Jehovamik tatiginnilluinnarneq toqqissisimalersitsisarpoq

“Torlorfigisaraanganni [Jehovap] tusartaraanga.” — TUSSIAAT 4:4.

1, 2. (a) Daavi qanoq navianartorsiorpa? (b) Tussiaatit sorliit sammissavavut?

KUNNGI DAAVI Israelimi ukiorpassuarni naalakkersuisimavoq. Maannakkulli navianartorsiorpoq. Ernera pikitsitsiumatooq, Absalomi, imminut kunnginngortippoq, Daavillu Jerusalemi qimattariaqalerpaa. Aamma siunnersortiminit tatigisaminit killuutigineqarpoq. Maannakkut qianngarmi kamillaangallunilu Uuliap Qaqqaatigoorpoq imminik ilumoorfiginnittut ikittunnguit ingiaqatigalugit. Kingusinnerusukkut Shim’ip, angutip Kunngip Saulip ilaqutaasa ilaata, Daavi ujaqqanik issumillu milloorpaa perloqqullugulu. — 2 Samueli 15:30, 31; 16:5-14.

² Daavi misilinneqangaarnini pissutigalugu aliasullunilu nikanarsagaalluni toqussava? Naamik, Jehovami tatigaa. Tamanna Tussiaammit 3-mit, Daavip qimaanerminut tunngatillugu allagaanit, erseqqilluinnarpoq. Daavip aamma Tussiaat 4 allappaa, Tussiaatinilu taakkunani marlunni ersersippaa Guuti qinnutinik tusartarlunilu akisisartoq. (Tussiaat 3:5; 4:4) Tussiaatini taakkunani uppernarsarneqarpoq Jehovap kiffani ullukkut unnuakkullu najorlugit, annertoqqusersorlugit eqqissinermillu toqqissisimanermillu pilluaqqusarai. (Tussiaat 3:6; 4:9) Taamaattumik Tussiaatit taakku misissoriartigit paasiniarlugu qanoq Guutimut tatiginninnerulissutigisinnaanerlutigit qanorlu Guutimit toqqissisimalersinneqarsinnaanersugut.

‘Amerlasuut uagutsinnik saassussigaangata’

3. Tussiaat 3:2, 3 naapertorlugu Daavi qanoq nalaataqarpa?

³ Nalunaariartortitaq nalunaarpoq ‘Israelikkut Absalomimut ililiussimasut’. (2 Samueli 15:13) Absalomip taama amerlatigisunik ileqalersimanera tupigusuutigalugu Daavi ima oqarpoq: “[Jehova], ila akeqqama amerlassusii! Amerlaqaat uannik saassussisut, amerlaqaat oqartut pillunga: ‘Taanna Guutip annaatissanngilaa.’” (Tussiaat 3:2, 3) Israelikkut ilarpassui isumaqarput Absalomip tapersersuisuisalu ajunaartitsiniarnerannit Daavi Jehovamit annaanneqarnavianngitsoq.

4, 5. (a) Daavip suna qularutiginngilaa? (b) Oqaaseq “aarlortitsisiga” qanoq paasisariaqarpa?

⁴ Daavip Guuti tatigilluinnaramiuk toqqissisimavoq. Ima erinarsorpoq: “Kisianni illit [Jehova], tassaavutit eqqortinnaveeqqutiga, ataqqinaatiga, aarlortitsisiga.” (Tussiaat 3:4) Daavip qularutiginngilaa Jehovap illersussagaani sakkutuup eqqortinnaveeqqummit illersorneqarneratut. Aap, kunngi utoqqalisoq qimaavoq nikanarsarneqarami nakangalluni niaqqi ulissimallugu. Qutsinnerussaartulli Daavi ataqqinarsisippaa taassuma pissutsinik atugaanik pitsaanerulersitsinermigut. Jehovap ‘aarlortissavaa’. Daavip Jehova torlorfigaa ikioqqulluni qularutiginagulu akiumaaraani. Illit Jehova taamatut tatigaajuk?

⁵ Daavip oqaaseq “aarlortitsisiga” atoramiuk ersersippaa Jehovamit ikiorneqarnissani qularinagu. Today’s English Version naapertorlugu versi taanna imaappoq: “Illilli, NAALAGAQ, navianartunut eqqortinnaveeqqutigiuarpakkit; illit ajugaatittarlungalu sapiissuseqalerseqqittarparma.” Qinerlerfissiami oqaaseq “aarlortitsisiga” ima nassuiarneqarpoq: “Inuk Guutimit ‘aarlortinneqaruni’ taassumannga neriuuteqalersinneqartarlunilu toqqissisimalersinneqartarpoq.” Daavi  Israelikkunnut kunngiujunnaarsinneqarami aliasunnissaminut pissutissaqarluarpoq. ‘Aarlortinneqartarninili’ pissutigalugu sapiissuseqaleqqittarlunilu Guutimik tatiginneqqilertarpoq toqqissisimalluinnalissutigisaminik.

