Guutimut palligunniarit

‘Qinnutinik tusartartoq’

NALUNAARSUUTIT SIULLIIT 4:9, 10

JEHOVAP GUUTIP pallorfiginnitsimi aallussilluartut ilumoorlutik qinnutaat ilumut akisarpai? Biibilimi allaatigineqarpoq angut ilisimasaqarfigerpianngisarput Jabesimik atilik; tassanilu ersersinneqarpoq Jehova ilumut ‘qinnutinik tusartartuusoq’. (Tussiaat 65:3) Oqaluttuaq naatsunnguaq taanna ilimananngilluinnartumi kinguaariit allattorsimaffiata qeqqani Nalunaarsuutit siulliit aallartinneranni atuarsinnaavarput. Nalunaarsuutit siulliit 4:9, 10 misissoriartigit.

Jabesi pillugu allassimasut tamaasa versini marlunni taakkunani atuarsinnaavavut. Versi 9-mi allassimavoq ‘anaanaata Jabesimik atsersimagaa’ ima oqarluni “anniarlunga erniarigakku”. * Sooq taama atserpaa? Nalinginnaasumit anniarnerulluni ernisimava? Uillarnerualuunniit ernertaamik inunngornera uimi misiginngimmagu aliasuttoq? Tamanna Biibilimi allaatigineqanngilaq. Anaanaasorli taanna kingorna pissutissaqarluassaaq ernerminik tulluusimaarutiginningaarnissaminut. Jabesip qatanngutai assuarnaatsuusimasinnaapput, Jabesili “qatanngutiminit tamanit ataqqisaanerpaavoq”.

Jabesip qinusarneq pingaartingaarpaa. Qinnummini Guutip pilluaqqusinissaa qamannga pisumik qinnutigeqqaarpaa. Taava upperluartuunerminik ersersitsisut pingasut qinnutigai.

Siullermik, Jabesip Guuti ima qinnuigaa: ‘Nuna pigisara annerulersiguk.’ (Versi 10) Angut ataqqinartoq taanna piumatulluni nunaatissarsiunngilaq, tullimiluunniit piinik pileriginninngilaq. Ilumoorluni qinunera inunnut, nunaammuunngitsoq, tunnganerusimasinnaavoq. Immaqa Guutimut ilumoortumut pallorfiginnittunut amerlanerusunut inissaqarneruleqqullugu qinnutigaa najukkami eqqissisimasumik annerulersinneqarnissaa. *

Aappassaanik, Jabesip Guuti qinnuigaa ‘assaata’ najuinissaanik. Guutip assersuutaasumik assaa tassaavoq nukik imminik pallorfiginnittunik ikiuiniarluni atortagaa. (1 Nalunaarsuutit 29:12) Uummammigut kissaatigisani eqquutinneqaqqullugu Jabesi Guutimik, imminik upperinnittunik ikiuiumalluni talia naappallaanngitsumik, tatiginnippoq. — Esaja 59:1.

Pingajussaanik, Jabesi ima qinuvoq: “Ikiunnga ajunaarneq anniarnerlu uannit nigorsimatillugit.” Biibilip hebræerisut allassimaqqaarfii naapertorlugit Jabesip ajunaarnerup kingunerinik eqqorneqaruni aliasuppallaannginnissani imaluunniit aliasungaarnermik artorsangaalinnginnissani qinnutigigaa ilimanarpoq.

Jabesip qinnutimini ersersippaa pallorfiginninnermik ilumoortumik soqutiginninnini aamma qinnutinik tusartartumik tatiginnillunilu upperinninnini. Jehova qanoq piva? Oqaluttuaq naatsunnguaq taanna ima naavoq: ‘Guutip qinnutigisaanik tunivaa.’

Qinnutinik tusartartoq allanngorsimanngilaq. Pallorfiginnitsimi qinnutaat nuannaarutigingaartarpai. Taassuminnga tatiginnittut neriorsoqqissaarneqarput ‘piumasaanut naapertuuttumik qinugunik tusarneqarumaartut.’ — 1 Johannesi 5:14.  (wp10 10/1-E)

[Quppernerup ataani ilanngussat]