaannik qanoq matussusiisinnaanini. Taamaalilluni taakku Jehovamut kiffartornissaannut qiimmassarlugillu kajumissaartarpai.

8. (a) Oqaluussiffigisartakkatsinnut qanoq isiginnittaaseqartariaqarpugut? (b) Biibilimik atuaqqissaaqateqartarneq oqaluussinermi nuannaartuunissatsinnut qanoq ilasaataasinnaava?

⁸ Paulusi oqaluussinerminik qanoq pimoorussitigaa? Jehovamuinnaanngitsoq aammali sallusuissut pillugu tusarliussamik tusarnaarusuttunut ‘inussiaataajumavoq’. (Romamiut 12:11; 1 Korinthimiut 9:19) Allanut Guutip oqaasianik ilinniartitsinissaq akisussaaffigilersimagutsigu — Biibilimik atuaqqissaaqateqarnerugaluarpat Kristumiut ataatsimiinneranniugaluarpat ilaqutariittulluunniit atuaqqissaaqatigiinnermiugaluarpat — ilinniartitatsinnut akisussaaffeqarnerput ilisimaaraarput? Immaqa isumaqarpugut Biibilimik atuaqqissaaqateqartarneq akisussaaffeqarnarpallaartoq. Ilumoorpoq amerlanertigut piffissaq nammineq sammisartakkatsinnut atornagu allanik ikiuinermut atortariaqartaripput. Jiisusilli neriorsoqqissaarpaatigut ‘tunisinerup tigusinermit pilluarnarneruneranik’. (Apustilit Suliaat 20:35) Allat annaanneqarnissamut aqqutikkoornissaannik ilinniartitsinermut nammineq peqataanerput suliarisinnaasatsinnit allanit tamanit pilluarnerulissutigissavarput.

9, 10. (a) Pimoorussisuugaanni inunnik allanik eqqissisimaaqateqanngisaannarlunilu nuannisaaqateqanngisaannarnissaq pineqarpa? Nassuiaruk. (b) Utoqqaanertap qiimmassaanissaminut ilassiortuunissaminullu suna iluaqutigissavaa?

⁹ Pimoorussisuugutta imaanngilaq inunnik allanik eqqissisimaaqateqanngisaannarlutalu nuannisaaqateqanngisaannartugut. Jiisusi naammalluinnartumik maligassiuivoq allanik ilinniartitsiinnarani aammali eqqissisimaartilluni allat ilisarisimallualernissaannut piffissaqartarluni. (Lukasi 5:27-29; Johannesi 12:1, 2) Pimoorussisuugutta aamma imaanngilaq mersernarpasittuaannartariaqartugut. Jiisusi mersernarpasittuaannarlunilu sukannerpasittuaannarsimasuuppat inuit kajungerinngilluinnarsimassagaluarpaat. Allaat meeqqat Jiisusi ilagalugu nuannarisarpaat. (Markusi 10:13-16) Jiisusip oqimaaqatigiissaarisuunera qanoq ilaarsinnaavarput?

¹⁰ Utoqqaanertaq pillugu qatanngut angut ima oqarpoq: “Imminut piumaffigisupilussuuvoq, allalli kukkujuitsuunissaannik piumaffiginngisaannarpai.” Illit pillutit taamatut oqartoqarsinnaava? Allanik ingasaassinani ilimasuffiginninneq ajortuunngilaq. Assersuutigalugu meeqqat angajoqqaaminnit naleqquttumik anguniagassinneqaraangamik taakkulu anguniagassiissutaannik angusinissamut ikiorneqaraangamik ajunngitsumik periartarput. Taamatuttaaq utoqqaanertat ilagiinniittunik ataasiakkaanik anersaakkut ineriartornissamut kajumissaaralutillu qanoq ineriartorsinnaanerannik immikkut siunnersuisinnaapput. Utoqqaanertaq oqimaaqatigiissumik imminut isigiguni ilakkuminartuussaaq. (Romamiut 12:3) Qatanngut arnaq ima oqarpoq: “Utoqqaanertaq sunik tamanik quianartunngortitsiniartassappat iluarissanngikkaluarpara. Aappaatigulli ilumoorsaartuaannassaguni saaffigiuminaassagaluarpoq.” Qatanngut arnaq alla oqarpoq utoqqaanertat ilaat “pimoorussisupilusuujuaannaramik mersernarpasingaatsiarsinnaasut”. Tamatta Jehovamut, ‘Guutimut pilluartumut’, pallorfiginninnerput nuannaarutigisassatut isigisariaqarparput, utoqqaanertallu allanik nuannaannginnerulersitsisarnissartik kissaatiginngilluinnarpaat. — 1 Timotheusi 1:11.