Jehova akisarpoq!

6. Sooq Daavip eqqaavaa qinnutini Guutip qaqqaanit illernartumit akineqarumaartut?

⁶ Daavi toqqissisimallunilu Jehova tatigalugu ima nangippoq: “[Jehovap] torlorfigiganni akivaanga qaqqaminit illernartumit.” (Tussiaat 3:5) Daavip peqqusineratigut angerutsip illerfia, Jehovap najuunneranut assersuutaasoq, Qaqqamut Zionimut oqqunneqarpoq. (Atuakkit 2 Samueli 15:23-25). Taamaattumik pissusissamisoorpoq Daavip eqqaammagu qinnutini Guutip qaqqaanit illernartumit akineqarumaartut.

7. Sooq Daavi annilaanganngila?

⁷ Daavip qularutiginngilaa Guutimut qinnutini asuliinnaanavianngitsut. Taamaattumik annilaanganngilaq, imali erinarsorpoq: “Nallarpunga sinilerlungalu, iterpunga [Jehovap] pissatsimmanga.” (Tussiaat 3:6) Allaat unnuakkut, terlinganeerneqarluni saassunneqarnissaq ilimanarnerugaluartoq, Daavip sinilernissani annilaangatiginngilaa. Iternissani qularutiginngilaa. Misilittakkaminit nalunngilluinnarpaa qularutiginngilluinnarsinnaallugu Jehovamit tapersersorneqartuarnissani. Aamma uagut Jehovap tapersersortuarumaarpaatigut taassuma ‘aqqutigeqqusaanik’ maleruaaqqissaartuarlutalu taanna qimanngisaannarutsigu. — Atuakkit 2 Samueli 22:21, 22.

8. Tussiaammi 27:1-4-mi qanoq erserpa Daavip Guuti tatigigaa?

⁸ Daavip toqqissisimallunilu Guutimik tatiginnilluinnarnera Tussiaasiaanit allanit erserpoq, taakku isumassarsiarititaasut ilaat imaappoq: “[Jehova] qaammaqqutigigakku annatsitsisigalugulu kina ersigissavara? [Jehova] inuuninnut sernissortigigakku kina qunugissavara? . . . Sorsunnialluunniit ungugaluarpannga uummatiga sioorassutissaqanngilaq. . . . Manna kisiat [Jehovamit] kissaatigaara, ataaseq kipitsavigaara: Ineqarumallunga [Jehovap] illuani inuunera tamaat, tipaatsuutigisinnaajumallugu [Jehovap] alutornassusia, akissutisiffigiumallugulu naalaffiani.” (Tussiaat 27:1-4) Aamma illit taamatut  misigiguit, pissutsillu atukkatit naapertorlugit pisinnaaguit, ilagiit ataatsimiinnerini uppeqatitit ilagisarumaarpatit. — Hebræerit 10:23-25.

9, 10. Sooq oqartoqarsinnaava Daavi akiniaajumatuujunngitsoq?

⁹ Absalomi pikitsitsigaluartoq allanillu ilumoorfiginninngitsuliorfigineqaraluarluni Daavi ima erinarsorpoq: “Qunuginngilakka sorsuttartut 10.000-it uannik ungusisut sammivinnit tamanit. Makigit, [Jehova], annaannga Guutiga! Tassami akeqqakka ersaarpatit nallorlugillu iluaatsut kigutaat.” — Tussiaat 3:7, 8.

¹⁰ Daavi akiniaajumatuujunngilaq. Akerai ‘ersaarneqarpata’, imaluunniit isanneqarpata, taamaaliortoq tassaassaaq Guuti. Kunngi Daavi nammineerluni Mosesip inatsisaanit allaqqiisimavoq, nalunngilaalu Jehova tassani ima nalunaaruteqartoq: “Akiniaanissaq akisinissarlu uanniipput.” (5 Mosesi 17:14, 15, 18; 32:35) Guutip aamma aalajangerumaarpaa guutiitsut ‘kigutaat nallussanerlugit’. ‘Kigutaat nallorneqarnissaat’ ima paasisariaqarpoq taakku ajoqusiisinnaajunnaarsinneqassasut. Jehovap guutsiitsut kikkuunersut nalunngilai ‘inuup uummataa isigisaramiuk’. (1 Samueli 16:7) Qujamasuutigisinnaavarput Jehovap uppissuseqalersillutalu nakussatsittarmatigut guutsiitsuunerpaaq ajornerpaarlu, Saatani, suujunnaarsinneqartariaqartoq løvitut uiannisaartutut kiguteqanngitsutulli ungasinngitsukkut itinersuarmut iginneqarumaartoq akiorsinnaaniassagatsigu! — 1 Petrusi 5:8, 9; Saqqummersitat 20:1, 2, 7-10.