 Ilagiinni akisussaaffeqalerumanissaq

11. Ilagiinni akisussaaffeqalernissamik ‘kajungerisaqarneq’ qanoq paasisariaqarpa?

¹¹ Apustilip Paulusip angutit ilagiinniittut akisussaaffeqarnerulernissamut piumasaqaatinik eqqortitsinissaannik kajumissaaramigit namminneq anguniagaqarnissaannut kajumissaanngilai. Ima allappoq: “Nakkutilliisuujumasup suliassamisut kajungerisaa pingaartorujussuuvoq.” (1 Timotheusi 3:1) Kristumiu angut suliassamik ‘kajungerisaqaruni’ tamanna ersersittariaqarpaa ilagiinni kiffartorsinnaanermut anersaakkut pissuserineqartussanik pisariaqartunik pissuseqalerniarnermigut. Qatanngut angut minnerpaamik ukioq ataaseq kuisimasimaguni ilagiinnilu kiffartortunut piumasaqaatinik Biibilimiittunik eqqortitsisimaguni ilagiinni kiffartortunngornissaa inassutigineqarsinnaavoq. Piumasaqaatit Biibilimiittut Timotheusimut allakkani siullerni 3:8-10, 12, 13-mi allassimapput. Maluginiarsinnaavarput versimi 8-mi Ny Verden-Oversættelsen af De Hellige Skrifter naapertorlugu ima allassimasoq: “Ilagiinni kiffartortut pimoorussisuusariaqarput.”

12, 13. Qatanngutit angutit inuusuttut ilaatigut qanoq akisussaaffeqalerumanerminnik ersersitsisinnaappat?

¹² Illit qatanngutaavit angut kuisimasoq inuusuttuaraajunnaalersoq Jehovamik pallorfiginninnermik pimoorussisoq? Taamaappat akisussaaffeqalerumanerit arlaatigut ersersissinnaavat. Assersuutigalugu oqaluussinerulernissat oqaluussillaqqinnerulernissallu sulissutigisinnaavatit. Ukiui apeqqutaatinnagit oqaluusseqateqartalernissannut piareersimavit? Biibilimik atuaqqissaaqatissarsiortarpit? Biibilimik atuaqqissaaqateqartaruit Kristumiullu ataatsimiinnerini siunnersuutigineqartut malittarukkit ilinniartitsillaqqinnerulissaatit. Aamma Jehovap aqqutaanik ilinniartitannut misiginneqatiginnissinnaalissaatit. Atuaqqissaaqatigisat allannguisariaqarnerminik paasinninnerujartortillugu Biibilimik najoqqutassianik malinninnissaanut utaqqisinaassuseqarlutit periaaserillutillu qanoq ikiorsinnaanerlugu paasissavat.

¹³ Ilissi qatanngutit angutit inuusuttut utoqqarnik ilagiinniittunik ikiuinissamut piareersimasarsinnaavusi. Aamma naalagaaffilersaarfimmik soqutiginninnersi ersersittarsinnaavarsi eqqiaaqataasarlusilu torersuutitseqataasarnissigut. Kajumillusi ikiuukkumasarnissigut kiffartornissinnik pimoorussisuunersi ersersittarparsi. Timotheusip pisimaneratut, qatanngutissinnik taakkualu pisariaqartitaannik ilumoorlusi isumaginninnissaq ilikkarsinnaavarsi. — Atuakkit Filippimiut 2:19-22.