‘Annassut Jehovamit pivoq’

11. Sooq uppeqativut qinnuttassavavut?

¹¹ Daavip paasivaa aniguisinneqartariaqarluni, nalunngilaalu Jehova aniguisitsisinnaasutuaasoq. Tussiaasiortorli imminuinnaq eqqarsaatiginngilaq. Jehovap innuttamisut toqqagai ataatsimut isigalugit aamma eqqarsaatigai. Taamaattumik Daavip tussiaasiani isumassarsiarititaasoq ima naggaserpaa: “Annassut [Jehovamit] pivoq. Innuttatit pilluaqqukkit, [Jehova].” (Tussiaat 3:9) Daavip nammineq ajornartorsiuterpassuaqaraluarluni Guutip innuttai ataatsimut isigalugit eqqarsaatigai, qularinngilaalu Jehovap taakku pilluaqqujumaarai. Uaguttaaq uppeqativut eqqarsaatigissavavut, ilaa? Qinnunnissaat eqqaamasartigu Jehovalu qinnuigalugu taakku anersaaminik illernartumik tuneqqullugit nutaarsiassaq nuannersoq sapiillutik oqaluussissutigisinnaaniassammassuk. — Efesosimiut 6:17-20.

12, 13. Absalomi qanoq piva, Daavilu qanoq qisuariarpa?

¹² Absalomi nikanarsagaalluni toquvoq. Tamannalu allanik, ingammik Guutimit taninneqarsimasumik, eqqunngitsuliorfiginnittunut tamanut mianersoqqussutaavoq. (Atuakkit Ussatit 3:31-35). Sorsuuttoqarpoq, Absalomillu sakkutuui ajorsartitaapput. Absalomi siutitoorsuaq qimusserfigalugu qimaavoq, nujaali orpissuup avalequtaanut naatipput. Tassani susinnaanani nivingaannalermat Joabip qalugiusanik pingasunik tiguseriarluni uummataatigut kapivaa. — 2 Samueli 18:6-17.

¹³ Daavi ernerminut tunngatillugu qanoq pisoqarsimasoq tusaramiuk nuannaarpa? Naamik. Aliasulluni pisoqattaartuarpoq, qiallunilu ima kappialavoq: “Ernera, Absalomi, ernera, ernera, Absalomi! Illit pinnak uanga toqusimasariaqaraluarpunga! Absalomi, ernera, ernera!” (2 Samueli 18:24–19:1) Aatsaat Joabip oqaluffigimmani Daavip ernini aliasuutigivallaarunnaarpaa. Absalomip taamatut toqunerata ila alianassusia! Ingasaassilluni namminissarsiortumik anguniagaqarusunnini pissutigalugu ataatani — Jehovap tanitaa — akiorpaa, taamaalillunilu imminut ajunaarutissiinnarpoq. — 2 Samueli 19:2-9; Ussatit 12:21; 24:21, 22.

Daavip Guutimik tatiginninnini eqqartoqqippaa

14. Sooq Tussiaat 4 erinniarineqarpa?

¹⁴ Soorlu Tussiaat 3, aamma Tussiaat 4 Daavimit qinnutaavoq, tamatumanilu Daavip ersersippaa Jehovamik tatiginnilluinnarnini. (Tussiaat 3:5; 4:4) Imaasinnaavoq Absalomip pissaanermik arsaareriaraluarnera iluatsinngimmat Daavip Jehovamut qujamasunnini eqqissiallanninilu ersersinniarlugu tussiaat taanna erinniarigaa. Aamma imaasinnaavoq erinarsortartut Levikkuusut eqqarsaatigalugit erinniarigaa. Qanorluunniit  ikkaluarpat tussiaatip imarisaasa eqqarsaatigeqqissaarneratigut Jehovamik tatiginninnerput nakussatsissinnaavarput.

15. Sooq tatiginnilluta Jehova ernera aqqutigalugu qinnuigisinnaavarput?

¹⁵ Daavip Guutimik tatiginnilluinnarnini Guutillu qinnutiminik tusarnaartarneranik akisisarneranillu qularutiginninnginnini erserseqqippaa. Ima erinarsorpoq: “Torlulasaraangama akinnga, illit Guutiga pinngitsuutitsisiga [naapertuilluartoq, NV]! Annikilliorninni annaatereersimavarma. Saammaannga, qinnutiga tusaruk!” (Tussiaat 4:2) Uaguttaaq taamatut Guutimik tatiginnissinnaavugut naapertuilluartuliortarutta. Jehova, ‘Guuti naapertuilluartoq’, kiffaminik eqqortuliorusuttunik pilluaqqusisartoq nalunnginnatsigu Jiisusi aqqutigalugu taassumalu pilliutaa tunngavigalugu Guutimut qinusarsinnaavugut qularutiginagu qinnutitsinnik akisiumaarnissaa. (Johannesi 3:16, 36) Tamanna eqqissiallannangaarami, ilaa?

16. Suna Daavip nikalluutigisimasinnaavaa?

¹⁶ Ilaatigut nikalluutigisinnaasatsinnik nalaataqarsinnaagatta toqqissisimajunnaarsinnaavugut. Imaasinnaavoq Daavi taama nalaataqartoq, imami erinarsorpoq: “Inuit ilissi, qanoq sivisutigisumik ataqqinaatiga kanngunarsarniarpisiuk? Piunngitsut nuannaraasi sallulu ujarlugu.” (Tussiaat 4:3) Matumani oqaaseq “inuit” iluarinninngippaluttumik atorneqarpoq. Daavimut akeraasut ‘piunngitsut nuannaraat’. New International Version naapertorlugu versip ilaa ima nutserneqarsimavoq: “Qanoq sivisutigisumik nakutitsiniutit nuannariniarpisigit guutillu ilumuunngitsut ujartorlugit?” Allat iliuuserisaat nikalluutigisaraluarlutigit Guuti ilumoortutuaq, Jehova, qamannga pisumik qinnuigiuarlugulu tatigilluinnartigu.

17. Tussiaat 4:4 naapertorlugu qanoq iliuuseqarnissarput nassuiaruk.

¹⁷ Daavip Guutimik tatiginninnera oqaatsini tulliuttuni erseqqippoq, imami erinarsorpoq: “Ilisimassavarsi [Jehovap] ilumoorsutsini tupinnartoq uannut takutissimagaa, torlorfigisaraanganni [Jehovap] tusartaraanga.” (Tussiaat 4:4) Jehova ilumoorfigiuarumallugu sapiissuseq taassumanngalu tatiginnilluinnarneq pisariaqartippavut, ingammik ilaqutaq peqqissiminngitsoq ilagiinnut ilaajunnaarsinneqarpat. Guutip imminik najoqqutassiaminillu ilumoorfiginnittut pilluaqqusarpai. Ilumoorfiginninnerlu Jehovamillu tatiginnilluinnnarneq taassuma innuttaasa akornanni nuannaarnerulersitsisarput. — Tussiaat 84:12, 13.

18. Tussiaat 4:5 naapertorlugu oqaatsikkut iliuutsikkulluunniit inussiarniiffigineqarutta qanoq iliussaagut?

¹⁸ Taavami ilaasa oqaatsikkut iliuutsikkulluunniit narrujuummisippatigut? Daavip oqaasii uku maleruarutsigit nuannaartuarsinnaavugut: “Kamassimariannguaritsi, kisiannili ajortuliornasi! Innanngavissinni eqqarsarallaritsi, nipangersimagitsilu!” (Tussiaat 4:5) Oqaatsikkut iliuutsikkulluunniit inussiarniiffigineqarutta akiniaanikkut ajortuliussanngilagut. (Romamiut 12:17-19) Innaraangatta misigissutsivut qinunikkut oqaatigisarsinnaavavut. Tamanna pillugu Jehovamut qinugutta imaasinnaavoq allatut isigilissagipput asanninnerlu aallaavigalugu isumakkeerfiginnikkumassasugut. (1 Petrusi 4:8) Tamatumunnga tunngatillugu maluginiarnarpoq Paulusip siunnersuutaa una Tussiaat 4:5-mik tunngaveqarunartoq: “Kamassimariannguaritsi, kisiannili ajortuliornasi. Seqineq tarrisinaveersiuk narrutsassimanissinni. Diaavululu inissaqarteqinasiuk.” — Efesosimiut 4:26, 27.