14. Qatanngutit angutit inuusuttut ilagiinni kiffartulersinnaanerat qanoq ‘misilinneqarsinnaava’?

¹⁴ Ilissi utoqqaarnertaasusi qatanngutinut angutinut inuusuttunut ‘inuusuttut kajungerisaannik’ qimarratiginnittunut ‘iluarnermillu, uppernermik, asanninnermik, eqqissinermik’ — pissuserineqartussanillu ajunngitsunik allanik — ‘noqqaassutiginnittunut’ suliassiisarnissarsi eqqumaffigisariaqarparsi. (2 Timotheusi 2:22) Ilagiinni suliassinerisigut akisussaaffeqalersinnaanersut ‘misilinneqarsinnaapput’ siumukarnerat “tamanit takuneqarsinnaaqqullugu”. — 1 Timotheusi 3:10; 4:15.

Ilagiinni ilaqutariinnilu pimoorussineq

15. 1 Timotheusi 5:1, 2 naapertorlugit allanik pinnittarnitsinnut tunngatillugu pimoorussisuunerput qanoq ersersissinnaavarput?

¹⁵ Pimoorussisuunermut ilaavoq qatanngutinik ataqqinninneq. Paulusip Timotheusi siunnersoramiuk ataqqeqatigiittariaqarnerput erseqqissarpaa. (Atuakkit 1 Timotheusi 5:1, 2). Ataqqeqatigiittarnissaq ingammik pingaaruteqarpoq angutaagaanni arnamut arnaagaannilu angummut pissusilersorneq eqqarsaatigalugu. Arnanik, ingammik nuliamik, ataqqinninnermut tunngatillugu  Jobi maligassiuilluarpoq. Jobi arnamik allamik pileriginnilluni isiginninnaveersaartarpoq. (Jobi 31:1) Pimoorussigutta qatanngutivut qaninniarujoortassanagilluunniit taakkua nuanniilliuutigilersinnaasaannik iliuuseqartassanngilagut. Ataqqeqatigiinnissaq ingammik pingaaruteqarpoq aappassiariilertoqarsimaguni. Kristumiup ilumoortup angutaaguni arnaq arnaagunilu angut katinniartuusaarlugu asuleerfiginngisaannassavaa. — Ussatit 12:22.

16. Silarsuup uiusunut ataataasunullu isiginnittaasia Biibilimilu taakkua inissisimaffiata allaatigineqarnera qanoq assigiinngilluinnarpat?

¹⁶ Ilaqutariinniittugut Guutip uagutsinnut inissisimaffigititaa pimoorussassatut isigiuartariaqarparput. Saatanip silarsuaani uiusut ataataasullu inissisimaffiat eqqunngitsumik isigineqartarpoq. Assersuutigalugu fjernsynimi filminilu ilaqutariinni ittuusoq illaruaatigineqartarpoq, taamaalilluni oqartussaassusia Guutimit pisoq ataqqineqarunnaartarpoq. Biibilimili uiusoq ilaqutariinni akisussaaffeqangaartutut allaatigineqarpoq, ‘nuliaminummi niaquuvoq’. — Efesosimiut 5:23; 1 Korinthimiut 11:3.

17. Ilaqutariittut anersaakkut ittunik sammisaqarfimmi akisussaaffitsinnik pimoorussinerput qanoq ersersissinnaavarput?

¹⁷ Imaasinnaavoq uiusoq ilaquttaminik pilersuisoq. Ilaquttaminilli anersaakkut siulersuinngikkuni naliliilluarsinnaaneq ilisimassuserlu amigaatigisimassavai. (5 Mosesi 6:6, 7) Ilaqutariinni ittuuguit ilagiinnilu akisussaaffeqalerumaguit Timotheusimut allakkani siullerni 3:4-mi allassimasut naapertorlugit ‘inoqutinnik aqutsisinnaasuusariaqarputit qitornannillu naalatitsisinnaallutillu ataqqineqartuullutit’. Tamatumunnga tunngatillugu imminut ima aperigit: ‘Sapaatip akunneri tamaasa ilaquttama Biibilimik atuaqqissaaqatiginissaannut piffissaqartarpunga?’ Kristumiut nuliaasut ilaasa uitik anersaakkut ittunut tunngasut eqqarsaatigalugit siulersueqqusariaqartarpaat. Uiusut tamarmik akisussaaffimminnik tamatuminnga qanoq isiginninnerlutik eqqarsaatigeqqissaartariaqarpaat. Soorunami nuliaasoq uiminik tapersersuiumallunilu suleqateqarumassaaq unnuk ilaqutariittut anersaakkut ittunik sammisaqarfik sapaatip akunneri tamaasa pisarsinnaaqqullugu.