19. Anersaakkut pilliutitsinnut tunngatillugu Tussiaat 4:6 qanoq iluaqutigisinnaavarput?

¹⁹ Daavip Jehovamik tatiginnittariaqarnissaq erseqqissarpaa ima erinarsorami: “Pilliutit  piviusut pilliutigisigit [Jehovalu] tatigalugu!” (Tussiaat 4:6) Pilliutit Israelikkut pilliutigisaat aatsaat naleqarput eqqortumik pissutiginiagaqarpata. (Esaja 1:11-17) Anersaakkut pilliutivut Guutimit akuerineqassappata uaguttaaq eqqortumik pissutiginiagaqartariaqarpugut Jehovalu tatigilluinnarlugu. — Atuakkit Ussatit 3:5, 6; Hebræerit 13:15, 16.

20. Oqariartaaseq ‘Jehovap kiinaanit qaammarsarneqarneq’ qanoq paasisariaqarpa?

²⁰ Daavi ima nangippoq: “Amerlasuut oqaraluarput: Kia pilluaammik atugaqartippaatigut? Kiinnannik qaammarsartigut, [Jehova]!” (Tussiaat 4:7) ‘Jehovap kiinaanit qaammarsarneqarneq’ Guutimit iluarisaanertut paasisariaqarpoq. (Tussiaat 89:16) Taamaattumik Daavi qinugami, “kiinnannik qaammarsartigut”, ‘iluaritigut’-mik isumaqarpoq. Jehovap tatigigatsinni iluaraatigut, taassumalu piumasaa malillugu ilioratta nuannaangaarneq misigaarput.

21. Anersaakkut katersuiffimmi maannakkut pisumi tamakkiisumik peqataagutta suna qularutiginngissinnaavarput?

²¹ Daavip nuannaarneq — katersuiffimmi nuannaarnermit nuannaarnarnerusoq — Guutimit pisassani qilanaaralugu Jehova ima erinarsorfigaa: “Nuannaarutissipparma karrinik viinnimillu piisaartut nuannaarnerannit annermik.” (Tussiaat 4:8) Anersaakkut katersuiffimmi maannakkut pisumi tamakkiisumik peqataagutta qularutiginngilluinnarsinnaavarput qamannga pisumik nuannaarneq misigiumaarlugu. (Lukasi 10:2) Tanitanit siulersorneqarluta katersuiffimmi peqataasut amerliartornerat maannakkut nuannaarutigaarput. Katersuiffimmi suliamut nuannaarnartumut tamakkiisumik peqataasarpit?

Guuti tatigalugu kiffartornerput ingerlattuartigu

22. Tussiaat 4:9 eqqarsaatigalugu Israelikkut Guutip inatsisai maleruaraangamikkit qanoq atugaqartarpat?

²² Daavip Tussiaasiani ima naggaserpaa: “Eqqissillunga innassaanga sinilerlungalu, illit [Jehova] kisivit eqqissinartumik qasuersaartikkamma.” (Tussiaat 4:9) Israelikkut Jehovap inatsisai maleruaraangamikkit toqqissisimasarlutillu Jehova eqqisseqatigisarpaat. Assersuutigalugu Salomop naalakkersuinerani ‘Juda Israelilu aarleqquteqanngillat’. (1 Kunngit 5:5) Naak inuiaqatigiit avatangiisigisaat akeqqersimaaraluartut Guutimik tatiginnittut eqqissineq nuannaarutigisinnaavaat. Uaguttaaq Daavitut ‘eqqissilluta innartarsinnaavugut’ Guutip toqqissisimatimmatigut.

23. Suna misigisinnaavarput Guuti tatigilluinnarutsigu?

²³ Jehovamut kiffartornerput ingerlattuartigu. Ilumoorlutalu qinusa, taamaalillutalu misigisinnaavarput ‘eqqissineq Guutimit pisoq siuneqassusernit tamanit annerungaartoq’. (Filippimiut 4:6, 7) Tamanna ilumut nuannaarnangaarami! Jehova tatigilluinnartuarutsigu aamma siunissami toqqissisimassaagut. (w11 05/15-E)

Qanoq akissavit?

• Daavi Absalomi pissutigalugu sumik ajornartorsiuteqarpa?

• Tussiaat 3 qanoq uagutsinnik toqqissisimalersitsiva?

• Tussiaat 4 qanoq Jehovamik tatiginninnitsinnik nakussatsitsisinnaava?

• Guutimik tatiginnilluinnarnerput qanoq iluaqutigisinnaavarput?

[Atuaqqissaarnermi apeqqutit]

[Qupp. 29-mi assiliartaq]

Allaat Absalomimit qimaagaluarluni Daavip Jehova tatigilluinnarpaa

[Qupp. 32-mi assiliartat]

Illit Jehova tatigilluinnarpiuk?