18. Meeqqat inuunermi pingaaruteqartunik pimoorussinissaminnut qanoq ilinniartinneqarsinnaappat?

¹⁸ Meeqqat aamma kajumissarneqarput inuunermi pingaaruteqartunik pimoorusseqqullugit. (Oqaluussisartup oqaasii 12:1) Eqiasuilluni sulinermik ilinniartinneqarunik iluaqutigissavaat. Assersuutigalugu angerlasimaffimmi ukiuminnut piginnaasaminnullu naleqquttumik suliakkerneqartarsinnaapput. (Upputit 3:27) Kunngip Daavip nukappiaaraallunili savanik paarsineq ilikkareersimavaa. Aamma nipilersorneq erinniornerlu ilikkarsimavai, taamatullu piginnaasaqarnini pissutigalugu Israelip kunngianut kiffartulerpoq. (1 Samueli 16:11, 12, 18-21) Daavi peroriartorami qularnanngitsumik pinnguartarsimavoq, aammali naleqangaartunik piginnaasaqalersimavoq kingusinnerusukkut Jehovamik unnersiutiginninnerminut iluaqutigisaminik. Savanik paarsisutut misilittakkani Israelikkunnik kamagittarluni siulersuinissaminut iluaqutigai. Ilissi meeqqat inuusuttullu, iluaqutaasunik piginnaasaqalerniartarpisi — piginnaasanik Pinngortitsisumut kiffartornissinnut  iluaqutaasunik siunissamilu akisussaaffeqalernissassinnut piareersaataasunik?

Oqimaaqatigiissumik isiginnittaaseqartuarneq

19, 20. Imminut Jehovamillu pallorfiginninnermut oqimaaqatigiissumik isiginnittaaseqartuarnissat qanoq aalajangiusimasinnaaviuk?

¹⁹ Tamatta imminut oqimaaqatigiissumik isiginissarput — imminut pingaartippallaannginnissarput — ilungersuutigisariaqarparput. ‘Iluarniarpallaarusunngilagut.’ (Oqaluussisartup oqaasii 7:16) Quiasaarsinnaaneq pissutsini najummassimanartuni iluaqutaasinnaaavoq, angerlasimaffimmiugaluarpat, suliffimmiugaluarpat, qatanngutivulluunniit kristumiut peqatigigaluarutsigit. Angerlasimaffimmik eqqissisimanartuusussamik eqqissisimanarunnaarsitseqqunata ilaqutariinni ingasaassilluta immitsinnut isornartorsiornaveersaartariaqarpugut. Qatanngutivut ilagiinniittut nuannisaqatigisinnaavavut, eqqaamassavarpullu oqaloqateqarnitta ilinniartitseriaatsittalu iluaqutaallutillu ineriartornartuunissaat. — 2 Korinthimiut 13:10; Efesosimiut 4:29.

²⁰ Silarsuarmi inuuffigisatsinni Jehova taassumalu inatsisai pingaartinneqanngillat. Jehovalli innuttaasa taassumunnga naalanneq ilumoorfiginninnerlu pimoorussassatut isigaat. Nuannaarutigeqaarput inunnut Jehovamik pallorfiginninnermik pimoorussisunut ilaanerput. Qanortoq tamatta inuunermik pallorfiginninnermillu pimoorussinerput aalajangiusimajuartigu.

[Quppernerup ataani ilanngussaq]

Qanoq akissavit?

• Sooq silarsuup inuunermut qarsupittumik isiginnittaasiatut isiginnittaaseqarnaveersaartariaqarpugut?

• Qanoq ililluta nuannaarluta pimoorussillutalu oqaluussisinnaavugut?

• Akisussaaffimmut isiginnittaatsitsinnit qanoq erserpa inuunermi pingaarutilinnik pimoorussinerput?

• Sooq qatanngutitsinnik ilaquttatsinnillu ataqqinnittarnissarput pingaaruteqangaarpa?

[Atuaqqissaarnermi apeqqutit]

[Qupp. 14-mi assiliartat]

Uiusoq ilaquttaminik timikkut anersaakkullu isumassuisariaqarpoq